متن نوحه احوالات حضرت ابوالفضل (ع) امان نامه
مجموعه اشعار منتخب و گلچین ترکی و فارسی مناسب متن نوحه احوالات امان نامه و شجاعت حضرت ابوالفضل العباس (علیه‌السلام) از شعرای آیینی معاصر و قدیمی
احوالات امان نامه و شجاعت حضرت ابوالفضل (علیه السلام)
گلمیشم سیزدن بو صحراده حمایت ایلییم
مظهر قدرت یزیده اخذ بیعت ایلییم
سیزلره منصب ویروب صاحب جلالت ایلییم
غیرت و وجدانی هم بی جا مرامی بوشلیون
صاحب اجلال اولون تشنه امامی بوشلیون
تا او نادان صوتینی درک ایله دی سقای دین
بیر سویوخ تر شرمیدن دوتدی منور صورتین
تا بو جریانی اشیتدی سرور خلد برین
محضر والاسینه عباسی دعوت ایله دی
حیدری لحنیلن اول شیری نصیحت ایله دی
امر ایدوب گیت تلین اوسته ویر قولاق گفتارینه
گر صلاحون اولسا ویر بیعت الین سالارینه
راضی اولما پیکرون قارداش بویانسین ثارینه
آلدی رخصت محضر سالاریدن سردار عشق
تلین اوسته عازم اولدی غیضیلن رخسار عشق
کیم گوروب وقرین دیدی تل اوسته شیر نر گلور
یا کی قافی ترک ایدوب عنقای زیبا پر گلور
مرحبی ئولدورمگه یا فاتح خیبر گلور
هیبت عباسی گورجک شمر بیلدی مطلبی
بیلدی بیر دنیایه ویرمز تار موی زینبی
گورجگین اول ابلهی پور غیور مرتضا
سسلدی ای پست و انتر کاسه لیس بی حیا
سن ندن باعث اولوبسان آل حیدر قو رخوشا
اذنیم اولسیدی سالاردیم جسمووی بیر حالته
شیریلر گورسیدی اندامون دوشردی وحشته
من علینون اوغلیام ام البنینه دلبرم
لشکریم یتمیش نفردور لشکره سر لشکرم
عالمین سلطانی اولسامدا حسینه نوکرم
دست بیعت بو جهانداهر پلیده ویرمرم
اصغرون بند قماتین مین یزیده ویرمرم
سرور و شاهیم حسیندور عشقیمه سلطان حسین
روحیمه ریحان حسیندور دردیمه درمان حسین
قان دیور رگلرده هردم آدووه قربان حسین
مکتب عشاقیده شوری حسیندن آلمیشام
بدر آل هاشمم نوری حسیندن آلمیشام
کربلایی نوید آسال اردبیلی
موضوع: حضرت ابوالفضل العباس (ع) امان نامه ,
زبان شعر و شاعر: نوحه ترکی , آسال اردبیلی
------------
امان نامه
شمرون سسی‌کی تللید‌ن اخیامه گلیبدیر
بیلدی هامی عباسه امان نامه گلیبدیر
هی باشلیر امان نامه سوزین باشدان او ظالیم
شرمنده ائدیر، قارداشی قارداشدان او ظالیم
سسلیر باجییم اوغلانلارینین ارشدی هاردا
عباس قمر طلعـت و رعنا قدی هاردا
سروی کی اونی ام بنین بسلدی هاردا
ال چکسین حیسند‌ن یتیر‌م جاه و مقامه
سرلشگر اولوب امر اله‌سین لشگر شامه
شمرون سسی عباسه یتیب غملی چاغێندا
رنگی سارالێـب تیتـره‌دی یاپـراق سایاغێنـدا
باشێـن آشاغـا سالدی حسینین قاباغێندا
قلبی سیخیلیب آتش غیرتد‌ن آلیشدی
خجلت تری آلنیندا نه دیندی، نه دانیشـدی
ماهی دوتولان حالدا گوروب شمس امامت
فرمایش ادیب کی خلف شاه ویلایت
گور کیم چاغیریر چیخ قاباغا ایله ایجابت
ناچار اولوب اجرا اله سین امرامامی
تلله طر‌ف عزم ائتدی او سردار گرامی
اهریمن ایله گلدی ملاقاته سلیمان
تل اوسته مقابیل دایانێب کفریله‌ن ایمان
شمر آچدی سوزو عرض ائله‌دی ای مه تابان
واردیر آرامیزدا سیزیلن حق قرابت
گلدیم ایلیم محضریوه نچچه نصیحت
یوخ مثل و مقابیل سنه شجعان عربده
ممتازسن البتده شجاعتده، اد‌بده
وار نسبتیمیز سنله قرابتده نسبده
من پیر کهنسال و جهان دید‌ه‌م عباس
سالما بو ووجودین خطره موقع حساس
دریاده حسیین ایندی سینیق کشتیه بنزه‌ر
عاقێل بئله موقعده خطردن حذ‌ر ایلر
مندن بو سـوزی ایله قبول اولما مکد‌ر
آخیر بو حسینین سنه لایق ایشی یوخدور
یتمیش نفره شاه اولاسان ارزشی یوخدور
یازدیردیم امان نامه‌وی من ابن زیاده
حاضردی وئره خلعت و انعام زیاده
لذ‌تله گئچین بئش گونو بو دار فناده
آللام سنه بیر کرسی زررین امار‌ت
سیم و زر و قصر و خدم ومیز ریاست
عباسه تکان وردی بو سوز اولدو موثر
غئیظیله گلیب نطقه او سـردار مدبر
لال اول دئدی ای نابخرد پیر مزور
ایبلیسه گلن لعنت، عبیداللاها آزدی
زهرا بالاسی قالدی امانی منه یازدی
آغزون او دیلان دولسون ایا کافر شداد
آخر بو نه سوزدیر دانیشیرسان ائوی برباد
دونیاد‌ن اوتور قارداشیما اتمییم امداد
جان بسله‌میشم فاطیمه نان نمکیند‌ن
حاشا چکم ال ایندی حسینین اته‌گینده‌ن
مکریله گینه وورسوز اگر نیزیه قرآن
حاشا تاپا ایماێما ال سن کیمی شیطان
تز گت دالی باخسان اولوسان قانووا غلطان
من عبدم علی اوغلونا سـن ابن زیاده
سن مست ری و من روش صدق و وفاده
به‌به اولا رحمت آناسی ام بننه
چون دوز سود امه‌ن حامی اولار دین مبینه
خیجلتله گینه گلدی حضور شه دینه
کشف ائتدی امان نامه سوزون کهف امانه
اغیار سوزون بیلدی گلیب یار بیانه
عباسه بو تکلیفی ادیب زادهی زهرا
گئتسن سنه مدر‌کدی امان نامیه اعدا
قارداشلارینی باشینا ییغ ایلمه دعوا
هر حالدا منی اولدوره‌جک لشگر کافر
باری بو حسین اولسه‌ده، سن اولمه براد‌ر
گئتسز اولوسوز کوفه‌ده محبوب خلایق
خلق ایچره ائده‌رسیز بیلیرم جلب علایـق
بیر قصر براز‌نده ویرللر سیزه لایـق
گلسم سیز اولان شهره قوناق، منده مسلم
خولی ائوینه گدمه‌ر‌م اوندا سیزه گللم
سن اولسان اگر کوفه‌ده بیر صاحب مسند
سجادیمی صد جوریله ائدمزله مقید
چکمز باجیلار گورسه سنی خفت بی‌حد
قوللارین آچیب قیزلاریمێن گویلون آلارسان
کیم باش آچوق اولسا باشێنا قاره سالارسان
هئچ کیم غم اوخون قلب پریشانه ساچانماز
چنگ ودف و تنبوریـله پیشوازه قاچـانماز
زهرا قێزی هر سوز دئسه هئچ کیم ال آچانماز
زینب سنی گورسه، آچیلار نطق بیانی
یاخشی دانیشار مفتضح ایلر طلقانی
سن اولسون امیر، امرین اید‌ر دین ایوین آباد
زینداندا علی شیعه‌لری دیلـد‌ن اولار شاد
مختار وفاداری ائده‌رسن اوزون آزاد
گیزلینجه علی دوستلاریندان آلار اقرار
قان آلماغا آمـاده اولار کوفه‌ده مختار
بیرده گزه‌سن گوشه‌ی زیندانلاری قارداش
یاده سالاسان بی‌گنه انسانلاری قارداش
گورسن یاتیشیب مسلمون اوغلانلاری قارداش
آهسته اویات قورخمایالار موژده سسیندن
بلبلری آزاد ائلـه ظولمون قفـسیند‌ن
عزم وطن ائتسه او ایکی بی‌گنه آهو
قویما ائده‌لر غصه‌لی قمری کیمی کوکو
گر مسلمین ایسترسن اولا روحی دعاگـو
آل تازه لباس یاشیل عمامه براد‌ر
نازیله گییندیر اولاری یثریبه گوند‌ر
عبـاسه امان‌نامه سـوزی چوخ اثر ایتدی
شمرون سوزو آسانیدی بیر یول دیدی گئتدی
نوبت ولی شاه اتدیگی تکلیفه کی یئتدی
عباس اوجادان آغلادی سس زینبه چاتدی
قێزلاردا بیلیب مطلبی ال باشینا آتدی
عباس گلوگیر اولوب از بـس که غضبد‌ن
بیر سوز دییه بیلمیر هله سلطانه اد‌بد‌ن
فیکریم دولانیر آیری خیامه بو سبـ‌بده‌ن
سیزده منیله‌ن همره اولون باری بو غمده
جدا گور‌ک آخر نه قیامتدی حر‌مده
اولموش بو خبرد‌ن نگران عتر‌ت زهرا
ایلیر هامیسی زینب اولان خیمه‌ده غوغا
بعضی‌سی دییر گتسه عموم نیلرم آیا
بعضی‌سی دییر باخبرم من اورهگیندن
گئتمز قییدر صدقیله دوتام اتگیند‌ن
زینبده دییر قورخمیین آگاهم از‌لد‌ن
ثابیتدی وفاسیـنده ابوالفضلیم او‌لد‌ن
شانیند‌ن اوزاقدیر ویره اوز پرچمین الدن
عیللت اودو بو مطلبی آسان سانیرام من
تک قویماز حسینی اونی چوخدان تانیرام من
سوز بۇ یئره چکدی هامیسی دوردی ایاقه
عزم ائیله‌دیلر معر‌که‌ی بـزم فراقه
گوردیلر ابوالفضل باشین سالمێش اشاقه
عرض ایلور حسین دوزدی کی لایق دگیلم من
صبر ایله اگر یانماسام عاشیق دگیلم من
زهـرا آناوا چاتماز آنــام ای شه ابرار
قارداش دگیلم نو‌کرووم ایتمور‌م انکار
بو نوکره سن رتبه وریب اتدین علمدار
بو منصبی قارداش سن ابوالفضله وریبسن
الدن آلیسان پرچمی منـد‌ن نه گوروبسـن
سن بیل کر‌مین سالما منـی دشـت و فـلاته
من سالک عشقم دوزهر‌م هر زحماته
سردوشیمـی آچ پرچـمی آل قـوش نفـراته
سرلشگرم آل رتبه‌می سرباز ائله قارداش
قووما قـاپیدان سـاخلا سـرافراز ایله قارداش
ایستیر بیـزی قارداش آیروب تکلیه اعدا
خوار اولدوره بیر بیـر سنی تنـها منی تنها
قصدیم بودو بیر ییرده دوشم تووپراغا شاها
جنجال ائلیین وقتیده دشمن باشیم اوسته
آخر نفسیمده گلسن سـن باشیم اوسته
آگهسن اوزون صحبت عهد از‌لیمد‌ن
اسـراردیلیمـد‌ن هـد‌فیمـد‌ن عملیمدن
هئچ مـن دمور‌م پرچـمیـوی آلما الیمدن
آلسانـدا گینـه نـوکرووم شـانیم آزالماز
اما کر‌م اهلی بیلیرم ویردیگین آلمـاز
وار نوکریوین عتر‌ت پیغمبره نذری
بیر باش ایکی ال اوسته قویـۇب گونـدره نــذری
عالمـده مـگر کیم گورونـوب قـیتـ‌ره نـذری
قیترمه توکوم خون دیلی گوز یاشیم اوسته
بیر گوزده قویۇم قوی ایکی قول بیر باشیم اوسته
قصدیم سحر البتده اولار فاش مسللم
مشگیمده سۇ اولسا پر آچیب خیمییه گللـم
سۇ اولماسا گر سیزدن اۇزاقدا خجیل اوللم
هر یئرده سرافکنده‌دی هر کیم الی بوشدی
شرمـنده اولان نـوکر اۇزاقـدا یاتا خوشـدی
القصه او شیره هیجـان گتـدی بـۇ سـوزلر
قلبینده اولان عشقه دلالـتدی بـۇ سـوزلـر
شیرین‌دیل اۇشاقلارا دل اورگتدی بۇ سوزلر
سسل ندیله گئتمه باشوا بیر دولاناق بیز
قوی پرچمیوین سایه‌سینه دالدالاناق بیز
زینب گوروب عبا‌سیده وار یاخشی عقیده
حاضیردی اوله گئتمیه دربار یزیده
ایلیبـدی دعا ام بـنینه او حمیده
سسلـنـدی آنـا، بــه‌بــه اوزون آغ، ائـوین آبــاد
شاد ائیله‌دی اوغلۇن بیزی، اولسۇن اوره‌گین شاد
یــوز دوتـدی ابــوالفضلـه طـرف زینب اوساعـت
به‌به دئدی ای بحرکـر‌م، کان شجاعـت
قــارداشلیغــا الحـــق واریمیـــش سنــده لیاقـت
باش اگمدون عالمده قوی دوشمنه قـارداش
خوش حالیوه اقبالیـوه، احسـن سنه قـارداش
احسن ادب وغیر‌ت وگفتاروه احسـن
احسن شرف وعیز‌ت و ایثاروه احسن
گفتـاروه، رفتـــاروه، کرداروه احسـن
جانیم بۇ اوجا قامـت، اوزون اللـره قربان
حق شیری آتام، حق دانیشان دیللره قربان
غیرتده بابام حیدره خـوش مظهـریمیشسن
اثنــای خطر حامــی پیغمبـریمیشسن
سن رخت پیمبرده یاتان حیـدریمیشسن
سالدۇن خطره جانیوی پیغمبره خاطر
زهرایه کمک دۇردۇن آتام حیدره خاطر
احضار ائلــه‌دی گــوردوم آتــام بیر گون عقیلی
یاخشی تانیسان سن دئدی انساب اصیلی
واردیــر سنه آز زحمـتیمون اجـــــر جزیلی
عقــد ائــت منـه بیـر دوختر پاکیزه، رشیده
سیماسی عبوس، اننی آلین، قددی کشیـده
من اوز اوزومه فیکر ایلدیـم بۇ سوزی اونــدا
مــردانه صیفات عور‌تی نیلیر بـابام آیا
الان منه روشندی نه فیکر ائتمیش او مولا
آلمیــش بو خییالیله آتــام شیــرزن عـــور‌ت
سن تک بیر اوغول دوغسون او گنجینه عصمت
ایستیــر سنی بیزده‌ن آییــرا آل امیـه
مکتوب امان یازمیش او فرزند سمیه
الان ائشیدیب گئتمـه‌گیــوی نازلی رقیه
لای‌لای دئمـه‌دی اصغــره دۇردی باشین آچدی
فکر ائتدی گدیبسن بیر آز اول چوله قاچدی
یاد ایله شب قتل علی اوز قسمیند‌ن
قـربانین اولوم قــارداش ال اوزمــه علمینــدن
حاضردی رقیه اوپــه الان قـــدمیند‌ن
آغۇشیوه آل گول یوزو گولسون، دیله گلسیـن
دیندیر او شیرین دیل قیزی، قلبی اله گلسین
مرحوم یحیوی اردبیلی
موضوع: حضرت ابوالفضل العباس (ع) امان نامه ,
زبان شعر و شاعر: نوحه ترکی , یحیوی اردبیلی
------------
امان نامه
کوفه دن زیاد اوغلی گوندروب کربلایه بیر نامه یا حسین
قاردشیم ابولفضلی ایستوری عازم ایلسون شامه یا حسین
خیمه لر قباقینده شمردون گورنه نوعله ایلوری صدا
هاردادورباجیم اوغلی بس گلوب کوفه دن گلن نامه سین آلا
ایلیه یزید امرینی قبول تا حیاتی وار بی زوال اولا
قارداشیم ابوالفضله دی وره بیرجواب او ب نامه یاحسین
ایلدی حسینه بو سوز اثرسسلدی ابوالفضلی محضره
گیت بویوردی ای بدر کاملیم اول امیر وسالار لشکره
گرسن اولسان اولماز ایدن جفا بیر نفر عیال میگیره
نطقه گلدی سقای کربلا وار دیدی نه برنامه یاحسین
عرض ایدوب ایاشاه کربلاقارداشون اولاجانوا فدا
آشکارا ایله دلده مطلبون تا گوروم مرامون ندوراخا
دیموسان مگرقارداشوندان ای شهریارمن ایلوسن رها
قطعه قطعه اولسامدا گتمرم آند اولابوایفامه یاحسین
من بو دینی دنیایه ساتمارام محکم ایلرم دین پایه سین
ورمرم الیمدن بو منصبی حق ایده منه قطع سایه سین
رد ایده جوابین ویا سالانطقدان بیانین او آنیده
گستره حسینه وفاسینی سیر ایده اوهنگامه یا حسین
استاد امینی
موضوع: حضرت ابوالفضل العباس (ع) امان نامه ,
زبان شعر و شاعر: نوحه ترکی , امینی
------------
امان نامه
گئجه گوندوز اهلِ بیتین سرِ پاسیبانی قارداش
سنه شمر نامه گتدی آتامین نشانی قارداش
بو بلالی چولده سوز یوخ اولاسان سپاهه سرهنگ
سن اولان مکاندا وورماز باشیما بو کوفیان سنگ
منیم اوسته اولما قارداش درِ بارگهده دلتنگ
بو حسین خدایه وئرسین گرک امتحانی قارداش
ووراجاق سنانِ ظالم باشیمی اخا سنایه
ائدجک او کوفه اهلی باشیمی داشا نشانه
بو کسیک باشیم براد‌ر باتاجاق دوباره قانه
اولاجاق او نیزه باشی باشیمین مکانی قارداش
اولاسان بو کوفیانه آتام اوغلو سنده سردار
نه یانار خیامِ دیبا نه چوله قاچار بو قیزلار
نه مینر سنیق کجاوه نه باجیلارون قان آغلار
نه گئدر دمشقه زینب نه یانار زبانی قارداش
نه جنازه‌می کفنسیز قویاسان قالا براد‌ر
نه خیامید‌ن حرملر گله قتلگاهه یکسر
گئده جک باشیم جداده قالاجاق برهنه پیکر
بو حسین وطن ائدیبدیر بئله غم فضانی قارداش
نه رقیه آت دوشونده دولانار بلا چولونده
تاپاجاق برهنه نعشی اخی کربلا چولونده
علی‌اکبر‌یمدی قربان حقه بو منا چولونده
جمع ائله مگر سوزوم وارباشا شامیانی قارداش
جواب
منی قووما سن قاپیندان شهِ کربلا آماندیر
علی‌اصغر‌ین باشینا منی خیمه ده دولاندیر
علی‌اکبره غلامم بو قاپیندا دالدالاندیر
ایلرم تصدُّق اکبر باشینا بو جانی قارداش
ازل آل بو تیغی الدن یولا سال منی شهنشاه
گئد‌رم نجف چولونده ائد‌ر‌م بابامی آگاه
دیر‌م حسین قوووبدیر قاپیدان منی چکیم آه
اوجالار درِعلی دن دیلیمین فغانی قارداش
وئر اجازه قانه اوَّ‌‌ل بویانیم بو کربلاده
سرِ پاکینی حسینیم گوره بیلمر‌م جداده
کسلر اوزون بو قوللار قالا پیکریم آرادا
توکلر فراتین اوسته یره لخته قانی قارداش
سنه حضرتِ ابوالفضل ائد‌ر‌م بو دردی اظهار
نئچه ایلدی من دخیلم سنه ائت نظر علمدار
یاپیشیبدی دامنوندن گوزو یاشلی خیردا قیزلار
ائلدیم بو عشقی (ثابت) سنه بیرده آنی قارداش
مرحوم ثابت
موضوع: حضرت ابوالفضل العباس (ع) امان نامه ,
زبان شعر و شاعر: نوحه ترکی , ثابت
------------
امان نامه حضرت عباس ع
غم لشگری لشگرگه اسلامه گلیبدیر
سس دوشدی ابوالفضله امان نامه گلیبدیر
تل اوسته چخیب شمر خطا دیده خطاکار
آوازیله سسلندی ابوالفضلی او غدّار
گلدی اوجا بویلی او اوزون قوللی علمدار
تعظیم ائدیب عبّاسه او بی‌دین ستمکار
برنامه وئریب آشدی باخیب بُهتیده قالدی
تز پارچالادی چکمه‌سینین آلتینا سالدی
اولسیدی اگر شهد‌ن اجازه اویاناردون
بو تیغ شررباریله قانه بویاناردون
حیرتله او بی‌دین الینی بیربیره ووردی
دال دالی گئدیب ساق دیزی اوستونده اوتوردی
شاهین او شجاعتلی علمدارینه باخدی
شهلا گوزونه قدّینه قوللارینه باخدی
عرض ائیله‌دی عبّاس ائشیت موعظه مندن
اوز نفسیوه رحم ائیله ال چک بو حسین دن
دنیا بو حسین‌سیز دئدی بیر کلمه‌ی لادور
چوخ موعظه ائتمه بورا میدان بلادور
آیریلدی گلیب خیمه قاباغینده دایاندی
ایستیردی گئده محضر سلطانه اوتاندی
سالدی آشاغا باشینی جوش ائیله‌دی غیرت
من حدس ائدیر‌م گلمه‌دی چون چکدی خجالت
شاه شهدا بیلدی بولوتلار کیمی دولدی
گلدی اوجا بوی قارداشیلان قول بویون اولدی
قارداش دئدی مانع دگیلم گئتسون ابوالفضل
من بی‌کسی بی‌یاور‌ی ترک ائتسون ابوالفضل
من باغلامیشام روز ازل اولمگه پیمان
سن سالما بلایه اوزینی تازه جوانسان
مندن نگران اولما مرامه چاتارام من
دونیا سوزونون داشینی باشدان آتارام من
صبّاح بو بیابانیده قانه باتارام من
شئشماهه بالام سینه‌ده راحت یاتارام من
عرض ائیله‌دی یا سیّدی قلبیمده یارام وار
نوکرلری قوومازلار اگر قووسون هارام وار؟
درک ائتدی امان نامه سوزون ماه مدینه
یغدی باشینا دربه‌در اطفالی سکینه
سسله‌ندی آچین باشیزی باشیزدا بلا وار
عبّاس عمومی کرب و بلادان آپارورلار
قیزلار گوزی یاشلی هامودان دوشدی قباقه
گلدی او خانیم، سودامری آلدی قوجاقه
بیردن هاموسی سسله‌دی لای‌لای علی اصغر
گئتسه عمومیز وای بیزه وای علی اصغر
دورموشدی همان یئرده اوزون قوللی علمدار
بیردن آقانی دوره‌له‌دی خیرداجا قیزلار
بیر ناله بلند اولدی سکینه اورهگیندن
اگلشدی یره دوتدی ابوالفضل اتگیند‌ن
عبّاس عمو گئتمه بو یانان لب‌لره خاطر
قویما بیزی چوللرده علی اصغره خاطر
فوراً آلیب آغوشه الین باشینه چکدی
جوش ائیله‌دی غیرت، گوزونون یاشینی توکدی
آیریلمیوب هر قدر بو قوللار بدنیمد‌ن
آیریلمارام ای نازلی سکینه بالا سندن
گون باتدی بلا آرتدی گوروندی مه تابان
اولدوزلاریلان اولدی سماوات چراغان
سوندوردی چراغلاری حسین قلب‌لر اسدی
سسلندی گئدین خالِق یکتا منه بسدی
صبّاح قیامتدی بوصحرای بلاده
کیم قالسا گره‌ک غرق اولا دریای بلاده
سس دوشدی باشیندان داغیلیب چوللره لشگر
قرخ آلتی نفر قالدی، اوتوز بئش قارا معجر
باخدی داغیلان لشگره آواره رقیّه
توکدی گوزونون یاشینی بیچاره رقیّه
یاندی گنه مشعل‌لر ائدیب حجّتین اتمام
گوردی دایانیب تیتر‌ییر عبّاس دل‌آرام
سسله‌ندی زُهِیر ایله حبیب ابن مظاهر
ای فاطمه دلبندی کی ای طیّب و طاهر
سن غرق اولاسان قانلی بو دریاده حسینیم
بیز عازم اولاق مسکن و مأوایه حسینیم؟!!
صبّاح نه دییک حضرت زهرایه حسینیم
سندن سورا عار اولسون او دنیایه حسینیم
شاه شُهدا اللری قوینوندا دایاندی
شمعین باشینا دسته‌ی پروانه دولاندی
ائتدی بیر اشاره چکیلیب پرده ظلمات
گؤرسندی او دم گوزلرینه روضه جنّات
امر ایلدی اصحابه اگر اولسا قبیلوز
تا اهل عیالی آپارین ساکین ائدین سیز
عورتلروزی قویمیون عُدوان آراسیندا
صبّاح قالالار ورطه توفان آراسیندا
گلدی هاموسی اهل عیالین ائدیب احضار
چیخدیلا سراسیمه او عصمتلی خانیملار
سسلندیله ه حضرت بویورور حاضر اولون تز
بو قورخولی چولد‌ن سیزی بیر یانه چکک بیز
بو کلمه‌نی درک ائتدی او غیرتلی خانملار
بیردن هاموسی آغلادی جوش ائیله‌دی قانلار
ناله گئجه‌نین عالمی قوزاندی سمایه
عورتلر او شاهین چادیرین آلدی آرایه
سسلندیله ای عالَمه امید حسین‌جان
رحم ائیله بیزی قوما قاپوندان سنه قربان
رحم ائت بو آدامسیزلارا پیغمبره خاطر
قوما بیزی شئشماهه علی اصغره خاطر
سسلندی چادیردان او زمان شاه شهیدان
صبّاح قوپاجاقدور بو بیابانیده توفان
قصدیم بودی سیز قالمیاسوز قان آراسیندا
قانلار توکولن وقتیده توفان آراسیندا
درک ائتدی خانملار بو سوزی آغلادی های‌های
سسلندیله ایوای حسین وای حسین وای
بیز گتدیک اگر جمع پریشان هارا گئتسین؟
زینبده آدامسیزدی حسین‌جان هارا گئتسین؟
بو السیز آیاقسیز بو سوسوزلار هارا گئتسین؟
بی‌کس آتاسیز خرداجا قیزلار هارا گئتسین؟
بیز گتدیک حسین نازلی رقیّون هارا گئتسین؟
قارداشسیز او ایستکلی رقیّون هارا گئتسین؟
زینب یانان اودالاردا دوشوب یاننیق حسینیم
چؤللرده قالیب قول قولا باغلانیق حسینیم
مرحوم منعم اردبیلی
موضوع: حضرت ابوالفضل العباس (ع) امان نامه ,
زبان شعر و شاعر: نوحه ترکی , منعم
------------
جواب دادن حضرت ابوالفضل (علیه السلام) به شمر لعین
یا شمر گلوبسن سالاسان شیری کمنده
وار بولموسن ایمان و ادب عاطفه منده
زهرا بالاسین بوشلاسین عباس وفادار
ائتسون اوزونی زادهٔ مرجانیه بنده
یا شمر حسین ابن علی نوکری یم من
مظلوم آقامین یاوری سر لشگری یم من
عباسم او مولایه نظر کرده غلامم
بیل حیدری یم حیدری یم حیدری یم من
یا شمر جهانین شرف ناسی منم من
ایستکلی باجیم زینبین عباسی منم من
چون حیدریم حیدریم حیدریم من
حیدر الینون خنجر الماسی منم من
یا شمر سپهر ادبین اختری یم من
گنجینهٔ فضل و شرفین گوهری یم من
سن سفرهٔ نامردده کاسه یالیانسان
من حیدریم حیدریم حیدری یم من
یا شمر علینون باغینون نوبری یم من
دین لشگرینون حمزه سیم جعفری یم من
بیر کلمیه دل آچما حضوریمده دایانما
من حیدریم حیدری یم حیدری یم من
استاد کریمی مراغه ای
موضوع: حضرت ابوالفضل العباس (ع) امان نامه ,
زبان شعر و شاعر: نوحه ترکی , کریمی مراغه ای
------------
امان نامه شمر لعین به حضرت عباس علیه السلام
عصر تاسوعا قریب شام عاشورائیدی
چخدی لشکردن کناره شمر شوم نابکار
یوز دوتوب سمت سپاه شاه دینه دادیله
سسلدی أَینَ بنو أُختی؟ سوزون ایتدی کرار
بولدی شمرین مقصدین پور رشید مرتضی
باشینی سالدی اشاقه با کمال انکسار
شاه دین یوز دوتدی عبّاسه بویوردی یا أَخا
شمر ذی الجوشن سیزی سسلور گورون نه قصدی وار؟
ایلدی عبّاس فوراً امر شاهه امتثال
خارج اولدی خیمه لردن مرتضایه یادگار
یوز دوتوب اکراهیله شمره دئدی قصدون ندی؟
وئردی عبّاسه بو طرزیله جواب اول کین شعار
هم قبیلم دور آنان سن قتله یتسن تا وارام
اوز قبیلم ایچره اولّام بو عملدن شرمسار
گئت گوتور قارداشلارون گَل ملحق اول بو لشکره
اول سپه سالار لشکر واردی سنده اقتدار
هر ریاست ایسته سن وار سویسن هر بیر منصب آل
سر سپه حتّی سنه اوز شغلون ایلر وا گذار
آلمیشام کتباً امیریمندن امان نامه سنه
یوخ تعرّض سیزلره گر اولسا هر شهر و دیار
تا ایشیتدی بو سوزی پور غیور مرتضی
تیتردی اعضاسی اولدی طبعینه چوخ ناگوار
سویلدی ای بی حیا دنیاده عار اولسون سنه
شرم ائدورسن اوز آنامدان ایتمیسن زهرادن عار
فاطمه اوغلون قویوم یالقوز گلوم سردار ئولوم؟
یوخ بو منصبده شرافت ، وار مذلّت زینهار
نه امان نامه نه منصب نه ریاست نه جلال
بیر گونوم اولسا حسین سیز عالم اولسون تار و مار
سن خیال ائتمه حسینه قارداشام سر لشکرم
بیر غلامم گر قبول ائتسه بو شاه تاجدار
طول وئرمه صحبته قورخار حسینون قیزلاری
خیمه لردن گورموسن زهرا قیزی زینب باخار
فکریمه بیر سوز گلور نوعاً چوخ استبعادی یوخ
تا خیمده بو خبر نشر اولدی تاپدی انتشار
شمر عبّاسیله میداندا ائدنده گفتگو
خیمه لرده زینبه یوز وئردی حال انکسار
یوز دوتوب درگاه حقّه یادگار فاطمه
عرض ائدوب ای دادگر ای مهربان پروردگار
قارداشیم عبّاسی آیا بس آنام امّ البنین
بسلموب اولسون حسینه بیر بئله موقعده یار
شمر آییرسا بیربیریندن بو ایکی قارداشیمی
وای منه اولّام یقیناً تا وارام دنیاده خوار
شمر گوردی ایلمز عبّاسه افسانه اثر
شاهباز اوج همّت کرکسه اولماز شکار
او قیتدی لشکره عبّاس خجلتدن ولی
شرم ائدردی بیرده سمت خیمیه ائتسون گذار
شه توجّه ائتدی لطفاً با وفا سردارینه
گوردی عبّاسه وئرور دنیای دون بی حد فشار
آز قالور ئولسون خجالتدن او غیرت معدنی
ایلدی احضار حضوره قیلدی رأفت بی شمار
هر سوزی گرچه امامون قولیجه اولماز دئماخ
وار ولی شهرت بو سوزده منده ائتمم استتار
ایتدی فرمایش ابوالفضله غریب کربلا
میلون اولسا گیتمگه قارداش واروندی اختیار
بولمورم بو سوز ابوالفضله نقدر ائتدی اثر
دوشدی توپراقه قدوم شاهه اولدی خاکسار
عرض ائدوب مولا قاپوندان قوما بیر عبدم ذلیل
اولماسام قابل ، قبول ایله واریمدی اعتذار
سیّدی سنسیز حیاتی نیلورم دنیاده من
خوش دگل سندن صورا عمر اولسا گیرم صدهزار
فرض ائله من بیر غلامم شاهزاده اکبره
تا ائدوم احراره بیله بندلیقدان افتخار
وئرماقا پایانه اوز پیمانیمی خوشخوانیله
ایسترم توفیق حقدن عهدیم اولسون استوار
خالقیم قیلسون عطا سالم بدن آسوده دل
دلنشین اولسون سوزوم چون شعر «شأنی» آبدار
مایلم بیر اربعین اوچ اکبر آدلی نوحه خوان
اتّفاقیله نصیب اولسون او شش گوشه مزار
مرحوم شانی
موضوع: حضرت ابوالفضل العباس (ع) امان نامه ,
زبان شعر و شاعر: نوحه ترکی , شانی
------------
امان نامه
از اشعار چاچ نشده مرحوم استاد حسینی سعدی زمان
ای جماعت من حسینه دست بیعت ویرمیشم
ظالمه باش اگمیم قول شرافت ویرمیشم
بو گیچن گون ویرمیشم بو چولده من بیر امتحان
ایتمیشم ثابت فدادوردینیمه مین نقد جان
زاده مرجانه کیمدورتا منه ویرسون امان
من طلاق منصب و جاه و ریاست ویرمیشم
بیر امان نامه گتورموشدی منه شمر شریر
ال چکم قرأن ناطقدن دوتام دینی حقیر
من دیدیم هند اوغلی أل هاشمه اولماز امیر
من حسین راضی اولان امره رضایت ویرمیشم
سیز ایله تولانموسوز جاه و مقام و منصبه
ای جماعت پی أپارمورسوز بو واضح مطلبه
ایلیوب دینی یزید پست فطرت ملعبه
من اودور اول پست فطرتدن برائت ویرمیشم
قالماقین یوخ ارزشی تا دینی دنیایه ساتام
دوتموشام تصمیم من باش فکرینی باشدان أتام
اهل اسلامی آیلدام قانلی تپراقدا یاتام
تا جهان وار اهل اسلامه مزیت ویرمیشم
سیز دگلدوز نامه یازدوز ای ستمگرلر تمام
فاطمه اوغلین چافوردوز تا سیزه اولسون تمام
ال کمکلیقدان چکوب ایتدوز قتاله اهتمام
قولیمه من صاحبم چون قول نصرت ویرمیشم
بلموسوز نراد و خمار و ستمگردور یزید
منکر قرأن و قانون پیمبردور یزید
کافر مطلقدی مست خمر و ساغر دور یزید
من ولی احیای قرأنه ضمانت ویرمیشم
جنگه رخصت ویرمیوب سلطان بحر و بر منه
یوخسا اولماز هم نبرد اولسون هامی صفلر منه
اورگدوب جنگی فنونی اوز أتام حیدر منه
امتحان زور و بازو و شجاعت ویرمیشم
زانیه هند اوغلی نامه گوندروبدور
هر یره که منم بو گون خلیفه حضرت پیغمبره
قبریدن گر دورسا پیغمبر دیر اول کافره
أل هنده هاردا من اذن خلافت ویرمیشم
قویمادوز قالسین سودا بی أبرولر أبرو
خوردا جا قزلار سوسوزدان یاندی ای قوم عدو
باشیمی ویرم بها ویرسوز اگر بیر مشک سو
قیزلارا سو وعده سی من ای جماعت ویرمیشم
مرحوم حسینی سعدی زمان
موضوع: حضرت ابوالفضل العباس (ع) امان نامه ,
زبان شعر و شاعر: نوحه ترکی , حسینی سعدی زمان
نظرات (۰)
هیچ نظری هنوز ثبت نشده است