متن نوحه شجاعت حضرت ابوالفضل العباس (ع)

مجموعه اشعار مذهبی ترکی و فارسی منتخب مناسب متن نوحه احوالات شجاعت حضرت ابوالفضل العباس علیه السلام از شعرای آیینی معاصر و قدیمی

شجاعت حضرت ابوالفضل (ع)

 

اهلِ شامون یادلاریندیدی هنوز

ایلمشدی نه هنر ، بوندان بروز

 

گوردیلر بیر گون تمامی شیخ و شاب

بیر جوانِ نامدار ، اوزده نقاب

 

چخدی صفدن خارجه او صف شکن

سِنّی اولمازدی فزون اون یدّیدن ۱۷

 

تا مبارز ایستدی اول نوجوان

گلمدی میداننه بیر پهلوان

 

سطوتی اولموشدی واضح لشکره

هیبتی سالمشدی وحشت دللره

 

واریدی دشمن صفنده بیر نفر

ابنِ شعشعاء آدلی ، گردِ نامور

 

یوز دوتوب ابنِ ابی سفیان اونا

بولدی بو امری ز بس آسان اونا

 

امر ایدوب قوی عرصهء جنگه قدم

بو جوانین تیز ، وجودین قیل عدم

 

سویلدی لشگر بولور یکسر منی

رزمده مین آتلیه همسر منی

 

اولماز آیا بو منیم چون عار و ننگ؟

ایلسم نورسته بیر طفلیله جنگ

 

وار علاوه یدّی اوغلوم ، نامدار

هر بیری مرد افکن و خنجر گذار

 

ایندی گوندرّم بیرین میدانه من

جزئی بیر رزمه اودور اَولی ، نه من

 

اوّلی گلدی ایچوب جامِ اجل

سسلدی دورما ایکیمجی سنده گَل

 

هر بیری گلدی دوشوب آتدان یره

ملحق ایتدی یدّی سنده بیر بیره

 

چکدی چوخ طول ، هر یدّی نفر

آز زماندا دوزخه ایتدی سفر

 

ابنِ شعشعاء گوردی ، اولدی کار ، زار

ایلدی غیظیله عزمِ کارزار

 

کین اوزیله باغلادی محکم بلین

ئولدوره اوغلانلارینون قاتلین

 

بغض و کین اولدی سبب ، گلدی جسور

شیرِ هیجا رزمنه ، کلبِ عقور

 

ویرمدی مهلت حریفِ نامور

ایلسون میداندا اظهارِ هنر

 

ایتدی اوّل حمله سینده سر به زیر

دوندی یدّی سگّز اولدی ناگزیر

 

ایتمدی جرأت داخی بیر جنگجو

اولسون اول جنگی جوانه روبرو

 

پس علی المرتضی ، میرِ هدا

اول شجاعت معدنین ، قیلدی ندا

 

تا کنار ایتدی جمالندن نقاب

ابرِ ظلمتدن گوروندی آفتاب

 

گوردولر مهرِ جهان آراسیدور

اوز دلاور اوغلی ، اوز عبّاسیدور

 

دوشدی یکسر دوست و دشمن حیرته

پهلوانلار مات اولوب بو قدرته

 

مطلبیم هاردیدی گور گیتدی هارا

هاردا باشلانمشدی سوز ، یتدی هارا

 

ایتسه توفیقین منه خلّاق ، یار

خامم ایلر دفتر اوسته دُر نثار

 

اولماسا اوندان توجّه مختصر

کوشش و جدّیتمده نه اثر

 

ایلرم بیر بیله سعی و اهتمام

تا بو جزئی خدمتیم اولسون تمام

 

مرحوم استاد حسین شأنی

منبع مجموعه کانالهای مدح و مرثیه

موضوع: حضرت ابوالفضل العباس (ع) شجاعت ,
زبان شعر و شاعر: نوحه ترکی , شانی

 

------------

 

در شجاعت حضرت ابوالفضل (ع)

 

فریاد او وقتدن آلوب عبّاس حُسام اله

یوز قویدی رزمگاهه سالوب کونه ولوله

 

ایتدی طلوع شرقِ خیمدن چو آفتاب

نوری ووراردی طعنه سِراجیله مشعله

 

چگیننده بیر سو مشگی که ویرمیشدی اهلِ بیت

بیر الده دین لواسی ، ایدوب عزم ، مقتله

 

هر دم گلور بیر آز دایانور قیزلارا باخور

بو فکریله که ایتمیه لر خوف و هروَله

 

گه نغمهء حجازیله تکبیر سسلنور

صوتی سالوردی انفس و آفاقه زلزله

 

گلدی دایاندی غیظیله قلبِ سپاهیده

گوردی ایدولّه لشگرِ کفّار هلهله

 

آچدی ازل لِسانین او ناصِح نصیحته

ایتدی خطاب غیظیله اول قومِ باطله

 

ای کوفیان گَلون سو یولون شرم ایدون آچون

آل اللّهین دوشوبدی بو گون امری مشگله

 

بو نظمی بر هم ایتماقا وار منده اقتدار

ظغیان ، جفا و ظلمیده سیز ایتمیون بیله

 

گر آچماساز فرات یولون ای سپاهِ کین

واضحدور اوندا سیزلره معنای مسئله

 

بیر حمله ده بو گون پوزارام بو صفوفی من

سالّام سیزی هلاکته بیر ضربِ تیغیله

 

سسلندی بیر نفر ، هامی دنیانی دوتسا سو

بیر قطره ویرمروخ بو شهنشاهِ اَعدَله

 

بو شرطیله یتر سو بناتِ رسالته

هند اوغلونی حسینده بو گون پیشوا بوله

 

ناگه ایشیتدی بو سوزی عبّاسِ نامدار

ایتدی خطاب او کافرِ غدّاره غیظیله

 

مین دفعه باشیمیز کسیله بیعت ایتمروخ

قول قویماروخ جهاندا بو امرِ معظله

 

امّا فراتی آلماقا من قادرم اوزوم

چکمز او قدر الیمده بو بیر امر ، فاصله

 

روبه صفتلره ایلیوب حمله ناگهان

گویا قیروبدی بیشه ده ضرغام ، سلسله

 

هی الدی ، قولدی ، باشدی بدندن کنار ایدور

بیر کسده قدرت اولمادی گلسون مقابله

 

هر کیم اولور مبارز ، ایدور جامِ مرگی نوش

اود سالدی قلبِ شمر و سَنانیله بَجدله

 

یردن عروج ایدوبدی ، گویه بانگِ الحذر

عبّاسی تا گوروب قشون اهلی او سهمیله

 

کیمدور دیوبله بیر بیره بو صاحبِ هنر

یوخسا که لافتادی بو ، شمشیر آلوب اله

 

صفلر پوزولدی یاتدی علملر ، قوشون قاچوب

شورِ قیامت اولدی عیان قومِ ارذله

 

آتلار ایاقلاریندا قالاردی پیاده لر

بیر عدّه قالمیوب او قدر قورخودان ئوله

 

هر دم دییردی قاچمیون ای اشقیای شام

سلطانیم اذنِ جنگ منه ویرمیوب هله

 

سو یولّارین او کیمسیه سدّ ایتمسوز که او

معنادی جمله آیهء قرآنِ منزله

 

بیر شاهدور که سینهء زهراده بسلنوب

جانِ علی سلیلیدی ، هم ختمِ مرسله

 

بیر شاهدور که روزِ ولادت او سَروره

امرِ خدای حقّیله جِبریل اولوب لَله

 

ایتدی دوباره حمله آلوبدور شریعه نی

نصب ایلدی لواسینی سقّای قافله

 

پرچم اسور ویرور دلِ عبّاسه چوخ شعف

حسرتله بیر نظر سالوب آبه او حالیله

 

دولدوردی اوجونا سوئی تا اینکه میل ایده

قلبی آلشدی یاندی گینه نارِ نسگله

 

گویا سالوبدی یادینه نازلی رقیّه نی

سو ایچمدی توکوب یره چخدی او وضعیله

 

چگیننده مشگی محکم ایدوب چیخدی نهردن

فکر ایتدی هانسی سمتدن او خیمیه گَله

 

لابد سالوبدی شاهرَهین نخله زاریدن

تا قیزلارا سوئی یتوره قلبی دینجله

 

بیر ظلم ایدوبله صاق قولی تندن اولوب جدا

گوردی یَمینی قطعیدی یوخ یر تأمّله

 

شمشیری آلدی صول اله بیر قدر جنگ ایدوب

تحسین ایدوب یَلانِ ستم پیشه بو یَله

 

ناگه اولوبدی صول قولودا ظلمیله قلم

مشگی آلوبدی دیشلرینه ایتمیوب گِله

 

بیر سنگلده ناگه ایدوب پاره مشکینی

سو آخدی سالدی کشتی امّیدینی گِله

 

قولّار گیدوب او حالیله مشغولِ جنگیدی

بیر اوخ قویوب کمانه او ابناده حرمله

 

اوخ آچوب پر اصابت ایدوب مه جبینینه

ال اولمیوبدی گوزلرینون قانینی سیله

 

نوفل یتوب او حالتیله الده بیر عمود

بیر ظلم ایدوب یخیلدی علمدار مقتله

 

یوز دوتدی خیمیه دئدی قارداش دایانما گَل

طوفانه دوشموشم چَکنیم یوخدی ساحله

 

اوخدان آچوبدی پَر بدنیم شاهباز تک

پر ورّام اوجِ عشق و محبّتده شوقیله

 

ای نیّرِ سپهرِ وفا چیخ خیامدن

گَل سایه سال سو اوسته باتان بدرِ کامله

 

بو اشتیاقیده واریدیم جان ویرن زمان

رخساروی گوروب یتیشم فیضِ اکمله

 

تبدیلِ یأس ایلمه سن بو امیّدیمی

گَل باشیم اوسته مقصدیمی قوی اله گَله

 

بو رسمدور که بلبل اولور چوخ علاقه مند

شوریله دردِ دل دیه گلزاریده گُله

 

هر کیم گوره وجودیمی گُل تک ورق ورق

تشبیه ایدر بو اوخلاری بیر دسته سنبله

 

جسمیم خدنگیله یازیلان بیر کتابیدور

بو قان مسیری اوخشوری سینمده جدوله

 

یازما (امینی) مطلبوی اختصار ایله

قورتار بو شرحِ محنتی تنگ اولدی حوصله

 

باب الحوائجه دئ خلوصیله دردیوی

آغلار گوزیله ایسته بو اشعاروه صله.

 

جناب آقای حاج مجید امینی

منبع مجموعه کانالهای مدح و مرثیه

موضوع: حضرت ابوالفضل العباس (ع) شجاعت ,
زبان شعر و شاعر: نوحه ترکی , امینی , حاج مجید امینی

 

------------

 

شجاعت حضرت ابوالفضل (علیه السلام)

 

سس دوشدی میدانه شیر دلاور گلور

صفلری سیندیرماقا حیدر دیگر گلور

 

قاش گوزونون صیدینه یوسف مصری اسیر

باخ اوزون اللرده بیر قرمییزی پرچم اسیر

امر امامینده بو تابع فرمان اولوب

علقمه قصدینده تک راهی میدان اولوب

سس دوشدی میدانه شیر دلاور گلور

صفلری سیندیرماقا حیدر دیگر گلور

 

اولدی مقابل دیدی عاشق آزادی ام

مین بیله لشگر گله جان بکف آماده ام

ذلته باش اگمرم آند اولا عشق آدینه

نوکری ام من ئوزوم فاطمه اولادینه

سس دوشدی میدانه شیر دلاور گلور

صفلری سیندیرماقا حیدر دیگر گلور

 

هاردادی فرماندهوز آلماقا جان گلمیشم

مکتب حیدرده من درسیمی ئدورگن میشم

مرکب غیرت مینیب مشک و علم دوتموشام

سوز دیمیشم رهبره بال علم آچمیشام

سس دوشدی میدانه شیر دلاور گلور

صفلری سیندیرماقا حیدر دیگر گلور

 

جان ویررم یاحسین میل وصال ایتمیشم

دینه گوره باش اوجا بذل امام ایتمیشم

رهبره تقدیم ایدم باشیمی زیبنده دی

سسلنرم تا ابد عشق حسین زنده دی

سس دوشدی میدانه شیر دلاور گلور

صفلری سیندیرماقا حیدر دیگر گلور

 

هر نه امان یولاساز جیررام امان نامه نی

اذن اولا خوار ایلرم حاکم خود کامه نی

تک تکوزه روز و شب خوابی حرام ایلرم

دایره عالمی سیزلره دام ایلرم

موضوع: حضرت ابوالفضل العباس (ع) شجاعت ,
زبان شعر و شاعر: نوحه ترکی

 

------------

 

شجاعت حضرت ابوالفضل (علیه السلام)

 

منم عباس نام آور، که مندن کفر لرزاندور

هراسیمدن یلان پردل عالم، هراساندور

 

نهنگ بحر قهر حضرت یکتای قهارم

فروغ مطلع باقی وجه اللهه انوارم

محل و مظهر تقدیر و صنع حی دادارم

منیم بو حول قوم، هر چه اولسا، صنع رحماندور

 

شعاع نور پیغمبر، منم ماه بنی هاشم

بو معراجیمدی، میدان بلایه اولموشام عازم

او سردارم که هیجاده منه لشگر دگل لازم

که هر مهلک معارکده منه عون الله، اعواندور

 

منم فرزند دلبند علی بن ابیطالب

نهنگ قلزم سطوت، هژبرالسالب غالب

شجاعتده بو گون شیر خداونده منم نائب

منه دعوا علومینده معلم، شاه مرداندور

 

منم ضرغام بن ضرغام، شیر کردگار اوغلی

منم صمصام بن صمصام، صاحب ذوالفقار اوغلی

منم کل معارکده علینون شهسوار اوغلی

شعاع شهرت تیغیم، بو شمس آسا نمایاندور

 

بو های و هوی لشگردن من ایتمم باک و اندیشه

که یکسر ریشه بیخ و بن کفره منم تیشه

هراسیمدن دوشر هیجا گونی، بهرام، تشویشه

منیم قهر و مهابت سطوتیمدن لرزه کیواندور

 

منیم یوخ واهمم، بو صوت طبل و ناله نی دن

نه باکیم وار بو گیر و دار و های و هوی و هی هی دن

گرک محروم ایدم سعداوغلونی، سلطانی ری دن

که الآن امر و نهییم، ناهی احکام فرماندور

 

نه بیله چوخ چالورسوز طبل جنگ و نای رزمانه

مگر عباس ئولوبدور؟ سسلنور دشمن دلیرانه

حریفیم کیمدور؟ اقدام ایلسون مردانه میدانه

بو عباس علی، بو تیغ، بو پهنای میداندور

 

اولیدی حکم اگر درگاه شاهنشاه والادن

یر اوزره زنده قویمازدیم قالا بیر نفس اعدادن

گچوردوردوم ته تحت الثرای ملکین، ثریادن

جهانی برهم ایتمک، دست تقدیریمده آساندور

 

اگر قهریله روز جنگ ورسام چنگ شمشیره

گروه شامیانه شام تک عالم اولور تیره

گتورمز روبهان کوفه طاقت، حمله شیره

که من شیر غرانم، آتام هم شیر غراندور

 

او دریایم که ذخارم، ولی بیتاب و صبرم من

او ضرغامم که غرانم، دم هیجاده ببرم من

او عباسم که ببر اسمم، پلنگ افکن، هژبرم من

منیم رزمیمده شیر و دیو و جن و انس، یکساندور

 

او شیرم من که شیر و ببر اولور هیجاده نخجیریم

احاطه ایلیوب آفاقی سهم برق شمشیریم

سیزی ئولورمگه یکسر واریمدور حول تقدیریم

و لیکن مانعیم فرمایش شاه شهیداندور

 

اگر چه سروران دهره، میر تاجدارم من

و لیکن بو حسینه چاکر و خدمتگزارم من

حضور باهرالنورینده عبد جان نثارم من

حیات جاودانیمدور، بو ئولمک راحت جاندور

 

بو نه بیداددور ای لشگر بی رحم و کین تواءم؟

سیزون بی حد ظلموزدن دونوبدور ساحت عالم

بو گون شهزاده قاسم وضع عیشین ایلدوز برهم

کف کف الخضیب آسا، کف داماد الواندور

 

نهال اکبر شهزاده نی یخدوز صنوبر تک

بدن صدپاره، تارک شق القمر زخم فرق حیدر تک

احد دعواسیدور، شبه نبی ده خود پیمبر تک

سالوبسوز عرش زین اوستن، بدن خاکیله یکساندور

 

دگل آیا حسین سبط رسول ختم پیغمبر؟

مگر بو شه دگل فرزند پاک حیدر صفدر

دگل یوخسا بو زیب دوش زهرا، زهره ازهر؟

بو آخر حجه الله دور، امام الانس و الجاندور

 

بو گون سوز عطشدن کودکان آل پیغمبر

بنات النعش تک جمع اولدولار اطرافیمه یکسر

جمیعاً العطش گویان که یابن الساقی کوثر

بیزه بیر جرعه سو بذل ائت، که سو من باب احساندور

 

جماعت دوریدور بو ظلم، انصاف و مروتدن

گچوبدور تشنگی کودکان حد و نهایتدن

گلون رحمه منی ایلون رها قید خجالتدن

اگر بیر مشگ سو ویرسوز منه چوخ منت جاندور

 

حسین قتلیندن اوتری دوشمیون ای قوم وسواسه

گمانوز گلسه هر تیر و سنان نوک الماسه

ورون بو گوزلریمدن جمله نوش جاندور عباسه

و لیکن سو ویرون، آل علی مجموع عطشاندور

 

بو جانی ایتمشم دائم نشان طعنه اعدا

که تا جسم حسینه یتمسون آسیب و غم اصلا

ورون هر حربیه گلسه گمانوز، ایتمیون پروا

بو قول بو باش بو جسم و جان، حسین راهینده قرباندور

 

بو گون ئولماخ منه کونینیده شان و جلالتدور

آدیم محسوب انصار بن ختم رسالتدور

حسینین مقدمینده آخسا قانیم چوخ سعاتدور

ازل گوندن بو نقد جان، نثار راه جاناندور

 

دئدی سعد اوغلی کی سقای اهل سید والا

حسینه یوخدی سو، گر سوئیله مملو اولا دنیا

مگر بیعت، و الا جز شهادت چاره یوخ اصلا

بو عالی حکم یا عباس، حکم پور سفیاندور

 

چو عباس علی اولدی کلام دشمنه سامع

سکوت ایتموب غلاف صبرده سیف الله قاطع

چهار آئینه سیندن ظاهر اولدی صاعق لامع

که بعد از برق شیر حق، رعد آسا خروشاندور

 

یتشدی تند باد طعنه نار آه خاموشه

شراریندن اولوب افسرده دل، پروین و هم خوشه

مگر طمطامدن ایلوب تلاطم، یم گلوب جوشه

بیریندن چرخ سوزاندور، بیری بنیاد طوفاندور

 

حصار صبرینی ایتدی مسخر طعنه دشمن

قیزاردی گوزلری مانند چشم ضیغم ذوالمن

سر هر موینه سوفار اولوب بیر حلقه جوشن

که زوبین حمیت نافذ خفتان مرداندور

 

چکوب بیر نعره غیظیله بسان رعد آذاری

محیط اولدی عدویه صوت قهر و سهم قهاری

ظهوره گلدی چین جبهه سیندن غیظ آثاری

جهان سیماب تک، دشمن چو برگ بید لرزاندور

 

عقابه اولدی تند و تیز و قهر آمیز و خصمانه

چکوب مهمیز آتش ریز، برق انگیز یکرانه

وروب ال قبضه صمصام خون آشام برانه

نهنگ آسا خیال ایتموب که لشگر بحر عماندور

 

جلوریز اولدی قلب لشگره تا حیدر ثانی

مثال برق خاطف، پنجه سینده تیغ عریانی

ایدوب چوخ کشته دن پشته، دوتوب قان سیل میدانی

او سیلابین حبابی اسپر و خاشاکی پیکاندور

 

جناح و میمن و میسر اولوب یکسر پراکنده

توکولدی بیر بیر اوسته زخمدار و کشته و زنده

سپه چون گله روباه، او شه بیر شیر درنده

هراس صولتیندن فوج فوج اعدا گریزاندور

 

دم تیغ شررباری عجب مرگ آفرین اولدی

توکردی مردی مرکبدن، یسار و یا یمین اولدی

او صحرا ایچره پشته کشته های مشرکین اولدی

او تحت پشته لرده جوی تک جاری اولان قاندور

 

او گون کروبیان قدس، طاق عرش اعلاده

ایدوبلر عزم نظاره، نه وار آیا بو صحراده

بیری مجمر ایدوب برپا، بیری چون شات آماده

فلک ایثار ایدر انجم، ملک بو شسته حیراندور

 

بیزه کرب و بلانی قسمت ائت، ای خالق ذوالمن

گوگل تا نور من زارالحسینیلن اولا روشن

اولا محسوب بلکه زمره جاروب کشلردن

او درگاهون سوئی گوز یاشیدور، جاروبی مژگاندور

 

زهی فخریه عالی که عباسه غلامم من

جسور نظم و مادح شیرین کلامم من

ولی اوز خواجمه همنام، گوینده بنامم من

او درگاهون (ترابی) بوسه گاه میر و سلطاندور

 

 ترابی

منبع مجموعه کانالهای مدح و مرثیه

موضوع: حضرت ابوالفضل العباس (ع) شجاعت ,
زبان شعر و شاعر: نوحه ترکی , ترابی

 

------------

 

در شجاعت حضرت ابوالفضل (ع)

 

او گونکه اهلبیت آرا سوسوزلوق آشکاراولوب

چو یادگارمرتضی ایشیتدی بی قرار اولوب

 

سکینه نی سوسوزگوروب کسیلدی صبرو طاقتی

اسردی جسمی بید تک گلنده جوشه غیرتی

خطاب ایدردی نفسینه عباس ایله راحتی

سوسوزقالا کباب اولا بو گون حسینین عترتی

چکردی آه جانگداز دو عینی درّباراولوب

 

گیوبدی سرو قدّینه محاربه سلاحینی

او گل کیمی جبینینه قویوبدی طاس کلاحینی

او دم نجف دیارینه دوتوبدی روی ماهینی

چاغوردی اوزهرایینه دو عالمین پناهینی

چیخوب کناره خیمدن عقابه چون سواراولوب

 

یتوب حضورانوره ادبله ایلدی سلام

دیدی ویروب آنام منی بو پاک درگهه غلام

بویورگیدیم بو لشکره غریو و آه و واسالام

آتام علی کیمی بو گون بو عرصه ده هنرقیلام

آنام ایشیتسه فخرایدردیر سودوم گواراولوب

 

سکینه العطش دیردوتوب الینده جامه باخ

یانار سوسوزدان اصغرین او طفل تشنه کامه باخ

نجفده مرتضی دیه هژبر ایدن دوامه باخ

اودی رشید و هم غیورکمرده کی حسامه باخ

باخار حسین اشاقلارا سو-یوخدی شرمساراولوب

 

غرض جهاده اذن آلوب چیخوب عقاب استینه

علم گوتوردی دوشینه آلوب سنان دستینه

گورن دیردی شاهباز گیدور غراب سمتینه

قضا باخاردی قدّینه قدرباخاردی شصتینه

دیردی کیمدی بو جوان حسینه جان نثاراولوب

 

یتوشدی چونکه لشکره او نامدار شهسوار

دیوبدی گلسون هرکیمین منیله جنگی میلی وار

بو رزمگه بو تیغ تیز بو من بو وقت کارزار

سالوب اشاقه باشلارین یلان کفرهرنه وار

دیردیلریقین بلا بو لشکره دچاراولوب

 

مبارز ایلدی طلب او یادگارلو کشف

بیریزده یوخدی گرهنرگلون جداله صف بصف

گلوبدی تنگه اول زمان غضنفرشه نجف

اوزین ووروبدی لشکره قلج ووراردی هرطرف

جراد منتشر کیمی داغیلدولارفرار اولوب

 

عبوره راه اولمادی  زیاده خون و لحمیدن

تمام زهره چاک اولوب  او قوم دون-سهمیدن

نه بیر باخاردی دشمنه نه باک ایدردی زخمیدن

حسین دیردی آفرین او خشمناکه خیمدن

اخا غمینده عترتیم تمام اشکباراولوب

 

ایا غضنفرو دلیرایا نشان لافتا

او ضرب و شصت و صولته او قولارا جهان فدا

(کنیزفاطمه )بیله شهین غمینده قیل نوا

اودورایکی جهانیده تمام دردیوه دوا

شجاعتی سخاوتی جهاندا آشکاراولوب

 

مرحومه کنیز فاطمه

مرحومه (ام لیلا)فرزند غره العلماء است

که در سال 1244(ش) در قریه ی (دومریق)

شهرستان کلیبر متولد شده ودر سن 17 سالگی

 طی یک مکاشفه درعالم رویا

 با کرامات امام حسین (ع) قدرت سرودن اشعا  باو عطا شده است

او بمدت 27 سال در سوگ اهلبیت نوحه سرایی نموده

این بانوی شاعر در56 سالگی (1300ش)

در مراجعت از عتبات عالیات درشهر

کربلا وفات نموده ودرآن دیارمقدّسمدفون گردیده است

 

منبع کانال گنجینه گذشتگان

موضوع: حضرت ابوالفضل العباس (ع) شجاعت ,
زبان شعر و شاعر: نوحه ترکی , کنیز فاطمه

 

------------

 

شجاعت و حماسه حضرت ابوالفضل العباس (علیه السلام)

 

بو نجه عشقیدی عشّاقی گرفتار ایلیور

بو نجه عشقیدی شوره یری گلزار ایلیور

نخل عرفانی پر از شاخه و پر بار ایلیور

زشت رو برده لری چهره نمودار ایلیور

فی المثل قدرت خلقت دی یوخی وار ایلیور

 

بو نجه عشقیدی ائتمیش اوجا نام بشری

فوق ائدوب سلک ملک دنده مقام بشری

عشق اداره ایلیور آری نظام بشری

میندیروب قدرته نیروی قیام بشری

عشقیدور قدرت ایمانی سزوار ایلیور

 

جاودانه گل خوشرنگ بهار عشقیده وار

حسن عبدیّت و سیمای وقار عشقیده وار

گوهری ناب اولا یاخشی عیار عشقیده وار

قسم اولسون شرف عشقه نه وار عشقیده وار

عشق پیمانیدی پیمانه نی سرشار ایلیور

 

من دیَن عشق کی تعریفینه وار منده قصور

بهترین صحنه سی عاشور گونی ائتدی ظهور

سالاجاق طنطنه ایجادیده تا نفخۀ صور

مغز بیداره وئروب کرب و بلا صحبتی شور

بو حماسه بلی هرغافلی هشیار ایلیور

 

صبح صادق ده حسین پرتو نور ازلی

افق عشقیده زیبا یوزی خورشید جلی

خونی خون نبوی، اللری پیغمبر الی

امر ائدوب اکبره اعلان اذان ایله علی

صبح امّید ئوزین السّاعه پدیدار ایلیور

 

عاشق اعظم ائدوب عشقیله اقدام صَلواة

اقتدا ائتدی اونا صادق و صالح نفرات

فکر بیر قولیده بیر عشق بیر اندیشه ثبات

او جلال و جبروتی ده ملکلر هامی مات

تیپ ارباب صفا سجدۀ دادار ایلیور

 

صوت تکبیر اوجالور عرشه سوسوز لبلردن

قدسیان روحه گلور کلمۀ جان پروردن

بو ندای ملکوتی اوجالوب هر یردن

خلقته بسدی حسین مکتبی پیغمبردن

فخر بو طاعته پیغمبر مختار ایلیور

 

مشعر عشقیده ختم ائتدی نمازین شهدا

صدقیله محرم اولانلار ایلدی فکر مِنا

یار و انصارین حسین ابن علی قیلدی دعا

دئدی هامّوزدا سیزون من گورورم روح وفا

صورتوز سیرتوزون حُسنُنی اظهار ایلیور

 

ظاهراً عدهّ میزون گرچه چوخ آزدور عَدَدی

باطناً بسدی بیزه دولت عشقون مَدَدی

هر کس امضاء ائده بولمز بو خدائی سَنَدی

عشق توحیدیده وار رمز بقای اَبَدی

صود امر طفلیده سلطان جهاندار ایلیور

 

ای مجلّل کیشی لر کی دایانوبسوز بو سیاق

ورمیسوز خاطریمه همسروزی سیز سه طلاق

ساحت پاک خداده گوروم اولسون ئوزوز آق

اولاجاق سوز بو گئجه سفرۀ جاناندا قوناق

جدّیم احمد ده همان سفره ده افطار ایلیور

 

ما حصل اهل ولا فیض شهادت تاپدی

کهنه سرمستلر ئوز عشقینه قیمت تاپدی

تشنه لر اولدی فدا چشمۀ وحدت تاپدی

چوخی گمنامیدی بیر لحظه ده شهرت تاپدی

آری خوش لحظه یولی سالکه هموار ایلیور

 

خیمه لر بوشدی فقط عترت اطهار قالور

نه مهاجردن اثر واردی نه انصار قالور

نه علی اکبر و نه قاسم دلدار قالور

بیر حسین بیر صود امر بیرده علمدار قالور

اودا اذن آلماقا سلطانیدن اصرار ایلیور

 

یاپشوب دامن مولای وفاداریندن

ایله بیل حاجی دوتوب کعبه نین استاریندن

شبنم خجلت آخور لالۀ رخساریندن

یوسف حیرتده قالوب گرمیِ بازاریندن

هاردا یوسف بو قدر رونق بازار ایلیور

 

سیّدی وئر منه رخصت ایله مشمول کرم

مدرک عشقیمی قیل لطفیله توشیح و رقم

سینه می تنگه سالوبدور بیلوسن غصّه و غم

طاقتیم یوخدی سوسوزدان مَلَشه اهل حرم

الطش صوتی آقا روحیمه آزار ایلیور

 

باغلیوبسان نیه شهباز کیمی شهپریمی

گوهریم نابیدی قوی راضی ائدوم مشتریمی

داریخور قلبیم عباده گورورم اکبریمی

منده آزاده ام آزاد ایله سن اللریمی

گور نجه جنگیده اعجاز بو قولّار ایلیور

 

جنبشه گلدی بو سوزدن او کرم دریاسی

شاه دین رزمه مُخیّر ایلدی عبّاسی

امر پروازی آلوب قاف شرف عنقاسی

شاد و بشّاش اولوب مرتضوی سیماسی

گئدور عبّاس، حسد گنبد دّوار ایلیور

 

احسن احسن دیوری روح الامین همّتتینه

قدسیان عالم معنا دیل آچوب مدحتینه

شهدای اُحُدون روحی گلوب خدمتینه

باخور حسرتله حسین قارداشینون قامتینه

ساچلاری الده دعا خورداجا قیزلار ایلیور

 

تلّیدن اندی عقابی پر آچوب مثل عقاب

حکم تمکین وئروب توسنه ناگه او جناب

مسلک ابلیس سیاهه یتیشوب تیز شهاب

موسی تک سامُری سیرت قوشونا قیلدی خطاب

بی بصیرت سُپهه پند اولوالابصار ایلیور

 

ای سپاه اموی حیله مراموزدی سیزون

ننگ تاریخ بشر ننگ قیاموزدی سیزون

ظاهرا کلمۀ حق تکیه کلاموزدی سیزون

دینوز اولسا شه لب تشنه اماموزدی سیزون

ئوز امامینده مگر دینی اولان خوار ایلیور؟

 

دولدورورب قلبوزی عشق زر وسیم عشق جهان

مرغ زیبا پر حُرّیت اوخا اولدی نشان

قورخودوبدور سیزی عفریت محیط خفقان

قابل نفرت و لعنت دی یزید نادان

نه حکومت دی سیزه مردک میخوار ایلیور

 

عار اولا اون ایکی مین نامه یازان ملّتوزه

عار اولا عاطفوزه نیّتوزه غیرتوزه

لطمه وردوز ئوزوز ئوز ارزش و حیثیّتوزه

نه سبب اولدی قیتدوز گنه وحشیّتوزه

روبرو اولماقا انسان سیزیلن عار ایلیور

 

هانسی مسلکده سوئی تشنیه ایلوبله حرام؟

سارالوب ختم نبی گلشنی ای قوم ظلام

یوخدی سو شدّت گرماده یانور اهل خیام

نه کیچیک لرده رمق وار نه بیوک لرده دوام

سعدون اوغلی نیه آل اللهه اجبار ایلیور

 

گلمیشم نهری آلام سو آپارام تشنه لره

اعتنا ایلمرم یوز بئله سایسیز نفره

چکسه شمشیرینی هر کیم الین آتسا سپره

روبرو اولسا منه جنگیده سالّام خطره

نجه که کاهی فنا برق شرر بار ایلیور

 

انتخاب ایله دی هرکیم جدل تن به تنی

ساغر مرگی ایچوب توپراقا دوشدی بدنی

گورمیوب دیدۀ دنیا بئله شمشیر زنی

فِی المَثَل طَیراً اَبابیل پر آچموش عَلَنی

اَبرهه قومینی سجّیله گرفتار ایلیور

 

گوردولر جنگیده ماهردی او عالی هدفی

اختیار ایلدی ابطال عرب پشت صفی

بیلدی عبّاس علی تک باشا یوخدور طرفی

خیمیه باخدی صورا سسلدی شاه نجفی

کارزار اهلینی اوغلون نجه گور زار ایلیور

 

هر نه عّباسی ده واردور باباجان سَندَندور

منده که صدق و صفا نام و نشان سَندَندور

بو قوی پنجه بو بازوی توان سَندَندور

رگ قلبیمده عروقیمده کی قان سَندَندور

سن اؤپن قولدی بو گون صفلری طومار ایلیور

 

بیر نبرد ایلدی میدانیده اول یکّه سوار

قلب لشگرده یول آچدی قوشونا وئردی فشار

سوروشوب مارد بد خو نه قیامتدی نه وار

بیخبرسن دیدیلر جنگیدن ای فتنه شعار

مرتضانون اوجا بوی اوغلیدی پیکار ایلیور

 

خیمه سین ترک ایلدی فوری او غولِ اُموی

گوردی میداندا علمدار سپاه عَلوی

قول اوزون، پرچم اوجا، قامت اوجا، پنجه قوی

ماردون خیمه سینه فوری ائدور پیشروی

برق شمشیری شاخور مارده اخطار ایلیور

 

عصبی ائتدی صدیف اوغلونی کابوس اجل

مرکبه وئردی جلو اولدی مهیّای جدل

فنّ رزمیله آتوب نیزه سین عبّاس اَوَل

اوجالاندی او اوجا نیزه نی دوتدی اوجا اَل

بو نمایش دئدی مارد سنی بیدار ایلیور

 

منیم استاد نبردیم اسدالله علی

ایلیوبدور منه تعلیم رموز جدلی

ناقصون چوخدی سنون رشتۀ دعواده ولی

مردسن نیزه وی آل سن، دالی قیتر بو الی

اشقیا قدرت سرپنجه وی معیار ایلیور

 

نیزه سین آلماقا مارد چالشوب قدرتیله

زور بازوسی نی ویردی عصبانیّتیله

اولدی ناکام سنانه یاپشوب خفّتیله

نیزه سین آلدی علی اوغلی اونون همّتیله

منتطر دی هامی گورسونله نه رفتار ایلیور

 

ماردون مرکبینی پیله دی عبّاس شریف

عرصۀ رزمی ده سر در گُم اولوب کهنه حریف

پنجۀ شیرده روبه تک ئوزین گوردی ضعیف

دیل آچوب عجزه ابوالفضلی ائدوبدور تعریف

منی عفو ایله، بیوک عفو خطاکار ایلیور

 

ایسته دی مارده مرکب گتوره قوم ضلال

اسدالله بالاسی وئرمدی بو امره مجال

اونون ئوز نیزه سین عباس برازنده خصال

بوغازیندان ائله ووردی کسیلوب راه مقال

گوردیلر ترک نفس لاشۀ مردار ایلیور

 

جان وئرور مارد نامرد قشون وحشت ائدور

تلّون اوستونده حسین زینبیله صحبت ائدور

باجی قارداش او گوزل قارداشینا دقت ائدور

ارزش جنگینی زهراده گلوب قیمت ائدور

غبطه بو منظریه جعفر طیّار ایلیور

 

زینیدن اَندی او پروردۀ سلطان نجف

ماردون کسدی باشین قهریله اول کان شرف

بیلدی زینب سوؤونور آتدی اونی تلّه طرف

نیزه نی چالدی قوی پیکرینی قیلدی هدف

دئدیلر ایندی نه دور فکری نه پندارایلیور

 

گوردولر قوش کیمی قالخیزدی نگونسار تنی

آتدی سعد اوغلونا ساری او کثافت بدنی

خوار ائدوبدور اونی بو جنگی نمایش عَلَنی

علی اوغلی دئدی تپراقه سالور هر گئدَنی

صحنۀ عرصۀ بدری بیزه تکرار ایلیور

 

بی توقّف چاپاراق وئردی جلو مرکبینه

سعی ائدوب راه صفاده یتیشه مطلبینه

آلدی دریانی سودان وورمادی امّا لبینه

قویدی قیمت ئوزی ئوز عشقینه ئوز منصبینه

عشقه باخ ایچمگه سو ناز او سردار ایلیور

 

نهریدن چخدی اورکده غمی یوخ مشگی دولی

علمی الده قلج الده سلامتدی قولی

باخدی اطرافه ورانداز ایلدی صاق و صولی

انتخاب ایلدی مقصودینه نزدیک یولی

دل تمنّای حرم خانۀ دلدار ایلیور

 

قویسا اهریمن اگر درک سلیمان ائدرم

سو آغیر قیمت اولوب قیمتین ارزان ائدرم

غشّ ائدن قیزلارا مشگون سویون احسان ائدرم

صود امر اصغریمون دردرینه درمان ائدرم

تشنه لر غصّه سینی تشنه علمدار ایلیور

 

حمله ور اولدی او سایسیز نفره فرد رشید

دفتر رزم و شهامتده آچوب فصل جدید

ما و من اهلینی شمشیر ائدوبدور تهدید

کوفیه ساری فرار ایلدی افراد پلید

الحذر الحذر اُول فرقۀ کفّار ایلیور

 

تیز حملیدی ئوزی مرکب رهواری بُرو

گه ویروبدور آتا مهمیز گهی ویردی جلو

ایلدیریم تک قُشونون خَرمنینه توکدی اَلو

باشلاری داس اَجَل تک قلجی ائتدی درو

روبرو هر کیم اولور فوری نگونسار ایلیور

 

الحق الحق نه گوزل خدمت ائدوب قارداشینا

فرصت جنگی فلک حیف اولا وئردی قوشینا

آغلا آغلا آناسی مشتری دور گوزیاشنا

یازمازیدوم نه بلا گلدی او السیز باشینا

حضرت صادقون امری منی ناچار ایلیور

 

بشرون الدی خطر وقتی نگهبان گوزونه

الّلری اولسا مواظب اولار انسان گوزونه

السیزه چاره نه دور اوخ کچه پرّان گوزونه

یاریلا باش یاراسیندان توکوله قان گوزونه

سیلمه سه گوزلرینی باخماقی دشوار ایلیور

 

لخته قانیله دولان گوز گورر آیا هارانی

گوز دوتولموشدی قبول ایلدی هر بیر یارانی

نه گلن نیزه اوخی گوردی نه یاره ویرانی

نه یانیندان گئچنی گوردی نه یولدا دورانی

دونور هر سمته هدف سینه سین اوخلار ایلیور

 

باغلیوب امّ بنینون یرینه قان گوزونی

ایتیروبدور یولی میداندا ایتیرمور ئوزونی

گلدی بیر ظالم اونون تار ایلدی گوندوزونی

دئمرم آهن عمودیله آچیق باش سوزونی

صبر و طاقت او غمه هانسی عزادار ایلیور

 

بیلمورم اولدی نه رفتار او قوی پیکریله

اوجا قامت اوجا یردن یخیلوب لنگریله

باشینون اوسته گلوبدور آناسی حیدریله

فاطمه سیلدی گهی گوزلرینی معجریله

گه سو تکلیفی اونا حیدر کرّار ایلیور

 

سسلنوب معرکه دن گل منی درک ائت شاهیم

شاهسن سن منه شاهد بیر اولان الّلهیم

قورتاروب الده کی سرمایَم اوجالمش آهیم

سر خونین تن خونین دی قالان تنخواهیم

اونودا مقدمووه نوکرون ایثار ایلیور

 

گرد راه قدمون فخریدی ایجاد ائوینه

شاه عادل سن آقا عدل ائوینه داد ائوینه

آغلاما لطف ائله گل قارداشوون شاد ائوینه

سنی دعوت ائدورم عشقیمون آباد ائوینه

ائوی آباد اولا عشقون یوخ ائوی وار ایلیور

 

((انورم)) نوحه ده صرف ایلمیشم همّتیمی

آرتیروبدور آقامون لطفی منیم شهرتیمی

نیّتیم قلبیده خدمتدی بیلور نیّتیمی

وار امیدیم وئره موعود جزا خلعتیمی

موری تشویق سلیمانِ کَرَم دار ایلیور

 

مرحوم انور اردبیلی

منبع مجموعه کانالهای مدح و مرثیه

موضوع: حضرت ابوالفضل العباس (ع) شجاعت ,
زبان شعر و شاعر: نوحه ترکی , انور اردبیلی

 

------------

 

عزم میدان حضرت ابوالفضل (ع)

 

چیخوب چون خیمدن اول شهسوارعرصه هیجا

یل دریا دل و ضیغم شکار مرتضی آسا

 

همایون عهد و ضیغم جهد کیوان مهرسیمین قد

فلک کردارو مهرآثارخوش رفتار و مه سیما

 

سحاب مرحمت کان کرامت منبع  حکمت

یم جود و سخاوت یادگار سید بطحا

 

علمدارشه گلگون قبا ماه بنی هاشم

سپهدارحسین ابن علی عباس رزم آرا

 

سکینه قلبینین آرامی سقای سپاه غم

پناه زینب و کلثوم یارعترت طاها

 

دم هیجا  ووران دم مرتضادن سهم و صولتده

فروزان کوکب برج مهاتب نیربیضا

 

ووران شجعان کفری نیزه آتش فشانیله

ایدن فرعونیانه آشکارا معجزترسا

 

گیچن جانان یولیندا قولاریندان اشتیاقیله

ویرن جان سو کنارینده سوسوزاما آدی سقا

 

سواراولدی عقابه مرتضی تک چون او نام آور

عیان اولدی عیال مصطفایه محشرعظما

 

گوروب تنها علمدارین حسینین گیتدی آرامی

گلوب افغانه گویا سویلدی با چشم خون پالا

 

بویوردی کای ایدن خم قدینی بارفراقینده

بیله تعجیلیله بو قانلی میدانه قدم قویما

 

منی یالقوزقویوب گیتمه که یوخدور بیر مددکاریم

داغلموش لشکریم گیتموش سپاهیم قالموشام تنها

 

الوب اکبر یانوب قلبیم یوخومدور یارو غمخواریم

دوباره نارهجرانه بو یانمیش قلبی یاندورما

 

بو غربت الکه ده قارداش منی یالقوزقویوب گیتمه

اگر سن اولماسان جرئت تاپاربو قوم بی پروا

 

توفق قیل اپوم بیرقولاریندان دم غنیمتدور

فرات استه سالارایمدی یقین بو قولاری اعدا

 

ولی ای شیعلربلمم نه حاله قالدی اول سرور

گورنده قارداشین قولسوزدوشوب چون شاخه طوبا

 

مرحوم حقیرخویی

منبع کانال گنجینه گذشتگان

موضوع: حضرت ابوالفضل العباس (ع) شجاعت ,
زبان شعر و شاعر: نوحه ترکی , حقیر خویی

 

------------

 

عزم میدان حضرت ابوالفضل (ع)

 

چیخوبدی حضرت عباس چون عقاب استه

عقاب بال و برین اچدی افتاب استه

 

گلوبدی  خیملره سسلنوب خدا حافظ

توکولدی خیمدن اولاد بو تراب استه

 

سکینه ایستدی سو غصه دن سسی دوتولوب

اشاره قیلدی الین دیده براب استه

 

شهاب ثاقبین اوغلی او قوم عدوانین

یتوب سالوب شرر تیغیله شهاب استه

 

ایدوبدی هلهله رجاله عرب بیردن

توکوبدولر اوخی چون بارش سحاب استه

 

نهنگ قلزم غیرت سالوب فراته اوزین

حباب وار سبر باشه چکدی اب استه

 

هر ایکی اوجینی دولدوردی بیر سویا باخدی

گلوب او حالیده اوز نفسینه خطاب استه

 

سن ایچ گلن بو سوئی اغلاسون علی اصغر

عطش سالوب اونی گهواره دن تراب استه

 

سن ایچ گلن بو سوئیقوی سکینه غش ایلسون

عیال فاطمه نی سالسون اضطراب استه

 

الیشدی قلبی حسینه سوئی توکوبدی یره

یانوب دی قلبی نجه اود دوشر طناب استه

 

چیخوب کناره یولین دتدی مارد ابن صدیف

چکوب سنانینی فرزند بوتراب استه

 

هواده نیزه نی دوتدی باخوبدی خیملره

باخوب حسینه اوجالدوب الین رکاب استه

 

غضبلنوبدی علی اوغلی یا علی چکدی

سالوبدی گنبد دواری بیچ و تاب استه

 

یخوب او ظالمی سالدی عقابینین دوشونه

گورن دیردی عقاب اوز قویوب غراب استه

 

شهید دشت بلا سسلنردی یا عباس

مجال ویرمه بو ملعونه سال تراب استه

 

ووروبدی نیزه نی قوزوب الوب گلنده یره

یتوشدی مالک دوزخ او بی حجاب استه

 

خیالی واردی بو وقفه گر ایسته سن (واقف)

قویا او صحن مبارکده یوز تراب استه

 

 مرحوم واقف سرابی

منبع کانال گنجینه گذشتگان

موضوع: حضرت ابوالفضل العباس (ع) شجاعت ,
زبان شعر و شاعر: نوحه ترکی , واقف سرابی

 

------------

 

شجاعت حضرت ابوالفضل (علیه السلام)

 

ال ساخلیون ای کوفیان عباس نام آور منم

فرماندهِ سلطان حق، بو ارتشه حیدر منم

اون آلتی یاشدا اولموشام رمز نبرده آشنا

یردن گویه صف باغلیون، صفلر پوزان صفدر منم

 

هرچند اگر شهزاده یم، فرزند شیرِ حیدرم

سقای دشت کربلا، بو لشکره سرلشکرم

فرمانده عالم اولام، من شهریاره نوکرم

تا من وارام واردور حسین، اولسون قسم پیمانیمه

بو قان علینون قانیدور تزریق اولوبدور قانیمه

 

امضا ازلده وئرمیشم بیر باش ایکی قولدان گئچم

گوزدن گئچم جاندان گئچم هم صاق و هم صولدان گئچم

بو یول صراط عشقدور، حاشا که بو یولدان گئچم

یاخشی تانیرسوز سیز منی، میدانیده شیر نرم

من حیدر اوغلی حیدرم، قورخی نه اولسا بولمرم

 

اولسون قسم پیمانیمه، سینمده کی قرآنیمه

گر قطعه قطعه دوغرانام، ال تاپماسیز ایمانیمه

قانین توکوب خار ایئلرم کیم چپ باخا سلطانیمه

اَیْن المحارب سسلورم ای کوفیان بیحیا

من شیریزدان اوغلویام بومن بو سیز بو کربلا

 

سیز بیحیالر عترتِ پیغمبره یول باغلادوز

زهرای اطهر قلبینی بو معصیتده داغلادوز

اوچ گون گجه گوندوز بیزی، بو چولده عطشان ساخلادوز

سطان عشقیمدور حسین، من پیشمرگ اصغرم

باشیم بدندن آیریلا هند اوغلونا باش اگمرم

 

کفّاری سالدی لرزه یه، پرورده ی شیر خدا

بیر حمله ده نهری آلوب فرمانده کلّ قوا

صفلر دگوبدی بیربیره بو پهلوانه مرحبا

هر بیر قدمده بیر باشی کسدوقجه غوغا ایلدی

گویا دیریلدی مرتضیٰ صفّینی احیا ایلدی

 

صد حیف اولا ویردی فلک آخر او گیزلین داشینی

هم اوچ پر اوخ بیچدی گوزون، هم یاردی نوفل باشینی

بولمم نه نوعی سسلدی امدادینه قارداشینی

واضح دئیوم چون قانیله دولموشدی عطشان لبلری

بیر سمته دوشموشدی علم، بیر سمته دوشموش اللری

موضوع: حضرت ابوالفضل العباس (ع) شجاعت ,
زبان شعر و شاعر: نوحه ترکی

 

------------

 

احوالات حضرت ابوالفضل (علیه السلام)

 

عجب محشر  یاراتدون  نینواده یا ابوالفضل

حسینی سن  قوجاتدون کربلا ده یا ابوالفضل

 

شه مشکل گشا سن امیر  کربلا سن

ایکی  دنیا ده  مولا  هامی درده دوا سن

دخیلم آقا  سنه جان فدا   ایا باب الحوائج

 

سنون  عشقون  اولوب بو عاشق زاره فریضه

گئجه لر گوز یاشیلان من سنه یازدیم عریضه

شفا  وئر یا  ابوالفضل  درد منده  هر مریضه

قالوب  آغلار گوزوم سنتک آقاده  یا ابوالفضل

 

دوشنده مرکب اوستن سسلدون گل داده فارداش

آلوبدی  دورمی  اعدا  یتیش   فریاده   قارداش

اماندی  سنده  گل   گلدی ننم  زهراده  قارداش

یانوب  زهرا  سنه بحر  بلاده   یا ابوالفضل

 

قوتارماز سن دئدون بو بیکسون اندوه و دردی

اونون   اندوهی  قان   ایلر  دل  آزاده   مردی

یوزونده واردی زهرانون حسین جان سیلی ردّی

یانوب  قلبون  بو درد  جان گدازه   یا ابوالفضل

 

فکری مراغه ای

منبع مجموعه کانالهای مدح و مرثیه

موضوع: حضرت ابوالفضل العباس (ع) شجاعت ,
زبان شعر و شاعر: نوحه ترکی , فکری مراغه ای

 

------------

 

عزم میدان علمدارکربلا

 

خیمدن سمت فراته تشنه لب سقا گیدیر

اغلاشورمه پاره لرعباس مه سیما گیدیر

 

عشق اگرویرسه منی قربانگه عشاقه سوق

ایلرم عباسین اوصافین بیان تا اهل ذوق

صفحه رخساره جاری ایلسونلراشگ شوق

چشمه چشمیمدن اشک شوق سیل آسا گدیر

 

الله الله ماه یا سرو رواندور بزمیده

شاهباز عشق یا شیرژیاندوررزمیده

عزم محکم فی المثل کوه گراندور عزمیده

موجه گلمور نهراگرنهره طرف دریا گیدیر

 

سرودورسرودلآرا ماه دورماه منیر

میردورمیرهنرورشیردورشیردلیر

ساخلا یارب بدنظردن یوخدی بو شیره نظیر

بیرجوان مینلرقشون ایچره بیله تنها گیدیر

 

آی دیوم عباسه یا چرخ مروت کوکبی

موکب شهده امیرلشکراولموش منصبی

ایلین تاسیس عالمده فتوت مکتبی

پورشاه لافتی ماه جهان آرا گیدیر

 

پیشگاه شاهه گلدی دامنینه ووردی چنگ

ایستوب آلسین شاه دیندن رخصت پیکارجنگ

عرض ایتدی سیدی سینم اولوبدی ضیق و تنگ

اذن ویرجنگه گیدوم الدن داخی یارا گیدیر

 

ایتدی فرمایش حسین سنسن علمداریم منیم

ال تاپاردشمن منه گرگیتسه غمخواریم منیم

سو بیرآز تحصیل ایله عطشاندی قیزلاریم منیم

ناله و شیونلری تا گنبد مینا گیدیر

 

مهریدن ماه آیریلوب جانان یولوندا جان بکف

قصد ایدوب شط فراتی زاده شاه نجف

یوخ هراسی بیرنفردن دلده وارعالی هدف

رایت اسلام الده آیت عظما گیدیر

 

سو تهیه ایتماقا مشکی سالوبدور دوشینه

پرچم شاهنشهدینی باسوب آغوشینه

نیش هجرانه دوزر یتسون وصالین نوشینه

دوشماقا بال و پری پروانه بی پروا گیدیر

 

گوردی لشکربی محابا زاده حیدرگلور

بیرصلابتله گلورگویا که بیرلشکرگلور

صف یاران صف سیندیران عباس نام آورگلور

صولتیندن طاقت و تاب دل اعدا گیدیر

 

برق شمشیری سالارلرزه عدونین جانینه

تیغ تیزی تشنه دورقوم عنیدین قانینه

قورخودان ممکن دگل بیرکیمسه گلسین یانینه

هرکسی گیتسه مصافینه اگربیجا گیدیر

 

چیخمیوب چیخمازابوالفضلین کمالی یادیدن

گیتمیوب گیتمزبو سقا شرح حالی یادیدن

چیخماز البته مواسات و خصالی یادیدن

هرچه عاشورا گلورهرقدر عاشورا گیدیر

 

(منطقی) بو بندیدن گیچ طرح بند دیگره

بو سوزین باقیسینی ثبت ایله آیری دفتره

ملتجی اول هرشب و هرروز پورحیدره

یاز فراتی آلماقا آیا نجه سقا گیدیر

 

 مرحوم منطقی زنجانی

منبع کانال گنجینه گذشتگان

موضوع: حضرت ابوالفضل العباس (ع) شجاعت ,
زبان شعر و شاعر: نوحه ترکی , منطقی زنجانی

 

------------

 

شجاعت حضرت ابوالفضل (علیه السلام)

 

بیابانیدی پهن آور یوخیدی مسکن آثاری

نیستانیدی نخلستان و ریگستان همواری

زمین کربلا دشت بلا صحرای خونخواری

محرم آینون دوردیندن اونمینجی گونه ساری

قوشون اولدی پیاده اتصالاً یوخدور آماری

 

مقاتلده اوتوزمین اللی مین یوزمین ایکی یوزمین

یاریم میلیون حدودینده ایدن وار عدّه نی تخمین

اوزی وئرمیش حسین بن علی تمثیل اونون قدرین

منیم جنگیمه سعد اوغلی چکوب بیر لشگر سنگین

نئجه داغه یاغار نیسان اولور سیل درّیه جاری

 

حصار کوفه دن تا کربلا بیر رزمگاهیدی

اواعظم منزلون پهناسی مملو سپاهیدی

دیولَّر طبل و شیپور اون ایکی مین دستگاهیدی

گئجه لر جبهه ده دورت مین کفیل پاسگاهیدی

فرات اوستونده تیر انداز دورت مین کوفه اشراری

 

عبیداللهیلن ما بین ابن سعد بی پروا

اولوب رد و بدل تا یدّی نامه روز عاشورا

یوخیدی اوندا که پست هوایی یا زمین پیما

نئجه طی ائتدی بیر گون یدی نامه بو یولی آیا

وئریلدی ال به ال نامه قیتدی ال به ال باری

 

او نیروی عظیم ایچره چوخیدی آدلی سر کرده

هاموسیندان قوی پر زور جنگی بیر خطاکرده

سدیفون اوغلی مارد پهلوان رزم پرورده

وجودی چوخ مهمّیدی تمام افراد لشگرده

دگلدی اسکوک عمرو عبدویدن فعل کرداری

 

سیاست پرده سینده باخدی بیر مشکل زمان گوردی

ذخیره ائتدی سعدون نانجیب اوغلی او نامردی

او لشگرگاهیده عین وسطده خیمه سین قوردی

یزیدون پرچم کلِّ قواسین قلبده ووردی

اوتوردی خیمه سینده بیدق کفرون نگهداری

 

ائله سر گرم و سر مستیدی مارد یوم عاشورا

شهدالر گلوب میداندا بیر بیر ائتدیلر دعوا

سپهدار حسینه تا یتیشدی نوبت هیجا

بو های و هوی دن مارد خبر دار اولمیوب اصلا

بودور میدان جنگون وسعتینون حد و معیاری

 

علینون نامدار اوغلی ابوالفضل اسد صولت

ائدوب لشگر آراسینده لوای دشمنی رؤیت

خیالینده قویوب اول پرچمی یخسون همان ساعت

عقابه هی ووروب تیغیله سالدی لشگره وحشت

یریندن قالخزوب سیندیردی نظم فوج کفاری

 

اوجالدی,ناگهان بیر هلهله اردوی اعدادن

دئدی مارد مگر باشلاندی دعوا صوت غوغادن

آتاندا چادرینون دامنین توز قوپلدی صحرادن

مشامینه یتیشدی بوی مرگی بو تماشادن

سراسیمه سارالدی صورتی سست اولدی رفتاری

 

گوروب آتلاردو بی صاحب یهرسیز تاکپو اوسته

قشون یوز دوندروبدور کوفیه لرزان و اشکسته

باسور آتلو پیاده بیر بیرین هی دسته به دسته

دوشور آتدان بدنلر اوینیور باشلار هوا اوسته

اوزاقدان بیر اوزون قول اندیرور تیغ شررباری

 

دییَن اولمادی ای مارد حریفون شیر پر فندور

وجودی کوه محکمدور فنون جنگه معدندور

بلا دشتینده شمشیری بلای جان دشمندور

شهاب الثّاقبون اوغلی شهاب آذر افکندور

حسینون یار و سرداری هواداری مددکاری

 

لباس جنگی گیدی مارد اولدی غرق فولاده

تعجبدور نبرد شیره روباه اولدی آماده

اوزین صیاد سانمیشدی ایلیشدی دام صیاده

او دیو جنگلی بیر بانگ ووردی گلزی فریاده

کأنه سسلنوب ترسالرون ناقوس و زناری

 

مقابل اولدی جوشان و خروشان عربده جویان

ابولفضله طرف اوز نیزه سین آتدی او بدبنیان

نمایان اولدی ناگه پنجه سقای مظلومان

ایکی انگشتیله دوتدی وسطدن نیزه نی پران

بویوردی قوّتون وور نیزه وی آل ائتمه خودداری

 

آجیقلاندی اوظالم قوتین ووردی سنان اوسته

سنانی گلمدی حاشا و کَلا بیر تکان اوسته

بیله بیلمیشدی سوزن سانجیلوبدور پرنیان اوسته

دوتوب بِنگوبنی زیر بغلده گلدی جان اوسته

ایکی اللی یاپوشدی نیزه دن گوج ووردی اجباری

 

اونا شیر خدا اوغلی رموز جنگی آندیردی

اوتشنه حالتین قوت مردانه سین وئردی

حریفون قولتوقیندا آهن بنگوبی سیندیردی

دریسی له قوپاردی جوشنینون حلقه سین قیردی

آتین ووردی پیاده ائتدی اول ملعون بی عاری

 

بودور به به شجاعت دورت طرف دشمندی هر یاندا

عربستان چولی یای فصلی گرما حین بحراندا

اوزی اوچ گوندو تشنه یوخ کومک یالقوز بیاباندا

عقابینون دوشینده گزدیروردی خصمی میداندا

دونوب هر دم باخاردی چگنی اوستن خیمیه ساری

 

دییردی عجزیله مارد منی بخش ائله یا عباس

رکابوندن اوپوم قوی ای امیر کربلا عباس

بوراخسون پهلوانلوق ائتمرم من ادعو عباس

فرار جنگی قومازدی آتان شیر خدا عباس

عطا ایلر بویوکلر گورسه کوچکدن خطا کاری

 

یزیدون مطبخینون کاسه لیسانی بلاتأخیر

گتوروبلر بیر اسبی که قاچاقین دوتمیور نخجیر

علمدارون قولاقینه یتوب بیر کلمه ی تکبیر

باخاندا گوردی سلطاندور دوروبدور تلده دلگیر

دییور قارداش اماندور قویما آتلانسون او خونخواری

 

چکوب غیظیله بیر نعره مصافی لرزیه سالدی

سنان و شمر خولی قورخوسیندان ئولسون آز قالدی

یزیدون ابن سعدون ماردون آرامینی آلدی

اونون اوز نیزه سینی گود حلقیندن ائله چالدی

هواده گزدیروب ووردی یئره اول جسم مرداری

 

هزار افسوس اوضرب و شست بازوی هنروردن

کئچوب بیر آز زمان بو قصه دن سس قوپدی لشگردن

گلوب دریا کیمی موجه قشون اوینادی هر یئردن

چتلیندی اون ایکی مین طبل و شیپور یریش بیردن

یاتان بیدق اوجالدی دایر اولدی فوج پرگاری

 

دییور راوی که گوردوم چیخدی خرمالوق آراسیندن

آت اوسته بیر جوان قولسوز آخور قانی یاراسیندن

دوتوبدور دیرسگیله سینه ده قانلو لواسیندن

یاراسینون قانی تک سو آخور مشگون پاراسیندن

نه قول وار نه سپر تا رد ائده گلدوقجه اوخلاری

 

ایکی دنیا بسوندور (یحیوی) ای زاده ی یحیا

آتون یحیانی شعرون هر مجالسده ائدوب احیا

دیولَّر وئردی عباس علی بیر خلعت اعلا

آتاسی مرتضاده ائیلدی انعاموی اعطا

کئچوردوبلر نظردن یازدیقون ابیات اشعاری

 

مرحوم یحیوی اردبیلی

منبع مجموعه کانالهای مدح و مرثیه

موضوع: حضرت ابوالفضل العباس (ع) شجاعت ,
زبان شعر و شاعر: نوحه ترکی , یحیوی اردبیلی

 

------------

 

شجاعت حضرت ابوالفضل (علیه السلام)

 

صاحیب  وقار عباس، میر تاجدار عباس

حیدرین رشید اوْغلۇ، شیر نامدار عباس

 

چکدی نقشه‌  جنگ، تۇتدۇ جنگه چون تصمیم

سینه‌ ایکی اللـر، شاهه ائیله‌دی تعظیم

آلدێ تئشنه سولطاندان، اؤز وظیفسین تعلیم

رمز دفترین سولطان ائیلدی اوْنا تسلیم

اوْلدۇ ائحتیرامیلن خئیمدن کنار عباس

 

بیر گئدیب آتێن تنگین، تۇتدۇ سر لجامیندن

گلدی تا عوبور ائتسین، تئشنه‌ لر‌ مقامیندن

بیر بؤلۆک خانێم قێزلار، چێخدێ اؤز خییامیندن

یاندێم العطش یاندێم، سس گلیب سۇ جامیندن

اوْل سۇسۇز بالالاردان اوْلدۇ شرمسار عباس

 

جانێنێ گئروْ قوْیدۇ، ائتمیین دئدی ناله

قئیمتی نه قدر اوْلسا، سۇ گتیررم اطفاله

من کی صادق و القوْلم، قالدێ هیمت ایقباله

آفرین بۇ کرداره، آفرین بۇ افعاله

ای جوان دریا دیل، ای وفا شۇعار عباس

 

یئتدی پیش اعداده، رسمن آت دوْلاندێردێ

هر یانا ائدیب حمله، برق تیغی یاندێردێ

پوْزدۇ دستلر نظمین، تا سیپاهێ سێندێردێ

نحرعلقم اۆستۆنده، وۇردۇ بئیره‌غین دۇردۇ

بیر هدفده دریانێ، ائیلدی شیکار عباس

 

بیر اوْوۇج سۇدان گؤتدۆ، گتدی گؤز قاباغینه

تئشنه‌ لر سسی دۆشدۆ، ناگهان قۇلاغینه

باخدێ باطین عالمده، اصغرین دوْداغینه

ایچمدی سۇیۇ آتدێ، مرکبین ایاغینه

دوْلدۇرۇب سۇدان چێخدێ، مشگین اشکبار عباس

 

خط سئیرینی سالدێ، نخلگاه آراسێندان

دۆشدۆ لئشگره وحشت، سهمگین نداسێندان

هئی تؤکردی باشلارێ، تیغ جان روْباسێندان

دوْلدۇ کربلا دشتی، الحذر صداسێندان

یوْم حشری اعدایه، قێلدێ آشیکار عباس

 

اسدی توْند بیر تۇفان، اوْلدۇ رویئ عالم تار

گؤردیلر کی دندانه، مشگینی آلێب سردار

سینه ده علم قانلێ، بس هانێ اۇزۇن قوْللار؟

اوْغلۇنۇن اوْ وقتینی، فاطیمه دییر آغلار

سؤیلیر آنان قۇربان، ائی حۆسئینه یار عباس

 

بیر زامان حۆسئن تاپدێ، باش آچێق علمداری

گؤردۆ قاندێ بیر پارچا، اوْل وۆجۇد گۆلنارێ

بیریانا دۆشۆب مشکی، بیر طرفده قوْللارێ

بایرا‌غین هارا دۆشمۆش، کربلا سیپهداری

یاتما دۇر بئلیم سێندێ، اوْلدۇم ایندی خوار عباس

 

یحیوی یاز عباسه، نؤوحه عؤمر فۆرصتدی

وقتیکی احئببالر دفن ائدیب سنی گئتدی

اقربا اوْغۇل قارداش، سندن اۇنسی ترک ائتدی

اوْندا سن گؤررسن، بۇ زحمته عوض یئتدی

یعنی باشێن اۆستۆنده بایراغێن وۇرار عباس

 

مرحوم یحیوی

منبع مجموعه کانالهای مدح و مرثیه

موضوع: حضرت ابوالفضل العباس (ع) شجاعت ,
زبان شعر و شاعر: نوحه ترکی , یحیوی اردبیلی

 

------------

 

شجاعت حضرت ابوالفضل (ع)

 

لشگره تیغ شررباری بوساعت چکرم

نار نیرانه سپاهی اولا فرصت چکرم

 

ابن سعدی سالارام آت دوشونه بی پروا

بوینونا تیغیمله طوق مذلت چکرم

 

یا که قبرین قازارام گورمیه هیچ ری ملکون

اوزونه لشگرینه حیدری صولت چکرم

 

بو امیران سپاه الیوی اُپسونلر

خیمه لر سمتینه وار منده بو جرأت چکرم

 

باشینی ترپدنین باشینی من سندیرام

یاعلی نعره سی وردقجادا  ضربت چکرم

 

توکرم نعشیلری نعشیلر اوسته یره من

نعشیلردن یولا دیوار حفاظت چکرم

 

کوفه ده ابن زیادین اوزرم  جُبَّه سینی

تختون اوستن یره ای روح عدالت چکرم

 

نجه سقّایم آقا یوخدی سویوم مشگیمده

خط خون  نهر فرات اوسته بو ساعت چکرم

 

بله لر حمله دی قصدیم داغیلار کوفه لیلر

خرمن عمرلرین من اوتا حضرت، چکرم

 

کوفه و شامی مسخّرایدرم  اذن اولسا

ظالمه تیغیمی من ایتموشم عادت چکرم

 

قُوریان مشگلریم تختیه بنذر آقاجان

قوریان  لبلره باخدقجا خجالت چکرم

 

بلمورم سرّی ندور جنگی ایدورسن ممنوع

تیغیمی قانلو بیاباندا به ندرت چکرم

 

سندن  ئورگشمیشم ای شاه فنون جنگی

سنده شمشیر علی واردی من حسرت چکرم

 

دال دالا ویرساق اگر داغلاری بیز سندیروق

من رکابونده قلج  ویرماقلقا لذّت چکرم

 

باغرینا باسدی علمدارینی فرمایش ایدوب

برده بو قول بویون اولماقلقا حسرت چکرم

 

شعله خشمیوی صبرونله مهار ایله بوگون

سنی اُلدورسله من رنج و مشقت چکرم

 

سن  منه مالک اشتردن عزیزیم باشسان

مالکیم  گیتسه  الیمدن غم غربت چکرم

 

باغبانا بو صولان گللره بر فکر ایله

آغلاشور تشنه  اوشاقلار من اذیّت چکرم

 

عرض ایدوب چشم آقا امر ایله آلوم دریانی

خط خون ساحل دریاده زیادت چکرم

 

 استاد عینی فرد

موضوع: حضرت ابوالفضل العباس (ع) شجاعت ,
زبان شعر و شاعر: نوحه ترکی

 

------------

 

شجاعت حضرت ابوالفضل (علیه السلام)

 

ایلیور حمله اوتوز مین نفره جرأتیله

تولیور صاق و صولا قولارینی قدرتیله

دَرَکه واصل ائدور شامیلری خفّتیله

مجمع شعر حماسی اوزمان دائر اولوب

جبرئیل مدح ابالفضله اوزی شاعر اولوب

 

واژه یوخ وصف ابالفضله زبان قاصر اولوب

مارده ایلدیلر فوری خبر حاضر اولوب

قدرت حضرت عبّاسه بیرآز ناظر اولوب

صورا دستور ویروبلر قویا میدانه قدم

آلدی پاداش فراوان گئده میدانه اودَم

 

مارده سویلدی عبّاس سپهدارم من

فاطمه اوغلینا هریرده مددکارم من

اوجاقامتلی اوزون قولّی علمدارم من

فنّ رزم و جَدَله هرنَدَن آگاهم من

گئت اوشاقسان بابا شاگرد یداللهم من

 

سویلدی مارد ابالفضله اگر عاقلسن

اول پناهنده بیزه بیعته گر مایلسن

سنی حیفیم گلور اولدورمگه چوخ قابلسن

ایستوسن لذّت دنیانی بیزه همراه اوُل

چون امیریمدی یزید سن اونا خاطرخواه اوُل

 

ماردین کسدی سوزین حضرت عبّاس اوزمان

دئدی جنگ ایلمگه سنده اگر یوخدی توان

سال یره اسلحووی خواب جهالتدن اویان

مست و میخواره لره سرور و سلطان دیمرم

اویزیدی قاپیما هِچ ایت حساب ایلمرم

 

رحیم فیضی اردبیلی

موضوع: حضرت ابوالفضل العباس (ع) شجاعت ,
زبان شعر و شاعر: نوحه ترکی , رحیم فیضی اردبیلی

 

------------

 

شجاعت حضرت ابوالفضل (علیه السلام)

 

بیرقَدریازقلم عباس نجه جنگ ایلدی

عرصه نی لشگره اعدایه نجه تنگ ایلدی

 

گوردولر تلی انوب رزمگه شیر گلیر

دیلده تکبیر دیور غرشه شمشیر گلور

 

دین اسلامه اوگون خدمت شایان ایلدی

چوخ فرومایه لری وارد نیران ایلدی

 

جنگ ایدیب بیر یره چاتدی او یل حیدرخو

الغرض ماردیلن اولدی آقام رودرو

 

کل شاماتیده مارد دئدی مشهورمنم

مرتضی اوغلی دئدی نورعلی نورمنم

 

او دئدی قول ریاست منی سرمست الیوب

بو دئدی پست ریاستدی سنی پست الیوب

 

او دئدی تیغه ی برنده الماسم من

بو دئدی ام البنین اوغلویام عباسم من

 

او دئدی جنگ وجدل فنینه اگاهم من

دئدی یوم آغزیوی شاگرد یداللهم من

 

او دئدی مارد معروف منیم آدیمدی

بو دئدی حیدر صفدر منیم استادیمدی

 

او دئدی لشگرشام ایچره سپهدارم من

بو دئدی لشگر اسلامه علمدارم من

 

او یزیدین دئدی فخریله غلام دریم

بودئدی منده بونا فخرالیرم حیدریم

 

اودئدی کوفه سپاهینده بویوک سردارم

بودئدی یتمیش ایکی عاشقه پرچمدارم

 

اودئدی هریره گدسن یولوی من کسرم

بودئدی یول کسنی اصغره قربان کسرم

 

اودئدی خیملری ظلمیله من یاندیرام

بودئدی یاندیرانین گردنینی سیندیرام

موضوع: حضرت ابوالفضل العباس (ع) شجاعت ,
زبان شعر و شاعر: نوحه ترکی

 

------------

 

شجاعت حضرت ابوالفضل (علیه السلام)

 

سس دوشوب رزمگهه قویدی قدم شیراوغلی

شیر تک ،نعره چکور الده علم ،شیر اوغلی

 

قلمیم ایستوری ایتسون قدیم ایامی مرور

صورا طبعیم الییه مبحث جنگیندن عبور

 

مستمع اهل سخن مجلیسیمیز محفل نور

اولوب عباسین آدی گرمی بازار شعور

 

نوجوانلیقدان حمایت الییوبدور دیندن

گورسدوب قدرتینی خصمه اون اوچ سنیندن

 

نوجوانییدی ستم رشته سینی قیرمیشدی

جنگ صفینیده اعدا صفی سیندیرمیشدی

 

آتاسی حیدره توهین ایده نی ویرمیشدی

داغ کیمی پشت ولایت تکینه دورموشدی

 

یعنی پیک اجلی جانیزه مامور ایدرم

آتاما چپ باخانین گوزلرینی کور ایدرم

 

نوجوانییدی دیدی عالمه فخر الناسم

گلشن معرفته رایحه ی احساسم

 

آند اولا حیدره،حیدر آدینا حساسم

دشمن حیدری بیچاره ایدن عباسم

 

بو فنا دهریده هیچ کیم کسه بیلمز یولومی

قولومون قدرتی وار،حیدر ئوپوبدی قولومی

 

اگلشوب مرکبین اوستونده بیر الده سپری

هیبتی لرزیه سالموشدی او گون قوم شری

 

آل هاشم آیی مات ایلدی گویده قمری

پاسباندی حرمه روحی گزور خیمه لری

 

قورخولی معرکه ده دشمن آلوب صاق صولونی

خیمه لرده بالا قیزلاردا گوزتلور یولونی

 

آتینون شیحه سی سیندیردی صف اعدانی

کیم گوروب مرکبین اوسته ،بو یل هیجانی

 

سوروشور کیمدی سالوب معرکه ده طوفانی؟

ایله بیل حمزه دی گویا دولانور میدانی

 

نعره سی دشمن دینه ایله وحشت سالدی

پهلوانلار چوخی میدانیده حیران قالدی

 

جنگین اوصافینی شرح ایتمگه قاصردی زبان

ایاقین قوزادی تز مرکبینه ویردی تکان

 

بیشه ده شیر کیمی،روبهه ویرموردی امان

اوجا تکبیری صدیف اوغلون اویاتدی یوخودان

 

دوردی مارد دیدی کیمدی؟،که ئولوم پاداشیدی

دیدیلر که او حسینون اوجا بوی قارداشیدی

 

روبرو اولدی ابوالفضلیله اول خصم دنی

آچدی نحض آغزینی عباسه ایده بد دهنی

 

دیدی بیر ضربتیلن ئولدوررم باری سنی

پهلوانان عرب چونکه تانور یاخشی منی

 

سعدین اوغلی ئوزوده واقف بو مطلبدی

زور بازومی گورن فکر الیییر مرحبدی

 

قوزویوب نیزه سینی سیخدی ابوالفضله طرف

ایلییوب سینه ی عباسی او نیزه یله هدف

 

نه ئوزونده نه رئیسینده اونون واردی شرف

مارده باخدی گوز آلتی پسر شاه نجف

 

شیر تک غرش ایدوب جنگیده کسدی سسینی

ایکی بارماقین آراسیندا دوتوب نیزه سینی

 

دیدی مارد بو علم حشره کیمی یاتمیاجاق

مکر و حیلن منی بو عرصه ده آللاتمییاجاق

 

گوزلریندن علی اوغلی حرمی آتمیاجاق

نه قدر نیزه نی چکسنده گوجون چاتمیاجاق

 

آند اولا غیرتیمه یوخدی بو دامنده لکه

بیر اشاره یله اونی واصل ایدوبدی درکه

 

سسلدی رشته ی ظلمی قیران عباس منم

ماردین وجهه سینی سیندیران عباس منم

 

نهریده پرچم عشقی ویران عباس منم

هم امان نامه ی شمری جیران عباس منم

 

ایکی دنیاده ولایت باغینون یاسی منم

ننم ام البنینون قهرمان عباسی منم

 

بهلول حبیبی زنجانی

موضوع: حضرت ابوالفضل العباس (ع) شجاعت ,
زبان شعر و شاعر: نوحه ترکی , حبیبی

 

------------

 

شجاعت حضرت ابوالفضل (علیه السلام)

 

عشق سرگردان قالار عشق ابوالفضل اولماسا

واژه لر پنهان قالار مشق ابوالفضل اولماسا

 

معصیتده غرق اولار امت ابوالفضل اولماسا

گون به گون گوزدن دوشر غیرت ابوالفضل اولماسا

 

هانسی مجلسده اگرذکر اولماسا زیبا آدی

مُستَمِع روحیه تاپماز مجلسون اولماز دادی

 

رشته مهری قیریلماز ، محکم وپیوسته دی

شیعه لر مین دورد یوز ایلدور عشقنه وابسته دی

 

سینه زنلر شوره گلدوکجه دیللّر جان آقا

غیرتون قربان ابوالفضل ، عشقوه قربان آقا

 

عشق عباس اولماسا عاشق مسیریندن دونر

مشعل پرنور حریت اورکلردن سونر

 

پاک وبا تقواخانملار اورگدر اولادینی    

اولیندن عاشق عباس ایدر نوزادینی

 

عشقنون مستحکم ایلر گوزیاشیلا پایه سین

اهلبیته وقف ایدر الده اولان سرمایه سین

 

قنداقین بندین دوتار، عباس آدین سسلر بَلر

صود ویرر،غیرت قانی گهواره ده جوشه گلر

 

باصلابت بَسلنرپرورده احساس اولار

تا ئولونجه نوکر شایسته عباس اولار

 

هانسی عباس ، اُول ابوالفضلی که شهدن دویمادی

گچدی جانیندن ولی جانانینی تک قویمادی

 

شاه دین اوندا که سوندوردی خیامون مشعلین

سویلدی ای یاوران دین سیزه قربان گلون

 

سینه ده حبس ایتمیون دای بسدی سوزآهوزی 

گورسدیم بیربیر گورون جنتده جایگاهوزی

 

چیکدیلر صف باخدیلار، ماه منوردن صورا

گوردولر جنّاتی ، عباس ابن حیدردن صورا

 

یوز دولاندوردی ابوالفضله حسین تشنه لب

ایتدی فرمایش ندن بس باخمادون ای باادب

 

سویلدی مولا بو عشقیم ، سرنوشتیمدور منیم

نورِ رخسارون حسین والله بهشتیمدور منیم

 

صبح عاشورا آچلدی لشکره سان ویردیلر

میندیلر مرکبلره میداندا جولان ویردیلر

 

شاه دین عاشقلری هم عهدوپیمان اولدولار

گیتدیلر میدانه بیربیر قانه غلطان اولدولار

 

نوش ایدوب شهدشهادت یار و انصارحسین   

قالدی بیر شاه لب عطشان بیرعلمدارحسین

 

اذن جنگ آلدی حسیندن عاشق حق الیقین

تلّی آشدی سمتِ میدانه یل ام البنین

 

مرکب رهوارینه مهمیز ویردی غیضیلن

غیضیله سسلندی الآن جنگیمه کیمدور گلن

 

اَیُّهَاالکُفّار اولون آماده جنگه یکسره

من حماسه ساز عشقم آند اولا پیغمبره

 

ای ریاست شوقینه مرکب چاپانلار هارداسوز

لقمه ناپاکیله قدرت تاپانلار هارداسوز

 

مکر ونیرنگیله خلقی آللادانلار هارداسوز

دینی دیناره ساتوب حقی دانانلار هارداسوز

 

نایب پیغمبرین حقین یینلر هارداسوز

حیدرکراری نا حق سَبّ ایدنلر هارداسوز

 

نیتمدور اصغرین قنداقنه اولسون قسَم

کیم حسینه چکسه خنجر ریشه سین یردن کسم

 

کیمده جرات وار منیله تن به تن جنگ ایلیه

یامنیم تک عرصه گاهی دشمنه تنگ ایلیه

 

من اوشاقلیقدان تنِ اعدایه وحشت سالمشام

حیدرکرار الیندن لوح غیرت آلمشام

 

حاجتیم یوخدور ئوزومدن دم ویرام بوحینینده

جنگیمی شمرابن ذی الجوشن گوروب صفینیده

موضوع: حضرت ابوالفضل العباس (ع) شجاعت ,
زبان شعر و شاعر: نوحه ترکی

 

------------

 

شجاعت حضرت ابوالفضل (علیه السلام)

 

شاهباز بیشۀ عزّت دی عباس ِعلی

شاهکار پهنۀ خلقت دی عباس علی

هم اوزون قول هم اوجا قامتدی عباس علی

باب احسان قبلۀ حاجت دی عباس علی

 

رزمگاه عشقیده سرلشگر عشاقیدی

ماه اقلیم شهامت جلوۀ آفاقیدی

شمع تک بزم ولایت ده ایشی یانماقیدی

جامی لبریز ِ می ِ همّت دی عباس علی

 

خط درسین حیدر کراریدن مشق ایلین

ئوز آتاسی قدرت بازوسینه عشق ایلین

مرتضانین صولتین میداندا سرمشق ایلین

کیمسه بیلمور مرتضیٰ صولت دی عباس علی

 

کوفیان گوردی بیر آتلی یل دی رزم آور گلور

مشکینی دولدورماقا سالار مه پیکر گلور

سس دوشوبدور گوئیا اژدر بولن حیدر گلور

ساز جنگی کوک ائدن حجت دی عباس علی

 

رزمگاه کربلاده پرچمین آلمیش اله

تیر جانکاهیله ایستور دشمنین قلبین دله

بیر نفرده یوخدی جرأت اونلا رو در رو گله

چون بیلوللر حیدری ضربت دی عباس علی

 

سسله دی باشدان آتوب عباس دنیانین داشین

کوفیان! یاخشی تانورسوز سیز حسینون قارداشین

حیدرین اوغلی جگرخوار اوغلونا اَیمز باشین

قدرتی حیدر نشان قدرت دی عباس علی

 

نطفه ناپاک اولسا بیر کس نسلینه اطهر دئمز

دهریده کیمسه غرابین بالینه شهپر دئمز

مرتضیٰ اوغلانلاری هند اوغلونا رهبر دئمز

جدّی تک صحبت ده پرجرأت دی عباس علی

 

شاهبازم گلمیشم دشت بلاده پر چالام

بو حُصام آتشینله جانیزه من اود سالام

قدرتیم وار بیر نفسده علقمی سیزدن آلام

تک سوار رکن حیثیت دی عباس علی

 

بیز بنی هاشمدَنوق دل وئرمروخ بیگانیه

وئرمروخ ال بو جهاندا بیر رذیلِ زانیه

آل هاشم بیعت ائتمز زادۀ مرجانیه

پاک و اطهر نسله بیر حجّت دی عباس علی

 

خرمنه اود سالماقا نار بلا طوفانیم

من سویون عطشانی یوخ بیر وصل یار عطشانیم

آلتی آیلیق تشنه لب بیر صود امر قربانیم

اولماسا سو قالماقا خجلت دی عباس علی

 

بی وفالیق گورمیشم من چوخلاروزدان کوفیان

گور نه یولدا گئچمیسیز وار یوخلاروزدان کوفیان

بال و پر آچمیش وجودیم اوخلاروزدان کوفیان

ساقی جانباز و خوش نیت دی عباس علی

 

پنجه سیندن قان آخاردی بو عقاب خوش پرون

گورماقین دشمن قاچاردی قامت مه پیکرین

حیف ، گوز دگدی او صحراده سالوبلار اللرین

عندلیب خوش پر و هیبت دی عباس علی

 

حیدر کرّارین اوغلی اولدی مقطوعُ ٱلیَمین

غیرت و ایثارینه سس گلدی مینلر آفرین

وار یری عالم دییَه صد مرحبا ام البنین

قائم و قد قامت نهضت دی عباس علی

 

گوردیلر قولسوز قالوب غوغا دوشوبدور لشگره

گوئیا یوخ بیر مسلمان امر آتش بس وئره

شاهپرسیز شاهبازی سالدیلار آتدان یره

باشدا بیر شقّ القمر آیت دی عباس علی

 

بیر «مصیّب» آدلیَم درگاهیزه یوز سالمیشام

عُمده هر بیر دردیمه درمان قاپوزدان آلمیشام

وار ولی بیر مشکلیم حلّینده حیران قالمیشام

کربلایه گوزلریم حسرت دی عباس علی

 

بیر نولی بو هیأت اهلیلن رحیل و یار اولاق

نشئۀ عطر زیارتدن دولوب سرشار اولاق

کربلاده آلتی گوشه قبره بیز زوار اولاق

شه گدایه باخسا بس عزت دی؛ عباس علی

 

محمد علی مصیبی تبریزی

موضوع: حضرت ابوالفضل العباس (ع) شجاعت ,
زبان شعر و شاعر: نوحه ترکی , محمد علی مصیبی تبریزی

 

------------

 

شجاعت حضرت ابوالفضل (علیه السلام) 

 

به کف آب و لبش از تشنگی سوخت

که انسانی به انسان ها بیاموخت

 

اگر از آب تر گردد گلوئی

رود از آب عالم آبروئی

 

دهانش آشنای آب گردد

از آن آب خنک سیراب گردد

 

نگرداند اگر از آب رو را

گذارد در ره آب آبرو را

 

در آن حالت چه حالی کرد احساس

بگفتا خوار شو ای نفس عباس

 

به دریا ریخت از کف باز آبی

به نفس خویشتن کرد این خطابی

 

بگفتا من شوم از آب سیراب

حسینم را شود دل در تب و تاب

 

اگر من آب را نوشم حلالست

ولی در عشق این امر محالست

 

به نفس خویش گفت آن سرو قامت

مباح است آب اگر باشد حرامت

 

مگر رسم وفاداری ندانم

که نوشم آب چندی زنده مانم

 

چنین عمری نمی ارزد بهائی

بمانی شهره اندر بی وفائی

 

تو خواهی آب نوشی زنده مانی

بمان تا روز محشر گر توانی

 

مرحوم خوندل

منبع مجموعه کانالهای مدح و مرثیه

موضوع: حضرت ابوالفضل العباس (ع) شجاعت ,
زبان شعر و شاعر: نوحه فارسی , حاج حیدرخوندل

 

------------

 

شجاعت حضرت ابوالفضل عباس (علیه السلام)

 

سو سرین ایستی هوا قلبینون آرتوق عطشی

نفس عباسیله عشقون اوجالوب کشمکشی

 

آب سردیله مبارک الینی ائیتدی پر آب

قوریان لبلره نزدیک ایلیوبدور اوجناب

عشقیدن نفسینه گویا یتیشوبدور بو خطاب

عاشقه نقصدی گر نفسون الی قازسا قویی

نفس مغلوب ایله یاندیر یره توک ایچمه سویی

 

ایچمدی آتدی یره مجری تصمیم اولدی

نفس سلمی واریدی عشقینه تسلیم اولدی

نفسله عشق آراسی رابطه تحکیم اولدی

پیشتاز ائیتدی ئوزون قافله عرفاندا

عبدصالح دیولور علت اودور هر یاندا

 

گوئیا گلدی بیانه دئدی ای آب روان

موج وور ایله نفدری ایلیورسن جریان

عشقیمی نفسله مغلوب ائده سن ائیتمه گمان

تشنه لردن نه روا نفسنی عباس سچه

آقا لب تشنه قالا خیمه ده نوکر سو ایچه

 

ایچمرم قطرون اگر اولسا سنون آب حیات

باخمارام گر اتگیمدن یاپوشا نهر فرات

من علی اصغریمه آختارورام راه نجات

سوسوزام یوخدی علاقم ولی بیر ذره سنه

قوریان لبلرین ایسلاتسام اونون بسدی منه

 

هر بشر دهریده بیر خوش عمله طالب اولار

مشکلاته اوعمل عشقینه تز غالب اولار

سعی ایدر بسکه نتیجه ئوزونه جالب اولار

دورمشام منکه او گوندن بو جهاندا ایاقا

وار علاقم سوسوز انسانلارا سو پایلاماقا

 

گیدورم خیمه لره ساری امان وئرسه قضا

مشکی سالم یتورم سسلنم ای آل عبا

بالا قزلار سو ایچه مندن اولا بلکه رضا

ایلکه خیمه ده سو ایچدی هامی اهل حرم

تشنه لر دویسا سودان قالسا ئوزومده ایچرم

 

رسمدور دوشسه اگر مشکله هر اهل ولا

دردین عباسه دیوب اخذ ایلیور فوری دوا

بنده سین صاحب اعجاز ایلیوب ذات خدا

بزم عز و شرفون عزتی عباس آدیدور

"انورون"دفترینون زینتی عباس آدیدور

 

مرحوم انور اردبیلی

منبع مجموعه کانالهای مدح و مرثیه

موضوع: حضرت ابوالفضل العباس (ع) شجاعت ,
زبان شعر و شاعر: نوحه ترکی , انور اردبیلی

 

------------

 

 رجز خواندن حضرت ابوالفضل (علیه السلام)

در مقابل لشگر کوفه

 

ایّها القوم ظُلَم عالمه سردار منم

نائب منقبت حیدر کرار منم

 

هل اتی مخزنینین دُرّ ِ گرانمایه سیم

لافتا دُرجینه بیر لوء لوء شهوار منم

 

نقطه ذال اذا زُلزِلَتِ الْاَرضه ضمیر

قدرت قاهره قادر قهار منم

 

مقصد اَنْفُسنا، وارث فخر النُّجبا

قُل کفى’ آیه سینه محرم اسرار منم

 

آیه نصرُ مِنَ الله دا اولان فتح غریب

سیف برنده مسلول شرر بار منم

 

اِعْلَموا وَ اسْتَمِعوا ایّها الانصار یزید

کلمه نصرت حقّی ایدن اظهار منم

 

ضاربُ السَّیف، شجاعُ البَطَلِ الْمرتضوی

قاهرُ القومِ عدو، قامِعُ الاَشرار منم

 

سالک نَهجِ هدا مِنهَجِ مِنهاجِ وفا

لفظ یُوفون، ضمیرینده وفادار منم

 

و اَنا اِبنِ اسدالله ِ امام الثَّقلین

زادهء صف شکن سرور اَبرار منم

 

حُجَّة اللَّهه اَخی، بَلْ هُوَ قرآنِ مجید

فیض قرآن مبین شرحینه طومار منم

 

مشتری ویرماقا جان ، توکماقا قان مرّیخم

صاحب سیف و سِنان خنجر خونخوار منم

 

قمر برج عطایم در دریای سخا

نیّر چرخ ولا نورینه آثار منم

 

لقبیم ماه بنی هاشم اوزوم زهره جبین

شمس افلاک وفا مطلعُ انوار منم

 

مین عُطارِد یازا بولمز هنریم دفترینی

زُحلى طینت ایچون صاعقه کردار منم

 

کافدن قافه کیمین شوکتیمین شهرتی وار

عالم شوکت آرا میر جهاندار منم

 

بیر الیم آتش سوزان بیر الیم آب روان

دشمنه برق بلا، قاتل کُفّار منم

 

شاطریمدور ملکَ الموت، نَقیبیمدی قضا

کاروان هنره قافله سالار منم

 

دوتموش آفاقی جلالیم گوز آچون یاخشی باخون

تانیون حضرت عباس علمدار منم

 

قیلمشام جانیمه مین خنجر بُرّانی قبول

بو حسین قارداشیما یار و مدد کار منم

 

قویمسوز سوره توحید کیمی فرد و وحید

قریلوب یاور و انصاری اونا یارمنم

 

سالمسوز دایرهء محنته چون نقطهء نون

وَالقَلَم ، نونیدور ، ای قوم اونا غمخوار منم

 

بوکدولر قاف کیمی قدّ ِ برازنده سینی

مَدّ تک قافینین اوستونده هوادار منم

 

ای امامی بیله خوار اُلدورن اُمَّت تانیون

درگهینده بو شهین عبد گنهکارمنم

 

ایلیوبدور منی سقا بو جگر تشنه لره

خجلتیم چوخ ، الی بوش ، دیده سی خونبار منم

 

گلموشم اَل گوتوروب جانیدن ای قوم ظُلَم

مطلبیم وار بیله سودایه طلبکار منم

 

خنجر و نیزه سیزون ، سینهء مجروح منیم

نقدر اولسا وورون یاخشی خریدار منم

 

بیر باخون قولاریمی سالماقا آماده اولون

ثانیِ ناصرِ دین، جعفر طیّار منم

 

بیر بو مشکیم دولوسی قان آخیدون سینمدن

عوضینده سو ویرون جامیله، ناچار منم

 

ایچمرم من اگر اولسمده سوسوزدان اما

اُلدورون اُلماقا واللّهی سزاوار منم

 

قوریوب لبلری بیچاره سکینه یانوری

سو گتورَّم بو سوزی ایلین اقرار منم

 

اصغرین ناله سی اوچ گوندی چخوب افلاکه

کیمه دردین دیسون اول طفله پرستار منم

 

آپاروم سو ویروم اول طفله گلیم میدانه

دوغریون پیکریمی قانیله گلنار منم

 

اُلدورون سیز ایکی منصب ویریلن سرداری

هم علم صاحبی سقای دل افکار منم

 

ایلرم نظمیله تسخیر فصاحت چمنین

(قمری) بزم عزا زینت اشعار منم

 

مرحوم قمری

منبع مجموعه کانالهای مدح و مرثیه

موضوع: حضرت ابوالفضل العباس (ع) شجاعت ,
زبان شعر و شاعر: نوحه ترکی , قمری

 

------------

 

 احوالات عابس بن ابی شبیب و

گریز به جنگ حضرت ابوالفضل (علیه السلام)

 

دیل آچماز اهل دل ، درد دیله ، اغیار اولان یئرده

اورک سرین دئمز اغیاره ، عاشق یار اولان یئرده

 

محبت عالمنده جرم دور فاش ائتماق اسراری

حریم بزم رازه محرم ائتمز یار ، اغیاری

جهاندا عاشق و معشوق و عشقین واردی معیاری

مقام ، اغیاره اولماز محرم اسرار اولان یئرده

 

گرک بزم محبتده سئچیلسون یاردن اغیار

بیلینسون قدر و قیمتده ، خزفدن گوهر شهوار

مطاع جاندی بازار وفاده رونق بازار

خزف بازاری گرم اولماز در شهسوار اولان یئرده

 

جمع اولماز بیر یئره اضداد بو قانون عالم دور

گوروب کیم صبح صادق ، ظلمت شامیله توام دور

هاچان بزم حریم یارده ، یگانه محرم دور

بو ، حرمتدن اوزاقدور یار اولا اغیار اولان یئرده

 

طریق عشقده سالک بلا پیکون ائدر پئئشواز

ایاق چکمز محیط ابتلادن عاشق جانباز

ائدر سیر و سلوکندا سفر مین شوقیله آغاز

یولون رنجین آتار باشدان حدیث یار اولان یئرده

 

بلا پیمانه سندن مست اولانلارهوشیار اولماز

قیام حشره تک اول نشئه دن هرگز خمار اولماز

بو می بیر می دی کیم نا اهله اصلا ساز گار اولماز

حریف پاکباز ایستر ، خم و خمار اولان یئرده

 

او عاشق لر که واقف اولدی اسرار حقایقدن

اورکدن چکدی ال بالمره اسباب علایقدن

اوزاقدور پای بند اولماق جهانه شان عاشقدن

که عاشق طالب اولماز عالمه ، دلدار اولان یئرده

 

بلا هنگامه سین آنلار ، سئچر برنامه دن عاشق

ائدر آسوده اوز جسمون زره دن جامه دن عاشق

قویار تاج شرف باشه گئچر عمامه دن عاشق

لباس و درعی نیلر ، دولت ایثار اولان یئرده

 

اگر بیلماق خیالون وار جهاندا عشق معناسین

حقیقی جان بکف عاشق لرین سیر ایله دنیا سین

چکوبلر گور نئجه شوقیله باشه شوق صهباسین

بلی عاشق دایانماز ، ساغر سرشار اولان یئرده

 

مجسم قیل بلا دشتین نظر ده گور نه غوغا دور

حسین بن علی دور بیر نئچه اهل تولا دور

ولی باشدان باشا اول عرصه گه مملو اعدا دور

مجاهد نیلسون بیر لشگر جرار اولان یئرده

 

سلوک عشقده بیر باخ حسینون گور نه اعوانی

چکوبدور باشه بیر باش تک به تک اول جام صهبانی

بیری (عابس) دور اول عاشق لرین ، مهر و وفا کافی

که گئچدی ملک و جاندان ، عالم دیدار اولان یئرده

 

باشندان طاس کلاهین ، پیکریندن گیم و خفتانین

آتوب آسوده ائتدی هر تعلقدن دل و جانین

تجرعالمنده ، قیلدی ثابت عشق میزانین

گرک میزان عشق اولسون عیان معیار اولان یئرده

 

قویوب مین عجزیله یوز آستان درگه عشقه

قیلوب عرض ارادت محضر شاهننشه عشقه

آلوب رخصت قدم قویسون دلیرانه ره عشقه

که سالک سیر دن قالماز یولی هموار اولان یئرده

 

قدم تا بیشه جنگه قویوب اول شیر بی پروا

دوشوب فوج گراز و گله ی روباه آرا ، غوغا

هراسندن چکوبدور ال جدلدن لشگر اعدا

چکر ال جنگدن اهل جدل ناچار اولان یئرده

 

او دم که عابس بن بوشبیب آهنگ جنگ ائتدی

او وسعتده بلا صحراسینی اعدایه تنگ ائتدی

حیاتون شهدینی اشرار کامیندا شرنگ ائتدی

کیمون وار جرعتی جنگه بئله سردار اولان یئرده

 

گوروب ناگه (ربیع بن تمیم ) اول شیرغرانی

که جولان ایلوری شیرانه شمشیر الده میدانی

دوتوب یوز لشگره ائتدی مخاطب اهل هیجانی

آتون با شدان جدل فکرین بو افسونکار اولان یئرده

 

بو( عابس) دور بیلون لشگر خیال ائتمون که تنها دور

شجاعت بیشه سینده بسلنن بیر شیر هیجا دور

بونی من جنگ لرده گور موشم هر فنده دار ا دور

دلیر نامور دور ، صحبت پیکار اولان یئرده

 

گلوب دوردی مقابل لشگر کفاره اول سردار

باشندا شور عشق الله ، النده تیغ آتشبار

مبارز ایستدی اما جدلدن ائتدی خوف اشرار

شهامت سلب اولار چون تیغ آتشبار اولان یئرده

 

گوروب (سعد اوغلی) بو وضعی سپاهندان اولوب حیران

دوتوب یوز قورخوسندان لشگرکفره وئروب فرمان

که لشگر سنگسار اتسون اوزاقدان یوخسا یوخ امکان

یاخیندان جنگه بو جنگ آور سالار اولان یئرده

 

قوشون سعد اوغلونون امرین قویوبلار یکسر اجرایه

شروع ایلوبد یلر داش آتماقا اول شیر هیجایه

سالوب روبه صفت لر هلهله میدان دعوایه

که جرعت جنگه اولماز بنده ده ،احرار اولان یئرده

 

گوروب یوخ بیر نفر قویسون قدم پیکاره اول سردار

چکوب با لمره ال جنگ و جدلدن لشگر کفار

سپاهه گوستره معنای عشق و صورت ایثار

گلوب دوردی مقابل لشگر کفار اولان یئرده

 

خطاب ائتدی سپاه کفره ای لشگر فرار ائتمون

گلون مردانه میدانه اوزا قدان سنگسار ائتمون

چکون شمشیر آ تشباری ، ترک کار زار ائتمون

جدلدن مرد قاچماز مرد میداندار اولان یئرده

 

ندن باک ایلوسیز من که بو چولده گئچموشم جاندان

محال اوز دوند رم مین یولدا دوغرانسام بو میداندان

جهاده آلمیشام رخصت بو عنوانیله سلطاندان

که جان بذل ایلیرم من عرصه خونبار اولان یئرده

 

چیخاردوب آچدی آتدی گیم و خفتان و دبیلقاسین

حجابات تعلقدن ائدوب آسوده اعضاسین

ووروب قلب سپاهه عاشقانه ، باد پیماسین

گرک عاشق نشان وئرسون اوزون کردار اولان یئرده

 

نه اگنینده زره نه باشدا خود اوز قویدی پیکاره

شکوه حمله سیندن دوشدی وحشت قلب کفاره

چیخوب ( این المفر) صوتی قوشوندان چرخ دواره

فرارایلر مبارز رسم دور ، کرار اولان یئرده

 

حدیث جنگ (عابس) یاده سالدی جنگ (عباسی)

او سردار رشید کربلا اول اشجع الناسی

او چولدی جانه گتدی ضرب شصتی قوم خناسی

علم لر سرنگون اولدی بو پرچم دار اولان یئرده

 

قدم میدان هیجایه قویوب اول مرتضی صولت

کمال صولتوندن سلب اولوب اشراریدن جرعت

او صحراده قدم میدانه قویسون کیمده وار قدرت

سلیل مستطاب حیدر کرار اولان یئرده

 

ازل فرزانه دیل آچدی نصیحت ائتدی اعدانی

که بلکه خواب غفلتدن اویاتسون قوم نادانی

ولی هیهات او جاهل لر قبول ائتسون بو برهانی

نصیحت بهره وئرمز ، جهل و استعمار اولان یئرده

 

دوروب بیر هیبت ایله مرکز میداندا مردانه

که گویا مرتضی دور جنگ خندقده دلیرانه

چکوب دور ذوالفقارون اوز قویوب لشگر بیابانه

گرک قاچسون قوشون بو سرور ابرار اولان یئرده

 

گوروب هرکیم بو حالی سسلنوب لشگر قاچون گلدی

جهاده عزم ائدوبدور وارث حیدر قاچون گلدی

خیالوز وار باشوز قالسون سلامت گر قاچون گلدی

والاحتم دور ئولماق بو منصب دار اولان یئرده

 

پیاده آتلیدان سبقت ائدور قاچسون معارکدن

قوتارسون جان سلامت بلکه میدان مهالکدن

داهی ائتمور اطاعت توده مملوک ، مالکدن

ندور مملوک و مالک بو سپهسالار اولان یئرده

 

گوروب اقدام ائدن یوخ جنگه چیخسون کیمسه لشگردن

چیخوب (هل من مبارز) نعره سی عرشه او سروردن

ولیکن اولمادی بیرسس وئرن اشرار کافردن

که سس وئرسون ابالفضله او گیر و دار اولان یئرده

 

مصمم اولدی لابدجنگه عباس ایلسون اقدام

اوزون ووردی سپاه کفره الده تیغ خون آشام

قویوب یوز قاچماقا اما هراسندن سپاه شام

فرار آسانترین یولدور جدل دشوار اولان یئرده

 

ابوالفضلون هراسندن بلا دشتی اولوب محشر

قویوب یوز قاچماقا ، سرباز و پرچمدار و سرلشگر

دگیبدور بیر بیره نظم قوشون صفلر سینوب یکسر

سینار صف لر مسلم صف شکن صفدار اولان یئرده

 

هله قوللار بدندن دوشمیوب اعضاسی سالم دور

هله اوخلانمیوب مشگی ، عقاب اوستونده قایم دور

بیر الده تیغ بیر الده علم ، میدانه عازم دور

گرک جنگه مجاهد عزم ائده وادار اولان یئرده

 

سالوب هر سمته آت دیلدن چکوب بیر نعره تکبیر

بیر الده پرچم نصرت بیر الده قان توکن شمشیر

او چولده اولمادی اشراره قاچماقدان صورا تدبیر

فقط قاچماقدی چاره حمله دن آثار اولان یئرده

 

قاچان قاچدی قالانلار طعنه شمشیری نوش ائتدی

اوزون بعضی فراته آتدی غرق اولدی سودا گئتدی

خلاصه اول مهالکدن قاچانلار ایمنه یئتدی

امان قاچماقدا دور صحنه ، هلاکت بار اولان یئرده

 

ائله جنگ ائتدی شیرانه او شیر جنگی شرزه

که خوف مرگدن دوشدی قلوب لشگره لرزه

قلنجی اولدی اوت دشمن گیاه بی خود و هرزه

مسلم خار و خس ائتمز تحمل نار اولان یئرده

 

سپاهه حمله ائتدیقجه رجز انشا ء ائدور عباس

دیلنده ذکر یا حق حقدن استمداد ائدور عباس

قلیج ویردیقجه ، حقی هر نفسده یاد ائدور عباس

که یاد ائتماق حقی واجبدی حق انکار اولان یئرده

 

وفادن عاشق صادق گئچر بیر گوز ایکی قولدان

اوخ اوستن وورسالار اوخ سالکه قالماز گئدن یولدان

خلاف ائتمز سلوکندا بلا گر یاغسا صاق ، صولدان

بلا سد ره اولماز ، سالکه عیار اولان یئرده

 

او چولده جنگ عباسی گورنلر وحشته دوشدی

قدم میدانه هر کیم قویدی خا ک ذلته دوشدی

دلاور لر بو رفتاری گورنده حیرته دوشدی

بلی حیرت ائدر لشگر ، علی رفتار اولان یئرده

 

اوزون ووردی ، سپاهه یول فراته تیغ ایله آچدی

علم لر یاتدی صف لر سیندی لشگر خوفدان قاچدی

سس آفاقه دوشوب سقا فرات اوسته علم ساچدی

مسلم فتح اولار دریا بئله سردار اولان یئرده

 

فراته وارد اولجاق دولدوروب اولده سو مشگین

خیالندا ائدوب ترسیم او لحظه تشنه لر اشگین

سودان ایچموب اگر چه تشنه لیق تحریک ائدوب رشگین

نئجه سقا سو ایچسون تشنه لب قیزلار اولان یئرده

 

فراتون فتحی خرگاه ولاده قیزلارا چاتدی

سوسوزلق فکرینی باشدان سوسوزلار شاد اولوب آتدی

فرح دریا سینه ، اصغر آناسی شوقدان باتدی

دئدی قالماز بالام تشنه بئله غمخوار اولان یئرده

 

تماشا قیل مواساته چیخوب لب تشنه دریادن

ائدوب نفسین ملامت گور نئجه فیض تولادن

بو امیده که سوندورسون عطش سوزون احبادن

سو ایچموب غیرتندن ، قلزم ذخار اولان یئرده

 

مشیت اقتضاسندان قضا کسدی یولون افسوس

آپارسون خیمه گاهه مشگی سالم ائتد یلر مایوس

او چولده بیلمورم ، نولدی که دشمن چالدی طبل و کوس

بساط عیشه دوندی رز مگه اشرار اولان یئرده

 

حسین بن علی دو درگه لطف و کرم شب خیز

خلوصیله بو شاهون درگهینده اول خدم شب خیز

بو درگه ده اولان اولسون گرک ثابت قدم (شب خیز)

گوز اوتسون اوزگه درگهدن بئله دربار اولان یئرده

 

مقام شعرده درک ایله بیل استاد دور (شانی)

حریم حرمتون ساخلا ، اونا شاگرد اول یعنی

بو یئرده شعر ائدوب املا گوزل وجهیله پر معنی

ندن یازدون بو اشعاری ائله اشعار اولان یئرده

 

مرحوم عباس شبخیز

منبع مجموعه کانالهای مدح و مرثیه

موضوع: حضرت ابوالفضل العباس (ع) شجاعت , احوالات یاران امام حسین (ع) ,
زبان شعر و شاعر: نوحه ترکی , عباس شبخیز

 

------------

 

رجز حضرت ابوالفضل (ع)

 

من ابوالفضلم مرامیم دین حق احیاسیدور

بسدی بو فخریم دیسونلر کربلا سقاسیدور

 

شاهبازم من فضای عشقیده پرچالماقا

خرمن کفره شرار تیغیله اود سالماقا

اولموشام مامورسیزدن بو فراتی آلماقا

آمریم امرایلیوب فکریم اونون اجراسدور

 

سیز مسلمانسوز گردی دینه اولسون خدمتوز

دینوزی حفظ ایتماقا لازمدی اوز جدیتوز

غفلتوز باعث اولار آخرگیدر حیثیتوز

عرض و ناموسوز گورورسوزدست کین یغماسیدور

 

ای جماعت اولمیون تابع یزید جانیه

ایستوری آباد دینی دوندره ویرانیه

سرنوشت مسلمین دوشسون ید بیگانیه

بلموسوز بو نکته نی سیزلر حسین احساسیدور

 

ای جماعت سیز بصیرتله باخون کوراولمیون

سیز مسلمانسوز اماندورتابع زور اولمیون

حاکموز مزدوردور مزدوره مزدور اولمیون

سیزلری یولدان چیخاردان خرجی ایماسیدور

 

ای مسلمانلار دانوب قرانی گمراه اولمیون

زاده سفیانه خاطر خواه و دلخواه اولمیون

دوتمیون دنیانی بیله طالب جاه اولمیون

عزت دنیای بیدین ذلت عقباسیدور

 

لشکراسلاموسوز سیز یاتمویون بیدار اولون

چوخ خموش اگلشمیون عالمده مرد کار اولون

پیشوای ملت اسلامه بو گون یار اولون

ایتمیون غفلت ایشوزده آخرت سوداسیدور

 

بو حسین باخماز یازولموش قتلینه برنامه لر

گوز ایوینده وار نچه قانه باتان عمامه لر

بچدیروب اوز نازلی قیزلارینه قاره جامه لر

ماملکدن ال اوزوب بو دین حق احیاسیدور

 

مرحوم تایب تبریزی

کامل این اشعار در جلد 2 گنجینه گذشتگان ثبت شده است

منبع کانال گنجینه گذشتگان

موضوع: حضرت ابوالفضل العباس (ع) شجاعت ,
زبان شعر و شاعر: نوحه ترکی , تائب تبریزی

 

------------

 

قمر منیر بنی هاشم حضرت ابوالفضل العباس (ع)

حماسه نهرعلقمه

 

اولموش فرات اوستونده شور محشر

دوت مین قوشون بیر شیرلن برابر

 

بیر سمتیده سردار دین ابوالفضل

بیر سمتیده اشرار کینه‌پرور

 

بیر سمتیده سقّای تشنه کامان

بیر سمتیده کمگشتگان کافر

 

بیر سمتیده شور و صفا و عرفان

بیر سمتیده جور و جفا و منکر

 

جان تک باسوب آغوشینه سومشگون

حفظنده جهد‌ایلر سلیل حیدر

 

تنگ ایلیوب میدان کارزاری

رو‌به‌لره اول شیر شیر داور

 

گویا قیامتدور بوگون عوالم

آشوب و غوغادن دولوب سراسر

 

طوفان اولور موجه گلنده لشکر

باشلار دوشور نهر فراته یکسر

 

ناگه عدو بیر ظلم ائدیب کمیندن

ساق آل قلم اولدی بسان جعفر

 

غیظه گلیب عبّاس شیر‌یزدان

فریاد‌ائدیب ای قوم پست و ابتر

 

وَاللّـهُ اِن قَطَعتَموا یَمینی

اِنّی اُحامی اَبداً عَنْ دینی

 

لشکر بولون بو صاحب‌الزّماندی

مه عارضی وجه‌اللّهه بیاندی

 

شمس رخی «اللّـهُ نوره» معنی

مشکوة نور حیّ لامکاندی

 

ذاتنده نور حق سرشته اولموش

یوزده صفات کبریا عیاندی

 

خاک رهی کحل البصردی حوره

نور جمالی جلوة جناندی

 

عزّ و جلال و شوکت و کرامت

مهر و وفا و الفته نشاندی

 

سبط نبی زهرایه نور دیده

نفس علیّ مرتضایه جاندی

 

قدوّسیان، کرّوبیان، ملائک

جنّ و بشر وصفنده ناتواندی

 

فرمان وئره، اجراسینه سراسر

ذرّات عالم، کونیله مکاندی

 

سردار دین ارشاده دل آچوبدور

لشکر جوابی تیریلن کماندی

 

گوردی علاج اولماز نصیحتیله

حاکم اویرده تیغ خونفشاندی

 

غیظه گلیب فریاد ائدوبدی لشکر

ساق آل گدیب باغریم اگرچه قاندی

 

وَاللّـهُ اِن قَطَعتَموا یَمینی

اِنّی اُحامی اَبداً عَنْ دینی

 

مست اولموشام من بادة وفادن

تا کام آلا دل عالم بقادن

 

جانان یولوندا رند می‌پرستم

مست اولموشام من ساغر ولادن

 

اورگشموشم درس وفا و عشقی

مکتب سرای پور مصطفی‌دن

 

لب تشنه‌یم ظاهرده لیک جانیم

سیراب اولوب سرچشمة وفادن

 

گوردوم جمالون خیمه‌دن گلنده

مخمور عشقم چهر دلربادن

 

سردار دینم، یادگار حیدر

هیجا گونونده قوخمارم جفادن

 

ای فرقة کافر بولون که هرگز

ال چکمرم من شاه کربلادن

 

تکرار‌ائدیب اول شیردل شعارین

آلدی توان و تاب اشقیادن

 

وَاللّـهُ اِن قَطَعتَموا یَمینی

اِنّی اُحامی اَبداً عَنْ دینی

 

ای قوم کین عبّاس نامدارم

نام آور میدان کارزارم

 

جانان یولوندا گیچموشم جانیمدان

من عاشقم اسلامه جان نثارم

 

جانیم فدادور شاه عالمینه

دار بلاده رند سر بدارم

 

پیمان بودور جانانیلن وجودیم

دوغرانسادا پیماندا پایدارم

 

دنیا بویی دشمن اولا سراسر

هیجا گونونده شیر روزگارم

 

اولدورموسوز یاران با وفامی

هجران غمینده یار بیقرارم

 

عهد ایتموشم حق اوسته بذل ائدم جان

ای قوم کین عهدیمده استوارم

 

دینه فدا اولماق منیم شعاریم

تاوار نفس پابند بو شعارم

 

وَاللّـهُ اِن قَطَعتَموا یَمینی

اِنّی اُحامی اَبداً عَنْ دینی

 

من عاشقم درد و غم و بلایه

جانیم فدا دور شاه کربلایه

 

سردار دین سرلشکر حسینم

صاحب لوا سلطان نینوایه

 

من پور شیر بیشة شجاعت

من وارثم علیّ مرتضایه

 

وئرمشدی فرمان شاه مشرقینیم

تحصیل آبه طفل مه‌لقایه

 

آلدیم فراتین شرعه سین سراسر

دولدورموشام سو، مشک دلربایه

 

دلده واریدی آرزو، سومشکیم

سالم یئته اولاد مصطفایه

 

ناگه ویروب اوخ مشکیمه اوجاتدوز

ناله خیمدن طاق نُه سمایه

 

ساق پنجه می سالدوز اگر غمیم یوخ

ای قوم بی دین آنداولا خدایه

 

وَاللّـهُ اِن قَطَعتَموا یَمینی

اِنّی اُحامی اَبداً عَنْ دینی

 

مست اولموشام مست شراب وحدت

مخمور جام بادة شهادت

 

جانان یولوندا گیچموشم جانیمدان

تا ایلیم اسلامدن حمایت

 

باک ائتمرم گر دولسا دشمنیله

بودشت غم ای فرقة ضلالت

 

من زادة شیر خدا علی‌یم

عبّاسم و سر حلقة شجاعت

 

من مظهر قهر خدای قهّار

من منبع شهامت و رشادت

 

من یادگار میر لافتی یم

من وارث علی شه ولایت

 

ساق آل فدا اولدی امیر عشقه

تاپدیم بو نوعیله علّو و رُتبت

 

صول الده گیتسه یوخدی ذرّه باکیم

هان! ای گروه کینه و جهالت

 

وَاللّـهُ اِن قَطَعتَموا یَمینی

اِنّی اُحامی اَبداً عَنْ دینی

 

دل وئرمیشم من شاهد السته

سودائیم دلدار می‌پرسته

 

زنجیری زلف نگار مه‌رو

افتاده صیدم دست و پای بسته

 

دوتموش طریق میر انس و جانی

دل وئرمیشم چشم خمار مسته

 

من خستة تیر نگاه یارم

اولمام خدنگ کینه‌ایله خسته

 

مین خوشه سنبل دور ره وفاده

سینمده تیر کینه دسته دسته

 

سینماز اراده‌م جنگده اگرچه

اولسا عمودیله باشیم شکسته

 

اوج ولاده شاهباز عشقم

باش اگمرم خصم پلید و پسته

 

«منعمدی» کایناته شهریاریم

من «فانیم» او سرور خجسته

 

اود یاغدیرار شمشیر آبداریم

سیز یاغیان شاه تشنه اوسته

 

اما منه فرمان جنگ ویرموب

سلطان دین نخل هدایه هسته

 

بر ال گیدیب مندن ولی وجودیم

هر ذرّه سسلرسیز سپاه پسته

 

وَاللّـهُ اِن قَطَعتَموا یَمینی

اِنّی اُحامی اَبداً عَنْ دینی

 

 استاد فانی تبریزی

منبع کانال اشعار فانی تبریزی

موضوع: حضرت ابوالفضل العباس (ع) شجاعت ,
زبان شعر و شاعر: نوحه ترکی , فانی تبریزی

 

------------

 

جنگ دو برادر شجاعت حضرت اباعبدالله الحسین (علیه السلام) و حضرت ابوالفضل العباس (علیه السلام)

 

گوردولر جنگه ابوالفضل وفا پرور گلور

زین مرکبده دیرسن شعلۀ آذر گلور

 

سرسپاه شاه بی لشگر ایدوبدور عزم جنگ

غیظدن حیدر باخیشلی گوزلر اولموش سرخ رنگ

دستۀ زاغ اوسته گویا شاهباز تیز چنگ

قهر و غیظیله شکار ائتماقه آچمیش پر گلور

 

سینه پهناور ، اوجا قامت ، ایکی قولار ستبر

گورمیوب دنیا گوزی گورمز ایله غرّان هژبر

گورسه سهم و صولتین پنهان اولار درّنده ببر

باخسا هر کیمسه دیر اژدر بُولَن حیدر گلور

 

چوخلاری صفین ده گورموشدولر دعواسینی

برق خاطف تک چالان شمشیر خون پالاسینی

قان توکن ابطالی حیرتده قویان هیجاسینی

سسلنوبلر فوق زور مالک اشتر گلور

 

جنگ خندقدن نمایاندور بو چولده منظره

تیغ تیز الده گلور شیر خدا عَمر ئولدوره

یاعلی المرتضا - یوز دوندروبدور خیبره

یخماقا خیبر حصارین فاتح خیبر گلور

 

صاق الینده تیغ خونریز اول جوان پُر شُکوه

یوز قویوب نهره صول الده پرچم نصرت پژوه

لشگر آل امیه قلبینی دوتدی شِکوه

کتفده خشکیده بیر مشک اول وفا پرور گلور

 

گرچه تک دور ابن قتال العرب یوخ بیر کسی

دولدوروب آفاقی اما ئولّم ئولدورّم سسی

برّ و بحری دولدوروب آت شیحه سی ئوز نعره سی

سسلنور اِنّی اَنَا العَبّاس او نام آور گلور

 

بُلدولر دل دادگانِ مال و جاه دنیوی

وار علی اوغلوندا نه قدرت نه زور معنوی

ال هامی الدن اوجا کسکین قلج - بازو قوی

گوئیا داس اجل بیچماقه تندن سر گلور

 

تا یتیشدی مرکز میداندا دوردی خشمناک

سسلدی ای اهل کوفه حشردن یوخ سیزده باک

آز قالور اولسون عطشدن آل پیغمبر هلاک

بُلموسوز بو ظلمدن فریاده پیغمبر گلور

 

مهر زهرادور فرات ای اشقیای کین مآب

عترت زهرایه اما ویرموسوز بیر جرعه آب

شدت سوز عطشدن اولدی آل الله کباب

نه رذالتلر ظهوره سیزدن ای لشگر گلور

 

قابض الارواحوزام ای قوم گلدیم جان آلام

اکبری ئولدورموسوز سیزدن گرکدور قان آلام

باش وئرم بیر مشک سو ای لشگر عدوان آلام

اود دوتوب سوز عطشدن نالیه اصغر گلور

 

ئورگدوب جنگی فنونی صاحبِ تیغ دو دم

لشگر جاوید اسلامیته ارتشبُدَم

بیر نفر منلن اولانماز تا قیامت همقدم

جز حسین ابن علی مندن هامی آخر گلور

 

بیر نفر سسلندی ویرمه صحبته عباس طول

یا گرک قارداشون ائتسون بیعتی شخصاً قبول

کوکبِ اقبالی یا - بو لشگرین تاپسون افول

بو ایکی ایشدن سیزه هانسی گورون اَیسَر گلور

 

تا بو صفلر بو علم لر وار بو وضع و های و هو

ویرمروق بیر قطره اصلا یر یوزین دولدورسا سو

شیوۀ اعراب یوخ - مرسومدور دنیاده بو

پیشنهاداتی قبول ایلر او که مضطر گلور

 

چشم عباسه بو سوزدن اولدی دنیا تار و تنگ

سسلدی ای بی حیالر سیزده یوخدور عار و ننگ

ریزه ماهی اولسا بیر میلیون مگر قورخار نهنگ

شیر قورخماز گورسه گر روباه یوز مین لر گلور

 

تابع قرآن امامی نفسینه مولا بولر

من حسینه نوکرم بیعت ایشین مولا بولر

صفلری سیندیرماقی عباس نام آور بولر

قطع و فصل مطلبه تیغیم منیم داور گلور

 

ئورگنن شیر خدادن فن دعوانی منم

قانیله دریا ائدن خشکیده صحرانی منم

تیترر عالم سطوتیمدن حیدر ثانی منم

مثل و مانندیم جهانه ائتمیون باور گلور

 

من که قتال العربدور حیدر کرار آتام

قدرتیم وار قانوزی نهر فراتیله قاتام

یا آلام نهری و یا باش فکرینی باشدان آتام

جنگیمه بیر بیله لشگر گر چه سرتاسر گلور

 

تا دیوب بو سوزلری قاخدی هوایه صاق الی

برق تیغ تیزی ائتدی رزمگاهی منجلی

حمله ور اولدی سپاهه دلده ذکر یاعلی

کوفیان گوردی علی اوغلی علی سسلر گلور

 

یوز فراته قویدولار اول فرقۀ ترسو تمام

اولدی ظاهر کربلاده شورش یوم القیام

هر کیمه باشدان ووروب عباس نام آور حُسام

برق تیغی تنگ مرکبدن اولوب اظهر گلور

 

اول نهنگ بحر صولت دلدن عزم یم قیلوب

مشک چشمین تا سویون موجین گوروب پُر نم قیلوب

دولدوروب سو مشکین اوّل کتفده محکم قیلوب

اووجونی دولدوری قلبیندن گوروب آذر گلور

 

الده سو ائتدی نظاره لشگره اول جنگجو

سسلدی یوخ سیزدن اصلا باکیم ای قوم عدو

ایچمرم - ایچسم اگر وار قدرتیم بو من بو سو

ایچمسه مولا سو ایچماق نوکره بدتر گلور

 

بو سوئی خلقه مباح ایلوب خدای لاینام

وحش و طیر و دیو و دد سیراب اولور بوندان تمام

وار نه علت ائتموسوز سیز آل طاهایه حرام ؟

دللرینده العطش صوتی اولوب ازبر گلور

 

توکدی اوجوندان سویی اول نوجوان نیکخو

سویلدی ای سو - سولاردا قویمادون سن آبرو

خیمه گاه عترت طاهاده یوخ بیر شربه سو

تشنه لیقدان داده آلِ ساقی کوثر گلور

 

نهردن چخدی وزیر جنگ شاه بی سپاه

اوینادی لشگر یریندن خیمیه باغلاندی راه

ماسواللهین پناهی خیمه دن ائتدی نگاه

دورت طرفدن گوردی اشرار جفا گستر گلور

 

تا وزیر جنگینی تک گوردی سلطان حجاز

ایسته دی ویرسون وفالی لشگره بیر امتیاز

مرکب اوستن تیغ الینده آچدی پر چون شاهباز

سرسپاهه شاه بی لشگر اوزی یاور گلور

 

قدرت قهار ائدوب قوم ستمکاره هجوم

برق شمشیری سالوب اتباع شیطانه رُجوم

گر چه تعداد سپاهی ثبت ایدوبلر کَالنُّجوم

لیک پنبه تاب ایدنمز گورسه گر اخگر گلور

 

سرسپاه و شاه اولوبلار بیر بیره پشت و پناه

بیر طرفدن شاه بیر یاندان او یالقیز سر سپاه

کربلادن کوفیه قان سیلی آچدی شاهراه

بیر طرفدن ماه بیر یاندان خورِخاور گلور

 

شاه و فرمانده ایدنده حمله قوم کافره

دگدیلر مور و ملخ تک اهل کوفه بیر بیره

آتلی لار قاچدی قاچانلار بیر بیرین یخدی یره

های و هو قوزاندی گویا شورش محشر گلور

 

ایلدی دستور صادر ابن سعد نابکار

قاچمیون لشگر ایدون جدیتیله کار زار

بیر بیرندن جهد ایدون اولسون ایکی قارداش کنار

گر بولار آیریلماسا بیز قومه شور و شر گلور

 

اولسالار باهم اگر شهزادگان بوتراب

تک نه کوفه یر یوزین بالمرّه ایللَّر خراب

پور زال و سام و گرشاسب ایده هیهات تاب

بیر یری که اوردا جنگه بو ایکی سرور گلور

 

شاه و فرمانده آراسیندا اولوب حایل سپاه

جنب نهره دوشدی سقا جانب خرگاهه شاه

باخبر اولماقلیقا بیر بیرلریندن گاه گاه

قویدولار بیر رمز اوندان ظاهره مُضمر گلور

 

شه قلج ووردوقجا سسلردی اَنَا ابن المُصطفی

سس ویروب قارداشی سسلردی اَنَا ابن المُرتضی

قوّت دل آرتیروب قارداشه قارداش صوتی تا

ایله جنگ ایلردیلر گویا که شیر نر گلور

 

زادۀ زهرا دیینده من پیمبر اوغلیام

سسلنردی تشنه سقا منده حیدر اوغلیام

شه دینده من بتول پاک و اطهر اوغلیام

اوچماقا ام البنین اوغلی آچوب شهپر گلور

 

شه دینده من جهانه افتخارم افتخار

آفرینش عالمینده شاهکارم شاهکار

سسلنوب عباس علیدن یادگارم یادگار

لرزیه غیظ اوسته گلسم جمله بحر وبر گلور

 

سسلنده بیرده شه خلقه منم مالک رقاب

وحی منزلده آتامدور معنی اُمُّ الکتاب

گوردی سرلشگر سسی گلمور داخی ویرمور جواب

سمت نهر اوستن غریوِ لشگر کافر گلور

 

ناگهان قوم دنی طبل بشارت چالدیلار

شه بُلوب سقّانی نهر اوسته آت اوستن سالدیلار

شیر غُرّان دوره سین روبه صفت لر آلدیلار

های و هو ایچره ولی بیر نالۀ دیگر گلور

 

سس گلور گَل - ای وجودی آبروی آب و خاک

دوشموشم اَلدن ، الیمدن دوت اخی ادرک اخاک

اللریم گئتدی وجودیم اولدی قارداش چاک چاک

اوستومه هر سمتدن بو قوم بد اختر گلور

 

خلقتی ای کارگاه آفرینشدن غرض

جوهر پاکوندی جوهر عالم امکان عَرَض

ماسواللهه مطیع امرون اولماق مفترض

سن او کس سن فعل تکوینه آدون مصدر گلور

 

سو گتورماق تشنه لب اطفاله اولدی نیّتیم

حفظ مشک آبه بستیدی هامی جدیّتیم

حیف اولا اوخلاندی مشکیم قالدی ناقص خدمتیم

خجلتیمدن مشک چشمیمدن سرشک تر گلور

 

اللریم گِئتمیشدی گر چه ای امام محتشم

جد و جهد ایلردیم اما یاتماسون بلکه علم

بیر عمود آهنین آمالیمی ائتدی عدم

سیندی باشیم گور هارا اَمریم اولوب منجر گلور

 

ای بو چولده هر سئنق قلبین پناهی هارداسان

دادخواهی اولمویانلار دادخواهی هارداسان

باتسون آل هاشمین آز قالدی ماهی هارداسان

هر طرفدن اوخ گلور نیزه گلور خنجر گلور

 

خط مشین دوندروب اول سرور خشکیده کام

نهر علقم سمتینه عطف عنان ائتدی امام

باش، بدن ، قول توکدی بس که شاه ووردوقجا حُسام

هر گورن سویلری ، گویدن باش گلور پیکر گلور

 

منهزم اولدی قوای کوفیان سئندی صفوف

شاه دین بیر منظره گوردی که آرتوردی لهوف

قان ایچینده ایلیوب ماه بنی هاشم خسوف

سسلدی دور ، شمس عزت گور نجه اغبر گلور

 

سسلدون فریادووه بو بی پناهی گلمیشم

ای اوغولسوز پادشاهین سر سپاهی گلمیشم

خاندان عصمتین امید گاهی گلمیشم

شیونه سنسیز بو چولده عترت اطهر گلور

 

خلق اولاندان بدو خلقتده سماوات و زمین

حق یاراتمیشدی سنی من بی کسه حِصن حصین

یخدیلار بو چولده محکم حِصنیمی بو قوم کین

سن کیمی هیهات دهره سینمیان سنگر گلور

 

اسدی باغ عمروه بو دشتیده باد خزان

اولدی زیبا پیکرون آفت زده بیر گلستان

تاب ائدر دنیاده هانسی دل شکسته باغبان؟

من کیمی گورسه اگر گلزارینه صرصر گلور

 

سندیروب کشتیّ اسلامی بو گون قوم دنی

قویدولار طوفانلی دریا ایچره قارداش سیز منی

بو سنق کشتی اولار اسلامیانین مأمنی

عالم امکانه حاشا سن کیم لنگر گلور

 

آچ گوزون ای سرو ناز گلستان بو تراب

سیلمیشم قانی گوزوندن قلبیمی ائتمه کباب

قیزلاریم یول گوزلوری گوز یاشلی دلده التهاب

وا ابوالفضلا سسی خرگاهدن پی در گلور

 

ای « حسینی » قلبیوه غم گونده بیر پرچم ساچار

مشکلاتین قفلینه یوخدور توسل تک آچار

آغلا یالوار مشکلون مشکل گشا اوغلی آچار

اولسا حاجتمند شه دربارینه نوکر گلور 

 

مرحوم حسینی سعدی زمان

منبع مجموعه کانالهای مدح و مرثیه

موضوع: حضرت ابوالفضل العباس (ع) شجاعت ,
زبان شعر و شاعر: نوحه ترکی , حسینی سعدی زمان

 

------------

 

حضرت ابوالفضل العباس (علیه السّلام)

 

ابولفضلی گوروب صفلر داغیلدی

قاچوب سرکرده لر لشگر داغیلدی

 

حسینون عاشق کامل عیاری

علمدار رشید و با وقاری

الوب گویا علیدن ذوالفقاری

توکوب قان قلعه خیبر داغیلدی

قاچوب سرکرده لر لشگر داغیلدی

 

ائدوب کفرین سپاهین بر هم عباس

گلوب نهر اوسته وردی پرچم عباس

سووا با خدیقجا اولدی خرم عباس

اورکدن غصه سی یکسر داغیلدی

قاچوب سرکرده لر لشگر داغیلدی

 

سو مشگین دولدوروب لب تشنه سقا

ئوزی میل ائتمدی بیر قطره اما

جزاک الله دئدی معناده زهرا

غم اولاد پیغمبر داغیلدی

قاچوب سرکرده لر لشگر داغیلدی

 

رجز خوان الده پرچم دلده تکبیر

ئوزین ووردی سپاهه بیرده چون شیر

هراسان ائتدی خصمی برق شمشیر

یول اوستن فرقه کاغر داغیلدی

قاچوب سرکرده لر لشگر داغیلدی

 

دیور راوی باخوردیم حالی مضطر

چیخور گوردوم نیستاندان او سرور

نه وار مشگینده سو نه تنده اللر

دگوب باشه عمود افسر داغیلدی

قاچوب سرکرده لر لشگر داغیلدی

 

اونی السیز گوروب ال چالدی اعدا

کمکسیز قارداشین سسلندی سقا

غریب عباسیوی درک ایله مولا

اولوب عمروم گلی پر پر داغیلدی

قاچوب سرکرده لر لشگر داغیلدی

 

علمدارون وئرور جان یا حسین گل

سن عطشان منده عطشان یا حسین گل

گلن یولاره قربان یا حسین گل

یاغیش تک اوخ یاغوب پیکر داغیلدی

قاچوب سرکرده لر لشگر داغیلدی

 

  استاد کلامی زنجانی

موضوع: حضرت ابوالفضل العباس (ع) شجاعت ,
زبان شعر و شاعر: نوحه ترکی , کلامی زنجانی

 

------------

 

 حضرت ابوالفضل العباس (علیه السلام)

 

ای جماعت تا وارام اسلامه نصرت ایلرم

صاق الیم گیتدی صول اللی دینه خدمت ایلرم

 

تا منی گهواریه سالدی آنام ام البنین

ویردی بیر سود سینه دن هر قطره سی آئین دین

بسلدی دینه منی حامی امیرالمومنین

جوهر ذاتیمدی دینیمدن حمایت ایلرم

 

بو حمایت نه فقط قید حیاته بسته دور

نه بو عرصه گاهده سعی و ثباته بسته دور

بلکه تاثیرات اصلیسی مماته بسته دور

جان ویرم بو یولدا تحصیل نتیجت ایلرم

 

گر چه من شهزاده فرزند رشید حیدرم

لیک بو یالقوز اوغولسوز شهریاره چاکرم

دینیمامرایلوربوشاهین نصرتینده جان ویرم

جان و دلدن دینیمون امرین اطاعت ایلرم

 

صادر ایتسیدی منه سلطانیم امر کارزار

ضرب تیریله آلاردیم روزگاروزدن دمار

نیلیوم مامور ایدوب تحصیل آبه شهریار

شاهیمون اجرای فرمانینده دقت ایلرم

 

قالمیوب با شدا هوای میمنه یا میسره

بو امیده سو ویرم تشنه بنات حیدره

لا محاله بیر ایچیمده شیرخواره اصغره

من اولام سقا اوقالسون تشنه حسرت ایلرم

 

هانسی مذهبده روا دورای گروه کین شعار

اوچ گیجه گوندوزنه سودنه سوتاپا بیرشیرخوار

تشنه لیقدان درک ایده ششماهه طفلی اختیار

من او وضع حا ل رقت باره رقت ایلرم

 

تشنه لر امری اولوب منجر عطشدن بیر یره

آزقالور خوردا اوشاقلارتشنه لیقدان جان ویره

ناروا دور نامسلمانلار بو ظلموز کافره

منتقم قهاره ظلموزدن شکایت ایلرم

 

سیزده واربیرخواب غفلت کیم اویانمازیاتمسوز

جبت وطاغوتی دوتوب حبل المتینی آتمسوز

تولانوب آز جیفه دنیایه دینی ساتمسوز

انتبا هوزده ئولومدن استعانت ایلرم

 

ال که مندن ای گروه پست فطرت سالمسوز

بولموسوز هانسی الی سیز بی مروت سالمسوز

پیکر اسلامدن بیر دست قدرت سالمسوز

حقدن اسلامه استدعای قدرت ایلرم

 

شاهباز شاهدن مکریله سالدوز شاهپر

اوستیمه دورت بیرطرفدن پر آچوب تیر سه پر

بسکه اوخ وردوز وجودیم اوخدان آچدی بال و پر

بو وجودی شاهیمه شاهین دولت ایلرم

 

اوستومه هر قدر یاغدور ساز خدنگ اوسته خدنگ

حیدر کرارین اوغلی حمله دن ایتمز درنگ

شعله لندیرسوز نقدری آتش سوزان جنگ

یانماقا مثل سمندر منده سبقت ایلرم

 

بیر سو مشگی اوسته یوزمین اوخ کماندان رد ایدون

اوخ الندن مشگی حفظ ایتماق طریقین سد ایدون

سیز کمال ظلمی پی در پی خمیده قد ایدون

عاقبت منده حسینی قوس قامت ایلرم

 

سیز بو گون ایله بولورسوز ای گروه کینه جو

بو کشاکشده کلید فتحدور بیر مشگ سو

مشگی اوز قانیمله دولدورام سودا نه آبرو

قان قبالینده سویی بی قدر و قیمت ایلرم

 

ثابتم عهد الستیمده بلا پیمانینه

تابعم صدقیله دلدن کربلا سلطانینه

قان گوارا دور سودان لب تشنه شه قربانینه

جان سوسوز ویرم بو یولدا جانه منت ایلرم

 

من فدای کوی حقم حق طریقین گچمرم

نفسیی نفس حسین بن علیدن سچمرم

نیلورم سو سلسبیل و کوثر اولسا ایچمرم

تا حسینیم ایچمیوب سو تابعیت ایلرم

 

گورمدوز آلدیم فراتی ضرب تیغ تیزیله

توسنی ووردوم سویا مهمیز خار انگیزیله

ایچمدیم سو بو دل عطشان آتش بیزیله

ایمدیده سو ایستسه نفسیم ملامت ایلرم

 

ظاهرا غملی گوگل سو مشگینه مشعوفدور

همتیم سعییم تلاشیم حفظنه مصورفدور

باطنا مشگیم سولی پیکانیله مالوفدور

ایمدیدن بو محنتیله طرح الفت ایلرم

 

ال تاپار بولم بو یولدا فرقه گمره منه

آرزو طوماریمی ظلموز ایدر کوته منه

پرچمین اما امانت تاپشورب چون شه منه

هر خیانتدن مصون حفظ امانت ایلرم

 

سعی ایدرسوز پرچمیم یاتسون بوگون جنگاهده

تا قوپا شور قیامت بارگاه شاهده

قویمارام قویسامدا حکما باش و جان بوراهده

التزامین قامت شور قیامت ایلرم

 

گر یره گوگلر توکولسه عالم اولسا تار و مار

حاش لله پرچم اسلام اولسون خاکسار

بیر قیامت شوری قامت اوسته قیلام استوار

حشر اولونجا اهتزازین من ضمانت ایلرم

 

تا الیمده قبضه شمشیر خون آشامدور

شاهد فتح و ظفردن اهل کین ناکامدور

قویمارام یاتسون بو بیرق بیرق اسلامدور

خاکسار اولسامدا نصب اوج رفعت ایلرم

 

بسکه اولدوز غفلتیله جمله سرگرم قتال

بیلمدوز هر توکدوقوز قان اوز قانوزدور لامحال

ایتدی قصد قربتوز اسلام دینین پایمال

من بو باطل قصد قربتدن برائت ایلرم

 

سیز هر اندازه اوزاقسوز عترت یاسین دن

بیر او قدری فاصله واردیندن آئین دن

مکه معلوم اولوندی بیخبر سوز دیندن

مایل اولساز من سیزی دینه هدایت ایلرم

 

امن ایوین ناامن قیلدوز بیتین اوز اصحابینه

عرضه نی تنگ ایلدوز حل و حرام احبابینه

بیزده گلدوخ بو چوله اتمام حج آدابینه

حجیمون تکمیل نقصانیده همت ایلرم

 

باغلیاندان کعبه دن بو وادیه احرام غم

وردیمیز لبیکدی یولاردا صبح و شام غم

عاقبت بو سرزمین ایتدی بیزه اتمام غم

انتهای غمده شکر بی نهایت ایلرم

 

هر طوافیم قورتاروب دور سرای حقده

آزقالوب سعیم باشا یتسون صفای حقده

قوچ کیمی قربان کسیلم بو منای حقده

کربلانی کعبه اهل حقیقت ایلرم

 

قیلماقا ختم طوافه حکم شرعیله نماز

باشلادیم عالی تیمم ممکن اولماز دستماز

بو تیممدور من ممتازه مخصوص امتیاز

توپراقا وورام الی بیربیر کفایت ایلرم

 

صاق الیم توپراقدادور ای فرقه بیدادگر

ختمدور امر تیمم صول الیمده دوشسه گر

اوندا دوشسم سجده حالینده نماز اولماز مگر

نیلیوم بیر سجدیه لابد قناعت ایلرم 

 

منته لله همان سجدم نه عادی سجده دور

مثلی اولماز بیر تذلل آستان سجده دور

کربلانون مایه فخری حجاز و نجده دور

حاش لله بو مباهاته منیت ایلرم

 

بیز جماعتدن اولار که قانه غلطان ایلدوز

آق محاسنلر که القانیله الوان ایلدوز

سرو قامتلر که توپراقیله یکسان ایلدوز

فرد فردین مصرعین سجدمده تربت ایلرم

 

با صفا سعی خیام اوسته نه جای هلهله

ایلرم بین فرات و خیمگهده هروله

ایتمیون تحلیقیمه تعجیل صبر ایلون هله

من اوزوم باشوم آچوق قالجاق اشارت ایلرم

 

من گرگ آئین حجیله ایدم رمی جمر

سیز منه رمی ایلوسوز ای قوم کین تیر سه پر

محرمه دینوزده حرمت تیرباراندور مگر

منکه هر اوخ گلسه سینم اوسته حرمت ایلرم

 

ناوک دلدوزه کیمسه مایل اولماز من کیمی

خوشدلم اوخلار دوزولسون سینه مه پیکان کیمی

نوک پیکان چولقاسا بو قامتی جوشن کیمی

جوشنه مردانه بو قامتله زینت ایلرم

 

(ذهنی) سائل که خادمدور بیزه ایستر صله

ایستوری زنگ غم دارینی قلبیندن سیله

نخل امیدین ایکی دنیا یتورم حاصله

مشکله هر لحظه دوشسه حل او ساعت ایلرم

 

مرحوم ذهنی زاده

منبع مجموعه کانالهای مدح و مرثیه

موضوع: حضرت ابوالفضل العباس (ع) شجاعت ,
زبان شعر و شاعر: نوحه ترکی , ذهنی زاده

 

------------

 

 حضرت ابوالفضل العباس (علیه السلام)

 

من ابوالفضلم جماعت، شهر‌تیم دوتموش جهانی

قدر‌ت الله اوغلویام من، حیدر کرار ثانی

 

یادگار نامدار خسرو بدر و حنینم

حیدر کرار آتامدور، مرتضا‌یه نور عینمم

هم سپهسالار لشگر‌، هم علمدارحسینم

ائیلرم ظاهر بو چولده، صولت شیر خدانی

 

دیلده یوخ بیر ذره باکیم، گر دوتا دنیانی دشمن

اولدی گرچه آل هاشیم، اولمایین اولمکدن‌ ایمن

قویمارام جنبنده سیزدن تیغ قهرآمیزیله من

چرخ اطلس گورسه تیتر‌ر، بو حسام جانسیتانی

 

مجلس شورای جنگین، صاحب اور‌نگییم من

لشگر شاه حجازین، باهنر سرهنگیم من

بو کومکسیز پادشاهین چون وزیر جنگییم من

وئرسه رخصت ائیلرم بو عالم امکانی فانی

 

گر ائدم دعوایه اقدام، ای گروه پست فیطرت

قویمارام قالسین بو چولده بیر نفر سیزد‌ن سلامت

گئچمک اما باش جاندان، چون وظیفمدیر جماعت

قانیمیله دینه وئرر‌م، بیر حیات جاویدانی

 

بیشه‌ هیجاده شیر‌م، قاف رزم عنقاسییم من

هر فنون جنگ جنگی ایشلرین داراسییم من

عتر‌ت شیر خدانین، تشنه لب سقاسیم من

نهر علقمدن خیامه، باغلارام آب روانی

 

خیمه‌ده آغلیر سوسوزدان، عتر‌ت شاه مدینه

العطش فریادی یئردن، اوج ائدیر عرش برینه

چیگنیمه سالدی گلنده، بو قورو مشکی سکینه

ائیله‌دی سو التماسی، بیر منه گلدی گمانی

 

بو حسینی کی سپاهین، ائیلییب‌سیز قانه غلطان

جان زهرادور جماع‌ت، هم امام کون امکان

حجت‌الله بیلمیسیز گر، فرض ائدین سیز بیر مسلمان

قویمایین یانسین سوسوزدان، عترت بی‌خانیمانی

 

ائیلدی اتمام حجت، لشگرره هر چند او سرو‌ر

اولمادی اصلا موثر، گلمه‌دی رحمه او لشگر

بیر نفر سسلندی اما، کی هنرو‌ر پور حیدر

ائیلمه سو اوسته بیجا، سن ملام‌ت شامیانی

 

گر ایکی ایشدن بو چولده، اولمیا بیر امره مجرا

یئر یوزین دولدورسا دریا، وئرمریک بیر قطره اصلا

یا گرک قارداشین اولسون، بئیعته دیلده‌ن مهیا

یا بو تشکیلاتی پوزسون، تیغ قیلسین حکمرانی

 

جنگ عباسی گوره‌نده، قدسیان گلدی نوایه

سس سسه وئردی ملکلرر، عرض قیلدی مرتضایه

ائیلیری عباس دعوا، یا علی باخ کربلایه

گوستریر اوغلون حسینه، گور نه نوعی جانفشانی

 

بیر رشادت، بیر شجاعت ، گوستریب اول تشنه سقا

عرصه تنگ اولدو سپاهه، سیندی صفلر قاچدی اعدا

آلدی تا نهر فراتی فارس میدان هیجا

بیرقین نهر اوسته ووردی ، اول وفا و مهر کانی

 

لشگره سس دوشدی آلدی، نهری بو یالقوز علمدار

خیمه ده ناگه ائشیتدی، بو سسی تشنه اوشاقلار

خیرداجا قیزلار سوویندی، داده گلدی آل اطهار

باشینا ییغدی سکینه، عتر‌ت آل عبانی

 

اللـ‌رینده بوش سو جامی، گلدیلر داده نوایه

یوز دولاندیردی خانیملار، بارگاه کبرییایه

عرض ائدیبلر بارالاها، حافظ اول صاحب لوایه

حفظ قیل شر عدود‌ن، یادگار مرتضا‌نی

 

اول قد‌ر گئچمیب، حسینین گول کیمی رنگی سارالدی

سسلنیب وای قارداشیم وای، زینبین آرامین آلدی

یعنی عباسین سو اوسته، قوللارین شام اهلی سالدی

اوخلانیب سو مشگی گئتدی، طاقت و تاب و توانی

 

مرحوم حسینی سعدی زمان

منبع مجموعه کانالهای مدح و مرثیه

موضوع: حضرت ابوالفضل العباس (ع) شجاعت ,
زبان شعر و شاعر: نوحه ترکی , حسینی سعدی زمان

 

------------

 

حضرت ابوالفضل العباس (علیه السّلام)

 

سوار اولان کیمی سسلندی جان سپهداریم

گلور حمایتوه عالمون جهانبانی

 

اوزون ووروب قشونا الده تیغ آتشبار

داغیتدی قارداشنون دوره سندن اعدانی

 

هر ایکی قارداش او دم آرخا آرخیا ویردی

ایدردی بیر بیرینون حفظنه تقلانی

 

ایله ووراردی قلج مرتضی نشانه لری

که مشکل ایتدیله اشراره فتح آسانی

 

دیردی هر ایکی دلبنده آفری دلدن

اگر باخیدی او دعوایه شیر یزدانی

 

او ایکی قامتی شور قیامتین قلجی

سپاهه ایلدی محشر او دشت و صحرانی

 

گوروب بو شورشی سسلندی زاده وقاص

مخاطب ایلدی اشرار شام ویرانی

 

دیدی بو طرزیله وورسا قلج ایکی قارداش

دم حسامه چکر جمله پیر و برنانی

 

تلاش ایدون آییرون شاهدن علمداری

چکون کناره هاموز شاهد منایانی

 

قشون او وقتده دریا کیمی گلوب موجه

مضاعف ایلدی فلک نجاته طوفانی

 

آیردی قوم فشاری عنای مشک آخر

او شهریاردن اول شهسوار هیجانی

 

پیمبر اوغلی اویاندیدی ذوالفقار الده

توکردی تپراقا کفار بی محابانی

 

بویاندا وارث حیدر النده شمشیری

ایدردی زیر و زبر قوم سست پیمانی

 

ووراردی خرمن عمر سپاه اشراره

شراره صاعقه تیغ آتش افشانی

 

ایله فشاره سالوبلار او قوم تنگدلی

که تنگ ایدوب قشونا اول وسیع میدانی

 

قاچور سواره ایاقلور پیاده نی آتلار

دوتوب او چولده یارالی نواسی هر یانی

 

نه وار آتا خبری اوز عزیز اوغلوندان

نه بیر خلیل سالور یادینه اخلانی

 

امام ایستدی عباسدن خبر بولسون

بو اختباره ایدوب اختیار ایمانی

 

قلج ووراردی دیردی اناابن ختم رسل

بابام پیمبره حق نازل ایتدی قرآنی

 

آلاردی بو سسی عباس اودا ویرردی جواب

آتام علی اوجادوب نام حی اعلانی

 

بیری بیرینون آلاندا سسین ایکی قارداش

سیلردی زنگ محندن دل مصفانی

 

بیر آز گیچردی گینه سسلنردی سبط نبی

سایاردی منقبت لاتعد و تحصانی

 

گورردی گلدی جوابی گینه ابوالفضلین

علیدن ایتدی بیان افضل ثنایانی

 

اوقدر گیچمدی آلدی قطعتموا سسنی

بولوب که قارداشنون صاق قولی قلم لندی

 

مرحوم ذهنی زاده

منبع مجموعه کانالهای مدح و مرثیه

موضوع: حضرت ابوالفضل العباس (ع) شجاعت ,
زبان شعر و شاعر: نوحه ترکی , ذهنی زاده