متن نوحه ترکی مرحوم حافظی تبریزی

مجموعه اشعار ترکی مرحوم حافظی تبریزی که در مدح و رثای اهلبیت علیهم السلام سروده شده اند

متن نوحه ترکی مرحوم استاد حافظی تبریزی

-----------------------------------------------------------

در احوالات حضرت فاطمه زهرا (س)

 

رقم رقیمده خامه یازاندا زهرادن

خیالی وارگتوره سوزعلی اعلادن

 

علی چکن غمی دنیایه قسمت ایله سلر

اولونجه شاد اولان اولماز بیراهل دنیادن

 

ایشیت روایت عماری عرضیمه شاهد

بیله بیانگراولوب شرح حال مولادن

 

علینین او گوننکی حقی غصب اولدی

گوزونده گوندوزی تاراولدی لیل یلدادن

 

قاپوسی  یاندی دوگولدی عیالی جبریله

شهید محسنی اولدی فشاراعدادن

 

گوروبدی صدمه خانم فاطمه مریض اولدی

یواش یواش مرضین شدتی سالوب پادن

 

خلاصه اولدی مقام شهادته نائل

اوحالیله که یارالیدی نچه اعضادن

 

گیجه له دفن ایلدی نازنین جنازه سینی

دگولدی کامرواگروصال زهرادن

 

اولوب ایوینده معزانچه گیجه گوندوز

ایدوبدی رابطه سین قطع پیروبرنادن

 

ولی بیرعده منه اهل شهریدن دیدیلر

علی گورونموری عمار شهربطهادن

 

اگرچه خانه نشیندی گینه دیردی گوزه

گیدوبدی یوخسابیرآیری یره بو ماوادن

 

اودودمانه یولون وارسنون خبربول گور

هاراگیدوبدی کسوب علقه زشت وزیبادن

 

اراده ایتدیم علینی تاپام دیر عمار

یتم حضوره تفحس ایدم قضایادن

 

مشرف اولدوم علی دودمانینه بیرگون

ایوین نماسی آپاردی منی تقاضادن

 

قیچیم سینیدی دیدیم کاش گلمییدیم من

غم آیداولدی منه حدسیزبوسودادن

 

آقام علینون ایله حالی حالیمی پوزدی

دولوپ گوزوم چیخام آزقالدیکه شکیبادن

 

حسن صاقینداصولونداحسین اوتورموشدی

توکردی گوزیاشی رخساره چشم شهلادن

 

چکردی باشلاریناال یتیمه قیزلارینین

اوپردی رائفتیله زلف مشک آسادن

 

ایله آنا تک آناسیزلارا محبت ایدیر

باخاندادیده دل حظ  ایدیر تماشادن

 

دیدیم خلاصه اونامردمون دیین سوزونی

بولوردی گرچه اوزی ماجرانی اولادن

 

بیوردی ایلدون عماردردیمی تازه

ساغالمیندی اگرچه گیچوب مداوادن

 

یادونداواردی وفات خدیجه کبرا

آلوب توانینی آلدی قرارطاهادن

 

پیمبرایوده اوتوردی عزادوتوب نچه گون

صباوشام توکوب اشگ چشم بینادن

 

سنون کیمی منیده خلق اوناایدوب مامور

تاپام پیمبری واقف اولام معمادن

 

یتوب حضورینه اندوهه مبتلاگوردوم

منیده سالدی غمه حالت غم افزادن

 

دیدیم عم اوغلی فداگوزلرووه آز آغلا

توان آلیرغم ودردین سپر مینادن

 

جواب ویردی علی سختدورفراق نگار

مگرتوجه اولا کردگار یکتادن

 

اولاخدیجه کیمی بالخصوص کان وفا

نیین دیوم اولابیرقطره بلکه دریادن

 

فراق یاره پیمبردوزنموری عمار

اونیله بیردگولم گرچه هیچ زوایادن

 

اوزون حساب ایله زهراهاراخدیجه هارا

ایکیسی بیراولابولمزله هیچ زوایادن

 

خدیجه نون قاپوسی یانمیوب کوته یمیوب

آغارمیوبدی قرازلفی ظلم اعدادن

 

علاوه عمرطبیعی ایدوب معمراولوب

گینه پیمبری حسرت اوخی سالیرپادن

 

دیوم بومطلبی حق ویرمنه که شاهدسن

گرک اولونجه یانام بوعزای عظمادن

 

ثقیفه اهلی جوان اولدوروبله زهرانی

اوزون حدیث مفصل اوخی بوایمادن

 

ویرنده غسلونی نه چکمیشم بولورالله

نه یوزویروبدی سوروش ماجرانی اسمادن

 

قاریشدی سینه سینین قانی غسلونون سوونا

سزادی آهیم اوخی گیچسه چرخ خضرادن

 

الیم قولوندادگوب تازیانلریرینه

خجالت اولدوم اوآزرده شاخ رعنادن

 

حیاسی عصمتی لطفی منی اوتاندیردی

دوزوب نه ظلملره قوم طبع سفلادن

 

منه کی محرمیم ورمیوب نشان گوردوم

نشان ویرورولی بیرسری واراواخفادن

 

منیم رعایت ایدوب حالیمی وفاسیندن

گوروبکه چوخدی غمیم حدوحصرو احصادن

 

گوزومده اود دیسن پارلادی گورنده گوزون

مزین آق گل اولوب رنگ زردحمرادن

 

بونظم شعره سخندان اولوب سبب یازیلوب

تشکرایله همیشه اومرد دانادن

 

ریاست اوسته بلی آدلاری مسلمانلار

اولولا (حافظی) ادنا یهودو ترسادن

 

مرحوم حافظی تبریزی

منبع مجموعه کانالهای مدح و مرثیه

موضوع: حضرت فاطمه زهرا (س) احوالات ,
زبان شعر و شاعر: نوحه ترکی , حافظی تبریزی

-------------------------------

زبانحال حضرت زینب (سلام الله)

 

باجوی آیری سالوبلار وطندن آی قارداش

وار انتظاری بو غربتده سندن آی قارداش

 

یوبانما زینب مظلومه نین یامان گونیدی

اورگیمون باشینون داغ کیمی یانان گونیدی

فدا اولوم سنه جان اوستیم امان گونیدی

صله رحم ائله جان اوسته مندن آی قارداش

 

خوشام دانیشدیراسان جان خطاب ائدم سوزیوه

دئمه لی دردیمی بیر بیر بیان ائدم اوزیوه

آنا گوزینده گوروردون منی فدا گوزیوه

عیادت ایله اقلا نه نندن آی قارداش

 

منی حضوریوه ممکن دگول گلن گتورن

دیزیمه قدرت و قوت دوباره دن گتورن

بو فکرده دگولم یوخ منه کفن گتورن

محالدور که سالام سوز کفندن آی قارداش

 

او بلبلم که سالوب چرخ بیر اوزاق چمنه

ائدوبدی حسرت دیدار سرو و یاسمنه

کفنسیز ئولماقوین دردی درد اولوبدی منه

کفن سوزی داخی چیخماز دهندن آی قارداش

 

بی بی سی زینب مظلومه تک غمین اوغلون

اسیر دشمن اولوب چوخ ائدن انین اوغلون

گوزوم یاشی قورومور زین العابدین اوغلون

سنی او کهنه حصیره بوکندن آی قارداش

 

نجه اولا بلی خوشحال اولوم دوباره گولوم

محال اولوبدی اچیلسون غمام وش گویلوم

بو قانلی کوینگون اولموش الیمده دسته گولوم

آلورام عطریوی بو پیرهندن آی قارداش

 

یالان خلافدی شرعا گرک دئماق سوزی دوز

ولو ادا ائلماخدا یوزیمه باغلورام ئوز

اورک دوگونمه سی منلندی هر گئجه گوندوز

آلوب بو کوینگی مندن گییندن آی قارداش

 

جهان طبیب اولا حاشا اولا بو درده دوا

ئولومدن اوزگه سی بو حقی ایلینمز ادا

گوزیمده جلوه نور ماجرای دشت بلا

گوزوم دولور غم و درد و محندن آی قارداش

 

اولور گوزیمده گئچن گونلر آینه گورورم

نجه که گورموشدوم تازه دن گینه گورورم

دونوب شقایقه اکبر معاینه گورورم

گلوبدی دامن دشت و دمندن آی قارداش

 

بیوک گلوب هامی غمدن بو بیر غمون منه چوخ

بو محنت اوستونه دنیاده اوزگه محنت یوخ

اورک باشین دلور اصغر بوغازینا دگن اوخ

آچوب او غنچه دوداقی لبندن آی قارداش

 

چتین اولا بولر عالمده ایله رنج و تعب

محققا بلدی یوخدی ذره جای عجب

ربابین ئولماقینا سنلن اصغر اولدی سبب

آلوب ربابده مشقین گورندن آی قارداش

 

رباب گونلر ائوینده یانوب کباب اولدی

مسبّب اولدی که مندنده سلب تاب اولدی

منیمده ئولماقیمون باعثی رباب اولدی

آیردی ایریلیقی تابی مندن آی قارداش

 

گل ای باشمدا اولان عزت و شرف تاجی

آنام باجیم که دیردون ئولور همان باجی

بوصون نفسده اولوب بیر نگاه محتاجی

فراق شربتوی نوش ائدندن آی قارداش

 

دیوبدی (حافظی) و (هاشمی) بو گفتاری

که رمز ابجد زینبدی بیت اشعاری

مرید و مرشده احسان ایلیوب تاری

که سوز سچلموری دُر عدندن آی قارداش

 

مرحوم حافظی تبریزی  و هاشمی

منبع مجموعه کانالهای مدح و مرثیه

موضوع: حضرت زینب کبری (س) زبانحال ,
زبان شعر و شاعر: نوحه ترکی , حافظی تبریزی

-------------------------------

زبانحال حضرت زهرا (س)

 

آغلاما منده قالمادی طاقت و تاب عم اوغلی جان

توکمه سرشک حسرتون مثل سحاب عم اوغلی جان

 

باخما منه من آغلورام سن بیله پوزما حالوی

گوزلریوه فدا اولدوم توکمه سرشک آلوی

شائقم استماع ایدم من او گوزل مقالوی

گرچه یوخومدی قدرت ردّ جواب عم اوغلی جان

 

ایستر آتا فلک منیم عالم هجره داشیمی

چکمز او قدر سن منیم بوش گوره سن فراشیمی

بیرجه قبول زحمت ایت آل دیزون اوسته باشیمی

عم قیزی سن خطاب ایله منده خطاب عم اوغلی جان

 

اولدوم عم اوغلی دوقّوز ایل باغوه باغبان سنون

تربیت گل ایلدیم دولدی گلیله گلشنون

بسلدیم ارغوانی و یاسمنیله سوسنون

حیف دویونجا دوتمادیم عطر و گلاب عم اوغلی جان

 

ایمدی سموم غم منی گلشن و گلدن ایلوری

آتش هجره یاندیرور، شغلومی شیون ایلوری

یعنی اجل گلوب منی جبریله سندن ایلوری

یانّام اودور سیزیلدارام مثل کباب عم اوغلی جان

 

فکر ایلورم من اولماسام غنچه ده گللریم سولار

دردسریم هدر گیدر رنج و شکنجه مفت اولار

علّت اودور بولود کیمی اشکیله گوزلریم دولار

سیلی ایدر سراچه ی صبری خراب عم اوغلی جان

 

طول و دراز صحبتین یوخدی بو قدری حاجتی

فاطمه نین حضوریوه واردی نچه وصیّتی

جان سنون ایمدی جان منیم گللریمون امانتی

من کیمی قیل مواظبت ایله ثواب عم اوغلی جان

 

قویما سولا بالالاریم فرض ایله غنچه گلدولر

چون که بالا بو گودماقین زحمتینی آنا بولر

آغلاسا تلخکام اولار، گولسه بالا آنا گولر

قوی منی راحت ایلیوم قبریده خواب عم اوغلی جان

 

بیرده منی دانیشدیروب پرسش وضع حال ایله

گوگلومی آل ترحّماً رفع غم و ملال ایله

سوءِ ادب مشاهده ایلموسن حلال ایله

قورخورام ایتمه سن حلال اولسون عذاب عم اوغلی جان

 

رسمیدی دوره سین دوتار جان ویره نین قبیله سی

محتضره او حالیده خوش گلور آشنا سسی

صوتیوه من فدا اولوم گل اوخی جمعه سوره سی

صوتیوه وار علاقه بی حدّ و حساب عم اوغلی جان

 

روز ازل بلائیله گرچه خمیر اولوب گلیم

عرض ایلیوم نجه بلا یوخ ولی طاقت دلیم

یاندورار اهل عالمی پخش اولا گر بو نسگلیم

یاندوران اوددی واقعاً مرگ شباب عم اوغلی جان

 

بیرده منیم جنازه مه ویر گجه غسل قیل کفن

ایتگین ایله مزاریمی ایلمه دفنیمی علن

بولسه لر هاردادور منیم قبریم اولار گلوب گیدن

دشمنیم ایتمه سین ایابیله ذهاب عم اوغلی جان

 

حافظی وقت ضیقدور تیز ایله صحبتون تمام

گرچه نظامیله دوشور رشته ی نظمه بو کلام

فاطمه نین دلینجه قیل بو سوزی ورد صبح و شام

آغلاما مندهقالمادی طاقت و تاب عم اوغلی جان

 

مرحوم حافظی تبریزی

منبع مجموعه کانالهای مدح و مرثیه

موضوع: حضرت فاطمه زهرا (س) زبانحال ,
زبان شعر و شاعر: نوحه ترکی , حافظی تبریزی

-------------------------------

زبانحال امیرالمومنین حضرت علی (علیه السلام) در احوالات حضرت فاطمه زهرا (سلام الله)

 

فاطمه سن کیمی مظلوم ئولن اولماز دئمه بس

من کیمی کیمسه غریب وطن اولماز دئمه بس

 

من سنه تعزیه دوتدوم قاپونی قویدوم آچوخ

بیر نفر مجلس ختمه گلن اولماز دئمه بس

 

هر وفات ائلینه شام غریبان دوتولور

بیله بیر شام غریبان گورن اولماز دئمه بس

 

چوخ سووردیم یغشوب یثربین اهلی گله لر

گوردوم عکس العملین من سوون اولماز دئمه بس

 

بیری گلسه دیرم دردیمی سینم بوشالار

اوتلی سینم ده کی دردی بُلن اولماز دئمه بس

 

چوخ داریخیدیم نه گلن وار نه گیدن وار گوردیم

بیر ائله درده سالان انجمن اولماز دئمه بس

 

پاک ایدردون گوزومون یاشینی تا سن واریدون

ولی گوز یاشیمی سن سیز سیلن اولماز  دئمه بس

 

گتوررمیش دیله لکنت ، غم هجران عزیز

دلده یارای کلام و سخن اولماز دئمه بس

 

کسه سن  اُلفتوی مندن امیدیم یوخودی

سن کیمی رشته اُلفت کسن اولماز دئمه بس

 

قبره نسگیللی گیدن چوخ اولی فکر ایلردیم

ائله نسگیللی مزاره گیدن اولماز دئمه بس

 

چوخ مریضین بدنی بوته درد ایچره اریر

ارین گل بدنون تک بدن اولماز دئمه بس

 

گونیگون که کفن اولدی منه باور گلدی

غنچه وقتی سولا گل بی کفن اولماز دیمه بس

 

من دئیردیم حسنین بالغ اولار سایونده

لیک بالغ بو حسین و حسن اولماز دیمه بس

 

من دئیردیم یتیشر چوخلارا غم دنیاده

من کیمی درد و مصیبت چکن اولماز دیمه بس

 

تئز ایاقدان دوشه سن فکریمه گلمزدی منیم

یوخسا سن تک تئز ایاقدان دوشن اولماز دیمه بس

 

سنی گل فرض ائلدیم تخته تابوتی چمن

ائله بیر گل ائله پوزقون چمن اولماز دیمه بس

 

آغاران زلفووی تشبیه ایلدیم یاسمنه

او گوزللیقدا گل یاسمن اولماز دیمه بس

 

کیشینی سیندرار عورت ئولومی شهرتی وار

اوندان آرتوق غم و درد و محن اولماز دیمه بس

 

یاندیرار تازه گلین داغی بولوردوم ئورگی

لیک سوزشده حرارتده سن اولماز دیمه بس

 

چوخلاریلان من اوزوم غمده شریک اولموشدوم

بی وفا چیخدی هامی من دین اولماز دئمه بس

 

او نفر اوز اوزونی ریشه کسن بیلدی ولی

تاری وار «حافظی» لر ریشه کن اولماز دئمه بس

 

مرحوم حافظی تبریزی

منبع مجموعه کانالهای مدح و مرثیه

موضوع: حضرت فاطمه زهرا (س) زبانحال ,
زبان شعر و شاعر: نوحه ترکی , حافظی تبریزی

-------------------------------

زبانحال حضرت امام حسین (ع) بر بالین حضرت ابوالفضل (ع)

 

ای رزم گونی حیدرِ کرّاری حسینون

قولسوز یخیلان جعفرِ طیّاری حسینون

بیر مشگ سو اوسته کسیلن اللره قربان

امدادینه قارداش چاغوران دللره قربان

 

راضیدیم ئوله تشنه لب اطفالِ لب عطشان

هر تک تکی بو چولده اولیدی سنه قربان

امّا سنه ال تاپمیا بو فرقهٔ عدوان

سنلن مَثَلیم جدّیمه حیدر مثلیدی

یا حیدریلن مالکِ اشتر مثلیدی

 

قارداش نجه نعمتدی ویرر قارداشا الله

بولمز بیری تا اولمیوب اسرارینه آگاه

بخصوص یامان گونده محیط اولسا خطرگاه

فرض اولسا بدن جان کیمیدی قارداشا قارداش

عِرقنده گزن قان کیمیدی قارداشا قارداش

 

ئولدورمه سلر گر منی سندن صورا اعدا

خضر عمریجه عمروم اولا گولمز یوزوم اصلا

بیر درد اولی دردون منه که یوخدی مداوا

بو دردین علاجین هامی لقمان اولا بولمز

واللهی ئولوم اولماسا درمان اولا بولمز

 

کیم بولدی سسون گلدی پوزولدی نجه حالیم؟

نه حاله قالوب سِیر ایله دیم من نه عَوالیم

بیر بولدى باجیم بیرده بولر خالقِ عالیم

فکریم داغیلوب محوِ جمال اولدوم ابوالفضل

دل سیز کیمی بی نطق و مقال اولدوم ابوالفضل

 

دوردوم که گلم داده گؤزوم گؤرموری گؤردوم

سالدوقجه غمون یاده گؤزوم گؤرموری گؤردوم

اولدوم ایله افتاده گؤزوم گؤرموری گؤردوم

علّت بودی تأخیریمه وقتیم تلف اولدی

تأخیرده بیر مایهٔ حزن و اسف اولدى

 

گؤرموردوم ازل هاردا یخوبدی سنی کفّار

کسمیشدی یولی لشگرِ بدکیش و تبهکار

سیندیردی صفِ دشمنی شمشیرِ شرربار

فکریم که گیدردی هارا من یول اورا سالدیم

ناگاه آنام فاطمه نون عطرینی آلدیم

 

شوریله فضادن آنامون عطرین آلوردوم

گلدوقجه یولی عطر گلن سمته سالوردوم

گاهی اگیلیردیم یره گاهی اوجالوردوم

ناگه بو ایکی عادل اولان رهبری تاپدیم

سو اوسته بو ناحق کسیلن اللرى تاپدیم

 

گویا آناما کشف اولوب آشفته دی حالیم

قارداشیما دشمن تاپوب ال ، چوخدی ملالیم

یالقوزلیوب اعدا منی پوزقوندی خیالیم

تاب ایلمییوب تکلیقیما داده گلوبدی

امداد ایلسون اوغلونا زهراده گلوبدی

 

اولدی سبب اوچ رمز و علامت سنی تاپدیم

بیر علّت اولوب مِهرِ اُخوّت سنی تاپدیم

بیر ائتدی آنام عطری هدایت سنی تاپدیم

بیرده کسیلن اللّریوین قان ریزی قارداش

یوخسا یولی قویمازدی گورم گؤزده کی قان یاش

 

طوبا سنون احوالیوه اقبالیوه احسن

اولدون شهداده هامودان شأنی مُحَسّن

بو عطر مُصَدّقدی که زهرانی گؤروبسن

شاید یوزیوه قویموش اولا عارضِ آلین

قوی منده زیارت ایلیوم سنده جمالین

 

بو نسگلون اوتلار منی تا روزِ قیامت

بیر گؤز که ایده حضرتِ زهرانی زیارت

انصاف دگولدی اونا بو ظلم و جسارت

بو یاره که بودیدهٔ شهلایه دگوبدی

بلکه دوشوب عکسی رخِ زهرایه دگوبدی

 

اهلِ حرمه صبر و تسلی ویره الله

محشر اولاجاق اولسالار احوالیوه آگاه

دور تک یولا سالما منیلن اول گینه همراه

گوستر بالاجا قیزلاریما اوخلی سو مشکین

جام الده گزوب خیمه لری توکمه سین اشکین

 

بو حالیده سندن نجه صرفِ نظر اولسون

گئتسم نگرانم که عدو باخبر اولسون

الدن الیوه ال تاپانی بی ثمر اولسون

اولسیدی الون رفعِ شر ایلردون اوزوندن

بیر نحویله دفعِ خطر ایلردون اوزوندن

 

ای «حافظی» اولدی حسنی بانی اشعار

سندن سبب اولدى قالا دنیاده بو آثار

ایسته صله ویرسین یدِ مقطوعِ علمدار

اعطاسینی شکرانهٔ نعمت بولوسن بول

یا لطفینه احسانینه قسمت بولوسن بول.

 

مرحوم حافظی تبریزی

منبع مجموعه کانالهای مدح و مرثیه

موضوع: حضرت ابوالفضل العباس (ع) زبانحال ,
زبان شعر و شاعر: نوحه ترکی , حافظی تبریزی

-------------------------------

در ولادت حضرت رسول اکرم (صلی الله)

 

موج ایدوب دریای لطف خالق عالم بوگون

قویدی دنیایه قدم پیغمبر خاتم بو گون

 

هاتف غیبی اوجا صوتیله جاءَ الحق دیدی

باطل اِضمحلانینون ختم اولماسین مطلق دیدی

یعنی دین احمدی رمزاً تاپار رونق دیدی

گلدی دنیایه ائدن دین پایه سین محکم بو گون

 

گورسنوب اوضاع عالمده بیوک بیر انقلاب

عالم حیرتده مات اولدی تماماً شیخ و شاب

فکر ایدوبلر حشر اعظمدور اولور عالم خراب

یا نه وار نظم و نظام دهر اولوب برهم بو گون

 

تا تولّد تاپدی پیغمبر یتوردی پا یره

گوستروب نچّه حوادث عالم بالا یره

سلطنت تختی یخلدی واریدی هاردا یره

بو عجیب امره تعجّب قالدی هر ذی دم بو گون

 

یر یوزینده واریدی هر نه سلاطین اولدی لال

نه جوابه اولدی قادر، نه ایده بولدی سوال

کند مادرزاده مانند اولدولار بی قیل و قال

تا ایشیق گوندوز اولونجا شامیله توام بو گون

 

اولدی ایوان مداین گوئیا بی پای بست

ایلدی لرزه به سانِ شاخِ بیدِ نو نشست

طاق کسری که اولوب مشهور او گون اولدی شکست

گوسترور آثارین ایمدی اهلینه عالم بو گون

 

سوندی مین ایل اتّصالاً سونمین آتشکده

فرقه ی آتش پرست فارس اولوب ماتم زده

حسّ ایدن اولموب ندور علّت همان پیش آمده

بعضی دللردن مسرّت گیتدی گلدی غم بو گون

 

اولدولار یکسر کلیساده صنم لر واژگون

یوز ویروب غم بت پرست اشخاصه حدّیندن فزون

وار یری عرض اولسا بعضی احمق و خوار و زبون

ساخلادی خلق ایتدیقی اللهینه ماتم بو گون

 

دیشده انگشت تحیّر ساحر و کاهن تمام

هر بیری اوز صنعت فعلینده عاجز خاصّ و عام

هیچ بیری آگاه اولانموردی ندور بو ازدحام

لیک کشف ایلردیلر بیر سرّ وار مبهم بو گون

 

خشک اولوب دریای ساوه، دوندی لَم یَزرَع چوله

سو سماوه دشتینه گلدی شبیه اولدی گله

اضطراب و وحشتیندن آز قالوب ابلیس اُله

بار غمدن قدّ سرو آساسی اولدی خم بو گون

 

ماجرادن چوخ تفحّص ایتدی تاپسون اطلاع

بیر به بیر یغدی شیاطینی ایدوب بیر اجتماع

گوندروب ایتسونله اصوات سمانی استماع

آنلاسون یرده ندور تا شورش اعظم بو گون

 

دفتر شاعر به سانِ حجره ی عطّاردور

«حافظی» شاعر دگل یوخدان ولی بیزاردور

اولسا مولود ایستین ایستور دیسون که واردور

بو متاعه گر خریدار اولسا بیش و کم بو گون

 

مرحوم حافظی تبریزی

منبع مجموعه کانالهای مدح و مرثیه

موضوع: حضرت محمد (ص) میلاد ,
زبان شعر و شاعر: نوحه ترکی , حافظی تبریزی

-------------------------------

زبانحال به حضرت علی اکبر (علیه السلام)

 

هانسی جوان اولوب علی صد پاره سن کیمی

جسمی باتوبدی قانه عقیق یمن کیمی

 

من بیر دویونجه بیر دولی گوزلی باخمادیم

بو سر و قد و قامته گوگلوم سون کیمی

 

شام اهلینی گوروم داغلا عیش و گلشنی

گلزاریمی داغدتلا زاغ و زغن کیمی

 

هر یاره بیر گوزل گل اولوب گل وجودیوه

گلدی چیچکدی هر یری صحن چمن کیمی

 

قانون آخوب معطر ایدوب کربلا چولون

ایلوب ترابی نافه مشک ختن کیمی

 

باشون یاراسی نوع حکایت ایدیر سنون

زخم سروندی زخم سر بوالحسن کیمی

 

الله بو قومدن کسه رحمین گوروم اوغول

روحون علاقه سین بدنونن کسن کیمی

 

نعشون گرک عباده گیده یوخسا وار یری

عولدورسون اوز اوزون حرم اهلی گورن کیمی

 

قارداش دیور سکینه باجون زلفنی آچور

تل تل توکور چمن بزین یاسمن کیمی

 

صغراده گوزلوری یولون ایمدی مدینه ده

قارداش دیور سکینه شیرین سخن کیمی

 

(بیخود)دی نوحه شوره گتور اهل مجلسی

اکبر غمینده اوخشویون اوغلی عولن کیمی

 

ای (حافظی)حسینون عزاسینده آغلایان

بزم عزانی فرض ایله بیت الحزن کیمی

 

مرحوم حافظی و بیخود سرابی

منبع مجموعه کانالهای مدح و مرثیه

موضوع: حضرت علی اکبر (ع) زبانحال ,
زبان شعر و شاعر: نوحه ترکی , حافظی تبریزی , بیخود سرابی

-------------------------------

آموزش و مشقِ جنگ به  حضرت علی اکبر (ع) توسط حضرتِ ابوالفضل  (ع)

 

او که اخباره دارادی حدیثی ایلمز کتمان

کلامون صحّت و سُقمون بولر یوخ حاجتِ برهان

 

بولوب اوچ امری لازم امّته پیغمبرِ رحمت

همیشه توصیه هر تک تکین خلقه ایدوب اعلان

 

بو اوچ فنّی بیر امری ایلیون اولادوزه تعلیم

باشاردوقجا تَغافل ایتمیون یا ایُّهاالاِنسان

 

اوخ آتماخدور بیری ، بیرده شنادور ، بیرده آت مینماق

گرک دارا اولا بو نچه فنّه مردِ با ایمان

 

اگر چه طول اولار صحبت ، و لیکن عقل حاکی دور

نه تک مقصودِ حضرت ، آتدی اوزماقدی کمان پیکان

 

اودور گویا ، ایدیبدور امتثالِ امرِ پیغمبر

غریبِ کربلا ، مقتولِ اعدا ، سرورِ عطشان

 

حضوره بیرگونی گونلرده رسمِ التفاتیله

چاغوردی اوز علمداری ابوالفضلی ، ویروب فرمان

 

بویوردی اکبریم قارداش اوشاقدور گورمیوب دعوا

اونا مشقِ جدال و جنگ ویر قارداش سنه قربان

 

ایدوب تا استماع ، قارداش سوزون عبّاسِ نام آور

یدِ طاعت قویوب فورا" گوز اوسته ، اول مه تابان

 

خبر ویردی حسین ابن علی اولادِ طاهایه

چکیلدی پردهء عصمت ، حرملر اگلشوب حیران

 

بیر عده اهلِ یثرب چیخدیلار فورا" تماشایه

به امرِ شاه نُه کشور ، حسین سلطانِ مظلومان

 

چیخوب دروازدن دیشره هر ایکی فارسِ هیجا

مصمّم اولدولار دعوایه ، مثلِ ضیغمِ غرّان

 

غرض هر ایکی نام آور ، مّصمّم اولدی دعوایه

چکوبدور بیر خط خطی او دم پورِ ابن عمران

 

زره گیی ، چکمه گیی ،  باغلا چهار آئینه دور ابلق

قلج باغلا گوتور نیزه ، سپر سال ای اوغول آتلان

 

بو خطِ مشقدن گوزله کنار اولمامدور گز

عنانِ توسنی بوشلا ، قوی ایتسین عرصه نی جولان

 

قلج گلسه خبردار اول ، سپر آت ، گیچ صولا صاقه

مبادا مصدرِ یاقوتدن آخسون یره آلقان

 

حسینین نامراد اوغلی عقابی گتدی جولانه

دیدی چوخ کم هنر سانما منی ای عَمّ والاشان

 

نشان حُجّتینَم من ، بیری عالی بیری اعلی

بیری احمد بیری حیدر ، قضا حکم و قدر فرمان

 

اوزون تعریف قیلدون ای عمو ، تعریفون حقدور حق

منیده کم هنرفرض ایتمه سانما گورمین میدان

 

بابامدور مرتضی یعنی قسیمِ نار والجَنّه

او پیغمبردی جدّیم که اونا نازل اولوب قرآن

 

سنون تک عَمّ پاکیم وار ، قدرفرمان و شیر افکن

شجاعت ارثیدور سیزدن منه ، بِالعَدلِ والاِحسان

 

قلیج گلدی خبردار اول ، منم دورت حُجّته نائب

هواده برق تک جولانه گلدی تیغِ خون افشان

 

چکوب بیر نعره شیرانه ، ابوالفضل ایلدی کرنوش

قلنجین رد ایدوب شهزاده نون سقای مظلومان

 

آتین جولانه گتدی عرصه گهده بادِ صرصر تک

وزیرِ جنگ اوردوی همایونِ شه عطشان

 

الینده قبضه شمشیر و دلده کلمهء تکبیر

بِعینِه مرتضادور شَستینه نظار اولوب حیران

 

گلوب نِطقه دئدی من مرتضا دلبندی عبّاسم

منم چرخِ رشادتده اولان بیر نیّرِ رخشان

 

قلج گلدی خبردرار اول ، دیمه ویردی عَموم غافل

منیمدور نورِ دیده ، حمله ایتماق نوبتی الان

 

کسیلدی طاقت لیلا دئدی زینب دخیلم من

علمداره دینه اَندیرمه قلینجون ای مهِ تابان

 

اگر چه مشقدور دعوا دگل یازینبا ، امّا

قلج آتدا بالامی گورماقا یوخ طاقتِ امکان

 

نه حاله قالدی بس یارب او لیلا روزِ عاشورا

کفن گییدی جوانی ، آلدی شهدن رخصتِ میدان

 

نجه طاقت گتوردی ال چکوب دوزدی و حال آنکه

بولوردی گیتسه قویماز صاق قیدسین لشگرِ عدوان

 

علاوه اکبری تشنه جگر یورقون ، عدو سانسیز

ایدوبلر قتلینه آماده تیغ و خنجر بُرّان

 

بو سوز هرکسدن اولسیدی واریدی نقصی اوّلده

حسین حافظی تکمیل قیلدی قویمادی نقصان

 

فدانی حسینی اولدی بانی دُرّ و گوهر تک

دوزولدی رشتهء نظمه همین مطلب تاپوب پایان.

 

مرحوم حافظی تبریزی

منبع مجموعه کانالهای مدح و مرثیه

موضوع: حضرت علی اکبر (ع) احوالات ,
زبان شعر و شاعر: نوحه ترکی , حافظی تبریزی

-------------------------------

در احوالات حضرت موسی ابن جعفر (ع)

 

غم درده گتدی قلبِ شریفِ پیمبری

تشییع ایدنده حضرتِ موسی بن جعفری

 

نسگل اودی کباب ایلدی ، وار یری دیسم

خلدِ برینده دلِ زهرای اطهری

 

بولمم ندن توکولمدی گویلر یره خدا

سکّانِ عرش گوردی او وضعِ محقّری

 

تابوتیدی نردبانیدی کوتاه ، عباسی شال

پوشیده کامل ایتمیوب او نعشِ انوری

 

حامل جنازیه ، نچه زنگی قره غلام

مولانون اوغلونون دییمیون یوخدی قنبری

 

غربتده ئولماقین غمی یارب نه سختمیش

آنلار آیوق اورک بو نهان ، رمزِ مُضمری

 

دفن ایتماقا غریبی گلولّه غریب لر

اولماز غریب کیمسه ننون شخصِ دیگری

 

هیچ بیر غریب ده یوخدی بو غریب ایچون

اشگیله دولدورییدی ایکی دیدهء تری

 

تابوتین آردیجا دوشر ائل طایفه گیدر

بعضی آچار یخاسبنی بعضی سی معجری

 

نه اوغلی نه قارداشی واریدی ، نه حرم نه قیز

باش آچماقا یانوندا واریدی نه خواهری

 

بیر عده یثرب اهلی اولیدی او دمده کاش

تابوتین آردیجا دوشه قوینوندا اللری

 

نه بیر صبا آپاردی بنی هاشمه خبر

سادات جمع اولوب ایده له دفن ، او سروری

 

دوشموشدی بیر نفر او جنازه قباقینه

داغلوردی نترِ نسگلیله قلبِ حیدری

 

سویلوردی رافضی لر امامی وفات ایدوب

هارون مجلسیندن اولور حمل ، پیکری

 

ناگه بو سس یتیشدی سلیمان قولاقینه

دوندردی قانه قلبینی ، قان اولدی گوزلری

 

گلدی آلوب جنازه نی ، دنیایه اُف اولا

محتاج ایدور گورون کیمه بو دهر کیملری

 

آلدی خبر وصیّتی وار ایلیاق عمل

جاری ایداخ شریعتِ پاک و مطّهری

 

وار چوخ وصیّتی دیدیلر ، عمده سی بودور

جسرین یانندا دفن ایلسونلر بو پیکری

 

جدّیم حسین قبرینه زوّار سالسا یول

قصدِ زیارت ایدسله شهزاده اکبری

 

زوّار ایاقینون توزی ، قونسون مزاریمه

تا مدفنیمه غبطه ایده عرشِ داوری

 

بوردان بولر مقامِ حسینی ، حسینی لر

دوتماز اوزون حقیر او سلطان ، نوکری

 

زنجاندا (حافظی) سنه یازدیردی بو سوزی

آزادی نوحه خوان حسین ، محسن عسگری.

 

مرحوم حافظی تبریزی

منبع مجموعه کانالهای مدح و مرثیه

موضوع: حضرت امام موسی کاظم (ع) احوالات ,
زبان شعر و شاعر: نوحه ترکی , حافظی تبریزی

-------------------------------

زبانحال حضرت ام البنین (سلام الله)

 

سنه عباس اوغول دائم آنان ام البنین آغلار

سالار بلبل کیمی یاده پوزولموش گلشنین آغلار

 

اولا سندن صورا دنیا بوئی عمریم یوزوم گولمز

ئولونجه آغلاسام یانسام یانان دل سوزیم اسگیلمز

اوغول داغین اوغول اوغلی ئولندن اؤزگه سی بولمز

او آنلار بو نیه قویموش اورک اوسته الین آغلار

 

منیم فصل بهارینده گلستانیم خزان اولموش

جفای خاریدن باغریم بسان غنچه قان اولموش

ئولوبدور دورد جوان اوغلوم الف قدّیم کمان اولموش

منیم احوالیمی دشمن اگر گورسه یقین آغلار

 

بلا دشتینده اولسیدیم بو قدری نسگل اولمازدی

بیانِ نسگلیمدن عاجز و قاصر دل اولمازدی

بقیعون غملو قبرستانی دائم منزل اولمازدی

گذاری بو مزارستانه دوشسه هر کیمین آغلار

 

آناسیز اولماقون سالّام خیاله ایلرم شیون

او چولده اولمادیم دعوا ائدنده تا دیَم احسن

دیوللر چوخ شجاعت چوخ رشادت خرجه وئردون سن

حلال اولسون سودیم قویدون آناسین دشمنین آغلار

 

سن ئولدون یوخ سوزوم آغلار ئولونجه بو آنان قالدی

سمندر تک آلیشمیش دوشموش اودلاره یانان قالدی

یرون بوش قالمادی سندن نشانه بیر بالان قالدی

اودا من تک ائدر دائم سنه آه و انین آغلار

 

سن آل هاشمون ماهی بو چرخ حیدره اختر

اوجا بویلی اوزون قوللی شیرین دیللی قمر منظر

اوشاقلیقدان هامی رفتار و گفتاری سنه بنزر

سنی یاده سالور دوشسه گوزی هر کیمسه نین آغلار

 

گوزومدن قویمارام بیر آن کناره من بو ناشادی

کنارینده گل اهلی ، سُوَر چون سرو آزادی

اگر چه قویمارام چیخسون سپهره ناله و دادی

گوزیمه گوز تیکوب منله بِلَه بو مه جبین آغلار

 

دوشنده گوزلرینه گوزلریم ساللام گوزون یاده

دانشسا گَلسه گفتاره دوشر شیرین سوزون یاده

گلر گاهی دله آدون سالارسان اوز اوزون یاده

قویار گاهی گوزون قاشون گهی لعل لبین آغلار

 

منیم تک آتش هجره گمانیم یوخ یانان اولسون

خوشام بو یانماقا دلدن گرکمز که نهان اولسون

حسینه اولموسان قربان سنه قربان آنان اولسون

اگر چه ظاهراً اولموش پریشان و غمین آغلار

 

بو دورد اوغلومدان آرتوخ یاندیران نسگل حسینیمدور

حسینیم مهجۀ دلدور امیدیم نور عینیمدور

حسینیم علّت فریاد و داد و شور و شینیمدور

نه من تک آغلارام بلکه سماوات و زمین آغلار

 

حسین ئولدی چراغ خاندان مصطفی سوندی

حسین ئولدی پوزولدی عیشیمیز دورانیمیز دوندی

حسین ئولدی چوخ آغزین تلخ طعمه لذّتی چوندی

حسینون ئولماقیندان قالدی یکسر اهل دین آغلار

 

حسینون گورمیوب گورمز نظیرین عالَمِ فانی

حسینون ئولماقی ویرانه قویدی ملک بطحانی

حسینون ئولماقی درده گتوردی کون و امکانی

ائدر نوحه حسینه باش آچوخ روح الامین آغلار

 

سنی ای (حافظی) هر نه بولر شاه و گدا بولسون

سُوَر اهل حقیقت سؤموری اهل ریا اولسون

رجوعون اولماسین مخلوقیله سن بول خدا بولسون

اونی بول مؤمن منصف جزاده چوخ چتین آغلار

 

 مرحوم حافظی

منبع مجموعه کانالهای مدح و مرثیه

موضوع: حضرت ام البنین (س) زبانحال ,
زبان شعر و شاعر: نوحه ترکی , حافظی تبریزی

-------------------------------

استمداد حضرت علی اکبر (ع)

 

یخیلمیشام یره آتدان ، یارالیم باباجان

یتیش هرایمه چوخ ماجرالیم باباجان

 

باشیمدا معجزِ شقُ القَمر علامتی وار

بابام علی کیمی باشدان یارالیم باباجان

 

یخوبلار قامتیمی سرو تک بو چولده یره

دِموبله باغِ وفانون نهالیم باباجان

 

وطن محبّتینی ، باش یاراسی ، باشدان آتوب

مدینه یوسفیَم ، کربلالیم باباجان

 

شکسته نی کیمی بیجا دگول نوا ایدورم

دولوب نوائیله جسمیم ، نوالیم باباجان

 

بو سون نفسده سنی سسلورم بودور نظریم

گورم جمالیوی بیرده ، وفالیم باباجان

 

آخان ستاره کیمی عرشِ زین دن آخدیم

عِنان الیمده دگول ، دست خالیم باباجان

 

آنام دئ نیزده باخسین آی اوّلی باشیما

سپهرِ عشق و محبّت هلالیم باباجان

 

باجیم سکینیه دئ ، یول داخی گوزَتلمه سین

دوشوب بلایه باشیم ، ابتلالیم باباجان

 

غمیمده چوللره مجنون اولوب دوشر لیلا

بو حالیده ایله بیر حاله ، حالیَم باباجان

 

شهادت عالَمی بیر صورته شبیه اولسا

او صورتین لبِ بالاده خالیَم باباجان

 

کمندِ دشمنه بند اولموشام جفائیله

بو قانلی معرکه نین خوش غزالیم باباجان

 

ووروب یارا یارالی جسمیمه گروهِ خطا

بولوبله چین و ختانون مارالیم باباجان

 

اذان سسی ایشیدنده آنام چوخ آغلیاجاق

بولور امامِ زمانون بِلالیَم باباجان

 

داغیلمیشام یره خندان اولان قیزیل گُل تک

خزان گورن گُل و غنچه مثالیم باباجان

 

یارالاریم گُل آچوب پیکریمده رنگ به رنگ

بهشت گلشنی تک چوخ صفالیم باباجان

 

عبث دگول بو که عشّاق ایچینده ممتازم

حبیبیسن ، عاشقِ نیکو خصالیم باباجان

 

مدینه ده باجیمین حالینی اوزوم بولورم

اگر چه فاصله چوخدور ، آرالیم باباجان

 

علیله باجیما الله غمیمده صبر ویره

بیر عمر اونون سببِ اشگِ آلیم باباجان

 

شبیهِ کامل اولار عرشه ، فرشیده قبرون

اونون کشیدهء کافِ کمالیم باباجان

 

خیالِ لیلی ایدوب چوخ خیالی جان اوسته

اونون بو حالیده پوزقون خیالیم باباجان

 

دوتوب بوغازیمی قان لخته سی سسیم گلمور

مقال مجلسینون نطقِ لالیَم باباجان

 

گتورمرم دله سو صحبتی سینار قلبون

بو دردی قبره آپارّام ، وفالیم باباجان

 

ایدر نمازی شروع اسممیله اهلِ نماز

هامی نمازده لفظِ جلالیَم باباجان

 

یارالی باشیمی گَل باس یارالی سینه وه ، تا

گوره لر سینهء شاهین مدالیم باباجان

 

غمیمده (حافظی) (نجمی) یانار هر آی هر ایل

سبب نوالرینه ماه و سالیم باباجان.

 

مرحومین نجمی و حافظی تبریزی

منبع مجموعه کانالهای مدح و مرثیه

موضوع: حضرت علی اکبر (ع) زبانحال ,
زبان شعر و شاعر: نوحه ترکی , حافظی تبریزی , نجمی , نجمی تبریزی

-------------------------------

زبانحال حضرت زینب کبری (سلام الله) در احوالات حضرت فاطمه زهرا (سلام الله)

 

یاناندا باب رسالت غم و ملالیلن

دیردی زینب کبری زبانحالیلن

 

قرار دوتما بابا یوز ویروب بلا آناما

قاپی دالندا دگوب کاری بیر یارا آناما

 

اِشیکده خلق ایلیوب ازدحام غوغادور

هجوم ایدوب دیه سن قوم اشقیا آناما

 

بیری دیور چاغیرون بیعته علی گَلسون

بیری نهیب وورور خیرة النّسا آناما

 

فدا اولوم سنه شمشیریوی گوتور الیوه

حمایت ایله غم و درده مبتلا آناما

 

آنام اُلر، قاپومیز باغلانار، ایویم یخلار

بو نوع که آچوب ال فرقه ی جفا آناما

 

بُلنمورم نه اولوب سینه سینه قان آخوری

الینه رنگ حنا تک اولوب دما آناما

 

قاپی یانور آلیشوب، دود دولدوروب صحنی

یته اونون اثری قورخورام بابا آناما

 

دورانموری ایاقا حال ضعفیده یخلوب

تاپولموری اونا بیر کیمسه هم صدا آناما

 

هرایه فضّه نی سسلوردی سسله موردی سنی

منیم گمانیمه مانع اولوب حیا آناما

 

یتیش هرایینه سن منده معجریمی آچوب

حضور حقّه دوتوم یوز، ایدوم دعا آناما

 

دیوم الهی گواه اول گناهسیزدی آنام

روا اولور بو قدر ظلم ناروا آناما

 

نه ایلیوبدی آنام امّتین شقی لرینه

نیه بو ظلمی ایده لّر بولار خدا آناما

 

بیزیم که بیر کسیمیز یوخدی بستره دوشنه

مواظبی کیم اولور، کیم ویرور دوا آناما

 

یاراسینی کیم آچوب باغلیوب سالور مرهم

بو نوعیله که دگوب زخم جان گزا آناما

 

مگر امانت پیغمبر خدا دگولی

نه تیز بو امّت اولوب بیله بی وفا آناما

 

ابوقحافه نون اوغلی نه ایستوری بیزدن

ایدوب سرشکینی هم سو و هم غذا آناما

 

قورومیوب هله پیغمبر خدا کفنی

بیر عدّه ایلوری تعیین رهنما آناما

 

توکور سرشکین عذاره یتیم اوشاقلار تک

دوتوب حسین و حسن اُلمه میش عزا آناما

 

حسین آناما باخور آغلوری حسینه آنام

علاقه منددی آرتوخ او مه لقا آناما

 

کباب اولور اورگیم بُلمورم توکم قانیاش

حسین قارداشیمون حالینه و یا آناما

 

اوشاق یانندا آنانی سزا دگول وورماق

و حال آنکه باخور دورت بالا بالا آناما

 

نه جرمی وار آنامون، نیلیوب بو قومه مگر

آچوبدی ظلم الی بو خلق بی وفا آناما

 

یاخوندی قان اولا گوزده سرشکی کلثومین

گَلوب نوایه ایدر نی کیمی نوا آناما

 

آنا غمی مگر آز غمدی غم دوباره چکه

بیله مشیّت ایدوب یوخسا اقتضا آناما

 

مگر ایشیتمیدی ثانی بویوردی ختم رسل

رضای ذات خداونددور رضا آناما

 

نیه اذیّت و آزاریدن گوتورمور ال

ایدر ایشیق گونوزی شام تک قرا آناما

 

کیموندی آیه ی لاتَدخُلوا بیوت نبی

نبی ایوی دگول ایو یا دگول آتا آناما

 

دانور نه علّته نصّ صریح قرآنی

ندور جوابی اونون موقف جزا آناما

 

گوروم غضب ایده الله آنامی اینجیدنه

مگر دیمزدی بابام نفسینی فدا آناما

 

بو شعری «حافظی» آزاد لاله یازدوردی

ردیف و قافیه او سویلدی اولا آناما

 

مرحوم حافظی تبریزی

موضوع: حضرت فاطمه زهرا (س) زبانحال ,
زبان شعر و شاعر: نوحه ترکی , حافظی تبریزی

-------------------------------

زبانحال به حضرت فاطمه زهرا (سلام الله)

 

غم آشیانه سینون اودلانان دری آناوای

پیمبرین پری سینموش کبوتری آناوای

 

سرشک چشمی سوئی دانه سی قفس اوز ایوی

بلالی باشینه پوشش اولان پری آناوای

 

آتا قراسینی باشندان آچمادان ازّل

دوشن بلایه غمه مبتلا سری آناوای

 

اولان جفائیله حقّ مسلّمی مغصوب

آتاسی منبری بیگانه منبری آناوای

 

ایدن مزارینی مجهول قدری تک مجهول

یارالی دفن اولونان پاک پیکری آناوای

 

دونن کمانه جوانلیقدا سالخورده کیمی

قیام قامت سرو و صنوبری آناوای

 

سیاه زلفین ایدن درد و غصّه کافوری

گونوز گوزونده شب تار مظهری آناوای

 

شکسته شیشه کیمی سنگ ظلم امّتدن

صاغالمیان دل زار و مکدّری آناوای

 

گَتورمین دله سوز جراحت جسمین

خزینه نقد غمه قلب مضطری آناوای

 

بالاسین آلمیان آغوشینه بوکن کفنه

مریض بستری خاک اوسته بستری آناوای

 

اولان نجه دیوم ایوای که ایسی سودن عوض

یارالی سینه سی مسمار مجمری آناوای

 

بیر عمر بخشش و بذله اَلی آچوق کیشی نون

طناب ظلمه گورن باغلی اللری آناوای

 

دالنجا باش گوتوروب مسجده گیدن بیر باش

گوروب قرا گون آچان قاره معجری آناوای

 

وفالی شوهرینون دائماً یامان گونلر

حمایت ایلینی یار و یاوری آناوای

 

یتیم اوشاقلار الینده قویان آتام یقه سین

اُلونجه درده سالان قلب حیدری آناوای

 

قالان بالالاری آغوش گرمینه حسرت

دویونجا ایلمین مهر مادری آناوای

 

الین تَوَل بالالار اوسته ایلین دسداس

امید نخلی ویرن آیریلیق بری آناوای

 

به سان لاله یانان دلده داغ داغ قدری

سولوب باشندا یانان سنبل تری آناوای

 

جفای خار سارالدان یوزین ساری گَُل تک

ستمله نرگس شهلاسی احمری آناوای

 

گونون زوالی باتان گون کیمی زوالیندن

ایدن گونی منه بیر ایل برابری آناوای

 

قویان فلک لره آی تک اوزون گونوز گئجه لر

باتوب گوزیمدن ایتن مثل مشتری آناوای

 

قویان ملر آنادان آیریلان غزال کیمی

ایکی باجی ایکی پوزقون برادری آناوای

 

گوزوم دوشنده حسینون سولا گُل عارضینه

اولور بو کلمه دلیم آغزیم ازبری آناوای

 

کباب اولور غم اوتوندا بو زینبین اورگی

دینده قارداشی یا غملی خواهری آناوای

 

آز عمریله گونی آغلار گیچن یوزی گُلمز

قویان محاصره ده غصّه لشکری آناوای

 

نجابت و ادب و رحم و رافت اکسیری

حیا خزینه سینون دُرّ و گوهری آناوای

 

چیگینده بوینی قالان دورت قورا قورا بالانون

اورگی داغلی، گوزی یاشلی مادری آناوای

 

حسین اورکلنوب آغلار، باخار حسینه حسن

یازار یوزه قلم دیده تری آناوای

 

بو شعری حافظی احسن، دیدون ایله دیه سن

آنا غمینده دیور غملی دختری آناوای

 

 مرحوم حافظی تبریزی

موضوع: حضرت فاطمه زهرا (س) زبانحال ,
زبان شعر و شاعر: نوحه ترکی , حافظی تبریزی

-------------------------------

در ولادت حضرت رسول اکرم (صلی الله)

 

وجودون ویردی ایجاده شرافت یا رسول الله

دوتوب امّت سنه جشنِ ولادت یا رسول الله

 

سنه بیر درج بی مثل و بدلدور آمنه خاتون

سنون مثلون نه گوهر وار، نه دْرّ و لولوءِ مشحون

سببسن خلقته، هر ماخلق سنلن اولور مفتون

تاپوب هر کیم شقاوت یا سعادت یا رسول الله

 

بو وصف و سانه گلمز خلق اولانلاردان سن اشرف سن

خَلَقتُ آیه سینده کلمه و مصداق اُعرّف سن

معرِّف ذات پاک کبریادور، سن معرَّف سن

سنوندور بو مقام و بو سیادت یا رسول الله

 

صراط المستقیمه ایلیوب الله سنی منهاج

اولوالعزم و نبی و مرسلین الطافیوه محتاج

سلاطین بو خلایق فرض اولا، تارَکده سنسن تاج

ایکی دنیاده سنلن دور ریاست یا رسول الله

 

یارانموش ماسِوالله عالی و ادنی سنه خاطر

خلیل الله و نوح و آدم و عیسی سنه خاطر

کلیم الله و خضر و صالح و یحیی سنه خاطر

خدا سنلن ایدوب ختم رسالت یا رسول الله

 

سنه قربان اولوم که معنی حبل المتین سنسن

سنه قربان اولوم که رحمتاً للعالمین سنسن

سنه قربان اولوم اوّلین و آخِرین سنسن

ای امّت حافظی روز قیامت یا رسول الله

 

سنون تا نورون آفاقه گوره کُحل عیون اولدی

هامی اقشاریده نوشیروانلار سرنگون اولدی

غمی دیو رجیمون حدّ و حصریندن فزون اولدی

قیریلدی قید واهیّ عدالت یا رسول الله

 

سیناندا طاق کسری یعنی کسرانون بِلی سیندی

دگوب سدّ سدیده کفر و الحادین سِلی سیندی

یاتوب طوفان نفسانیّت و سلطه یِلی سیندی

گلوب فرهنگ دین، گیتدی جهالت یا رسول الله

 

سنون مازاد نوروندان خدا دنیانی خلق ایتموش

نه دنیا، بلکه جمله خلقته دارانی خلق ایتموش

بو فخرون بسدی سندن زهره ی زهرانی خلق ایتموش

کیمون وار اونداکی شان و جلالت یا رسول الله

 

اگرچه بولمدی قدرین بیر عدّه جاهل و نادان

ولیکن بو عداوتلر یتورمز شانینه نقصان

گلنده قائم اوغلی ایلینده عدلیله دیوان

اولار جرات ایدن اوندا خجالت یا رسول الله

 

خیالیم وار کلامی ختم ایدم من بو کلامیله

معطّر ایلیم انفاسی ذکر و لفظ و نامیله

دیم یعنی محمّد یاد صلوات و سلامیله

اولا سرمایه ی روز شفاعت یا رسول الله

 

خلایق فرد فردی کامل اولسا سن مکمّل سن

سنی منها ایدوب الله، جمیع جمعه حاصل سن

تبارک کلمه سی مضروب فهموندور که کامل سن

تاپوب سنده نهایت بی نهایت یا رسول الله

 

مرحوم حافظی تبریزی

موضوع: حضرت محمد (ص) میلاد ,
زبان شعر و شاعر: نوحه ترکی , حافظی تبریزی

-------------------------------

زبانحال حضرت علی (علیه السلام) در شهادت حضرت زهرا (سلام الله)

 

عالم عالم ایسترم عالم بلور زهرا سنی

نیلرم آلسا الیمدن بی وفا دنیا سنی؟

 

سن منیم جسممده شیرین جانمه تشبیه سن

یوخدی شبهه بوالحسن زهرادی، زهرا بوالحسن

روح سن، روحیه سن، سن اولماسان نه سن، نه من

فرد و بی همتا یاراتمش ذات بی همتا سنی

 

حقدور ئولماق سوزوم یوح، لیک وار بیر مسئله

ضربت دردن سنون سینونده یاره وار هله

وار یری درده دل پیغمبر رحمت گله

گورسه بو پوزقون پریشان حالیله حالا سنی

 

کاش اجلدن مهلت اولسون، دردیوه اولسون دوا

قولارون سینون بیر آزجا توخدیوب تاپسون شفا

محضریندن چکمه سین خجلت علی المرتضا

در تک سالم امانت تاپشوروب طاها سنی

 

ماسواللهده یگانه تکیه گاهیم سن منیم

دولتیم بختیم امیدیم دادخواهیم سن منیم

ایل قبیله طایفه، آرخام پناهیم سن منیم

بیر جهان نیرو گتورم خاطره تنها سنی

 

سن دیدوقجا ناخوشام مندن اولور سلب قرار

غصه لب قلبیم دوشور چرپنمیا بی اختیار

نیلیوم چاره ئولومدن قویمیوب پروردگار

نیلرم ویرسم الیمدن بلمورم آیا سنی؟

 

ئولماقی خردا بالالی مادرین آسان دگل

کیم بیله بیر درده دوشسه قابل درمان دگل

طولی ایللردی بش اون گونلر دگی بیر آن دگل

آغلاسا ایتام هاردان ایلرم پیدا سنی؟

 

سرپرست ایودن که گیتدی، اولدی آسایش حرام

صبح تک نه صبحدور صبحی، ایوین نه شامی شام

کیم ایدر روشن چراغی کیم ایدر طبع طعام؟

ایلمشدی حق عطا بیر نعمت عظما سنی

 

کیم حسن مادر دئن دمده ویرور آیا جواب؟

کیم حسینون باشی اوسته سو قویور هنگام خواب؟

زینبین نازین چکور کیم توکسه اشگناب؟

نه دیوم دوتسا خبر مندن بو مه سیما سنی؟

 

اولماسان بیر گون بو ایوده، ایو منه زندان اولار

باور ایله لاله تک هجرونده باغریم قان اولار

بوینی چگننده قابار اطفال سرگردان اولار

منده منلوق قالماز اولسا دورت بالا جویا سنی

 

زلف شبرگوندن اولسا بیر سر مو قدری کم

درد الندن بو دل غم پروریم باغلار ورم

غصه مرگ اولام مرضیه جانوه اولسون قسم

قلب عالملقدا بولم قلبیمه یارا سنی

 

خاطریمدن چخمیان سوزدور گورن ساعت سنی

دائم ابلردی احاطه نکهت جنت منی

اولسا عطروندن معطر خلد اعلا گلشنی

آرزو عمرینجه ایلر عالم سفلا سنی

 

اولندن آیریلیق سالماخدی چرخین شیوه سی

یرده قالماز لیک بیر مظلومین آه و ناله سی

تیز چکه آخر امیدیم وار محبت جذبه سی

بیرده پیدا ایلیاق یا سن من، من یا سنی

 

((حافظی)) شکر ایله، نعمت شکری نعمت آرترار

رتبه نی شانی مقامی، حسن خدمت، آرترار

خدمت ارزنده هر انسانه قیمت آرترار

ایلیوب یاخشی موفق، خالق یکتا سنی

 

مرحوم حافظی

منبع مجموعه کانالهای مدح و مرثیه

موضوع: حضرت فاطمه زهرا (س) زبانحال ,
زبان شعر و شاعر: نوحه ترکی , حافظی تبریزی

-------------------------------

زبانحال حضرت زهرا (س)

 

ای مظهر حق اسمی ایدن حل معما

وی معنی ایمان و کلام الله گویا

 

گل گوگلومی آل پرسش حال ایله عم اوغلی

جان اوسته دی، زهرانی حلال ایله عم اوغلی

عزم سفر ایستسه بولوسن فرد مسلمان

ساخلار باشی اوستونده بیر ایستکلیسی قرآن

گل سنده گیدر فاطمه بو موسم هجران

 

ای ناطق قرآن او گلن یولّارا قربان

اگلش باشیم اوستونده ویروم جانیمی آسان

سوز یوخ که سور صاحبینی دلده چوخ عورت

رغبتله ایدر دائم اونا رافت و خدمت

منده سنه نسبت ولی وار اوزگه محبّت

 

بو عرضیمی شرح ایتسم اولور مسئله روشن

ثابت اولی حددن سنی آرتوخ سورم من

رحلت ایلین گوندن آتام دار فنادن

اولموبدی بیر آن فارغ اولام درد و بلادن

گوندوز گجه دن بدتر اولوب، صبح مسادن

 

خاصّه قاپی یانماقی ایاقدان منی سالدی

امّید حیاتی اورگیمدن او گون آلدی

اولدوم من او گوندن غم ایّامیله همدم

صیّاد ووران صید کیمی دامیله همدم

دردیله جراحاتیله آلامیله همدم

 

نه دردیمی بولدوردوم اوزوم نه بولن اولدی

سندنده نهان اولماقی سرّ علن اولدی

فکر ایتدیم ایدوم دلده کی گیزلین غمی اظهار

چاره غمی گیزلتماقی بولدوم گینه ناچار

گوردوم که غمون چوخدی دوباره غمون آرتار

 

تاب ایلمه سن سینمی قولّاریمی گورسن

باغرون اولی قان سبزیِ رخساریمی گورسن

آرتدوقجا یارا سوزشی قلبیمده کی دردیم

صبریم آزالوب شیونه گیزلینجه گلردیم

ایتمزدیم عیان اوز اوزیمه دلده دیردیم

 

غم ارث اولی ئولسم آپاری حصّه عم اوغلوم

روحیمدی عزیزیمدی ایدر غصّه عم اوغلوم

سنلن اله هر لحظه دوشر پای تکلّم

جنّتدن اولار باش منه ماوای تکلّم

افسوس که یوخ طاقت و یارای تکلّم

 

من منتظر قاصد میمون مماتم

سن واله هجران و غم و محنت ماتم

یوخ ایمدی که درد دل ایداخ مهلت صحبت

تا الده هله وار نه قدر فرصت صحبت

بیر آندا غنیمتدی گل اول معدن رافت

 

آل باشیمی دیز اوستونه لطفونده گوزوم وار

ویر اذن ایلیوم عرض نچه کلمه سوزوم وار

اولسا خدماتیمده حضورونده قصوریم

یوخ عذر تشکّر، ولی وار شرم حضوریم

عفو ایله گوروم حشریده خلّاق غفوریم

 

داد دلیمی دشمن جبّاریدن آلسون

ناحق توکولن قانیمی اشراریدن آلسون

بیرده من ئولندن صورا عورت اگر آلسان

من تک متوجّه دی اَمامه بالالاردان

یا آل اونی یا بیر ایله سین آل سنه قربان

 

اطفال یتیمین هامی نازین چکن اولسون

هر تک تکینی دلدن اوزوم تک سون اولسون

ویر غسل گجیلن منه، قوی قبره گجیلن

تا اولمیا واقف منیم ئولماقیمه دشمن

تشییعیمه حاضر اولا راضی دگولم من

 

باطنلری کافر، ایشیگی مسلم صوری

ثانی و اونون تک به تک اتباع شروری

تا رشتیه اوز گوهر گفتارینی دوزدی

طاها گوزینه بنزر اولان گوزلری سوزدی

یوز قبله ی عالمده حیاتیندن ال اوزدی

 

ترک ایلدی دنیانی گونون عصری زمانی

غسلی کفنی دفنی گجه اولدی نهانی

گیچدی گجه بیر پاس، دوتوب عالمی ظلمت

غسل ایستدی زهرایه ویره شاه ولایت

تغسیلینه اقدام ایلدی طبق وصیّت

 

پیراهنینی ایتمدی خارج بدنیندن

چخماز گل اگر غنچه سولا پیرهنیندن

امّا یوزه بیر اوزگه مصیبت درین آچدی

باغلیدی ره چاره گوز اشک ترین آچدی

باشدان خانمون غصّه و غم معجرین آچدی

 

قاره گون آغاردان او گل زلف پریشان

اولدی چمن تخته ی تابوته پریشان

عفو ایله ایا صاحب عصر اولسا جسارت

نه حالته قالدی بس آتان شاه ولایت

گوردی آناوین گوشه ی چشمینده علامت

 

یعنی اثر دست خطاکار جهان وار

قان شبنمینه نرگسی گل اوسته مکان وار

نقل ایلیوب اسما واریدیم حاضر و ناظر

تغسیل بتوله آقام اولموشدی مباشر

بیردن او بلایا و مصیبتلره صابر

 

غسلی خانمون یتمه میش اتمامه ال اوزدی

دیواره قویوب یوز، یوزه گوز دُرّینی دوزدی

عرض ایلدیم ای سلسله ی صبره سلاله

بو فاطمه نین آیریلیقی سالدی بو حاله

دللندی لسانُ الله او دم گلدی مقاله

 

زیبنده دی پوزسون منی زهرا غمی اسما

بو حاله سالوب اوزگه مصیبت منی امّا

مشکلدی علیدن بو غمه صبر و تسلّی

بو نسگلین آساندی مگر قلبیده حلّی

مصدومیدی جسمی واریدی ضربه محلّی

 

زهرا گل جنّتدی بهارینده خزان وار

خارین ستمیندن گل جسمینده نشان وار

گوزیاشلی ویروب غسلین او شه ایتدی کفن پوش

زهرا گوروب اولموش دیه سن شمعیدی خاموش

پروانه وش اطفال دوروب دوره ده مدهوش

 

شمع دل اهل خبری شعله ور ایتدی

تا فاطمه پروانه لرین باخبر ایتدی

گلدی بالالار گوردی آنا نعشین، آچوب باش

هم ناله اولوب هر ایکی باجی ایکی قارداش

سسلردیله سنسیز بیز ئولیدوخ آنا ای کاش

 

شهزاده حسین و حسن و زینب و کلثوم

یعن ایلین غملری عالملری مغموم

زهرائیلن ازبس حسنین آغلادی یاندی

ایسلاندی کفن اشکیله یاش اولدی بویاندی

ناله سسی یردن اوجالوب عرشه دایاندی

 

شوره او نوا اهل حجاباتی گتوردی

درده دل سکّان سماواتی گتوردی

اعجازیله سس خلق ایلدی خالق اکبر

کای صاحب شمشیر دو سر، ساقی کوثر

قویما حسنین آغلیا، آغلولّا ملکلر

 

اشکین حسنین عارضینه باغلیا قویما

ایوای آناوای ورد ایلیوب آغلیا قویما

عرشیم بو جلالتله یتیم آغلاسا تیترر

قویما گله چوخ لرزیه عرش حق داور

باش آچسا حسینیم باش آچار جدّی پیمبر

 

اشکین توکه قویما گتوره جدّینی درده

جنّت ایله بیر یردی غم اولماز ایله یرده

تا گلدی بو سس هاتف غیب ازلیدن

آغلار گوزوزون سویلدی قربانی اولوم من

بسدور بو قدر ایلمیون ناله و شیون

 

هر تک تکینی دوتدی دله، ئوپدی یوزیندن

باشلارینا ال چکدی، سیلوب اشکی گوزیندن

سوز گتدی سوزی گلدی گوگل مرغی نوایه

دوشدی بو تمنّایه ایده عرض کنایه

یارب نیه امر ایلمدون شیرخدایه

 

تشریف آپاریدی او بیابان بلایه

باش چکماقا باشسیز حرم آل عبایه

ظلمیله بلا دامی جفا اهلی قوراندا

اطفالی او دام ایچره سالوب قمچی ووراندا

نعش شهدادن بالالاری آیراندا

 

ای شمر حیا ایله گله وورما دییدی

رحم ایله گوزین اشکیله دولدورما دییدی

سوز حذف اولی باشلانسا اگر مطلب تازه

تعقیب ایدرم ویرسه گوزوم یاشی اجازه

گیزلینجه گجه حمل اولونوب قبره جنازه

 

دنیایه گوروم ئوفّ اولا بو غم خبریله

زهرا اولا قبره گیده یتدی نفریله

دویمازدی علی فاطمه دن، سن دیمه دویدی

غم تیری علی قلبینه دگدی نجه اویدی

الله بولوری روحینی قبره نجه قویدی

 

زهرا او شهین پیکرینه روحیدی الله

روحوندا قولی سینه ی مجروحیدی الله

توپراقه یوزون قویدی آخوب اشکی گوزوندن

بیر سوز دیدی، حالین بوله سن تک بو سوزوندن

زهرا نه علاج ایلیوم اوز دونمور اوزوندن

 

گیتماق دیزی یوخدور، ندی چاره، نه ایدوم من

سنسیز نجه زینب یاننا ایمدی گیدوم من

زهرا ئولومی قلبیدن ایتمیشدی شکسته

گوزیاشی توکوب آغلیوب اولدی داخی خسته

دوردی دیزی گلمز گلر آخِر ایاق اوسته

 

گوزیاشلی خداحافظ ایدوب منزله گلدی

ای چرخ دیدی یاخشی مرامون اله گلدی

گوردی دولانوب منزلی بیت الحزن اولموش

بیر یاندا حسینون سارالوب عارضی سولموش

اشکیله اویاندا حسنین گوزلری دولموش

 

بیر یاندا پریشان اوتوروب زینب مغموم

چیگنینده قالوب بوینی اویان سمتیده کلثوم

حالی پوزولوب طاقت و آرامی کسیلدی

ایتام آتاسی چاره دله دوتماقی بولدی

هر تک تکینی دوتدی دله اشکینی سیلدی

 

صبر ایلیه بولموردی اوزی صبریده دریا

اشکی توکولوردی یوزه ویردوقجا تسلّی

ازبس بالالار آغلیوب اولموشدولا بی تاب

حضرتده نوازش بیر آز ایتدی آپاروب خواب

گنجینه ده یوخ باخدی گوروب گوهر نایاب

 

غم آفتی خرمن کیمی دل صبرینه گلدی

دوردی گینه ده فاطمه نین قبرینه گلدی

حسرتله باشین فاطمه باش داشنا قویدی

هجران اودی یاندوردی یانان قلبینی اویدی

ازبسکه یورولدی دیمورم آغلادی دویدی

 

بلبل نجه گل عطرین آلاندا اولی مدهوش

باش فاطمه باش داشینون اوسته آپاروب هوش

رویاده گلور فاطمه نی گوردی پریشان

سسلور گوزیوین یاشینه بو فاطمه قربان

دور منزله تشریف آپار ای خسرو خوبان

 

یاتموشدی حسینیم اویانوب آغلوری قویما

سسلور منی اشکه بویانوب آغلوری قویما

بیدار اولوب گوزیاشینه ویردی ادامه

دوردی ولی اولدی متکلّم بو کلامه

زهرا یتیشیدی منیم عمریمده تمامه

 

مشکلدی فراقون منه بِالله دوزه بولمم

یالقوز قویا بولمم سنی، گیتدیم گینه گلّم

سرعتله ایوه شیرخدا ایلدی رجعت

رافتله حسینی آلوب آغوشه او ساعت

ساکت ایدوب آنّندان ئوپوب ایتدی محبّت

 

دردین داغیدوب، گوگلین آلوب، قلبی دوزلدی

ایتامه محبّت بلی دنیاده گوزلدی

یارب سپه کوفه نه آهن دلیمیشلر

نه مذهبه نه دینه اولار قائلیمیشلر

جور و ستم و ظلمه نجه مایلیمیشلر

 

ایتام حسینه او بیابان بلاده

رافت یرینه سیلی ووروب گتدیله داده

بیر کیمسنه اولموب دیه ای فرقه ی ظالم

هیچ مذهبین اهلینده تاپولماز بو عوالم

رحم ایلمیسوز ایمدی که، وورماخ نیه لازم

 

انصاف ایلیون بو گونه قویمازلا یتیمی

درده گتیروب قلبینی، سویمازلا یتیمی

گوندوز بو قرا گونلی حرملر یورولوبلار

بیر نصفی یانان خیمه گجه چولده قوروبلار

توپراقلارین اوستونده پریشان اوتوروبلار

 

آسوده قویون باری بو بیر عدّه پریشان

تک تک دوتا ایستکلیسینه شام غریبان

ای ((حافظی)) هرچند سوزون اولدی مطوّل

امّا دولانوب قُبحی اولوب حسنه مبدّل

اولماز اوخویان بو سوزی بیر یرده معطّل

 

هر بیر طرفه توسن طبعون دولانوبدور

گللر کیمی سوز رنگ به رنگه بویانوبدور

 

مرحوم حافظی تبریزی

منبع مجموعه کانالهای مدح و مرثیه

موضوع: حضرت فاطمه زهرا (س) زبانحال ,
زبان شعر و شاعر: نوحه ترکی , حافظی تبریزی

-------------------------------

زبانحال حضرت فاطمه زهرا (سلام الله)

 

حکم قرآندور مسلماندا حجاب اولسون عم اوغلی

باحیا عورت یوزونده بیر نقاب اولسون عم اوغلی

 

هانسی موجودون که دلده اصطلاحی کیمیادور

گورمیوب چوخ گوز او موجودی نظرلردن خفادور

بیله بیر اکسیردن منظور عصمتدور حیادور

مو به مو واقف گرکدور شیخ و شاب اولسون عم اوغلی

 

بی خبر انسان اولا، بو کنزیدن سرمایه سیزدور

سستدور بنیانی، استحکامی یوخدی، مایه سیزدور

اولسا بنت عامره حتّی اگر پیرایه سیزدور

ایستر عالی مرتبت عالی جناب اولسون عم اوغلی

 

مصحف منزلده نسبت عفّته وار هر نه آیات

لازم الاجرادی، حکمُ ا... گرک اولسون مراعات

کافره مسلم حجابیله ایدر فخر و مباهات

ایستمز معموره ی مذهب خراب اولسون عم اوغلی

 

زندگانلیق پرده سیز ایتمز خواتین مجلّل

مخزن ناموس و عفّت درگهین ایتمز مقفّل

ویرمز الدن عصمتین، ساخلار اونی مانند مشعل

رهنمای خلق مستقبل حساب اولسون عم اوغلی

 

ماجرای بیعتین سونمز گوگلدن التهابی

مسجده گیتدیم یوزومده ایلدیم محکم نقابی

قدرت ا..َ. اللریندن تا که آچدیردیم طنابی

ایتمدیم طاقت بو قولّاردا طناب اولسون عم اوغلی

 

بو یدا..َ. اللرون باغلانمادی تک بیعت اوسته

باغلین آگاهیدی باغلور الون نه حکمت اوسته

بیرده سندن من بُلوردوق باغلیوب حرّیّت اوسته

اختناقه یول آچیلسون، فتح باب اولسون عم اوغلی

 

بو مبرهن دور که فتح مکّه ده ای شیر داور

بو ایکی ال همّتیله سرنگون اولدی صنم لر

نقش طاغوتی داغیتدی نقشه ی ا... اکبر

اهل باطل ایستور ایمدی حق مجاب اولسون عم اوغلی

 

بیر بویوک طومار محنتدور قباله ادّعاسی

یالقوز عورت، ظلم ثانی، کوچه و بازار آراسی

بیر شل اولموش ال جفاسی، گوشواره ماجراسی

گور نجه منده دوام و صبر و تاب اولسون عم اوغلی

 

قابل بخشش دگل بیر عدّه نون جرم و گناهی

درگهیم اوددا یاناندا یاندی قلب ماه و ماهی

آتش ظلمیله یاندی مهبط وحی الهی

وار یری پیغمبرین قلبی کباب اولسون عم اوغلی

 

کاش درگاهیم یاناندا خیمه ی گردون یانِیدی

نجم تک محنت افولینده دل هامون یانِیدی

نه صدف قلبی سینِیدی، نه دُر مکنون یانِیدی

بیر بیله دلدن گرکمز التهاب اولسون عم اوغلی

 

کاش گلشنده گُلون هم خانه سی خار اولمیِیدی

آیریلیق، بیرلیق اولِیدی یاریدن یار اولمیِیدی

بیر زمان ساکن اولِیدی چرخ دوّار اولمیِیدی

بو یوزی قاره فلک بی آفتاب اولسون عم اوغلی

 

ایستوری دست اجل روحی بدندن آیری سالسون

عندلیبی غنچه دن گُلدن چمندن آیری سالسون

محضروندن دویمین زهرانی سندن آیری سالسون

قویموری کامینجه دلدن کامیاب اولسون عم اوغلی

 

نیمه جان بسمل اولوب من قالموشام کنج قفسده

جان گیدر تحلیله هضمه درد الیندن هر نفسده

یوخدی یارای تکلّم حیف اولا دوتقون بو سسده

شائقم که چوخ سواله چوخ جواب اولسون عم اوغلی

 

اگلشوب داغلار بویی داغلی دلیم اوستونده داغلار

لاله تک داغلی گوگل داغلی دل دنیانی داغلار

بیر بیله داغلار قبالینده دوام ایتمزله داغلار

وار یری داغدان بو داغ تک دل مذاب اولسون عم اوغلی

 

نظمیله نظمه بو شعری حافظی صالح سالوبدی

گوئیا روح القدسدن تک به تک الهام آلوبدی

دللرون آچسان بو ایده حکّ اولوب دلده قالوبدی

دادرس ابن ترابه بوتراب اولسون عم اوغلی

 

مرحوم حافظی تبریزی

منبع مجموعه کانالهای مدح و مرثیه

موضوع: حضرت فاطمه زهرا (س) زبانحال ,
زبان شعر و شاعر: نوحه ترکی , حافظی تبریزی

-------------------------------

 در ولادت حضرت رسول اکرم (ص)

 

موج ایدوب دریای لطف خالق عالم بو گون

قویدی دنیایه قدم پیغمبر خاتم بو گون

 

هاتف غیبی اوجا صوتیله جاءَ الحق دیدی

باطل اِضمحلانینون ختم اولماسین مطلق دیدی

یعنی دین احمدی رمزاً تاپار رونق دیدی

گلدی دنیایه ایدن دین پایه سین محکم بو گون

 

گورسنوب اوضاع عالمده بیوک بیر انقلاب

عالم حیرتده مات اولدی تماماً شیخ و شاب

فکر ایدوبلر حشر اعظمدور اولور عالم خراب

یا نه وار نظم و نظام دهر اولوب برهم بو گون

 

تا تولّد تاپدی پیغمبر یتوردی پا یره

گوستروب نچّه حوادث عالم بالا یره

سلطنت تختی یخلدی واریدی هاردا یره

بو عجیب امره تعجّب قالدی هر ذی دم بو گون

 

یر یوزینده واریدی هر نه سلاطین اولدی لال

نه جوابه اولدی قادر، نه ایده بولدی سوال

کند مادرزاده مانند اولدولار بی قیل و قال

تا ایشیق گوندوز اولونجا شامیله توام بو گون

 

اولدی ایوان مداین گوئیا بی پای بست

ایلدی لرزه به سانِ شاخِ بیدِ نو نشست

طاق کسری که اولوب مشهور او گون اولدی شکست

گوسترور آثارین ایمدی اهلینه عالم بو گون

 

سوندی مین ایل اتّصالاً سونمین آتشکده

فرقه ی آتش پرست فارس اولوب ماتم زده

حسّ ایدن اولموب ندور علّت همان پیش آمده

بعضی دللردن مسرّت گیتدی گلدی غم بو گون

 

اولدولار یکسر کلیساده صنم لر واژگون

یوز ویروب غم بت پرست اشخاصه حدّیندن فزون

وار یری عرض اولسا بعضی احمق و خوار و زبون

ساخلادی خلق ایتدیقی اللهینه ماتم بو گون

 

دیشده انگشت تحیّر ساحر و کاهن تمام

هر بیری اوز صنعت فعلینده عاجز خاصّ و عام

هیچ بیری آگاه اولانموردی ندور بو ازدحام

لیک کشف ایلردیلر بیر سرّ وار مبهم بو گون

 

خشک اولوب دریای ساده، دوندی لَم یَزرَع چوله

سو سماوه دشتینه گلدی شبیه اولدی گله

اضطراب و وحشتیندن آز قالوب ابلیس اُله

بار غمدن قدّ سرو آساسی اولدی خم بو گون

 

ماجرادن چوخ تفحّص ایتدی تاپسون اطّلاع

بیر به بیر یغدی شیاطینی ایدوب بیر اجتماع

گوندروب ایتسونله اصوات سمانی استماع

آنلاسون یرده ندور تا شورش اعظم بو گون

 

دفتر شاعر به سانِ حجره ی عطّاردور

حافظی شاعر دگل یوخدان ولی بیزاردور

اولسا مولود ایستین ایستور دیسون که واردور

بو متاعه گر خریدار اولسا بیش و کم بو گون

 

مرحوم حافظی تبریزی

منبع مجموعه کانالهای مدح و مرثیه

موضوع: حضرت محمد (ص) میلاد ,
زبان شعر و شاعر: نوحه ترکی , حافظی تبریزی

-------------------------------

ورود به مدینه

 

گوگلوم کیمی ویرانه نی ویرانه دی گوردوم

بی لانه و پر مرغ دله لانه دی گوردوم

 

غم چولقالیوب غملیه غمخانه دی گوردوم

تاریکیدی سوز یوخ یوخودی وضع رفاهی

 

روشن ایلدوخ صبحه کیمی مشعل آهی

هر قیز سارالان گُل یوزینی قویدی ترابه

 

رشک چمن خلد برین اولدی خرابه

شبنم کیمی گوزیاشلاری بنزردی گلابه

 

ویرانه اولوب عطر و گلابیله معطّر

ریحان و گُل و غنچه ی نابیله معطّر

 

اولدوخ بیر اوزون مدّت او ماواده زمینگیر

احوالیمیزی ایتدی حوادث متغیّر

 

هیچ غم بیزه دل یاره سی تک ایتمدی تاثیر

یخمازدی بیز آل اللهی اندوه فراوان

 

شام اهلی ووران دل یاراسی سالدی ایاقدان

بیر گون آتا مرگین ایشیدوب باخبر اولدی

 

مین تیر غمه قلب رقیّه سپر اولدی

بیر قوش کیمی سیندی پری، بی پال و پر اولدی

 

نیلر او قفس بلبلی که دانه سیز اولسا

ناچار قوری یرده یاتار لانه سیز اولسا

 

هجران قوتاروب عالم وصلی اله سالدی

گوردی آتا باشین بالا آغوشیوه آلدی

 

بیر منظره یوز ویردی، گویه ناله اوجالدی

باش بیر طرفه دوشدی اوزی بیر یانا دوشدی

 

فوج شهداده او بالامدا سانا دوشدی

گرچه غمی چوخ مایه ی حزن و تعب اولدی

 

امّا او قیزون اُلماقی امر عجب اولدی

کاخ ستمی یخماقا عمده سبب اولدی

 

پرگار یزیدی او قیزون همّتی یخدی

شالوده ی کفری او گونون نهضتی یخدی

 

هند اوغلی گوروب آز قالور اولسون ایوی برباد

مجبور اولوب آزاده لری ایلسون آزاد

 

ویرانه ده یاتدون دیدیم اولسون ایوین آباد

ای قلبیمون آرامی رقیّه گیدیروخ بیز

 

غربت بو ولایتده سنی ترک ایدیروخ بیز

یغدیم داغیلان سلسله ی آل عبانی

 

هودجلره میندیردیم اوزوم خرد و کلانی

آغلار گوزیله قصد ایلدوخ کرب و بلانی

 

میعادگه حضرت جانانه یتیشدوخ

قربانگه حق کوی شهیدانه یتیشدوخ

 

گوردوخ که بلا دشتی دگل گلشن جاندور

افسوس او طراوتله بهارینده خزاندور

 

هر لاله سینون باغری بو باغریم کیمی قاندور

اشکیم کیمی بیر باش سو باش آلموشدی آخاردی

 

اوددان باش اودی دللره سالموشدی آخاردی

چشم اسرا دوشدی قبور شهدایه

 

یوز ویردی وله عالمی گویا اسرایه

بیر قبر که چوخ اشبهیدی عرش خدایه

 

مندن سوروشوبلار نیه شش گوشه دی بو قبر

جان نکهتی وار جانه عجب توشه دی بو قبر

 

بو سوزده گوزوم اشکیله تر ایلدی دامن

لازم اوزومه بُلدوم ایدم مطلبی روشن

 

وار علّتی شش گوشه دوشوب طرحه بو مدفن

اوچ گوهره گنجینه دی بو قبر مطهّر

 

اکبردی، حسین ابن علیدی، علی اصغر

هر کس که اوز ایستکلیسینون تاپدی مزارین

 

آچدی باشینی، باش داشنا قویدی عذارین

گُل تک اُپوب ایگلردی قرار دل زارین

 

بیر دسته بو آق زلف سریمدن اله آلدیم

گُل تک یارالی قارداشیمون قبرینه سالدیم

 

سجّاد گَلر باخدی غم اوستن غم تازه

گر قیزلار ادامه ویره لر سوز و گدازه

 

ممکندی اُلوب گیتمیه لر بیرده حجازه

غم یتسه گینه غملی دله طاق اولی طاقی

 

امر ایلدی ترک ایلماقا مُلک عراقی

توفیق عنایت ایلیوب خالق سبحان

 

وحدت یارادا (صالحینن) (حافظ قرآن)

شرکتله یازوب تاپدی گوزل طرزیله پایان

 

هر کس اولاری باندی بُلوردی گینه بُلسون

غالب ایکی بیر جاندی بُلوردی گینه بُلسون

 

حافظی تبریزی و صالح تبریزی

منبع مجموعه کانالهای مدح و مرثیه

موضوع: احوالات ورود به مدینه ,
زبان شعر و شاعر: نوحه ترکی , حافظی تبریزی , صالح تبریزی

-------------------------------

شام غریبان امام حسین (علیه السلام)

 

گوندوز که خزان اولدی گلستانی حسینون

خوار اولدی گئجه شام غریبانی حسینون

چوخ عترت پیغمبره مشکل او گئجه ئیدی

بیر آن که دیه لّر اولی بیر ایل او گئجه ئیدی

 

منزل یاری یانموش چادر اولاد پمیبر

کاشانه سی یانموش قوشا بنزردی حرملر

هر گوشه ده بیر غمزده ی زار و مکدّر

باش زیر پر غمده او صیّاده گرفتار

غملی متوحّش یاری یاتموش یاری بیدار

 

بیر جمع پریشان که پریشانیدی حالی

بعضی سی دوگولموشدیله بعضی سی یارالی

بعضی لرینون زلفی تک آشفته خیالی

هر بیر دله مین داغ چکیلمیشدی داغ اوسته

واضحدی دورانماز یارالی قوش بوداغ اوسته

 

گوندوز بیر اوشاق رسمیدی قورخا گئجه یاتماز

چون یاددان او گوندوزکی غم و فکری چخاتماز

خاصّه بیر اوشاق اولسا مودّب سس اوجاتماز

صبحه کیمی آغلار اولی بیر ائل گئجه بیدار

گویا او سنق نی‌دی یله یلده سیزیلدار

 

نه چکدیلر آل اللهه یوز ویردی نلر غم

بُلمز بیری گر ایلمسه گوزده مجسّم

چکموب ایله بیر منظره بیر مانی عالم

بیر یاندا سیزیلدار آنا، بیر یاندا بالاسی

نه دردی معیّن نه طبیبی نه دواسی

 

بیر عورتیدی بیر کیشی بو جمعه نگهبان

بیر دوستیدی بیر دشمن، او غملی بو خرامان

بیر شمردی گویا او بیری زینب نالان

غملیدی بو دلشادیدی او حال کشیکده

بو پشت در خیمه ده تا صبح او ایشیکده

 

درده او گئجه غم دل دنیانی گَتوردی

هم چرخ چهارمده مسیحانی گَتوردی

جنّـده اوغول مادری زهرانی گَتوردی

باش چکماقا باشسیزلارا گلدی شب ظلمت

اوغلی آتاسی بیرده علی شاه ولایت

 

امّ السّلمه زوجه ی پیغمبر اکرم

یاتدی یوخودا گوردی او بانوی مکرّم

هنگامه دی بیر عالم محشر اولوب عالم

پیغمبر رحمت گَلور احوالی پریشان

یوز گوز بلشوب توپراقا آخور قان

 

عرض ایلدی امّ السّلمه کای شه خوبان

ایوای بو نه عالمدی کنیزون سنه قربان

نه درد و مصیبت سنی ایتمیش بیله گریان

شایسته دگول درد و مصیبت سنه گَلسون

دردون ندی اظهار ایله دردون منه گَلسون

 

آرتوردی بو سوز حضرت پیغمبره شیون

فرمایش ایدوب محنتیمی تازه لدون سن

امّ السّلمه کرب و بلادن گلورم من

غم صرصری گلزاریمی سولدوردی گیچن گون

شام اهلی حسین اوغلومی اُلدوردی گیچن گون

 

گوردوم یارالی نعشینی اشکیم یوزه آخدی

باخدیم دایانام شرط محبّتدن اوزاخدی

قانین یوزه من فاطمه ده زلفینه یاخدی

جمّال حسینون پی آپارموش اورگیندن

بو قاندی او قان تازه آخوردی بیلگیندن

 

یوخ گوردی بدنده باشی، تاب ایتمدی زهرا

بُلدی آپاروب کوفیه مهمان اونی اعدا

اوردان گیدوب ایتسون یارالی باشینی پیدا

خولینون ایوینده توکر ایمدی یوزه قانیاش

زهرا سنه قربان دیر ای قانلی کسوک باش

 

ویران اولا خولینون او ویرانه سراسی

گیتمز اورگیمدن او ایدن ظلم یاراسی

کول اوسته آنا گورسه یاتوب نازلی بالاسی

دوزمز، شرر غمله دل عالمی داغلار

دنیا بویی ایوای بالا وای ورد ایدر آغلار

 

بو نوحه نی که (حافظ) قرآن ایدوب انشاد

باخسا اونا احسن دیه جاق شعریده استاد

بدخواه ایشیدر غملنی، احباب اولی دلشاد

سوزدن آپارار مطلبه پی نطفه ی شیطان

تزویریله آردینجا دیمز بیر پارا بهتان

 

مرحوم حافظی

منبع مجموعه کانالهای مدح و مرثیه

موضوع: حضرت امام حسین (ع) شام غریبان ,
زبان شعر و شاعر: نوحه ترکی , حافظی تبریزی

-------------------------------

تنور خولی

 

عاشق حقون گرک باشنده شور اولسون آنا

منزل شاهانه سی کنج تنور اولسون آنا

 

عشقه جان بذل ایتمینلر بلمز عشقین لذتین

عاشقه زیبادی نوش ایتسه شهادت شربتین

عاشقین زیبنده دور فردوس چکسون حسرتین

آغلیانی عالم معناده حور اولسون آنا

 

راه جاناندا باشندان کچمین عاشق دگل

ایلین فکر سر و پا و بدن عاشق دگل

قالمیان گونلر ایوینده بی کفن عاشق دگل

پیکر صد پاره سی لازمدی عور اولسون آنا

 

من شراب عشقیله پیمانمی ایتدیم دولی

مجلس روحانیت هر یرده اولسا روح اولی

محفل ارواحه جسمین شبه سیز یوخدور یولی

یار بزمنده گرگ اغیار دور اولسون آنا

 

عشقمه نقصاندی قالسام باجی قارداش فکرینه

عالم وحدتده کثرت یار و یولداش فکرینه

کچمیشم باشدان انا حاشا قالام باش فکرینه

عاشقه شایسته دور محنت سرور اولسون آنا

 

بلبلون عشقی مجازیدور گل اوستون خوش دوتار

گلشن ایچره گل بوداقین سنبل اوستون خوش دوتار

اوغلوون عشقی حقیقی دور کول اوستون خوش دوتار

خوابگاهین ایستر اوز عشقیله جور اولسون آنا

 

خولیدن یوخدور گلایم یوخدی حق بینا گوزی

خوش دگل بزم محبتده اولا دشمن سوزی

یر ویروب مهمانه کول اوسته یاتوب راحت اوزی

حقی هر گوز گورمسه لازمدی کور اولسون آنا

 

من شهید اولدوم که قسمت وصل یار اولسون منه

منزل ایتسم هر یری بزم نگار اولسون منه

سنده که گلدون گرک خوش روزگار اولسون منه

نیلورم سن سیز یریم دایم قصور اوسلون آنا

 

من دیمم بلبل کیمی قوی گل بوداقوندن اوپوم

یانمیشام نار فراقونده دوداقوندن اوپوم

باشیمی قوی تپراقون اوسته ایاقوندن اوپوم

مایه فخریم منیم تا وار دهور اولسون آنا

 

قیلسون  (انور حافظی) شکر خدای بی نیاز

درگهمده نوکراولماقدا تاپوبلار امتیاز

چوخ چتین اولسون میسر بو قدر نعمت بو ناز

هامودا ممکن دگول ذوق وفور اولسون آنا

 

 مرحومین حافظی تبریزی و انور اردبیلی

منبع مجموعه کانالهای مدح و مرثیه

موضوع: احوالات تنور خولی ,
زبان شعر و شاعر: نوحه ترکی , حافظی تبریزی , انور اردبیلی

-------------------------------

حلول ماه محرم

 

محرّم اولدی حسینون عزاسی باشلاندی

بساط عشرت اولوب چیده، یاسی باشلاندی

 

گوروندی قامت خمله هلال اوّل شب

بوکولدی یعنی بو آی سرو قامت زینب

 

دولوبدی قلبینه مومنلرین عبث دگی غم

ائمّه غصّه لیدور، ساخلیوبدولر ماتم

 

یری وار عرض اولا بو آی شفیعه ی محشر

حسینه زینبه آغلار، توکر سرشک بصر

 

باتوبدی عالم معناده یاسه پیغمبر

بو خاطره که بو آیدا جوان اُلوب اکبر

 

آچوب امام حسن باشینی گلوب داده

سیزیلدور، آغلور الی قان حنالی داماده

 

دیسم سزادی گیوب مرتضاده قاره لباس

دوتوب عزا دیور ایوای رشید اوغول عبّاس

 

ایدوبدی عرشی عزاخانه خالق اکبر

بونا گوره که بو آی تشنه اوخلانوب اصغر

 

گورنده بو خبری اولموشام پریشانحال

صراحتاً ایلیوب درج منتی الآمال

 

شبیبین اوغلودی راوی بیله روایت ایدر

صحیحدور خبری، صحّتین حکایت ایدر

 

دیر که گیتدیم امام رضا زیارتینه

اولان زماندا مشرّف حضور و خدمتینه

 

امام گوردوم ایله غصّه لی پریشانحال

دولوب بولود کیمی، گوزدن توکر سرشک زلال

 

گورن کیمی منی رافتله اول امام غریب

سوال اوزیله اوروجسان بویوردی یابن شبیب

 

صورا بویوردی بو گون اوّل محرمدور

بو آیدا چوخدی جلالت، مقامی اعظمدور

 

بو گونکه گون اولا هر کیم اوروج ثواب ایلر

علاوه حق نه دعا ایتسه مستجاب ایلر

 

بو گونکه گون زکریّا پیمبرین الله

اجابته یتیروبدور دعاسین اول آگاه

 

بو گون ملائکه محرابیده به اذن خدا

ویروبدیلر زکریّایه مژده ی یحیی

 

بو آی او آیدی که ایّام جاهلیّتده

دوتاردی محترم افراد هر ولایتده

 

هلال ماه محرّم اولان زمان پیدا

هامی حرام بولوب ایلمزدیلر دعوا

 

قتاله هیچ بیری نفسین مجاز بولمزدی

سونردی جنگ اودی هر یرده، قان توکولمزدی

 

بابام حسینی ولیکن بو آیدا امّت شوم

قوناق آدیله ایدوب دعوت ایتدیلر مظلوم

 

پیمبرین اورگین ظلم اودیله داغلادیلار

بابام حسینه ازل سو یولونی باغلادیلار

 

ایله او ایسّی بیاباندا قحط آب اولدی

اوشاقلارین اورگی اود دوتوب کباب اولدی

 

او قدر ظلمه اولوب اهل کوفه نین هوسی

چخوب سپهره بالا قیزلارین سیزیلتی سسی

 

بیر عدّه سی ایله بیتاب و بی قرار اولدی

ایشیق گونوز گجه لر تک گوزینده تار اولدی

 

دوشوبله اوچ گجه گوندوز فشاره بو منوال

اونِ محرّم اولوب، قویدولار بنای قتال

 

الیندن آلدیلار هم پیر و هم جوانلارینی

سوسوزلارین سو یانیندا توکوبله قانلارینی

 

شبیبین اوغلی دیمه شرط رحمی یوخلادیلار

الینده سودامر اوغلوندا تشنه اوخلادیلار

 

دوباره رقّته گویا گلوب امام رضا

گوتوردی باشدان عمامه، بویوردی یاجدّا

 

همینکه گوردیله یابن الشّبیب جدّیمی تک

یارالی یخدیلار اُلدوردولر قویونلار تک

 

خیامه ووردولار اود، سویدولار حرملرینی

سالوبلا قورخویا اطفال نازپرورینی

 

او حالیله که دیدوقجا دیردی واجدّا

بو کلمیه متکلّم اولوب امام رضا

 

شبیبین اوغلی اولان وقته زار و دل مغموم

بابام حسینه چوخ آغلا که چوخ اولوب مظلوم

 

ایشیتمیشم من آتامدان اودا آتاسیندان

اودا پیمبره نسبت ویروب ایدوبدی بیان

 

اوزی مقامینی بولسون حسین عزاداری

حسینه آغلیانون اولسا گوزیاشی جاری

 

حقیقت اولسا اگر ایتموش اولسا هر نه گناه

تمامیسین او آخان اشکه عفو ایدر الله

 

شبیبین اوغلی اگر ایسته سن که محشرده

همیشه لیق اولاسان جدّیمیله بیر یرده

 

دوشنده یادیوه اوضاع روز عاشورا

خلوصیله دینه یا لَیتَنی مَعَک کُنّا

 

خبر بورا کیمیدور، ختم اولوب کلام امام

تصرّف ایتمم اولا فعل مستحبّ حرام

 

گلون عمل ایلیاخ حضرتین وصیّتینه

حسین تشنه لبین آغلیاخ مصیبتینه

 

اولاخ سرشک تریله شریک غملرینه

ویراخ عریضه او اوّل شهید اکبرینه

 

قوجا آتایه چتیندور جوان اوغول ویره جان

چتیندور اوندان آچا دل شماتته عدوان

 

گوزی باخا باخا جدّی شبیهی جان ویردی

اوتانمیوب عمر اوغلانلارین نشان ویردی

 

دیدی حسین اُلور اوغلون سنه مصیبتدور

منیم یوخومدی غم، اوغلانلاریم سلامتدور

 

اورک یارالیدی جان اوسته دور جوان بالاسی

اوغول یاراسینون اوستن ووروبدی دل یاراسی

 

دیدی سنه دیمدیم گل یزیده بیعت ایله

اوزون بو مهلکه دن چک کناره راحت ایله

 

او قدر امامه طرف طعن اوخی او شوم آتدی

یارالیوب اورگین شدّتیله آغلاتدی

 

اگرچه (حافظی) یازسان بو یرده سوز چوخدی

ولی او بیرسی قالار وقته اقتضا یوخدی

 

مرحوم حافظی تبریزی

منبع مجموعه کانالهای مدح و مرثیه

موضوع: ماه محرم ,
زبان شعر و شاعر: نوحه ترکی , حافظی تبریزی

-------------------------------

احوالات اربعین

 

برنامه غم شامیده اتمامه یتیشدی

قورتولدی اسارت، ستم انجامه یتیشدی

 

آغلار گوزیله عترت اطهاری حسینون

قیرخیندا گلوب اولدولا زواری حسینون

دوشدی گوزی زهرا قیزینون کرب وبلایه

قارداش دیدی محملدن انوب گلدی نوایه

صحرای بلایه دوتوب یوز ایتدی گلایه

 

ای کرب وبلانین یری ایتدون بیزی مغموم

ئولدوردیله سنده آتامین اوغلونی مظلوم

دوقوز گیجه گوندوز بیزی مهمان ایلدون سن

ایتدون ایله رفتار ایلمز دشمنه دشمن

آگهسن اوزون ایلدیقوندان نه دیوم من

 

نه بیزلره قسمت سویون اولدی نه طعامون

آب غم و آلامیله سرشار اولا جامون

آباد اولاسان یاخشی قوناق ساخلادون ای خاک

یوز ویردی نه لر سنده چتین درک ایده ادراک

قان آغلادی لایقدی دیسم دیده افلاک

 

مهمانی ایویندن قولی باغلی یولاسالدون

بیر لاله کیمی سینه سی داغلی یولا سالدون

مجنون ایلدون لیلینی اکبردن آیردون

صحرایه سالیب شبه پیمبردن آیردون

ناکام اوغولی، غصه لی مادردن آیردون

 

همرنگ ایلدون بختینه اوزمعجرین آخر

چکدون دیلینه داغین علی اکبرین آخر

دوندردون عزاخانیه دامادین اطاقین

قانیله خضاب ایتدون عروسین ال ایاقین

گورسترماقا خجلت چکیری ایمدی قولاقین

 

گورزلفیله گیزلتمه سه نه چاره سی واردور

گوشواره که غارت اولونوب یاره سی واردور

چوخ مهر و وفاسیزدی سوئی نهر فراتین

بیرمشگینه سقایه بها بیلدی حیاتین

قان ایلدی اشگ ترینی گوزده بناتین

 

قولارین آلوب باشدا جراحت یولا سالدی

آخدی قوری مشگیله خجالت یولا سالدی

هر بیر صود اوشاقین دلیلن صوددن آچالار

چوخ زحمتیلن نسگیللن صوددن آچالار

اویناتمالی دسته گلیلن صوددن آچالار

 

اصغر ولی اوچ شعبه خدنگیله آچیلدی

امدی سولی پیکانی، شرنگیله آچیلدی

عالم یری وار دوتسا شرر غم شرریمدن

سونمز اورگیمده یانان اود اشگ تریمدن

دنیابوئی عمریم اولا چیخماز نظریمدن

 

ایتام پرستاری پرستارسیز ئولدی

دوتموشدی حسینیم اوروج افطارسیز ئولدی

ای باشلی لارین باشین آلوب باشسیز ایدن یر

ای باجی لاری قارداشی قارداشسیز ایدن یر

ای زینب مظلومه نی یولداشسیز ایدن یر

ای زینب مظلومه نی قارداشسیز ایدن یر

 

باشدان ایاقا شکل و قیافون عوض اولموش

گوگلوم آچیلور سنده فضا عطریله دولموش

زینب دیدی درد دیلینی کرب و بلایه

ایتدی اوکی دلده واریدی شکوه گلایه

یوزقویدی فرات اوسته گلوب شور و نوایه

 

بیرجام سودولدوردی یانایانه گتیرسین

ششگوشه مزار شه عطشانه یتیرسین

گتدوقجه سو جامین یوزه گوز یاشی آخاردی

محنت شرری قلبینی اودلاره یاخاردی

هر دم دونوب حسرتیله جامه باخاردی

 

گوز یاشی دولوب کاسه ی چشمنده داشاردی

جام ایچره گوزی، عکس حسینه ساتاشاردی

ایتمشدی مجسم یارالی قارداشین حالین

بو منظره آلمشدی هامی فکر و خیالین

بیر اوزگه عوالم اونون آرتیردی ملالین

 

حسرتله دولاندیردی گوزین، ایتدی نظاره

دوشدی گوزی ناگاه او شش گوشه مزاره

گوز یاشی قاتوب سپدی سوئی قبرین ایدوب یاش

بوحاله باخیب اهل حرم آغلادی قان یاش

سسلندی گتیردیم سو، دور افطار ایله قارداش

 

قویمایانا چوخ آج سوسوز ئولماقیوه زینب

قربان اولا باش داشیوه توپراقیوه زینب

 

مرحوم حافظی تبریزی

منبع مجموعه کانالهای مدح و مرثیه

موضوع: احوالات اربعین ,
زبان شعر و شاعر: نوحه ترکی , حافظی تبریزی

-------------------------------

در مدح امام محمد باقر (علیه السلام)

 

والا بود مقام تو یا باقرالعلوم

جانم فداى نام تو یا باقرالعلوم

 

اى پنجمین امام که چشم خواص است

دائم به لطف عام تو یا باقرالعلوم

 

باشد اساس دین نبى حب آل او

خود این بود کلام تو یا باقرالعلوم

 

از انقلاب علمیت اسلام زنده شد

نازم بر آن قیام تو یا باقرالعلوم

 

شیرین بود کلام تو هر چند از ستم

گردیده تلخ کام تو یا باقرالعلوم

 

سوزانده است جان هشام پلید را

آن آتشین پیام تو یا باقرالعلوم

 

گیرد ولى عصر به گاه ظهور خویش

از دشمن انتقام تو یا باقرالعلوم

 

همچون حسین سرور آزادگان بود

آزادگى مرام تو یا باقرالعلوم

 

اى خسرو دیار ولا (حافظى) ز جان

شد کمترین غلام تو یا باقرالعلوم

 

مرحوم حافظی تبریزی

منبع مجموعه کانالهای مدح و مرثیه

موضوع: حضرت امام محمد باقر (ع) مدح و میلاد ,
زبان شعر و شاعر: نوحه فارسی , حافظی تبریزی

-------------------------------

شام غریبان امام جواد (علیه السلام)

 

یالقوز ایوده ویرورم حسرتیله جان آناجان

گل جواد اوغلووا دوت شام غریبان آناجان

 

ئوز عیالیم من خونین دلی مغموم ایله دی

کینه سین ویردی بروزه آنا مظلوم ایله دی

قلبیمی پارچالادی زهریله مسموم ایله دی

قلبیمی زهرجفا ایله دی آلقان آنا جان

 

اوز الونله آنا گل قبلیه دوندر یوزومی

قویما بو پارچالانان قلبیده گیزلین سوزومی

باغلا اوز معجریویله ایکی آغلار گوزومی

باشیمی آل دیزیوه جان ویروم آسان آنا جان

 

علتی وار بو قدر گوگلره نالم اوجالوب

صرصر جور و جفادن گلِ عمروم سارالوب

گل یوزوم یرده گوزوم یولدا سوزوم دیلده قالوب

تیر محنت ایلیوب قلبیمی شان شان آناجان

 

سالدی دیلدن منِ محنت زده نی درد و محن

یوخدی بالینیمه بو حالیده بیر کیمسه گلن

اوغلووام گل ویرورم جان بو غریب ئولکده من

گوزلریم یولدا قالوب گل سنه قربان آناجان

 

سن آنا هاردا غریب ئولسه اونون همدمیسن

گوگلونون گیزلین اولان محنتینین محرمیسن

غملی لر غمکشی غربتده سرشگ غمیسن

آلاسان دردینی هر آن دِیَه سن جان آناجان

 

سالوب اکبادیمه اود زهر جفا اودلانورام

آتش زهریله اودلانماقی آسان سانورام

بیر ایچیم سو ویره نیم یوخدی عطشدن یانورام

سو گتور قویما یانوم چوخ من نالان آناجان

 

دیله گتدیم سو آدین گر آنا عفو ایله منی

آغلادار قان اولا سو صحبتی هر یرده سنی

اوغلوا ویرمدی بیر شربه سو اشرار دنی

سو یانیندا سوسوز ئولدی شه عطشان آناجان

 

حسرتیله آنا آخر الیم الدن اوزولوب

جام چشمیمدن اوزه اشک روانیم سوزولوب

قطره قطره اورگیم قانی دوداقه دوزولوب

غبطه بو قانه ایدر شطه مرجان آناجان

 

کیم وطن سیزلره غربتده هوادار اولاجاق

دردینی دلدن آلوب محرم اسرار اولاجاق

گلمه سن شام غریبانیم آنا خوار اولاجاق

دوتان اولماز منه بیر شام غریبان آناجان

 

گوگل آلچاقلیقی هر آنیده ایلرسن آنا

هامی اولادیوه برپا ایدسن بزم عزا

هارا اولسا گیدسن بِلده الون دیلده نوا

اولا بغداد و یا شهر خراسان آناجان

 

سن هامی اوغلون ئولنده گوزونی باغلامیسان

آچمیسان باش یوزه گوز یاشی توکوب آغلامیسان

غم اودوندا دل ماتمزده وی داغلامیسان

سس چکوب ایلمیسن ناله و افغان آناجان

 

غمی بیر اوغلوون اما هامی غمدن باش اولوب

گورموسن غسلی قزل قان کفنی اوخ داش اولوب

نعشی اوستونده اونون قانیله زلفون یاش اولوب

آغاران ساچلاریوی قان ایدوب الوان آناجان

 

ساچدون اوردا او قیزل قانیله بیر گل باشیوا

ایلدی غبطه هامی سوسن و سنبل باشیوا

او گل اوستونده سووردون نیه بس کول باشیوا

اولا ویرانه گوروم کوفۀ ویران آناجان

 

گل منیمده باشیم اوستونده باش آچ ایله فغان

سینه داغلا یوزیوه گوز یاشیوی ایله روان

یوخدی بو حالیده احوالیمه بیر کیمسه یانان

ویرورم حسرتیله جان من نالان آناجان

 

یازیلان دمده بو اشعار ایکی اکبر واریدی

ناجیان اکبری فرهودی اصغر واریدی

ئوزگه اوضاعیدی بیر عالم دیگر واریدی

هامی گوزدن توکوردی در رخشان آناجان

 

ئوز وفاتیمده بو بش خادم شاه شهدا

پیشنهاد ایلدیلر تا که بو نوحه یازیلا

(نجمی) و (حافظی) یازدی ایلدی حقین ادا

اولدی بر پا منه بیر شام غریبان آناجان

 

مرحومین نجمی تبریزی و حافظی تبریزی

منبع مجموعه کانالهای مدح و مرثیه

موضوع: حضرت امام جواد (ع) احوالات ,
زبان شعر و شاعر: نوحه ترکی , نجمی , حافظی تبریزی

-------------------------------

احوالات دفن شهدا

 

حسینون دفنینه مشهوریدور اهل قرا گلدی

او ظاهردور ولی باطنده فوج انبیا گلدی

 

ملک لر دسته دسته عرشیدن فرشه نزول ایتدی

دلنده قصد قربت ساکنان نه سما گلدی

 

خلیل و آدم و نوح و کلیم و عیسی مریم

رسولان اولاعزم و وصی و اوصیا گلدی

 

زمین کربلا دولموشدی صدیق و شهیدیله

تماما مومنین و صالحین و اتقیا گلدی

 

معزا رسمیدور دوشسون قباقه رسم عرفیله

اودور اول عمامه الده جدی مصطفی گلدی

 

شهید مسجد و محراب امیرالمومنین حیدر

نجفدن زخم کاری فرقده شیر خدا گلدی

 

مکرر دلده ، قارداش وای ، دیدی قانلی دوداقیله

گریبان چاک ، گوز یاشلی ، امام مجتبی گلدی

 

خدیجه ، آمنه ، مریم صفیه آسیه سارا

او جمعیله پریشان زلفی تک خیرالنساء گلدی

 

جناب جعفر طیار ، عموسی حمزه گلمیشدی

هامی آباء و اجدادی گیوب رخت عزا گلدی

 

جهان بیر ایله تشییع جنازه گورمیوب گورمز

جنازه دفن اولان ساعتده درده ماسوا گلدی

 

امامین نعشین عالمده رعیت دفن ایده بیلمز

دیار کوفه دن اعجازیله زین العبا گلدی

 

یتنده کربلایه چکدی دلدن ناله جانسوز

اوجا صوتیله سسلندی : اویان اوغلون بابا گلدی

 

گوروب اهل قبیله الده حفر اسبابی مرد و زن

اوشاقلار اول صفده او جمع با وفا گلدی

 

اوشاقلاردا گوروب بیل و کلنگی گوزلری دولدی

شکسته نی کیمی درده او درده مبتلا گلدی

 

دیدی ایوای بابا بوندان بیوک مظلومیت اولماز

ایشون هاردیدی اول گور بابا آخر هارا گلدی

 

پیمبر جانشینینی جمع اولوب کند اهلی دفن ایدسین

عجبدور گردش گردون گردون ناروا گلدی

 

قبیله اهلی اول مضطرب احوال اولوب گویا

بیله فکر ایتدیله جاسوس قوم اشقیا گلدی

 

مشخص اولدی بعدا که نه بیگانه نه دشمندور

تانیدیردی ئوزون انظاره حضرت آشنا گلدی

 

بویوردی بو غریبین اوغلی زین العابدینم من

هامی آغلاشدی بیردن تا سوزه اول مقتدا گلدی

 

سووردی کربلانین تپراقین باشه کیشی عورت

قیامت عالمی اوردا ظهوره بر ملا گلدی

 

بیری چوخ عذریله دفن امامه ایستدی رخصت

کمال لطفیله نطقه او دریای کرم گلدی

 

تانیدررام بویوردی من سیزه کیمدور بو پیکرلر

و الا زحمت با جا گورورسوز نا بجا گلدی

 

نچه یرده مشخص ایلورم من قبر ایدن تعیین

هارا تشریف آپاردی آردیجه مردم اورا گلدی

 

حسینون قازدیروب اولده قبرین ایتدی آماده

آتا جسمین قویا قبره پریشلان دل بالا گلدی

 

سلام ایتدی زیارت ایلدی اعضای مجروحین

خدا بلدی نجه درده او سلطان هدی گلدی

 

گوروب لایق کفن یوخدور،اوزون عفو ایله یا زهرا

نقدری فکر ایدوب آخر خیاله بوریا گلدی

 

حسینون یغدی نعشین بیر حصیر اوسته قویا قبره

آچوب آغوشینی وجده زمین کربلا گلدی

 

ایاق سمتنده ده بیر قبر ایدوب قارداشنا تعیین

دیدید شایسته بو قبره شبیه مصطفی گلدی

 

مصمم اولدی دفن ایدسین صورا شش ماهه قارداشین

آخوب گوز یاشی موجه گوزلریندن چشمه سا گلدی

 

آتا آغوشینه ویردی بالانون قانلی قنداقین

دیه بیلم دیله بیردن بالا گلدی آتا گلدی

 

کسلمش حلق لردن سس اوجالدی ذوق و شوقیله

غریبه کامیاب اولدوخ اله خوش مدعا گلدی

 

توکنده قبرینه اهل قبیله سو ، آخوب اشکی

سوسوز جان ویرماقی یاده آتانون گوییا گلدی

 

یازوب انگشتیله قبر حسین تشنه لب دور بو

شریعت اوسته گلدی باشنه هر نه بلا گلدی

 

دوزلدی اوچ وجود نازنینه قبر شش گوشه

وجود کربلاده نقشه عرش خدا گلدی

 

دویونجا آغلادی دوتدی یوزین حضاره گوز یاشلی

دیدید اهل قبیله نوبت صاحب لئا گلدی

 

گلون همتله نهر علقم اوسته جمله ای یاران

سیزه یار اولماقا باطنده جدیم مرتضی گلدی

 

عموم عباس نعشین تاپشوراخ قبره قالوب یرده

اونون دردینده سینم درده ای اهل وفا گلدی

 

قبیله اهلی گلدی باخدی جسمه حیرته دوشدی

گوزه هر عضوین اوستونده سانا گلمز یارا گلدی

 

گوروبلر حمل و نقلی ممکن اولماز باخدیلا هر قدر

خیاله دوشدوقی یردن تکان ویرماق خطا گلدی

 

همان یرده قازیلدی عادی بیر مدفن ابوالفضله

مناسب قامته گلمدی بلمم ویا گلدی

 

گرکدور قامته نسبت قازیلسون مدفن امواته

اوجا قدیله خوردا قبر شاید نارسا گلدی

 

یازلا سرو نازه ناز ایدردی قد موزونی

دیمزدیم سوز سوزی گتدی دله بو ماجرا گلدی

 

نه اولموشدی خداوندا که عادی حاله دوشموشدی

دلیم لال اول دانشما صحبت چون و چرا گلدی

 

امام عصر ناراحت اولی توضیح واضحدن

آچام حاشا سوزی ، قهره مبادا کبریا گلدی

 

قالان اصحابی ده بیر یرده مدفون ایلدی حضرت

او نوعی مصلحت بلدی ، ولی اوندان رضا گلدی

 

او درباره گوره شایسته دربان فکرینه اما

حبیب ابن مظاهر پیرمرد پارسا گلدی

 

حبیبی قیلدی دربان چونکه دفن اولموشدی حر اول

اونون امدادینه بی کس توکولدی اقربا گلدی

 

یوخیدی بیر کسی قالدی حسینون پیکری عریان

گلنده زینبی قتلایه دلده وا اخا گلدی

 

مرحوم حافظی تبریزی

منبع مجموعه کانالهای مدح و مرثیه

موضوع: احوالات دفن شهداء ,
زبان شعر و شاعر: نوحه ترکی , حافظی تبریزی

-------------------------------

در شهادت امیرالمومنین حضرت علی (ع)

 

صبح وقتی شهر کوفه عرصه گاه محشر اولدی

سجده گهده قانه غلطان باش یارالی حیدر اولدی

سس یتیشدی ماسوایه ماسوا باتوب عزایه

اهل بیت مصطفایه رستخیز محشر اولدی

 

هولیله حسن حسینون حالی غصّه دن پریشان

یوز قویوب عماده الده مسجده طرف شتابان

گوردولر آتا یخلمش باشدا یاره سجده گه قان

تازه غصّه مبتلاسی هر ایکی برادر اولدی

 

تا بالا گوروب آتانین اوزگه ماجرالی باشین

چرخ دون سالوب بلایه تازه دن بلالی باشین

اگلشوب آلوب کناره مجتبی یارالی باشین

توکدی گوزیاشین عذاره قلبیدن مکدّر اولدی

 

عرض ایدوب شرار محنت قلب اهل بیتی داغلار

دور گیداخ یولون گوزتلر قیزلارون سیزیلدار آغلار

مرهم ایلر اشک چشمین زینبیم یاراوی باغلار

ایمدی زینبین سرشکی سیلیله برابر اولدی

 

قان دولان گوزون آچاندا مجتبانی گوردی پوزقون

آغلاما بویوردی صبر ایت حالون ایلمه دگرگون

قویما آغلاسون حسینی غصّه ایلسون جگر خون

دوزمرم حسینی گورسم درد و غمله همسر اولدی

 

گوردیلر او شهریارین حال ضعفدن قعودین

حمل فکریله دوشوبلر جسمینون او گل وجودین

بیر گلیمه چولقیوبلار پیکرین او کان جودین

تا او نحویله مشرّف منزله او سرور اولدی

 

منزله یاخونلاشاندا سویلدی شه ولالیت

ایلیوم منی قویون سیز اوز ایاقیمیله رجعت

بیله گورمسون اوشاقلار قیزلار ایتمسونله وحشت

گرچه قان آخوب باشیمدان اوز گوزوم مخمّر اولدی

 

مرتضایه عرض ایدوب ای تاجدار کون و امکان

تیغ زهرداردندور بو یارایه یوخدی درمان

وار وصیّتون بیان ایت باشیوین فداسی نعمان

بو باشا وورولدی یاره خلق جمله با سر اولدی

 

مرحوم حافظی تبریزی

منبع مجموعه کانالهای مدح و مرثیه

موضوع: حضرت علی (ع) احوالات ,
زبان شعر و شاعر: نوحه ترکی , حافظی تبریزی

-------------------------------

احوالات حضرت خدیجه (سلام الله)

خلق ایلینده خالق یکتا خدیجه نی

خلق ایلمشدی گل کیمی زیبا خدیجه نی

 

هر حیثیدن ایدوبدی برازنده خلقتا

پروردگار حی و توانا خدیجه نی

 

خوش طیب ، خوش سلیقه و خوشبخت و مالدار

مردم ملقب ایلدی کبرا خدیجه نی

 

اندازه سیز غلام و کنیز و خدم حشم

ایتمیشدی سرشناس و هویدا خدیجه نی

 

هشتاد مین یازولا شتر بارکش تمام

مشهور ایدوب تجارت و سودا خدیجه نی

 

بیر سبز خیمه سی واریدی ایپلری حریر

حاصل تانوردی عالی و ادنا خدیجه نی

 

بیوِیدی قرخ یاشندا و لا کن قیافه سی

گوزده نشان ویروردی دل آرا خدیجه نی

 

چوخلار اونون تمایل اولوب ازدواجنه

حتی رجال ایتدی تمنا خدیجه نی

 

از بس واریدی ثروت دنیاسی بیکران

پول و ریاست ایتمدی اغوا خدیجه نی

 

هر خواستگاره لا بویوروب ، رغبت ایتمدی

خود رأی بیلدی اهل تقاضا خدیجه نی

 

پیغمبرین واریدی هله ایرمی بش یاشی

ایتدی تجارت ایتماقا پیدا خدیجه نی

 

توضیحی چوخدی چونکی مفصلدی داستان

تعریف ائدنمورم و لهذا خدیجه نی

 

دلدن و لیک عشق یتوردی پیمبره

عشق و علاقه ایلدی شیدا خدیجه نی

 

پیغمبر اولدی یوسفه تشبیه فی المثل

فرض ایلسم بجادی زلیخا خدیجه نی

 

بیر گون چاغوردی پرده سین آچسون بو مطلبین

کشف ائتمیوبدی اِسمله اما خدیجه نی

 

سویلوب که بیر نجیبه حرم تاپمیشام سنه

ائتسن مخیر آلماقا مولا خدیجه نی

 

شرم و حیا یولیله اشاقه سالوب باشین

چکدی سوال و پرسشه طاها خدیجه نی

 

آلدی خبر خانم کیم اولا سیز بویوردوقوز

وادار ائدوب تبسمه در جا خدیجه نی

 

عرض ایلدی گوله گوله من گورموشم اونی

باخسا گورن گوزون گوره جاق تا خدیجه نی

 

هیچ عیبی یوخدی سیدی ، اولسا بیر عیبی وار

بیر آزجا سندیروبدی او معنا خدیجه نی

 

بیر نچه ایل تفاوت سنی سنیله وار

سووسَن برابرونده دی حالا خدیجه نی

 

الله اکبر ایشلره باخ گور هایاندادی

نیلور ندور خدای تعالی خدیجه نی

 

تصمیم باغلیوبدی مشیت معاینه

ویرسین قرار مادر زهرا خدیجه نی

 

باش دوتدی ایش خلاصه اولوب عقد ازدواج

تزویج قیلدی سرور بطحا خدیجه نی

 

دوران دولاندی گون گیچوب آی گیچدی ایل گچوب

زهرایه بویلی گوردی بو دنیا خدیجه نی

 

قهر ایلدی بیر عده غرض ورز بانوان

ئوز منزلینده قویدولا تنها خدیجه نی

 

بطننده کن آناسینا مانوس اولوب بتول

قویمازدی غصه چکماقا اصلا خدیجه نی

 

هنگام زایمانیده اما یازور صدوق

دوتموشدی اضطراب و مهابا خدیجه نی

 

ناگاه دوت خانم هاموسی هاشمی لباس

تشریف گتدی قویمیا تا تک خدیجه نی

 

کلثوم و آسیه ، بیری مریم او حین ده

تک قویمیانلارین بیری سارا خدیجه نی

 

اگلشدی دوردی دورت طرفینده مخدرات

رافتله دیندیریردیله گویا خدیجه نی

 

نور بتول ناگه اولوب گوزده جلوه گر

ایتدی احاطه نور و تجلا خدیجه نی

 

پاکیزه و مطهره ، میمونه ، مشک بو

بیر قیز که شاد قیلدی سراپا خدیجه نی

 

فوراً گییندیروبله ویروبلر قوجاقنه

ایئتدی جمالی غرق تماشا خدیجه نی

 

دقتله باخدی گوردی کی خیردا خدیجه دور

بیلمور دی کی بالانی گورور یا خدیجه نی

 

گوی سمتینه دولاندیروب یوز عرض ایدوب خدا

چوخ شکر تاپدی نعمت عظما خدیجه نی

 

روحیمدی بو ، اگر بونی مرد و زن اینجیده

البته اینجیدوبدی خدایا خدیجه نی

 

افسوس یاندیروب قاپوسین قوم مشرکین

ایتدی دچار زحمت و ایذا خدیجه نی

 

مرحوم حافظی تبریزی

منبع مجموعه کانالهای مدح و مرثیه

موضوع: حضرت خدیجه (س) ,
زبان شعر و شاعر: نوحه ترکی , حافظی تبریزی

-------------------------------

اجازه خواستن حضرت قاسم (ع)

از حضرت امام حسین(ع) برای جنگ

 

من نجه گوروم تنگ ایدوب عمو عرصه‌گاهی بو اشقیاسنه

بـاخ الیمـده‌کی دستخطّی گور اذن ویر اولوم من فدا سنه

 

قتلیمـه آتـام مجتبـی یـازان اَلده‌کی بوفرمان اولااولا

یار و یاور آختارماقا گوزون حسرتیله باخسون صاقا صولا

باشوا دولاندور اجازه ویر سال عَم‌اوغلوم اکبرکیمی یولا

بو طریق عشق ایچره گوستروم منده قُدرتیمجه وفا سنه

 

باغریمی بلا و مصیبتین چوخلوقی عمو قانه دوندورب

منلـه اوز آراسنــداکی گُل اُلفتـی آنام شاخه‌دن دَروب

اَل چکوبدی مندن کفن سالوب بوینوما سنه فِدیه گوندروب

ای خلیله وارث اُولام بوگون تشنه‌لب ذبیحِ مِنا سنه

 

ترک ایدن زماندان آتام حسن بوجهانی سَنلندی زحمتیم

من سنی آتا بولموشم اولوب دائماً سنه میل و رغبتیم

فرض ایله غلام اکبره منی قارداش اولماقا یوخ لیاقتیم

بو سوزه گواه ایسته‌سن اولور بو وصیّت مجتبا‌ سنه

 

باخما اِلتجا ایلرم گلوب خاطریم منیم درده اِی‌عَمو

گوز یاشیم آخور سیل‌تک بیله متّصل رخ زرده ای‌عمو

غصّه‌لنمه قاسم فدا سنه تؤکمه گوزیاشون بیرده ای‌عمو

شاهزاده اکبر عم اوغلومون محنتی ایدر اکتفا سنه

 

بو دگل وفا شرطی ای عمو اَل تاپا بو چولده عدو سنه

من سنی کومَک سیز قویوب باخوم اکثرّیتِ فوج دشمنه

جانووه قسم حالووی گوروب یوز ویرور زِبس درد غم منه

علّتی اودور من بو حالیله ایلرم بیله اِلتجا سنه

 

گلمشم بو گلماقدا اولموشام لطفُوه اورکدن امیـدوار

ناامیـد لطفونـدن ایلمـه سنـده ای شهنشـاه تاجـدار

قوی گیدوم باتوب قانه جان‌ویروم اولمیوم قیامتده شرمسار

افتخار ایدوم فاطمه آنام سویلسون اوغول مَرحبا سنه

 

سن پیمبره نور دیده‌سن هم آناندی خیرالنّسا سنون

مجتبا آتامدور برادرون هم آتاندی شیرخدا سنون

بولموری مقامات و شأنوی دوره‌وی آلان اشقیا سنون

عترتین اؤزون تشنه قالموسان ایلمور بو قوم اعتنا سنه

 

راضیم عمو باش قلج‌لانوب قان آخا ایکی گوزلریم دولا

باش آچوب آنام نعشیمه باخا اشگنی توکه زلفنی یولا

لیلی و سرّیه بو دشتده وای اوغول دیوب همصدا اولا

لیک اولمیه ذرّه‌جه غم و درد و محنت و ابتلا سنه

 

من گرک جلای وطن اولام آیری بیر یره ایلیم سفر

لیلینون یوزون من گورنمرم صاق قالوب عمو اؤلمسم اگر

چون اونون جوانی اؤلوب منی گورسه یادینه دوشر

زنده دور عم‌اوغلون دیر اوغول دوتموشام ولی من عزا سنه

 

(حافظی) شکایت زمانه‌دن ایتمه روزگاریله‌ سازش ایت

مجتبی یتیمین خیاله سال گوز یاشیله دردون گزارش ایت

هاردا بیر یتیم و یتیمه‌وار رأفت ایله گورسن نوازش ایت

قورخما خالقون مهرباندور چوخ ویرور جزاده جزا سنه

 

مرحوم حافظی تبریزی

منبع مجموعه کانالهای مدح و مرثیه

موضوع: حضرت قاسم ابن حسن (ع) ,
زبان شعر و شاعر: نوحه ترکی , حافظی تبریزی

-------------------------------

کوچ از خرابه

 

رقیّه چارم اولسا کربلایه گیترم سنسیز

گَلوب نی تک نوایه کربلایه گیترم سنسیز

 

گیده بُلسن آپارّام قویمارام تک بو ولایتده

قالوب روحیم داریخسون بو دیار دار غربتده

دولانّام غملی قبرین باشینه هر آن و ساعتده

اورکده اولماسون مندن گلایه گیترم سنسیز

 

بلالی عمّه وی چوخدا قیزیم نامهربان بُلمه

سویرم چوخ سنی، آز ایسترم ایتمه گمان بُلمه

منیم جسمیمده جانسان اولماسان جسمیمده جان بُلمه

نه بزم جشنه نه بزم عزایه گیترم سنسیز

 

الیمده اختیار اولسا دیار شامیده قالّام

مزارون اوستونه شال عزا تک زلفیمی سالّام

دوشنّم قبریوه سندن حسینین عطرینی آلّام

اگر گیتسمده دشت غمفزایه گیترم سنسیز

 

اُپوب توشه گوتورسِیدیم دویونجا گوز قاشوندان من

گوتورمزدمیم بلالی باشیمی تیز باش داشندان من

ملامت اولماسا چونکه خجلم قارداشوندان من

مزار اکبر گلگون قبایه گیترم سنسیز

 

محبّت آتشی یاندوقجا دیگ دل گَلور جوشه

دولانّام باشیوه ای سرور دینه جگر گوشه

اوزوملوق اولسا بو غملی مزارون آلّام آغوشه

محلّ دل گشا و باصفایه گیترم سنسیز

 

اولا ممکن سنی من قویمارام تنها بو منزلده

بودور مقصود و منظور و مرام و مقصدیم دلده

گوزوم اوسته آپارّام، نه قوجاقیمده نه محملده

حضور خامس آل عبایه گیترم سنسیز

 

نجه شوریده بلبل قویسالار گلشندن آیریلماز

اوزینه جذب ایدر آهن ربا آهندن آیریلماز

قیزیم واللهی عمّنده باشارسا سندن آیریلماز

قالوب غربتده کوی آشنایه گیترم سنسیز

 

قسم بو قبریوه جانیم عزیزی دویمادیم سندن

ولی ترک ایتماقا مجبورم آخِر، اینجیمه مندن

اگرچه دردمندم حاجتیم درمانه وار غمدن

بُلم امکانی وار دارالشّفایه گیترم سنسیز

 

بیله فکر ایتمه گیتسم درد الیندن بیرده دینجلّم

خدنگ آهیله قلبین هامی اهل دلین دَلّم

فراموش ایتمرم، سندن اوتور شامه گینه گَلّم

فنانی ترک ایدوب مُلک بقایه گیترم سنسیز

 

گَلنده شامه شیرین دل قیزیم سن گَلموسن مندن

حسیسنین جانینه اولسون قسم دونمور یوزوم سندن

امانتسن حسینیمدن، سنه قربان اولا عمّن

اولا ممکن او صحرای بلایه گیترم سنسیز

 

ویروبدی بیر بیره آلتی برادر قول مردانه

حسنله عسکری قاسم حسین که گیتدی زنجانه

نصیب اولسا خدای ذوالکرم ال آچسا احسانه

دیوبله «حافظیه» کربلایه گیترم سنسیز

 

مرحوم حافظی تبریزی

منبع مجموعه کانالهای مدح و مرثیه

موضوع: احوالات کوچ از خرابه شام ,
زبان شعر و شاعر: نوحه ترکی , حافظی تبریزی

-------------------------------

احوالات خرابه شام

 

نچّه منزلده حسینون باشی مهمان اولدی

دوندی هر تک تکی بیر روضه ی رضوان اولدی

 

بیری خولینون ایویدی که خراب اولموش ایوین

مثلی گلخنیله لاله ی نعمان اولدی

 

گَلدی مهمان او کول اوستونده کی مهمانه بتول

او صولان غنچه گینه چاک گریبان اولدی

 

بیریده دیر نصارادی کلیسا دیگیلن

عیسوی مذهب او منزل که مسلمان اولدی

 

اوردا گَلدی خانم فاطمه آغلار گوزیله

زلف آشفته سی تک حالی پریشان اولدی

 

بیرده بی شرم یزیدین ایوینه گیتدی قوناق

اوردا لعل لبی القانیله الوان اولدی

 

گَلدی ویرانیه ده بیر گئجه شام ایچره او باش

کنج ویرانه دونوب رشک گلستان اولدی

 

گوردی میر حرمی اهل حرم خرد و کبار

هوسیندن هامونون گوزلری گریان اولدی

 

احتراماً‌ هامی دوردی ایاقا ویردی سلام

کیم بُلر اوندا نه عالم نجه دوران اولدی

 

هامی دورموشدی الی سینه ده باغلی قولونان

تا صفین سینماقینا صادر فرمان اولدی

 

بُلمورم حضرت سجّادیدی فرمانده او دم

یا گینه زینب مظلومه و نالان اولدی

 

دایره اهل حرم، نقطه ی پرگار او باش

اوزگه بیر منظره واقعده نمایان اولدی

 

گُل کیمی اوّل اُپوب ایگلدی هر تک به تکی

یودولا اشکیله، باش چون در رخشان اولدی

 

صورا بیر بیر هره درد دلین ابراز ایلدی

هریه بیر دلیله بیر سخن عنوان اولدی

 

چوخ دارخموشدی رقیّه بیله بُلّم که ازل

گَلنه ناز ایدن اول مرغ خوش الحان اولدی

 

دیدی قربانون اولوم ای بابا بس هاردِیدون

بیر یانار اود منه بو محنت هجران اولدی

 

بیله سالماز قیز اوشاقین بابا گوزدن باباجان

فرقتونده اورگیم لاله صفت قان اولدی

 

منه سنسیز چوخ اذیّت ایلیوب اهل جفا

بابا حقّیمده منیم ظلم فراوان اولدی

 

آغلیم ایسته میشم قمچی ووروبلار باشما

آغلاماقداندا بو بیچاره پشیمان اولدی

 

چولده قالدیم ایاقیم اولدی قابار قاچماقدان

ایاقیمدان اُپنیم خار مغیلان اولدی

 

قاریشو بیر بیرینه درد و غمیم، ناخوشودوم

گَلماقون یاخشی منیم دردیمه درمان اولدی

 

کاش اُلسم صفحه ی تاریخیده ثبت ایلیه لر

آتاسی گَلدی سفردن قیزی قربان اولدی

 

ایشیدوب بو سوزی ناگاه اورکلندی رباب

موج ایدوب اشکی به سان یم عمّان اولدی

 

دیدی قوی من دیوم احوالیمی بیکس آتاوا

داخی گوگلوم بو خرابه کیمی ویران اولدی

 

اوّل عذر ایستدی عجزیله خانم زینبدن

گوردی اظهار محبّت ایده امکان اولدی

 

دیدی بو قانلی یارالی باشوا من دولانوم

هجر الینده اورگیم شانه ی شان شان اولدی

 

اگیلوب قویدی او قانلی یوزه غملی یوزینی

چوخ پریشان چون او بانوی پریشان اولدی

 

دیدی آهسته کنیزون نه عجب یاد ایلدون

گَلماقون چوخ سنه زحمت، منه احسان اولدی

 

یوزینه باغلیوب اوز عرض ایدوب اکبر آناسی

مقتضی درد دله گوردی دم و آن اولدی

 

دیدی قوی منده آقامدان بالامی بیر سوروشوم

ایچدی سو یا که گوروم فدیه لب عطشان اولدی

 

عرض ایدوب سیّدی لیلا دلیجه اکبره دی

دوشدی لیلا چوله مجنون بیابان اولدی

 

ایوین آباد آناوی یاخشی اوغولسوز قویدون

تا حیاتیم وار ایشیم نی کیمی افغان اولدی

 

یوخوما گَل باری رویاده دولانوم باشوا

آشکارا گوروم امّید دل حرمان اولدی

 

ای شهامتلی، ادب معدنی، غیرتلی بالام

شمر سندنصورا لیلایه نگهبان اولدی

 

پاسدار اوغلومی شام اهلی الیمدن آلدی

منزلیم بیر گئجه ده کوفه ده زندان اولدی

 

رقّته گَلدی سکینه دیدی لیلایه آنا

دوشدی اکبر سوزی درد دلیم اعلان اولدی

 

ویر اجازه باباما منده دیوم اکبردن

برگ ریحان کیمی دل تیتردی لرزان اولدی

 

اودا گویا دوداقیندان اُپوب عرض ایتدی بابا

بویور اکبر باجیوین قامتی چوگان اولدی

 

قالدی یولدا گوزی صغری باجیوین یثربده

بو نجه عهد ایلماقدی، نجه پیمان اولدی

 

آیریلاندا دیوب اکبر یوزینی تیز تیز اُپون

ستم خاریله بُلمور گلی خندان اولدی

 

ناگهان تازه عروس اشکیله گوز جامی دولی

یانماقا بزم غمه شمع شبستان اولدی

 

قیز عیالی آتاسین گورسه بودی رسم جهان

گوره سن آچدی دلین بلبل خوشخوان اولدی

 

دوداقین، آنّین، اوزین، گوزلرین اُپدی آتانون

اشکی رخسارینه چون گوهر غلطان اولدی

 

بعضی سوزلر دیدی بیر بُلدی اوزی بیرده او باش

سخن آهسته بیر آز وقت کماکان اولدی

 

بیله بُلّم که ایدرموش گله اوز بختیندن

اشکینون گوردوله شرمنده سی باران اولدی

 

هانسی بیر بختی قرا قیز که عروس اولدی آدی

اوزی اوز طالعینه واله و حیران اولدی

 

صورا مجلسده یزید ایتدیقی ظلمه دل آچوب

دیدی گوردون بابا نه ظلم و نه طغیان اولدی

 

نه یزید آنلادی مذهب، نه شرافت نه ادب

نه اوتاندی و نه وابسته ی وجدان اولدی

 

منی ایستوردی کنیز آدی قویوب ایلیه خوار

سوز اوزاندی گئجه گوندوز منه یکسان اولدی

 

آغلادیم من، دایانا بُلمدی عمّم زینب

خشمگین بزمیده چون ضیغم غرّان اولدی

 

او زنازادیه غیظیله آجیقلاندی بیبیم

اونی سیندیردی، منیم مشکلیم آسان اولدی

 

یتدی یوز ایلده گوروب نوح نبی بیر طوفان

منه آز سنّیله هر گون نچه طوفان اولدی

 

دیمه لی سوز چوخودی حیف اوتاندیم دیماقا

دل خاکستر آرا اود کیمی پنهان اولدی

 

منتها رافتیله زینب مظلومه دیدی

مختصر وصلیله چوخ فرقته جبران اولدی

 

قوی قیزیم منده بیر آز قارداشیمیله دانیشوم

بیله فرصت اولا مشکلدی که الآن اولدی

 

کعبه تک ایتدی زیارت او باشین هر طرفین

آلدی آغوشینه، قالب ایکی بیر جان اولدی

 

دیدی بیر بیر دیمه لی سوزلرینی قارداشینا

حال و مستقبل و ماضی ندی اذعان اولدی

 

ایستیوب عذر، دیدی قارداش اسیرم گوروسن

خدمتیمده سنه نسبت دیمه نقصان اولدی

 

حین گفتاریده قارداشیله ناگه نه گوروب

تازه بیر غم اودی ویرانه ده سوزان اولدی

 

جان ویروب نازلی رقیّه قولی باغلی یخلوب

محفل انس دونوب شام غریبان اولدی

 

اولدی یعقوبی وثاقی بو کلامه بانی

گرچه انشا ایدنی (حافظ قرآن) اولدی

 

مرحوم حافظی تبریزی

منبع مجموعه کانالهای مدح و مرثیه

موضوع: احوالات خرابه شام ,
زبان شعر و شاعر: نوحه ترکی , حافظی تبریزی

-------------------------------

در مدح حضرت علی ابن موسی الرضا (ع)

 

ای شه کشور تسلیم و رضا

سنه مین حاتم طائی دی گدا

یا غریب الغربا

یا معین الضعفاء

 

ای شه کشور تسلیم و رضا

سنه مین حاتم طائی دی گدا

یا غریب الغربا

یا معین الضعفاء

 

قاپوا گلمیشم ای بنده نواز

بلوسن دردیمی ای محرم راز

وار یقینیم بولورم بو سوزی من

نا امید ایلمه سن سائلی سن

سنی زهرا آناوین جانی آقا

لطفیله حاجتیمی ایله روا

یا غریب الغربا

یا معین الضعفاء

 

عجز و الحاج ایدورم ایندی سنه

باخاسان گوشه چشمیله منه

سنون احسان الیوین دردین آلوم

اولما راضی الی قوینوندا قالوم

الی بوش سالم یولا مولا جان

اولوم احسان الیوه من قربان

یا غریب الغربا

یا معین الضعفاء

 

ای جگر گوشه زهرا و علی

حجت هشتم والله ولی

کرموندن چوخ اوزاقدور آقاجان

بیر نفر بوش قیده بو قاپودان

سیدی من سنه بیر عبد ذلیل

اولموشام محضر پکونده دخیل

یا غریب الغربا

یا معین الضعفاء

 

 مرحوم حافظی تبریزی

منبع مجموعه کانالهای مدح و مرثیه

موضوع: حضرت امام رضا (ع) مدح ,
زبان شعر و شاعر: نوحه ترکی , حافظی تبریزی

-------------------------------

احوالات ورود به شهر شام

 

سس دوشدی گلور شامه حسین باشی جداده

شام اهلی تماشایه چیخا ائتدی اراده

 

هر رهگذری خلق ویروب ال اله دوتدی

غوغا اوجالوب هلهله و غلغله دوتدی

زینت تاپوب اولموشدی بوتون شهر چراغان

ائتمیشدیله خلقه اولاری خارجی عنوان

رقاصه لر اوینوردی دوشمنیشدی خیابان

 

سازنده گیدوب شوره نوازنده گلوردی

رقاص اوتوروردی یره خواننده گلوردی

بایرام کیمی اللرده حنا خرد و کلانین

قاتمیشدی باشین عیش و طرب پیر و جوانین

پیغمبرین آلمیشدیلا معناده توانین

 

بولموردیله که ختم رسلی شامه گلوبدی

ایتام آتاسی باش چکه ایتامه گلوبدی

بیردن نه گوروبلر که سینیق قافله گلدی

منظوری تماشاچیلرون حاصله گلدی

ناگاه حسین باشی جداده دله گلدی

 

قرآن اوخودی قانلی لبی آیه به آیه

سالمیش باشینا قیزلارینون نیزه ده سایه

شام اهلنی غم منظره سی حیرته سالدی

بعضیسی قیتدی ایوه بعضی لری قالدی

بو اوندان او بوندان جریانی خبر آلدی

 

هر کس که بولوب بولمینی ایلدی حالی

وردی باشا ای وای دئدی پیغمبر عیالی

دوشموشدی جداده شهدا باشی نظامه

تشبیه گونه اولدوزا یا بدر تمامه

مشعل او چراغانیده اولموشدولا شامه

 

هر تک تکی نین سیریده مخصوص مسیری

مجذوب ائلیوب هر بیری بیر نچه اسیری

هر بیر باشا مینلرجه گوز ایلوردی تماشا

مشغول تماشا اوزی زیبا و دل آرا

مشهوریدی شام اهلی اولور حسنده تنها

 

سوزدن بوله سن باش ندی باش صاحبی کیمدی

یا حسن ندی حسنون اولان طالبی کیمدی

مستغرقیدی بحر تحیرده باخانلار

یا رب گورسن کیمدی دئردی بو جوانلار

چوخ جای تعجبدی که ئولموله قالانلار

 

دلده بولارین لاله کیمی داغی ساغالماز

بیر بئله جوان ئولسه آناسی دیری قالماز

بوندان بیلسن لیلینین احوالینی سنده

نه چکدی او مدتده و یا ملک وطنده

اکبر وئیه بولموردی دوشوردی دیلی بنده

 

ایستردی دوشه سوز یتوره خلقه مرادین

قویدی آناسی ئولموش علی اکبرین آدین

داماد باشیندا ائلین زلفه نظاره

دلدن آلشوب یاندی دیلی دوتدی شراره

بیردن او جماعتدن اوزون چکدی کناره

 

گوز یاشی توکوب آغلادی احوال عروسه

یاندی ئورگی ایده و آمال عروسه

اصغر باشی آلمیشدی ئورکلرده کی تابی

سویلوردوله یوخدور غمینین حد و حسابی

هر چند تانیموردولا غم دیده ربابی

 

حقلیردیله کی حقلیدی حسرت ئولوم ایتسون

الله آناوین کورپه بالا دادینه یتسین

سقا باشی اما یوخودی نوک جداده

فرض ایلماق اولماز او بویوک مطلبی ساده

هاردیدی یرین دل دئماقا ائتمز اراده

 

نسگل اوتی کشف اولسا دل عالمی داغلار

جنتده علی ساقی کوثر یانار آغلار

زهرا قیزینون تنگیدی دنیا نظرینده

چیخمیشدی ئوزوندن غم و محنت اثرینده

گوردوقجا تماشاچیلری دور و برینده

 

الله بولوری غملر الیندن نه چکوردی

بیر عده ستمگرلر الیندن نه چکوردی

آدم گتوروب دور ، دیه سن بس در و دیوار

مملویدی عورت کیشیدن کوچه و بازار

بیر خاتم انگشتر اولوب عترت اطهار

 

ناجنس لرین دستی رسندیدی تمامی

آزار و اذیت هوه سیندیدی تمامی

بعضی داش آتوب دل یاراسی بعضی وئراردی

مهمان باشنا گل یرینه کول سووروردی

صیاد صفت دام بلا یولدا قوروردی

 

هر دام بلانی قوران اوز قوردوقی یره

ائلوردی اذیت برینه دوردوقی یرده

هر گونه ستم ایتماقا اولموشدیلا آزاد

هر کس که نه الیندن که گلوب ائلدی بیداد

بیجا دگی فرمایش ائدوب سید سجاد

 

ایکاش ئولئدیم من آنامدانم دوغولونجا

بو نوعیله دریای بلاده بوغولونجا

خیبردن اولان جمع یهودی متواری

مسکن گلوب ائتمیشدیله او دار و دیاری

فرصت دالیسنجا ائلیوب روز شماری

 

پیغمبره مافاته قصاصین سراغیندا

بیردن بیره گوردی هدفین اوز قاباقیندا

چیخدی او یهودیلر ائچیندن بیر عجوزه

گلدی دل پوسیده ده داغ غمی سوزه

اوز کینه دیرینه سینی گتدی حضوره

 

بیر سنگ جفا تاپدی اله سالدی بهانه

سلطان سلاطین باشینی قیلدی نشانه

آتدی او داشی آلنی حسینون یارالاندی

قان آخدی قیزیل قانیله آغ خطی بویاندی

باخدی باجی قارداش باشینا صبری تالاندی

 

جان سسلدی قارداش یارالی باشیوه قربان

ئولمور نیه زینب که اولا دردینه درمان

نه گون اولور آخشام نه یتور باشه مصیبت

بیر ائیل اولوری بیر ایله که لحظه ده ساعت

آل اللهه با جادی دئسم اولدی قیامت

 

بیر آز یول ة اوزون وقت ، الهی نه چتیندی

یول اهلیدی عورتدی اشاق قیزدی گلین دی

ویرانیه دروازه دن آزجیدی مسافت

چکمزدی او یول طی طریق اون ایکی ساعت

یا رب واریمیش یولدا نه اندازه جماعت

 

غم قافله سین لنگه سالوب یولدا یوباتدی

بیر گون چکوب علت اودی ویرانیه چاتدی

عزت اطاقیندا یاشیان خیردا اوشاقلار

اولدی قوری یرلرده اولان خوار قوناقلار

تترردی بدن لر ، قوروموش غنچه دوداقلار

 

دل خسته ، بدن خسته ، ئورک داغلی ، سوسوز آج

هر تک تکی بیر یالشه آسایشه محتاج

سوز سخت مقامه یتیشوب ختم ائله قورتار

دل صاحبی دل وئردی سوزون اولدی شکر بار

هر بیتینه بیر سجده شکر ائتگیله مین بار

 

ای (حافظی) ، یعقوبی ،و آزادی و اصلی

یازدیردی بو اشعاری سنه موسم و فصلی

 

 مرحوم حافظی تبریزی

منبع مجموعه کانالهای مدح و مرثیه

موضوع: احوالات شهر شام ,
زبان شعر و شاعر: نوحه ترکی , حافظی تبریزی

-------------------------------

در ولادت حضرت امام زمان (عج)

 

سزادور مژده ویرسون پیک حق جنّتده زهرایه

که ای خاتون محشر قائم اوغلون گَلدی دنیایه

 

مَلَک منظر گلوب گوله بنزر گلوب

اونون یمن قدومیندن جهان طرفه گلستاندور

ویروبلر سس سسه مدحینده بلبل لر غزل خواندور

عیاباً چشم روشن عرض ایدور شیعه خراماندور

یره گَلسون سماوات اهلی لایقدور تماشایه

 

نجه مولود؟ تعریفه زبان بی زبان ایستر

که یعنی قدرت نطق خدای لامکان ایستر

دیماقدان دل کتابیندن قلم عذر عیان ایستر

قضا مبهوت و حیراندور قدر بو ماه سیمایه

 

نجه مولود؟ آلار حسن و ملاحت کشوریندن تاج

ایدر صبر دل عشّاقی فوج غمزه سی تاراج

اونون مینلر عزیز مصر سهم عشقینه آماج

وورار پابند عشق کمتری طعنه زلیخایه

 

نجه مولود؟ هرگز من دیمم بیر طفل ابجددور

دیسم زیبنده دور سرمایه ی فخر اَب و جددور

هامی اوصافی تشبیه وجود پاک احمددور

بو نوباوَن گَلوب دلدن گوزل یتدون تمنّایه

 

سلام و تهنیت عرض ایلروخ بیزده بو مولوده

تشکّر بی نهایت ایلروخ درگاه معبوده

بیزی الله بو مولودیله نائل ایتدی مقصوده

بِحمدِ الله یتیشدوخ لطف حقدن فیض عظمایه

 

وورار کام دل اهل ولا کامینجه گام عالم

عدالتله دولار عالم بساط ظلم اولار برهم

یتر باشه مصیبت، قورتولار غم، ختم اولار ماتم

دونر دنیای دونون رفعتی جنّات اعلایه

 

بودور مسرور ایدن غمگین اولانلار قلب ناشادین

بودور ظلّام عالمدن آلان مظلوملر دادین

بودور ویران ایدن اهل جفانین قصر آبادین

ممیّزدور تماماً خیر و شرّ و زشت و زیبایه

 

اگر بایرامدی لیکن دوشدی صحبت ظلم ظالمدن

سوزین طرزین دگیشدیم منصرف اولدوم خیالیمدن

گوزوم بیر قاصد ایستر گوندره اشک زلالیمدن

خبر ویرسون بو مولودین قدومین آل طاهایه

 

دیسون ای خوش گونه دنیاده حسرتلر گوزوز روشن

گورن دشمن الیندن چوخ اذیّتلر گوزوز روشن

زبان حالیله عرض ایلور امّتلر گوزوز روشن

گَلوب خونخواه ای ناحق آخان قانلاری صحرایه

 

ستمله آیریلانلار صاحب و اولاد و قارداشدان

اُلونجه غصّه دن آیریلمیانلار گوزلری یاشدان

یتیشدی منتقم آچسونلا قاره معجری باشدان

داخی گوز تیکمسونلر انتقام صبر فرسایه

 

آچیلسون قلبی، شاد اولسون اورکدن زینب کبری

یاخونلاشدی او گون اولسون قصاص روز عاشورا

جزایه قاتل اکبر یتیشسون دلده واویلا

ویریلسون مژده سی غمکش آناسی امّ لیلایه

 

دولی گوزله سریّه نوعروسه هر باخان ساعت

اَشاقه سالماسون باشین دوباره چکمه سون خجلت

یاخوندور کامه یتسون قاسم دامادیمه طلعت

تاپا طوی حجله سی داماد گَلماقیله پیرایه

 

ربابون آز قالور غمدن بلالی گوگلی دینجَلسون

یاخوندور آه پیکانی نشانگاهه دگوب دَلسون

مقام انتقامه بی مروّت حرمله گَلسون

آلنسون اصغرین قانی وورولسون تیغ او ترسایه

 

یاخوندور تابعان آل سفیان خوار و زار اولسون

ابوالفضلی خجالت ایلینلر شرمسار اولسون

آلنسون قانی دشمندن اوشاقلار کامگار اولسون

ملالی زائل اولسون هر باخاندا تشنه سقّایه

 

 مرحوم حافظی تبریزی

منبع مجموعه کانالهای مدح و مرثیه

موضوع: نیمه شعبان ,
زبان شعر و شاعر: نوحه ترکی , حافظی تبریزی

-------------------------------

حضرت فاطمه زهرا (سلام الله)

اذان بلال

 

خدا آدیله او فعلیکه ابتدا اولماز

قصور کامل اولار فعله ابتدا اولماز

 

خدا آدیله اودور باشلیرام بو مطلبی من

خدادن اوزگه سینه اتکا سزا اولماز

 

بلال شوری بلالی باشیمدا، الده قلم

اگرچه لایق شأنی سوزوم ادا اولماز

 

ایدوبدی شور پیمبر بلالی شوریده

ایله مهیّج و پرشور ماجرا اولماز

 

مؤذن نبوی پیرو حقیقتیدی

مجاز اهلی اولان قلبیده صفا اولماز

 

همینکه ایلدی رحلت پیمبر رحمت

گوروب رعایت مصداق اِنَّما اولماز

 

اذانی ترک ایلدی ویرمدی بلال اذان

دیدی که خادم شه خادم گدا اولماز

 

نقدر ایتدیله خواهش بلال اذان ویرسون

جواب ویردی بو منظور مطلقا اولماز

 

ابی قحافه نون اوغلی خلافته یتسون

موافق نظر ختم انبیا اولماز

 

علی وصیّ بلافصل حقی غصب اولسون

بو امره آند اولا اللهه حق رضا اولماز

 

سفارش ایلدی بیر گون اوزی خانم زهرا

بلال اذان دیمه سن دردیمه دوا اولماز

 

بابام پیمبری چوخ گوگلوم ایستوری هرچند

سنه امام جماعت او مقتدا اولماز

 

سسون گَلنده دوشر یادیمه رسول امین

منه تسلّی دل اوزگه بیر صدا اولماز

 

بلال گوردی بتولین سوزین یره سالسا

موافق دل سلطان اولیا اولماز

 

گلوبدی مسجد پیغمبره اذان دیماقا

زمان اگرچه دونوب بیرده مامَضی اولماز

 

بلال حزن تمامیله سویلدی تکبیر

گورن دیدی بیله محزون ایدن صلا اولماز

 

ایشیتدی فاطمه تکبیری ایلدی تکرار

دیدی که اوزگه سی مستوجب ثنا اولماز

 

دینده اشهد ان لا اله الا ا...

خانم بویوردی خدادن سوا خدا اولماز

 

اوچومجی فصلین اذانین دیَن زماندا بلال

قیامت اولدی دیسم گر، سوزوم خطا اولماز

 

پیمبر آدی سالوبدور مدینیه بیر شور

که حشریده ایله بیر شور غمفزا اولماز

 

قاریشدی بیربیرینه آغلادی اناث و ذکور

جهان نه قدر اولا ایله بیر بکا اولماز

 

مدینه دن فلکه وا محمّدا اوجالوب

ایله یاران جگری وا محمّدا اولماز

 

آتاسینون ایشیدنده گوزل آدین زهرا

دیدی خراب ندن ارضیله سما اولماز

 

بابا بابا دیدی ازبس یخیلدی ضعف ایلدی

بیله وفالی قیز ایله رئوف آتا اولماز

 

خبر ویریلدی بلاله دایان بتول اولدی

کسوب سسین دیدی بیرده بو سس رسا اولماز

 

خیال ایدوب آلا ثانی بلالدین بیعت

او حاضر اولماسا بیر عدّه هکذا اولماز

 

بلاله عرصه نی چوخ تنگ دوتدی اول بی دین

دیدی خلیفیه اولماق کم اعتنا اولماز

 

تانور هامی اوزونه پیشوا ابوبکری

تانوماسان اوزیوه سنده پیشوا اولماز

 

دوتوب او دست خطا کاریله گریبانین

دیدی اولونماسا بیعت یخن رها اولماز

 

غلامیدون سنی بوبکر آلوب ایدوب آزاد

بو فاش مطلبی ایتماقلیق اختفا اولماز

 

بلال سویلدی حاشا ایدم اونا بیعت

او فعلی ایلمرم که خدا رضا اولماز

 

پیمبر امر ایدوب آلدی او ایلدی آزاد

بو کلمه حقّیدی انکار حق سزا اولماز

 

ولی منی گینه قیترسه ایتسه قول اوزینه

وار اختیاری جوابینده حرف لا اولماز

 

دوباره قول اولوب اوز عمریمی باشا ویرّم

جزاده خصم منه شافع جزا اولماز

 

اوتان حیا ایله صحّاک زاده شرم ایله

تعدیات اولی گیزلینده برملا اولماز

 

منیم گیچوبدی چوخی عمریمون آزی قالوری

دوباره عمر جهاندا منه عطا اولماز

 

جهان فنادی ولی عمر آخرت باقی

بُلن یانندا فنایه بقا فدا اولماز

 

ایشیتدی بو سوزی خطّابین اوغلی غیظه گلوب

ملاطفت دیدی هرگز سنه روا اولماز

 

خلاصه بیعت ایله یا مدینه دن چیخ گیت

قبول اوزگه تمنّا و التجا اولماز

 

بلال گوردی گرک کوچ ایده، یوخ اوزکه علاج

رعایت حرمتی اوردا قالا اولا اولماز

 

مینوبدی ناقه سینی چیخدی شهر یثربدن

قبول ایلمسه گوردی انزوا اولماز

 

دیار شامه گیدوب بلکه غصّه سی آزالا

اگرچه اهل ولادن بلا جدا اولماز

 

یاتوبدی بیر گئجه پیغمبری ایدوب رویا

ایله غلام ایله مولای ذوالعلا اولماز

 

محبّتیله رسول خدا بویوردی بلال

وفالی دوست بو تیزلیقدا بی وفا اولماز

 

سبب نه اولدی علیدن نه تیز بیله دویدون

زمان سختیده بیگانه آشنا اولماز

 

دمشقی سن نیه ویردون مدینیه ترجیح

مگر دمشقیده دنیای دون فنا اولماز؟

 

بلال اویاندی اوزی نفسینی مخاطب ایدوب

دیدی بو ظلمیدی بوندان بیوک جفا اولماز

 

علاوه ناخوشیدی سن گلن زمان زهرا

اونا اگرچه سنون گیتماقون دوا اولماز

 

گینه عیادتی لازیمدی دلشکسته دی چون

اونون عیادتی بی اجر و بی جزا اولماز

 

دوشوب بو فکره قِییتسون مدینیه بیرده

اگر قِییتمسه شرط وفا ادا اولماز

 

دوباره یثربه گَلدی دمشقیدن غمگین

اونون او حالی کیمی حال غمفزا اولماز

 

قالوب ولی متفکر ایکی مرام اوسته

که هانسینی ایلسم نقض مدعا اولماز

 

گیدوم زیارت پیغمبره ازل گوره سن؟

و یا عیادت زهرایه که صورا اولماز

 

اگر زیارت پیغمبره ازل گیتسم

گلایه مند یقینیمدی مرتضی اولماز

 

اولار پیمبرین امّا خلاف رفتاری

یقین رضا اونا پیغمبر خدا اولماز

 

اوزی گَلنده سفردن همیشه پیغمبر

گوزوم گوروب اونا بو کلمه افترا اولماز

 

ازل گیدردی قیزی فاطمه زیارتینه

اونون ایشی سوزی که وحی دن سوا اولماز

 

گیدوم عیادت ایدوم بس ازلده زهرانی

صورا بیر ایش اولی موقعده اقتضا اولماز

 

مصمم اولدی علی دودمانینه گَلسون

ایله غلام وفادار و پارسا اولماز

 

گَلوب دوگوب قاپونی گور غلامیده ادبی

اجازه ایستمه میش داخل سرا اولماز

 

گوروم عذابیوی ثانی خدا شدید ایلسون

سنون کیمی بو خلایقده بی حیا اولماز

 

او محترم قاپونی ظلم اودیندا یاندیردون

و حال آنکه بُلوردون تایی بنا اولماز

 

ایدوم خلاصه بلالین حکایتین تعقیب

تمامه یتمیه ناقص اگر قالا اولماز

 

خبر بودور حسنینون بیری گَلوب قاپیه

منیم عقیدمه امّا بو سوز بجا اولماز

 

گرک قاپونی آچان شاه کربلا اولسون

قاپی آچان او اولان یرده مجتبی اولماز

 

آچوب قاپونی بلالی گوروب سلام ایلدی

بلاله صبح خیال ایله گور مساء اولماز

 

باخوب حسینه گوروب حالی چوخ پریشاندور

یوزی ایله سارالوب که ایله طلا اولماز

 

دولوب پیاله تک اشکیله نرگسی گوزلر

بُلوب او حال بدون غم و بلا اولماز

 

دیدی او گوزلره قربان اولوم آنان نجه دی؟

شِفا تاپوبدی؟ دوا دردینه و یا اولماز

 

اوره کلنوب توکوب اشگین یوزه حسین دیدی

توکم سرشگیمی عمریمجه اکتفا اولماز

 

آنام وفات ایلیوب قالموشام بلال آناسیز

مگر آناسیز اوشاقلار گونی قرا اولماز

 

اوشاق آناسیز اولونجا اوزی اُله ایکاش

چتین آنا اُلوموندن بیر ابتلا اولماز

 

گئجه گونوز باجیم اوخشار بیز ایلروق ناله

آتامدان اوزگه بیزه کیمسه هم صدا اولماز

 

آتا نه قدر اولا مهربان بونی بُلوسن

گینه آنا یری ویرمز گَلوب آنا اولماز

 

قالوب سسی قولاقیمدا قاپی یانان گوندن

او نوع حادثه واقع ایله بداء اولماز

 

دیوب بو سوزلری قویدی یوزون یانان قاپیه

ایله سیزیلدادی بیر نی ده اول نوا اولماز

 

دیدی بلال آناما بوردا بیر یارا دگدی

یتر تمامه بو دنیا ایله یارا اولماز

 

بو آستانیه آخدی او یاره نین قانی

نه قان که ویرسله دنیانی خونبها اولماز

 

چاغوردی فضّه نی گَل فضّه گَل بالام اُلدی

ایاقه دورماقا منده داخی قوا اولماز

 

دی (حافظی) آدی اسلام ادّعا ایدنه

بشرده دین اولی تزویریله ریا اولماز

 

مرحوم حافظی تبریزی

منبع مجموعه کانالهای مدح و مرثیه

موضوع: حضرت فاطمه زهرا (س) احوالات ,
زبان شعر و شاعر: نوحه ترکی , حافظی تبریزی

-------------------------------

زبانحال حضرت فاطمه زهرا (سلام الله)

به حضرت زینب کبری (سلام الله)

 

گُل رخساره اشکون ایلمه چون ژاله زینب جان

شکسته نی کیمی ایتمه فغان و ناله زینب جان

 

قیزیم گوزیاشیوه قاتما اورک قانین یانا یانه

گرک تاب ایلیوب دوزماق شرار نار هجرانه

پریشان ایلوری غم آرتیرور بو دل پریشانه

سرشک آلون آخدوقجا جمال آله زینب جان

 

بو غملی قلبیمون امّیدی سن یاراسی سان آخِر

هامی اخلاقیمون رفتاریمون داراسی سان آخِر

قیزیم سن بو ایویم مندن صورا زهراسی سان آخِر

سنی بُلّم یریمده سرپرست اطفاله زینب جان

 

باجون قارداشلارون مندن صورا اولسا پریشان حال

محبّتله دانشدور، دوت دله، رافتله گوگلون آل

یوزین اُپ، گوزیاشین پاک ایت، اوزوم تک بوینونا قول سال

وورا غم قویما آی تک دوره سینده هاله زینب جان

 

آنائیله صغیر اطفاله عالم اوزگه عالمدی

آناسیزلیق غمین من گورموشم، بُلّم بویوک غمدی

آناسیز طفله دائم گوزیاشیله ناله همدمدی

دوشر بیر لحظه یوز درده قالار مین حاله زینب جان

 

اُلوم بیر درددور یوخدور علاجی دار دنیاده

هامی ناچار اُلور اعلی و ادنی، زشت و زیباده

نه استثناسی نه تبعیضی واردور پیر و برناده

نه عقل و جهله دور اُلماق، نه سنّ و ساله زینب جان

 

وفاسی یوخدی دنیانین ایدنده یاخشی اندیشه

وورار یاره یارا اوسته گینه هر بیر دل ریشه

به غیر از صبر یوخ چاره، گرکدور صبر اولا پیشه

گرک تاب ایلیوب دوزماق همین منواله زینب جان

 

اگرچه نسگلیم چوخدور بو بیر امر مسلّمدور

سنه مندن صورا هر فرد فردی مایه ی غمدور

سفارش ایلورم امّا گوزون گوردون که پرنمدور

آتان ایستور گَله سیل اشکون ایتمه ناله زینب جان

 

کیشی غصّه گوتورمز، غصّه ویرماق خوش دگل مَرده

سزا اولماز اوجالسون آهی عرشه پرده به پرده

نجیب عورت رضا اولماز گَله مَردین دلی درده

اودور پرده چکر غصّه ویرن اعماله زینب جان

 

کیشی خلقینده عورتجه غم و درده توان اولماز

کیشینی غم تکانی سیندیرار غم بی تکان اولماز

ستون خانماندور، مرد سینسا خاندان اولماز

دوشر ایو اهلی بیگانه سوین احواله زینب جان

 

عم اوغلوم ایسترم غم چکمسین بیرده بودور علّت

یتنده محنت انسانون قولوندان سلب اولار قوّت

آتاوین دشمنی چوخدور قیزیم دشمن تاپار جرات

آلار دل داغلی داغ اوسته مثال لاله زینب جان

 

اولاندا ایوده تشریفی آتاوین توکمه گوزیاشون

اونی دیندیر دانشدور قویما زانوی غمه باشون

قاتون باشین ایکی باجی ایکی ایستَکلی قارداشون

ایدون مشغول پند و صحبت و امثاله زینب جان

 

سالوب بیرده خیاله حالیمی سن چکمه دلدن آه

دیوم بو نکته نی تا راحت اولسون خاطر آگاه

یوزیمده ال یرین گورسه اگر جدّون رسول ا...

قویار یوخسا یته ظالم خبیث آماله زینب جان؟

 

سنی زهرا آنان زهرا عزیزی زینب کبری

هامی اهل عزانون حالینی قیل لطفیله جویا

خصوصاً حافظی ایستور صله ای مظهر زهرا

یتیشسون مقصده چوخ دوتماسین دنباله زینب جان

 

مرحوم حافظی تبریزی

منبع مجموعه کانالهای مدح و مرثیه

موضوع: حضرت فاطمه زهرا (س) زبانحال , حضرت زینب کبری (س) زبانحال ,
زبان شعر و شاعر: نوحه ترکی , حافظی تبریزی

-------------------------------

زبانحال حضرت زینب کبری (سلام الله)

در فراق حضرت فاطمه زهرا (سلام الله)

 

گورن زماندا یرین بوش آناسی زهرانون

دیردی زینب زهرا نماسی زهرانون

 

(ایوای منه وای غمکش دوران آنام ایوای)

(باغری آتا هجرینده اولان قان آنام ایوای)

 

هجرون منی یوردومدا غریب ایتدی وطنسیز

گویا او قفس بلبلیم باغ و چمنسیز

عنوان کلام اولموش آنا زینبه سنسیز

هر شام و سحر هر دم و هر آن آنام ایوای

 

کاش آیری دوشونجه آناجان سندن اُلیدیم

هجرونده قالوب ایلمیوب شیون اُلیدیم

تسلیم ایلیوب جان سن اُلونجه من اُلیدیم

دائم دیمییدیم من نالان آنام ایوای

 

گونده منه برپا اولی مین شور قیامت

نه شور قیامت که قیامت اونا آیت

گورّم دولانان یرلروی سلب اولی طاقت

وردیم اولی وای دیده سی گریان آنام ایوای

 

سجّاده وی فرش ایلرم اوقات فریضن

بیر ایل اولی هر ساعت ساعات فریضن

دیدمده مجسّم اولی حالات فریضن

یانّام دیرم قامتی چوگان آنام ایوای

 

باغریم غم هجرونده اولوب لاله صفت قان

غبطه یری وار ایتسه دُر اشکیمی مرجان

رخساره او اشکیله یازار خامه ی مژگان

عمری آز اولان دردی فراوان آنام ایوای

 

هیچ خوردا بالالی بیر آنا اُلمه سین ای کاش

اُلسه غمی دنیاده هامی غمدن اولار باش

علّت اودی دائم ایکی باجی ایکی قارداش

تک تک دیروخ زار و پریشان آنام ایوای

 

کلثوم سالار یاده جوان اُلماقون آغلار

خم قدّیوی اوخشار، اورگین غم اودی داغلار

سسلر آنا گللر سولا، ویران اولا باغلار

گورسم دیرم سرو خرامان آنام ایوای

 

بیر یاندا حسن قارداشیمون حالی دگرگون

افسرده، اورک داغلی، پریشان و جگرخون

شهلا گوزینون یاشی آخار چون شط و جیحون

سسلر او پریشان پریشان آنام ایوای

 

اودلار غم اودوندا دل دنیانی حسینون

عرشه اوجالار دمبدم افغانی حسینون

ایوای آنا ایوای اولی عنوانی حسینون

هر سوز باشی سسلر جگری قان آنام ایوای

 

آغلار گه اولار بیزلره هم ناله آتامیز

گاهی یانار آغلار یانان اطفاله آتامیز

اشکین گل رخساره ایدر ژاله آتامیز

سویلر که دیون اول شه مردان آنام ایوای

 

سوز ایسته سن ای « حافظ قرآن » حسن اولسون

آد بیرده پیمبردن آپار پنج تن اولسون

مقطعده دینه مطلعی زهرا سئوَن اولسون

ایوای منه وای غمکش دوران آنام ایوای

 

مرحوم حافظی

منبع مجموعه کانالهای مدح و مرثیه

موضوع: حضرت فاطمه زهرا (س) زبانحال ,
زبان شعر و شاعر: نوحه ترکی , حافظی تبریزی

-------------------------------

مفاخرۀ حضرت علی ابن ابی طالب (ع)

 با حضرت اباعبدالله الحسین (ع) در

محضرحضرت رسول اکرم (ص)

 

اگر دیسه هامی عامل عملده بسم الله

یتر تمامه همان امر طبق خاطرخواه

 

خدا آدیله اودور قیلّام ابتدا سوزیمی

که انتهایه کیمی خوش ایدم ادا سوزیمی

 

دیه لّه بو سوزی مشهور کلّ عالمدور

نشاط دوست نشاط آور و غمی غمدور

 

بو ماجرانی بیان ایلورم اولا خرسند

کمند عشق علی و حسینیله پابند

 

صحیح دور خبری، اعتباری نادره دور

آتائیله بالانین ایتدیقی مفاخره دور

 

باخان مناقب مشهور ابن شاذانه

بولر روایته حاجت یوخ اوزگه برهانه

 

ولی من ایلمورم اکتفا اونا تنها

اولوبدی کتب کتاب تظلّم الزّهرا

 

یازوبلا بیر گون اوتورموشدی ایوده پیغمبر

اونون حضور شریفینده ساقی کوثر

 

اودم اولان او ایکی نوره نور عین گلوب

که یعنی خامس آل عبا حسین گلوب

 

حسین او غنچه که آلتی بهار گورموشدی

نه جور باد خزان و نه خار گورموشدی

 

مفاخره ایلین عصریده او شهزاده

خبر بودور واریدی آلتی سنّی دنیاده

 

گورن کیمی اونی جدّی پیمبر رحمت

چاغوردی دوتدی باسوب باغرینا همان ساعت

 

اُپردی گل کیمی ایگلردی هر بوداقیندان

ایکی گوزی آراسیندان، گهی دوداقیندان

 

نظر او حاله علی شیر لایزال ایلدی

دوتوب رسول خدایه یوزین سوال ایلدی

 

ایا رسول خدا وی پیمبر ذی شان

فدا اولوم سنه آیا حسینی چوخ سویوسن

 

جواب ویردی نجه سویمرم اونی گور من

حساب اولور منه او جسمیده بیر عضو بدن

 

دوباره عرض ایلدی کای رسول عالمیان

حسینی چوخ سویوسن یا منی سنه قربان

 

به سان طوطی شکّر شکن هوسلندی

ایشیتدی بو سوزی ناگه حسین سسلندی

 

پیمبره او یاخوندور که شانی بالادور

سویر پیمبر اونی که مقامی والادور

 

بولوب سوزیندن او شه شاهزاده نین سوزی وار

بالاسینون آتاسیندان مفاخره گوزی وار

 

منه تفاخر ایدورسن بویوردی یاولدی

گر ایسته سم بلی لفظیم جواب عرض ایلدی

 

یتیشمه سین بو خیاله که سوز گران گلدی

ولیک نطقه او سلطان انس و جان گلدی

 

منم بویوردی که مومنلره مددکارم

منم بویوردی که قتال قوم کفّارم

 

منم بویوردی علی راستگلورین دلیم

یالانچیلار که عدوّ خدادی قاتلیم

 

منم بویوردی که مومن لرین امیری اوغول

عرب دیه لّه منه حربگاه شیری اوغول

 

منم بویوردی شفیعم جزاده شیعه لره

منیم محبّتیمیله عمل ویرور ثمره

 

منم بویوردی او نعمت که لطف ایدوب الله

اونی تمامی مخلوقه، اول گلن آگاه

 

منم بویوردی قسیمُ الجنان والنّیران

منم سالان اودا یا اینکه قورتاران اوددان

 

منم بویوردی اولان خلق اوچون او بیت الله

قالور امانیده هر کیم اورا گتورسه پناه

 

منم بویوردی تمسّک ایدن ولایتیمه

یتر عذابیدن امنه، دوشر محبّتیمه

 

منم بویوردی که بدر و حنین جنگینده

پوزان صفوفی اولان تیغ تیز چیگنینده

 

منم بویوردی که شمشیریله ووران یاره

منم ایدن دل اعدانی نیزه سی پاره

 

منم بویوردی لسان اللهی که ناطقدور

منم او کیمسه که او حجّت خلایقدور

 

منم بویوردی که مومنلره صلات اوغول

تمام ماخلقه علّت حیات اوغول

 

منم بویوردی نمازی ایدن بو گون احیا

قالوبدی دوغری چیلیق منله یرده پابرجا

 

منم بویوردی ایدن خلقی خیر ایشه عامل

منیم ولایتیمیله بو دین اولوب کامل

 

منم بویوردی ایدن حوض کوثره دعوت

ایچر منیم الیمیله او حوضیدن امّت

 

منم بویوردی که یوخ مندن اوزگه ده بو مقام

منیم الیمدن آلور جام روز حشر انام

 

منم بویوردی آتاسی یتیم اطفالین

منم سراغ دوتان مستمندلر حالین

 

منم بویوردی که کهف اَرامِلَم مشهور

منم سالان دل اعدایه غم، محبّه سرور

 

منم بویوردی که حقّیمده حضرت طاها

دیوب منم کیمه مولا علی اونا مولا

 

همین بو نحویله یتمیش نچه عدد حضرت

فضائلین گتیروبدور بیانه ثُمَّ سَکَت

 

دولاندیروبدی مبارک یوزین حسینه رسول

کمال رافتیله دیندیروب بویوردی اوغول

 

اوئیکه سایدی ایشیتدون فضائلیندن آتان

بیرین فضائلینون مینده ایتمیوبدی بیان

 

آتان علینون او سایدیقلاری او گفتاری

اولا چتیندی که عشر و عشیر و معشاری

 

فضائلیکه اوغول سایدی ساقی کوثر

اونون برابری مین میندی بلکه بالاتر

 

آچوب او دُرج لعل لبی دُرّ سانه گتور

سن اوز فضائلون ایمدی اوغول بیانه گتور

 

آچوب تکلّمه غنچه دوداقینی گل تک

گلوبدی شوره او شیرین دل آچدی بلبل تک

 

کیمین منیم کیمی وار سن کیمی آتاسی آتا

باخا آتاسینا فخر ایلیه بالاسی آتا

 

تفاخر ایلمیوم گور نجه آتا سنه من

و حال آنکه منیم ای آتا آتام سنسن

 

منم حسین آتامدور علی بن طالب

همان علی که اولوب عمر و مرحبه غالب

 

منم حسین آنامدور شفیعه ی عرصات

اودور حبیبه ی محبوب قاضی الحاجات

 

منم حسین آنامدور او زهره ی زهرا

منیم آناما آنادور خدیجه ی کبری

 

منم حسین آنام آدلانوبدی خیر نسا

بتول و فاطمه، صدّیقه هانیه عذرا

 

منم حسین که بسدور منه بو عزّت وشان

اناث عالمه خاتوندور آنام آتاجان

 

منم حسین که جدّیمدی احمد مختار

رسول ذات خداوند قادر و غفّار

 

منم حسین محمّد بابامدی میر امم

اونون کنیّه سی دور مصطفی و هم خاتم

 

منم حسین که اشرفدی کائناته بابام

منم که علّت خلقتدی ممکناته بابام

 

منم حسین که گهواره ایچره جبرائیل

ایدوبدی نوحه و، تلقین ایدوبدی میکائیل

 

منم حسین که لارَیب و شکّ یا ابتا

دوتوبدی حق منی چوخ حیثیدن عزیز و علا

 

بابام باباندان آتاندان آتان آناندان، آنام

شریف و اشرف و افضلدی یوخدی شکّ و کلام

 

حضور حقده آتا سن شرفسن مندن

آتا بابا آنادا من گرامیم سندن

 

دیوب بو سوزلری اول غنچه گل شکفته لنوب

باباسیندان قوجاقیندان ایدوبدی ناز انوب

 

اوزین آتوب آتا آغوشینه یرین آلدی

بالاجا قولّارینی آچدی بوینونا سالدی

 

دوداقلارین بالا قویدی آتا یوزیندن اُپوب

آتاسیدا بالا آنّیندان اوز گوزیندن اُپوب

 

بویوردی آرتورا حق شان و شوکت و علمون

اولا زیاده بو فخر و شرافت و حلمون

 

سنه اذیّت ایدن اولماسون گوروم راحت

سنه جفا ایدنه خالق ایلسون لعنت

 

بو قدر وار که سنه ظلم ایدوب ایدن مظلوم

ایدوب باباوی آناوی منی اوغول مغموم

 

سنون گوزیوی گوره بولمروخ که پرنمدور

بیزه سنون فرحون عیشدور، غمون غمدور

 

مرحوم حافظی تبریزی

منبع مجموعه کانالهای مدح و مرثیه

موضوع: حضرت علی (ع) مدح ,
زبان شعر و شاعر: نوحه ترکی , حافظی تبریزی

-------------------------------

حضرت امام زمان (عج)

ای ماخلقین علّت ایجاد وجودی

ذرّیّۀ طاها و علی منبع جودی

احسان ایله گل پردۀ غیبتده دایانما

جانلار سنه قربان اولا چوللرده دولانما

 

انصافیدی غول ایتمیه مولانی زیارت

آیا دگی دنیا بویی اسباب خجالت

بیر عمریده هجران اولی ای کان کرامت

بو آیریلیقی لطف ایله قیل وصله مبدّل

قربان او گلن یولّارا یاسیّدی تیز گل

 

سن پردۀ غیبتده پریشان گجه گوندوز

بیزده شرر هجریله سوزان گجه گوندوز

اولماق نه روا بیر بیله گریان گجه گوندوز

احساس ایله احوالیمیزی گوزیاشمیزدان

کسمه بو قدر سایۀ لطفون باشمیزدان

 

دللرده یم غم گَله موجه داشا قویما

طوفان ایده سیلاب اولا باشدان باشا قویما

ای نوح حقیقی بیزیلن باش باشا قویما

گل دوت الیمیزدن بیزی چک ساحله ساری

اول واسطه الله آراسندا سنی تاری

 

سوز یوخ یوخ او که بیزده مسلمانه گرکدی

واقف دگیلوخ هر نه که ایمانه گرکدی

عامل دگیروخ بیز او که قرآنه گرکدی

وابسته سیز آل اللهه بیز اولموشوخ امّا

سیزدن اولاجاق حلّ اگر اولسا معمّا

 

تقصیریمیزی عفو ایله پیغمبره خاطر

نادیده حساب ایله آتان حیدره خاطر

صدّیقۀ کبرای الم پروره خاطر

باشسیز بیزی گل قویما داخی بوندان علاوه

قطع ایله او دللر که دیر عمریجه یاوه

 

شایسته دی گل پرپر اولا خوارین الینده

اسلام اولا ملعبه کفّارین الینده

دین اهلی دوشه ذلّته اشرارین الینده

نه رحم ایده لر طفل صغیره نه کبیره

نه پیر و جوانه نه قتیله نه اسیره

 

کفّارین آدی مسلم اولوب آلت دستی

احراره جری ایلوری هر ارذل و پستی

دینون دیموری قائمی وار یوخدی شکستی

بیر نچّه شرارت یوکی صدّام ایاقدا

گویا گوروری هامی اسلام اوزاقدا

 

آگهسن اوزون حاجتی یوخ شرح و بیانین

مینلرجه مسلماندی گلن پیر و جوانین

ناحق یره دشمن توکوری سو کیمی قانین

دل یوخدی که دل داغ اولمیه غم دللری داغلار

قربان گوزیوه قالدی رعیّتلرون آغلار

 

ملک وطنین مرزی دونوب کرب و بلایه

تبدیل اولور گونده نچه طویلار عزایه

مهمان ایله منّت قوی اوزون خیر دعایه

صدّام صفت لر هاموسی ریشه کن اولسون

رونق تاپوب اسلام دونوب سن سوین اولسون

 

اسلام اتگیندن کَس الین اهل جفانون

سیندیر قوشونون کافر بی شرم و حیانون

شمشیریله آچ باغلی یولون کرب و بلانین

گیتسون او مزار اوسته جوان اوغلی اُلنلر

لیلا دلیجه سویله سون ایوای علی اکبر

 

ای (حافظینون) حافظی هر آنیده دمده

سندندی کمکلیق منه گفتار و قلمده

واردور گوزوم عمریمجه گوزل دست کرمده

هر کیم منیلن وار اونادا لطف و کرم قیل

هر تک تکینون آدینی دفترده رقم قیل

 

مرحوم حافظی تبریزی

موضوع: حضرت امام زمان (عج) ,
زبان شعر و شاعر: نوحه ترکی , حافظی تبریزی

-------------------------------

حضرت علی ابن موسی الرضا (علیه السلام)

 

یارب غریب خاک خراسان اولان منم

غربتده لاله تک اورگی قان اولان منم

 

اِئل لردن آیری دوشموشم ایل لردی ای خدا

جبراً دچار محنت هجران اولان منم

 

حسرت قالوب منه بالالار من بالالارا

درد فراقی دلده فراوان اولان منم

 

یوخ محرمیم یانیمدا دیم دردیمی اونا

محتاج استراحت و درمان اولان منم

 

اُلماقدان آیریلوق غمی مشکلدی دهریده

امّا امید وصلتی حرمان اولان منم

 

معصومه نی چوخ ایستوری گوگلوم داریخموشام

وصلیندن اوتری دیده سی گریان اولان منم

 

ای کاش اولوب سالیدی منیم بوینوما قولون

احسان اولاردی، لایق احسان اولان منم

 

قارداش اُلنده خوشدی آچا باشینی باجی

بو آرزوده ای حق منّان اولان منم

 

آغلاشماقا یوزومده یوزی اولمادی ولی

بو بارده دن قرار ایوی ویران اولان منم

 

جان اوستیم، یوزوم قوری توپراقلار اوسته دی

آهی به سانِ مشعل سوزان اولان منم

 

عیناً سودان کناره دوشن بیر بالیق کیمی

هولیله گه صاقا صولا غلطان اولان منم

 

اوغلی اولوب اوغولسوز اولانلار مثالیم

چشم انتظار و حالی پریشان اولان منم

 

یعقوب ثانیم، بو خراساندا مصر غم

مشتاق وصل یوسف کنعان اولان منم

 

الله بویوم برابری اوغلوم اولا اولا

گوزده صباحی شامیله یکسان اولان منم

 

تاخیرینون ندور سببی بولموری مگر

هجر عالیمنده واله و حیران اولان منم

 

گویا یغوب بالالاریمی باشینه دیور

بوندانصورا بو جمعه نگهبان اولان منم

 

بو آرزودییم که آنام فاطمه گله

چوخ اوغلیم، یاخون اونا الآن اولان منم

 

دوشسه بالا بلایه آنا آرزو ایدر

بو آرزوده هردم و هر آن اولان منم

 

هاردا غریب ئوله او گیدر باشی اوستونه

غربت غریبی ایمدی کماکان اولان منم

 

عهد ایلورم گلنده قویام یوز ایاقینه

لایق او خاک پاکینه قربان اولان منم

 

خوشدور باشیم دیزینده اولا جان ویرن زمان

جانیم عزیزیدور اونا جانان اولان منم

 

حتماً یارالیدور یوبانوب تیز گلنمیوب

یوخسا بولور که چاک گریبان اولان منم

 

مشکل گشا بابام کیمی مشکلده قالموشام

گورّم خدا که مشکلی آسان اولان منم

 

چوخلار منه دیردی سوزون من کیمه دیوم

مینلرجه دردی سینه ده پنهان اولان منم

 

عبدالله ایستیوب، (حسنی) (حافظی) یازوب

سویلوب حسنده بانی عنوان اولان منم

 

مرحوم حافظی تبریزی

منبع مجموعه کانالهای مدح و مرثیه

موضوع: حضرت امام رضا (ع) احوالات ,
زبان شعر و شاعر: نوحه ترکی , حافظی تبریزی

-------------------------------

 حضرت موسی بن جعفر (علیه السلام) 

 

اولدی چوخ محبوس اولان مایوس مانوس اولمادی

بیر نفر موسی ابن جعفر مثلی محبوس اولمادی

 

چوخ اولوب عالمده زندانی مقصّر بی گناه

مجرم و بی جرم اولوبدور چوخلاری خواه و نخواه

اولمیوب امّا رعیّت حبس ایدن محبوس شاه

حضرتین حقّینده ناحق ظلم محسوس اولمادی

 

چوخ اولوب بیکس سالان اولموبدی بیر کس یادینه

جان ویروب حسرت اُلنده عترت و اولادینه

چوخلارین چوخ غم یتوبدور خاطر ناشادینه

هیچ بیری بیله غم و محنتلی محبوس اولمادی

 

گوشه ی محبسده چوخلار اُلدی یا اُلدوردولر

زهریله یا مختلف طرزیله مسلک یا کفر

بو وجود نازنینون مثلی اولماز بیر نفر

بیر نفر حضرت کیمی جبریله مسموس اولمادی

 

یتدی ایل دورد ایل یازوبلار اون بیر ایل اون یتدی ایل

بیر آدامسیز بیر قوجا بیر بی پرستار و علیل

قالدی یوز دیواریده گوزیاشی توکدی متّصل

کنده و زنجیردن بیر اوزگه مانوس اولمادی

 

گه دیردی هارداسان ای گوزلریم نوری رضا

گه دیردی گیت بقیعه دورما ای باد صبا

عرض ایله جان اوسته دور اوغلون گَل ای زهرا آنا

سسلدی هر کیم سنی فریاده مایوس اولمادی

 

گه دیردی بوردا معصومه اولیدی ایمدی کاش

گوزلریمی باغلیِیدی، باش آچِیدی گوزده یاش

هامّی نسگلدن بو بیر نسگل ولیکن اولدی باش

اول همایون بخته یار اول وقت منحوس اولمادی

 

روزگارین باشه ویردی پراسف احوالیله

رحمسیز سند آدلی زندان بان و شاقّ اعمالیله

بیر قاپی اوسته مرخّص اولدی دورت حمّالیله

اوز ایاقیله مرخّص حیف وافسوس اولمادی

 

ای وطنسیزلیق غریب اُلماق الوندن داد و آه

هیچ کیمه گوسترمه سین چه دوست و چه دشمن اِله

وضع تشییعه سلیمان ایلدی ناگه نگاه

عزّته ذلّت دیمه بیر آندا معکوس اولمادی

 

بیر جنازه گوردی اُفّ اولسون سنه ای روزگار

بیر عبا اوستونده وار شال عزا تک خوار و زار

بو اُلن کیمدور سوروشدی بیله بی عزّ و وقار

احترام و وقری بیر شهر ایچره محروس اولمادی

 

بیر نفر دلّندی بو بی یار و یاوردور دیدی

خلق ایچینده مشتهر سبط پیمبردور دیدی

بعضی لر سویلر آدی موسی ابن جعفردور دیدی

اُلدی تابع حکم هارونه بو تعقوس اولمادی

 

تا بُلوب موضوعی یا مهریله

آلدی نعش حضرته قیلدی گوزل غسل و کفن

سوز کفندن دوشدی سالدیم کربلانی یاده من

کربلا شاهی کفنله نولدی ملبوس اولمادی

 

کربلا دشتینده آیا بیر سلیمان اولمادی

یا حسینون پیکری مسلوب و عریان اولمادی

یا او کفّار ایچره بیر فرد مسلمان اولمادی

اولدی یا اوندا حیا و عار و ناموس اولمادی

 

اوندا مانع اولدی دشمن عترت اطهارینه

آغلاسون قویموردولار اول حضرته انصارینه

ایمدیده مانع اولوب یول باغلوسی زوّارینه

کربلا بیزده نجه چون خطّه ی طوس اولمادی

 

نوکروندور (حافظی) ای مفخر نوع بشر

گورمه سه قبرون بیر عدّه آشناسیله اگر

آردیجا اُلسه آچار طعنه دلین بیگانه لر

بو نه نوکردور دیه لّر شاهه پابوس اولمادی

 

مرحوم حافظی تبریزی

منبع مجموعه کانالهای مدح و مرثیه

موضوع: حضرت امام موسی کاظم (ع) احوالات ,
زبان شعر و شاعر: نوحه ترکی , حافظی تبریزی

-------------------------------

حضرت زینب کبری (سلام الله)

 

شاماتیده نشانه ی طاهایه یادگار

جان اوسته عرض ایدردی که ای حیّ کردگار

 

ای زینبین گوگلدن آلان اختیارینی

یارب یتور منه آنامین یادگارینی

 

قارداشیمی چوخ ایستوری گوگلوم بو صون نفس

دفع ایله غصّه لی اورگین غم فشارینی

 

زینب حسینین عشقی سبب اولدی ترک ایده

تبعید آدیله موطن و دار و دیارینی

 

نعمتدی جان ویرن آچا گوز جان ویرن زمان

اطرافینه باخوب گوره ایل و تبارینی

 

سن وعده ویرموسن ایده سن حاجتین روا

هر بنده داده سسلیه پروردگارینی

 

نور دو عین فاطمه نی سندن ایستورم

احساس درد یار ایلمز گورسه یارینی

 

دلده بودور نهایت آمالی خواهرین

تشییع و دفن ایده قازا قارداش مزارینی

 

سن سالموسان محبّتینی قلبیمه منیم

سیل وصل الیله دلده کی هجران غبارینی

 

گوندوز کیمی گوزومده شب تار ایشیقلانار

گورسم وفالی قارداشیمون گل عذارینی

 

مدّتدی آیری دوشموشم اوندان عنایت ایت

سوندور اوزون گوگلده کی محنت شرارینی

 

گلسون گوروم او تشنه لبین قانلی لبلرین

جاری ایدوم او لبلره گوز آبشارینی

 

تنها بودور اورکده اولان آرزو منه

لطفاً ویره زیارتینون افتخارینی

 

قربان اولوم حسینه منه روحدور حسین

چوخ شائقم ئوپم ایکی چشم خمارینی

 

بیر عمردور منه آدی ورد زبان اولوب

دلدن سالام محالدی نام کبارینی

 

عهد ایلورم گلنده سودان صحبت ایتمیم

آرتورمیم او غملی دلین آه و زارینی

 

هر کیمسه نین کسیلسه اورک تاری من کیمی

سسلر هرای و دادینه هر لحظه تارینی

 

تیغ اجل یاخوندی کسه عمر رشته سین

مشکلدی دلده پاره لسون عشق تارینی

 

عشق حسین ئولونجه بو زینب وقاریدور

پابوسی گلسه آرتوری زینب وقارینی

 

دل دردی عشق درددی درمانی اوندادور

تاپسون بو غربت ئولکه ده درده دچارینی

 

گل صحبتین او گل یوزونی گورسم ایتمرم

باد ستم خزان ایلیوب نوبهارینی

 

بیر عمر قارداشیم دیموشم او دیوب باجیم

قارداش باجی باشا ویروب اوز روزگارینی

 

معیار دُرّ و گوهری صرّاف اولار بولر

عاشقده رمز عشقیله عشقین عیارینی

 

یارب یزیدین ایله گوزونده گونون قرا

او زینبین سپید ایلیوب زلف تارینی

 

بیر گونده چکمسِیدیله شمشیره بیر ائلی

ایمدی بو زینبین ائل آلاردی کنارینی

 

کلثوم ایدردی مجلس ماتم به پا منه

داغلاردی داغ اودیله دل داغدارینی

 

اکبر اذان ویرردی آلاردیم گوزل سسین

دینین ئولن زمان ایشیدردیم شعارینی

 

قاسم اوخوردی خوش سسیله جمعه سوره سین

آسان ایدردی عمّه سینون احتضارینی

 

تابوتیمی آلاردی ابوالفضل دوشینه

اشکی یخاردی سیل صفت غم حصارینی

 

تابوتیمون دوشردی بنی هاشم آردیجا

هر سمتیدن سالیدی جنازم گذارینی

 

یارب نوازی، (حافظی) ، صالح نصیب قیل

گورسونله ئولمه میش او حسینین مزارینی

 

مرحوم حافظی

منبع مجموعه کانالهای مدح و مرثیه

موضوع: حضرت زینب کبری (س) زبانحال ,
زبان شعر و شاعر: نوحه ترکی , حافظی تبریزی

-------------------------------

حضرت رقیه (سلام الله) 

 

بابا سیاحته مردم گیدر چمن یرینه

سنون خرابیه باشون گَلوب بدن یرینه

 

دیسم خرابیه خوش گَلموسن سزا دگلی

رقیّه نون ولی خوش گلموسن ئولن یرینه

 

اجازه ویر دوشییم زلفیمی ویروم زینت

گُل بنفشه و نسرین و یاسمن یرینه

 

سویوندوقومدان ایتیردیم اوزومی هیچ دیمدیم

فدا کسوک باشیوین من گَلوب گیدن یرینه

 

ایاقلاروندان اُپردیم اولِیدی گر ایاقون

بو قانلی باشیوین اولّام فدا گَلن یرینه

 

ازلده رسمیدی بو ؛ باش چکر ایلین بویوکی

سبب ندور صورا گَلدون ایلین دوشن یرینه

 

ایشیتمیشم چوخ اُپرموش آنان بوغازوندان

قویوم دوداقیمی قوی بیر آنان اُپن یرینه

 

بو توزلی زلفیمی تل تل وفالی قیزلار تک

جنازون اوسته توکه بُلمدیم کفن یرینه

 

سنی نیه یولا تک سالدی اکبریم هانی بس

فدا اولا باجیسی اکبرین گَزن یرینه

 

داریخموشام بابا قِیتر منی آپار وطنه

علاقه مند اولی غربت چکن وطن یرینه

 

نه خوش گلور سویی نه اهلی نه هواسی منه

بو یاخشی دور کوچه هر طایفه سوین یرینه

 

مریضه ام بابا شامه گَلوب گلن گوندن

قوی عرض ایدوم ندی عرضیم گَلوب سخن یرینه

 

گونوزلر ایستی اذیّت ویرور، سویوق گئجه لر

گوگل آچلموری هی غم گلور محن یرینه

 

بیری باخور گولور احوالیمه بیری آغلور

هی آغلیان گیدوری هی گلور گلن یرینه

 

نه یاخشی گوزلریوی یومّوسان فدا گوزیوه

گوزون ساتاشموری بوینومدا کی رسن یرینه

 

دانشموسان بابا یوخسا دوداقلارون یارادی

فدا او لبلریوه من آقاج دگن یرینه

 

گئجه گونوز اورگیم تیترور اصغریمدن اوتور

او اصغری که ایچوب قانینی لبن یرینه

 

منه ده کاش دگِیدی اونون کیمی پیکان

اولیدیم اصغریم ای کاش کاش من یرینه

 

مدینه یوسفی اکبر بُلم بو شهره گَلوب

کلاف جان گیدرم الده پیره زن یرینه

 

تمام اولا بیر اوزون گورماق عمر قیمتینه

بو نقد جانیمی نقد ایلرم ثمن یرینه

 

عموم امام حسن یادگاری هاردا قالوب

بیبیم اُپِیدی یوزین قارداشی حسن یرینه

 

نیه عروسینی نو کدخدا سالوب گوزدن

باجیم قرا گیونوب نیلی پیرهن یرینه

 

رقیّه عهد ایلیوبدی عمو سو ایستمسون

یولون دوشنده اونون پرچمی دوشن یرینه

 

ایله ملر حرم آهولری گئجه گوندوز

خرابه شام مبدّل اولوب ختن یرینه

 

بیبیمون آغلاسان احوالینه اگر باخسان

نحیف پیکرینون قمچی لر دگن یرینه

 

ادیب اودور اولا آزاد (حافظی) یا قول

نه قدر بُلسه اوزین قویمه بُلن یرینه

 

اوزی اوزین بگنن شاعری بگنمز خلق

سوزی سوز اولماسا قویمازلا سوز دین یرینه

 

مرحوم حافظی تبریزی

منبع مجموعه کانالهای مدح و مرثیه

موضوع: حضرت رقیه (س) زبانحال ,
زبان شعر و شاعر: نوحه ترکی , حافظی تبریزی

-------------------------------

حضرت رقیه (سلام الله) 

 

ای بابا تا چشم خونبار آغلادی من آغلادیم

آغلاموردوم آل اطهار آغلادی من آغلادیم

 

صبره امر ایتمیشدون ایتدیم صبر، سوزدن چخمادیم

منجنیق فرقتونده روحیمی چوخ سخمادیم

سیل غمده سرحد صبری دایاندیم یخمادیم

حالیمه تا اینکه کفّار آغلادی من آغلادیم

 

ایتمدیم شکوه سوار اولدوم شکسته محمله

زجر چکدیم هر نه بیر منزلدن اوزگه منزله

حالیمی عمّم گوروردی گلمدیم اصلاً دله

عاقبت سجّاد بیمار آغلادی من آغلادیم

 

کوفه ده گوردوم جداده باشیوی اعجازیله

ایلوری قرآن تلاوت شیوه ی ممتازیله

دینمدون هر نه دانیشدیردیم طریق نازیله

درده گَلدی اهل بازار آغلادی من آغلادیم

 

ناقه دن دوشدوم گیدنده شامه بین راهیده

ای بابا حیرتده ام نه صبر وار اللهیده

پابرهنه من سراسیمه، او یالقوز گاهیده

هی ایاقیمدن اُپوب خار آغلادی من آغلادیم

 

تا گَلوب عمّم اولونجا یار و غمخواریم منیم

صاق صولا حیران باخوردی چشم خونباریم منیم

ای بابا اولدی آنان زهرا پرستاریم منیم

آلدی آغوشه پرستار آغلادی من آغلادیم

 

قانلی باشون عمّه می مامور ایدوب سالدی یولا

گَلدی عمّم، عمّه مون احسان ایوی آباد اولا

یول یوزون قارداش بالاسی عمّه ویردوخ قول قولا

اتّصالاً اول دل افکار آغلادی من آغلادیم

 

تا گَلوب نوک جداده باشیوه قیلدیم نظر

ایستدیم درد دلیمدن شرح ایدم بیر مختصر

غم گلوگیر ایلدی مانع اولوب اشک بصر

اشکی آخدی، باخدی اشرار آغلادی من آغلادیم

 

ایلدون طیّ مراحل تا یتیشدوخ شامه بیز

گوردوخ امّا شامیده اندازه سیز هنگامه بیز

میهمان اولدوخ یزید شوم و خون آشامه بیز

صبحدن شامه بو قیزلار آغلادی من آغلادیم

 

بزمینه احضار ایدوب بیر گون یزید بی حیا

بیر طلا طشت ایچره باشون، الده بیر چوب جفا

شرحه یوخ حاجت آچوب قانلی گوزون گوردون بابا

بیر ایله ظلم ایتدی حضّار آغلادی من آغلادیم

 

مجلسینده گوز دولاندوردی او بی شرم و دنی

هر کیمی دیندیردی اوج ایتدی سپهره شیونی

یتدی نوبت ایستدی آخِر دانیشدیرسون منی

چوخ پوزولدوم اهل دربار آغلادی من آغلادیم

 

الغرض گوندردی قول باغلی بیزی ویرانیه

پرشکسته قوشلاری ویرانه بیر کاشانیه

ایلدوخ تبدیل ویرانه یرین غم خانیه

اوردا بو بیر عدّه ناچار آغلادی من آغلادیم

 

متّصل اهل تماشا یار تک اغیار تک

دوره می قیزلار آلوردی نقطه ی پرگار تک

یوز قویوبلار مسجد ویرانیه زوّار تک

حالیمی گوردوقجا زوّار آغلادی من آغلادیم

 

ایمدیکه لطف ایلدون گَلدون دوباره، گیتمه قال

بو شکسته دللرین ایله نوازش گوگلون آل

قانلی باشیله بلالی باشیم اوسته سایه سال

یاخشی دمده بخت بیدار آغلادی من آغلادیم

 

(حافظی) حقّونده احسانین ایدوب الله تمام

آنّیوی قوی سجدیه ایله تشکّر صبح و شام

یازدیران آزادیدی قولونجه قیل ختم کلام

ناظم ایتدی نظم اشعار آغلادی من آغلادیم

 

مرحوم حافظی

منبع مجموعه کانالهای مدح و مرثیه

موضوع: حضرت رقیه (س) زبانحال ,
زبان شعر و شاعر: نوحه ترکی , حافظی تبریزی

-------------------------------

حضرت علی النقی امام هادی (علیه السلام)

 

گرچه هر امام اوز زماننون ظالمی الندن جفا گوروب

حضرت علی النقی ولی اوزگه محنت اوزگه بلا گوروب

 

عمری قرخ ایکی ایل اولوب یازار مجلسی بیوک شرح حالی وار

منتهای مظلومیتیدی که آزجا سینله چوخ ملالی وار

چکدیقی غمین شرح ویر ماقا خامه نون دلین انفعالی وار

نه دیوم نه لر گلدی باشنه نه اسفلی بیر ماجرا گوروب

 

بی اجازه گاهی توکولدولر منزلینه دیواردن عدو

آدقویوبلا آلات حرب وار ایلروخ گیجه وقتی جستجو

گوردولر نماز اوسته دور او شه محض بیجهتدور او هایهو

بو جفانی بیر مسلمه گورون هانسی نا مسلمان روا گوروب

 

صاحب نمازین نمازینون پوزدولار نماز اهلی صورتین

کفر خواهش نفسینه گوره هتگ ایدوبله اسلام حرمتین

محضرینده ناگه امامی اول دشمن رسول و خدا گوروب

 

شرب خمر تکلیف ایدوب ازل حضرته او بیدین و بیحیا

ایلدی چوخ اصرار ابا ایدوب عاقبت او ناموس کبریا

سویلدی که معذور دوت منی حاش من ایدم فعل ناروا

ال گوتورمیوب کینه دن کنه چوخ جواب الا و الا گوروب

 

قلب عالمین قلبنه نجه ورودی ظلم الیله جفا اوخی

سینه لرده قبره گرگ گیده کشف اولونماسی خوش دگل چوخی

حضرته خلاصه یوزین دوتوب سویلدی نچه بیت شعر اوخی

مستیدی سر حالده اوزین چون او کفرمحض و دغا گوروب

 

چوخ منیم سرو کار شعریله یوخ منیم بو یوردی امام اونا

بینهایت اصرار ایدوب گنه شرم و عار ایتموب او بیحیا

چاره سیز نچه شعر عبرتی ایلیوب قرائت او مقتدا

یعنی نولدی حالی گچنلرین عالمی هامی بیوفا گوروب

 

اهل مجلسین قلبین آتش نطق و وعظ و شعریله داغلادی

نچه دفعه درج لب دررباروگوهرین آچدی باغلاردی

مکر اوزیله عصرین امامینی ناسزا سزای عطا گوروب

 

الغرض امامی چوخ عذریله پول ویردی نا کس سالوب یولا

عاقبت شهید ایتدی زهریله بو امامی معتز بیحیا

امر دفن و تشییع و غسلینی اوغلی واریدی ایتدی جابجا

نه قالوبدی بی غسل و بی کفن نه وجودی سانسیز یارا گوروب

 

آغلیان حسینه چوخ آغلاسون اوچ گجه گونوز قالدی بی کفن

ایسی قوملارین استی جان حسین بیر یارالی تشنه جگر الن

اهل کوفیه اولمادی دین بیر بیله جفا ایلوسوز نه دن

هانسی بیر رعیتالنده بو جور و ظلمی بیر پیشوا گوروب

 

اکتفاایدیدی او ظلمنه اهل کوفه ای کاش او سرورین

قتلگاهدن سالمییدیلر یولارین پریشان حرملرین

گورمییدی زینب او حالیله ساربان کسوب قارداش اللرین

هیچ باجی ایله کورمه سین که اوز قارداشین او کان وفا گوروب

 

(حافظی) اطبا او درده که چاره تاپیوپ ایلیه دوا

صدقیله توسل ایدن گوروب چاره ساز دور آل مصطفا

بالخصوص مشهور دور بو سوز کربلا ترابینده وار شفا

روحی نا خوش اولماز حقیقتا هر او کیمسه که کربلا گوروب

 

 مرحوم حافظی تبریزی

منبع مجموعه کانالهای مدح و مرثیه

موضوع: حضرت امام علی النقی (ع) احوالات ,
زبان شعر و شاعر: نوحه ترکی , حافظی تبریزی

-------------------------------

 زبانحال حضرت زینب (سلام الله) در اربعین

 

ایله شش گوشه مزارون یره زیبا دوشنوب

آنام اوغلی دیه سن عرش معلا دوشنوب

 

ایله قبرون بو بیابانه ویروب ذوق وصفا

روضه جنت اعلایه دونوب دشت بلا

شوریدی،جاذبه دی ،عشقیدی باشدان ایاقه

هانسی طراح ویروب طرح بو مأوا دوشنوب

 

یرده ترسیم اولونوب عالم بالا نقشی

گورمیوب دیده دنیا بو دل آرا نقشی

نجه که منعکس ایلر گچه دریا نقشی

فرش تک فرشه ایله گنبد مینا دوشنوب

 

لحظه لحظه یتشندن بورا فکریم دوزه لور

یا گلور تیر تخیل توخونور قلبی دلور

اوزینی گورمورم اما آنامون عطری گلور

دیه سن قرخا گلوب قبریوه زهرا دوشنوب

 

قورتولوب دامنی گلچینون الیندن دیه سن

سپیلوب گل بزه نوب صحن گلستان و چمن

حرم اهلی هره بیر قبره سالوب زلف سمن

 

آریوب آختاروب هر کس ئوزی ئوز خواسته سین

جان تک آغوشه چکوب گلبن پیراسته سین

ایده ترمیم حیاتیندن اولان کاسته سین

گله گلزاریده چون بلبل شیدا دوشنوب

 

تاپوب اوغلون آنا آغلور باجی اوز قارداشینا

ساری یوز شبنم گل تک بویانوب گوز یاشینا

قویموشام من یوزومی مرقدوین باش داشینا

جان شیرین تک ایاق سمتینه لیلا دوشنوب

 

نوجوان قبرینه مرسومیدی چکسونله قرا

لیلی آق زلفون ایدوب اکبرینه شال عزا

ورد ذکرین ایلیوب وا ولدا وا ولدا

اریوب جسمی نمادور یره گویا توکولوب

 

دیمورم دردیمی دردون چوخالار غصه لیسن

باجون ئولسون جریاناتی تماما بیلوسن

ولی بیر چاره منه فکر ایله بوندان صورا سن

نیلیوم غم بیله که قلبیمه حالا دوشنوب

 

بیره یوز دوندریم آیا نجه سنسیز وطنه

بولوسن پایه عشقیم که نه میزاندی سنه

گونده مین دفعه اولومدنده چتین ایشدی منه

که گورم بوشدی یرون سفره طاها دوشنوب

 

سویون اولسون یوزی قاره اولوب آتش سو سوزی

سودی سوز یوخ ولی بیر یاندیران اوت اولدی اوزی

قانه دونموشده کانه گنه ده واردی گوزی

اودی که نهر فرات اوستونه سقا دوشنوب

 

سو تدارک ایده ایستور که رقیه گلنه

اوتانوردوم دئیم اوندان ولی بیر شمه سنه

قئیده بیلمدی منلن او سه ساله وطنه

گوشه مسجد ویرانیه تنها دوشنوب

 

(حافظی) هر سوزه نسبت اوزونه مشتری وار

چون جواهردی کلامین دُری وار گوهری وار

اونی صراف تانور هانسیسینون قیمتی وار

یا که یوخ ارزشی ویترینیده بی جا دوشنوب

 

مرحوم حافظی تبریزی 

منبع مجموعه کانالهای مدح و مرثیه

موضوع: احوالات اربعین ,
زبان شعر و شاعر: نوحه ترکی , حافظی تبریزی

-------------------------------

آرزوی زیارت

 

عشقین خزانی یوخدی ولکن بهاری وار

هر یرده گلشنی گلی وار، لاله زاری وار

 

طوبی مثالی سایه سالوبدور نهال عشق

هر قدر محفلی، یری، دار و دیاری وار

 

هر یرده عشق خیمه ووروب محشر ایلیوب

شورآفرین کلامدی، شیرین شعاری وار

 

الفت دوتوب حسینیله آرتوب جلالتی

چون هم نشین لیقون اثر پایداری وار

 

یاره حسین سوزی گتیرور طپش قلبیده

معلوم اولور که دلده حسینون قراری وار

 

گوز مردمونده ده دیه سن زینب اگلشوب

صحن سرای دیده ده گوز آبشاری وار

 

آغلور حسینه، آغلاماقی آغلادور گوزی

گویا شکسته نی مثلی آه و زاری وار

 

هردم که جان حسین دیوری جانه اود سالور

جان کلمه سینده یاندوران اود تک شراری وار

 

ای کربلا غریبی نه عالمدی عالمون

دلداده وین نه اُلچیسی وار نه شماری وار

 

حیرتدیم که کیمدی سنه عاشق اولماسون

دیوانه سی، عقیل لیسی، خرد و کباری وار

 

یاللعجب مسیحیده دردین دیور سنه

کیمدی خدا یانندا بو شان و وقاری وار

 

قربان اولوم سنه بیزیده ایسته قبریوه

سلطانیدن غلام لرین انتظاری وار

 

قویمازلا یوخسا باغ بهشته قرالری

تسنیم آدینلی رنگی یووان جویباری وار

 

گلسون حبیبیانیله بیر وقفه حافظی

امّیدی وار، توکّل پروردگاری وار

 

مرحوم حافظی تبریزی

منبع مجموعه کانالهای مدح و مرثیه

موضوع: در آرزوی زیارت ,
زبان شعر و شاعر: نوحه ترکی , حافظی تبریزی

-------------------------------

زبانحال حضرت امام حسین (علیه السلام) 

در شهادت مادرشان به بلال 

 

آنا فراقی اولارموش بلا بلال بلال

همان بلایه منم مبتلا بلال بلال

 

بو نکته نی هامی یاخشی بُلر اولوب معروف

بالانی سایه ی مادردور ایلین مشعوف

آتا آنا یری ویرمز نه قدری اولسا رئوف

آتا محالیدور اولسون آنا بلال بلال

 

چراغدور آنا، گیدسه ایوین چراغی گیدر

صفاسی قالماز آناسیز ایوین، صفاسی گیدر

آنائیله بالانون دردینون دواسی گیدر

آنا ایدر هامی درده دوا بلال بلال

 

جهان جهانی اولالی هر نه وار اناث و ذکور

یتیم آناسیزا مردم دیر اولوب مشهور

ولی آناسی اُلندور یتیم دل رنجور

عیان اولوب منه بو ماجرا بلال بلال

 

عبث دگل یوزه غربال چشمیم اشکیم اَلر

دیمه دوباره بو سینمیش گوگل گینه دوزَلر

سسی قولاقیمه فکر عالمینده گاه گَلر

شکسته نی کیمی قیلّام نوا بلال بلال

 

یووار آنا بالانین زلفینی، وورار شانه

آلار قوجاقینه گویا صدفدی دَر دانه

قالار آناسیز اوشاق من کیمی یانا یانه

گوزینده تنگ اولی ارض و سما بلال بلال

 

مثال روحیدی اطفال اوچون آنا نفسی

باشارسا روحی آچار پر اوچار گَلنده سسی

او مادری اُلنه وای ایده آنا هوسی

قالار نه حاله بُلر بیر خدا بلال بلال

 

شهید اولماقینون علّتی اولان دشمن

ایکی جهاندا مصیبتدن اولماسون ایمن

نه وقتیمیدی مصیبت زده اولِیدیم من

یوزوم اولا مثل کهربا بلال بلال

 

گوزین تیکردی گوزومه آنام صاق اولسِیدی

قولاق ویرردی سوزومه آنام صاق اولسِیدی

یوزین قویاردی یوزومه آنام صاق اولسِیدی

آلاردی گوگلومی صبح و مسا بلال بلال

 

ایکی باجی ایکی قارداش بلال شام و سحر

آنا دیوب توکروخ عارضه سرشک بصر

باخوب نماز یرین بوش گوروب ایدنده نظر

یاخون اولار اولا محشر به پا بلال بلال

 

آنا فراقینون آیا دیوم هاراسیندان

بیان ایدوم نجه دیوار و در آراسیندان

نه نوع شرح ویروم سینه سی یاراسیندان

اورک او یاره دن اولموش یارا بلال بلال

 

او یاره سی منی دلدن جریحه دار ایلیوب

گئجم کیمی گونومی تیره روزگار ایلیوب

خیال ایت گور آتامدا نه قدر کار ایلیوب

قالور نه حاله او میر هدی بلال بلال

 

بو رسمیدور قاپودا ساخلاسا بیری نوکر

خانم، آقا اونا گه گاه بیر ایده لّه نظر

بو شعره حافظ قرآندا بیر صله ایستر

آنا فراقی اولارموش بلا بلال بلال

 

مرحوم حافظی تبریزی

منبع مجموعه کانالهای مدح و مرثیه

موضوع: حضرت فاطمه زهرا (س) زبانحال ,
زبان شعر و شاعر: نوحه ترکی , حافظی تبریزی

-------------------------------

 احوالات ورود به مدینه  

 

سس دوشدی اُلوب قافله سالار مدینه

زینب گَلوری، باغلادی بازار مدینه

 

بُلدی پوزولوب خلق که پرگاری حسینون

شهر اهلی تمام اولدی عزاداری حسینون

 

شهرین در و دیوارینی کلثوم گورنده

قلبی دویونوب، قالمادی یاراسی بدنده

 

گویا دوتوب اوز سسلدی محملدن اَنَنده

گَل بیزلری سن بیرده قبول ایلمه یثرب

 

اوز اهلیوی عمرونجه ملول ایلمه یثرب

سن بیزلری عزّتلی موقّر یولا سالدون

 

اعزازیله منصور و مظفّر یولا سالدون

هاردا بیله محزون و مکدّر یولا سالدون

 

ایمدی دولانوب عزّتیمز ذلّت اولوبدور

عیش و فرح و عشرتیمیز محنت اولوبدور

 

سندن که گیدردی بو جلالی داغیلانلار

همراهیدی چوخ شیر صفت پیر و جوانلار

 

روبه لره صید اولدولار اول شیرِ ژیانلار

تک تک بویانوب قانینه، تک گَلمیشوخ ایمدی

 

قاره گون اولوب قاره لچک گَلمیشوخ ایمدی

اجماعیله شهر اهلی که پیشوازه گَلردی

 

اولماق لیقا واقف هامی بو زاره گَلردی

بو غملی دله بیر مُحنِ‌تازه گَلردی

 

هر کس که اولوب حالی یول اوستونده دوراردی

گوز یاشی توکوب باشینا توپراق سُووراردی

 

شوریله او حالتده که آغلاردی جماعت

ناگه نه گوروبلر که گَلور بیر نچه عورت

 

بیر بیرلرینه خلق ایلدی فوراً اشارت

سس ایلمیون عمّه لری گَلدی حسینون

 

بُلمولّه هله بد خبری گَلدی حسینون

کشف ایلیه بُلموردوله واضح جریانی

 

ایوای دیوب آغلاردی بُلن سرّ نهانی

هاردِیدی او دل که اولا یارای بیانی

 

یوز قویدی هامی زینب اولان محمله گَلدی

زهرا قیزی کشف ایتماقا سرّی دله گَلدی

 

ای اهل مدینه ایدون ایولرده اقامت

هیچ بُلمیون آلُ الَّلهه اولدی نه قیامت

 

پیغمبریزون اوغلینی بیر آدلادی امّت

مهمان لیق آدیله چاغیروب کرب و بلایه

 

یالقوزلادیلار، گَتدیله پیغمبری داده

لیلانون اَلی شبه پیمبردن اوزولدی

 

باش پارچالانوب، چشمه کیمی قانی سوزولدی

قان قطره سی مرجان کیمی رخساره دوزولدی

 

ایمدی گَتیروب اکبرین عمّامه سین اَلده

اکبر یرینه قانه باتان جامه سین اَلده

 

بی جا دیمیون چوخ پوزولوب قاسم آناسی

نسگلدن اورکده وار اونون کاری یاراسی

 

داماد اَلینون طوی گونی قان اولدی حناسی

آرام دلی غارت اولوب صبری آلندی

 

بی چاره عروسین باشنا قاره سالندی

کیم بُلدی نلر اولدی ابوالفضلیم اُلنده

 

نه سالمیدی باشی، نه قولّاری بدنده

سیزده یوخ ایشیتماقه دوزوم شرحینه منده

 

بیر محشریدی آند اولا آللهه او ساعت

بلکه او قیامت بو قیامتدن علامت

 

غنچه کیمی باغری دولی قان اولدی ربابین

اوچ شعبه اوخا اوغلی نشان اولدی ربابین

 

غمدن بوکولوب قدّی کمان اولدی ربابین

بو سهلیدی گیتدی سود امر اصغر اَلیندن

 

بیرده گیدوب اوچ سنّیده بیر دختر اَلیندن

باش اولدی او قیز اُلماقی اصغر اُلیموندن

 

اشکین او اُلن گونده توکوب، آغلادی دشمن

یاندیردی بیزی ایلدی ویرانه نی مسکن

 

اوزدی اَلیمیزدن اَلینی شامیده قالدی

آغلاتدی بیزی، یثربه آغلار یولا سالدی

 

سرگرمیدی بیر بیر دیماقا دردینی باشدان

سونمَزدی مصیبت شرری گوزده کی یاشدان

 

آغلوردی دیدوقجا گه اوجا گاهی یاواشدان

بیر اوزگه طرفده نه گوروب ناله اوجالدی

 

بو ناله سسی تازه دن آرامینی آلدی

حسرتله باخاندا نه گوروب، گورمیه گوزلر

 

عبّاس آناسی فاطمه دور، گوردوقی مضطر

دوتموش بیر اوشاقین اَلینی سسلوری پِیدر

 

گورمور گوزوم ای اهل مدینه سیزی تاری

بیرجه یِتیرون زینبه بو زار و فگاری

 

زینب ایشیدوب بو سوزی توکدی یوزه قان یاش

سسلندی گَل ای غملری غملردن اولان باش

 

قربان گوزیوین یاشنا زینب اولا ای کاش

گل گُل لریمیز سولدی خزان اولدی آنا گل

 

دائم ایشیمیز آه و فغان اولدی آنا گل

بو سوزده خانم فاطمه نون صبری آزالدی

 

قولّارین آچوب زینبینون بوینونا سالدی

ایوای دیدی اوّلده حسیندن خبر آلدی

 

فرمایش ایدوب سویله حسینیم هانی زینب

آرام دلیم نور دو عینیم هانی زینب

 

زینب ایشیدوب اسم حسین آتدی ملالی

بیر چشمه کیمی آخدی یوزه اشک زلالی

 

بو فکره دوشوب ترک ایلدی اوزگه خیالی

یوخ منده ملامت یری روحیم قوشی اوچسا

 

الله نه دیوم قارداشیم عبّاسی سوروشسا

قربانی آنا عرض ایدوب آغلار گوزیوین من

 

عمرونجه سزادور ایده سن ناله و شیون

باشون ساق اولا اوغلون حسینین طرفیندن

 

شام اهلی آنا بی سبب اُلدوردی حسینی

یورقون یارالی تشنه لب اُلدوردی حسینی

 

بو سوزده اوجالدوب فلکه ناله و دادین

برعکس ایلیوب گوردی قضا عین مرادین

 

اوغلانلارینون هیچ بیرینون دوتمادی آدین

بُلدی ادبیندن بو سوزی صحبته سالسا

 

زینب پوزولار بیر به بیر اوغلون خبر آلسا

بیرده بویودی علّت بانوی مودّب

 

هیچ بیر دیمه دی نه گَلوب عبّاسیمه زینب

پوشیده دَگولدی اوزینه دلده بو مطلب

 

عبّاس ساق اولسِیدی بُلوردی هنریندن

بیر موده کم اولمازدی حسین زلف سریندن

 

حاشا دله بو سوز گَله بانوی حجیزم

یا فخر ایلیم هر ایکی دنیاده عزیزم

 

دورت اوغلوم حسینین قولودور منده کنیزم

ویرمیشدیم اودور اوغلیمی اول سروره قربان

 

هم قاسمه هم اکبره هم اصغره قربان

امّا دیدی ای نائبه ی حضرت زهرا

 

قربان دلیوه لطف ایله سن وار بو تقاضا

بو خلقه بویور تا نفسیم وار منیم اصلا

 

گوگلومده نهال غم آلوب بسلمسونلر

مِن بَعد اوغولّار آناسی سسلمسونلر

 

هر کیم که منی سسلوری تک سسلیه خوشدور

یا فاطمه یالقوز یا اوغولسوز دیه خوشدور

 

قوی فاش ایلیوم بو سوزی بو سوز نیه خوشدور

زهرا کنیزیدیم، اوغولّار آناسیدیم

 

دورت اوغلوم اولان گونلر اوغولّار آناسیدیم

بو سوزده شعاعیله ایدوب حافظی شرکت

 

ختمینده ولی ایتدیلر باهم بیله صحبت

خوشدور ایلیاق بو سوزی یثربده قرائت

 

بو سویلدی یارب به حق حضرت یاسین

قسمت ایله بیر جمعیله او سویلدی آمین

 

مرحومین شعاعی و حافظی تبریزی

منبع مجموعه مدح و مرثیه

موضوع: احوالات ورود به مدینه ,
زبان شعر و شاعر: نوحه ترکی , حافظی تبریزی , شعاعی

-------------------------------

 احوالات ورود به مدینه 

 

 بیر گونکه امّ سلمه اولوب تنگ حوصله

سس دوشدی یثربه قییدوب غملی قافله

 

پیغمبر خدا حرمیدی او باوفا

تشریف گوئیا آپاروب درب منزله

 

گوردی بشیری گورمیه گوزلر نجه بشیر

گرد غم اگلشوب هامی شکل و شمایله

 

جاریدی قان آتین قولاقیندان اوزی ملول

آغلور دانیشدورولّا ولی گَلموری دله

 

قاره گیوب سالوبدی آتین بوینونا قرا

بیر پرچم عزا که قرادور آلوب اله

 

چرپندی قلبی حالی پوزولدی او حالیده

حیرتده دور دیور گوره سن وار نه مسئله

 

ایستور حسینیمون خبر مرگینی ویره

بیر اوزگه حادثه یتیشوب یوخسا حاصله

 

ویرسه خبر حسین اُلوموندن بشیر اگر

ناخوشدی اکبرین باجیسی قورخورام اُله

 

اکبردن اوتری تیتروری قلبی گئجه گونوز

گاهی شکایت ایلوری گاهی ایدور گله

 

جاروب زلفیله اطاقین اکبرین سیلور

گرد و غبارینی یووور اشک زلالیله

 

شیرین یوخی گوزینه بو مدّتده گَلمیوب

هجران غمی گئجه گونوزون دوندروب ئیله

 

وعده ویروب عراقه آپارسون بو مضطری

یارب دیور نه وقت اولاجاق اکبریم گَله

 

عبّاس آناسی نیلیه جاق بُلسه مطلبی

اونلان نه نوع چرخ ایده جاقدور معامله

 

دورت اوغلینون گوزتلوری امّ البنین یولون

نیلر او عمری قاره خبر ویرمیه هله

 

ایوای منه بو غم خبری اُلدورور اونی

ای کاش اوجالمیه بو هیاهو و غلغله

 

وار بالخصوص علاقه سی آرتوخ حسینینه

دائم سراغ ایدر که سلامت لیقین بُله

 

سویلر دوشنده سوز که حسیندور امیدیمیز

کشتی عمری دوشمیه ای کاش اونون گِله

 

بو فکریدِیدی گوردی گَلور سس آنا سلام

سس آشنا گَلوبدی گیدوبدی تامّله

 

ناگه تانیدی زینبی سسلندی جان قیزیم

من اُلمدیم نیه سنی گوردوم بو حالیله

 

قولّارین آچدی جان کیمی بیر باسدی باغرینا

شیون اوجالدی حشره کیمی قوپدی غائله

 

بیر بیر سوروشدی باشلارینون ماجراسینی

ویرموردی اشک ریزشی هرچند فاصله

 

زهرا عزیزی دردینی بیر بیر بیان ایدور

اوّل سوزی بو اولدی او بانوی کامله

 

بیر گونده چوخ دونرمیش آنا دور روزگار

مشکل آچانلارین ایشینی سالدی مشکله

 

مهمان آدیله کوفه لیلر دعوت ایتدیلر

دوندی قوناقلیق اولدی جدال و مقاتله

 

اوّل سویون کَسوبله یولون اوچ گئجه گونوز

آل علی و آل پیمبر بُله بُله

 

اوچ گون اوشاق بویوک هامی قالموشدی تشنه لب

باخ گور نولور سو اوچ گون اگر ویرمه سن گُله

 

گُل غنچه سی کیمی سارالوب سولدی چوخ بالا

اوج ایتد عرشه ناله و فریاد و هلهله

 

منجر اولوبدی جنگه ایشین آخِری آنا

نه جنگ من نه عرض ایلیوم نه مقابله

 

نه شرح ماجرایه سن ایسته نه من دیوم

کشف اولماسون نه ظلم ایلیوب شمر و حرمله

 

قانه بویاندی پیر و جوان یاد و آشنا

ظلمون یتوردی کوفه نون اهلی تکامله

 

لشکر داغلدی، خیمه تالاندی، وورولدی اود

زرتار خیمه یاندی مبدّل اولوب کوله

 

گُل تک وورولدی نیزیه باشلار بویوک کیچیک

تقسیم اولوندی باشلار امیر قبایله

 

یل قانلی زلفینه توخوناندا جوانلارین

تبدیل ایدردی دللری ریحان و سنبله

 

اولدوخ فرنگ اسیری کیمی دشمنه اسیر

قولدا طناب ظلم، بویونلاردا سلسله

 

بیر تازه داغ داغلی دل اوسته چَکیردیلر

غم کاروانی که یتیشوب هر منازله

 

شام اهلینون الیندن امان ای آنا اولار

پیشوازه کوی و برزنه چخدی گوله گُله

 

حاضر اذیّته اولار اولدی که اولمادی

حاضر آتا بالالاری ایتسون مباهله

 

زلفوم حکایت ایلوری باخسان ملالیمی

بسدور اشاره یاخشی دیوبلر که عاقله

 

اوغلانلی قیزلی نچّه بالا کم گَتورمیشم

یولدا شهید اولوبلا بدون مجادله

 

بسدور نه فاش ایده بُلوسون نه نهان سوزی

اوخ تک یاخوندی سوز توخونوب قلبیوی دَله

 

ای حافظی او صادقه ویر هی دعای خیر

چون یاخشی فرق قائل اولور حقّ و باطله 

 

حافظی تبریزی

منبع مجموعه مدح و مرثیه

موضوع: احوالات ورود به مدینه ,
زبان شعر و شاعر: نوحه ترکی , حافظی تبریزی