متن نوحه ترکی کریمی مراغه ای
مجموعه متن نوحه ترکی از اشعار استاد کریمی مراغه ای در مدح اهلبیت عصمت و طهارت علیهم السلام
-- -- --
زبانحال حضرت ابوالفضل (ع)
عبّاسه بو دشتِ کربلانی صحرای قیامت ائتدون ای اوخ
ووردون اوزووی بو قانلی مشکه ، عبّاسی خجالت ائتدون ای اوخ
گر گلماقیوی ازل بولیدیم ، سینمده سنه مکان وئرردیم
یا قلبی سنه هدف ائدردیم ، یا صاق گوزوم نشان وئرردیم
بولسیدیم اگر بئله سوسوزسان ، حتما" سو یئرینه قان وئرردیم
آیا نیه دگمدون گوزومدن مشکیمدن اصابت ائتدون ای اوخ؟
آخر نیه دگمدون اورکدن تا خانهء دل مجلّل اولسون
تا مکتبِ عشق و معرفتده عبّاسیده شخصِ اوّل اولسون
دوندردی بهاریمی خزانه بو اوخ آتانین الی شل اولسون
آلدون عجب اختیار الیمدن ، آرامیمی غارت ائتدون ای اوخ
من نهرِ فراتیدن بو مشکی دولدورموشودوم بو نیّتیله
سیراب ائدم آلِ مصطفانی توفیق تاپام بو خدمتیله
حاشا داخی من گئدم خیامه اصغر یانینا بو خجلتیله
بیر دسته سوسوز سولوب سارالمیش اطفاله خیانت ائتدون ای اوخ
بیر مشک سویون منیم یانیمدا آرتیخدی بو گون بهاسی جاندان
سست اولدی بدن داخی امیدیم یأس اولدی سو مشکیم اوخلاناندان
ایمدی داخی ئولماقا رضایم دویدوم بو حیاتیدن جهاندان
گئتدی یئره مایهء حیاتیم تولیدِ خسارت ائتدون ای اوخ
یوز مین یارا دگسه دلخوشام گر اوخدان پَر آچام بسانِ شهباز
گر سینسا عمودیلن بو باشیم اولّام شهدا ایچینده ممتاز
دعوا گونی جنگ جبهه سینده قرباندی شهه وفالی سرباز
افسوس قصورِ خدمت اولدی ایجادِ ندامت ائتدون ای اوخ
هر دعویّ عشق ائدن جهاندا اثباتِ وفاده محکم اولماز
جسمیمده هامی یارام ساغالسا امّا بو یارایه مرهم اولماز
مین یاره دگه ، آقام حسینه بیر ذرّه ارادتیم آزالماز
ظاهرده بو مشکه دگدون امّا قلبیمی جراحت ائتدون ای اوخ
تا سو واریدی قاچاردی دشمن ، قورخاردی قوشون صلابتیمدن
سو گئتدی امید یأسه دوندی ، اوزدون الیمی شجاعتیمدن
ایمدی داخی راضیَم وجودیم دوغرانسین ئولوم خجالتیمدن
قورتولدون او دم که سن کماندان اعلانِ شهادت ائتدون ای اوخ
بیر مشک سو اوسته من بو چولده گئچمیشدیم ایکی اوزون قولومدان
یاغدیردیلار اوستومه هوادن اوخ لشکرِ کینه صاق صولومدان
اخیامه او حالیله گئدردیم ائتدون منی منصرف یولومدان
کسدون منه راهِ آرزونی آمالیمی غارت ائتدون ای اوخ
عطشاندی رقیّه خیمه لرده ، ایمدی چکوری سو انتظاری
بیر عدّه الینده بوش سو جامی ، گوزلر منی دلده آه و زاری
ایمدی نه ئوزیله من خجالت بیرده قیدوم خیامه ساری
بولدوردون عداوتون جهانه اظهارِ شقاوت ائتدون ای اوخ
دریای فراتیدن بو چولده بیر مشک سووا قناعت ائتدیم
لب تشنه سودان کناره چیخدیم ، لب تشنه لره حمایت ایتدیم
قلبیمده دئدیم زهی سعادت ، اطفالِ حسینی راحت ائتدیم
اصغرله رقیّه باره سینده افکاریمی راحت ائتدون ای اوخ
قلبیمده کی ریشهء وفانی مین تیشهء ظلم دگسه قازماز
قرباندی حسینه باش و جانیم عبّاس رهِ وفادن آزماز
هئچ بیر قلم اوخ کیمی اورکده معنای وفای عشقی یازماز
دلده بوشودی یرون ندن بس مشکیمده اقامت ائتدون ای اوخ
گورسه منِ زاری خیمه لرده بو حالیله آل عصمت آغلار
ایوای عمو وای دیوب رقیّه ، برپا ایلیوب قیامت آغلار
بو محنته روز و شب (کریمی) جاری ائدر اشکِ حسرت آغلار
بیر عمر اونون یارالی قلیبین آماجِ مصیبت ائتدون ای اوخ.
حاج میرزا حسین کریمی مراغه ای ،
فرزندِ مرحوم کربلایی محمد علی کریمی مراغه ای (ذاکر مراغه ای)
منبع مجموعه کانالهای مدح و مرثیه
موضوع: حضرت ابوالفضل العباس (ع) زبانحال ,
زبان شعر و شاعر: نوحه ترکی , کریمی مراغه ای
-------------------------------
در شهادت حضرت امام حسن عسکری (علیه السلام)
ترک ایدوب مظلوم آتان دنیانی یا صاحب زمان
قورتولوب زندان غمدن جانی یا صاحب زمان
معتمد ظالم سنی بیر عمر مهموم ایلدی
جدّیوین حقّین الیندن آلدی مظلوم ایلدی
عاقبت ویردی او شاهه زهر مسموم ایلدی
اوج ایدوبدور گوگلره افغانی یا صاحب زمان
ایستدی ایتسون اوزیندن رفع تهمت مکریله
دوتدی استشهاد کذبی مطلبی گلدی اله
یعنی بو سیّد اوزی ناخوشدی ممکندی اُله
ایتدی مدرک بیر نچه امضانی یا صاحب زمان
جمع ایدوب اعیان شهری مکریله اوز باشینه
جدّیوی گلدی عیادت ایتماقا اوز باشینه
آچدی باشین ظاهراً رخصت ویروب گوزیاشینه
کیم گوروب بو حیله ی شیوانی یا صاحب زمان
گوزلرین آچدی امام عسکری زار و حزین
صاق صولا باخدی گوروب اوز باشی اوسته قاتلین
چکدی بیر آه آغلادی کشف ایتمدی درد دلین
دولدوروبدور دیده ی گریانی یا صاحب زمان
یادیمه دوشدی بو یرده بیر موثّر غائله
بیر امامینده گوزی دوشدی اُلنده قاتله
اود دوتوب یانّام اُلونجه آغلارام بو نسگله
یاده سالدوقجا شه عطشانی یا صاحب زمان
شمر ظالم دلده کینه، الده تیغ پرشرار
صدر مکسور حسینه چخدی ایتموب ننگ و عار
سنگدل دشمن، آغور چکمه، سوسوز هم زخمدار
لرزه دوتدی عالم امکانی یا صاحب زمان
شه گوروب سینه آغورلاشدی دوشوب تنگه نفس
مرغ دل دوشدی فشاره آز قالور سینسون قفس
گوزلرین آچدی دیدی خوش گلمیسن ای بوالهوس
عشقه باخ گور عاشق شیدانی یا صاحب زمان
یاخشی گلدون گل بو غمدن راحت ایله جانیمی
باشیمی تیز کس یتور تکمیله بو نقصانیمی
شکرُ لِلَّه زنده ایتدیم قانیله قرآنیمی
بیر او قاندور ساخلین قرآنی یا صاحب زمان
باغریمیز قان اولدی بو محنتده یابن العسکری
شیعه نین شاها نه قدری عجّل اولسون ازبری
اهل حق قالموش شماتتده اولوب باطل جری
دولدوروب جور و جفا دنیانی یا صاحب زمان
استاد کریمی مراغه ای
منبع مجموعه کانالهای مدح و مرثیه
موضوع: حضرت امام حسن عسگری (ع) احوالات ,
زبان شعر و شاعر: نوحه ترکی , کریمی مراغه ای
-------------------------------
در احوالات حضرت موسی ابن جعفر (علیه السلام)
تا جهان وار بو جهان آغلار امام کاظمه
هم زمین و آسمان آغلار امام کاظمه
قالدی زندان ابدده عمری تاپدی خاتمه
ئولدی غربتده بو دنیانی باتوردی ماتمه
ایندی ده آغلار او احواله آناسی فاطمه
نوحه خواندی قدسیان آغلار امام کاظمه
هاردا گورسم بیر قوجا سید دوشوب تاب تبه
یا اولوب مغلوب، بیر مظلوم بیر لامذهبه
سندیله موسی ابن جعفر دوندرور صبحیم شبه
آغلارام افلاکیان آغلار امام کاظمه
باخمادی سند ابن شاهک دیده ی خونبارینه
آغ محاسنده دوزولموش لولو شهوارینه
ووردی بیر سیلی او مولانین سولان رخسارینه
ایندی ده پیر و جوان آغلار امام کاظمه
ای کریمی هاردا گوردون بیر غریبی داده گل
یاد ایله موسی ابن جعفره حالینی فریاده گل
هر زمان دعوت یازیلدی آدووا بغداده گل
سنده کی طبع روان آغلار امام کاظمه
کریمی مراغه ای
منبع مجموعه کانالهای مدح و مرثیه
موضوع: حضرت امام موسی کاظم (ع) احوالات ,
زبان شعر و شاعر: نوحه ترکی , کریمی مراغه ای
-------------------------------
حضرت ام البنین (سلام الله)
اگر بیری گئچه ام البنین مزاریندن
یقین دؤزنمز او خاتونین آه و زاریندن
یاتوب بقیعده اما یوزی عراقه طرف
گوزونده قانه دونوب اشکی انتظاریندن
دئیور الهی ابوالفضلیمون باشیندا نه وار
نه نامه وار نه گلن ،کربلا دیاریندن
وفالی قارداشینون قبرینه مجاور اولوب
وزیر ،آیرولا هیهات شه جواریندن
دیولّه قولارینی اشقیا سو اوسته سالوب
ووروبلا اوخ بالامون چشم اشکباریدن
یانیندا اولمامیشام خشکه بند ائدم یاراسین
چکیدیم اوخلاری من جسم زخمداریندن
دمیر عمودین آچیق باشیله نه نسبتی وار
اولیدی نوفلی بی بهره روزگاریندن
کسیلسه شیرین اگر پنجه سی نه حاله قالار
توکولسه اوستونه روباه لر کناریندن
الی سلامت اولیدی اگر جوان بالامون
قاچاردی کوفه لیلر تیغ پر شراریندن
اولوبدی جعفر طیّاریله بالام یولداش
بهشتیده طیران ایلر افتخاریندن
اوجاتدی باشیمی سینمیش باشی قیامتده
تشکریم وار اونون لطف بیشماریندن
گلنده محشره زهرا یانیندا فخر ائدرم
حسینه ائتدیگی ایثار و انتصاریندن
منیم کی بیرده یولوم نهر علقمه دوشمز
وئرم بو قلبه تسلّی اوغول مزاریندن
سفارشیم بودی زوّارینه لِوَجه الله
اگر گذاری لری دوشسه غم دیاریندن
اوپون منیم عوضیمدن گوزل ضریحیندن
چگوز گوزوزه او قبرین گوزل قباریندن
صدا صدایه وئرون اوخشیون رواقنده
سبیل اشک ائلیون چشم جویباریندن
کریمیا یخیلاندا رکابدن سقا
ندندی چخمادی افلاک ئوز مداریندن
استاد کریمی مراغه ای
منبع مجموعه کانالهای مدح و مرثیه
موضوع: حضرت ام البنین (س) احوالات ,
زبان شعر و شاعر: نوحه ترکی , کریمی مراغه ای
-------------------------------
در احوالات حضرت ابوالفضل (ع)
شاهین هوایه اوج ایلینمز ، پَر اولماسا
عنقا ننوعی قافه چیخار ، شهپر اولماسا
اَلدور حوادثاتی بدندن دفاع ایدن
فکر ائت بدن نه حاله دوشر اللّر اولماسا
دعواده لشگرین گوزی سرلشگر آختارور
سرلشگرین علاجی ندور لشگر اولماسا
من بو منای عشقیده دینون فداسیَم
آزاده امتحان ویررم یاور اولماسا
من کاروانِ عشقه بو صحراده رهبرم
چاتماز مراده قافله ، گر رهبر اولماسا
الدن آلوبلا خنجریمی ، قولّاریم دوشوب
کیم سو ویرر بو حنجریمه خنجر اولماسا
من تشنهء وصالِ حسینم ، سو نیلورم؟
آبِ فراتی ایستمرم کوثر اولماسا
محشرده باشه تاجِ شفاعت قویانمارام
نوکِ جدایه قانلی باشیم زیور اولماسا
دولدورسا یر یوزین سو ، سوسوز ئولّم ، ایچمرم
سیراب اگر رقیّمله اصغر اولماسا
سقّایم اهلِ بیته سویوم یوخدی نیلیوم
سقّایه عیبدور بو ، سو مشگی تر اولماسا
دولدورام ایمدی قانیله مشگی عِجالتا"
گوز کاسه سینده سو ویره رم ساغر اولماسا
یالقوز وفالی قارداشیمون انتظاریَم
جان ویرمرم یانیمدا همان سَرور اولماسا
جان اوسته خیمه گاهه سورنّم یواش یواش
دور و بریمده بو سپهِ کافر اولماسا
پای حسینه ساخلامیشام بیر یارالی باش
سردار شاهه بس نه باغیشلار سر اولماسا
قان لجّه سینده کشتیَم ، اوخلاندی لنگریم
کشتی دوشر تلاطمه گر لنگر اولماسا
پورِ معاویه نقدر اشتباه ایدوب
یوخ دینه حامی فکر ایلدی حیدر اولماسا
بیلموردی وار بو دینه ابوالفضل تک فدا
دویماز جهاددن نقدر مضطر اولماسا
افسوس آنام یانیمدا دگل جان ویرن زمان
کیملر عزا دوتار اوغولا مادر اولماسا
سسلندی ناگه عالَمِ معناده فاطمه
عبّاس چکمه غم سنه گر یاور اولماسا
گر چه آنان یانوندا دگل ، من سنون آنان
زلفیمله باغلارام گوزیوی معجر اولماسا
گَل سینمه یارالاریوی خشگه بند ایدوم
آغرور یارالینون یاراسی بستر اولماسا
سن جدّیمون شریعتینی زنده ایلدون
قرآن ئولر شریعتِ پیغمبر اولماسا
محشرده مدرکیم ندی امرِ شفاعته
آیا الیمده بو کسیلن اللّر اولماسا
بسدور شفاعته منه بیر جوت قولون سنون
دستارِ لاله گونِ علی اکبر اولماسا
محشرده یوخدی دردیوه چاره (کریمیا)
شرمنده سن الونده کی بو دفتر اولماسا.
کریمی مراغه ای
منبع مجموعه کانالهای مدح و مرثیه
موضوع: حضرت ابوالفضل العباس (ع) احوالات ,
زبان شعر و شاعر: نوحه ترکی , کریمی مراغه ای
-------------------------------
کوچ از خرابه شام
یاتما رقیه شامیده یثربه کاروان گئدر
دوریولا سال باجون گئدر عمه گئدر آنون گئدر
یوخلاما نازنین باجی,دور گئدیروخ مدینیه
قویما یوزوی تپراقا دور گتی قوی بو سینیه
اهل وطن سوروشسالا بس نه گلوب رقییه
نیلرم اوندا قلبیمه غصه گلر توان گئدر
یاده سالاندا نیسگلون سینمی داغلارام باجی
سیل بهارتک یوزه اشکمی باغلارام باجی
آج قوری یئرده ئولماقون یاد ائدوب اغلارام باجی
بیرده یارالی سینه دن داغ غمون هاچان گئدر
بیر ایلی فرصت اولمادی ائتماقا شانه زلفووی
دوتدی قبار غم گورن گلدی فغانه زلفووی
دور یووارام گلابله ائتمه بهانه زلفووی
عمه لریم سن اولماسان گئتسه ده ناگران گئدر
گرچه اورکده محنتون چوخدو باشون بلالیسان
قلبووی تیر غم بؤلوب غصه لی سن یارالیسان
شامیده مسکن ایلمه سن باجی کربلالیسان
باور ائله سن اولماسان قافله میز گران گئدر
دور داخی یوخدی ساربان باغلیا راه چاره وی
شاد ائدرم رقیه من بو دل پاره پاره وی
وئردیله غارته گئدن خیرداجا گوشواره وی
آل باجی سال قولاقووه گون دولانار زمان گئدر
اولدی خرابه گوشه سی حسرتیله وطن سنه
کول باشیما تاپولمادی شامیده بیر کفن سنه
اولدی کفن بو شهریده کهنه او پیرهن سنه
قبریوه ایندی هر باخان آغلار ائدر فغان گئدر
کریمی مراغه ای
موضوع: احوالات کوچ از خرابه شام ,
زبان شعر و شاعر: نوحه ترکی , کریمی مراغه ای
-------------------------------
احوالات حضرت رقیه (سلام الله)
آدون اگرچه مصیبتدی غمفزادی رقیه
گوزل مقام وضریحون نه باصفادی رقیه
وفالی عمه وین عطری گلورگوزل حرموندن
یوزون قویوب یوزیوه سنله همصدادی رقیه
خانم خرابه نی دوندر میسن بهشت برینه
بهشت غبطه ائده قبر یوه سزادی رقیه
قاپوندی باب الحوائج آدوندی فیض ونتایج
طنابه باغلانان اللر گره گشادی رقیه
خانم ایاقلار یوین توختویوبدی زخم قباری
ویاگنه دولانا بولموسن یارادی رقیه
اوقدری گوزیاشی توکدون خرابه ده گئجه گوندوز
نه گوزیاشی دییه سن درّ شبنمادی رقیه
همان گئجه باباوین باشینی خرابه ده گوردون
دئدون بابا یارالی باشوه فدادی رقیه
منی بو خیر داجا سنیمده کیم یتیم ائلیوبدی
ترحم ایلمدی درده مبتلادی رقیه
بوغازیوین شل اولیدی داما رلارین کسن اللر
فدای رأس ذبیحا من القفادی رقیه
بابا گوزوندن ایراق شمر سیلی ووردی یوزومدن
ترحم ایلمدی زار وبی نوادی رقیه
باباخرابه ده هئچ کس منیم هرایمه گلمز
بوگوشه ده غم واندوهه آشنادی رقیه
نه اکبریم گلوری نه عموم نه قاسم عم اوغلوم
دچار مهلکهٔ درد بی دوادی رقیه
اوگونلریم ها راگئتدی هامی آلاردی قوجاقه
خرابه دی هامی ئل طا یفادان جدادی رقیه
باخور جمالیمه دشمنده رحم ائدیر منه آغلور
قالوب یامان گونه بیر غملی ماجرادی رقیه
یارالی باشووی من قویمارام یره قوجاقیمدان
منی قوجاقوه چوخ آلمیسان رضادی رقیه
یاواش یاواش اُپرم لبلرون یارالیدی اینجیر
اذیت ایلمرم عهده بافادی رقیه
نولیدی بیرده گوریدیم اوتورمشام قوجاقوندا
نه غم نه غصه نه مظلوم اشقیادی رقیه
بیلکلریمده توان یوخ آلام قوجاقیمه باشون
یخیلمیشام با شون اوسته سنه فدادی رقیه
کریمی درگهه کشکول آسوبدی سفره سالوبدی
بولور علی نوه سی منبع سخادی رقیه
کریمی مراغه ای
موضوع: حضرت رقیه (س) احوالات ,
زبان شعر و شاعر: نوحه ترکی , کریمی مراغه ای
-------------------------------
زبانحال حضرت رقیه (سلام الله)
باباجان بو نصف شبده بو بِلاده خوش گَلوبسن
بو خرابه ده سالوبسان منی یاده خوش گَلوبسن
بابا بُلمدیم ازلده سنی پیشواز ایدوم من
منی بیرده آل قوجاقه سنه کشف راز ایدوم من
نه عموم نه قارداشیم وار، کیمه بیرده ناز ایدوم من
منه ویرماقا تسلّی بو بَلاده خوش گَلوبسن
بابا سن کیمی امیره بو مکاندا یوخ لیاقت
گوزوم اوسته قوی اَیاقون، منی ایلمه خجالت
سنه کیم دیدی مریضم گَلوب ایلدون عیادت
قالا قویمادون جنازم بو آراده خوش گَلوبسن
من او بلبلم اسیر قفسم، چمن سیز اُلّم
بو خرابه گوشه سینده یاتارام وطن سیز اُلّم
نه مزار اولار نه خلعت، بُلورم کفن سیز اُلّم
بُلورم کفن تاپولماز اسراده خوش گَلوبسن
بابا هیچ یتیمه من تک بو قدر شماتت اولماز
نه چراغ وار نه بستر بیله استراحت اولماز
یاتا بُلمورم آجیمدان، اورگیمده طاقت اولماز
نجه صبر اولار بو ظلمه صغراده خوش گَلوبسن
بابا سندن آیریلاندان بیله دوشموشم نظردن
نه بیر ایلین حمایت من زار و خون جگردن
گئجه گوندوز انتظارم گَله قارداشیم سفردن
ز بس آغلادیم چاغیردیم سنی داده خوش گَلوبسن
منی ایلدی زمانه آتاسیز بو اوچ یاشیمدا
بو صغیر سنیلن گور نچه قاره وار باشیمدا
اورگیم دونوبدی قانه، گورونور بو گوز یاشیمدا
منی گورماقا مکان فقراده خوش گَلوبسن
بو خرابه گوشه سینده باباجان سولوب سارالدیم
منه باخدی گُلدی قیزلار، باشیمی اَشاقه سالدیم
قوجاقوندا بَسلَمیشدون منی گور نه حاله قالدیم
نجه بیر اوشاق دایانسون بو جفاده خوش گَلوبسن
هانی اکبریم گَلوب بیر اُپه یاشلی گوزلریمدن
آییرانماز اهل عالم گئجه می گونوزلریمدن
دوتوب اود یانار کریمی بو یانیقلی سوزلریمدن
گَلی نی کیمی نوایه بو عزاده خوش گَلوبسن
کریمی مراغه ای
موضوع: حضرت رقیه (س) زبانحال ,
زبان شعر و شاعر: نوحه ترکی , کریمی مراغه ای
-------------------------------
ورود به کربلا
قافلم یتیشدی کربلایه زینب
حاضر اول بو یرده هر بلایه زینب
گللرون سولان یردی- زلفیوی یولان یردی
بو بلالی صحرا- بو بلالی صحرا
من شهید عشقم مدفنیم بو یردی
سرور حجازم مسکنیم بو یردی
عندلیب عشقم گلشنیم بو یردی
باصفا گلستاندور- خوش هوا بیاباندور
بو بلالی صحرا- بو بلالی صحرا
من خلیل عشقم گلمیشم منایه
صابرم بلایه راضیم قضایه
غبطه وار مناده دشت کربلایه
کعبه دن مجلّلدی- شاه عشقه مقتلدی
بو بلالی صحرا- بو بلالی صحرا
کشف اولار بو یرده دلده کی مرامیم
دشتگاه ظلمی محو ایدر مقامیم
آخِرین مسیریم بهتریم مقامیم
بو دیار پرغمدور- رتبه ده معظّمدور
بو بلالی صحرا- بو بلالی صحرا
تیز قالار بو چولده قارداشون اوغولسوز
اشقیا قویالّار بو غریبی یالقوز
قلبیمه وورولّار بیر خدنگ دلسوز
خاک خونیله هردم- یاره مه قویار مرهم
بو بلالی صحرا- بو بلالی صحرا
ای آنام بتوله باوفا صبیّه
شان و منزلتده مریم سویّه
سندن اوتریدور بو تلّ زینبیّه
ظهر روز عاشورا- قانیله اولار دریا
بو بلالی صحرا- بو بلالی صحرا
گوگلومه بو یرده غم گلور غم اوسته
دوغرانار ابوالفضل نهر علقم اوسته
زلفیوی توکرسن اوخلی سینم اوسته
تیترر آه و زاروندن- آه شعله باروندن
بو بلالی صحرا- بو بلالی صحرا
اکبریم ویرر جان زینبا بو یرده
اصغریم ایچر قان برملا بو یرده
باشیمی کسه لّر اشقیا بو یرده
جای امتحانیمدور- آخِرین مکانیمدور
بو بلالی صحرا- بو بلالی صحرا
جان کیمی بو صحرا جانیمی قوجاقلار
شان و منزلتده کعبه نی قاباقلار
پاره پاره جسمی سینه سینده ساخلار
اکبریم ایاقیمده- اصغریم قوجاقیمده
بو بلالی صحرا- بو بلالی صحرا
ایمدیدن سرشکون باغلاما عذاره
اسمیوب سموم غم بو لاله زاره
اُلمیوب حسینون گلمه آه و زاره
اوندا آغلا اول غمگین- قانیله اولار رنگین
بو بلالی صحرا- بو بلالی صحرا
قارداشون قالاندا شمر الینده آغلا
تشنه جان ویرنده آغلا سینه داغلا
ویرسه شمر مهلت گوزلریمی باغلا
حالیمه یانور گویلر- لرزیه دوشوب تیترر
بو بلالی صحرا- بو بلالی صحرا
شیعه لر اولولّار بو یره مسافر
شهلر ایستور اولسون قبریمه مجاور
اولسا گر «کریمی» من غریبه زائر
عرض ایدر نه غوغادور- گور نه محنت افزادور
بو بلالی صحرا- بو بلالی صحرا
استاد کریمی مراغه ای
موضوع: احوالات ورود به کربلا ,
زبان شعر و شاعر: نوحه ترکی , کریمی مراغه ای
-------------------------------
زبانحال حضرت امام حسین (علیه السلام)
من حسینم عاشقم طشت زره یحیی کیمی
قتلگاهیمده صفا وار وادی سینا کیمی
ربّی ارنی ائتمرم اعلان بو طور عشقده
لَن تَرانی تا جوابیمده گله موسا کیمی
کلمهٔ یا قوم اَسقونی زبان حالیدی
قوی فرات آخسین کناریمدن منیم دریا کیمی
من سوسوز جان وئرماقا عهدیمده امضا وئرمیشم
ساقی کوثر آتامدی وار آنام زهرا کیمی
من نه اسکندر کیمی آب حیات عطشانیم
خضر جام الده حضوریمده دوروب سقا کیمی
قطعه قطعه خنجر و شمشیریله دوغرانماسام
قاف عشقه قانلی شهپر آچمارام عنقا کیمی
احتیاجیم وار بو سو داده شریک اعظمه
بیر باجیم وار منزلتده مریم و سارا کیمی
زینبیم وار مین اوغولدان باشدی قارداشدان گوزل
مادر گیتی دوغانماز زینب کبری کیمی
باشیمون دسمالی قندیل اولموش عرش اعظمه
یادوارم وار منیم دنیاده عاشورا کیمی
نفس امّاره شریحی سالدی چاه ذلّته
دینی دیناره نثار ائتدی ابوموسی کیمی
وئردی فتوا قتلیمه ثاراللهّی بولدی هدر
بولمدی مهدی بالام وار مصلح دنیا کیمی
چوخلاری علم و عبادتدن وورار دم٬ دمبدم
آزمایشدن چخاماز شیح بر صیصا کیمی
من حسینم آل بوسفیانه بیعت ائتمرم
قتلیمه دار شقاوت قورسالار عیسی کیمی
من خلیلم منجیقه باغلاسا نمرودیان
صبریم عشقیم آرتیرار امواجنی دریا کیمی
من علی بن ابیطالبدن الهام آلمشام
مرشدیم وار خانقاه عشقیده مولا کیمی
کوفه شهرینده تنوری ایلرم مشکوة نور
نوریمه فرعونیان والِه یدِ بیضا کیمی
کاف ها یا عین صادین مظهر و معناسیم
سورهٔ کوثر آنامدی وار بابام طاها کیمی
من فنا فی اللهم اخلاصیمده خالص مخلصم
یوخلارام راحت کول اوسته بستر دیبا کیمی
یدّی ضربتله کسَر قاتل قفادن باشیمی
دشمنیمده برک اورک وار صخرهٔ خارا کیمی
ای «کریمی»منشآتون باقیاتٌ صالحات
زنده دور آدون همیشه ائتدیقون انشا کیمی
استاد کریمی مراغه ای
موضوع: حضرت امام حسین (ع) زبانحال ,
زبان شعر و شاعر: نوحه ترکی , کریمی مراغه ای
-------------------------------
راز و نیاز حضرت امام حسین (علیه السلام)
یارب بو عهدنامه بو پیمان منیمکیدور
بو دشتی لاله زار ائلین قان منیمکیدور
من کربلا خلیلیم عالیدی منصبیم
توپراقلار اوسته قوچ قوزی قربان منیمکیدور
عشّاق ایچینده پرچم شخصیّت آچمیشام
الان بو کوی عشقیده چوگان منیمکیدور
بو کربلا چولون ائدرم جنّته رقیب
عالم گورر بو روضهٔ رضوان منیمکیدور
وئردیم یزیده کوفه و شامین ریاستین
عالم اونون،بو غملی بیابان منیمکیدور
معناده بو چوخور یئری دنیایه وئرمرم
من عارفم بو مکتب عرفان منیمکیدور
شش گوشه بیر مزار اولی بو قانلی مقتلیم
هر بیر نقاطیدن گله مهمان منیمکیدور
مظلوم اولوب ،یزیدین ائوین ایلرم خراب
فاتح منم بساط سلیمان منیمکیدور
ایستوردی پایمال ائده شرع محمدی
من قویمادیم حمایت قرآن منیمکیدور
نازلی رقیه می سنه تاپشوردوم ای خدا
سن حافظ اول او بیکس و نالان منیمکیدور
باشیم جداده گون کیمی صحرالری گزر
شامه کیمی حفاظت طفلان منیمکیدور
آل خلیل ایچینده حسین افتخار ائدر
لطف ایلیوب دیسون که بو قربان منیمکیدور
گودال قتلگهده بو گون تشنه جان وئروب
قویماق جهانی عشقیمه حیران منیمکیدور
اکبر کیمی یولوندا جوان ویردیم ای خدا
یعقوبیوَم،بو یوسف کنعان منیمکیدور
لایق بیلوب حضوریوه گوندردیم اصغری
گرچه اولوب جفائیله خندان منیمکیدور
کیمدور وئره مناده ابوالفضل تک فدا
اولسا قبول محضر سلطان منیمکیدور
ال قاسم آدلی تازه جوانیمدن اوزمیشم
ائتسه قبول حضرت جانان منیمکیدور
بیر باش قالوب که باشه وئرم عهدنامه نی
عفو ایله گر یوبانسا بو نقصان منیمکیدور
آخر نفسدی منتظرم زینبیم گله
اخیامیده او جمع پریشان منیمکیدور
دانش سرای عشقیدی میدان کربلا
عشّاق ایچینده رتبهٔ شایان منیمکیدور
ناگه یتیشدی قتلگهه شمر بی حیا
نعره چکوب دیردی که دوران منیمکیدور
ابن زیاد فاعل مختار ائدوب منی
ری ملکنون ایالتی الآن منیمکیدور
عهد ائتمیشم حسینی اوزوم ئولدورم گرک
یوخ ربطی هئچ کسه که بو فرمان منیمکیدور
پیغمبرین چراغینی خاموش ائدم گرک
وار قدرتیم بو خنجر برّان منیمکیدور
سس گلدی ظالم ایلمه ظلمون مضایقه
روز جزاده عدلیله دیوان منیمکیدور
شاها ((کریمیم)) سیزه مداح و نوکرم
بزم عزاده دیدهٔ گریان منیمکیدور
استاد کریمی مراغه ای
منبع مجموعه کانالهای مدح و مرثیه
موضوع: حضرت امام حسین (ع) مناجات ,
زبان شعر و شاعر: نوحه ترکی , کریمی مراغه ای
-------------------------------
خطاب به حاجی از مکه برگشته
ترک ایلدوز مدینه نی شور و نوائیله
چیخدوز او شهریدن صلوات و ثنائیله
سالدوز خیاله شاه شهیدین او وقتینی
چیخدی مدینه دن هوس کربلائیله
سسلندی ای مدینه منی ساخلیانمادون
ساغ قال همیشه بو گوزل آب و هوائیله
من کربلا دیوب گئدیرم چون بلا گونی
مانوسم آه و دادیله درد و بلائیله
ای با صفا مدینه منی قویمادی فلک
تا معتکف اولام حرم مصطفائیله
قال جان سنوندی جان نه نه مین قبری ای بقیع
فخر ائت بهشته تربت خیرالنّسائیله
سازش منیله ایلمدی مکه و منا
چوخ خوشدی کربلا منه یتمیش فدائیله
مشهور اولوب کرمده آتام مرتضی علی
حال رکوع ده بیر اوزوک وئردی سائیله
قوی بارماقیمدا گئتسون اوزوک اشتیاقینه
بجدل سووینسون عشق نگین بهائیله
نه مکه نه مدینه منه صاحب اولمادی
همسایه ام سلیقه ده مرغ قطائیله
احرام ایچینده چوخ حاجی شمشیر باغلیوب
عصرین امامین ئولدوره فکر خطائیله
بیر نکته سهو مُحرمی مُجرم ائدر بلی
دوتماز بو امر کینه و کید و ریائیله
دنیای پنج روزه ده بیر قصر زرنگار
هئچ فرق یوخدی عاشقه مطبخ سرائیله
یاتسون یزید عزّتیله تخت نازیده
من کوللر اوسته راحتم عشق و وفائیله
اکثیر احمر ائتمتاقا قانیلمه توپراقی
تصمیم دوتمشام نظر کیمیائیله
بیر عمر شیعه توپراقیما افتخار ائدر
ائتمز عوض او تربتی سیم و طلائیله
قیلسون نماز او تربت پاکه حسینچی لر
آلسون دوا مرضلره خاک شفائیله
هر یره بیر مدال شفاعتدی سینه مه
یار ایستیوبدی یارینی دورت مین یارائیله
بیر قوچ فدا وئروبدی مباهات ائدر خلیل
مشهور ائدوب منانی همان بیر فدائیله
یتمیش ایکی فدائیله شرمنده دور حسین
من کربلائیم نه ایشم وار منائیله
عباس تک قوچوم علی اصغر کیمی قوزوم
آهو تک اکبریم خط و خال ختائیله
کریمی مراغه ای
موضوع: زائران کعبه ,
زبان شعر و شاعر: نوحه ترکی , کریمی مراغه ای
-------------------------------
زبانحال به حضرت رقیه (سلام الله) در خرابه شام
قویما توپراقا جمالون نازلی سُوگلیم رقیه
گل قوجاقیمه او زلفون توپراقین سیلیم رقیه
ائتمه غم اگر الوندن گئتدی عزت و اساسون
آه چکمه غصه لنمه کهنه دور قزیم لباسون
جانیمی آلوبدی باالله ناز و عجز و التماسون
بو خرابه ده بوکولدی غصه دن بئلیم رقیه
شاهزاده سن سوزوم یوخ مسکنون دگول خرابه
گلموری گمانیم اما فرشه تخت و رختخوابه
آل بو تراب عیالی یوز قویا گرک ترابه
نیلیوم گئدوب جلالیم بوش قالوب الیم رقیه
چیخما کوچیه گورورسن قزلار ایلوری اذیت
گه لباسوه گولوللر ایلیورله گه شماتت
داش آتور سنه اوشاقلار بیر کس ایلمور حمایت
بیز بو شهریده غریبوخ قالمیوب ائلیم رقیه
صبر ائله قزیم قیتسون قارداشون آتان سفردن
اکبریم گلوب قوتارسون جانیوی خرابه لردن
زینبون یارالی قلبی اود دوتار بو غصه لردن
شوریله یتر تمامه آی گونوم ایلیم رقیه
قلبیمه بو شامون اهلی غم قویوب قزیم غم اوسته
قویما گل یوزون ترابه قوی یارالی سینه م اوسته
دور گتور قبار ایاقون قوی بو یاشلی دیده م اوسته
سن امانت حسین سن ای شیرین دیلیم رقیه
آز دیلونده اصغر آدین ازبر ایله گل فغانه
گورموسن آنان ربابین گوز یاشی دونوبدی قانه
غصه دن دولوبدی قلبی آختارور قزیم بهانه
صبر ائله غم و بلایه ای سولان گلیم رقیه
سن قزیم یزید شومین اهلبیتینه قاریشما
گر قزی نوازش ائتسه آلسا گوگلوی باریشما
سن او کافرین قزیلان گفتگو ائدوب دانیشما
گئتمه یانینه گلنده تا اوزوم گلیم رقیه
آلتی آیدی کربلادن گورمیوبدی شانه زلفون
قتلگاهدن تلینده ساخلیوب نشانه زلفون
گل اُپوب سولان جمالون وئر اویان بویانه زلفون
ای سپهر معرفتده بدر کاملیم رقیه
گوزیاشون یاخار یزیدین عاقبت بو خانمانین
یاندیرار شرار آهون بو صفالی دودمانین
بیر گونی الیندن آلاْم شامی من بو بی حیانین
ایلرم سنه قباله خسته بلبلیم رقیه
بش گونون قوناقیوخ بیز سن همیشه لوخ قالارسان
شامدن چوخ عزتیله سن بیزی یولا سالارسان
بو گروه بیحیادن یاخشی انتقام آلارسان
مرحبا دیر گورنلر شاد اولار دیلیم رقیه
گرچه عمریوی گئچیتدون درد و محنت و غمیله
مونس اولدون آه و ناله اشک چشم پر نمیله
شامی ایله سن تصرف سبز رنگ پرچمیله
ای منیم بو ظلمت ائوده شمع محفلیم رقیه
من (کریمیم) ازلدن خادمم بو دودمانه
باشیمی وفالی ایت تک قویموشام بو آستانه
ایمدی ائتمیشم الیمده من بو نوحه نی بهانه
سن اوزون توجه ایله واردی مشگلیم رقیه
کریمی مراغه ای
منبع مجموعه کانالهای مدح و مرثیه
موضوع: احوالات خرابه شام ,
زبان شعر و شاعر: نوحه ترکی , کریمی مراغه ای
-------------------------------
شجاعت حضرت زینب (سلام الله)
وورمیسان شامه عجب پرچم ارشاد خانم
نه گوزل مکتب آچوبسان ائوون آباد خانم
گرک البته حسینین باجیسی زینب اولا
عفّتی عصمتی شخصیّتی زین اب اولا
پایتخت اُموی ده حرمی مکتب اولا
هر گلن کاخ یزیدین باخا ویرانه سینه
یوز قویا زینب مظلومین عزاخانه سینه
ائوون آباد خانم رتبه وی ممتاز ائلدون
عالم عشقده عشّاقی سر افراز ائلدون
صبری شرمنده ائدوب واقعاً اعجاز ائلدون
آتاوا اولمادی ممکن قویا شاماته قدم
سن ووروبسان دل سوریه ده فتحیله علم
هانسی دکتردی مطبّی تاپا بیر بیله رواج
هانسی خاتوندی اولا درگهی ینبوع نتاج
چاره سیز درده خانم شامده سندندی علاج
سکه عشقون اقالیم ده رایجدی خانم
ناامید ائتمه قاپون باب الحوائجدی خانم
نه مطبّون ویزیتی نوبه گئجه گوندوزی وار
نه طبابتده سنه بیر جه طبیبون سوزی وار
سن علینون قزیسان سنده جهانین گوزی وار
سن خانم شامده بیچاره لرین چاره سی سن
دوشموسن ائلدن آرالی وطن آواره سی سن
شامدن واردی خانم سنده آجی خاطره لر
باملردن باشووا توکدوله کول فاجره لر
گولدولر حالوه اللرده دف و دایره لر
تیشهٔ عدل خدا ریشهٔ ظلمی کسه جاق
نقدر وار بو جهان پرچم زینب أسه جاق
گینه گلدیم قاپووا دردیمه درمان ائده سن
ای علی نایبه سی سائلم احسان ائده سن
منی اوز سفرهٔ احسانوه مهمان ائده سن
اهل عالم سیزی مین حاتمه سرور تانیوب
هر نه اولسام منی ده زینبه نوکر تانیوب
حاج حسین کریمی مراغه ای
منبع مجموعه کانالهای مدح و مرثیه
موضوع: حضرت زینب کبری (س) زبانحال ,
زبان شعر و شاعر: نوحه ترکی , کریمی مراغه ای
-------------------------------
جواب دادن حضرت ابوالفضل (علیه السلام) به شمر لعین
یا شمر گلوبسن سالاسان شیری کمنده
وار بولموسن ایمان و ادب عاطفه منده
زهرا بالاسین بوشلاسین عباس وفادار
ائتسون اوزونی زادهٔ مرجانیه بنده
یا شمر حسین ابن علی نوکری یم من
مظلوم آقامین یاوری سر لشگری یم من
عباسم او مولایه نظر کرده غلامم
بیل حیدری یم حیدری یم حیدری یم من
یا شمر جهانین شرف ناسی منم من
ایستکلی باجیم زینبین عباسی منم من
چون حیدریم حیدریم حیدریم من
حیدر الینون خنجر الماسی منم من
یا شمر سپهر ادبین اختری یم من
گنجینهٔ فضل و شرفین گوهری یم من
سن سفرهٔ نامردده کاسه یالیانسان
من حیدریم حیدریم حیدری یم من
یا شمر علینون باغینون نوبری یم من
دین لشگرینون حمزه سیم جعفری یم من
بیر کلمیه دل آچما حضوریمده دایانما
من حیدریم حیدری یم حیدری یم من
استاد کریمی مراغه ای
موضوع: حضرت ابوالفضل العباس (ع) امان نامه ,
زبان شعر و شاعر: نوحه ترکی , کریمی مراغه ای
-------------------------------
در احوالات حضرت زهرا (سلام الله)
زهرا غمینده اشکیم عذاره روان گلور
زهرا آدی گلن یره صاحب زمان گلور
هانسی اورکدی بیر بله نسگلده یانمیوب
مین دورد یوز ایلدی شیعه سی قبرین تاپانمیوب
سیلی دگنده فاطمه نین گل جمالنه
بولمم ندن فلک روشیندن دایانمیوب
ثانی الی سالاندا لکه ماه صورته
آی بس ندن خسوفه دوشوب دالدالانمیوب
اود وردیلار یانوب ملک اذن ایستین قاپی
بیر شرمه باخ شرده علیدن اوتانمیوب
مسمار آچدی سینهٔ زهراده روزنه
مسماره باخ باتوب اورگه هیچ اوصانمیوب
قانه باتاندا فاطمه تنگ آستانه ده
عرش آستانه سی نیه قانه بویانمیوب
عظم رمیمی نالیه گتدی سیزیلتیسی
افسوس او آه زاره یاتانلار اویانمیوب
نامحرم ایچره عصمت کبرای کردگار
بولمم نه حالده یمش ایاقه دورانمیوب
زینب دیدی بابا ننم اُلدی هرایه گل
معصومه اولماقین آنامین خصم قانمیوب
زهرانی قان آپاردی نه اگلشمسن بابا
پیغمبرین امانتنه خلق اینانمیوب
شرط ادب عصارهٔ دیندور کریمیا
بی بهره دور او کسکه مؤدب دولانمیوب
کریمی مراغه ای
موضوع: حضرت فاطمه زهرا (س) احوالات ,
زبان شعر و شاعر: نوحه ترکی , کریمی مراغه ای
-------------------------------
در احوالات حضرت زهرا (سلام الله)
قلبونده بیر علینون ائوین چک تجسّمه
گوندر تخیّلاتی او محنت سراسنه
بیر خردا ائودی،صحنیدی،نصفی یانان قاپی
باخ ابتدای خانه ی وحی انتهاسنه
بیر گوشه ده علی اوتوروب گوزیاشی توکر
آغلار وفالی همسرینون ابتلاسینه
بیر یاندا فضّه باشینه یغمیش بالالاری
آغلار قولاق وئرر اولارین اوخشاماسنه
باخدوقجا مرتضی حسنینون جمالینه
آهسته ایلر اشکینی جاری محاسنه
زینب آنا یئرین گوروری بوش دؤزنموری
قلبی یانور پناه آپارور اوز آتاسنه
مظلوم بابا،آنام هایانا گئتدی گلمدی
من انس دوتموشام آنامین آه و واسنه
هی سسلیور یارالی ننم هاردا یاتموسان
قربان سینان قابیرقووا سینن یاراسنه
اولماز آنا کیمی بالانین نازینی چکن
قیز غم گونونده دردینی سویلر آناسنه
نسگیلّی سن ننه اوغول ائولندیرنمدون
حسرت قالان اوغول طویونا قیز حناسینه
گل باری بیر گئجه یوخوما آل قوجاقووه
باس بو یتیمی باغریوا باخ التماسنه
آچدی علی قولون آلوب آغوشه زینبی
دوز سپمه زینبیم آتاوین دل یاراسنه
آز آغلا چوخدی آغلامالی گونلرون سنون
ساخلا نوانی قارداشووین نینواسینه
یعقوبی،نوحی،یوسفی قان آغلادان فلک
آغلار حسینون آغلامالی ماجراسینه
بیر گون خلیلی،یونسی،ایّوبی،آدمی
عمّامه سیز، حسین چکر اوز کربلاسینه
آغلا « کریمی » گوزیاشیدی چاره درد یوخ
جنّت ویرلّه حشریده اشکین جزاسینه
یازدیر حسینون آدینی سنگ مزاریوه
قربان اولوم حسینون عزا و قراسینه
کریمی مراغه ای
موضوع: حضرت فاطمه زهرا (س) احوالات ,
زبان شعر و شاعر: نوحه ترکی , کریمی مراغه ای
-------------------------------
عشق حسینی
جهانی خلق ائدوب خدا فقط حسینون عشقینه
یاراندی جمله ماسوا فقط حسینون عشقینه
حسیندی مظهر خدا حسیندی مشعل هدا
حسین سفینهُ آلنّجا حسین شهید اشقیا
حسین معین انبیا قتیل دشت کربلا
یازیلسا صبحیله مسا کتاب فضلی جابه جا
خدا دیوبدی مرحبا فقط حسینون عشقینه
تمام اهل عالمه حسینون امتیازی وار
عموم خلق اولانلارین او سروره نیازی وار
خدای ذوالجلالیدن شفاعته جوازی وار
ئورکده سوز و سازی وار دیلینده کشف رازی وار
ائده لله غبطه انبیا فقط حسینون عشقینه
حسین خلیل عشقیدی مناسی کربلاده دی
منالرین فدالرین فداسی کربلاده دی
صفا و مروه نین گوزل صفاسی کربلاده دی
خلاصه شیعه دردیون دواسی کربلاده دی
مریض لر تاپار شفا فقط حسینون عشقینه
حسینون آدینا فدا بالالاریم آتام آنام
ولیّ امریدور بیزه مباد حقّینی دانام
مصیبتینده روز و شب گرکدی آغلیام،یانام
صفالی کربلاسینه گوزل مزاره قربانام
او بارگاه اولوب بنا فقط حسینون عشقینه
خدای حیّ لم یزل حسینی انتخاب ائدوب
او آلتی گوشه قبرینی بهشتدن حساب ائدوب
سپهر آل عصمته حسینی آفتاب ائدوب
حسین قیام نهضته مقدّس انقلاب ائدوب
دل ایستر اولسون آشنا فقط حسینون عشقینه
"کریمی ام" آقام وئرن پایا قناعت ائتمشم
نه مصلحت ائدوب خدا اونا کفایت ائتمشم
حسین حسیندی ازبریم حسینه عادت ائتمشم
اون آلتی دفعه قبرینی گئدوب زیارت ائتمشم
سورونّم ایلرم نوا فقط حسینون عشقینه
استاد کریمی مراغه ای
موضوع: حضرت امام حسین (ع) ,
زبان شعر و شاعر: نوحه ترکی , کریمی مراغه ای
-------------------------------
اظهار عطش حضرت رقیه (سلام الله)
اوره گیم یانور سوسوزدان کسیلوب توانیم عمه
منه بیر ایچیم سو فکر ایت باشوا دولانیم عمه
دوزه بولمرم عطشدن بو گیجه صباح اولونجا
نولی بیر گورم سرین سو ایچورم گینه دویونجا
نیه ئولمه دی رقیه سارالوب بئله سولونجا
قوتولور بهار عیشیم یتیشوب خزانیم عمه
گلوری سسی فراتین اوره گیم اسیر هوسدن
پر آچوبدی مرغ روحیم اوچا آز قالور قفسدن
دوتولوب بوغاز باتوب سس داخی دوشمیشم نفسدن
نجه صبر ایدوم بو ظلمه نجه من دایانیم عمه
بیزه نامه لر یازوبلا گتوروبله بو عراقه
اولا میزبان یهودی سویی باغلاماز قوناقه
نئجه سخت دشمن اولسا گینه رحم ائدر اوشاقه
سوزه یوخ دلیمده طاقت قورویوب دهانیم عمه
آخوری سویی فراتین بو بلا لی سرزمینه
دوتوب اود یانور رقیّه دوداقین امیر سکینه
نیه باغلیوب فراتین یولونی بو اهل کینه
یانور اصغریم عطشدن سویا یوخ گمانیم عمه
نیه گلمیشوخ بیز عمه بو دیار پر بلایه
نیه جمع اولوب بو لشگر بو زمین کربلایه
گئدیرم سوسوزلیقیمدان باباما ائدن گلایه
ایلسون بو درده چاره شه انس و جانیم عمه
بو گیجه نه وار باشوندا دی گوروم وفالی عمه
نیه آغلوسان بابامون پوزولوبدی حالی عمه
نیه قارداشیم علینون سارالوب جمالی عمه
نیه آلموسان قوجاقه منی مهربانیم عمه
نیه عمه جان بو منزل بیزه نامبارک اولدی
بو یره قدم قویاندان آتامون جمالی سولدی
یتیشوبدی غم غم اوستن بیزه حالیمیز پوزولدی
نیه دوشدی بو بلالی یره کاروانیم عمه
آنام اصغرین آچوبدور بلگین گلوب فغانه
چالور ال ایاق سوسوزدان سارالوب او نازدانه
یری وار ئولونجه شیعه ایده گوز یاشین روانه
بو غمی یازوب"کریمی" اولا نوحه خوانیم عمه
استاد کریمی مراغه ای
منبع مجموعه کانالهای مدح و مرثیه
موضوع: حضرت رقیه (س) زبانحال ,
زبان شعر و شاعر: نوحه ترکی , کریمی مراغه ای
-------------------------------
در احوالات حضرت امام رضا (علیه السلام)
اولوبدی نور خدا جلوه گر خراساندا
یاتوبدی ثامن اثنا عشر خراساندا
طلوع ایدنده ازل آفتاب مشرقدن
دوشر او قبّیه وقت سحر خراساندا
یاتوب او بقعه ده بیر شهریار عالی شأن
ایدوب او توپراقی لعل و گهر خراساندا
اونون جمالینون انوارینون اشعّه سیدور
همان بو انجم و شمس و قمر خراساندا
دیون دولانمیا بیجا جهانی اسکندر
تاپانماز آب حیاتی مگر خراساندا
بهشت شوقینه چکمه ریاضت ای زاهد
بهشت عاشقی اولسان اگر خراساندا
فدا اولاخ آدیوا ای غریب خطّه طوس
زمانه ائتدی سنی خونجگر خراساندا
صبا غریب لرین سن همیشه قاصدی سن
غریب جان ویروری بیر نفر خراساندا
ویروبله زهر جفا دوغریوب جگرلرینی
وجودی برگ خزان تک اسر خراساندا
باخور ساقا صولا هردم اووشدورور ئورگین
ایدوب دوداقلارینا زهر اثر خراساندا
باجیسینا خبر ایله دایانماسون گلسون
وفالی قارداشا ائتسون نظر خراساندا
زمانه ئوز وطنیمدن سالوب کناره منی
جفائیله ایلیوب دربدر خراساندا
بو زهر سالدی ایاقدان منی یانور جگریم
سالوبدی عالمه آهیم شرر خراساندا
هانی وفالی باجیم باشیمی آلا دیزینه
اولا تَشَفّیِ دل مختصر خراساندا
بو غربت ئولکه ده ئولسم اگر منِ مضطر
گوزومی باغلاماقا کیم گلر خراساندا
گوزوم قالوب قاپیدا حسرتیله جان ویرورم
بلا خدنگینه اولدوم سپر خراساندا
کریمی ام گجه گوندوز بو حسرتیله وارام
ائدم او تربتی کحل البصر خراساندا
غلاملر کیمی دائم قالام حضورونده
گیچیردم عمرومی شام و سحر خراساندا
استاد کریمی مراغه ای
موضوع: حضرت امام رضا (ع) احوالات ,
زبان شعر و شاعر: نوحه ترکی , کریمی مراغه ای
-------------------------------
در شهادت امام جعفر صادق (ع) و
گریز به شهادت موسی بن جعفر (ع)
شیعه لر آغلار بو گون طاها امام صادقه
باش آچوب ماتم دوتوب زهرا امام صادقه
صادق آل محمّد ظلمیله مسموم اولوب
مرتضی سسلر اوغول وای، مجتبی مغموم اولوب
دشمن بی رحم الینده گور نجه مظلوم اولوب
مجلس ماتم قوروب دنیا امام صادقه
دوندروب اهل جفا قانه دل ناشادینی
شدّت زهر ستم صد چاک ایدوب اکبادینی
بی مروّت دشمنی باشسیز قویوب اولادینی
آغلادی دنیا و مافیها امام صادقه
بیر گجه منصور ملعون ایستدی اول سروری
تا یتیرسون قتله ظلمیله ولی داوری
چکدی شمشیری غلافیندن قزاردی گوزلری
تا بو فکریله ایده ایذا امام صادقه
گوردی عالم تیره تار اولدی قیامت آشکار
باش آچوخ یتدی پیمبر مجلسه بی اختیار
بیر طرفده مرتضی دورموش الینده ذوالفقار
لاتَخَف سسلور حق یکتا امام صادقه
گوردی بو اوضاعی منصور اولدی حالی منقلب
قویدی شمشیری غفافه ایلدی کظم غضب
عرض ایدوب گل یانیمه ای سیّد عالی نسب
عطر مخصوصین ایدوب اعطا امام صادقه
عاقبت قتل امامه نفسینی محکوم ایدوب
دلده کی بغض و عنادین عالمه معلوم ایدوب
زهردار انگوریله اول سروری مسموم ایدوب
اولدی بیر ماتم سرا دنیا امام صادقه
ایتدیلر تکفین تشییعینده مردم ازدحام
ماتمینده حاضر اولدی پیر و برنا خاصّ و عام
چوخ جلالیله آتاسین قبره تاپشوردی امام
مجلس ترحیم ایدوب برپا امام صادقه
اولمیوب هارون ایدن ظلم عالم امکانیده
یانمادی موسی ابن جعفر حالینه بیر آنیده
ساخلادی سبط رسولی اون بیر ایل زندانیده
بیر بیله ظلم ایتمدی اعدا امام صادقه
ایتمرم سند ابن شاهک ایلین ظلمی بیان
نیلدی بولمم او شاهه آه یا صاحب زمان
سسلدی ظالم غریبم باغریمی چوخ ایتمه قان
نسگل اولدی بو غم عظما امام صادقه
حیرتیم وار جور و ظلم گردش دورانیدن
دورت نفر حمّالیله نعشی چخوب زندانیدن
روز و شب دویماز ‹‹کریمی›› ناله و افغانیدن
آغلار ایلر گوزیاشین اهدا امام صادقه
استاد کریمی مراغه ای
موضوع: حضرت امام جعفر صادق (ع) احوالات ,
زبان شعر و شاعر: نوحه ترکی , کریمی مراغه ای
-------------------------------
احوالات تنور خولی
بیر گجه حسین باشی ایلدی مطبخی منور تنوریده
گوشواره عرش لم یزل ویردی فرشه زیور تنوریده
بیر به بیر ملائک دئیردیلر بیر باخون بو قانه باتان باشا
جاه و عزتین جمله عترتین حق یولوندا باشدان آتان باشا
بارها پیمبر چکوب الین بو کول اوسته یالقوز یاتان باشا
وجه ذوالمنندور بو شکلیده تا اولوب مصور تنوریده
جبرئیله امر ایلدی خدا ای امین من گئیتگلن یره
فاطمه حبیبیم بهشتیدن قصدی وار گیده اوغلونی گوره
گورسه کوللر اوسته اوغول باشین عالمی ویرار جمله بر بیره
افتخاریله ایت قنادوی سن او باشه بستر تنوریده
گوردی بیر طرفدن عیادته جدی خاتم الانبیا گلور
مرتضی الینده عمامه سی مجتبی دیور وا اخا گلور
اللری بلینده گوزونده یاش دید شاهه خیر النسا گلور
سسلنور حسینیم هایانداسان سس ویرور او سرور تنوریده
خولی دنی قانلی باشوی کوفیه قوناق دعوت ایلیوب
چون بیلوب امیر حجازسن شانوه گوره خدمت ایلیوب
میزبان گوروب چوخ یارالیسان رختخوابوی راحت ایلیوب
میزبان یاتوب رختخوابیده میهمان مضطر تنوریده
کربلاده باش سیز جنازوی قان ایچینده آلدیم کناریمه
بیر به بیر ئوپردیم یارالارون قانوی یاخاردیم عذاریمه
ساربانی گوردوم دوزنمدوم باعث اولدی بو آه و زاریمه
گلدیم ایلیم کوفه ده عیان باشویله محشر تنوریده
سن اوزون قوناقسان بو کوفه ده منده گلمیشم میهمان سنه
چکمه خجلت اولما ملول اگر خدمت ایتمیوب میزبان سنه
زلفیمیله پاک ایلرم باشون سینم اوسته ویرم مکان سنه
قویمارام بو عزتله بسلنن باش اولا محقر تنوریده
استاد کریمی مراغه ای
موضوع: احوالات تنور خولی ,
زبان شعر و شاعر: نوحه ترکی , کریمی مراغه ای
-------------------------------
بقیع
حَبّذا روضه ی رضواندی بقیع
بیت الاحزاندی پریشاندی بقیع
نسگل اولسون بو مُحَن شیعه لره
گوز گوتورمور ائله ویراندی بقیع
گئجه ظلمتدی قرانلقدی مدام
همه شب شام غریباندی بقیع
سنده دی تربت زهرای بتول
قدری تک قبری ده پنهاندی بقیع
سنده دی حضرت عبّاس آناسی
گوزی یاشلی اورگی قاندی بقیع
ایمدی ده گوزلور ابوالفضل یولون
ناگران گوزلری گریاندی بقیع
دورد امامین او گوزل قبرلری
نیه بس خاکیله یکساندی بقیع
سنده قویمولا جگر داغلاماقا
شمرلر سنده نگهباندی بقیع
عمو قارداش بالاس سنده یاتوب
بیر آتایه بالا مهماندی بقیع
مجتبا زین العبا بستریدی
صادق باقره اسکاندی بقیع
چوخ اورکلر چکوری حسرتوی
شوق وصلونده نواخواندی بقیع
بو «کریمی» یخیلوب توپراقووا
کرم ائت لایق احساندی بقیع
ائله که دوشدی بقیعه نظریم
اشک حسرتله دولوب دیده لریم
غصّه بوغدی منی گلدیم جانا من
یوزومی دوتدوم او قبرستانا من
گئدیرم صاق صولا یار آختاریرام
بیر مصیبتلی مزار آختاریرام
هارداسان ای گل گلزار رسول
ای حسینه آنا زهرای بتول
آغلادیم یاندیم همان نسگله من
طوطی طبعی گتوردوم دیله من
استاد کریمی مراغه ای
موضوع: در احوالات بقیع ,
زبان شعر و شاعر: نوحه ترکی , کریمی مراغه ای
-------------------------------
مناجات
ای ماه صیامی بیزه احسان ائدن الله
خوان کرمه بنده نی مهمان ائدن الله
ای ماه مبارکده آچان سفره ی احسان
اوز دعوتین انسانلارا احسان ائدن الله
بو آیدا بیزه لطف ائله توفیق عبادت
ای یوسفه ماهینی نگهبان ائدن الله
بو صوم و صلاتی صلواتی حَسَناتی
ردّ ایلمه ای مشکلی آسان ائدن الله
هر یرده مریض اولسا شفا وئر اوز اَلونله
ای دردلی لرین دردینه درمان ائدن الله
ای یوسفی آزاد ائلین بند بلادن
زنجیرین آچوب مصرده سلطان ائدن الله
هر حاجتِ شرعیّه لری ایله برآورد
سنسن هامی نُقصانلارا جبران ائدن الله
ای حضرت یعقوبی ائدن غصّه دن آزاد
گمگشته سینی وارد کنعان ائدن الله
اوز رحمت آیوندان بیزی گل ائتمه پشیمان
ای آتش نمرودی گلستان ائدن الله
یاغدیر بیزه رحمت یاغیشین ابر سخادن
ای شبنمیله غنچه نی خندان ائدن الله
قاپلار آچیلوب بو گیجه لر نام حسینه
مقبول ائلدی گوزلری گریان ائدن الله
عفو ایله «کریمی» ده اولان جرم و گناهی
ای حُرّی خطاسینده پشیمان ائدن الله
استاد کریمی مراغه ای
منبع مجموعه کانالهای مدح و مرثیه
موضوع: رمضانیه ,
زبان شعر و شاعر: نوحه ترکی , کریمی مراغه ای
-------------------------------
احوالات وداع حضرت علی اکبر (علیه السّلام ) با حضرت لیلا (سلام الله)
هر صاحب سریر سلیمان نمیشود
هر سنگریزه لؤ لؤ مرجان نمیشود
جهّال را به بزم ادب ره نمیدهند
هر پیر صدر مجلس عرفان نمیشود
هر گل به دست غنچه دهانی نمیرسد
هر مرغ همچو بلبل خوشخوان نمیشود
هر مدّعی که دم زند از عشق و عاشقی
محو جمال جلوۀ جانان نمیشود
در راه دوست هر که بمیرد شهید نیست
هر کس به عشق شاه شهیدان نمیشود
از مام دهر اگر پسر آید هزارها
زانها یکی چو اکبر عطشان نمیشود
حاجر به لیلی گفت که احسن به صبر تو
انسان صبور میشود اینسان نمیشود
لیلا - توئی که دست کشیدی از این جوان
این امر مشکلی ست که آسان نمیشود
گفتا برو علی به امید خدا برو
گر چه به بازگشتنت امکان نمیشود
در راه دین اگر سرت از تن جدا کنند
لیلا قسم به جان تو گریان نمیشود
این گریه کردنم نه ز بهر فراق توست
پایم در این معامله لرزان نمیشود
نالم به حال باب کُبارت که بیکس است
حالش چگونه بی تو پریشان نمیشود
تا سایۀ تو بر سر من هست بی قرار
لیلا اسیر لشگر عدوان نمیشود
بخشنده است خالق عالم «کریمیا»
جرمی مکن که قابل غُفران نمیشود
استاد کریمی مراغه ای
منبع مجموعه کانالهای مدح و مرثیه
موضوع: حضرت لیلا (س) ,
زبان شعر و شاعر: نوحه فارسی , کریمی مراغه ای
-------------------------------
احوالات حضرت موسی بن جعفر (ع)
و گریز به روضۀ تنور خولی ملعون
بیر نظر قیل محبس بغداده یا صاحب زمان
جدّیوین حالین گؤروب گل داده یا صاحب زمان
اون بیر ایل زنداندا قالدی پر اسف احوالیله
مونس اولدی کنده و زنجیر و اشک آلیله
چیخدی زنداندان وجودی دورد نفر حمالیله
آغلاروق بو محنت عظماده یا صاحب زمان
نردبان اوسته گوروب نعشین سلیمان خاروزار
واغریبا سسلنوب گؤز یاشینی ائتدی نثار
آلدی نعشین غسل وئردی ائتدی کسب افتخار
ائتدی پرقیمت کفن آماده یا صاحب زمان
جان وئریب موسی بن جعفر گرچه چوخ تحقیریله
اولدی بیر مدت مصاحب کنده و زنجیریله
نازنین جسمی ولی دوغرانمادی شمشیریله
سو دیوب یالوارمادی جلاده یا صاحب زمان
وار یئری شیعه بو غمده قلبدن قان آغلاسین
اولمادی بیر کس ئولنده گؤزلرینی باغلاسین
باشینی آلسین دیز اوسته بیرجه سینه داغلاسین
دوشدی بیر اوزگه مصیبت یاده یا صاحب زمان
گرچه مظلوم اولدی اما وئرمدی لب تشنه جان
ویرمادی باشین جدایه خولی و شمر و سنان
قالمادی مطبخ سراده قانلی باشی میهمان
اهل بیتی گزمدی صحراده یاصاحب زمان
هئچ کسه دشمن بو ظلمی ائتمیوب ائتمز یقین
قلب زهرادن بو نسگل گئتمیوب گئتمز یقین
سینه ده اکبر یاراسی بیتمیوب بیتمز یقین
قویدی بیر حسرت دل لیلاده یا صاحب زمان
کربلا اوضاعی زهرادن آلوب صبر و قرار
آه او ساعتدن گلوب مطبخ سرایه اشگبار
اوز گُلین گؤردی کول اوسته شوره گلدی چون هزار
قالمادی طاقت داخی زهراده یا صاحب زمان
بیر اوغول وای سسلدی توکدی یوزه اشک تری
سینیه باسدی فغانیله او رأس انوری
پاک ائدوب مه صورتیندن تودهٔ خاکستری
سالدی جنبش عالم ایجاده یا صاحب زمان
روز و شب آغلار «کریمی» جدیوین احوالینه
قیل توجه نایل اولسون دلده کی آمالینه
شیعه لیق تصدیقینی یاز نامهٔ اعمالینه
شرمسار ائتمه اونی عقباده یا صاحب زمان
استاد کریمی مراغه ای
موضوع: حضرت امام موسی کاظم (ع) احوالات ,
زبان شعر و شاعر: نوحه ترکی , کریمی مراغه ای
-------------------------------
در شهادت امام حسن عسکری (ع) و گریز به قتلگاه
آخور گوزوم یاشی رخساریمه چو ماء زلال
ائدن زمان حسن عسکری غمینده خیال
تعجبم نیه بو چرخ شوم و کج رفتار
همیشه اهل ولانی ائدوبدی غرق ملال
سالوب بلا و غمه هر امامی بیر بی دین
آلوبدی حقین الیندن ائدوب پریشان حال
بونوندا حقّینی غصب ایلدی بنی عباس
ائدوبدی غصب خلافت او شوم کینه خصال
بو ظلمه دویمادی آخرده معتمد ملعون
امامه زهر وئروب ائتدی صبرینی پا مال
او زهر امامی ایاقدان سالوب مریض ایلدی
یغوب اَعاظِمِ شهری او مرتد و حَیّال
باخوب اعاظم شهره دئدی اولون شاهد
بو گون مریضیدی بو سید خجسته مآل
بو ئولسه شیعه لری دوتماسین منی مسئول
که من رضا دگولم بار اولا منه بو وبال
معاینه ایلسون دکتر ایلیون امضا
بیاون که ئوز اجلیلن ئولوب بو ذی الاجلال
طبیبی باخدی دئدی ضعفی وار عناصرده
سو ایستینده وئرون مستکی بونا فی الحال
او بزمده امرادن دوتولدی استشهاد
صراحتیله او طوماری مهر ائدوبله رجال
گلوبدی باشنون اوسته عیادت ایلماقا
اولوبدی ظاهراً افسرده باطناً خوشحال
امام آچوب گوزینی باخدی قاتله یومدی
توکوب جمالینه گوز یاشنی او ماه جمال
ایکی امام گوزین آچدی قاتلین گوردی
بیری بو شهدی که احوالینی دئدیم اجمال
ایکیمجی کرب و بلا شاهی نور چشم بتول
قتیل راه حقیقت شهید قوم ظلال
دوشوب یارالی وجودیله بیر چوخور یرده
او قدری قانی آخوب قانیله دولوب گودال
هوانون ایتیسی یورقون یارالی سوز عطش
گلن وورور یارا قانین بیلوبله بسکه حلال
حزین حزین دیور ای قوم دوشموشم دلدن
جگرلریم آلشوب ای گروه بد افعال
او دمده ایلدی احساس آغرلاشوب سینه
ائشیتدی وار باشنون اوسته اوزگه قال و مقال
آچاندا گوزلرینی گوردی شمر شوم و شریر
چخوبدی سینه سینه الده خنجر قتال
بلالی زینب الیلن دوتوبدی خنجرینی
گوزینده گوز یاشی اما الینده بیر دسمال
دیور او قدری امان وئر که باغلیوم گوزینی
یاخیندی شمس امات تاپا بو چولده زوال
دئدی آنام باجی صبر ائت ال آتما معجریوه
هنوز ئولمه میشم من ندور بو پوزقون حال
ال آتما خنجرینه یوخدی بوندا رحم اثری
خیامه گئت داغیلار ایمدی چوللره اطفال
«کریمیم» اوزیمی سالمشام بو درباره
حسینه نوحه یازوب آغلیام گرک مه و سال
کریمی مراغه ای
منبع مجموعه کانالهای مدح و مرثیه
موضوع: حضرت امام حسن عسگری (ع) احوالات ,
زبان شعر و شاعر: نوحه ترکی , کریمی مراغه ای
-------------------------------
حضرت زینب کبری (سلام الله)
در سپهر معرفت خورشید خاور زینب است
در شرف با حضرت زهرا برابر زینب است
از برای گوهران پرسیدم از صرّاف عقل
گفت در بازار دین ارزنده گوهر زینب است
مادر گیتی نزاید همچو زینب دختری
یک مدال افتخار از بهر مادر زینب است
آنکه اسمش جبرئیل آورد از ربّ جلیل
کرده نامش انتخاب ا...ِ اکبر زینب است
مصطفی را افتخار و مرتضی را نور چشم
مجتبی را مونس و غمدیده خواهر زینب است
آنکه اسرار شهادت را به عالم عرضه کرد
طالب خون حسین از قوم کافر زینب است
گر نبود او از حدیث کربلا نامی نبود
آنکه کرد این داستان را پخش کشور زینب است
آنکه با یک آتشین نطقی به تالار یزید
کرد ایجاد تحوّل مثل حیدر زینب است
گر نشد ممکن علیّ المرتضی را فتح شام
آنکه فعلاً شام را کرده مسخّر زینب است
ای کریمی در شدائد دامن زینب بگیر
آنکه سائل را نراند خالی از در زینب است
کریمی مراغه ای
منبع مجموعه کانالهای مدح و مرثیه
موضوع: حضرت زینب کبری (س) مدح ,
زبان شعر و شاعر: نوحه فارسی , کریمی مراغه ای
-------------------------------
زبانحال حضرت زینب کبری (سلام الله) به حضرت ابوالفضل العباس (علیه السلام)
نهر علقمین اوستونده نه طوفاندی اباالفضل
بیرشربه سویون قیمتی بیرجاندی اباالفضل
عباس آقاجانلار یاریلان باشوه قربان
یارام باشیمی گوزده کی قانیاشوه قربان
دین اوسته ئولن یاریوه یولداشوه قربان
مشگون علمون قانیله الواندی اباالفضل
آخسین سنون عشقونده بوقان قان نه یه لازم
یارام باشیمی قوی چیخا بو جان نه یه لازم
دیوانه عشقه بابا درمان نه یه لازم
باش یاره مه عباس آدی درماندی ابالفضل
عباس آقابوقاره گیینلرسنه قربان
بوعرض ارادت ائلینلر سنه قربان
لبیک اباالفضل دییلنر سنه قربان
عشقونده اورک لاله کیمی قاندی اباالفضل
شمشیر یازار عشقیمه تفسیر باشیمدا
شاهددی همان عشقه بوشمشیر باشمیدا
شمشیریم ائدر عشقیمی تحریر باشمیدا
هر لحظه دیلیمده آدون عنواندی اباالفضل
باش یارماقیما ایسته سه هرکس سندیّت
من زینب مظلومیه ائتدیم تبعیّت
دیوانه یم عاقل منه چوخ ائتمه اذیت
من خانه بدوشم منه سلطاندی اباالفضل
ووردی باشینی محمله صدّیقه صغرا
آغ ساچلارینی قرمزی قان ائتدی محنّا
سسلندی اخا ای اوزی عطشان آدی سقا
تز گل باجووین حالی پریشاندی اباالفضل
گوزلردن ایراق بیرگونون عرضینده قوجالدیم
گئتدی او خانملیق نه یامان گونلره قالدیم
غم بوغدی دار یخدیم باشیمی محمله چالدیم
محملده باجون قانینه غلطاندی اباالفضل
بیردفعه ده بوکوفیه گلدیم من نالان
ساغدا حسنیم صولدا حسین دالدا جوانان
ایمدی ایکی قاراداشدان ایکی باش قانا غلطان
مرکب اونا نیزه سنه قلخاندی اباالفضل
هرچند بلا گلسه منه یوخدی گلایه م
من روز الست اوسته کی قالویه بلی یم
مین قمچی دگه باشیمه دین اوسته رضایم
نیلر بو چتین لر منه آساندی اباالفضل
واردور فلک ده نقدر پست و بلندی
بیر گون باشیما کوفه ده گللر سپه لندی
بیر گونده سینیق محملیمه داشلار الندی
یاردیم باشیمی ساچلاریم ایسلاندی اباافضل
الله بیزه احسان ائلیوب فوز عظیمی
قارداشیم اوخور واقعه کهف رقیمی
آغلار قاپومیزدا قوجا نوکردی کریمی
نومید ائلمه لایق احساندی اباالفضل
استاد کریمی مراغه ای
منبع مجموعه کانالهای مدح و مرثیه
موضوع: حضرت ابوالفضل العباس (ع) زبانحال ,
زبان شعر و شاعر: نوحه ترکی , کریمی مراغه ای
نظرات (۰)
هیچ نظری هنوز ثبت نشده است