متن نوحه ترکی مرحوم غمکش
مجموعه اشعار (متن نوحه) ترکی مرحوم غمکش که در مدح و رثای اهلبیت علیهم السلام سروده شده اند:
----
در احوالات حضرت زینب (سلام الله)
زینبم سولوب گللریم منیم
بو سولان گلستانه آغلارام
غصّه دن چاتوب جان دوداقیمه
گؤزیاشیم دؤنوب قانه آغلارام
من او بلبلم پرلریم سینوب
موسم بهاریم اولوب خزان
دائماً بلا باشیمه یاغوب
غصّه لر ائدوب قدّیمی کمان
چرخ کینه بیر لحظه وئرمیوب
بو بلا چئکن باشیمه امان
بحر غصّه و غمده دوشموشم
هر گون اؤزگه طوفانه آغلارام
بش یاشیمدا غمخانه بو دله
اولدی مصطفانون مدینه سی
عترتین فنا اولدی عزّتی
دشمنین عیان اولدی کینه سی
آتش بلا اولدی شعله ور
اودلانوب آنام سیندی سینه سی
یادیمه آنام دوشسه هر زمان
اوخشارام غریبانه آغلارام
ییرمی بش ایل القانه دؤندروب
قلبیمی بابامین محنلری
دینمیه کی دین صدمه گؤرمه سین
یاندی غصّه دن قلب مضطری
چاهه ایلدی دردینی بیان
اولمادی ز بس یار و یاوری
وای غریب عالم علی دئیوب
آغلارام او دورانه آغلارام
کوفه ده بپا ایلدی بابام
دولت صفا و عدالتی
سعی ائدردی راه شهادته
ایلسون هدایت جماعتی
اشقی الاشقیا ویردی باشینه
حیف اولا ستمله جراحتی
راه عدله قربان اولوب بابام
من او شاه مردانه آغلارام
قارداشیم حسنده غریب اولوب
عرصه گهده تک قالدی برملا
گؤرمدی وفا اهل کوفه دن
صلحه امر حقلن وئروب رضا
عاقبت قاییتدی مدینیه
مین مصیبته اولدی مبتلا
زهر اونا ایچیرتدی اؤز همسری
اودلانوب یانایانه آغلارام
قارداشیم حسینون غمی ولی
الدن آلدی صبر و قراریمی
کربلاده کوفه جماعتی
قانه غرق ائدوبدی او یاریمی
سو یانیندا لب تشنه جان وئروب
قان ائدوب دل زخمداریمی
جان یئتوبدی الان دوداقیمه
اول شه لب عطشانه آغلارام
عمرومی باشاباش غم و محن
دولدوروب منیم غملی سینمی
قلبیمه یارالار ویروب فلک
اولمیوبدی عالمده مرهمی
بیر یانا هامی غملریم ولی
بیر یانا حسین قارداشیم غمی
قبر ائوینده ده ایلرم نوا
سرور شهیدانه آغلارام
کربلا یادیمدان چیخار مگر
اوردا ائللریم دوغرانوب منیم
قاسمیم باتوب قانه سر به سر
نعش اکبریم دوغرانوب منیم
یددی شیر دل یددی باصلا
بَت برادریم دوغرانوب منیم
وای غریب حسینیم دئیه دئیه
گللم آه و افغانه آغلارام
مرحوم غمکش
منبع مجموعه کانالهای مدح و مرثیه
موضوع: حضرت زینب کبری (س) احوالات ,
زبان شعر و شاعر: نوحه ترکی , غمکش
-------------------------------
در احوالات حضرت زینب (سلام الله)
زینبون ئولور اللری قالوب
سینه سینده نالاندی یا حسین
سن گلن یولا شهر شامیده
دیده سی نگهباندی یا حسین
زینبون پریشاندی یا حسین
دفتر غمینده یازوب آدون
محضر علیده بیان ایده
گلستانی یاندی نئجه اَخا
غملی سوزلرین ارمغان ایده
گل هرایمه غملی قارداشیم
زینبون بو دنیانی ترک ایده
دل او عشقه قرباندی یا حسین
زینبون پریشاندی یا حسین
صبریمی الیمدن آلوب غمون
گل حسین بوگون بو دیاره سن
زینبی رضای حقه گوره
جان ویرور اخا آل کناره سن
نعشیمی الونله بو شهریده
عزّتیله گل قوی مزاره سن
گور وجودیم اوتلاندی یا حسین
زینبون جگر قاندی یا حسین
شامیده منیم یوخدی بیر کسیم
دردیمون دواسی الینده دی
گوزلریم یولوندا قالوب سنون
قانلی پیرهن ایندی منده دی
نه فقط بو «غمکش» گوزی اخا
عالمین گوزی ایندی سنده دی
شاعرون پریشاندی یا حسین
نوحه خوانلارون یاندی یا حسین
مرحوم غمکش
منبع مجموعه کانالهای مدح و مرثیه
موضوع: حضرت زینب کبری (س) احوالات ,
زبان شعر و شاعر: نوحه ترکی , غمکش
-------------------------------
زبانحال حضرت زینب (سلام الله) در حال احتضار
غربتده حسین جان وئرورم یولدا گؤزوم وار
دنیا بویی قارداش دل زاریمده سؤزوم وار
چوخ آغلاموشام ائللره بیر آغلیانیم یوخ
داغلی اورگیم اودلودی دل داغلیانیم یوخ
یوللاردا گؤزوم گؤزلریمی باغلیانیم یوخ
گؤزیاشیمی یوخدی سیلن حسرتله ئوزومدن
آگاه اولا سینمده کی پنهانی سؤزودن
تک گلمه اخی قاسم مه پیکریلن گل
لطف ایله ابوالفضل وفاپروریلن گل
قربانون اولوم قارداش علی اکبریلن گل
گل ائللریلن ائللریمه فخر ائلیوم من
هم قاسمه هم اکبریمه فخر ائلیوم من
آگه سن اؤزون قامتیمی دردون ائدوب خم
زلفیم آغاروب طاقتیمی دلدن آلوب غم
آخر نفسیمده گل اؤزون اول منه همدم
گلسون ئوزوی گؤرسم حسینیم دئیرم جان
غربتده ئولن زینب نالان سنه قربان
گل باشیمی دیز اوسته آل ای خسرو خوبان
گویلوم سنی چوخ ایستیوری آدوه قربان
جانیم یئتیشوبدی دوداقا گل اوخی قرآن
قرآن سسوه عاشقم ای نور دو عینیم
یاسین اورگیم دردینه درماندی حسینیم
گل گؤر سینم اوستونده بو پیراهنی قارداش
یاددان بیلوسن آتماموشام من سنی قارداش
گل حسرتیلن قبره اؤزون قوی منی قارداش
یولداش اورگین دوتسا محن یولداشی گؤزلر
بو رسمیدی جان اوسته باجی قارداشی گؤزلر
جان اوسته سنی قویمادیم اول عرصه ده تنها
گلدیم گؤزوی باغلادیم ای زادۀ زهرا
هر چند چتین اولدی منه اول غم عظمی
گل سنده بو غربتده منی ایله سرافراز
دفن ایله منی باش داشیما غملریمی یاز
مرحوم غمکش
موضوع: حضرت زینب کبری (س) زبانحال ,
زبان شعر و شاعر: نوحه ترکی , غمکش
-------------------------------
در مدح حضرت فاطمه زهرا (سلام الله)
هر قطره گلوب وصل بو دریا اولا بیلمز
هر قوزانان ال که ید بیضا اولا بیلمز
هر بی سر و پا حضرت موسی اولا بیلمز
داره چکیلنلر نئجه عیسی اولا بیلمز
نسوان جهان مریم و سارا اولا بیلمز
بونلار هامسی هئچ بیری زهرا اولا بیلمز
زهرانی خداوند ئوزی چوخ ایستیوب ایستر
شأنینده گلوب فاطمه نین سوره کوثر
طاهادی گرامی آتاسی عالمه سرور
هم کفو امام، همسریدور حضرت حیدر
یاز خامه خلاصه اونا یوخ دهریده بنذر
واضحدی بیان کیمسه مهیّا اولا بیلمز
نسوان جهان حضرت زهرا اولا بیلمز
روحیم قوشی پروازه گلوبدی ائدیم ابراز
زهرا آدی دیللرده ائدوب دائماً اعجاز
یازدیقجا بو شعری ائدورم گویلره پرواز
خیبرده علی که ایلدی حمله سین آغاز
یا فاطمه سسلندی او خورشید سرافراز
هر دارُالامان درگهی مولا اولا بیلمز
هر کیمسه گلوب حضرت زهرا اولا بیلمز
زهرا بئجرن اوغلان امام حسن اولدی
یثربده همان شاه امام زمن اولدی
آللهه گوره آخری خونین کفن اولدی
گلزار ولایتده سارالموش چمن اولدی
بعد از آتاسی صلح ایلیوب خط شکن اولدی
بو منصبه هر شخص که دارا اولا بیلمز
منظور بودی هر آنا زهرا اولا بیلمز
بیر اوغلی حسیندی اوجالوب کوی مناده
تعظیم ایلدی یئر گوی اونا کربوبلاده
بئل باغلادی آللهه گوره یعنی جهاده
امر ائتدی خانم زینبه نظم اُسراده
وور قورخما باجی تو دهنی ابن زیاده
زهرا قیزی تک بیر نفر حتّی اولا بیلمز
هر کیمسه گلوب حضرت زهرا اولا بیلمز
قلبیم باشی اودلاندی خدا دشمن الیندن
چکدیم حَضر اعدانین اگر چه من الیندن
قورتارمادی زهرا گلی اهریمن الیندن
یاندی دل عالم او عمود آهن الیندن
«غمکش» یانوری درده دگول ایمن الیندن
هر قطره نی یاز وصل بو دریا اولا بیلمز
عالم یغیشا حضرت زهرا اولا بیلمز
مرحوم غمکش
موضوع: حضرت فاطمه زهرا (س) مدح ,
زبان شعر و شاعر: نوحه ترکی , غمکش
-------------------------------
در مدح حضرت فاطمه زهرا (سلام الله)
عالم معرفته قطب نما زهرادی
جِرم های فلکه شمس ضُحی زهرادی
کُفوّی خلق اولمیوب عالمده به جز شاهِ ولا
دُرّ یکتای خدا کانِ حیا زهرادی
ائله بیر گوندی شاخوب عالم و مافیهاده
شرف و عزّت و انوار هُدا زهرادی
کیمده وار قدرت ائله مدح یازا زهرایه
مادحی روح الامین عالم آرا زهرادی
سنده وار همّت اگر ایله نظر قرآنه
شانینه آیه گلن کان سخا زهرادی
گلدی قرآندا اونون شانینه خاطر کوثر
هل اَتی نور هدا سرَّ خدا زهرادی
آتاسی ختم رُسُل همسر باب حسنین
کعبه دور یا که گورن مروه صفا زهرادی
بویوروب حضرت پیغمبر خاتم بو سوزی
افتخار و شرف آل عبا زهرادی
کیم اونی اینجیده آزار وئرور روحیمه چون
بندِ قلبیمدی منیم روح دعا زهرادی
غملی گونده قوتارار اُمّتی اوددان بو بالام
هامّی امراضه ائدن اوندا دوا زهرادی
آچاجاق شهپر ئوزی شیعه نی امداد ائلیه
او کی اللرده گلر قانلی لوا زهرادی
گرچه ظاهرده بشر صورتی واردی خانمون
یعنی سر قافلیه روز بقا زهرادی
لقبیندن بیری چون طاهره، حورا ، عذرا
زکیه، هانیه، اسباب جزا زهرادی
صفیه، عابده ، حُرّه خانمون القابی
چوخدی سایسام هدف اَرض و سما زهرادی
فائزه ، مریم کبرایه وئرن زیب و صفا
قاپوسین دوگ نئجه گور باب شفا زهرادی
عطیه ، طیبه و عاقله و عالیه دور
درگهیندن اگیل ئوپ خیر نساء زهرادی
جان عالم اولا قربان بو گوزل القابه
شیعه لردن ئوزی محشرده رضا زهرادی
آدی گویلرده یازیلمشدی اودی منصوره
آسمان اهلینه چون قبله نما زهرادی
دئمه کیمدی بو سوزی ثبت ائلیوب دفترینه
اوخی اشعاریمی هر درده دوا زهرادی
اونا بی واسطه عرض ایله ئورک مطلبینی
اوندا گور سنده سینیق قلبه جلا زهرادی
زهره ی بیت محمددی علینون جانی
نور آیینه دربار ولا زهرادی
بویوروبدی گر ئولم چکمرم ال مولادن
اللّهون راضی ائدن بحر سخا زهرادی
بو او زهرادی بلی سیّده نسواندی
معدن انجمن بَزم حیا زهرادی
بعد از اینکه آتاسی رحلت ائدوب دنیاده
گوزلری یاشلی قالان باشدا قرا زهرادی
غصب اولوب همسرینین حقّی آلشدی جگری
دین واسلامه دئدی جان به فدا زهرادی
فدکی گئتدی الیندن ئورگی غصّه لنوب
دئمدی کیمسه اوگون صاحب عزا زهرادی
هله پیغمبر اکرم تازا دفن اولموشیدی
موج غملرده ائدن بلکه شنا زهرادی
قاپوسی یاندی اولوب محسنیده سقط جنین
اوکی اولموشدی نشان تیر بلا زهرادی
شمع تک یاندی وجودی اریدی آخرده
ئوز ائوینده چوخ ائدن آه و نوا زهرادی
(غمکشا) فاطمه محشرده شفاعت ائتسه
رُقبا اوندا بیلر زمزمه یا زهرادی
یازمیشام روز ازلدن بو سوزی دفتریمه
چون طرفدار هامی اهل عزا زهرادی
مرحوم غمکش
منبع مجموعه کانالهای مدح و مرثیه
موضوع: حضرت فاطمه زهرا (س) مدح ,
زبان شعر و شاعر: نوحه ترکی , غمکش
-------------------------------
دراحوالات حضرت فاطمه زهرا (سلام الله)
و گریز به احوالات روز عاشورا
آغلاتدی زهرا غملرون اهل جهانی سر به سر
اون سکّیز ایل عمر ایلدون دنیاده اولدون خون جگر
ای بند قلب مصطفی وی روح آرام رسول
ای طیّبه، وی طاهره، صدّیقه، مرضیه، بتول
وی عصمت کبرای دین گنجینه سرّ اصول
اخلاق و حُسن و حرمتون درک ایلمز عقل بشر
ای معدن فکر و ادب کنز وفا نور عُقول
سرچشمه‌ی بحر حیا سرلوحه‌ی خط وصول
غملر توکولدی اوستوه محنتدن اولدون دل ملول
چکدی شرر غملر اوتی ایتدون نوا شام و سحر
جدّون امانت تاپشروب قرآنی اوّل اُمته
بعداً سنی اسلامیده بیلدی شرایط وحدته
باش اگمدون یا فاطمه حیدر مثالی ذلّته
الدن آلوبلار حقّوی توکدون یوزه اشک بصر
بین در و دیواریده جسمون قالان وقته سنون
جور ستمدن اود دوتوب درگه یانان وقته سنون
مجروح اولان سینونده قان جاری اولان وقته سنون
فریاده ایدوبسن فضّه ویر شیر خدایه تیز خبر
مسمارِ ظلمه آشنا سینون اولان وقته سنون
مین ناله‌ی شبگیرله قلبون دولان وقته سنون
جور و جفادن صورتون گل تک سولان وقته سنون
یا فاطمه یا فاطمه قانیله اولدون غوطه ور
طاها فراقینده گیجه گوندوز یانوب دل داغلادون
بیتُ الاحزنده سن خانم خلوتده ماتم ساخلادون
غصب اولدی حقی حیدرین سن هر مکاندا آغلادون
غصه سالوب حالدان حالا محنت ایدوب چوخلی اثر
ارث اولدی سندن زینبه محنتلی غملی ماجرا
سن قاره سالدون باشیوه زینب سالوب باشه قرا
اولدی ایشق گونلر اونا ظلمت سرا سندن صورا
گلشن سولوب بلبلرون سرگشته حیران سر به سر
عشقون یتوردی زینبی عشقیله عالی مکتبه
ایستر قلم وارد اولا بوردان بیر آیری مطلبه
آغلار گوزوم یا فاطمه قدّی خمیده زینبه
گور اللری باشدا نجه کربو بلا دشتین گزر
اوخ نیزه و شمشیرلن دشمن توکولدی صف به صف
دورت سمتیدن جسم حسین اوخلارا اولموشدی هدف
بیر یاندا سقا اللری سو مشگی دوشموش بیر طرف
بیر یاندا ایوای اکبریم لیلای مضطر سسلنر
حَلق علی اصغر نشان اوچ شعبه لی پیکان اولوب
بیر یاندا قیزلار تشنه لب گل مثلی ماتمده سولوب
کلثوم زینب گوزلری ابر بهاران تک دولوب
بیر یاندا قیزلار تشنه لب هم زینب خونین جگر
آواره قیزلار زینبه الله بیلور وابسته دور
چون هامّسی بو گردش اَیامیدن دل خسته دور
قولار خدایا رحم ایله بند طنابه بسته دور
اهل حرم آواره‌دور گوزدن توکولّر اشک تر
یاندی آلیشدی خیمه‌لر غوغا اولوبدی بر ملا
قانیله رنگین اولدی تا اُول سرزمین کربلا
اهل حرم ال سینه‌ده یکسر اولوب غرق عزا
افلاکه ساری غم اودی اوردان اولوبدی شعله ور
عریان جنازه اوستونه توز قوندی یا صاحب زمان
آغلار قالوبدی انبیاء روحی اوچولده هم زمان
اکبر سسی گلمور دیدی زینب اودم وقت اذان
لیلا، رباب، اهل حرم، اوندا اولوبدی دیده تر
«غمکش» بو روضه آغلادار مجلسده اهل ماتمی
سعی ایله دیلده یر آچا مولا حسینون هر غمی
سایه سالوبدی باشلارون اوسته بوقاره پرچمی
گوز یاشینی شاعر ئوزی باران کیمی گوزدن اَلَر
مرحوم غمکش
منبع مجموعه کانالهای مدح و مرثیه
موضوع: حضرت فاطمه زهرا (س) احوالات ,
زبان شعر و شاعر: نوحه ترکی , غمکش
-------------------------------
زبانحال حضرت فاطمه زهرا (سلام الله)
من فاطمیم نوگُل گلزار پیمبر
من فاطمیم معنی قرآنه مصوّر
من فاطمیم کَنز دُر لؤلؤ و گوهر
من فاطمیم نور حق و احمده مَظهر
نازل ایلیوب شأنمه حق سورۀ کوثر
اسلامی سالوب نظمه همان باغلانان اَللر
ثانی آپارور مسجده یوخدور اونا یاور
تهدید ایلیور اهل ستم حقّی مکرّر
قُنفذ اَلینین ضربه‌سی سالدی منی دلدن
جبریله کنار ایله‌دیلر بلبلی گُلدن
من فاطمیم بند دل ختم رسالت
من فاطمیم رمز معمّای ولایت
من فاطمیم شعشعۀ نور هدایت
من فاطمیم مام حسین و حسنم من
قلبیم سیخیلوب غرق ملال و محنم من
من فاطمیم حسرت سایه‌مده‌دی طوبا
آللّه ایلیوبدی منی انسیّۀ حورا
فاخردی منه آسیه و مریم و سارا
بازولریمه قمچی وُروب دست شقاوت
سیلی ویریلوب قان گوزیمه دولدی او ساعت
چکدوم نه جفا و نه ستم دست ستمدن
دینجلمدی بیر لحظه دلیم غصّه و غمدن
مسمار باتوب سینمه قان آخدی سینمدن
اظهار ایلدی دلده اولان کینه‌نی ثانی
قویدی در و دیوار آراسنده منی ثانی
ثانی ستمکار اَلینین قدرتی چوخدور
افسوس اولا زهرا او قدر طاقتی یوخدور
من فکر ایلدوم سیلی دگول زهرلی اوخدور
دوشدوم یوزوم اوسته ایله بول گیتدیم اوزومدن
گوزیاشی آخوبدی یوزیمه قانلی گوزومدن
دینه گوره اولدوم بیله پهلوسی شکسته
لای لای چالارام مُحسنه من با دل خسته
خون دلی جاری ایلدیم اشک تر اوسته
سسلندوم آمان فضّه یتیش داده گلن یوخ
تیز سسلن عم‌اوغلوم گله فریاده گلن یوخ
من فاطمیم صاحب اخلاق و کمالم
دارای حجاب و شرف و شأن و جلالم
یتمش ایکی گون مونس غصّیله ملالم
بازوی کبودم اودور افسرده جمالم
فکر ایلورم آیندیه آزرده خیالم
درگاهمه اود وُردی او شورای سقیفه
یاندوردی دل عترت اطهاری سقیفه
تصدیق ایلیوب شأنیمی آیات شریفه
نازلدی حق اوصافیمه آیات مأوّل
پامال ایلدی جمله حقیم ثانی و اوّل
بیر منظره گوردوم او منی ایلدی دلگیر
قول باغلو عم‌اوغلوم دایانوب دورده شمشیر
آلمیشدیلار اطرافینی انصار و مُهاجر
تنظیم ایلدی دامنی صیاد جفاکار
ناگه تاپوب اَل شیر حقه روبه مکّار
قرآنیله قرآن اوخویان ایلوری تزویر
اوز رأینه هرکس ایلیوب ترجمه تفسیر
تاویل و نزولینده ویروبلر اودی تغییر
ای مُنتظر منتظران یولدادی گوزلر
قانیله دولوب شیعه‌لرون قلبی سراسر
ای دادگر اول بین حق و باطله داور
اقرار ایله‌سون حقّوی انکار ایلینلر
دلشاد اولا گوز اشگنی رویه اَلینلر
تا اولمیا قرآن اوخویانلاردا رقابت
اجرا اولا هر منطقه‌ده امن و امانت
قرآنیله حکم ایله اَیا شاهد و مشهود
وی ذات حقه مظهر و هم عابد و معهود
گَل قویما اولا جدّوین آثارنی مفقود
گل قویماگیلان ظالم ایده گونده جنایت
طغیان ایلین ایتمیه تکرار خیانت
سن هر نه قدر گلمیه‌سن خواردی شیعه
هرچند حضورونده گنهکاردی شیعه
زهرایه گیجه گوندوز عزاداردی شیعه
سن شیعه‌نین امّیدی سن ای رهبر والا
الغوث و اَمان درک ایله یا سیّد و مولا
«غمکشده» ایدور گوزیاشی رخسارینه جاری
محنتله محنله قوتارور لیل و نهاری
هر اشک توکن گوز اولا قربان سنه باری
تعجیله دعا ایله سن ای صاحب و حجّت
دنیایه سالوب ابر بلا سایۀ ظلمت
مرحوم غمکش
منبع مجموعه کانالهای مدح و مرثیه
موضوع: حضرت فاطمه زهرا (س) زبانحال ,
زبان شعر و شاعر: نوحه ترکی , غمکش
-------------------------------
در مدح حضرت زینب (سلام الله)
مهر رخشان رسالت در مدار زینب است
ماه تابان ولایت وامدار زینب است
عصت او جلوگاه عصمت زهرا بُوَد
هم عیار عصمت کبری عیار زینب است
بانوان شیعه گر اسطوره های عفّتند
عفّت ایشان در عالم یادگار زینب است
مرده باد آن زن که باشد شیعه امّا بی حجاب
آری آن زن در دو عالم ننگ و عار زینب است
او اسیر ظلم گشت و عفّتش را حفظ کرد
حفظ عفّت حفظ حیثیّت شعار زینب است
انقلاب کربلا از همّتش جاوید شد
این حسینیّت که بینی شاهکار زینب است
مرحوم غمکش
منبع مجموعه کانالهای مدح و مرثیه
موضوع: حضرت زینب کبری (س) مدح ,
زبان شعر و شاعر: نوحه فارسی , غمکش
-------------------------------
در مدح حضرت زینب کبری (سلام الله)
ائمّه نین شرف و افتخاری زینبدی
یقین او طایفه نین اعتباری زینبدی
رقیّه نین او خرابه مکاندا باور ایله
الی باشیندا قالان بی قراری زینبدی
بویوردی قارداشیمون قانین ایلرم احیاء
علی و فاطمه نین یادگاری زینبدی
خرابه ده باش اوجالتدی او عرش اعلایه
تانیتدیران بیزه پروردگاری زینبدی
گویون ملکلریده فخر ایدر اونون آدینا
حسینینون او زمان غمگساری زینبدی
یتردی اوجه خانم خطبه سینده ایثارین
گورن دیوردی علی ذوالفقاری زینبدی
قلم دایاندی الینده یازانمادی «غمکش»
که یعنی آل علی داغداری زینبدی
مرحوم غمکش
منبع مجموعه کانالهای مدح و مرثیه
موضوع: حضرت زینب کبری (س) مدح ,
زبان شعر و شاعر: نوحه ترکی , غمکش
-------------------------------
استمداد از حضرت امام زمان (عج)
ای امّت طاهایه کرامت گتورن گل
بو خلق آرا عالمده سعادت گتورن گل
یئر اوسته قالان حکمی گل ایت تازه دن آغاز
باشلار اوجالا عرشه دوباره ایله اعجاز
درمانده لری لطفویله ایله سرافراز
عاشق لرون اولسون آقا هر یاندا هم آواز
ای شیعه لره شأن و شرافت گتورن گل
چاره یولی اولسون او گوزل اللریلن باز
ویر تعزیه داره آقا بیر رتبة ممتاز
اوچ یوز اون اوچ افسردی سنه چون هامی سرباز
سربازووه قربان سنه قربان دل جانباز
هفتاد و دو عشّاقه عبارت گتورن گل
ای خسرو دین کعبده گل نصب ایله پرچم
سن بو یارالی قلبلره قوی آقا مرهم
وور آل سعوده سن ئوزون سیلی محکم
امر ایله ووراق ای شه دین عالمی برهم
ای دیده لره نور هدایت گتورن گل
آهیله یانان سینه لره دللره خاطر
پربسته و پر سوخته بلبلره خاطر
گلشنده چمنده سارالان گلّره خاطر
یاندی دلیموز لاله و سنبلّره خاطر
ای گلشن و گلزاره طراوت گتورن گل
گل گور نئجه ناکسلر دون فتنه سالوبدی
افلاکه حزین سسده کی یردن اوجالوبدی
الله ائوی بو گونلر اسارتده قالوبدی
اطراف مسلمانی یهودی لر آلوبدی
مظلوم اولان افراده جلالت گتورن گل
ای سرو خرامان گلستان پیمبر
ای منتقم خون دل حضرت حیدر
ای شیر غضنفر فر حقّ میر دلاور
ای بند دل نرگس خاتون مطهّر
ای قلبلره شوق محبّت گتورن گل
یول گوزلیوری کربوبلاده شه عطشان
ایکاش گورک بیر او گونی خسرو خوبان
میداندا دو پهلو قلیجون بیر سالا طوفان
دشمن لر اولا جمله او میداندا هراسان
یول گوزلیوروک دُرّ ولایت گتورن گل
قان اولدی یانان دیللریمیز، دینین عمودی
کور ایله سون الله گوروم چشم حسودی
یازدیم سنون عشقونده آقا من بو سرودی
قول باغلی گتور ایرانا سن آل سعودی
ای شیعه لره وعدة جنّت گتورن گل
عمّون آقا جان زینب مضطر سنی گوزلور
گوز یولدا قالوب حضرت حیدر سنی گوزلور
القانه باتان قاسم و اکبر سنی گوزلور
شش ماهه باخور یولاّرا اصغر سنی گوزلور
قربان او گلن یولاّرا نعمت گتورن گل
«غمکش» اورگی یاندی فراقونده کول اولدی
عشقون حاجیسی گل کیمی سولموش گوگل اولدی
چوخلار گل ئوزون گور قوناقیندان خجل اولدی
عاشق سنون عشقونده نجه غملی دل اولدی
ای الده ئوزی حکم قضاوت گتورن گل
غمکش
موضوع: حضرت امام زمان (عج) ,
زبان شعر و شاعر: نوحه ترکی , غمکش
-------------------------------
مدح حضرت فاطمه زهرا (سلام الله)
من فاطمیم دهریده اولدوم گل خلقت
کوثر لقبیم دختر پیغمبر رحمت
دنیاده منیم یوخدی حقیقتده مثالیم
جبریله قانات وئردی جهاندا پر و بالیم
عالمده اولان گوهر نایاب کمالیم
من فاطمیم فخر وجود بشریّت
خیرالبشرین شمس و هما سایه سیم من
قرآندا گلن معجز و سرمایه سیم من
گل واژه و دُردانه کاشانه سیم من
گورمز منیم امثالیمی دنیای طبیعت
من نور تجلّا و رُخ عرش برینم
سینه سپر شاه ولا نور مُبینم
در خدمت اسلام و ئوزوم پیرو دینم
مولادی منه هر دو جهان شاه ولایت
الله ئوزی بیر رتبه وئروب شاه ولایه
بیر نوریدی حیدر اونا یوخ دهریده سایه
اُمّتدن ائدر فاطمه محشرده گلایه
شاهدّی اوگون فاطمیه دین و دیانت
عالمده اولان وحی ائوینه واقف اسرار
تعریف اولونار سنله یقین عترت اطهار
تأیید ایلیوبدی بیزی خالق ئوزی کرّار
هر کیمسه بیزه ایتسه محبّت آلار اُجرت
سسلردی بابام آدیمی مرضیّه و زهرا
گه بضعة منی دئدی گه اُمّ ابیها
غرق ایلیه بیلمز بو آدی موجلی دریا
خوار ایلیه بیلمز بو آدی خار رعیّت
آینده دن الله بیلوری باخبرم من
من فاطمیم گلشن دینه ثمرم من
نسوانه جهاندا یارانوب تاج سرم من
انواریمی خاموش ائده حاشا بئله ظلمت
«غمکش» غمی افزوندی وفا ائتمدی امّت
اوچ شخصه دئیور دهریده گلسون بئله لعنت
اونلار ایلدی غصب فدک اولدی خیانت
زهرا دوگولوب اولدی غمین شاه ولایت
مرحوم غمکش
موضوع: حضرت فاطمه زهرا (س) مدح ,
زبان شعر و شاعر: نوحه ترکی , غمکش
-------------------------------
در شهادت حضرت امام حسن عسکری (علیه السلام)
عراقه ایله نظر ملک سامرا گورونور
حرم وار اوردا گوزه مثل کربلا گورونور
بیرینون آدی نقی دی بیرینون آدی حسن
فدا اولوم اولارا گور نه آشنا گورونور
سلام عرض ائدورم منده ملک ایراندان
اورکلرینده بو مولالرون یارا گورونور
ارادتیم بولارا چوخدی شاهدیمدی خدا
بو گوزلره حرم آل مصطفی گورونور
امام هادیدن اذن ایستورم عزاداران
یازام که دردی اولان لار بئله دوا گورونور
لواسی دست شفا بخش دی سالوب سایه
یقین بو باشلارون اوسته سایه لوا گورونور
اجازه وئرسه گریزیم منیم نتیجه آلار
حسن عسکری حتماً نظر بو شعره سالار
امام یازدهم باشدان آتدی دنیانی
سالاردی حیرته خلقی او روح رحمانی
گتیردی دشمن دین پادگاندا یئر وئردی
واریدی دورت طرف اطرافیده نگهبانی
مباد شیعه لریله تماس دوتسون امام
حقیقتاً ئوز ائوینده اولوبدی زندانی
فقط بالاسی امام زمان بیلور نه چکوب
حسن عسکری میل ایلدی جگر قانی
گئنه تحمّل اونی ائتمدی جری دشمن
امامی ئولدوره سعی ائتدی نفس شیطانی
تهیّه ائتدیله زهر جفانی گرچه ظالملر
گجیه اوخشادی عالمده ماه تابانی
غرض یتیم ایله دی شیعه نین گوزل آقاسین
آلوبدی جسم حسندن توان و یارانی
چاغیردی گل بالا مهدی به اذن حضرت حقّ
اوشاق بویوک بیزه لازمدی فیض قرآنی
سنون وجودوی الله ئوزی ائدر پنهان
منه چوخ آغلاما اوغلوم دوباره پنهانی
غریب جدّیمه هر یئرده قورسالار مجلس
گیت اوردا آغلا قبول ایله بو تمنّانی
عنایت ایله بیزیم شیعه لر مریض اولسا
طبابت ایله اوغول مهدی خلقی مجّانی
جلالیله بالا تاپشور مزاره پیکریمی
مزاره قویدولا جسم شریف مولانی
کفن اونا گوزل اوغلی فراهم ائتمیشدی
یادیما سالدی بو یئرده شه لب عطشانی
قوشون چوخور یئره دوشجک امامی دوره لدی
آلوبلا مور و ملخ تک او قانلی صحرانی
گلن ووروبدی گئدن ووردی یاره پیکرینه
چاغیردی زاده حیدر آناسی زهرانی
امیدی بیر فقط عبّاسیدی یامان گونده
اونی شهید ایلدی امّت جفا کانی
نه سس وئروب اونا اکبر نده جوان قاسم
ووروبلا ظلمیله اوتلاندی قلب سوزانی
ورق ورق ائدوب اعدا مثال قرآن تک
ائدوبله گور نئجه غارت او تشنه قربانی
او کهنه پیرهنی چوخ گوروبله مولایه
قالوبدب گون قاباقیندا او نعش عریانی
بالاسی زینُ العبا یئر گویی ائدوب تسخیر
گلوبدی علم امامتله شمس نورانی
بویوردی بونلاری قوم بنی اسد تانورام
گلون مزاره قویاق پیکر شهیدانی
نه نوعی تپراقا تاپشوردولار رجوعیم یوخ
کنار علقمه ده جسم پاک سقّانی
سوسوز ئولن آقاما بیر مکاندا یر وئردی
گوزل مزارینه کیم باخدی اولدی نالانی
سوروشدولار ندور علّت که آلتی گوشه سی وار
بویوردی حلّ ائدرم ایندی بو معمّانی
ایاقی آلتدا جوان اوغلی دفن اولار بو شهون
همین جواندی که عاشق ائدر جوانانی
و بیرده حضرت سجّاد امامتون قمری
گوروبله باغرینا باسدی او نعش بابانی
دئدی بابا کسیلن حنجره جانیم قربان
گئدوبدی غارته انگشترون الون هانی
هایاندادی علی اصغر جنازه سی بابا جان
بویور اونی گتیروم آغلادیم محبّانی
گزوبدی تاپدی ربابین گولین امام رئوف
ائدوبدی خلقی مخاطب اوجالدی فرمانی
بویوردی یوخدی کفن ایندی بوریا گتیرون
کفن ائدیم باباما منده لیف خرمانی
حلال ایله منی، خامه یازوبدی بی پرده
یانان دلیم منی وادار ائدوبدی بیر آنی
دولاندی قبر حسینون بنی اسد باشینا
رضای حقّه گوره راضی ائتدی جانانی
یازا یازا آقاما روضه منده آغلامیشام
باغیشلیون منی بو مطلب اولدی طولانی
فقط بو بنده گوره وقتوزی آلوب «غمکش»
بوکوبدی دفتری یوخدی بیر آیری امکانی
مزاره قویدی نئجه بیر فقط بیلور الله
قاریشدی تپراقا یا رب بوغازینون قانی
سوروشدی کوفه ده اهل و عیال آل الله
امیریموز بی بی جان یوخدی سویله جریانی
دئدی گئدوبدی قویا قبره تشنه قارداشیمی
همان او سوزدی او گون آغلادوبدی طفلانی
مرحوم غمکش
موضوع: حضرت امام حسن عسگری (ع) احوالات ,
زبان شعر و شاعر: نوحه ترکی , غمکش
-------------------------------
شهادت حضرت امام حسن مجتبی (علیه السلام)
کفن ائدوبدی خلاصه شه زمن حسنی
غرض او طایفه دن اوخشادی گلن حسنی
باجیسی زینب کبرا جهانی آغلاتدی
گورونده تا اولوب اوندا خون کفن حسنی
جنازه سین یولا سالدی او باغریقان باجیلار
گوروبدی چوخ او جلایله گلوب گئدن حسنی
نشانه ائتدی او دست کمانیلر بیر بیر
نه حاله سالدی اودم قوم اهرمن حسنی
دئیوبله قان توکروک تپراقا بو مأواده
اگر چه روضه طاهاده دفن ائدن حسنی
امام حسین بویوردی حسن وصیّت ائدوب
مباد جنگ ایلیم قیترون علن، حسنی
بقیعه دفن ایلیون قان توکولمه سین باری
زیارت ایلیه باری گلوب گئدن حسنی
مرحوم غمکش
موضوع: حضرت امام حسن مجتبی(ع) احوالات ,
زبان شعر و شاعر: نوحه ترکی , غمکش
-------------------------------
در احوالات حضرت امام حسن مجتبی (علیه السلام)
جلوه گاه عشقیده ای عاشق دادار حسن
عشقوه عالم فدا ای مرتضی رفتار حسن
پای وئروب الله سنی اوّلده مولا حیدره
صبر دریاسی گوزل مولا گوزل گفتار حسن
عاشق صادق سنی مولا تانور مثل حسین
ای حسینه غملی قارداش ای حسینه یار حسن
سن رموز عشقیده یثربده طوفان ایتموسن
باش تاپوب عرفانی هرکس درک ائدوب هر بار حسن
ای صلابت کوهی استاد حسین ابن علی
زینت آغوش زهرا زینت دربار حسن
جام عشقوندن ایچن عاشقلری مست ایتموسن
زینب کبری اولوبدی عشقووه بیمار حسن
هر یانا سنله حسین قویدوز قدم ای مقتدا
زینب ئوپدی ردّ پایوزدن که وار اخبار حسن
روزگارین یوخدی اوّلدن وفاسی عاشقه
ئوز عیالون اولدی دشمن ای گل بی خوار حسن
بیر بئله یارین گوروم الله یوزی هئچ گولمه سین
اولدی آخر ئوز ائوینده گور نئجه غدّار حسن
معرفت دریاسینه رحم ائتمدی بیگانه لر
سولدی گل تک ئوز ایوینده رهبر احرار حسن
بی کفایت اُمّتین رفتارینه حیرتدیم
امر واجبدی گرک اوچ شخصه لعنت ایلیم
اوّلین خائن بو دنیاده جنایت ایلدی
دوّمین خائن بو اسلامه خیانت ایلدی
سوّمین ظالم اولارداندا بَتر ظلم ایلیوب
دین و اسلامین رداسین بلکه غارت ایلدی
هر نه اونلار ایلیوب آل امیّه اورگشوب
مجتبایه بی حیالر چوخ حسادت ایلدی
جُعدنی سالدی کمند و بند ابلیسه اولار
بی وفا عورت دنی اولدی خباثت ایلدی
زهر مهلک آیری کشوردن فراهم ایتدیلر
بی حیا زن زهری پنهانی نه مدّت ایلدی
بیر گئجه سو کوزه سینده حلّ ائدوبدی فتنه جو
خانه‌ی ایمانی ویرانه او ساعت ایلدی
مجتبی بیدار اولوبدی نصف شب سو میل ائده
میل ائدوب سو کوزه دن قلبین جراحت ایلدی
قیتروب قان یاندی اکبادی آلیشدی لبلری
زهر جانکاه ستم جسمه اذیّت ایلدی
سسلنوب زینب یوبانما تئز یتیش امدادیمه
سن چاغیر گلسون حسینیم تیز باجی فریادیمه
الغرض گلدی حسین گوردی همان قارداشینی
آلدی آغوشه او دم قلبی یانان قارداشینی
سسلدی قربانون اولاّم مجتبی منله دانیش
لبلریندن سو کیمون قانی آخان قارداشینی
پاره پاره گلدی لبلردن گورور خون جگر
گتدی آخرده دیله قدّی کمان قارداشینی
بیر وصیّت ایلدی مظلوم عالم مجتبی
صبره دعوت ایلدی اول باغریقان قارداشینی
امر ائدوبدی یا حسین ئوز همسریمدی قاتلیم
آغلادوبدی دردینه ئوز نیمه جان قارداشینی
قوی قالا دردیم اورکده ای امیر کربلا
دیندروبدی آخرین دم همزمان قارداشینی
اهل بیتمیدن بویوردی اول مواظب یا حسین
ایستدی بیرده حضوره قهرمان قارداشینی
قاسم و عبداللهیم نوکردی قارداشیم سنه
آغلادوبدی نصف شب اول مهربان قارداشینی
وورسالار اوخ نعشیمه شمشیر چکمه یا حسین
مجتبی نین ساخلا باری پهلوان قارداشینی
کربلاده آبیاری ایله قرآن ملکونی
گلشن و گلزاره دوندر دین و ایمان ملکونی
مرحوم غمکش
موضوع: حضرت امام حسن مجتبی(ع) احوالات ,
زبان شعر و شاعر: نوحه ترکی , غمکش
-------------------------------
زبانحال حضرت امّ کلثوم (سلام الله)
در اربعین
مظلوم آتامون اوغلی حسین جان سنه قربان
سس ویر باجووا ایندی گلوبدی سنه مهمان
دور گور نجه آغلور سنه آواره سکینه
نوحه دیموشم من سنه ای شاه مدینه
قیزلار سنه ویرانه ده چوخ داغلادی سینه
دیندیر علی اصغر آناسین ای شه عطشان
آرامیمی الدن آلوسان غملی زماندا
گوردوم سنی بیر حالدا لب عطشان بو مکاندا
اوخلار دیله گلمیشدی قلیجلاردا یاروندا
آیا نجه‌دی یاره‌لرون تک تکی الان
کلثوم ابوالفضلیمه خاطر قوجالوبدی
قارداش بالا قیزلاروی اطرافه آلوبدی
گوردوکجه باجون زینبی دردی چوخالوبدی
ووردی بیزی یولاردا اخا فرقه عدوان
جانلار ایاقون آلتدا یاتان اکبره قربان
بو عالم هستی او علی اصغره قربان
علقمده یاتان دلبر و سرلشگره قربان
عُمروم نقدر وار اولارام زار و پریشان
«غمکش» الینه دفتر آلوب باتدی عزایه
قسمت اولا حتماً گلجک کربوبلایه
آغلار حرم عترت شاه شهدایه
قیل روز قیامتده اونون دردینه درمان
مرحوم غمکش
موضوع: احوالات اربعین ,
زبان شعر و شاعر: نوحه ترکی , غمکش
-------------------------------
در احوالات حضرت رقیه (سلام الله)
الهی شام ویراندا گُل گُلزاری دفن ایتدیم
قرا معجرله اول دُخت شه ابراری دفن ایتدیم
بالام لای لای بالام لای لای
رقیّم وای رقیّم وای
باجون زینب ابوالفضلیم فراقونده یانار آغلار
اونا بو شهر غربتده یانار دیلدن عزا ساخلار
گوزوم اشک عزا توکدی عزاداریم قرا باغلار
سنون عشقونده بیمارم گل گُلزاری دفن ایتدیم
جفای ساربان گوردی منیم تک باغریقان اولدی
گل گلزاری آل الله حسین جان نیمه جان اولدی
سنون رأسون گورن وقته رقیّم ناتوان اولدی
بیله فکر ایلدیم قارداش عزیزه یاری دفن ایتدیم
قرا گوزلر آخان وقته یوزون قویموشدی دیواره
باجوون هجرونده اودلاندی الینده قالمادی چاره
سنون تک یا حسین حسرت باخوردوم منده قیزلاره
خرابه گوشه‌سینده من گل بی خاری دفن ایتدیم
ستارم آخدی من باخدیم دل ویراندا آی قارداش
نوالی کاروانیله رقیّم ده گلیدی کاش
رضائی آغلیور دائم توکور چوخ دیده دن گوزیاش
زبانحال ایدوب نوحه قالان آثاری دفن ایتدیم
مرحوم غمکش
منبع مجموعه کانالهای مدح و مرثیه
موضوع: حضرت رقیه (س) احوالات ,
زبان شعر و شاعر: نوحه ترکی , غمکش
-------------------------------
در مدح حضرت علی (علیه السلام)
و گریز به احوالات حضرت امام حسین (علیه السلام)
قلم اوّلده یاز شیطانه لعنت
اونون باشینده کی اعوانه لعنت
سورا یاز منکر قرآنه لعنت
علی حقّین دانان نادانه لعنت
او اوچ نامرد بی ایمانه لعنت
ابوبکر و عمر عثمانه لعنت
پس از طاها آچیلدی ال خلافه
چاتوب احزاب باطل ائتلافه
اولوب دارالفتن، دارالخلافه
عوام امّت چکیلدی انحرافه
علی شمشیرینی قویدی غلافه
قاپوسین یاندیران دونانه لعنت
علی عادل ترین رهبردی والله
علی جانان پیغمبردی والله
خلایقدن علی برتردی والله
دل کفره بو سؤز خنجردی والله
علینون دشمنی کافردی والله
علینی سویمین انسانه لعنت
علی فرهنگی فرهنگ شرفدی
ولایتسیز قیزیل، یونگول خذفدی
هواداران حیدر جان به کفدی
ابو اشعردی هر کس، بی طرفدی
ولایتدن قاچانلار ناخلفدی
منافق نشر ائدن اعلانه لعنت
دئیور دلده علی خواهم علی خواه
عملده لیک اولور ثانیله همراه
غدیره شکّ ائدور از روی اکراه
اولور ضدّ ولایت گاه و بی گاه
بو خائندی نه روشنفکر و آگاه
دئنن فرهنگ بوسفیانه لعنت
بیری مین ایل ائده عمر عامیانه
هر ایل حجّه گئده بیت الامانه
چیخا مین دفعه قرآن، یانه یانه
باتا بین صفا و مروه قانه
ولایتسیز یولی یوخدی جنانه
علی راهین کسن رهبانه لعنت
ولایت شعری هر آهنگه دوشمز
علی چی مبتذل فرهنگه دوشمز
ولایت کاروانی لنگه دوشمز
لکه آئینۀ بی زنگه دوشمز
طرفدار علی مین رنگه دوشمز
وهابیّون یازان عنوانه لعنت
اولار کی ملّتین قانین سوروللار
تظاهر ایلیوب خلقی یوروللار
نمازه اوّل صفده دوروللار
امام ئولدورماقا شورا قوروللار
فقط دیلده دم از مولی ویروللار
یالان منطق یالان برهانه لعنت
مسبّب اولدی آرای سقیفه
خلافت چاتدی حکّام کثیفه
یول اگدی ییرمی بش ایل، اوچ خلیفه
قوی تحمیل ائدوب رأیین ضعیفه
غلط شرح اولدی آیات شریفه
غرور و فتنه و طغیانه لعنت
او مدّتده داغیلدی دین بساطی
علی گلدی دوزلده کج صراطی
قیریلموشدی ولایت ارتباطی
چئکوب سین جیمه هر بی انضباطی
زبیرین طلحه نون گئتدی نشاطی
زراندوزان نافرمانه لعنت
جماعت گؤردی عادلدی بو قاضی
ائدور ایتامه تقسیم اراضی
اولوب خلع شرف اشراف ماضی
چوخالدی زورگولر اعتراضی
بلی بیداد اولماز داده راضی
دئنن اندیشل بطلانه لعنت
همان نامردمان سست پایه
اولوب دشمن علی المرتضایه
خیانت ائتدیلر شاه ولایه
او شاهی سالدیلار درد و بلایه
سؤزی سال مغزوه گئت کربلایه
دئنن اشرار هم پیمانه لعنت
حسین ئوز دوتدی قوم ظالمینه
بویوردی دشمنه شاه مدینه
ندن خنجر چئکوبسوز قتل دینه
دئدیلر سبط ختم المرسلینه
علیدن قلبیمیزده واردی کینه
او نامردان بی وجدانه لعنت
مجوّز اولدی فتواسی شریحین
ییخیلدی رکن ایمان خانۀ دین
دئدیلر خارجی دی سبط یاسین
حسینون ئولدوروبلر اقرباسین
توکوبلر قانینی اول فرقۀ کین
ستم پیشه، جفاجویانه لعنت
حسینی نیزه لر بیر حاله سالدی
دئیرسن گلستانی صرصر آلدی
بدن یئرده باشی اللرده قالدی
خانیم زینب یاریم گونده قوجالدی
دئدی ای وای حسینیم بو نه حالدی
وفاسیز فرقۀ عدوانه لعنت
غرض مقتلده باتدی ماه مکتب
اورکلر کاسه سی دولدی لبالب
چاتوب مژده یزیده ئولدی مذهب
ائدوب محکم قراسین باشدا زینب
اولوب حاضر اونی ائتسون مخاطب
دئسون آل ابوسفیانه لعنت
مرحوم غمکش
منبع مجموعه کانالهای مدح و مرثیه
موضوع: حضرت علی (ع) مدح ,
زبان شعر و شاعر: نوحه ترکی , غمکش
-------------------------------
احوالات دیر راهب
لطف ایلسه گر ذات حق خامم گؤزل عنوان یازار
عشقیله سسلر یاحسین هر دم ائدر افغان یازار
پروانه لر شمع آختارار شوریده سر بلبل چمن
بزم عزای حضرت سلطان مظلومانی من
دلبر فراقینده اولار دلداده آماج محن
گؤزیاشی رخساره آخار هر آن غم هجران یازار
قلبیم اولوبدی غصّه دن مین ابتلایه مبتلا
سودای عشقیلن واریم گوندوز گئجه آه و نوا
ذکریم بودی صبح و مسا آی کربلا آی کربلا
لوح دله کرببلا عنوانی نی هر آن یازار
عشق حسین ابن علی سرمست ائدوب عالملری
جان جهاندی بو حسین اهل وفانون سروری
نور دو عین فاطمه شیرخدانون دلبری
دیوان عشقه آدینی اهل شرف سلطان یازار
شمع سعادتدی ویرار باشینده پر پروانه لر
سوگینده گؤزلر صورته چون ابر غم باران الر
تک شیعه لر یوخ عشقینون شیداسی دی بیگانه لر
باخسون مورّخلر اونی شاهنشه خوبان یازار
چیخدی ائلیکی کوفه دن شامه ساری اول کاروان
محمللر اوسته بانوان چولدن چوله اولدی روان
آل رسوله خولی و شمر سنان دی پاسبان
آل علی نون حالینی شاهدلر اشک افشان یازار
طول مسیر شامیده یئتدی حرملر بیر چوله
اول غملی چولده ایلدی اتراق او غملی قافله
طوفان زده کشتی کیمی یئتدی او دمده ساحله
بیر دیر او چولده، صاحبین راوی قوجا رُهبان یازار
راهب باخاردی دیردن صحرایه ایلردی نظر
بیر توز نمایان گؤردی اول صحرانی دوتموش سربسر
بیر آز دایاندی تا او توز گئتدی کناره مختصر
دوشدی گؤزی بیر لشکره ایلردیلر طغیان یازار
باشلار جدالرده باتوب القانه چون ماه منیر
بیر باش قاباقدا شمسیدن آرتوق تجلّی ایلیر
بیر عدّه عریان ناقه لر اوستونده قول باغلی اسیر
غملی اسیرانی کتاب غصّه ده نالان یازار
لشکر او صحراده انوب اخیامی برپا ائتدیلر
صندوقلرده باشلاری اندیردیلر گیزلتدیلر
زهرا عزیزی زینبی آه و فغانه گتدیلر
غمدن کشیده قامتین کلک عزا چوگان یازار
القصّه گون باتدی بوتون صحراده گؤزلر یوخلادی
شمر و سنان و حرمله، زجر ستمگر یوخلادی
بیر عدّه سی اولدی کشیک، بیر عدّه لشکر یوخلادی
اول کینه جو فاسق لری تاریخ هم پیمان یازار
راهبده یاتدی بیر یوخی امّا گؤروبدی نیمه شب
قاندان یازیلدی دیرینون دیوارینه یاللعجب
کرببلاده جان وئروب پیغمبر اوغلی تشنه لب
شرح جفای لشکر کین گستری قاندان یازار
دوردی هراسان خوابیدن اول راهب فرخنده فر
گلدی او قوم شومیدن بیر نوعیلن آلدی خبر
کیمدی قفادن ذبح اولان بو قانلی باش ای قوم شر
توپراقه القانی آخار هر دم اناالعطشان یازار
اول راهب خوش فطرته وئردی جواب شمر و سنان
بیر خارجی دی اولدی بو امر یزیده بدگمان
آدین سوروشدی ائتدیلر بو نوعی ظالملر بیان
فرزند زهرادی حسین قانه اولوب غلطان یازار
شمر دنی سسلندی من ظلمومده طغیان ایلدیم
کسدیم قفادن باشینی القانه غلطان ایلدیم
قلب یزیدی شامیده شاد و خرامان ایلدیم
بو خدمته خاطر منه بیر منسب شایان یازار
آلسون خبر گر جدّیدی ختم رسالت مصطفی
اؤز دامنینده بسلیوب آری بونی خیرالنّسا
فرزند حیدردی گل باغ علی المرتضی
اول شیردل کی آدینی عالم شه مردان یازار
چون راهب اولدی باخبر بو سؤزلره حیران قالوب
طاهانون اوغلون امّتی دنیاده بو حاله سالوب
اولدی پریشان قلبیدن آرامینی غملر آلوب
لوح دله اول حضرتین غمنامه سین پنهان یازار
گلدی دیله شمره دئدی قیل لطفوی ارزان منه
بو قانلی باشی وئرگیلن سن بو گئجه مهمان منه
تا بلکه بعضی سرّلر اولسون عیان الان منه
آهیم شراری سینۀ عرشه غم چندان یازار
واردی نئچه کیسه زریم ای طاغیان خیره سر
وئررم بهاسین بو باشی وئرسوز نئچه ساعت اگر
بو گوهر ارزنده دی، زر قدرینی زرگر بیلر
صرّاف لعلین قیمتین حاشا بئله ارزان یازار
آلدی او باشی دشمن ناداندان اول فرخنده خو
تاپشیردی امّا راهبه شمر لعین و کینه جو
صبح اولجاقین قیتر باشی سنلن منیم شرطیمدی بو
کیمسه خبردار اولماسین قتله یزید فرمان یازار
آلدی باشی دیره گلوب محشر نمایان ایلدی
آچدی باشین اؤز سینه سین چاک اول نواخوان ایلدی
ای وای حسینیم وای دئدی حسرتله افغان ایلدی
اولدی حسینون ذاکری نوحه ائدوب دیوان یازار
گاهی اوپوبدی لبلرین گاهی دولاندی باشینه
عطر و گلابیلن یودی مجذوب اولوب گؤزقاشینه
باخدوقجا هی حیران قالوب اول صورت بشاشینه
زلفی توکولموش آلنینا گویا خط قرآن یازار
یابن رسول الله دئدی بو منزله خوش گلموسن
ای قانلی باش هی دوشموسن الدن اله خوش گلموسن
سرنیزه لر اوسته دوشوب چولدن چوله خوش گلموسن
شرح ملالون سینۀ صحرالره طفلان یازار
موسی سنه قربان آقا، عیسی سنه قربان آقا
حق اوسته القانه باتان یحیی سنه قربان آقا
ای وارث ختم رُسُل دنیا سنه قربان آقا
هر کیم اشیتسه دردوی جانین سنه قربان یازار
ای شاه مظلومان حسین احراری محزون ائتموسن
الله یولوندا جان وئروب دنیانی مفتون ائتموسن
مهمان اولوب بو گون منه بو زاری مجنون ائتموسن
سوز غمون عاشقلرین قلبین دل سوزان یازار
وار سنده اول شأن و مقام عالم سنه دل داغلیار
معناده خیل انبیا یاسونده قاره باغلیار
نوح ایلیر نوحه سنه عیسی و موسی آغلیار
گل آدوی لوحه قلم، سلطان مظلومان یازار
مرحوم استاد غمکش
منبع مجموعه کانالهای مدح و مرثیه
موضوع: احوالات دیر راهب ,
زبان شعر و شاعر: نوحه ترکی , غمکش
-------------------------------
ولادت حضرت امام حسین (ع)
شیعه لر قویدی قدم عالم امکانه حسین
عبد صالحدی یقین قادر منّانه حسین
یثربون شهری اولوبدی نئجه گور گل باران
زینت عرش برین رحمت کاشانه حسین
خلق ائدوب تک اونی دنیاده اونا یوخدی مَثل
ایلدی حمد و ثنا چوخ حق سبحانه حسین
بیر اشاریله باخوبدی آنانون گوزلرینه
گوئیا عرض ایلیوب مفخر نسوانه حسین
منی مهمان آپارور روح الامین عرشه آنا
یعنی بو دمده قوناقدی ئوزی جانانه حسین
منزل حضرت مولانی ایله اوخشاتدی
اولجاقین باور ایله روضه رضوانه حسین
گل آچوب گلشن طاهاده او فخر علوی
ائدوب عاشقلرین عالم بوئی دیوانه حسین
فطرسه وئردی خبر جمله ملکلر فوری
اولدی مجنون کیمی ائتدی اونی پروانه حسین
او یانان بال و پرین تپراقا یکسر بَلدی
مور تک گلدی تمنّایه باخوب یانه حسین
شهپرین سورتدی مبارک قدم مولایه
کرم ائتدی نئجه باخ گور ئوزی مهمانه حسین
فطرسا وئردی خداوند جلی اوندا شفا
کرم ائتدی اونادا دهریده مردانه حسین
عشق لازمدی ائده شیعه اثنی عشری
تاج عزّتدی بو دنیاده مسلمانه حسین
ساقی کوثری سیراب ایلدی ساقی حقّ
یتیروب شوقیله عارفلری عرفانه حسین
مژده وئردی دَم اصحابه رسول مدنی
چکدی بلبلرینی باغ و گلستانه حسین
قونداقین عرشه آپاردی اودی جبرئیل امین
ووردی امضاء سَند عهدیله پیمانه حسین
پرده غیبده آینده نی گوردی علنی
نظر ایتدی او زمان کوه و بیابانه حسین
انبیانی اَلی قوینوندا گوروبدی دایانوب
هامی لبیک دئیور مستیدی جانانه حسین
عرض ائدوبدی حقّ منّانه سنون عاشیقووم
پیشواز ائتدی گلن اوخلاری مستانه حسین
فاطمه محضر پیغمبره عرض ائتدی بابا
گلمیوب عرشیدن علّتدی بو نالانه حسین
آجدی صوت اممیوب علّت ندی تأخیر ایلیوب
بویوروب ایلور الآن سجده شکرانه حسین
فاطمه غم یئمه آللهیله هم صحبت دور
یاندیروب عالمی باخ آتش هجرانه حسین
گتیروب قونداقینی فرشه یقین روح الامین
ائتدی درمان بیلورم اول دل سوزانه حسین
تا جهان وار اونا مدیوندی خلقت هامیسی
اوخشیار دهریده دریای خروشانه حسین
«غمکشین» شعرینه لطفیله نظر ایتسه حسین
یتیرر ایستسه گر اوج فراوانه حسین
مرحوم غمکش
موضوع: حضرت امام حسین (ع) میلاد ,
زبان شعر و شاعر: نوحه ترکی , غمکش
-------------------------------
زبانحال حضرت موسی ابن جعفر (ع)
ای صبا گیت یثربه ابلاغ ایله مندن سلام
جدیمه عرض ایله اوغلون گوندروب مندن پیام
گردنیمده طوق زنجیر ستم واردور یارام
روز و شب بند بلاده جدیمه دل داغلارام
یاده سالام حضرت عباس عموومی آغلارام
بیر مسلمانم قوجا رحم ایلین یوخدور منه
هر شماتت دشمن دل سنگ دن اوخدور منه
تیغ و تیر و نیزه و شمشیر دن چوخدور منه
ووردلار کنده ایاقیم گردنیم تک زخمدور
آند اولا جدیم حسینه دشمنیم بی رحمدور
گل آنا یا فاطمه آل سینوه سن باشیمی
باغلیان یوخ گوزلریمی باغلا سیل گوز یاشیمی
با خبر قیل بیر به بیر دورمده آل هاشیمی
بو ینومون زنجیرینی آچ من ویروم آسوده جان
زهردن قلبیم یانور یوخ حالیمه نیلوم یانان
«غمکشم» دریای غمده غوطه ویرام آغلارام
بزم ماتم هر گیجه بیر نوعی قورام آغلارام
حق حسیندی حق سوزون اوستونده دورام آغلارام
حضرت موسی ابن جعفر عشقینه یارم خدا
وار امیدیم اللریمدن تا دوتا روز جزا
مرحوم غمکش
موضوع: حضرت امام موسی کاظم (ع) احوالات ,
زبان شعر و شاعر: نوحه ترکی , غمکش
-------------------------------
زبانحال حضرت موسی ابن جعفر (علیه السلام)
ئوزون رحم ایتگلن یارب منه بو کنج زنداندا
یریم نمناکیدور ایندی گرفتارم بو طوفاندا
غریبم باغریقانم من ایویمدن ناگرانم من
ایاقیمده منیم کنده قولی باغلی اسیرم من
سینم داغلی جفاجولر الینده دستگیرم من
مکانیم محبس و ظلمت الهی چونکه پیرم من
وجودیم پایمال اولدی الهی کنج زنداندا
غریبم باغریقانم من ایویمدن ناگرانم من
ئوزوم سندن الهی من مکان خلوت ایستردیم
ایدم چوخلی عبادت من نگاه رحمت ایستردیم
ایدم صبح و مسا سجده بیر عالی همّت ایستردیم
سینوب بال و پریم قوش تک سیخلدیم کنج زنداندا
غریبم باغریقانم من ایویمدن ناگرانم من
گلنده سند بی ایمان اسیر یاپراق کیمی جانیم
اورکده طاقتیم قالماز بدنده سست اولار قانیم
فراز عرشه سیر ایلور گورورسن روح و پایانیم
یره یارب بو حالتده یخلدیم کنج زنداندا
مرحوم غمکش
موضوع: حضرت امام موسی کاظم (ع) احوالات ,
زبان شعر و شاعر: نوحه ترکی , غمکش
-------------------------------
احوالات خرابه شام
قصریدن گلدی سر شاه شهیدان اشاقا
قارداشی اوغلی ئولنلر هامی دوردی ایاقا
قویدولار پوششی اوستونده او طشتی قاباقا
گل رقیّه دئدی زینب سنه درمان گلدی
ایلدی دست قضا مشکلون آسان گلدی
باخدی او طشته خانیم قیلدی نوا اولمادی رام
دئدی عمّه بابامی ایستیورم من نه طعام
بیرجه یول لبلرینه لبلریمی باری قویام
گؤرمیونجه بابامی عالمی من داغلیارام
وای بابا وای دئیرم اوخشویارام آغلیارام
دای یوروبدی منی ویرانه ده غملر ئولورم
او قدر غمچی ویروب شمر ستمگر ئولورم
غم ایّام ائلیوب قلبیمی مضطر ئولورم
دؤزمگه غصّه لره یوخ داخی قلبیمده توان
شام قیزلاری گؤرنده ویرالار زخم زبان
دئدی زینب گؤزلیم غم یئمه چوخ چئکمه محن
بو گئجه کامه چاتارسان بالا ائتمه گله سن
اورتوگون ردّ ائله طشتین ائله بابادی گلن
اورگونده نقدر درد اولا درمان گتیروب
لبلرینده ولی افسوس قیزیل قان گتیروب
بالا آلدی آتانون یاره لی باشین قوجاقا
سارالان لبلرینی قویدی او قانلی دوداقا
دئدی قربان ائدرم جانیمی سن تک قوناقا
یاخشی وقتده قیزوین حالینی سن بیلدون آتا
دویموشام جانیمه ویرانیه خوش گلدون آتا
ای گل پرپر غم، بلبل بشکسته پرم
گؤز آچوب باخسون اگر قانلی گؤزوندن اوپرم
گؤزومون یاشینی قانلی ئوزوه من سَپَرم
یارالی بیر آتیا غملی قیزی همدم اولار
گؤزومون یاشی دوداق یارهسینه مرهم اولار
دردیمی ایندی سنه سوزیله ابراز ائدرم
اول کئچن گونلریمی یاد ائلیوب ناز ائدرم
یورولوبسان بیلورم نازیمی من، آز ائدرم
ئولورم یاخشی زماندا منی سن یاد ائلدون
کنج ویرانه ده غم غصّه دن آزاد ائلدون
بابا آچ بیر گؤزوی ایله نظر گؤزیاشیما
حیف اولا یوخدی الون ال چئکه سن بو باشیما
فخر ائدم بو دم آخر باباجان یولداشیما
قلبیمی تیر بلا محنتیلن یاردی منیم
فخر ائدردیم اونا رأفتلی بابام واردی منیم
بابا قویدون منی غملر ائده مضطر نیه بس
آلا آرامیمی اشرار ستمگر نیه بس
گلمیوب دیدیمه ویرانیه اکبر نیه بس
اکبرین دردی منیم فکریمی عالمده قاتوب
مهربان قارداشیم اولما باجیسین گؤزدن آتوب
کنج ویرانه ده بیر غصّه لی پژمرده گلم
داخی بو دهریده قالماخلیقا قادر دگولم
یارالی لبلریلن ایله دعا بلکه ئولم
گل سولاندا خوش اولار بلبل خوشخوان اوخویا
من ئولنده نولار اکبر منه قرآن اوخویا
مرحوم غمکش
موضوع: احوالات خرابه شام ,
زبان شعر و شاعر: نوحه ترکی , غمکش
-------------------------------
در مذمّت دنیا پرستان
قالما بو غفلتده اویان خوابیدن
گوزلرون آچ صحنۀ دنیایه باخ
قویما باشون بالش ناز اوسته سن
گیتدی هدر عُمر گرانمایه باخ
راهنمادی بیزه قرآن سوزی
سن اونی تفسیر ایله معنایه باخ
میل ایله سن مشرقه یا مغربه
لطف زیاد حق یکتایه باخ
نعمت الوان که دوشوبدی اله
سالما اشاقه باشی بالایه باخ
صانع افلاکیدی الله ئوزی
مرحمت خالق یکتایه باخ
گوگلری ساخلار نجه گور بی ستون
قدرت خلاق توانایه باخ
یرلری سو اوستونه فرش ایلیوب
داغلاری گور داشلاری صحرایه باخ
ذرّه خورشیده نگاه ایلیوب
گون که باتوب ماه دلارایه باخ
نسترن و سوسن و نیلوفره
یاسمن ولاله و نعنایه باخ
خار مغیلان و جماد و نبات
سطح گلستان دل آرایه باخ
قدرت خالق ایله بی حدیدی
فکره گیدوب جنگل و دریایه باخ
گلشنی گز بلبل خوشخوانی گور
درک ایله سن درس معمایه باخ
عقل و کمالاتیله تشخیص ویر
منظرۀ زشتیله زیبایه باخ
هندسه و جبر و حساب و عدد
جمعی معدل ایله سودایه باخ
ضرب ایله تقسیم ایله تفریق ایله
اخذ نتیجه ایله اولایه باخ
گوزلری گور یوزلری گور واقعاً
بیر اصم و ابکم و اعمایه باخ
جن و بشر وحش و طیور، خاک و باد
مورو مگس گلموری گور سایه باخ
گوهری گور درهم و دیناری گور
گور فقرا حالینی اغنایه باخ
فاسدی گور فاجری گور فاسقی
قانه دولان قلب شکیبایه باخ
لؤلؤ مرجان دُر غلطانی گور
سیم و زر و نقش مُطلّایه باخ
گور وسطی آخره بیر فکر ایله
خلقت مخلوقه باخ ابدایه باخ
جاهلی گور ظالم و مظلومی گور
رحم ایله مخلوقه بیر ایذایه باخ
نصف شبی خلوت ایدوب آغلیان
صوت حزین نفس مبرایه باخ
صبحی گوروب ظهری گوروب عصری گور
مغرب عشانی تاپوب اسرایه باخ
فوت ایلمه وقتوی عذرین یولی
بسته‌دی سود اولماسا عُقبایه باخ
درب نیابت گیجه لر باز اولار
اشگیوی جاری ایله مجرایه باخ
غرق اولاجاق اورداکه گردن کشان
خرم و دلشاد اولوب اضحایه باخ
تر توکر اُول صحنده شرمنده لر
دیدۀ عبرتله او مأوایه باخ
اهل ستم جمله سی زقوم ایچر
شربتی صرف ایله مصفایه باخ
ظلم ایلمه ظلملره صابر اُول
صبر ایلین قلبده بُرنایه باخ
میل ایله سن هرنه غذا سفره‌دن
معدیه باخ کیسۀ صفرایه باخ
زهردی چوخ زهرلیدی زهریدن
قدروی بیل رود و احشایه باخ
آختاریسان مدرسه آموزگار
درس اوخی اولده الفبایه باخ
سال گذرین قبر لره قیل نظر
داشلارینا ثبت اولان ایوایه باخ
تپراقین آلتیندا یاتان جسمیلر
مونسی مار عقرب و ایذایه باخ
عاد و ثمود ابرهه‌دن یوخ خبر
قیصر روم خسرو کسرایه باخ
خواهش نفس و هوسه باخما چوخ
سینه ده وسواس ایدن اغوایه باخ
گوزلریوه قلبوه بو عالمی
جلوه ویرر جلوده غوغایه باخ
عالیمی گور عابدی گور زاهدی
فعلده کرداریده تقوایه باخ
سامی ایشیت زالی ایشیت رستمی
دیو هوا گردش پیمانه باخ
کاوس روئین تنی سال یا دیوه
منزله باخ مسکن و مأوایه باخ
گلسه اجل یوخدی مجالون اینان
طشت طلاده سر یحیایه باخ
پرده لمه حق سوزی سن دهریده
حقدی ئولوم شیون و لالایه باخ
حضرت موسی نجه پیروز اولوب
نور جبل طوریله سینایه باخ
کوفه مسلمانلارنین ایشلرین
یاد ایله قلب شه بطحایه باخ
ئوزلری قرآن اوخیان سویولون؟
حق یوزونه باغلیان اعدایه باخ
ناطق قرآن که اونون شأنینه
وصفینه دنیاده گلوب آیه باخ
شمر و سنان خولی دون حرمله
یخدی کیمی ظلمیله صحرایه باخ
ویردیله بیر ارمینه خنجری
مقتله تا گلدی نصارایه باخ
گوردی یوزی اوسته دوشن پیکری
اوستونه حق سالمیش اونون سایه باخ
تشنه ئوزی قانی آخور سوکیمی
نفسی دیدی اوخلانان اعضایه باخ
گوردی اوجالمیشدی گویه نور حق
گلدی صدا نالۀ عیسایه باخ
حضرت عیسی اوناقان آغلیور
عقلی خطاب ایلدی مولایه باخ
حقّاً حسین ابن علی حقدی حق
یعنی بو رهبردی مسیحایه باخ
خنجری آلتدی یره قاچدی اودم
اُف مسلمانلارا ترسایه باخ
ظاهری بَد باطنی بد خُلقی بد
بَزمده «غمکش» بیله دعوایه باخ
مرحوم غمکش
موضوع: سایر موضوعات ,
زبان شعر و شاعر: نوحه ترکی , غمکش
-------------------------------
ورود به کوفه
ای نوک سناندا دولانان باش اوخی قرآن
گل صورتی قانه بویانان باش اوخی قرآن
قارداش اوخی قرآن
ای زینبون آرام دل و روح و روانی
قرآنه وئرن یئتمیش ایکی تشنه فدانی
قربان باجوین اولسون حسینیم سنه جانی
قلبی غم اکبرده یانان باش اوخی قرآن
قرآن اوخی وئر قلب پریشانیمه قوّت
باخدوقجا گولر گر چه بو بی شرم جماعت
آماج ائلیر نیزه ده باشون داشا امّت
سرنیزه ده داشلاره نشان باش اوخی قرآن
بو کوفه لیلر شرم ائلمور ذات خدادن
ائتموللر حیا ختم رُسُل، خیر نسادن
بو ملّته احسان ائلین شاه ولادن
ای باشینه عالم دولانان باش اوخی قرآن
قرآن اوخی عالملری قیل واله و حیران
بیلمور بیزی بو کوفه لیلر ایندی مسلمان
گؤستر بو جفاجولره سن آیت و برهان
ای عالمی حیرتده قویان باش اوخی قرآن
ای دردی سالان زینب غمپروری درده
اود دوتدی دل خواهر غمدیده شررده
بو گول ندی سالمیش گل رخساروه پرده
کوللر ئوزونه پرده سالان باش اوخی قرآن
کهف آیه سینی نیزه ده سن ایله تلاوت
تفسیر ائدرم ناقه ده ای شمس هدایت
عالملره تا روشن اولا حقّ و حقیقت
گون تک ائلین حقّی عیان باش اوخی قرآن
مرحوم غمکش
موضوع: احوالات کوفه ,
زبان شعر و شاعر: نوحه ترکی , غمکش
-------------------------------
زبانحال حضرت معصومه (سلام الله)
غربتده رضا جان ئولورم سنده گوزوم وار
گل گوزلریمی باغلا سنه دلده سوزوم وار
قارداش یتور ال خواهر نالانیوه بیر باش
راحت اولارام گورسه گوزوم بیر سنی قارداش
قم شهرینه دوشسون گذرون ایندی گوروم کاش
تا سن گَلَنه اولسا خبر منده دوزوم وار
صیّاد اجل وئرمور امان چاره یوخومدی
درمان و دوا دیدۀ خونباره یوخومدی
همراهلریم ئولدی گتور قاره یوخومدی
سال باشیمه قاره سن ئوزون قاره گونوم وار
ساوه بیزه میدان بلا اولدی رضا جان
قان قلبیمه خونابه اولوب دولدی رضا جان
باغ فدکین گوللری تک سولدی رضا جان
بوندان بئله باری نه گئجه نه گونوزوم وار
دیندیردی منی دوتدی دیله غمزده نسوان
شهر قما ایکاش گلیدیم ولی چوخدان
گوگلوم سنی ایستور دم آخر گئنه هر آن
طوسه ساری هر دم باخورام یولدا گوزوم وار
مرحوم غمکش
منبع مجموعه کانالهای مدح و مرثیه
موضوع: حضرت معصومه (س) احوالات ,
زبان شعر و شاعر: نوحه ترکی , غمکش
-------------------------------
زبانحال حضرت امام موسی کاظم (علیه السلام)
می شناسد هر که دارد در دل ایمان مرا
از نفس انداخته ظلم مسلمانان مرا
دشمنانم ظاهراً دم از مسلمانی زدند
این جماعت که نشد یک لحظه پشتیبان مرا
عاقبت زنجیرها مونس برایم گشته بود
هیچ کس رؤیت نکرد در گوشه زندان مرا
جای من تاریک و نمناک و به پایم کنده‌ها
تازیانه خوب می داند چه کرده آن مرا
هر زمان سوی عبادت رو نهادم بر نماز
می‌زند سیلی همان دم سند زندانبان مرا
«غمکشا» از موسی جعفر نوشتی روضه را
تا ببیند کاش در مجلس که او نالان مرا
مرحوم غمکش
موضوع: حضرت امام موسی کاظم (ع) احوالات ,
زبان شعر و شاعر: نوحه فارسی , غمکش
-------------------------------
زبانحال به حضرت قاسم (علیه السلام)
ای قاسم گلگون قبا آچ گؤزلرون گلدیم اویان
وی یادگار مجتبی آچ گؤزلرون گلدیم اویان
محنت چاقی گلدیم سنون ای باوفا امدادوه
آچ قانیله دولموش گؤزون گلدیم اوغول فریادوه
سرعتله تلّ اوستن انوب نالان یئتیشدیم دادوه
ای نور چشم مرتضی آچ گؤزلرون گلدیم اویان
سن سن منیم جسمیمده جان آرام دل روح و روان
زار و ملول و مضطرم قلبیمده یوخ تاب و توان
بو غصّه لی چولده منیم قدّیم اولوب غمدن کمان
ای مین بلایه مبتلا آچ گظؤزلرون گلدیم اویان
اطرافی آلموش اشقیا اللرده شمشیر و سنان
ائتمز ترحّم هئچ کیمه بو چؤلده قوم کوفیان
قول چیمریوب باش کسمگه آماده دی شمر و سنان
قان قان دئیور اهل جفا آچ گوزلرون گلدیم اویان
آماج اولوبدی اوخلارا باشدان ایاقه پیکرون
قان اولدی قلب مضطریم قانیله دولموش گؤزلرون
احسن سنون ایثاروه واردی سر سوداگرون
دینه ائدورسن جان فدا آچ گؤزلرون گلدیم اویان
قان اتمه قاسم باغریمی اشرار ایچینده مضطرم
چوخدی جفالی دشمنیم من بی معین و یاورم
اوغلوم ئولوبدی دور اوغول مغموم داغ اکبرم
واردی دلیمده مین نوا آچ گؤزلرون گلدیم اویان
گل صورتون بو قانیلن اولموش قیزیل گولدن گؤزل
قویما منی حسرت به دل ای مه لقا گفتاره گل
الحق کی اثبات ایلدون « ألمَوتُ أحلی مِن عسل »
بیله مرامه مرحبا آچ گؤزلرون گلدیم اویان
ظلمیله قانه باتمیسان القان ایچینده یاتمیسان
جانانه جان قربان ائدوب مقصوده گویا چاتمیسان
اکبر کیمی گؤزدن نیه سنده حسینی آتمیسان
سس وئر منه ای باوفا آچ گؤزلرون گلدیم اویان
اوج ایلیور یئردن گوه نالم اوغول آهیم اوغول
جان جهانه اود سالور بو آه جانکاهیم اوغول
یول گؤزلوین وار خیمه ده دور سن اول همراهیم اوغول
سسلور بی بون واویلتا آچ گؤزلرون گلدیم اویان
جان اوسته بو حالون منی افسرده احوال ایلیوب
نه ظلم اوغول آخر سنه بو قوم قتّال ایلیوب
آتلار ایاقی جسموی میداندا پامال ایلیوب
قان آغلارام ای مه لقا آچ گؤزلرون گلدیم اویان
مرحوم غمکش
موضوع: حضرت قاسم ابن حسن (ع) ,
زبان شعر و شاعر: نوحه ترکی , غمکش
-------------------------------
زبانحال حضرت زینب (سلام الله)
در احوالات حضرت زهرا (سلام الله)
در و دیوارین آراسیندا قالان وای ننه وای
یاره لی سینه سینین قانی آخان وای ننه وای
ئوز ائوینده دوگولن مادر خونین جگریم
گوزلری محسنه حسرتله باخان وای ننه وای
ای گلی پرپر اولان غنچه چاقیندا یارالی
ظلمیله درگهی عالمده یانان وای ننه وای
حقّینی اهل جفادن گئدوب آلدی قیدوب
گُذرین کوچه ی باریکه سالان وای ننه وای
آتامون گئتدی الیندن کمکی یالقوز اولوب
آغلیار دورت ئورگی غملی بالان وای ننه وای
سینه سینده قالان ای ضربه ی مسمار یئری
میخ در باعث اولوب جانی آلان وای ننه وای
صورتینده قالان ای دست ستمکار یئری
آهیله ناله سسین عرشه اوجالدان ننه وای
قنفذون قمچی سینین ضربه لریندن گووَرن
بیلگی هم گووَروب هم قارالان وای ننه وای
زرد گلفام و سیه فام اولان القان ئورگی
گلشنی بیرگونون عرضی سارالان وای ننه وای
ایکی باجی، ایکی قارداش بیر آتا آغلیاروق
وطن آواره سی اولدوق بو زمان وای ننه وای
آهیله سینه لری داغلیاروق صبح و مسا
غملی قلبه نه قالوب تاب و توان وای ننه وای
(غمکش) الده قلم ودفتری آغلار شب و روز
بُلور آغلار بالاسی میرجهان وای ننه وای
ایندی ئوز منتقم اوغلی دئیور حتما بیلورم
یارالی پیکری القانه باتان وای ننه وای
مرحوم غمکش
موضوع: حضرت فاطمه زهرا (س) زبانحال ,
زبان شعر و شاعر: نوحه ترکی , غمکش
نظرات (۰)
هیچ نظری هنوز ثبت نشده است