متن نوحه ترکی حاج عبدالله اصلی
مجموعه اشعار برگزیده و متن نوحه ترکی از شاعر دلسوخته اهلبیت حاج عبدالله اصلی که در مدح ائمه اطهار علیهم السلام سروده شده است:
-------
وداع حضرت علی اکبر (علیه السلام)
گل عازمم قتاله آنا آزدی فرصتیم
چوخ ساخلاما یول اوسته یوخومدور فراغتیم
احسان ادوب مریدینه بیر باده پیر عشق
مخمور ادوبدی نشئه جام شهادتیم
ایله ادوب دی مست می شوق وصل یار
دیدار یاریدن سورا یوخ اوزگه حاجتیم
من تشنه ی وصال نگارم بو دشتیده
آب فراته ذره جه یوخ میل و رغبتیم
امر ایلیوبدی سیر سلوک ایلیه ام بو گون
گودال قتلگاهیده پیر طریقتیم
ملبوس ادوب بابام منی بو آغ لباسیله
تا لایق نگار اولا اگنیمده خلعتیم
سنده رسوم دهریله زینت ور اوغلووا
سال نظمه زلف پیچ و خمی آرتا زینتیم
ای هاجر محبت صحرای کربلا
اسماعیله بو دشتیده وار افضلیتیم
کوه منایه گتدی او، ساق گلدی هاجره
اما منیم خیامه داها یوخدی رجعتیم
گوزلور دوباره ساقی عشق الده جام می
مدهوش اده خمارینی پوزقون دی حالتیم
بو کثرتیله دشمن دون الده تیغ کین
قانیله سعی ادور بزنه بزم وحدتیم
کربو بلایه غبطه ادر زمزم و منا
قربان کیمی بولونسه سوسوز سرو قامتیم
سیل سرشک اشکیوی رخساره باغلاما
ییخسون مباده قلبون اوین درد فرقتیم
خرمن کیمی داغیتما یوزه تار زلفیوی
قویما پوزا خیالیوی اندوه و محنتیم
گورسن جنازمی داغیلیب اتمه شور و شین
فکر ایله گل آچوبدی بدنده جراحتیم
بولمور مجازه طالب اولانار حقیقتی
اهل دله مطاف اولاجاخ قانلی تربتیم
صراف عشقه بذل ادورم جان مطاعینی
سوق وفاده ارجه یتر قدر و قیمتیم
وردیم طلوع صبحیده مخیمده بیر اذان
قان دجله سی منیم اولا محراب طاعتیم
ای شاهزاده بیر یوزی قاره غلاموزام
عبد خدا آدیمی آقا اصلی شهرتیم
هر سطر دفتریم دولی جرم و خطائیله
وار قبریدن او دور که بیله خوف و وحشتیم
سیز خانوادیه گوزومی تیکمیشم فقط
مقبول درگه اولسا بو ناچیز خدمتیم
حاج عبدالله اصلی
منبع مجموعه کانالهای مدح و مرثیه
موضوع: حضرت علی اکبر (ع) زبانحال ,
زبان شعر و شاعر: نوحه ترکی , حاج عبدالله اصلی
-------------------------------
در جلالت حضرت فاطمه (سلام الله)
ای گل باغ محبت فاطمه
وی دُرِ دریای عصمت فاطمه
ماه اِسپهر وفا و مکرمت
نجم گردون فضیلت فاطمه
رهنمای موکب صدق و صفا
مشعل راه حقیقت فاطمه
چلچراغ مهبط وحی خدا
شمع بزم اهل طاعت فاطمه
سایه ً سدره گل گلزار عشق
شاخهء طوبای جنّت فاطمه
چشمهء جوشان مهر و معرفت
بحر موّاج کرامت فاطمه
کنز عصمت معدن حجب و حیا
مخزن ناموس و عفّت فاطمه
کشتی ستر عفاف و معدلت
ناخدای لطف و رحمت فاطمه
زورق دریای صبر و حوصله
ساحل بحر متانت فاطمه
طاهره نجمه زکیّه هانیه
زهرهء چرخ نبوّت فاطمه
نور خورشید از جمالت منفعل
ای مه برج رسالت فاطمه
گرد راهت کحل چشم حور عین
تار مویت لیل ظلمت فاطمه
خاتم ختم رسل را گوهری
درةالتاج امامت فاطمه
روز مادر از تو بگرفته است روح
دخت طاها مام امت فاطمه
مام ماتم مام محنت مام غم
مام ایثار و شهادت فاطمه
لالهء دشت غم و درد و الم
نخل دشتستان محنت فاطمه
اصلی از آل علی غافل مباش
تا کند بر تو شفاعت فاطمه
استاد حاج عبدالله اصلی
منبع مجموعه کانالهای مدح و مرثیه
موضوع: حضرت فاطمه زهرا (س) مدح ,
زبان شعر و شاعر: نوحه فارسی , حاج عبدالله اصلی
-------------------------------
زبانحال حضرت رباب (سلام الله)
ای اوچ گجه گوندوز قالان عطشان بالام وای
تشنه کبوتر تک دوشن بی جان بالام وای
منقارون آچدون باغلادون
من آغلادیم سن آغلادون
عطشان بالام وای
پربسته قوش تک اوچ گجه گلدون فغانه
باخدیم سنه آخدی سرشگیم یانه یانه
اولدون خدنگ ظلمه آخرده نشانه
سن مرغک پربسته سن
دینجل بیرآز یات خسته سن
عطشان بالام وای
سانما ملالون قلبدن من سهل ساندیم
عطشان دوداقون سوزیشین گوردوقجا یاندیم
بیر جرعه سو فکریله اخیامی دولاندیم
من ایلدیم سعی و تلاش
سن سینمی ایتدون خراش
عطشان بالام وای
چوخ سعی قیلدیم یول تاپام راه نجاته
مأیوس اولوب گوزیاشلی بیر باخدیم فراته
چارم کسیلدی اللرون سالدیم قماطه
گاهی سنه لایلای دیدیم
گه اوخشادیم ایوای دیدیم
عطشان بالام وای
ایکاش بو آب فراتی قان اولیدی
ویران اولان گوگلوم کیمی ویران اولیدی
نه حرمله نه زهریلی پیکان اولیدی
نه اوخ اولیدی نه کمان
نه سو نه ظلم بیکران
عطشان بالام وای
نالم اوجالدی چرخ بدبنیاد الیندن
یاندیم دیدیم بو روزگارین داد الیندن
دلسیز بالام قورتولمادون صیّاد الیندن
ظلمیله کسدی چاره می
صید ایتدی شیرخواره می
عطشان بالام وای
ظلمنده طغیان ایلدی آل اُمیّه
عمرومجه شکوه ایلرم خلّاق حیّه
کاش گورمیه اوخ یاره سین نازلی رقیه
سویلر قان اولدی گوزیاشیم
وای شیرخواره قارداشیم
یاندوردی یانمش قلبیمی نار ملالون
پوزدی پریشان حالیمی آشفته حالون
سولدی سارالدی ظلمله گل تک جمالون
ای سینه مون خندان گلی
دلده قالان دل نیسگلی
عطشان بالام وای
سن شمع دل افروزیدون بو محفلیمده
نور رخون خاموش اولوبدی منزلیمده
سوز گدازون شعله سی قالدی دلیمده
اولدوز کیمی باتدون اوغول
چوخ آغلادون یاتدون اوغول
عطشان بالام وای
اصلی بیر عمری ایلدون دنیاده عصیان
آخر سنه لطف ایلدی خلّاق منّان
قوی آنّوی توپراقلارا شکر ایله هر آن
هر وقت دوشسن مشگله
بو واگیری تکرار ایله
عطشان بالام وای
استاد عبدالله اصلی
منبع مجموعه کانالهای مدح و مرثیه
موضوع: حضرت رباب (س) ,
زبان شعر و شاعر: نوحه ترکی , حاج عبدالله اصلی
-------------------------------
احوالات خرابه شام
دوتدی فغان و شیون و غوغا خرابه نی
مسکن ایدنده عترت طاها خرابه نی
یاللعجب اوتانمادی بو چرخ کجمدار
زین العباد ایلدی مأوا خرابه نی
مهر و مهین شعاعینه علت اولان وحود
شام سیه ده ایلدی سکنا خرابه نی
انوار ساطع اولدی گویه تیره شامده
شأنینده غبطه ایتدی ثریّا خرابه نی
مینلر بهشتیدن سچه هر کیمسه کوریدور
ایتمز عوض بهشتیله بینا خرابه نی
هر چاره سیز مریضه بیری ایستسه علاج
بیر بیر نشان ویرلّه اطبّا خرابه نی
دارالشّفا تانور او یری تک نه شیعه لر
درمان بوللّه گبر و نصارا خرابه نی
احیای نفس ایدن نفسه ایتمز افتخار
سیرینده منزل ایلسه عیسا خرابه نی
زُنّاری گردنیندن آچوب ایلیر قبول
اسلامی، گورسه اهل کلیسا خرابه نی
موسایه طور اولوبدی اگر جلوه گاه عشق
سجّاد ایدوبدی سینهء سینا خرابه نی
بیر جلوهء نگاریله ضعف ایتمیوب، ایدوب
مینلر کلیمه طور تجلّی' خرابه نی
تکبیر باشلینده او شب زنده دار عشق
خیل ملک ایدردی مصلّا خرابه نی
صف صف دوراردی پشت سرینده مقرّبین
هو حق سسی دوتاردی سراپا خرابه نی
قد قامت الصلاة دینده خضوعیله
ایلردی رشکِ مسجدالاقصا خرابه نی
الله اکبرین ایشیدن اکبر آختاروب
لیلایه ایتدی بیت غم افزا خرابه نی
سویلری هارداسان آنان اُلسون اوغول علی
حسرت سرشکیم ایلدی دریا خرابه نی
گزدیم دالونجا چوللری ویردی فلک مکان
آخر نشیمن ایلیه لیلا خرابه نی
آلدی سسین رقیّه نوائیله دولدوروب
اکبر آدیله مرغ خوش آوا خرابه نی
سویلردی رنجه قیل قدم ای شهریار حُسن
ایت نور حُسنویله مصفّا خرابه نی
بیرده گوروم او قامت رعنانی اُلممیش
رشک ایلسین بهشتیده طوبا خرابه نی
فخریله شامیانه سنی بیر نشان ویریم
ایلوم حدیث عشقده معنا خرابه نی
بولسونله وار نه عزّت و شأنی بو منزلون
دوتسونلا چوخ مقامیده والا خرابه نی
خاک قدوموی ایده لر طوطیای چشم
طوف ایلینده اهل تولّی' خرابه نی
افسوس اولا یتشمدی کامه اجل گلوب
ترک ایلیوب او بلبل شیدا خرابه نی
اَسدی گینه او گلشنه بیر تازه باد غم
هجرینده اودلادی او دلآرا خرابه نی
آلدی کنارینی او قیزین دلشکسته لر
بزم غم ایتدی زینب کبری' خرابه نی
هر بلبل اوز دلیجه اونا اوخشاما دیدی
آشفته ایتدی زلف چلیپا خرابه نی
سندی قوروق اویاندی یاتانلار سیزیلتیه
قصد ایلیوبله پیریله برنا خرابه نی
کاخ یزیدی یخدی او ناله او اوخشاما
آباد ایدوب همیشه لیق امّا خرابه نی
هر قدر شرح اولونسا بلا قورتولان دگول
بسدور قلم دایان داخی یازما خرابه نی
اصلی سوروشسا قبریده مأمورلر اگر
جنّاتی ایستوسن اوزیوه یا خرابه نی
عرض ایت خرابه خوشدی یقین بلبل غمه
گلزار ایدوبدی چون گل زهرا خرابه نی
بیر یول بو شعری یازدیم ایتیردیم، دوباره دن
امر ایتدی اهل دل ایدم املا خرابه نی
استاد حاج عبدالله اصلی
منبع مجموعه کانالهای مدح و مرثیه
موضوع: احوالات خرابه شام ,
زبان شعر و شاعر: نوحه ترکی , حاج عبدالله اصلی
-------------------------------
زبانحال حضرت لیلا (سلام الله)
علی جداده باشون سیر ایدر بیابانی
سالوبدی آردیجا لیلای خانه ویرانی
شکنج زلفوه از بس که باغلانوب گوگلوم
اسیر زنگی کیمی گزدیرور بیابانی
معاملات محبتده نقد جان قویدوم
گتوردوم آخر اَله تار موی جانانی
نه سمته چکسله گلّم دالونجا سایه کیمین
اُمده بوشلامارام زلف عنبر افشانی
سنخ کجاوه، اوزوم خسته، یول خطرلی، گینه
طریق عشقی گزوب بوشلارام سر و جانی
سکینه زلفوه تای قیزلاری سالوب نظمه
نظامه سن سالالی طرّهء پریشانی
یازوبلا یوزده علی آدون اشک چشمیله
اوخولّا دلده ولی آیه فتحنانی
چکولّه سیره گلن قیزلاری تماشایه
نشان ویرولّه تجلّای نور یزدانی
باخان جمالیوه مدهوش اولور دوشور دلدن
سالور خیالینه سیناده پور عمرانی
دیولّه هر تلی مین یوسفه دگر بو باشین
پوزولّا رونق بازار ماه کنعانی
نه قانلی باش دیَسَن نیزه ده قیزیل گُل آچوب
گلور مشامه بو باشدان شمیم رضوانی
بو کاروانه باشون مشعل هدایتدی
اماندی سالما محاقه او ماه تابانی
اسنده یل، پوزلور نظمی عالمون، زلفون
دوتور صحاب کیمی روی مهر رخشانی
حریم حُسنوی طوف ایلینده اهل حرم
یانان اورکده آلشدورّام آه سوزانی
جرس فغانه گلر ناله مین نواسیندان
چخار اسیرلرین عرشه داد و افغانی
عراق دشتینی آهنگ غم دوتار، بلبل
نوا و شوریله ترک ایلیر گلستانی
سپاه سنگ دله نالم ایلمز تاثیر
بیر آزدا آرتوری ظلمون گروه سفیانی
یارالی باشیویله درد و دل ایدنده عدو
گُلندن آیری سالور عندلیب نالانی
نه قدری یالوارورام نیزه داریوه ویرمور
نهان ایدم دل ویراندا دُرّ ِ غلطانی
وُروبدی اصلی امیدیله چنگ دامنیوه
اورکده واردی چتین دردی سرّ ِ پنهانی
حاج عبدالله اصلی
منبع مجموعه کانالهای مدح و مرثیه
موضوع: حضرت لیلا (س) ,
زبان شعر و شاعر: نوحه ترکی , حاج عبدالله اصلی
-------------------------------
زبانحال حضرت زینب (سلام الله) در حال احتضار
حسین وفالی باجون حال احتضاره دوشوب
درون سینه ده یورقون نفس شماره دوشوب
محبت عالمینی سیر ایدن وفالی مرید
دیار غمده گوزوندن ایراق فشاره دوشوب
طریق عشقی پیاده گزوب قدم به قدم
حسین دیه دیه آردینجا کوهساره دوشوب
اسیر حسنون اولوب مرغ روحیم ازلدن
او گون بو گوزلریم اول نرکس خماره دوشوب
قضا قدرله ویروب ال اله یازاندا یازی
هامی بلا بو بلاکش دوشن مداره دوشوب
او شام شوم که گوزده ایدوبدی گوندوزی شام
دولاندی دوره او شهره یولوم دوباره دوشوب
او گوهری که تراب ایچره ایلدیم مدفون
منیله ایندی اونون قبری همجواره دوشوب
ایله منور ایدوب تیره شامی خلق دیور
سپهر مهر و وفادن یره ستاره دوشوب
شمیم عشق و محبت مشام جانی دوتوب
زبسکه بلبل غم دیده لاله زاره دوشوب
او زینبی که یخوب کاخ ظلمی همتیله
شکسته حالیله شام ایچره گیر و داره دوشوب
نفس گیدور داخی گلمور گوزوم قالوب یولدا
ئولوم توزی عرق مرگیله عذاره دوشوب
نه بیر نفر سنی حالیمدن ایلوری حالی
نه بیر کسین یولی عباس نامداره دوشوب
دیه وفالی باجون غربت ائلده جان ویروری
ئوزوب قبیله دن ال حال انزجاره دوشوب
گوزومده گوزلروون عکسین ائتمیشم ترسیم
گوزوم ئولنده ده گورسونله عکس یاره دوشوب
سنه باخان گوزومی آز قالور اجل یومسون
کمند مرگیله اووچی پی شکاره دوشوب
گوزومده گوزلریوین عکسین ایتمیشم ترسیم
گوزوم اُلنده ده گورسونله عکس یاره دوشوب
جمالون عکسینه قورخوم بودور چکه هاله
ایشقلی آی کیمی چون چشم اشکباره دوشوب
سنه باخان گوزومی آز قالور اجل یومسون
کمند مرگیله اوچی پیِ شکاره دوشوب
کتاب عمرومی بیربیر ورق ورور گوگلوم
گوزی سنیله گچن دور روزگاره دوشوب
بلا چولونده گزور گلشن وفانی گورور
ستمله پرپر اولوب قانلی جویباره دوشوب
نه گل نه غنچه هامی سرولر صنوبرلر
سنوبدی قول بوداغی شاخه دن کناره دوشوب
دوشوبدی بیر یانا شرمنده شیر شرزهء عشق
بیر آیری یرده گلوپاره شیرخواره دوشوب
بویاندا عورت اوشاق وامحمّدا سسلنور
اویاندا لشکر کین فکر تار و ماره دوشوب
ویرور غروریله سعداوغلی لشکره فرمان
غریبه فرصت او گون قوم کین شعاره دوشوب
حریم عصمتی قصد ایلیوب سپاه شرور
کبوتران حرم فکرت فراره دوشوب
نه بیر پناه تاپور سایه سینده دالدالانا
نه فکرینه او زمان آیری راه چاره دوشوب
ریاض خلده ووران طعنه گل کیمی بالالار
اسوبدی باد مخالف کمند خاره دوشوب
قاچوبلا چوللره اللر باشندا دیز تیترور
دالنجا هر بالانین بیر نچه سواره دوشوب
بیری ستمله آلور بیر قیزین گلوبندین
بیریسینون الینه قانلی گوشواره دوشوب
بیریسی غارت ایدوب جبریله حریر و طلا
بیرینه قسمت او غارتده گاهواره دوشوب
وراندا هر بالیه تازیانه غارت ایدن
منیمده جسمیمه مین یاره اوسته یاره دوشوب
نلر اولوب دیمورم ساخلورام یانان دلده
قلم یازاندا اورک دردیمی اشاره دوشوب
قالان اساسیمیزه ظلم الیله ویردیلا اود
منیم او اودّا یانان قلبیمه شراره دوشوب
همان اودون اثری ایمدیده یانان دلده
چکور زبانه، شرر قلب داغداره دوشوب
اماندی اصلی دایان دفترون الولاندی
نه اوت دی خامهء زرّین و زرنگاره دوشوب
یقین بو آتش جانسوز آه زینبدی
نه خامه شعله سی هر قلب بردباره دوشوب
حاج عبدالله اصلی
منبع مجموعه کانالهای مدح و مرثیه
موضوع: حضرت زینب کبری (س) زبانحال ,
زبان شعر و شاعر: نوحه ترکی , حاج عبدالله اصلی
-------------------------------
زبانحال حضرت زینب (سلام الله) در قتلگاه
باجون گر چه جفای دهریدن دلتنگ دور قارداش
دایانام اعتراض ایتماق مریده ننگ دور قارداش
قوپوپ طوفان محنت فکری وار صبریم ایوین یخسون
ولی من قویمارام غم منجنیقی قلبیمی سیخسون
بو مکتبدن گرک شاگرد اول زینبون چیخسون
حوادث لرده دوزماق بیزلره فرهنگ دور قارداش
گرک پابند اولا عشق اهلی اوز عشقینده میثاقه
ویرا صبرین لواسین همتیله عرش نه طاقه
مگرهموار اولار عشقین یولی عالمده عشاقه
بو یول غمدور بلادور فتنه دور نیرنگ دور قارداش
قسم اولسون بو جسم اطهره فریاد ایتامه
یزیدی قویمارام اوز شوم طرحینده یته کامه
لوای فتحی ویرام قدرتیله کوفه و شامه
که زینب فاتح فتح الفتوح جنگ دور قارداش
بیله فکر ایلوری هند اوغلی من قول باغلی نخجیرم
اسیرم یالقوزام قارداشسیزام، افتادیم پیرم
او روبه بولموری من شیر زادم دختر شیرم
بو قیزلاردا منه هر تک تکی بیر هنگ دور قارداش
سینق محملده اطرافه ییغوب جمع پریشانی
سالوب نظمه قیامه ایلرم آماده نسوانی
آخان دین اوسته ناحق کربلا دشتینده کی قانی
اوزوم آلام بو محمل زینبه اورنگ دور قارداش
نه قدری گوز باخور دشت بلایه گلدی گلشندی
ریاض عشقدور هر بیر یری نسرین و سوسن دور
سنون گول جسمیوین اطرافی اما غملی خرمن دور
قلجدور، نیزه دور قانه بویانمیش سنگیدور قارداش
نوای ناله بلبل لروندن گلستان آغلور
یانور سرو صنوبرلر بو غمده باغبان آغلور
آچوب باش یاسمن نسرین و یاس و ارغوان آغلور
جرس فریاد ایدور هر ناله بیر آهنگ دور قارداش
بزنمیش بو داغلمیش گللریله کربلا یکسر
آچوب بعضی مثال لاله بعضی مثل نیلوفر
بو گلشندن سمایه اوج ایدور عطر گل حیدر
غریبه گللرون گلشنده رنگا رنگ دور قارداش
مشام جانه قارداش بو مکاندا عطر جنت وار
دیمم عطر جنان جنتده هاردا بیله نکهت وار
کنارینده ولی بو گللرین بیر سرو و قامت وار
یقین بو هیبتیندن سر سپاه جنگ دور قارداش
بو هیبت بو صلابت بولمورم قارداش نه علتدور
اولوب پژمرده حالت گوسترور رنگی خجالتدور
ویروب سو وعده سی شرمنده آل رسالتدور
اودور آیینه ایفای عهدی زنگ دور قارداش
بو درگاهون سیه رو نوکری ((اصلی))شرمنده
بیزه بیر یوزلی نوکردی خدایه شکر ایدن بنده
آنام زهرایه خاطر قویما اولسون چوخ سرافکنده
الیندن دوت گیلن ایش باره سیندن لنگدور قارداش
حاج عبدالله اصلی
منبع مجموعه کانالهای مدح و مرثیه
موضوع: احوالات قتلگاه ,
زبان شعر و شاعر: نوحه ترکی , حاج عبدالله اصلی
-------------------------------
غزل
شمع تک یاندم آلیشدم اوز اودومدا صبح و شام
تاپمادم بیر اهل دل اظهار ایدم اوز دردیمی
خلق ایچینده سس چکیب گولدوم که گولسون دوسلاریم
غصه لر آلتیندا گزلتدیم بو روی زردیمی
گللر اکدیم مین امیدیله گلستان بسلدیم
قیردی گلچین زمان نسرین و یاس و وردیمی
یاره خاطر طعنه اغیاره دوزدوم دینمدیم
کول ایدردی سینه دن چکسیدیم آه سردیمی
اولممیش گل بیر محبت گلشنین باهم گزاخ
تاپماسان بیر گون اورک آیینه سینده گردمی..
اولموشام آشفته خاطر باغلاناننان زلفووه
اصلی قاتدیم بیر بیره عشق اوسته زوج و فردیمی
حاج عبدالله اصلی
منبع مجموعه کانالهای مدح و مرثیه
موضوع: غزل ,
زبان شعر و شاعر: نوحه ترکی , حاج عبدالله اصلی
-------------------------------
زبانحال حضرت زینب (سلام الله) در حال احتضار
زینب گوروب دوتوب اورگین محنت و ملال
باد صبایه یوز چووروب ایتدی شرح حال
گیت ویر صبا اُلوم خبرین یاره یاریدن
هجران سوزون نگاره آپار بو دیاریدن
کرب و بلایه ایله گذر کوی عشقی تاپ
آگاه قیل حسینی سرانجام کاریدن
دی زینبون یامان گونیدور یوخیدی بیر کسی
مایوس اولوب قبیلدن ایلدن تباریدن
غم بسترینده ایندی دوشوبدور شکسته پَر
عشقون سالوبدی زینبیوی اقتداریدن
غصّه وجودینی اَریدیب قالمیوب رمق
تاب و توان گیدوب اَل اوزوب روزگاریدن
آخر نفس لرین چکوری یولدا گوزلری
کسمیش علاقه زندگی مستعاریدن
پروانه تک طواف ایلیوب عشق شمعنی
بال و پری یانوب شرر شعله باریدن
گاهی سیزیلدوری گهی بیجان دوشور یره
مدهوش اولور شرارهء طوف نگاریدن
حاله گلنده سویلوری قارداش هایانداسان
گل زینبی خلاص ایله بو انتظاریدن
غربت دیاریده اُلورم یوخدی بیر کسیم
غربت غمی چتیندی غم احتضاریدن
یوخ یتدی قارداشین بیری احوالیمی بیله
سالدی عجب فلک باجیوی اعتباریدن
منزل غریب دیار غریب جان ویرن غریب
بو غربت ایوده یوخ گلنیم اهل داریدن
ای یوسف مدینه باجون عطریوی آلور
پیراهن دریدهء بی پود و تاریدن
بو پیرهنده نقش اولونوب اوزگه منظره
روز بلاده کشکمش آشکاریدن
باشدان باشا بو پیرهنون جای زخمی وار
گلبرگ تک جفا یتشوب نیش خاردن
هر تار و پودی شرح جنایات اهل کین
هر رشته سی نشان عمل ناگواردن
کالای عشقدور بونا جان نقدی ویرمیشم
تا آلمشام اراذل بی شرم و عاریدن
بو کوینگ اوسته نولدی منه بیر خدا بولر
عاجزدی دل، بیان غم بیشماردن
گودال قتلگاهده گوردی گوزوم نجه
قان چشمه تک آخور بدن زخمداریدن
خشک ایتماقا یارالاریوی ایلدیم تلاش
دشمن ولیک ویرمدی فرصت کناریدن
بیر بی حیا بروزه ویروب اوز شقاوتین
حیرتدیم دایانمادی گردون مداریدن
الله بولور او لحظه نه غم یتدی زینبه
زلفوم آغاردی دوشدی بدن اختیاریدن
قدّیم کمانه دوندی او گوندن دوزلمدی
تار اولدی گوزلریمده گونوز لیل تاریدن
یولّاندی شام و کوفیه سرعتله قافله
گه شهریدن چکردیله گه کوهساریدن
هر بیر یره یتیشدی باجون باشلادی نوا
نی لر نوایه گلدیله بو آه و زاریدن
من اُلمدیم اوزوم، منی اُلدوردی اهل شام
بیر شام که خلیفه سی وار میگساریدن
سس دوشدی شهره بدرین آلون انتقامینی
فرمان گلوبدی حاکم بی بند و باریدن
هر کس ایشتدی گلدی گیدنلر دایاندیلار
باغلاندی راه کوچه او دم رهگذاریدن
بعضی شماتت ایتدی بیزه بعضی چالدی کف
کینه تموّج ایتدی دل کین شعاریدن
هر بیر جفا که فکره گلور ایتدیلر بیزه
ایوای او شهرده اولونان سنگساریدن
هر داش گلنده رنگی سارالدی رقیه نون
اشکین توکردی دیدهء گوهر نثاردیدن
حاج عبدالله اصلی
منبع مجموعه کانالهای مدح و مرثیه
موضوع: حضرت زینب کبری (س) زبانحال ,
زبان شعر و شاعر: نوحه ترکی , حاج عبدالله اصلی
-------------------------------
زبانحال حضرت زینب (سلام الله) به جناب عبدالله در مدینه
گیرنده یثربه زینب چکردی دلدن آه
باخور اسیرلره گوردی بیر بیر عبدالله
دیدی عم اوغلی یانان قلبی بیرده یاندیرما
گوزیوی حسرتیله صاق صولا دولاندیرما
ایشتدی تا بو سسی زوجه سیندن عبدالله
گلوبدی نطقه دیدی لا اله الا الله
بو آشنا سسیدی لیک سرّ مبهم دور
اگر علی قیزیدی قامتی ندن خم دور
خانم بو حالی گوروب ایتدی گوزیاشین جاری
بو شرح حالیله شرح ایتدی مبهم اسراری
اولیدی اُف فلک کجمداره عبدالله
خلل یتیدی بیله روزگاره عبدالله
بو چرخ کینه صفت منله ایتمدی سازش
بیر عمری توش ایلیوب آه و زاره عبدالله
اَریتدی زر کیمی غم بوته سینده ناب ایتدی
یتوردی غصّه ده کامل عیاره عبدالله
الیمدن آلدی اوشاق وقتیده جوان آنامی
یتیمه لیق توزی قوندی عذاره عبدالله
آتامی جدّیمی قارداشمی شهید ایتدی
ترحّم ایتمدی بو دلفکاره عبدالله
حسینیمیله گنه افتخار ایدردیم من
خوشیدی دل بو گوزل افتخاره عبدالله
مدینه ده باجیلار ایچره عزّتیم واریدی
رهین منّتیدیم کردگاره عبدالله
ولیک بیر گجه آواز الرّحیل اوجالوب
چکوب قطاریمی غربت دیاره عبدالله
جلال و جاهیله یثربدن آیریلوب گیتدیم
ایویم یخلدی قیتدیم دوباره عبدالله
مدینه دن گونی آغ زلفی قاره گیتمشدیم
باشیم آغاردی گونوم اولدی قاره عبدالله
پوزولدی بیر گونون عرضینده گلشن عیشیم
نه گون که محنتی گلمز شماره عبدالله
کنار نهرده قارداشلاریم سوسوز اُلدی
باخوب سرشگیمی توکدوم عذاره عبدالله
هامی مصیبته بیر داغ تک استقامت ایدوب
وجودیمی علم ایتدیم فشاره عبدالله
ولی حسینی گورنده گوزوم چوخور یرده
شراره دوشدی دل بُردباره عبدالله
دایانا بولمدیم اولدوم قیامه آماده
باخاندا حجّت پروردگاره عبدالله
او روبهه ایلدیم حمله شیر شرزه کیمی
دیدیله شیر چخوبدی شکاره عبدالله
ایله مهارتیله شمر خنجرون دوتدوم
او عرصه تنگ اولوب اول نابکاره عبدالله
دیردیلر که مگر جنگ خیبر اولدی عیان
علی اَلین آپارور ذوالفقاره عبدالله
او بی حیائیله من کشمکش ایدنده قشون
دوروب کناریده ایتدی نظاره عبدالله
حسینیم آچدی گوزون امر ایدوب باجی صبر ایت
سو سپدی امری دل شعله باره عبدالله
یارالاریندان آخان قانی کربلا چولونی
شبیه ایدوب بیر آخان چشمه ساره عبدالله
ایله یاناردی سوسوزدان اَمَردی دل دوداقین
یانار او حاله دل سنگ خاره عبدالله
مدینه یوسفی گرگان شام اَلنده اُلوب
ایدوبله کوینگینی پاره پاره عبدالله
بو قانلو کوینگ الیمده نشانهء غمدی
عزا اساسیدی هر سوگواره عبدالله
شهادت امری تمام اولدی باشلانوب غارت
که مجملاً ایدورم بیر اشاره عبدالله
دوتون ویرون داغدون غارت ایلیون حکمی
یتشدی تا سپه کین شعاره عبدالله
یریندن اوینادی وحشی صفت قوشون نه قوشون
نه رحم ایدوب اوشاقا نه کباره عبدالله
سالوبدی فرصت اله لشکر ستم پیشه
توکولدی خیمهء عزّ و وقاره عبدالله
هره سی قاچدیلا بیر سمته قورخودان بالالار
تاپانمادی نچه سی یول فراره عبدالله
آتوبدی بعضی اوزون خندقه او وحشتده
گوروبله یوخ داخی بیر راه چاره عبدالله
او گیر و داریده آتلار ایاقی آتدا قالوب
خسوفه دوشدی نچه ماهپاره عبدالله
سالوبلار آت دوشونه قمچی الده ظلمیله
قُواردی هر قیزی نچّه سواره عبدالله
کیمی فراته طرف اللری باشندا قاچوب
کیمی گیدوب سیخلوب پشت خاره عبدالله
تیکان دالیندا او قزلار که قورخودان سیخلوب
اُفوله یتدیله مثل ستاره عبدالله
حریم عصمتی غارت ایدوبدی لشگر شام
آپاردی مقنعه و گوشواره عبدالله
نجه قیتدیله بیرده چوله قاچان بالالار
سوروشما ایله رجوع اختباره عبدالله
دولاندی گون یتشوب مغربه قزاردی شفق
دوشوبدی مهرِ فلک استتاره عبدالله
یانان چادرلاریلا بیر چادر ویروب تشکیل
قالان حرملری یغدیم حصاره عبدالله
قویوبدی هر بیری بر یاندا توپراق اوسته یوزون
باتوب گل اوزلری گرد و غباره عبدالله
هامی یاتوبدی ولی یاتمیوب حیالی رباب
گلوبدی صبحه کیمی آه و زاره عبدالله
یانقلی دللریله اوخشیوب ایدوب شیون
او لیل غم یتشونجه نهاره عبدالله
ملر بیر آهو کیمی گه چخوب چولی دولانوب
بو فکریله ویره سود شیرخواره عبدالله
تاپانمیوب قیدوب منله قورموشوق بیر بزم
عزا هم اصغره هم شهریاره عبدالله
او دردینی منه من قیلمشام اونا اظهار
دیر اورک سوزونی یار یاره عبدالله
او لاله لر که چخوب داغ دوشونده دل داغلی
اولاردا آغلادی بو داغداره عبدالله
او حالتیله گیجه قورتولوب گون ایتدی طلوع
دوزوبله آل علینی قطاره عبدالله
چکوبله قتلگهه اهلبیت اطهاری
دونوبدی گوندوزوموز لیل تاره عبدالله
نه قتلگه یخلوب سرولر صنوبرلر
دوشوبدی قول بوداغندان کناره عبدالله
ولی شمیم وفا سربسر او دشتی دوتوب
شبیه ایدوب او چولی لاله زاره عبدالله
ریاض خلده تفاخر ایدور آچان گل لر
امید وصل یارالدور بهاره عبدالله
ولی اگر اولا مینلر بهار مینلر گل
بو گل لرین تایی گلمز دوباره عبدالله
همان او بار مصیبت لر اولدولار باعث
خلل یتشدی قد استواره عبدالله
دایاندی خامه دوشور اصلی نطقدن طبعون
چون عرصه تنگدی هر نامداره عبدالله
یقین توجّه ایدوبدی اوزی خانم زینب
بو شعر بانمک و آبداره عبدالله
حاج عبدالله اصلی
منبع مجموعه کانالهای مدح و مرثیه
موضوع: حضرت زینب کبری (س) زبانحال ,
زبان شعر و شاعر: نوحه ترکی , حاج عبدالله اصلی
-------------------------------
زبانحال حضرت رباب (سلام الله)
علی نه تک سنون احوالیوه رباب آغلار
من آغلینده گوزوم اوخشار اشگناب آغلار
او گونکه حنجرون اولدی هدف سه پر تیره
منیمده اولدی گوزومده ایشیق گونوم تیره
نه رغبتیم داخی مرداده وار نه وار تیره
او تیر عرشی ایدوب تیره نه قباب آغلار
او گوندن اولدی سیه جسمده وفا رختیم
توکندی خوش گونوم اوز گتدی گتدی عالم سختیم
ستمله ایتدون افول ای ستارهء بختیم
قمر یوزون بورویوب هاله آفتاب آغلار
دیمه شرارهء آهیم گویه عبث اوجالوب
فلک امیدیمین آئینه سینی داشه چالوب
یانان دوداقلاریوین سوزشینی یاده سالوب
اود اوسته اشگین اَلر حالیوه کباب آغلار
او گوندن ایلمیشم نفسیمه سرین سو حرام
محالیدور گوتورم عکس عهدیمه بیر گام
گون ایوی تپراقین اوستی اولوب ربابه مقام
باخاندا صورتیمه آل بوتراب آغلار
سحر اَسنده گل بختیم اوسته باد نسیم
گوزوم ایوینده ایدر عکس حُسنوی ترسیم
سرشگیله سیلرم ایلرم گینه ترمیم
اورک گوزوم گوره عکسون اولوب خراب آغلار
بهار ولاندا آچار غنچه گل گولر چمنه
یتر سرور و شعف ورد و یاس و یاسمنه
اگر جهان اولا گلشن گینه خزاندی منه
بهاریده سارالان غنچه مه سحاب آغلار
دیم نقدر اورک دردی یتمز اتمامه
باشونلا همره اولوب گیتمیشم نجه شامه
مرکب اشکیم اولوب کیپریگیم یازار نامه
آناوا گلمز او غم نامه دن جواب آغلار
سنیله آلتی آی ای غنچهء ریاض امید
اولاردی لیلهء ظلمت گوزومده روز سپید
او گونلریم هارا گیتدی هانی او بخت سعید
گوروم قالیدی بیله عالمِ خراب آغلار
عجب دونرگمی دوندردی چرخ پست و دنی
عزیز عالمیدیم اوخشادوب کنیزه منی
گلین گلن ایویم اولموش مصیبت انجمنی
پوزولموش حالتیمه جمله شیخ و شاب آغلار
اُلنجه گون قباقندا او بانوی ذی شان
علی علی دیدی اشگین عذاره قیلدی روان
گهی سیزیلدادی نی تک گه ایتدی داد و فغان
بو غمده چنگ و نی و بربط و رَباب آغلار
بیر عمر اولدی غم و درد و محنتیلن توش
اوز آتشنده یانوب شمع تک اولوب خاموش
اجل پیاله سینی نوش ایدوب دوشوب مدهوش
او چشم مستینه قان کاسهء شراب آغلار
دیولّه زینب کبری او بحر صبر و وقار
نماز صبحه ربابی گلوب ایده بیدار
چاغوردی دورمادی ترپتدی جسمنی ناچار
گوربکه روحی اوچوب عکس جسمه قاب آغلار
دیدی گلون ایویمون سوندی شمع انجمنی
دانشموری چمنون عندلیب خوش سخنی
بو گیر و داریده ترک ایلوری سولان چمنی
چکوب اُلوم توزی رخسارینه حجاب آغلار
او کسکه اصلی ویرار عشق و عاشقیدن دم
طریق عشقی گرک طی ایده قدم بقدم
دایانا بوتهء غمده یانوب گتورمیه کم
مرید سلک وفا اولماسا مذاب آغلار
اماندی ساخلا الون ویرمه مطلبه چوخ طول
حدیث عشقده ابوابه نابلدی عقول
تک عینینه یازولا مین مطوَّل و کشکول
کلام نقص اولی خامه سنار کتاب آغلار
بلی بو عشقیدی پروانه شمعه یانمالیدی
نگارین آردیجا صحرالری دولانمالیدی
خُم بلایه دوشن رنگینه بویانمالیدی
گلنده جوشه اود استونده کی گلاب آغلار
حاج عبدالله اصلی
منبع مجموعه کانالهای مدح و مرثیه
موضوع: حضرت رباب (س) ,
زبان شعر و شاعر: نوحه ترکی , حاج عبدالله اصلی
-------------------------------
ورود به ماه محرم
گورسَنوب چون هلال محرّم
عالمی دوتدی اندوه و ماتم
باشلانوب زینبه غم اساسی
شیعه لر گِیدی ماتم لباسی
باخسا هر کیم بو آیدا هلاله
غرق اولار بحر درد و ملاله
جاری ایلر سرشکین جماله
اوج ایدر عرشه داد و نواسی
غم اودوندا گرک شیعه یانسون
رنگِ ماتم خُموندا بویانسون
باش آچوخ کوچه لرده دولانسون
دلده ایوای حسین وای صداسی
عرشه بو آیدا قاره چَکیلدی
شیعه لر باشینه کُل توکولدی
زینبون سرو قدّی بوکولدی
باشینه سالدی قارداش قراسی
گرد غم کربلا دشتین آلدی
گُلستان پیمبر سارالدی
بلبلون حسرتی دلده قالدی
دولدوروب گُلشنی آه و واسی
کربلاده بو آی آل سفیان
اکبری ایتدیله قانه غلطان
شانه تک پیکری اولدی شان شان
توپراقا دوشدی قدّ رساسی
گُل کیمی جسمینی اهل کوفه
ظلم اَلیله چَکوبلر سُیوفه
اوخ قلج یاره سین اوتدی روفه
باغلانوب خار و خَسله دِماسی
اوچولار مجتبی یادگارین
صید ایدوب پیکر زخمدارین
عمرونون سولدوروب نوبهارین
اولدی فصل خزان آشناسی
دوشدی فرصت عجب اهل شامه
قاسمون گوندوزی دوندی شامه
باد غم گَتدی محنت مشامه
باغدیروب بارش غم هواسی
دوشدی بلبل بو آی آیری گُلدن
منده دل یوخ ایدم شرح دلدن
اصغری تشنه لیق سالدی دلدن
حالینه باخدی یاندی آناسی
یاره لی قوش تک اول شیرخواره
گَلدی گهواره ده آه و زاره
اُفّ اولا کینه لی روزگاره
تشنه اَُلدی ربابون بالاسی
شاه دینون بو آی سرسپاهی
آرخاسیز قویدی چوللرده شاهی
قالمادی اهل بیتون پناهی
لشکرین چون یخلدی لواسی
تا خسوف ایتدی ماهی حسینون
دوتدی افلاکی آهی حسینون
قالمادی بیر پناهی حسینون
سیندی صفلر داغیلدی قواسی
آغلارام تا وارام بو سوز اوسته
سرسپه دوشدی آتدان یوز اوسته
گَلدی شه باشین آلدی دیز اوسته
سویلدی ضربِ شصتون فداسی
سرسپاه اُلدی، اهل شقاوت
چَکدیلر نقشه ی قتل و غارت
بیر سوسوز شاهه یوز مین جماعت
ووردی نیزه قلج اوخ یاراسی
شیعه گَلمَز نجه آه و زاره
باغلاماز اشک چشمی عُذاره
خیمه لرده نچه ماه پاره
اولدی نارِ جفا آشناسی
اصلیم دلده چوخ محنتیم وار
اوز یِریمده غم غربتیم وار
کربلا مُلکینه حسرتیم وار
دردیمون کربلادی دواسی
حاج عبدالله اصلی
منبع مجموعه کانالهای مدح و مرثیه
موضوع: ماه محرم ,
زبان شعر و شاعر: نوحه ترکی , حاج عبدالله اصلی
-------------------------------
غزل
ساقی گتور پیالهء زرّین و زرنگار
ویر باده اولدورور منی بو شدّت خمار
واردی بوگون بومیکده ده اوزگه شوروحال
مدهوش وسرگران یخیلوب مست وهوشیار
جامِ می ایچره جلوهء دلدار گورسنور
بیر جلوه ایکه الدن آلور صبر و اختیار
آوای شورِ عشق گلور جان قولاقینه
دل گلشنین احاطه ایدور نکهتِ نگار
معنای عشقی شرح ایدوری گل ورق ورق
روحه ویرور نسیمِ سحر مژده ی بهار
قمری اوخور ترانه، عراق اوسته شوریله
دشت حجازه ذوق ویرور نغمهء هزار
غنچه آچوبدی لعل لبین گُل گولور گُله
بلبل وصالیدن دانیشور بولمورم نه وار
لاله یانور چمنده چیچکلر فرحلنور
شبنم محبتیله گُل اوستن سیلور غبار
رقص ایلوری بنفشه و نسرین ونسترن
گلشن ترنم اوسته گلور شوره لاله زار
دریای فکره غوطه ویریردیم نه وار مگر؟
اَلوان لباسیله بزنوب دشت و کوهسار
ناگه یتوردی باد صبا گوش هوشیمه
ای باده نوش میکدهء یار گلعذار
باخ بیر بسیط عالمه چشم بصیریله
عطر نگاریدن جان آلوب جلوهء سحار
اصلی بو گلسِتان ویروری روحه تازه جان
سنده غزل سرالیق ایله عندلیب وار
حاج عبدالله اصلی
منبع مجموعه کانالهای مدح و مرثیه
موضوع: غزل ,
زبان شعر و شاعر: نوحه ترکی , حاج عبدالله اصلی
-------------------------------
غزل
کیم گوره پرتو حسنون مه تابانی نئدر؟
لب لعلوندن اوپن لعل بدخشانی نئدر؟
خضر سرگشته حیاته یتیشر لعلوندن
داها چوللرده دوشوب چشمه حیوانی نئدر؟
قاشلارون طاقیدی محراب عبادتگه عشق
گوزلرون معتکفی دیر و کلیسانی نئدر؟
کپرگون قانیمی آخدیرسا سو تک اوف دیمرم
جان که اوز روحونی عشق اوسته ویره قانی نئدر؟
مصر بازارینه گر جلوه حسنون دوشسه
پیرزن الده کلف یوسف کنعانی نئدر؟
آتش عشقیوه یاندیقجا چوخالدی هوسیم
اودلانان عشق اودونا دهریده درمانی نئدر؟
یاز اورک باشینا عشقین سوزون اغیاره دیمه
اصلی کیم یاره یازا شعرینی دیوانی نئدر؟!
حاج عبدالله اصلی
منبع مجموعه کانالهای مدح و مرثیه
موضوع: غزل ,
زبان شعر و شاعر: نوحه ترکی , حاج عبدالله اصلی
-------------------------------
احوالات حضرت موسی بن جعفر (علیه السلام)
الهی بنده ی عشقم گوزل نام و نشانیم وار
دلیل عشقیمه بوینومدا طوق آسمانیم وار
منه محبس دگول میعادگاه عشقدور زندان
سنیله درد دل ایتماقلیقا عالی مکانیم وار
جبینیم سجده ده دل محضرونده ذکره مشغولم
عجب محراب عشقم وار عجب ورد زبانیم وار
یانان بیر شمع تک اوز آتشینده اودلانور قلبیم
گورنمز شعله سی بیگانیه سوز نهانیم وار
دونوبدور دود آهیم ابره قلبیم آسمانینده
ستاره تک آخان گوزدن یوزه اشگ روانیم وار
غریبم بیکسم زندانیم،ساقینیده کنده
قوجا بیر سید اولسامدا گینه درده توانیم وار
طبیبه یوخ نیازیم دلده دردیم درد عشقوندور
دایانام مین بیله درد اولسا تا جانیمده جانیم وار
خیال ایلور منی محبوس ایدوب هارون کین پرور
ولی فکر ایلمور شهبازه لایق آشیانیم وار
وئریب زهر جفا قلبیم یانور جسمین دوتوب لرزه
یوزوم توپراقلار اوسته دلده داد و الامانیم وار
منه هر گون ویرور بیر نوعیله سند دنی ایذا
بو خلوتگاهیده گور نه ستمگر میزبانیم وار
اگر چه یالقزام یوخ همدمیم بو کنج غربتده
ولی اوز شهریم ایچره بیر صفالی گلستانیم وار
نچه نازلی گلوم وار نچه ایلدی باغبانسیزدور
گوزی یولدا قالان نسرین و یاس و ارغوانیم وار
بهشتین گلشنی حسرت چکر بیر یول یوزین گورسون
رضا آدلی او گلشنده گل نزهت فشانیم وار
کناریمده اگر اولسیدی جان اوسته او دل خسته
ائدردی رو به قبله بیر گورردیم مهربانیم وار
باخور احوالیمه فریاد ایدور زنجیریله کنده
سیزیلدور محبس غم گور نه سویلور میهمانیم وار
خدا بو جمعیله بیر وقفه اصلی کاظمین ایستر
او غملی بُقعَده گورسون اَحِبّا، نه فغانیم وار
اوخییوم آغلیوم نوحه یازوم تا روز محشرده
خانم زهرا بویورسون بیر یانقلی نوحه خوانیم وار
حاج عبدالله اصلی
منبع مجموعه کانالهای مدح و مرثیه
موضوع: حضرت امام موسی کاظم (ع) احوالات ,
زبان شعر و شاعر: نوحه ترکی , حاج عبدالله اصلی
-------------------------------
غزل
یولون فراز و نشیبی
دولان گوگل قوشی هر بیر یری دولانمالیسان
گینه گلیب بو سینق دلده دالدالانمالیسان
سنه دیدیم ره عشقه اماندی قویما قدم
اینانمادون سوزومی ایندی گور اینانمالیسان
شرار شمعی گوروب مایل اولدون آتشینه
داخی گلایه یری قالمیوبدی یانمالیسان
یولون فراز و نشیبینده تئز دگیشمه یولی
اَیاقون آبله ده اولسا سهل سانمالیسان
دلون اَلون اَیاتون گر کسیلسه میثم تک
طریق عشقده صبر ایلیوب دایانمالیسان
نه رنگه سؤیسه بویار کیم خُم بلایه دوشه
نه آق نه قاره هامی رنگینه بویانمالیسان
توکولسه اوستوه داغلار کیمی مصیبت لر
یول آچ دینن دل ویرانمه قالانمالیسان
سپاه محنته قلبیم ایوینده یر ویردون
آچوبلا غارته اَل گوردوله تالانمالیسان
منای عشقده ذبح ایتدیله منی گولدون
خیال ایلمه دون سنده پارچالانمالیسان
بولانماسا سو دورولماز دیوب قدیم کیشیلر
دورولماق ایسته سه گوگلون اگر بولانمالیسان
علی دِیَن دایانار جور و ظلمه قنبر تک
یاغیش کیمی باشوا غم یاغا اوسانمالیسان
علی ولایتی اصلی حصار محکمدی
گدا صفت در کوینده دالدالانمالیسان
بیر عدّه آرخالانار ملک و مال شوکتنه
على ولایتنه سنده آرخالانمالیسان
سروش غیبی وورور هی که باغلا بار سفر
زمان کوچ یتوب خوابیدن اویانمالیسان
اماندی توشه گوتور بوش الیله محشرده
حضور فاطمه دن شرم ایدوب اوتانمالیسان
حاج عبدالله اصلی
منبع مجموعه کانالهای مدح و مرثیه
موضوع: غزل ,
زبان شعر و شاعر: نوحه ترکی , حاج عبدالله اصلی
-------------------------------
غزل
گوزلردن
کونول بیر باخماقیله مست اولوب مستانه گوزلردن
خمارم بیرده دولدور ویر ایچیم پیمانه گوزلردن
او گوزلر گوز آچاندان، قدر و قیمیت می دن اسگیلدی
سینوب پیمانه دوشدی ارزش میخانه گوزلردن
او گوزلر بیر باخیشدا سینمی گورنه ایدوب گوز گوز
ویریلدم کوی عشقینده بو یاندیم قانه گوزلردن
گوزوندن گوز یاشون تک گوز لره قربان منی سالما
اماندی قویما دوشسون بیر دقیقم یانه گوزلردن
ایلیم آرخام جلالیم عزتیم شأنیم سوزوم سنسن
اَلیمدن دوت کنار ایله منی بیگانه گوزلردن
اَل اوزدوم عزّ و جاهیمدن او گوندن چوللره دوشدوم
اوتوزدوم عقلیمی اولدوم بیله دیوانه گوزلردن
شرار شمعه اودلانماق اولوب ضرب المثل امّا
منیم تک کیم یانوب مثل یانان پروانه گوزلردن
کمند عشقیله چاه زنخدانونده محبوسم
قنادی باغلانان صیده ویر آب و دانه گوزلردن
فقیرم مستحقم احتیاجم بیر نگاهوندور
گدای درگهه پای ویر بو گون شاهانه گوزلردن
گلوبدی طوطی طبعون دیله اصلی اوخور دستان
شیریندی قندیدن یازماق بیله افسانه گوز لردن
حاج عبدالله اصلی
منبع مجموعه کانالهای مدح و مرثیه
موضوع: غزل ,
زبان شعر و شاعر: نوحه ترکی , حاج عبدالله اصلی
-------------------------------
در مدح حضرت فاطمه زهرا (سلام الله)
مه سپهره ویران طعنه صورتوندی خانم
منور ایلین آفاقی طلعتوندی خانم
گل ریاض بهشتی گر اشتهار تاپوب،
ویرن صفا او گلستانه نکهتوندی خانم
او کوثری که خدا وصف ایدوبدی قرآندا،
به عین آیت شان و جلالتوندی خانم
فلک ملک متنعّمدی خوان فضلوندن،
تمام خلق اودی مرهون منّتوندی خانم
حدیث عشقیده کی فضل لن تنالو البِرّ،
کرامتوندن او بیر آیه آیتوندی خانم
عروس کوینگینی سائله عطا قیلماخ
نشانه کرم و بذل و رافتوندی خانم
حجاب سنله شرافت تاپوب چاتوب شرفه،
حجابه زینت اولان حجب و عفتوندی خانم
اوزیوی ایوده ده اعمادن ایلماخ پنهان،
دلیل عفت و تقوا و عصمتوندی خانم
جلال و مرتبتون وصفی گلمز اوصافه،
سبب بو امره یقین اوج رتبتوندی خانم
دل اهلی محفل انسی ده ذکر ایدر آدیوی،
ویرن او بزمه صفا ذکر و صحبتوندی خانم
کیمم که من سیزه مداح اولوب مدیحه دییم،
محبت و نظر و لطف و رحمتوندی خانم
حجاز نغمه سینی نی نوائیله اوخیور،
نوای نی ده کی غم درد فرقتوندی خانم
اوزاتمیشام الیمی آستان اقدسیوه
عنایت ایت منه روز ولادتوندی خانم
اگرچه اصلی خطا کار و رو سیه دی ولی
امیدی روز جزاده شفاعتوندی خانم
حاج عبدالله اصلی
منبع مجموعه کانالهای مدح و مرثیه
موضوع: حضرت فاطمه زهرا (س) مدح ,
زبان شعر و شاعر: نوحه ترکی , حاج عبدالله اصلی
-------------------------------
غزل
صبا ویردی خبر یارون گلور چوخ طمطراقیله
مگرشه لر گلر بوطمطراق وبوسیاقیله
گوزللر دسته به دسته آلوب دوروبرین یوخسا
دییرسن آی چیخیب برج محبتده محاقیله
یول اوسته گل دوزوبلرلاله لر یکسر یانور گل گور
اوخوربلبل حجازی نغمه نی شوروعراقیله
قیروب دیوانه تک زنجیرهجری؛ وصلین عشقیله
دالنجا داغ داشا دوشدوم قاباراولموش ایاقیله
الیم چیخمیش اوزون مدت اولاردامان وصلیندن
گیجه گوندوز یانوب اوتلانمیشام نار فراقیله
یخلدیم گوزیاشیله گوزلریم دولدی یوزوم یئرده
دئدیم بلکه سسین آلدیم ایاقینون قولاقیله
ره میخانه نی افتان وخیزان آختاریب تاپدیم
الیمدن رحم ایده ساقی دوتا بلکه ایاقیله
بویاندیم قانمه فرهاد تک کوه محبتده
کی یاریم خونبها ویرسین منه شیرین دوداقیله
اوکس کی ادعا ایلردیرمن عاشقم بولسون
خم غمده گرک مین رنگه دونسون بیربویاقیله
بودور رسم زمانه هانسی سروین سایه سی اولسا
قیراللار شاخ وبرگین سیندرالار قول بوداقیله
ره عشقه قدم قویسا بیری (اصلی) بو واضحدور
گرک دردوبلانی جانه آلسین اشتیاقیله
بونا فخرایلیرم بیرخواجه ی عشقه غلامم که
آیرمازمن کیمی قاره یوزی بوخواجه آقیله
حاج عبدالله اصلی
منبع مجموعه کانالهای مدح و مرثیه
موضوع: غزل ,
زبان شعر و شاعر: نوحه ترکی , حاج عبدالله اصلی
نظرات (۰)
هیچ نظری هنوز ثبت نشده است