متن نوحه ترکی مرحوم انور اردبیلی بخش اول

متن نوحه ترکی اشعار انور اردبیلی ویژه محرم و ایام سوگواری ائمه اطهار علیهم السلام

بخش اول

در احوالات حضرت رباب (س)

 

یوخ اعتبار ذرّه بو دنیای فانیه

بیهوده دور کیم عشق ایده دورِ زمانیه

 

فرمایشِ حسیندی بو سوز دقّت ایلیون

مشتاقسوز اگر سخنِ صادقانیه

 

اولسیدی بو جهاندا اگر مِهر و عاطفه

یحیا باشین قباقه قویانمازدی زانیه

آختارمیون صفا بو پُر آشوب دهرده

دریای غصّه دور یولی یوخدور کرانیه

 

اولسیدی اگر صفا ، دیشی سینمازدی خاتمون

قیلمازدیلار جفا او گُلِ جاودانیه

 

فرصت تاپوب عدالت الین باغلادی زمان

زهرا دوشوبدی نایرهء ظلمِ ثانیه

 

باغلانماسیدی ظلمله شیرِ خدا الی

قنفذ نجه آتاردی الین تازیانیه؟

 

کرب و بلایه چک سوزی ای طبعِ نکته سنج

دُرّ سخن گزورسن اگر گیت خزانیه

 

بیر کلمه سوز یازیب ایله بو دهردن سؤال

نسگل اولا سوزون مللِ هفتگانیه

 

اصغر کیمه اوخ آتمیشیدی؟ ظالم حرمله

چیخدی عوض بوغازینی قویدی نشانیه

 

علّت اودور ئولنه کیمین آغلادی رباب

نفرت گوزیله قیلدی نظر زندگانیه

 

کسدی همیشه سایه لی منزلدن الفتین

گوزدن سرشگینی اَلَدی صحنِ خانیه

 

هی یالوارادیلار ائوه گَل چولده آغلاما

تپراق قونوبدی زلفیوه حسرتدی شانیه

 

صحن سراده قالما یورولموش هما کیمین

آخر هما یورولسا گلر آشیانیه

 

کاشانیه گتیر بالاوین گاهواره سین

ترپدیقیجا اوخشاما دئ گَل ترانیه

 

لای لای چال اصغره سسیوه بیزده سس قوشاخ

ماتم توتاخ چوخ ایستدیقین نازدانیه

 

آرامیوی آلیبدی گونوزلر گون ایستیسی

حسرتدی گوزلرین گجه شمعِ شبانیه

 

وار خواهشیم دیردیکی اوز ویرمیون منه

دردیم اورکده چوخدی اسیرم زمانیه

 

اوغلی ئولن ، ائوی یخیلان ، نیلیری ائوی؟

من طالبم قویام یوزومی آستانیه

 

نه بستره واریمدی علاقه نه مسکنه

گر قصر اولا یریم گینه فرق ایلمز منه

 

دیلده ایدوب اوغول آدین ازبر من آغلارام

هر سوز باشی دیوب علی اصغر من آغلارام

 

نفرین ایدین او شخصه کی اوخ نقشه سین چکیب

ایلوب آنالاری قره معجر من آغلارام

 

بیر اوخ منیم عوض ایلدی سرنوشتیمی

عمروم گر اولسا تا دمِ محشر من آغلارام

 

قبره یارالی گئتدی کبوتر کیمین بالام

گورسم اگر یارالی کبوتر من آغلارام

 

دشت ِبلاده بیر ملر آهو ایتیرمیشم

نیلوم غزالیمی اورک ایستر من آغلارام

 

تک اوخ دگل ، سوداندا واریمدی گلایه چوخ

هر سو ایچنده قلبی مکدّر من آغلارام

 

گورسم سودان چیخان بالیق آغزین آچیر یومور

حتما" بو قلبیمه اثر ایلر من آغلارام

 

صیّادیلر یارالاسا آهو بوغازینی

دیلسیز یارالی اوغلوما بنزر من آغلارام

 

گهواره اولدی قبری ، تراب اولدی بستری

سالسا آنالار اوغلونا بستر من آغلارام

 

نیلوم اورک اوتون گینه گوزیاشی سوندورور

کور اولسادا بو اشگیلی گوزلر من آغلارام

 

صحنِ سراده جان نقدر چیخمیوب وارام

ناله سسیمنن اینجمه سوز من یورولمارام

 

باشین آغاتدی ویردی باشا قاره گونلرین

پروانه وار عشق اودی یاندیردی شهپرین

 

نه استراحت ایتدی نه ایچدی سرین سودان

نه شانه گوردی زلفی نه هوردی هوروکلرین

 

صبحون زمانی زینب او گنجینیهء وقار

دوردی نمازه عشقیله ترک ایتدی بسترین

 

صحن ِسرایه قویدی قدم دستماز آلا

گوردی رباب اوخشامیری دیلسیز اصغرین

 

خاموش اولوب گیدوب یوخیا گلمیری سسی

یوز قبله ده چکیب یوزونه قاره معجرین

 

دیسکیندی زینبین اورگی سسلدی رباب

سس گلمینده بیر بیرینه ووردی اللرین

 

فورا" اوزون یتوردی اونون باشی اوستونه

قویدی یوزون سولان یوزونه ترپَدّی پیکرین

 

گوردی محالیدور اویانا گوزلرین آچا

دستِ ممات پارچالیب عمر دفترین

 

دینجلمین رباب ایله دینجلیب یاتیب

الدن ویریب خزانهء غم غملی گوهرین

 

راحت دئدی نه یاتمیسان ای بانوی حیا؟

کیم سیلدی جان ویرنده سنون آلنوون ترین

 

کیم سن کیمی یورولدی ملال و فشاریدن

یومدی گوزون گلایئله روزگاریدن

 

نسگیل لرون بو قلبیده گلمز شماریه

دوندی گوزونده محبسه دنیای عاریه

 

پر ووردون آتش ِغمه یاندون یورولمادون

پروانه تک هوس ایلدون سن شراریه

 

چوخدور غمون بو درده اما چوخ آغلارام

سوز درک ایدن کفایت ایدر بیر اشاریه

 

گون رنگیوی قراتدی ، گورنلر دئدی منه

قویما حیاطی ایلیه مسکن بو جاریه

 

آچ گوزلرون نه خوابِ عمیقه گیدوب گوزون؟

سالما فراق اودون بو دلِ پاره پاریه

 

اقبالیوون ستاره سی سوزموشدی لاجرم

قان آغلادون همیشه باخاندا ستاریه

 

گَل نطقه بیر چوخ ایستدیگین اصغره گوره

هر گونکی تک یتور الیوی گاهواریه

 

گر طاقتون یوخوندی سنه ایلیوم کمک

من ترپدیم سن اوخشاما دئ شیرحواریه

 

سوز چوخدی بو زمینه ده امّا یازانمیرام

غسل و کفن اولوب او اورک پاره پاریه

 

زین العباد قبره قویوبدور آناسینی

گویا بو دللریله دوتوبدور عزاسینی

 

ای مظهرِ محبّت و مِهر و وفا آنا

ای معدن ِعطوفت و شرم حیا آنا

 

ای عمرینی فنایه ویرن صحن ِخانه ده

وی اشگریزِ گوشهء صحن و سرا آنا

 

ای گوز یاشین سولان یوزونه زینت ایلین

باش غم دیزینده غملریله آشنا آنا

 

قارداشلاریندا گَلدی قویوب گتمدون بیزی

خلق ایلین اوزی سنه ویرسین جزا آنا

 

غملی مزاریوی اوزوه آشیانه قیل

دینجل بیر آز بو قبریده ای مهربان آنا

 

یادّان چیخاتمارام سنی هر قدر زِندیَم

هر گون نمازیده ایدرم من دعا آنا

 

گیت اصغری بهشتیده آل سینن اوستونه

روح عالمینده روحیوه ویرسون صفا آنا

 

سندن سو ایستمز نه صوده احتیاجی وار

زهرا آناسی حلقینه قویموش دوا آنا

 

یانماز چراغی حرملنون ده سونر یقین

چون انتقام وعده سی ویرمیش خدا آنا

 

(انور) حضورِ شه ده قبول اولسا بو سوزون

خلق آغلیاندا روزِ جزا آغلاماز گوزون.

 

مرحوم انور اردبیلی

منبع مجموعه کانالهای مدح و مرثیه

موضوع: حضرت رباب (س) ,
زبان شعر و شاعر: نوحه ترکی , انور اردبیلی

 

----

 

در مدح حضرت زینب (سلام الله)

 

قائم مقامیدی خانم زهرایه زینب

اولدی رقییله بو گون همسایه زینب

 

شام بلاده گون مثلی باتدی

آغلار گوزوندن دنیانی آتدی

 

قان آغلا ای گوز اون بش ماه رجبدی

یوم وفات بانوی والا نسبدی

 

عصرین امامی باش آچوب دل مُلتهبدی

یانمش ئورکله چون گئدوب عُقبایه زینب

 

زهرا مثالی رخساری سولدی

ساچلار آغاردی قامت خم اولدی

 

اوج بلاده مات ائدوب عنقای قافی

خالص چخوبدور امتحاندان عشقی صافی

 

تعریفنه بو جمله سوز کافیدی کافی

بانیدی فیض یوم عاشورایه زینب

 

گر اولماسیدی زهرای ثانی

مظلوم حسینون باتمشدی قانی

 

غم یورقونی یول خسته سی قلبنده آهی

شام اولدی آخر منزلی تبعید گاهی

 

داغلی ئورکده اللری دیلده الهی

گوز یومدی گئتدی محضر زهرایه زینب

 

گر چه ئولنده چاتدی مراده

روحی قالوبدور کرب وبلاده

 

آخر نفسده دوتدی یوز کرب وبلایه

قارداشلارینی سسلدی بیر بیر هرایه

 

غملر چکن باجوز گئدور ملک بقایه

یالواردی چوخ قولسوز یاتان سقایه زینب

 

زحمت قبول ائت هجری بهم وور

گَل قبریم اوسته قارداش علم وور

 

باخدی یولا دوشدی تواندان منتظر گوز

سس گلدی گویا غیبدن نینک خانم ، دؤز

 

بیرده ئورکلندی دئدی بیر یاندیران سوز

بی کس گلوب یا رب مگر دنیایه زینب

 

هر حالدا دیلده ذکریم وار الله

درگاهیوه چوخ شکریم وار الله

 

گاهی دئدی کاش عونیله جعفر گلیدی

گاهی دئدی قاسم حسن منظر گلیدی

 

یاده سالیدی عمه سین اکبر گلیدی

حسرتدی چوخدان مظهر طاهایه زینب

 

گلسیدی آلِ عصمت فقیهی

یاسین اوخوردی یاسین شبیهی

 

بیر عمردور اشکیم اولوب زیور دو عینه

جان طایریم دوشموش کمند شور و شینه

 

من کوفه ده باش یارمیشام مظلوم حسینه

جانان یولوندا جان قویوب سرمای زینب

 

القانیم آخدی زلفوم بلشدی

من یاره لندیم قزلار ملشدی

 

گوردی گلن یوخ کربلادن کشف رازه

ناچار اولوب دوتدی یوزون سمت حجازه

 

پروانه لر تک باشلادی سوز و گدازه

دردین دئدی انسیۀ حورایه زینب

 

مورگلرینده قان تیتریوردی

لبلر اسوردی جان تیتریوردی

 

سسلوردی ای بار بلادن قدّی خم گل

غم غصه لردن ایلیوب قلبیم ورم گل

 

پهلولری آی ظلیمله سنمیش ننم گل

ایستور باخا سیلی دگن رخساره  زینب

 

منده دوگولدوم چارم یوخیدی

کرب وبلاده قنفذ چوخیدی

 

عمروم قوتاردی گورمدیم دنیانی ایمن

گَل منله باهم ایلیک بو یرده شیون

 

محسن غمندن سن دانش اصغر غمین من

دوتسون عزا اول غنچۀ زیبایه زینب

 

دوشمز دیلیمدن آدلاری هرگز

محسونده دیل سیز اصغرده دیل سیز

 

 مرحوم انور اردبیلی

منبع مجموعه کانالهای مدح و مرثیه

موضوع: حضرت زینب کبری (س) مدح ,
زبان شعر و شاعر: نوحه ترکی , انور اردبیلی

 

----

 

زبانحال حضرت زینب (سلام الله) با حضرت زهرا (سلام الله) در حال احتضار

 

یورقونام کنار دمشقده

دوشموشم توانادن آی ننه

غصّه لر گرفتاری زینبون

آیریلور بو دنیادن آی ننه

 

سن گزن مصیبت آغاجلارین

شاخه شاخه گزدیم زمانه‌ده

یاندی درگهون ئولدی محسنون

وردیلار سنی صحن خانه ده

 

چکدیلرمنیم خیمه می اودا

بال و پر وروب آشیانه ده

بیر عقاب تک ایلدیم رها

ناخوشی او بلوادن آی ننه

 

کیم منیم کیمی غملی عمریده

روزگاریله پنجه نرم ایدوب

نامزد قیزی کاروانده باش

آچیق گورن وقته شرم ایدوب

 

قلبمون اودی اشک چشممی

چشمه مثلی چشممده گرم ایدوب

بیر کسیم حرارتلی اشکمی

سیلمیوبدی سیمادن آی ننه

 

بحردور مصیبتلریم منیم

منده غوطه‌ور بحره فی المثل

دست و پا وروردوم کرانیه

یتمیوردی نیلوم ئولونجه ال

 

آند اولا کفنسیز حسینمه

یاخشی وقت الیمدن دوتوب اجل

ساحل نجاته چخور قزون

موج خیز دریادن آی ننه

 

زهر غم اوشاقلیق زماندن

شیرین عمریمی ایلدی آجی

چون فلک سویوق باخدی زینبه

بختمون اودور قزمادی ساجی

 

یدّی قارداشیمدان بیری هانی

سسلنه باشیم اوسته آی باجی

بَهرَم اولمادی غصّه دن سوا

اسم با مسمّادن ای ننه

 

نقطه فرض قیلسون وجودیمی

دورمه وروب غصه دایره

شمع‌لر باشندان یانار منی

سر بپا دوتوب سوز نایره

 

سوزناکتر نسگلیم بودور

گلمشم خوشوم گلمین یره

اینجیوبدی روحیم ننم جانی

شام فتنه بر پادن آی ننه

 

گوگلوم ایستیور شامده سنی

گل اجل گلن بسر اوستونه

آخرین نفس لطف سایه‌سین

سال بو جسم نیلوفر اوستونه

 

غصه لر سارالدان یوزی قویوم

محسن اممین دوشلر اوستونه

من اوخای دیوم سنده آخ دی

جان دوشنده یارادن آی ننه

 

مُهر مِهر عشق حسینیله

باغلورام بوگون عشق دفترین

من آچانمدیم غسل ایدن گلر

باشمون آچار قاره معجرین

 

شمر خنجریندن دوتان الیم

قوّه یوخ سیله آلنومون ترین

پر توان مصیبت توانمی

سلب ایدوبدی اعضادن آی ننه

 

غسل ایدنده یثربده نصف شب

مغسل اوسته شیر خدا سنی

اوخشاما دیوردوم حزین حزین

اوخشیوردوم ای بینوا سنی

 

اوخشاما دیین یوخدی زینبه

ایستیور بو بی اقرباسنی

منتظر قالوب آغلیان گوزوم

کچمه بو تمنّادن آی ننه

 

دستگیر اولوب شامه گلموسن

جور و ظلم اعدادن آی بالا

دلشکسته ایتدی فلک سنی

دلشکسته زهرادن آی بالا

 

منشی ازل شام تپراقین

خسته جسموه ثبت ایدوب مزار

کربلا کتابنده آدوی

سردبیرلر قهرمان یازار

 

سوزلرون سنون تیز تیشه تک

ظلم نخلنون ریشه‌سین قازار

قان توکن قلنج باج آلانمیوب

نطق تیز و برّادن آی بالا

 

حق دانشماقیلا حقیقتی

پشت پرده‌دن چکموسن اوزه

نیش خار تک باتدی هر سوزون

آل هاشمه کج باخان گوزه

 

سن دوزن مصیبتلره چتین

روزگارده بیر نفر دوزه

گورمدون صفا اولدی هر گونون

قاره لیل یلدادن آی بالا

 

فاطمه بُلوردی لیاقتون

وار سنی اودور ایتدی جانشین

ایلدون عمل من دیین سوزه

هر وصیّتیم آلدی اوز یرین

 

آخرین زماندا نیابتاً

ئوپدون اوغلومون تشنه حنجرین

شاد قیلدون افسرده روحیمی

یاخشی فیض معنادن آی بالا

 

قارداشیلا هیچ باجی سن کیمی

قسمت ایتمیوب غصّه لر پایین

ایلدون حسینه گوره فنا

روزگاروین ایللرین آیین

 

مُحتسب‌لری حیرته سالوب

اولمادی بلن دردوین ساین

بیر خمیده قدّون نما قالوب

سرو قدّ رعنادی آی بالا

 

واقفم فراغت گورنمدون

شاهدم نه آسوده یاتموسان

تازیانه دگمش وجودیدن

قاره‌نی هاچان سن چخاتموسان

 

فاطمه حوره قاره تل‌ لری

تل به تل عزاده آغارتموسان

قارداشون ئولوب آیریلوب حنا

زلف عنبر آسادن آی ننه

 

دعوت ایلوسن جانویرن زمان

یاسوی گلیم ساخلیون قیزیم

من نجه او گوزلر که اوغلوما

دائم آغلیوب باغلیوم قیزیم

 

هانسی دردوه اوخشاما دیوم

هانسی غصّه‌وه آغلیوم قیزیم

هانسی نسگلین شکوه‌سین ایدیم

چرخ بی‌مدارادن آی بالا

 

عالم حقیقتده دردوین

فکرینی دیمه باشدان آتمشام

سینه دن بلورسن یارالیام

یاره‌ لی گلوب قبره چاتمشام

 

قبری ایلدن ایتگین شهیدیم

اللریم قابورقامدا یاتموشام

من گلنمرم سنده ورما اوز

گئچ بو بیر تقاضادن آی بالا

 

ای شهیدلری اوخشیان قیزیم

سینه اولی وی داغدار دل

گوزلری گیجه گوندوز آغلیان

ابر بارشین ایلین خجل

 

اشکوین حسابین بلند یره

کاش اولیدی کپریگلرونده دل

صحبت ایتسه مژگانلارون گیدر

پرده بو معمّادن آی بالا

 

مرحوم انور اردبیلی

منبع مجموعه کانالهای مدح و مرثیه

موضوع: حضرت زینب کبری (س) زبانحال ,
زبان شعر و شاعر: نوحه ترکی , انور اردبیلی

 

----

 

زبانحال حضرت زهرا (سلام الله)

 

او گونکه دار دنیادن بابام خیرالورا گئتدی

مدینه گوزلریمده تار اولوب شمس هدا گئتدی

 

فضای عالمی ابر مصیبت ایلدی تاریک

رسالت آسمانیندن فروغ مصطفی گئتدی

 

مه برج وفا باتدی نفس چکدیم غمیم آرتدی

بوغازیمدن گوارا سو نه بیر راحت غذا گئتدی

 

طلای بختیمی دوران مسه تبدیل ائدوب گویا

آنام ئولدی پریم سیندی الیمدن کیمیا گئتدی

 

وئروب تشکیل شورا دشمنان جابر اسلام

میان امت خودخواهیدن شرم و حیا گئتدی

 

ائدوبله دین ائوین ویران ائویمه گتدیلر حمله

ائله سسلندیلر یردن سماواته صدا گئتدی

 

دئدیله یاعلی گل بیعته عزلت نشین اولما

مفسّرسیز قالوب قرآن رئیس انبیا گئتدی

 

خلیفه ایلدوک تعیین ابوبکر انتخاب اولدی

سمایه اکثریتدن صدای مرحبا گئتدی

 

عم اوغلوم ایستدی دورسون دئدیم گئتمه ئوزوم دوردوم

کانّه زاغلر اجماعینه یورقون هما گئتدی

 

دایاندوم پشت درده اضطرابیله دله گلدوم

دئدوم سیزدن نه تز روحیه صدق و صفا گئتدی

 

بابام اوچگوندی عقبایه جهاندان ایلیوب رحلت

آنام گئتمیشدی دنیادن آتامدا هاکذا گئتدی

 

وئرنده جان بویوردی فاطمه چوخ ناگران اولما

خیال ائتمه آتون قویدی سنی بی اقربا گئتدی

 

وصیت ائتمیشم امت بیلورسن نور عینیم سن

سنه هرکیم اذیت ایلسه بیلسون خطا گئتدی

 

قاپومدا دورماقوز زهرایه توهیندی اذیتدی

بو یول که سیز گئدورسوز دینوز الدن برملا گئتدی

 

خلیفه ائتمیسوز تعیین عم اوغلومدان نه ایسورسوز

مسلّم حقینه ظلمیله وردوز پشت پا گئتدی

 

پراکنده اولون قورخور اوشاقلار دورمیون بوردا

سسوز که منزله گلدی بالالاردان قوا گئتدی

 

نقدری التماس ائتدیم سوزومه باخمادی ثانی

ثمربخش اولمادی ظلّامه برهانیم هوا گئتدی

 

قاپوم یاندی ئوزوم قالدیم در و دیوار آراسیندا

در عالم پناهمدن گویه آه و نوا گئتدی

 

او سینه‌ی که اوپردی مصطفی مسماره توش اولدی

توکولدی قان ئوزومدن بو اسیر ابتلا گئتدی

 

دئمدی ثانیه بیر کس اوتان زهرانی ئولدورمه

حریمنده فساد ائتدون خیالون کج یولا گئتدی

 

یخوبسان توپراقون اوسته ایاق اوسته دورا بیلمور

گورک مجروح جسمینده نفس قالدی و یا گئتدی

 

درخت بارداره ضربه یتسه میوه سی قالماز

سینار شاخی دیللر میوه سی اولدی فنا گئتدی

 

آغیر بیر ضربته طاقت ائدنمز حامله عورت

اورک میوه م منیمده محسنیدی نارسا گئتدی

 

آنا یاره گورن وقته بالا سالم قالار آیا

یقینیمدور بالام سقط اولدی جسمینده یارا گئتدی

 

شهادت دفترین محسن ازلده ایلدی امضا

حسینون آلتی آیلیق قارداشی حقه فدا گئتدی

 

گوز آچدوم ضعفدن گوردوم بالام یوخ دوشدیگی یرده

دئدیم فضّه بالام بس صحن خانمدن هارا گئتدی

 

اشاریله یتوردی آستانون دفن گاه اولدی

گوزل غنچون آچان وقته خزانه حیف اولا گئتدی

 

سنی بیر حالیله گوردوم چاغردوم یاعلی عجّل

یوبانما گل الوندن حضرت خیرالنسا گئتدی

 

گلوبدی مرتضی داده عباسین اوستوه چکدی

دئدی زهرا یخلدی پشتبان مرتضی گئتدی

 

قازوبدور محسنین قبرین ئوزی دفن ایلدی مولا

گوزوندن دانه دانه گل یوزه اشک عزا گئتدی

 

دئدوم فضّه نه یاخشی گئتدی منکه صود وئرنمزدیم

آنالیق حقینی زهرا ائدنمزدی ادا گئتدی

 

یارالی سینم اوسته بیر الیمله ساخلیانمزدوم

بشیک ترپدمگه اولمازدی منده اقتضا گئتدی

 

سینوب پهلولریم تزتز اونا من یئر سالانمزدوم

ائدنمزدوم یئرین قنداق ایچینده جابجا گئتدی

 

گئجه لر آغلیان وقته دوروب لایلای دینمزدوم

گونوز نازین چکنمزدوم اودور بی اعتنا گئتدی

 

یره دوشدی اقلاً اوپمدوم زیبا جمالیندن

من اوندان شرمسار اولدوم او مندن نارضا گئتدی

 

اجلده دوشدی تأخیره هاچان بس دینجلور زهرا

ئوزومده مبتلا قالدوم بالامدا مبتلا گئتدی

 

نه درک ائتدوم صدای ناله سین نه باخماقین گوردوم

صداسیز گلدی دنیای فنایه بی صدا گئتدی

 

نه من گهواریه سالدوم نه کلثوم آلدی آغوشه

حسینه مجتبایه زینبه نا آشنا گئتدی

 

در و دیوار آراسیندا ئولیدیم کاش قالمیدوم

ائله دؤندی قالا عمرومدن هرصبح و مسا گئتدی

 

دارخمازدوم اگر محسن ئولن گون منده ئولسیدیم

دیردیلر اوغول گئتدی دالیسیجا آنا گئتدی

 

خوشیدی مرتضی منله اونا بیر قبر قازسیدی

هزار افسوس آناسیندان بالا قبره جدا گئتدی

 

یقین روز قیامتده او گوزلر آغلاماز«انور»

توکوب اشکین ائدوبدور توشهٔ روز جزا گئتدی

 

مرحوم انور اردبیلی

منبع مجموعه کانالهای مدح و مرثیه

موضوع: حضرت فاطمه زهرا (س) زبانحال ,
زبان شعر و شاعر: نوحه ترکی , انور اردبیلی

 

----

 

در احوالات حضرت فاطمه زهرا (سلام الله)

 

شمس چرخ الولا هم کفو حیدر فاطمه

مفخر اهل کسا مصداق کوثر فاطمه

 

مُهجه ی ختم نبی پیرایه بخش ممکنات

دامنی لوث مذلتدن بیری زیبا صفات

بابی منجی الخلایق شوهری فخر الثقات

رتبه ده بیر اوغلی مصباح الهدا فلک النجات

ارشد اوغلی نامه ی صلحه کبوتر فاطمه

 

دولت اقبالی پاینده جلالی جاودان

گویده منصور القلب یرده علّیه آستان

حورلر انسیه سی صدیقه و تقوا نشان

لطف انفاسی نسیم روضه ی لاهوتیان

بانوان جنت الاعلایه سرور فاطمه

 

زیب دامان خدیجه دختر امّ القرا

گرد خاک مقدم خوش یمنی مغز کیمیا

وادی عشق خداده سالک ناخسته پا

قبله ی طاعت انیسی بی گناه و بی خطا

کرسی عصمتده خاتون موقّر فاطمه

 

عاشقان تسبیح و حمد و واله عشق خدا

قونشولارینی مقدم ایلین وقت دعا

ذکری یا غفار العفو وِردی اِرحم ربّنا

محفل وحدتده تسلیم و سلیم المدّعا

مجلس کثرتده نطّاق و سخنور فاطمه

 

نور ذات اقدسی نور خدای کبریا

مستجاب الدعوه یانمیش درگهی باب الرجا

خانه ی وحیه امینه شافع یوم جزا

بی حجاب عورتلره بیگانه و نا آشنا

بانوان عفت و آزاده رهبر فاطمه

 

محرم اسرار حق سرّ عوالمدن خبیر

مشکلات روزگاره سدّ آفت ناپذیر

نکته سنج و نکته دان و عامل روشن ضمیر

خوان جود و بخششیندن مستمندان لقمه گیر

گوهر ذاتی عرضدن عاری جوهر فاطمه

 

جان پاکی آشنا اندیشه ی جانانیله

تار و پود جسمی لرزان وحشت میزانیله

ارتباط مستقیمی محضر جانانیله

حسن رفتاری برابر حکمت قرآنیله

خوی و اخلاقی صفات اللهه مظهر فاطمه

 

بو فضایل بو کمالات و دلیلون صاحبی

سکّه ی عرفان و افکار جمیلون صاحبی

امّهاتون فخری ابنای اصیلون صاحبی

ضربه لردن اولدی بیر جسم علیلون صاحبی

زندگیدن اینجیدی آزرده پیکر فاطمه

 

خاتم پیغمبرون درد فراق و رحلتی

امّتون جور و جفاسی مرتضانون عزلتی

محسنون سقط اولماقی باغ فدک کیفیتی

قنفذ جلاد ظلمی ثانینون ضدّیتی

اضطرابه دوشدی روحاً روح پرور فاطمه

 

باخدیقیجا آه چکدی منزل آبادینه

آغلادی کچمیش زمانین سالدوقیجا یادینه

تنگ اولوب شهر مدینه دردینون ابعادینه

یثرب اهلی اعتراض ائتدی نوا و دادینه

سرزنشلر گوردی تکرار مکرّر فاطمه

 

حضرت زهرا اوجالدان وقتیده افغانینی

ناله سیندن تتردوردی یثربون ارکانینی

ساکن شهرون سالوردی لرزیه بنیانینی

شیرخواره طفل بوشلاردی آنا پستانینی

حاکمیدی دللره قلبی مکدّر فاطمه

 

چوخ مزید علت اولدی اعتراض مرد و زن

ایلدی شهرون کنارینده بنا بیت الحزن

عیبی یوخدور چوللری زهرا دئدی ایلر وطن

گر حمایت ایلسه بختیم تز ئولّم غصه دن

والله عمروندن دویوبدور دیده سی تر فاطمه

 

بیت الاحزانی ائدوب اولدوز کیمی غم محوری

یوزقویوب دیوارینه سسلردی هی پیغمبری

غصب اولان ای مسجد و محراب و عرش و منبری

گل بابا دشمن سالوب تنگه عم اوغلون حیدری

بیلمیور هئچ نیلسون بو قاره معجر فاطمه

 

سن گئدندن آشنالرده دونوب بیگانیه

فوج اصحابون بابا تهدید اولور هر ثانیه

مرتضانون زندگیسی بنذیور زندانیه

قارداشیم اولسیدی حتماً دیلّنردی ثانیه

وای نجه دنیاده اولدی بی برادر فاطمه

 

عزم ائدنده بیت الاحزانه بابا هرگونده من

دامنیم الدن بوراخمور بو حسینیلن حسن

گون قباقینده اوشاقلاریم سولوب چون یاسمن

طرّه ی زیبالرینده اگلشوب گرد محن

تللری آشفته سپمور مشک و عنبر فاطمه

 

من ئوزوم خانه به دوش آواره دور آهولریم

من سیز ائوده قالمیور طفلان زیبا رولریم

غصه و غمدن آغارسا وار یری گیسولریم

جانیمی آلمیش حسین جانی سینان پهلولریم

هاردا گورمیشدی فشار و زحمت در فاطمه

 

مسجده گئتدیم گُتوردوم پرده من اسراریدن

روشن ائتدیم امّتون افکارینی گفتاریدن

چوخ دفاع ائتدوم نتیجه گورمدیم حضّاریدن

نه مهاجردن منه سس گلدی نه انصاریدن

امّتوندن گورمدی بیر یار و یاور فاطمه

 

اولمادی قیمت بابا مطلق سرشک پاکیمه

شاهد زنده آپاردوم دعوی املاکیمه

تیر ردّ آتدی خلیفه سینه ی صد چاکیمه

ملکی آلمیشدیم گوجوم چاتسیدی غاصب حاکیمه

حیف مأیوس اولدی حقّیندن دلاور فاطمه

 

بیت الاحزانی منافقلر گوروب محض خطر

غاصبان حقّی زهرا بیلدیلر رسوا ائدر

سرّی بیر دستور آلوبلار ائتدیلر زیر و زبر

بیر آغاج واریدی حتی اول آغاجی کسدیلر

سایه سیندن تا اولا محروم مضطر فاطمه

 

گلدی بیرگون گوردی ویرانه قالوبدور مسکنی

چاره سیز قالدی مخاطب ائتدی حیّ ذوالمنی

بارالها یوخدی زهرایه وطنده ایمنی

آشیانیمدن کناره سالدیلار الله منی

انتقامین سندن ایستور یوم کیفر فاطمه

 

نچه گون کچدی خانم قلباً اولوبدور عقده دار

غصه لی روحی بدندن آز قالوب اولسون کنار

نازنین اوغلانلارین همراه ائدوب بی اختیار

صبح وقتی چیخدی ائودن دلغمین و اشکبار

حمزه قبرین قصد ائدوب خاتون محشر فاطمه

 

یثربون شرقینده بیر داغ وار متین و استوار

سربلند و رنگی قرمزدور شفق تک باوقار

نام معروفی اُحُد نه باغی نه گلزاری وار

عاشقان پاکبازه دامنی اولموش مزار

مقدمیله وئردی اول مأوایه زیور فاطمه

 

حمزه نون قبرین ئوپوبدور بانوی علیا جناب

گوزیاشین توکدی او قبره قطره قطره چون گلاب

سرگذشتین گتدی اظهاره اورکده التهاب

دور عمو درگاهیم اودلاندی ائویم اولدی خراب

گورنه سرگردان قالوب بنت پیمبر فاطمه

 

ای مجاهد ای صف توحیده سرباز کبیر

صاحب شمشیر بُرّا بیشه ی صولتده شیر

بیر تصادف یوز وئروب زهرایه جبران ناپذیر

رحلت ایلوبدی بابام غملر منی ائتمیش اسیر

باغبانسیز بیر گله یثربده بنذر فاطمه

 

ئوز ائویمده آغلادیم ئوز دردیمه ئوز غصه مه

اعتراض ائتدی وطن اهلی نوا و ماتمه

بیت الاحزاندا بنا ائتدوم عمو با اینهمه

ائتدیلر دیوارینی مخروبه یانّام بو غمه

زندگانی ائتمگی گورمور میسّر فاطمه

 

مرتضی منزلده گوز یولدا بتوله انتظار

عصری کچدی ناگران اولدی نگاریندن نگار

قیزلارین ائوده قویوبدور اولدی سرعتلن کنار

فضّیه تاپشوردی قویما زینب اولسون بیقرار

من گوروم هاردا یوباندی نیک منظر فاطمه

 

بیت الاحزاندا دگلدی روشنیدی مسئله

کوچه ده بیر عابری گوردی علی اول مرحله

بو نشاندا بیر خانم گورسون بویوردی فاش ائله

یولداشی خردا ایکی اوغلاندی وئرمیش ال اله

صبح وقتیندن چیخوب ائودن مطهّر فاطمه

 

عرض ائدوب ای راه ایمانون ایشیقلی مشعلی

بو نشاندا بیر خانم که سن دیورسن یاعلی

من احدده مختصر بوندان قاباق گوردوم بلی

خردا سیّدلر صاقیندا هم صولوندا منجلی

حمزه آدین ائتمیشیدی دیلده ازبر فاطمه

 

دوردوقی یردن قاچوبدور یل کیمی شیر خدا

منزل مقصودینه فوراً یتیشدی مرتضی

قبرون اوستونده گوروب بیر منظره واحسرتا

غفلتاً ایوای دئدی بو جمله نی ائتدی ادا

گور هایاندا غش ائدوب الله اکبر فاطمه

 

باشینی آلدی دیز اوسته سسلدی جان عم قیزی

دردی چوخ درمانی یوخ حالی پریشان عم قیزی

غصه دن جسمون گئدور تحلیله هرآن عم قیزی

سن هلاک اولسون من اولّام خانه ویران عم قیزی

مرتضایه یوخدی پشتیبان دیگر فاطمه

 

نه ائویمده بیر حلاوت نه سر و سامان قالوب

نه منیم آسایشیم واردور نه سنده جان قالوب

بو حسینیله حسندور دیده سی گریان قالوب

بوینی چیگنینده قیزون کلثوم سرگردان قالوب

دور گئدک زینب سنی منزلده گوزلر فاطمه

 

مرحوم انور اردبیلی

منبع مجموعه کانالهای مدح و مرثیه

موضوع: حضرت فاطمه زهرا (س) احوالات ,
زبان شعر و شاعر: نوحه ترکی , انور اردبیلی

 

----

 

در احوالات حضرت فاطمه زهرا (سلام الله)

 

گنه گفتاره بو طبع رسا و خوش سخن گلدی

سکوتین سیندیروب نطق و بیانه سوز دیین گلدی

 

عزا هنگی سرود غم انیس گوش جان اولموش

خزانون آفتیندن گل سولوب تنگه چمن گلدی

 

بئله معلوم اولور صدّیقه ی زهرا ئولن گوندور

نوایه ساکنان عرش حیّ و ذولمنن گلدی

 

همان گوندور جهاندان گوز یوموبدور جدهٔ سادات

علی المرتضایه دمبدم رمز محن گلدی

 

دولوبدور قلبلر غمله بولوط تک آغلیور گوزلر

پریشان یوزلره گوزیاشی چون درّ عدن گلدی

 

بهار درد و ماتمدور مجالس عشق زهرادن

نوا بلبللری غمگین اولوبدور پرشکن گلدی

 

طلوع صبحیدن زهرا مریدی دلده یازهرا

قویوب یوز مجلسه روحیه سی غمدن ئولن گلدی

 

بو مجلس مرکز اهل صفا و اهل ایماندور

برازنده اولان یردور برازنده بیلن گلدی

 

آنون یابن الحسن رحلت ائدوبدور محنتون چوخدور

سنه قربان بیر عده سرسلامت عرض ائدن گلدی

 

آنوون عمری آز اولدی غمی چوخ قبری نامعلوم

نواسیندن او مظلومون نوایه گلمین گلدی

 

روایتدور دیور اسما وفات ائتمیشدی اول خاتون

علینون منزلی غمدن منه بیت الحزن گلدی

 

اوتوردوم صحنیده تنها بتوله من تک آغلوردوم

قاپی ناگه دوگولدی لرزیه بوجان و تن گلدی

 

بفوری فتح باب ائتدیم نه گوردوم غملی گلزاره

ایکی رنگی پریده حالی پوزقون یاسمن گلدی

 

ویا کاشانه ی درد و بلایه اشکی گوزلرده

ایکی زیبا نظر خوش منظر آهوی ختن گلدی

 

نه آهوی ختن نه یاسمن دور اصل مقصودیم

سوزی واضح ادا ایلوم حسینیلن حسن گلدی

 

سؤال ائتدی حسن مندن آنامدان بیرخبر اسما

دئدیم یاتمیش منه اما جواب لا و لن گلدی

 

دئدیلر سن بیلن اسراره بیزده واقفوک اسما

سوزی پنهان ائدورسن بیلموسن کشف ایلین گلدی

 

گلوردوک ناگران یولدا خبردار اولدوق اسراره

ندای هاتف غیبی بیزه گویدن علن گلدی

 

نداده یتدی بو صحبت آنوز ئولدی یتیم اولدوز

بهشته میهمان الله پیمبر ایستین گلدی

 

او نور دیده لر کچدی ائوه بالین زهرایه

ائله آغلاشدیلار سس چکدیلر داده زمن گلدی

 

ایکی پروانه بیر خاموش اولان شمع اوسته پر ویردی

جنازه اوسته گفتاره ایکی وجه الحسن گلدی

 

حسن قیلدی مخاطب قارداشین اظهار درد ائتدی

آنامین باشینه قارداش نه گلدی کوچه دن گلدی

 

حسین سسلندی دور آل سینوه ریحانوی ایگله

آنا زهرا قوجاقوندن کناره گئتمین گلدی

 

حسن گوردی آنا الدن گئدوب یوز مسجده قویدی

حضور پاک مولایه او درّ پر ثمن گلدی

 

بابا مسجدده اگلشمه ائوه دور گل آنام ئولدی

پیام غصه دن درده امام ممتحن گلدی

 

امیدیم گئتدی دنیادن دئدی مسجدده غش ائتدی

فغانه قبریده گویا رسول مؤتمن گلدی

 

جماعتله دولیدی مسجد اعظم خبر واردور

دیوم قوی نطقیمه یاربّی سوزشلی سخن گلدی

 

علی مسجدده غش ائتدی یریندن دورمادی بیرکس

باشی اوسته تسلایه نه گوزیاشین سیلن گلدی

 

دئمه دی بیر نفر بو مرتضادی ئولدی یاقالدی

نه حالدا بیلمورم حاله شه خیبر شکن گلدی

 

سراسیمه دوروبدور قصد ائدوب بالین زهرانی

خزان اولموش گلستانه گلی الدن گئدن گلدی

 

یتیشدی منزلینده رو بقبله گوردی زهرانی

دئدی دور عم قیزی قلبی فراقوندن اسن گلدی

 

منیم خوش صحبتیم دیللن منیم شیرین دیلیم دیللن

عزیزیم نطقه گل بالینوه دلدن دوشن گلدی

 

باشون اوسته آچوب باش زینبون دور معجرین باغلا

حسین عمامه سیزدور لرزیه چرخ کهن گلدی

 

دوشوب سس یثربون اهلی بیلوبلر فاطمه ئولدی

جنازه دفنینه تعجیلیله چوخ مرد و زن گلدی

 

پراکنده اولون اعلان اولوندی باب اقدسدن

غرض دفن اولمادی زهرا ائوه اهل وطن گلدی

 

باتوبدور گون گجه گلدی خمود امت گئدوب یاتدی

طبیعت قاره گیدی نالیه دشت و دمن گلدی

 

علی ئوز همدمین آلدی قوجاقه چیخدی منزلدن

خلاصه مغسلون اوسته او مجروحه بدن گلدی

 

وئروبدور غسلینی شیرخدا کافور جنتله

کفن پوش ائتدی زهرانی ندن بیلمم کفن گلدی

 

کفن ایچره علی چوخ حسرتیله باخدی زهرایه

دئدی بیر اوخشاما اوّل نوایه بوالحسن گلدی

 

صورا احضار ائدوب اوغلانلاریلا قیزلارین مولا

گلون دیدار آخردور فراق پر محن گلدی

 

حسینیله حسن باهم بتولون باشینون اوسته

ایکی مظلوم ایکی قارداش ایکی گوزیاش توکن گلدی

 

یاپوشدی امّ کلثومون الیندن بینوا زینب

جنازه اوستونه کرب و بلا تلّین انن گلدی

 

آرایه آلدی بلبللر گلون افسرده حالیله

عزا لحنیله دورت یاندان آناوای سسلین گلدی

 

بالالار یرده آغلاشدی ملکلر گویده سس چکدی

او صحنه اهل معنادن باشا تپراق سپن گلدی

 

نه حالیله آیردی مرتضی بلبللری گلدن

سیه پوشان قالوب ائوده مزاره آق گین گلدی

 

اوشاقلار باخدی حسرتله حرکت ایلدی تابوت

گوی اهلیندن یره تابوت زهرانی ئوپن گلدی

 

آز عدّه یله گجه مدفون اولوب گنجینهٔ تقوا

سحر اولدی یانان درگاهینه اهل فتن گلدی

 

بیلوبلر دفن اولوب زهرا نه لر اولدی رجوعیم یوخ

فقط بیر نکته وار نسگل بو قلبه هر ندن گلدی

 

برای جلب افکار عمومی بی حیا ثانی

چکوب نقشه تظاهر اوسته ایماندان گئچن گلدی

 

سفارش ائتدی مولایه بیزی محروم فیض ائتدون

بتولین دفنی اهل شهره برعکس سنن گلدی

 

عزا بزمی اقامه ایله سن بیزده ائدک شرکت

خلاصه مجلس ماتم بنا اولدی گلن گلدی

 

فدک غاصبلری یوز قویدی بیربیر بیت مولایه

تسلّای سلیمانه بیر عده اهرمن گلدی

 

فشرده نظمیده ای اهل مجلس بیر سوزوم واردور

آدی سوز، نطقه اما رشته ی صبری کسن گلدی

 

علی گوردی حسینون رنگی سولدی اگلشه بیلمور

دئدی دردون نه دور گفتاره عطشان جان وئرن گلدی

 

بابا ایله نظر دهلیزه قنفذدور ایاق قویدی

اوتورا بیلمورم نیلوم آنامی ئولدورن گلدی

 

آلورسان نظموون پاداشینی محشرگونی«انور»

ائلیکی فاطمه الده او قانلی پیرهن گلدی

 

مرحوم انور اردبیلی

منبع مجموعه کانالهای مدح و مرثیه

موضوع: حضرت فاطمه زهرا (س) احوالات ,
زبان شعر و شاعر: نوحه ترکی , انور اردبیلی

 

----

 

در احوالات حضرت فاطمه زهرا (سلام الله)

 

پاره قلب رسول مدنی فاطمه دور

کنز حقّون گهر پر ثمنی فاطمه دور

 

ایستدی حق تانوسون پنج تنی اهل سما

ذکر ایدوب فاطمه نون آدینی اولّده خدا

همسر و باب و ایکی اوغلینی ذکر ایتدی صورا

بیلدیرن مرتبه پنج تنی فاطمه دور

 

ساحت قدس الهیده سر افراز و گرام

چرخ عصمت گونی معصومه و مرضیّه مقام

صاحب منطق زیبا و برازنده کلام

بزم توحیدون اولان خوش سخنی فاطمه دور

 

هیکل قدس ورع چهره زیبای عفاف

ملکوت اهلی ایدن درگهین عشقیله طواف

کهنه پیراهنی رغبتله گین لیل زفاف

بذل ایدن سائله نو پیرهنی فاطمه دور

 

آتاسیندان صورا مستغرق دریای بلا

مبتلای غم و محنت هدف تیر جفا

گجه گوندوز ایلین شدتّیله آه و نوا

اوزینه غربت اولان اوز وطنی فاطمه دور

 

بحر محنتده جلالت گمیسی لنگه دوشن

شیشه بخت و یا شیشه شکن سنگه دوشن

در و دیوار آراسیندا نفسی تنگه دوشن

قلب آفاقه موثر محنی فاطمه دور

 

دم مسماره اولان سینه سی ظلمیله نشان

سیخیلان پیکری پهلولری ظلمیله سنان

شهپری سنمش هما تک یره پوزقون یخیلان

گل سوسن تک اولان گلبدنی فاطمه دور

 

ذوق و شوقیله حنای اجلی باشه یاخان

جان ویرن وقته یوزه گوز یاشی حسرتله آخان

گهی کلثومه گهی زینب مظلومه باخان

تاپشوران تز تز حسین و حسنی فاطمه دور

 

روز اوّلدن اولان عاشق و شیدای حسین

ماتمنده او شهون دائم ایدن شیون و شین

دیین ایوای جگر بند رسول الثقلین

گوزی یاشلی گزن هر انجمنی فاطمه دور

 

تنگ اولان گوزلرینه قصر بهشت مینو

قتلگهده ایلین زلفلرین خونین مو

مطبخ خولیه دل داغلی پریشان گیسو

گجه وقتینده حسینون گلنی فاطمه دور

 

اشگ چشمین یارالی اوغلونا مرحم گتورن

بزم غم دائر ایدوب قانلو باشا ال یتورن

گل پژمرده سینی گل لرین اوستن گوتورن

درک ایدوب عطرینی نوحه دینی فاطمه دور

 

ای مبارک نظری تخت سلیمانه قوام

دگلم اوزگه گوزون یومما اوغول سوز آناوام

سن بویرده یاتاسان ایلمرم منکه دوام

بسلین سینه سی اوستنده سنی فاطمه دور

 

مرحوم انور اردبیلی

موضوع: حضرت فاطمه زهرا (س) احوالات ,
زبان شعر و شاعر: نوحه ترکی , انور اردبیلی

 

----

 

احوالات حضرت زهرا (سلام الله)

 

روز و شب ساعت بساعت دوری دورانون گئدور

لحظه به لحظه فنایه عمری انسانون گئدور

 

عمر بیر گوهردی پر قیمت عیار و ارجینه

فکر نه صرّاف و نه اندیشمندانون گئدور

 

انبیانی ذات هو خلقه معلّم گوندروب

بی معلم اولسا امّت آری بی قانون گئدور

 

مکتب توحیدیدن یوخ غیر بیر حق مکتبی

هوشیار اول چخما بو مکتبدن ایمانون گئدور

 

یوز ایگرمی دورت مین استادی اولان بیر مکتبه

پیروی اولسون عملده عیب و نقصانون گئدور

 

واعظا وعظونده گوزله انبیانون شیوه سین

نطقوون مغروری اولسون قدر برهانون گئدور

 

عالما اهل عمل اولسون اگر خوشبخت سن

رو بمعنا گون بگون ترفیع عنوانون گئدور

 

زاهدا زهدون دوز اولسون سعی ائله نفسون سلیم

چوخ دقیق اول قلبوه خطواتی شیطانون گئدور

 

ای توانگر ثروتون واردور فقیرون دوت الین

ایلمه غفلت الوندن فیض احسانون گئدور

 

ای قضاوت ایلینلر دوز قضاوت ایلیون

ناروا بیر حکمیله میزان میزانون گئدور

 

ایلیوب مغرور بش گونلوک ریاست نفسوی

بش گونه خاطر فنایه حسّ وجدانون گئدور

 

وار قاباقدا بیر بیوک عالی خدائی محکمه

دوز قضاوت اوردادور چون حکمی یزدانون گئدور

 

دادگاه عدلیده شاه و گدانون فرقی یوخ

اوردا نه حقّ گدا نه حقّی سلطانون گئدور

 

زرق و برق عالم امکان فنادور بی دوام

آشنا اولماز وفاسی تئز بو دنیانون گئدور

 

پند آلان اولسا اگر تاریخ پند آموزدور

باخسا کیم بحثی نظردن عمده جریانون گئدور

 

عادله رحمت قالوبدور ظالمه لعنت چاتوب

ذلت ظالم بلی نه حسنی خوبانون گئدور

 

فیلمیدور تاریخ اؤزی هرصحنه سی بیر پرده دور

داستان فیلمی هر بیر مرد مردانون گئدور

 

گاهی اسکندر گورورسن آب حیوان آختارور

گاه الیندن افسر و اورنگی دارانون گئدور

 

پاره لور پیغمبرون مکتوبینی گه یزدگرد

درنتیجه غارته درباری کسرانون گئدور

 

چارده معصوم دور دلسوز رهبر والسلام

حسن ظنّی عرضیمه منصف سخندانون گئدور

 

مرتضی تک رهبر ایستور رهبر اولسون عالمه

روشن اولسون تا هارا معیاری عرفانون گئدور

 

قویمادی ثانی دریغا کامیاب اولسون علی

نقش ظلمی ایندیده اول مرد نادانون گئدور

 

خود سر اولدی باخمادی پیغمبرون دستورینه

اولمادی وجدان دوشونسون حقّی مولانون گئدور

 

جاهل محض ائتدی علمون هیکلین عزلت نشین

ای عجب نادان الینده قدری نادانون گئدور

 

درگه دارالامانه وردی بیر اود ظلمیله

حشر اولونجا شعله سی اول نار سوزانون گئدور

 

توستی قوزاندی قاپی یاندی نه چکدی فاطمه

مشگله حلّی بو بیر مشگل معمّانون گئدور

 

باردار عورت قاپی سنگینیدی مسمار تیز

دردی فکر ائت گور هارا خاتون علیانون گئدور

 

وئردی زهرایه ایکی یاندان در و دیوار فشار

ضربه گورسه طاقتی واضحدی نسوانون گئدور

 

سیندی طاها ایگلین گل غنچه دوشدی تپراقا

نکته سنج اولسون جماله اشگ جریانون گئدور

 

محسنون عمری قوتاردی فاطمه غش ایلدی

منزله نازک صداسی فخر لعیانون گئدور

 

فضه ائودن هولیله چخدی دالیجا دورت بالا

زخمدار اولسا آنا یاراسی طفلانون گئدور

 

یاره لی گوردی بتولی سسلدی زینب آنا

سالمیدون سن نیه تپراقه القانون گئدور

 

گوزلریم قربان حسینون آغلیور آچ گوزلرون

طاقتی دیندیرمسون بو ماه سیمانون گئدور

 

گللرون سولدی چاغور امداده گلسون باغبان

باغبانون گلمسه الدن گلستانون گئدور

 

فضه الهام آلدی بو سوزدن چاغوردی یاعلی

دردمندون وار یوبانما وقت درمانون گئدور

 

سویگلون زهرانی دلدن سالدیلار امداده گل

ائوده اگلشمه خزانه باغی طاهانون گئدور

 

غش ائدوبدور صحن ده مصداق کوثر همسرون

قیل حمایت آبروسی اهل قرآنون گئدور

 

گوزلرین آچمور کأنّه دودمانوندن آقا

دوقّوز ایلّیک دردسرسیز خسته مهمانون گئدور

 

مرتضی ائودن چخوبدور گلدی صحن خانیه

توستی گوردی گوگه درگاه والانون گئدور

 

ناله ایلور قیزلاری حیران باخور اوغلانلاری

گوزیاشی رخساره دورت طفل هراسانون گئدور

 

بیر طرفده محسنی خاموش اولوبدور شمع تک

بیر طرفده یاره سیندن قانی زهرانون گئدور

 

عصمت اللهه عباسین پرده ائتدی مرتضی

احترامی گوردی چون ناموس یکتانون گئدور

 

ائتدی فرمایش عم اوغلون سندن اولدی شرمسار

سرنوشتی گور هارا اولاد عمرانون گئدور

 

حُسن نیّتله بلاگردانیم اولدون فاطمه

حشر اولونجا امری بو ایثار عظمانون گئدور

 

من سلیمان سن جلالت تختینون بلقیسی سن

گورسه بلقیسی خطر صبری سلیمانون گئدور

 

منع ائدوبدور مصطفی یوخسا آلاردوم انتقام

ثانی آنلاردی هارا جرمی بو طغیانون گئدور

 

دوزمز هر مردون عیالین ئوز ائوینده ورسالار

اختیاری الدن هر شخص شکیبانون گئدور

 

غیرت اللهَم صلاح دینه خاطر دینمورم

صبریدن چخسام رضاسی حیّ سبحانون گئدور

 

اون بیرینجی اوغلووا موکول اولوب بو انتقام

ناگران اولما اورکدن داغ پنهانون گئدور

 

هر زمان چخسا ظهوره محسنه خونخواه اولار

قلبیمیزدن سوزشی بو ظلم و بلوانون گئدور

 

ثانی درک ائتدی نه ظلم ائتسه مهیّادور علی

بیر ستم قیلدی نه ظنّی گبر و ترسانون گئدور

 

روبه ترسو دوتوب شیری دئدی گل بیعته

قالما ائوده وحدتی قوم مسلمانون گئدور

 

بوینونا سالدوردی شالین باغلادوب بازولرین

گئتمه سون گئتمه دئدی الده گریبانون گئدور

 

مختلف سسلر اوجالدی آچدی زهرا گوزلرین

گوردی الدن دامنی فرزانه جانانون گئدور

 

یاره سین یاددان چخارتدی دوردی یردن خشمگین

ورسالار فکر ائتمدی یاراسی اعضانون گئدور

 

اللریله مرتضانون دوتدی محکم دامنین

اشگی بو یرده یوزه هر چشم گریانون گئدور

 

ثانیه قیلدی بیان ال چک عم اوغلومدان اوتان

صحنیدن ایوان عرشه دود عصیانون گئدور

 

فکر ائله گور هانسی اللردی طنابه چکموسن

لذت امروزه ظالم خیری فردانون گئدور

 

سن غدیر خمّده به به دئدون بو سروره

خاطروندن تئز نیه اقرار و اذعانون گئدور

 

قویمارام سیزله عم اوغلوم مسجده باهم گئده

گئتسه سیزله احترامی شاه شاهانون گئدور

 

قوللارین سن باغلیانمزدون مشیّت باغلیوب

خط مشیی دوز یولا بو مرد معنانون گئدور

 

نیلیورسوز ایلیون ئولسم شهیده گئتمشم

غصه لی عمری هاچان پایانه زهرانون گئدور

 

دوشدی صحنه کشمکش قنفذ ال آتدی قمچیه

دگسه قمچی طاقتی مرد توانانون گئدور

 

قول شکست اولدی گوگردی اللری غش ایلدی

تاقیامت عمری بو غملی قضایانون گئدور

 

غشّیدن حاله گلنده گوردی یوخدور مرتضی

بیلدی امری مشگله سلطان مردانون گئدور

 

شهپری سینمش هما تک یوز قویوبدور مسجده

اشگی گوزدن هر قدم اول جنت آرانون گئدور

 

صدر منبرده ابوبکری گوروب ائتمش جلوس

عرشه گَردِ فتنه سی اول فتنه برپانون گئدور

 

بیعت ایستور مرتضادن پیر مرموز حجاز

اشگی گوزدن بوذر و مقداد و سلمانون گئدور

 

باش آچوقدور شالی بوینوندا وصیّ مصطفی

جسمینه رنجی کمند و بند و ایذانون گئدور

 

باغلانوب دروازه ی خیبر قوپاردان پنجه لر

آهی دلدن گوگلره اول دل پریشانون گئدور

 

دیللنوب زهرا عم اوغلومدان بویوردی ال چکون

شرم ائدون حیثیّتی سیز خانه ویرانون گئدور

 

من نه حالدا گلمشم بو مسجده الله بیلوب

دردیمی واضح دئسم گوزیاشی اعدانون گئدور

 

چارم اولسیدی قالاردوم ائوده گلمزدوم بورا

دردیمه فکر ائتمیون فکری اطبّانون گئدور

 

مسجد اهلی بی خبرسوز ئولدوروب قنفذ منی

بو اشارمدن توانی روح طاهانون گئدور

 

نیمه سوز هیزم هارا زهرا هارا قنفذ هارا

آخری قتله بو امر ناگوارانون گئدور

 

زندگیدن اوزمیشم ال مرتضادن اوزمرم

مرتضاسیز عزتی امّ ابیهانون گئدور

 

قوللارین آچمادیلار زهرا ال آتدی معجره

فکری نفرین ائتمگه خاتون کبرانون گئدور

 

تتردی مسجد بشیک تک لرزه دوشوبدی یثربه

آسمانه ضجّه سی اهل تماشانون گئدور

 

مرتضی امر ائتدی سلمانه اوتورما قیل شتاب

قویما زهرا باشین آچسون نقشی امکانون گئدور

 

بازوان حیدرون آخر طنابین آچدیلار

بیر سوزوم وار طاقتی هر صبری دریانون گئدور

 

مسجدی ترک ایلیوب گلدی ائوه زهرا ، علی

گور هارا اندیشه سی زهرای زیبانون گئدور

 

یورقونیدی منزلینده اگلشوب دینجلمدی

فضه گرچه چوخ دئدی گَل بستره جانون گئدور

 

باشینه جمع ایلدی اوغلانلارین هم قیزلارین

خدمته فکری گینه بانوی شایانون گئدور

 

عرض ائدوب شاها اجازه وئر دولاناق باشوه

باشوه دونسوک اگر شرّی بلایانون گئدور

 

درس اولوبدی بو قضیه زینب مظلومیه

قوی دیوم گرچه تواناسی احبّانون گئدور

 

مجلس شومه عبیدالله جلّاد ایستدی

قتل زین العابده متنی بو فرمانون گئدور

 

قورخولی قیزلار سارالدی قورخوسیندان تتردی

مجلسه افغان سسی طفلان لرزانون گئدور

 

حضرت سجادی باسدی باغرینا زهرا قیزی

گوردی الدن یادگاری شاه بطحانون گئدور

 

قهرمان کربلا جلّاده فرصت وئرمدی

بیلدی فرصت وئرسه درّی گنج تقوانون گئدور

 

ئولمسم من ئولدوره بیلمز دئدی بیرکس سنی

قتله یتسون رهبری فوج اسیرانون گئدور

 

عالم معناده زهرا زینبه احسن دئدی

آغلاما اشگی یوزه شاه شهیدانون گئدور

 

مرحوم انور اردبیلی

منبع مجموعه کانالهای مدح و مرثیه

موضوع: حضرت فاطمه زهرا (س) احوالات ,
زبان شعر و شاعر: نوحه ترکی , انور اردبیلی

 

----

 

در احوالات حضرت فاطمه زهرا (سلام الله)

 

عشقیدن بهره سیز انسان ئوزینی لا بیلسین

معنوی پیکره دن روحینی منها بیلسین

 

عشق فطرت یولونی روشن ائدن مشعلدور

یولی نوریله گرک سالِکْ هویدا بیلسین

 

ره ظلمتده گئدن مقصده هیهات چاتا

یعنی سرمنزل مقصودینی حاشا بیلسین

 

روشنای ره فطرتدی بیزه حبّ علی

بو چراغی گرک عشق اهلی درخشا بیلسین

 

خالی اولسا هر اورک مهر ولا مهریندن

صاحبی حتماً ئوزین ضدّ تولّا بیلسین

 

اِهدنا قولینه کیم ایسته سه حقدن لبیک

مرتضانی گرک حلّال معمّا بیلسین

 

روح واحددی پیمبرله علینون روحی

بو ایکی روح بزرگی هامی یکتا بیلسین

 

هرکیمون معرفتی واردی کلام اللهه

هَل اَتیٰ سوره سینی مظهر طاها بیلسین

 

بویوروب ختم نبی هرکیمه من مولایم

حیدر صفدری مندن صورا مولا بیلسین

 

کعبه ده آچدی گوزون اولدی شهید محراب

آیری بیر رهبری کیمدور بونا همتا بیلسین

 

بئله شخصیّتی کیملر ائلدی خانه نشین

خلفانی هامی بو شرّیده مبنا بیلسین

 

انتخابات ثقیفه یخوب اسلامین ائوین

اهل دین باطله اندیشه نی بلوا بیلسین

 

مجلسی که اولا شوراسی خلاف اسلام

نجه مؤمنلر اونی مجلس شورا بیلسین

 

ائله شوراده نه سلمان و نه بوذر واریدی

پس مسلمانلار ائله مَجمعی بیجا بیلسین

 

جانشین نبوی منتخب اللهیدی

کیم موحّددی علینی گرک اولا بیلسین

 

شیعه لر ماحصل عرضیمی چوخ یاخشی بیلور

غیرلرده بو سوزی کاش خدایا بیلسین

 

ای ریاست، سنه دینین ساتانی خوار اولسون

بشریّت ائله عنصرلری رسوا بیلسین

 

گلدی مولا قاپوسین یاندیرا اوچ یوز ظالم

قوم نمرودی اورک نیّتین اجرا بیلسین

 

نه قاپی هانسی قاپی هانسی ائوین درگاهی

مَلکی اوردا بشر صفّاً و صفّا بیلسین

 

پشت درده دایانان حامله بیر عورتیدی

ماجرانی او خانم گلمیشیدی تا بیلسین

 

دئدی ای قوم بیلورسوز که سنقدور قلبیم

منی امت آتا یاسینده معزّا بیلسین

 

هرکیمون واردی منه دلده اذیت فکری

ایلیور روح رسول اللهه ایذا بیلسین

 

غیرت دینوز اگر وار قاپومی ترک ائلیون

ئوز ائوینده ئوزینی اَمنیده زهرا بیلسین

 

آچمارام حق قاپوسین فرقه ی ناحق یوزونه

منه جبر ایلسه کیم دوزخی مأوا بیلسین

 

اهل نورین قاپوسین چکدی اوتا فرقهٔ نار

یاندی اسلامین ائوی عاقل و دانا بیلسین

 

متجاوز تانیوق بیز قاپیا اود ویرانی

کیم تجاوز ائدنی بیلسه مبرّا بیلسین

 

قاپونین یانماقی هر چند مهمّیدی ولی

پشت درده دورانون دردین احبّا بیلسین

 

غاصب دوم آچوب اوّل او یانمیش قاپونی

دوشدی زهرا نه حالا صاحب ایما بیلسین

 

در و دیوار آراسیندا قالانین فکرین ائله

حق دانیش فاطمه نون دشمنی حتی بیلسین

 

نیلدی حامله بیر عورته سنگین حمله

شیعه لر ، محنتی قوی ایلیوم افشا بیلسین

 

توخانان وقته قاپی سندی گهر دوشدی صدف

محسنی فاطمه دن هامّی مجزّا بیلسین

 

بالانون جانی چخوبدور آنا قالدی یاری جان

کیمدی بو مهلک اولان درده مداوا بیلسین

 

مدّعی، قتلگهه دؤندی علی درگاهی

بلمسین امت احمد دئ گوروم یا بیلسین

 

گوندن آیدین سوزه کیمدور چکه ایستور پرده

مطلقا پرده ده قالماز بو قضایا بیلسین

 

قان آخوردی یره مسمار باتان زخمیندن

فکر ائدن سینه سینی قانیله حَمرا بیلسین

 

ضربه دن بیر خانمیکه ائلدی سقط جنین

هانسی عاقلدی اونی سالم الاعضا بیلسین

 

شیعه نون حقّیدی تاریخ بویی یاسلی قالا

یوخدی امکانی آجی زهری گوارا بیلسین

 

ائله بیحالیدی زهرا آچا بیلموردی گوزین

هاراسی صدمه گوروب امّ ابیها بیلسین

 

مختصر تاپدی ئوزین ائتدی ندا گل فضّه

دردیمی ایستمورم خوردا صبایا بیلسین

 

فضه فوراً ئوزوی صحنه ی بحرانه یتور

یوخدی لعیا، سنی قوی فاطمه لعیا بیلسین

 

یخیلاندا یره من محسنیم الدن گئتدی

گوندوزون واریری زهرا شب یلدا بیلسین

 

اَممدی دوشلریمی صود دادینی بیلمدی حیف

بالامی قویمادیلار لذّت لالا بیلسین

 

بئله فکر ایلیورم فضه قابورقامدا سینوب

گئدرم قبره شهیده هامی دنیا بیلسین

 

آلنیمی تر بوریوبدور نفسیم تنگه دوشوب

دردیمون چاره سین هیهات اطبّا بیلسین

 

سو گتور سپ یوزومه بلکه بیر آز حاله گلم

سویی ایستر یارالی قلبینه یارا بیلسین

 

صحنه بیگانه دولوب یوخدی عبا باشیمده

دوزمرم قامتیمون حَجمینی اعدا بیلسین

 

منیدیم دهریده مظلوم علینون کمکی

ئوزینی غملی عم اوغلوم داخی تنها بیلسین

 

خانه ویران گورورم خانه نشین دلبریمی

کیمی وار مایه ی تسکین و تسلّا بیلسین

 

اونا قربان حسنینیم بالذ قیزلاریم ئوزیم

بیزی قربان ئوزینه کاش او دل آرا بیلسین

 

مرتضی صحنه چیخوب گوردی بتولی یرده

دلبرین دلبر اولوب حالینی جویا بیلسین

 

دئدی یا فاطمه آچ گوزلروی بیر منه باخ

مرتضی ایستیور احوالوی حالا بیلسین

 

دور ایاقه ائوه گئت محسنی من دفن ائلیوم

دینه قربان بالامی حیّ توانا بیلسین

 

ذوالفقاره ال آتام مصلحت ایجاب ائتمور

گرک اسلامی علی هرنه دن اولا بیلسین

 

خاک و خونه چکرم یوخسا بو غاصبلری من

منی تاریخ بشر حکمته دارا بیلسین

 

گوره بو منظره نی هاردادی ایّوب صبور

ئوزینی صبریده قطره منی دریا بیلسین

 

مطلقا یوخدی علینون الینون اوستونه ال

دشمنیم تیغیمی یک قبضه دو پهنا بیلسین

 

اون بیریمجی بالون حتما آلاجاقدور بو قانی

اونی روح شهدا ملجأ اعلا بیلسین

 

نگراندور بالالارون ملشور آهو تک

حسنینون گلوب اوضاعی مبادا بیلسین

 

قز اوشاقین آناگلسه دیله تز رام ایلر

دیله گل زنده سنی زینب کبرا بیلسین

 

ائویمون زینتی سن زینب اولوبسان خسته

نه روا سنسیز علی منزلی زیبا بیلسین

 

مرحوم انور اردبیلی

منبع مجموعه کانالهای مدح و مرثیه

موضوع: حضرت فاطمه زهرا (س) احوالات ,
زبان شعر و شاعر: نوحه ترکی , انور اردبیلی

 

----

 

آمدن مرد عرب به آستان مقدس باب الحوائج،

حضرت ابوالفضل العباس (علیه السلام)

 

یتدی ئوز نیّتینه دشت بلاده شهدا

کوفه و شامی گزوب یثربه گلدی اسرا

جدّینون شهرینی زینب ائلدی شهر عزا

قاره پوش ایلدی زهرا قیزی اهل وطنین

گوستریدی هامیا یوسفینون پیرهنین

 

گهی تبلیغ ائلیوب گاه ائلدی ناله و زار

هم شه محشره خونخواهیدی هم تعزیه دار

گونده بیر خانه نی وئرمیشدی عزاخانه قرار

یاس دوتوب درد دل ایلوردی اوغولسوزلاریلان

یا ئولن قیزلارا آغلوردی قالان قیزلاریلان

 

بیر گون عیدیدی خانم یاسلیلارا قیلدی خطاب

ای خواتین دل افسرده و پژمرده نقاب

ای علی اصغر آناسی اورگی داغلی رباب

ای قرا گونلی سریّه چوخ اولان درد و غمی

ای جوان اوغلی ئولن لیلی حسینون حرمی

 

منشی غم آدوزی ثبت ائلیوب دفترینه

اولون آماده گئدک امّ بنین محضرینه

غمی چوخدور آنامون شرکت ائده غملرینه

اطاقیندا یری اوغلانلارینون بوشدی بوگون

عیدیدور یاسلی یانیندا اوتوماق خوشدی بوگون

 

اورگیم چوخ دوتولوب اوردا بیر آز آغلاشاقون

اوغلی عباسه ائدوب سوز و گداز آغلاشاقون

قیلسا عبدالله او بیچاریه ناز آغلاشاقون

با وفا قارداشیما مجلس ماتم قوراقون

آهیله غملی اطاقینده چراغ یاندیراقون

 

اوغلی ئولسه یاسا مایل اولی از بس آنالار

سس وئروب زینب مظلومیه بیکس آنالار

سالدی چادر شبینی باشه مقدّس آنالار

صحنه که دوشدوله گوزیاشی آخوب یوزلرینه

یالواروب قوشدولار اصغر آناسین ئوزلرینه

 

منزل امّ بنینده هاموسی تاپدی حضور

باخدی مهمانلارا یوز وئردی او بیچاریه شور

هیجان ائتدی بدن قلب آلیشوب مثل تنور

خوش گلوبسوز دئدی هاموز بو پریشان اطاقا

باشلیون اوخشاما مشغول اولاقون آغلاماقا

 

آخدی صورتلره گوزلردن آخان گوزیاشلار

قره معجرلره ال گتدی آچیلدی باشلار

ایله مجلسده مسلّم سؤزی زینب باشلار

باشلادی اوخشامانی منظره لی یاس اولدی

هامونون ورد زبانی سؤزی عباس اولدی

 

بیری سویلردی چتین مثلی بو دنیایه گله

بیری سویلردی نه گلدی او کرامتلی اله

بیری سویلردی فلک ایلدی افسوس عجله

قویمادی کام آلا عمرونده او سردار سلیم

آناسین قویدی اوغولسوز بالاسین قویدی یتیم

 

بیری سویلردی حسین قدّینی خم قیلدی غمی

بیری سویلردی که الدن اله دوشدی علمی

بیری سویلردی گلوب رام ائله قارداش ننمی

بیری سویلردی که بس هارداسان ای اشجع ناس

عیدیدور گل بالون عبداللهه آل تازه لباس

 

اهل مجلس غم عباسیدن اولدی بی تاب

آغلاماق یوردی اوتوردی هاموسی دیده پرآب

ناگهان باب حرم خانه اولوب دقّ الباب

بیربیره بو سخنی ائتدیله اظهار و علن

یاسلیلار جمعیدی بوردا گوره سن کیمدی گلن

 

ئوزونی فضّه یتوردی قاپیا فوری اودم

دئدی کیمسن نه سوزون وار دئدی من بیر عربم

بو ائوین صاحبینی یولّا سؤزوم وار دییرم

دئدی ائو صاحبینی گوزلمه دئ حاجتوی

من کنیزم یتوروم ائوده سنون صحبتوی

 

دئدی بو صاحب خانه شرف اهل سخا

هر ایلین خرجینی ایلده منه ایلوردی عطا

کچن ایل عذریم اولوب گلممیشم بو قاپیا

گلمیشم ایندی امیدیله او ارزنده صفات

لطف ائدوب خرج دوساله ائده حقّیمده برات

 

فضه بیر سؤز دئمدی گلدی ائوه اشک فشان

گوردی مبهوت هامونی وار نه دئنن نه دانیشان

آناسی آلدی خبر اوغلومی کیمدور سوروشان

باشینی سالدی اشاقه سؤزی کشف ایلمدی

آغلاماق مانع اولوب مطلبی روشن دئمدی

 

گینه تکرار ائدوب اوّل که سؤزی ام بنین

فضه گوردی دئمسه ایلیجک داد و انین

بیر عربدور دئدی آغلاتدی منی گورمک همین

منتظردور آقام عباس ائده حقّینده کرم

سالاجاق سوز یولا ایندی نجه؟من بیلمیورم

 

دئدی فضه بو قدر آغلاما یاندیرما منی

پوزما اشک تریله بو پوزولان انجمنی

قویماروق خوار اولا عباسون آدیلان گلنی

دئمروک بیز ئولوب عباس اونا شرمنده اولا

سائلی اهل کرم لر سالار عزّتله یولا

 

ائشیدنلر بو سؤزی ناله سینی ائتدی بلند

دئدیلر ایلروک عباس قوناقین خرسند

بیری گوشواره وئروبدی بیریسی بازوبند

فوری بیر قدری فراهم اولوب اشیا طلا

دئدیلر فضه آپار وئر عربی ایله رضا

 

دئسه گر آزدی صله معذرت ایسته یولا سال

عربه فضه او اشیانی یتوردی فی الحال

آلدی باخدی دالی قیتردی بئله ائتدی مقال

تحفوز ارزنده دی آز چوخلوقونون یوخدی سؤزی

صاحب خانیه وئر قوی منه لطف ائتسون ئوزی

 

ائله فکر ایلمیون تحفه دی منظور و نظر

خانه صاحب قاپیا گلمسه الساعه اگر

سیزدن هیهات آلام من صله وئرسوز نقدر

مفتخر ائتسه منی درک ائلسم محضرینی

وئردیگین فخریله آلّام ئوپرم اللرینی

 

عربون مطلبینی فضه آلوبدور نظره

الده اشیای طلا منزله گلدی خبره

دئدی جریانی خانملار یغیشوب پشت دره

دئدیلر کیمدی بو ائو صاحبی ای پاک روان

یا نشانین دئ، و یا که آدینی ایله بیان

 

دئدی آدین منه بیلدیرمیوب اول مرد خدا

بویوروب بخشش و انفاق گرک گیزلین اولا

ولی بیر شخص مشخّصدی او فرخنده لقا

جالب اخلاقی گوزل صورتی خوش صحبتی وار

هم اوزون قوللاری واردی هم اوجا قامتی وار

 

عربون گتدی سؤزی امّ بنینه هیجان

سیخیلوب روحی اوغول وای دئدی بیردن اوجادان

یوزونی دوتدی صورا زینبینه قیلدی بیان

سن علاج ایله منیم که اورگیم یاندی بالا

سال یولا بو عربی تئز، قاپودا قویما قالا

 

دئدی زینب بو ائوین صاحبینون وار محنی

گوره بیلمزسن اونی نه او گورر بیرده سنی

یثربی ترک ائلیوب کرب و بلادی وطنی

خوشلیوبدور او یری ئوز وطنین گوزدن آتوب

او اوجا قامتیله بیر بالاجا یرده یاتوب

 

مرحوم انور اردبیلی

منبع مجموعه کانالهای مدح و مرثیه

موضوع: حضرت ابوالفضل العباس (ع) احوالات ,
زبان شعر و شاعر: نوحه ترکی , انور اردبیلی

 

----

 

در احوالات حضرت فاطمه زهرا (سلام الله)

 

گلچین اجل وفا باغیندان ، دردی گل جاودان آپاردی

مولا ایوینی سالوب صفادن ، ریحانه سینی خزان آپاردی

 

حق ایستدی بیر نمونه بانو ، ایجاد ایده عالم عدمدن

زهرانی یاراتدی ویردی خت ، پیغمبره کثرت کرمدن

چوخ اینجیدی مرتضا ایوینده ، گوردی یورولوبدی درد و غمندن

قلبین اله ایستدی گتورسون ، الله اوزی میهمان آپاردی

 

بیر فاطمه که اولوبدی ذاتی ، سادات ذوالکرامه جدّه

پیراهن عصمتی بیچوبدور ، خیّاط ازل او پاک قدّه

اوصافینی شرح ایده نقدری ، قاصردی قلم یتیشمز حدّه

بیر بحریدی وصفی بی کرانه ، بیر قطره سین هر یازان آپاردی

 

پیغمبر خاتمون عزیزی ، خلقتده وجودی هسته گتدی

شیخینیدن اولدی دلشکسته ، عصمت گهری شکسته گتدی

آز عمریده چوخ فشاره دوزدی ، غم یورقونی قبره خسته گتدی

آرایش و زیب بزم حیدر ، رعنا قدینی کمان آپاردی

 

مرضیه نی مرتضی غمیله ، قویدی گیجه وقتی مغسل اوسته

اوغلانلاری قیزلاری دوزولدی ، اطرافه دایاندی ال ال اوسته

اسمایه بویوردی سنده سو توک ، بو پیکره ی مجلل اوسته

کاشانه می قویدولار خرابه ، رحمت قوشونی جنان آپاردی

 

هجرونده بجادی تا نفس وار ، هر بیر گوزوم اولسا محنت ابری

مجهولیدی قدری زندگیده ، مخفی اولاجاق وطنده قبری

دردین دیمیوبدی گیزلدوبدی ، دلده واریمیش نقدری صبری

نیسگیل لرینی وفالی زهرا ، مندن ایلدی نهان آپاردی

 

پهلولرینه الیم توخاندی ، اولموش نه جفا نگاره بولدوم

صیّادلر حمله ایلینده ، ضربت یتیشوب شکاره بولدوم

یوزدن که تلون کناره چکدیم ، گزلین غمین آشکاره بولدوم

بولدوم که پیمبرین نشانی ، سیلی یرینی نشان آپاردی

 

ایوای نه چوخ اولدی مرتضانون ، درد و غم و ابتلاسی ایوای

ایوای نجه گل کیمی سارالدی ، گتدی ایویمون صفاسی ایوای

ایوای ملشور مثال آهو ، دورد خوردا گوزل بالاسی ایوای

ایوای بو عفیفه روحیمیدی ، مندن بو گیدیشده جان آپاردی

 

القصه قوتاردی غسلی مولا، تکفین ایلدی او جسم پاکی

بند کفنین ایدوبدی محکم ، تابوته قویوب او سینه چاکی

کلثومیله زینب ایتدی افغان ، فضّه باشینا سووردی خاکی

الله خانیموم گیدور بو ایودن ، قلبیمده نه وار توان آپاردی

 

سادات شباب اهل جنت ، باشدان گتوروبدولر عمامه

یوز قویدولا سینه ی بتوله ، غم منظره سی اولوب اقامه

سسلندی سروش غیبی بیردن ، القا اولونوب بو سوز امامه

اوغلانلاریوی آیور آنادان ، لوح و قلمی فغان آپاردی

 

یالواردی علی جنازه اوستن ، اوغلانلارینی چکوب کناره

دوزموردی حسین تلاش ایدوردی ، تابوته طرف گله دوباره

اوضاعی ایله گورنده ایتدی ، اصحابینه مرتضی اشاره

سلمان و ابوذریله مقداد ، تابوتی کشان کشان آپاردی

 

تابوته باخوب دیردی زینب ، سیننده آنا یارا گیدورسن

امیدیمیزون ایدوب بو ایوده ، سررشته سینی پارا گیدورسن

قال بو گیجه نی بیزه قوناق اول ، قربانون اولوم هارا گیدورسن

هانسی ایوه نصف شبده مهمان ، یارون سنی ناگهان آپاردی

 

ای دوقّوز ایلی گلین لیقیندا ، اندوه و ملالی مین رقم وای

وی بحر مصیبت و بلایه ، اعضاسی اولان سینیق بلم وای

قارداش یوزونه فنا جهاندا ، بیر یول قاپی آچمیان ننم وای

سیل اجلون ایوی یخیلسون ، تابوتیوی چوخ روان آپاردی

 

ای زینبه صحنه ی بلاسی ، هر لحظه زمینه ساز آنام وای

بلبل لری فصل دی اسیری ، مایوس صفای یاز آنام وای

اودلی نفسی نسیم رحمت ، شبنم کیمی عمری آز آنام وای

سولموش گلودون بوداقدا گویا ، یل ویردی سنی تکان آپاردی

 

جانیم نقدر بدنده واردی ، ورد ایلرم هر زمان آنام وای

سوسن کیمی گل جمالی نیلی ، غنچه کیم باغریقان آنام وای

گیسولرینی بلا آغاردان ، آی تز قوجالان جوان آنام وای

محکوم اجلدی هامّی سوز یوخ ، غم غصّه سنی جوان آپاردی

 

مرحوم انور اربیلی

منبع مجموعه کانالهای مدح و مرثیه

موضوع: حضرت فاطمه زهرا (س) احوالات ,
زبان شعر و شاعر: نوحه ترکی , انور اردبیلی

 

----

 

در احوالات حضرت فاطمه زهرا (سلام الله)

و گریز به حضرت علی اصغر (علیه السلام)

 

بو حدیثی بویوروب حضرت صادق علنی

مخبر اعظم اولاد رسول مدنی

قنفذون ظلمی جوانمرگ ایلدی فاطمه نی

ضربه لر که آناما ووردی او بی شرم غلام

آیری عورت دوزه بولمزدی آنام ایتدی دوام

 

گون بگون پیکری تحلیله گیدوب اولدی نحیف

اریمشدی اریَن شمع تک اول جسم شریف

دورا بولموردی ایاقه ایله اولموشدی ضعیف

اورگی غملی گوزی یاشلی غذا خون جگر

اجله منتظریدی او خانم شام و سحر

 

گون او گون اولدی وفات ایتدی او ناموس ازل

آغلیان گوزلرینه غالب اولوب خواب اجل

مرتضی قیلدی وصیّت لرینه بیربیر عمل

صحن منزلده گئجه نصفی او مولای زمن

کوینگ اوستن اونا غسل ایتدی گیندیردی کفن

 

قویدی تابوته بتولین بدنین شاه ولا

ویردی دستور اوگنج علوی دفن اولونا

باخدی زینب آنا تابوتی گئجه دوشدی یولا

قاره گونلر قیزیوین سن دیدی دینجلدون آنا

الی قوینوندا قویوبسان بیزی خوشگلدون آنا

 

گوزومون کاسه سی واردور یری اشکیمله داشا

نه باجون واردی سالا قاره بو ماتمده باشا

قارداشون واردی نه تابوتیوه باری یاپوشا

اولمیان باجیسی نه قارداشی یالقوز آناوای

گیجه تابوتی گیدن قبره آدامسیز آناوای

 

او مسافر دگوسن ای منیم ایستکلی آنام

سفرون روشن اولا منده دالونجا سو سَپَم

مسن اولدی داخی جغدِ غمه بو غملی حرم

ئوزونه صورت بیت الحزن آلدی ائویمیز

پوزولان بیر چمنون شکلینه قالدی ائویمیز

 

گل لروندن داخی بوندان صورا اولماز خبرون

بیرده بو غصّه لی کاشانیه دوشمز گذرون

لانه سیندن اولور آواره گوزل جوجه لرون

مهرباندور آتامیز یوخدی چاتان پایه سینه

سیخیلار خوردا اوشاقلار آنانون سایه سینه

 

بدرقه ایلدی گوزیاشلی پیمبر قوناقین

منزلین گلدی خموش ایلدی روشن چراغین

زلفینی توکدی یوزه گزدی بتولین اطاقین

سن قرانلوق ائوه گئتدون دئدی ای جدّیمه گُل

من چراغ روشن ائدم بو گئجه انصاف دگُل

 

ماحصل یدّی نفر یولداش اولوب مولایه

یتوروبلر خانمی دفن اولونان ماوایه

مرتضی گوردی گیدور الده اولان سرمایه

هرقدر سعی ایلدی مالک اولا صبر ایوینه

اورگی گلمدی زهرانی قویا قبر ایونه

 

گه باخوب قبره پیمبر قیزینون بسترینه

گه دونوب سالدی نظر فاطمه نون پیکرینه

دیله گلدی دئدی درد دلینی دلبرینه

مرتضی فاطمه وئرمزدی بو آفاقه سنی

ایندی وئرسون نجه آخر قره توپراقه سنی

 

نقدر فکر ایلدی گوردی غم اطرافین آلوب

گهی مبهوت گهی صوت نواسی اوجالوب

دردیمون چاره سی زهرا دیدی اللّهه قالوب

من نجه پیرهن وصلیوی بو یرده سویوم

صبر عطا ایلسون الله سنی من قبره قویوم

 

او لقای صمدی دوتدی حقه روی نیاز

ایکی رکعت ایلدی حضرت معبوده نماز

یالواروب کعبه نون اللّهینه سلطان حجاز

بارالها سن علینی ایله بو غمده صبور

قبره طاها گُلونی تاپشوروم ای حیّ غفور

 

ایکی رکعت اونمازیکه علی ایتدی ادا

حق تعالی اونچون صبرجمیل ایتدی عطا

قیلدی مثلین او نمازین شه دین عاشورا

نه زمانیدی نه وقتیدی یوخیدی قالانی

قبره ایستوردی قویا یوز گوزی قانلو بالانی

 

 مرحوم انور اردبیلی

منبع مجموعه کانالهای مدح و مرثیه

موضوع: حضرت فاطمه زهرا (س) احوالات ,
زبان شعر و شاعر: نوحه ترکی , انور اردبیلی

 

----

 

در احوالات حضرت فاطمه زهرا (سلام الله)

 

هر فرد بشر که ائدر اِمرار ئوز ائوینده

امنیّتی نسبت ئوزینه وار ئوز ائوینده

 

قانون طبیعتدی نظام مدنی دور

آسوده یاشار مسلم و کفّار ئوز ائوینده

 

کانون فراغتدی هر ائو اهلینه سوز یوخ

بیرکس ائده بیلمز بیرینی خوار ئوز ائوینده

 

راحت یاتا حتی گرک هر قوش یوواسیندا

پرّنده لره یتمیه آزار ئوز ائوینده

 

ای پیر خرد وار نه جوابون بو سؤاله

زهرا نه سبب اولدی گرفتار ئوز ائوینده

 

بیر فاطمه کی میوه ی قلبیدی رسوله

دؤزمزدی اولا ذرّه گرفتار ئوز ائوینده

 

باخدوقجا پیمبر اونا بالیده لنردی

ایگلردی گلون احمد مختار ئوز ائوینده

 

فرمایش ائدردی منی زهرا آتا سسله

شاد اولسون آتون مفخر احرار ئوز ائوینده

 

بیر فاطمه که بذلی چوخیدی فقرایه

ائتمزدی دویونجا ئوزی افطار ئوز ائوینده

 

بیر فاطمه کی عاشقیدی صوم و صلاته

ایلردی مناجات سزاوار ئوز ائوینده

 

بیر فاطمه کی نازل اولوب شأنینه کوثر

توهین ائلدی فرقه ی اشرار ئوز ائوینده

 

شیخین خلافت نقدر کج یولا چکدی

زهرایه گونی ایلدیلر تار ئوز ائوینده

 

اندیشه غلط اولسا بشر شرّ اولی مطلق

ناحق یره اخیاری ائدر زار ئوز ائوینده

 

یاندیردی عمر باب همایون علینی

شه بانوی اسلام گوروب نار ئوز ائوینده

 

اودلاندی قاپوم ثانیه ال چک دئدی مندن

زهرائیله گل ایلمه پیکار ئوز ائوینده

 

هر بیر یوزه بو درگه والادی آچیلماز

فکر ائت کیمه گور ایلوسن اخطار ئوز ائوینده

 

تا وار نفسیم بو قاپونی بیرکس آچانماز

گئتسون اوتوسون قوم تبهکار ئوز ائوینده

 

قارداشسیزام اینجیتمه آتام تازه ئولوبدی

قوی فاطمه نی اولسون عزادار ئوز ائوینده

 

فکر ایلیوسوز اولما کمک سیزدی عم اوغلوم

زهرا تک اونا واردی فداکار ئوز ائوینده

 

بیز ایستمدوک امر خلافت سیزون اولسون

قوی راحت اولا عترت اطهار ئوز ائوینده

 

آهولریمی ائوده ملشدیرمه حیا ائت

دورت خوردا بالام قورخودان آغلار ئوز ائوینده

 

باخمادی سوزه ثانی نه بیلدی اونی ائتدی

حقّون ائلدی حقّینی انکار ئوز ائوینده

 

بیر زور وئروب قهریله یانمش قاپی سیندی

زهرا اجلین گوردی پدیدار ئوز ائوینده

 

دیواره که تکیه ائلمیشدی ائله قالدی

سالدی اونی جاندان در و دیوار ئوز ائوینده

 

مسمار امان وئرمدی زهرا گئج ئولردی

دلدی سینه سین اوخ کیمی مسمار ئوز ائوینده

 

سیندی صدف طاهره درّی یره دوشدی

اولدی اجل اول دُرّه خریدار ئوز ائوینده

 

فضّه ائله سسلندی علی چیخدی اطاقدان

گوردی یخیلوب دلبر دلدار ئوز ائوینده

 

نه جای مذمّت وار علیده چتین ایشدور

یارین یارالی درک ایلسه یار ئوز ائوینده

 

ایوای دئدی الله آناسیز قالدی اوشاقلار

بو دورت بالاما کیمدی پرستار ئوز ائوینده

 

اوغلانلاریمون قیزلاریمون گوزیاشی آخماز

دیلدن دوشنیم ایلسه گفتار ئوز ائوینده

 

غشّ ایلیوب حتماً سسیمه سس وئره بیلمور

بیهوش ائلیوب یاریمی اغیار ئوز ائوینده

 

گلسه دیله سسلنسه عم اوغلی غمیم اولماز

بیلّم که علینون کمکی وار ئوز ائوینده

 

حاصل ایشی تقدیر قضا بیر یره چکدی

دوردی ایاقا فاطمه ناچار ئوز ائوینده

 

درک ائتدی علینی باش آچوق قولّاری باغلی

چوخ غصّه لیدور حیدر کرّار ئوز ائوینده

 

میر حرمی ثانی چکور مسجده ساری

شهبازه آچوب شبپره منقار ئوز ائوینده

 

دوتدی ایکی اللی شه دینون اتگیندن

ئوز همدمینه اولدی هوادار ئوز ائوینده

 

دشمن او شهی خارجه زهرا ائوه چکدی

قهر ایلدی محبوبه ی قهّار ئوز ائوینده

 

ثانی دیله گلدی دئدی قنفذ نه دوروبسان

زهرا نجه گور ایلیور ایثار ئوز ائوینده

 

فوراً او دنی قمچیسینی آچدی بلیندن

وردی گل طاهانی او غدّار ئوز ائوینده

 

سست اولدی بتولون قولی ال چکدی علیدن

ضربت یتیشن وقتیده تکرار ئوز ائوینده

 

صدّیقه ی کبریٰ یخیلوب صحن سراده

قالمادی شه خیبره غمخوار ئوز ائوینده

 

گلدی بالالار فاطمه نی آلدی آرایه

زینب ائلدی فضّیه اظهار ئوز ائوینده

 

درگاهیمیزی چکدی اودا بی سر و پالر

یاندی شرر محنته سردار ئوز ائوینده

 

بو شهریده مظلوم آتامین بیرکسی یوخدور

توش اولدی غمه حجّت دادار ئوز ائوینده

 

پیغمبره دلدار آنامی سالدیلا دلدن

راحت اوتوروبدور هله انصار ئوز ائوینده

 

فضّه سو گتور وئر آنامیز گوزلرین آچسون

ائتسون ئوزی ئوز دردینی معیار ئوز ائوینده

 

کیم وار قولی باغلی آتامون فکرینه قالسون

کیم گلدی اونا اولدی طرفدار ئوز ائوینده

 

چاره گینه قالمیش آناما بیزده نه چاره

بیر چاره تاپار اولماسا بیمار ئوز ائوینده

 

مرحوم انور اردبیلی

منبع مجموعه کانالهای مدح و مرثیه

موضوع: حضرت فاطمه زهرا (س) احوالات ,
زبان شعر و شاعر: نوحه ترکی , انور اردبیلی

 

----

 

احوالات حضرت خدیجه (سلام الله)

و حضرت زهرا (سلام الله)

و گریز به  قتلگاه

 

وقت او وقت اولدی خدیجه ائلسون ترک جهان

ام الایتامی آلا فخریله آغوشه جنان

دولدورا ختم رسالت ائوینی شور و فغان

روح خیرالبشره تنگ اولا دنیای فنا

کعبه تک بیت نبوت گئیینه رخت عزا

 

واله دین مبینیدی او بانوی کبیر

رتبه ده عالم نسوانیده بی مثل و نظیر

قبل از اسلام اونی مال و حشم ائتمیشدی شهیر

جاه و اجلالینی دین چکدی صورا نه فلکه

تاج اسلامیله اولمیشدی حجازه ملکه

 

ذکر معبودیله سرگرمیدی هر لیل و نهار

یوخودی کیمسنه ده اوندا که تمکین و وقار

راه توحیدیده ئوز ثروتین ائتمیشدی نثار

حامی منطق اعلای رسول اللهیدی

یعنی بازوی توانای رسول اللهیدی

 

ایستدی دست اجل باغلیا بینا گوزونی

پرده ی مرگ غم افزا دوتا زیبا گوزونی

قویا آغلار قیزی صدیقه ی کبرا گوزونی

عمر ریحانه سی دنیاده سولوب پرپر اولا

کعبه نون یعنی قرا تپراقینا زیور اولا

 

قلبینون میوه سی زهرا بالاجا بیر قیزیدی

گونیدی چرخ رسالتده نه که اولدوزیدی

چوخ چوخ ایستردی آناسی ولی قارداشسیزیدی

مرکز وحی الهی ائوینه زینتیدی

نور توحید تجلی گهینه طلعتیدی

 

جان وئرن وقته خدیجه دئدی ای ختم رسول

محضروندن گئدورم عالم عقبایه ملول

سنون امیدوه بو ائوده فقط قالدی بتول

قویما مندن صورا منزل قفس اولسون قزیما

قارداشی یوخدی گلوب دادرس اولسون قزیما

 

دئمورم بو سوزی سن بحر ملاله باتاسان

یوخ گمانیم بالامی ذره گوزوندن آتاسان

سهلیدور فاطمه سن امته یکسر آتاسان

ای وفالی آتا قارداشسیزیما آغلا منیم

آناسیز قیزلاری گورسون قزیما آغلا منیم

 

خوش سوز عالمده سالار قلبیده مرحم یاریا

مندن آرتوقدی علاقون بیلورم بو بالیا

قیزلارون چوخ سوزی واردور دیه بیلمز آتیا

غملی گلمه بو ائوه اولسادا درد و محنون

جان سنون جان الی قوینوندا قالان فاطمه نون

 

دیده تر آیریلورام دیده سی تر فاطمه دن

ای نظر صاحبی سن کسمه نظر فاطمه دن

نگرانم نیه بیلمم بو قدر فاطمه دن

بو هما سایه سینون شهپری گویا سیناجاق

قفس غمده پریشان اولاجاق چرپیناجاق

 

غسلیمی وئر ئوز الونله منیم ای شمس هدا

بیر تمناده واریم ائتگیله حقیمده عطا

بیر عبا که چکوسن وحی گلنده باشووا

جسمیمی بوک او عبایه قوی ئوزون قبره منی

گنه عرضیم بودی غمگین ائلمه فاطمه نی

 

مام زهرانی خلاصه آلوب آغوشه مزار

آنانون هجرینه ایستکلی قیزی اولدی دچار

دامن مهر و محبتدن ئوزین گوردی کنار

زندگی سینده آچوب دست اجل فصل بلا

باشینه قاره سالوبدور شرف اهل کسا

 

هر زمان منزله گلسیدی رسول مدنی

گل تک ایگلردی محبتله خانم فاطمه نی

باغبان گورسه گل افسرده دی آرتار محنی

باغبانیدی رسول الله او وجه الحسنه

قویمیوردی گلی غمدن سولوب افسرده لنه

 

سوروشاردی نه زمان بو سوزی زهرای بتول

هاردادور مام عزیزیم منیم ای ختم رسول

بویوراردی آتاسی فاطمه جان اولما ملول

آسمانلاردا آنون شأن و جلالتده گزور

سایه ی عرش الهیده سعادتله گزور

 

نقدر واردی وجودیم سنه من دادرسم

سوزوه صحبتوه منطقوه پر هوسم

واردی حقیم سنه هر قدر محبت ائلسم

غصّه م آرتور سنی بو ائوده قویوب تک گئدورم

هر زمان سن آتا دیسن منه من فخر ائدورم

 

نقدر دهریده پیغمبر خاتم واریدی

حضرت فاطمیه لطفی دمادم واریدی

آتاسیندان صورا چکدی نقدر غم واریدی

زلفینون تاری کیمی اولمیشیدی افتاده

بیر حبابیدی تلاطم ائلین دریاده

 

آغلاماق شوری گوتورمیشدی او شوریده سری

بیر شب تاره دچاریدی یوخیدی سحری

قوش کیمی یاره لنوب سنمیشیدی بال و پری

قفسی دام بلا یاره سی مرهم سیزیدی

حکم ائدن ثانی ولی یاره ووران قنفذیدی

 

یدی گون رحلت خاتمدن اولوبدور سپری

قلب زهرانی داریخدیردی مصیبت اثری

فضّیه حالت یأسیله وئروب بو خبری

ایستورم قبر رسول اللهه دیداره گئدم

اورگیم چوخ دوتولوب خانه ی دلداره گئدم

 

جمع اولوب محضر زهرایه سیه پوش زنان

قبر پیغمبره عزم ایلدیلر صیحه زنان

آتا قبرین آلوب آغوشینه خیرالنسوان

مرقدون سالدی نظر یأسیله دور و برینه

تربتیندن گوتوروب چکدی اول گوزلرینه

 

آه سردیله صورا توأم ائدوبدور نفسین

دئدی عمرینده خوش احوالینه اولسون او کسین

جان مشامی آپارا تربتوون رایحه سین

ائله مدهوش اولی بو رایحه ی عالیه دن

ال چکر عنبر و مشگیله گل و غالیه دن

 

ای اوغولسوز آتا زهرادی گلوب خدمتوه

جان فدا پیکروه مونس اولان تربتوه

جان فدا تپراقون آلتیندا قالان صورتوه

مغرب نیّر تقوادی بو یر قبر دگول

مدفن عزت زهرادی بو یر قبر دگول

 

یدی گوندوز بابا ترک ایلموسن فاطمه نی

الله عالمدی که غربت گورورم من وطنی

گوزلریم اشک توکور آختارور هر یرده سنی

نجه من آغلامیوم مدت هجران چوخ اولوب

سن کیمی تاج سعادت باشیم اوستن یوخ اولوب

 

رحلتون سالدی بو دنیانی بابا عزتدن

دوشدی حرمتلی حریم و حرمون حرمتدن

دیوم ئوز دردیمی یا که دانیشوم امتدن

سن که هم کفو ائلدون عترتیله قرآنی

امتون ایستمدی ایستدیگون زهرانی

 

نه تأسف ائلیوب حالیمه نه آغلادیلار

سهلیدور فاطمه نون داغلی دلین داغلادیلار

صف یخوب خیبر آلان پنجه لری باغلادیلار

طاقتیم اولمادی فی الفوری دوروب داده قاچام

حال ضعفیله ولی مسجده گتدوم باش آچام

 

نه لر اولدی نه چکوب فاطمه یوخ حد و عیار

فضه شاهددی منیم دردیمه ای باب کبار

اثر ضربت مسمار سینمده گینه وار

هئچ گمانیم یوخیدی ثانی عناد اوسته دورا

ئوز ائوینده گله ناحق یره زهرانی وورا

 

او جنینی که بویورموشدون اولا محسن نام

بابا عذر ایستیورم اولمادی تحصیل مرام

اشقیا آغلاماق اورگنمه مش ائتدی اونی رام

فوری پنهان ائلدی من یخیلان یرده ئوزون

قره تپراقدا یاتوب گورمدی گهواره یوزون

 

درد دل ایلدی زهرا او قدر ائتدی نوا

یورولوب قویدی مزار اوسته باشین خیر نسا

التجا قیلدی باشیندا گلن عورتلر اونا

یالواروب شمع غمون غصه لی پروانه سینه

اللریندن یاپوشوب گتدیله غم خانه سینه

 

گرچه زهرا ائوینه گتدی اوگون فکر بهم

چوخ تسلی وئریلوردی اونا یوز وئرمیه غم

عجبا مطلبی باریک یره چکدی قلم

بیلمورم درد و غم خیر نسادن دانیشوم

یاکه عاشور شه کرب و بلادن دانیشوم

 

ای حسینون آدینا عاشق اولان اهل عزا

یادیما دوشدی چوخور یرده رئیس شهدا

او کفنسیز بدنون پوششی اولموشدی دما

بالاجا بیر قیزینی سینه سینه آلمیشدی

کسیلن اللرینی گردنینه سالمیشدی

 

چیخسا بلبل قفسیندن نجه مقصوده چاتار

ظلم صیادی فراموش ائلیوب باشدان آتار

یول سالار سمت گلستانه گل اوستونده یاتار

غم ترانیله گله سرّ ضمیرین دانیشار

خاطرات اسف انگیزینی شیرین دانیشار

 

بلبل باغ عزا تاپمیشیدی ئوز گولونی

ائله شیرین دانیشوردی گله درد دلینی

شرح ائدوردی اونا هجران سوزینی نسگیلینی

صحن گلشنده که بلبل دله آزاد گلر

او بالا فکر ائلموردی گنه صیاد گلر

 

غرق اندیشه ایدی گرمیدی اشگ تریله

مونس اولموشدی چوخور یرده شه محشریله

سایه سالمیشدی او نعشه بالاجا تللریله

حیف اولا بزم وصاله باش آچوق دوشدی یولوم

کیم منی قویدی یتیمه بابا قربانین اولوم

 

سنه من ایندی بابا هانسی سوزومدن دانیشوم

شب یلدایه دولانمیش گونوزومدن دانیشوم

بیبیمون غصه سینی یاکه ئوزومدن دانیشوم

آیری دوشدون باباسن آی کیمی اولدوزلاردان

خبرون اولمادی غارتده ئولن قیزلاردان

 

اوستومه آتلی گلنده من ایتوردوم ئوزومی

قمچینون قورخوسی قویدی اورگیمده سوزومی

دردیمه آیری علاج اولمادی یومدوم گوزومی

بیر یانان خیمه کیمی قلبیده آهیم چوخیدی

دشمنین رحمی منیم ذره گناهیم یوخیدی

 

شرح ائدوردی آتیا درد و ملالین او بالا

ساربانلار توکولوب قویمادی مقتلده قالا

قمچیلر سالدی وجودین ولی بیر آیری حالا

ناقه نون اوسته مینوب عالمی داغلیدی او قیز

سهلیدور کرب و بلا یولدادا آغلیدی او قیز

 

مرحوم انور اردبیلی

منبع مجموعه کانالهای مدح و مرثیه

موضوع: حضرت فاطمه زهرا (س) احوالات ,
زبان شعر و شاعر: نوحه ترکی , انور اردبیلی

 

----

 

در احوالات حضرت زهرا (سلام الله)

 

ای گوزوم ایله نظر عالم معنایه طرف

باخما حَسرت بو قدر جلوۀ دنیایه طرف

 

قلب عفریت جهاندا نه وفا وار نه صفا

دوغدوقون هی آپارور سینۀ غَبرایه طرف

 

بشرون قافله سین گورمیوسن سُرعتیله

یوز قویوب گونده گیدور حیطۀ عقبایه طرف

 

بیکران بحردی دنیا هامی انسان قطره

قطره لر لازمه دور جذب اولا دریایه طرف

 

عشق توحیدون اگر واردی خلیل اللّها باخ

دوشونوب فلسفه سین گیت حق یکتایه طرف

 

صَنَمِ نفسوی سندیر تبر همّتیله

نفع امروزوی قوی فکر ایله فردایه طرف

 

نوح تک کشتی ایمانی خطردن قورتار

قالما گردابده چخ ساحل دریایه طرف

 

عفّتی یوسف صدّیقدن آل مشق اوزوه

باخمادی دیدۀ شهوتله زلیخایه طرف

 

روح عرفاندی بلی ایلدی موسانی کلیم

چکدی مثبت قدمین سینۀ سینایه طرف

 

آهن سختی ایدن موم کیمی داوده

لایق اولسوق یتورر عالی مزایایه طرف

 

صابر و شاکریدی دار ریاضتده مسیح

داردن قیلدی صُعود عالم بالایه طرف

 

خوی عیسانی تاپا کیم دم جان بخشی تاپار

بر نفس چکسه چکر مُرده نی احیایه طرف

 

علوی مکتبی دور اُمتّه کانون نجات

خط سرخی چکور انسانلاری تقوایه طرف

 

مثل سلمان عجم کیمده صداقت تاپولا

مکتب حقده گیدر رتبۀ مِنّایه طرف

 

کیم بو مکتبده خشونت یارادا ثانی کیمی

آپارار اُمتّی آشوب مهابایه طرف

 

آب غسلیله تریدی کفنی ختم نبی

خلقی تحریک ایلدی باطله شورایه طرف

 

ایله شورا که نه سلمان و نه بوذر واریدی

رذل لر پایه قویوب بیعت ادنایه طرف

 

مرتضی ساحتینه ثانی تعّدی ایلدی

او تعّدی آپاروب اُمتّی غوغایه طرف

 

خارکن اوغلی ایشینده او قدر اولدی جری

فکر بیعتله گلوب درگه والایه طرف

 

حلقۀ باب امیدی یاپوشوب گتدی سَسَه

سَس اوجالدی قاپودان گنبد مینایه طرف

 

یتشوب گوش بتوله قاپونون طنطنه سی

بلدی اشرار گلوب منزل و سُکنایه طرف

 

ایستدی شیر خدا عزم ایده باب الحَرَمَه

وار خطر گتمه دیدی سن قضایه طرف

 

من گیدوم شاید عم اوغلی قوتارام غائله نی

جابر اشخاصی چکم رحم و مدارایه طرف

 

چخدی ایودن یتوروبدور اوزونی پشت دره

پشت دردن اوجالوب صُحبتی ادنایه طرف

 

خبر آلدی نه دلیله یغشوبسوز قاپوما

گلموسوز درگهمه سیز نه تمنّایه طرف

 

یاسلیا ختم نبی ماتمینه مشغولم

یروشوز یاخشی دگل بیت غم افزایه طرف

 

بو ایوون صاحبی اسلامیده چوخ خدمت ایدوب

گیدوب اخلاصیله هر غزوده هیجایه طرف

 

بو ایوون صاحبی قرآنی بلادن قوتاروب

الده شمشیری گیدن وقتیده دعوایه طرف

 

بو ایون صاحبی پیغمبر الیندن یاپوشوب

سیز گیدنده هُبَل و لاتیله عُزّایه طرف

 

بو ایوون صاحبنون زحمتنون سایه سی دور

یتیروبدور سیزی بو نعمت عظمایه طرف

 

بو ایون صاحبی دور رخت پیمرده یاتان

سپر ردّ بلا هیکل طاهایه طرف

 

ظلمت شرکده سیز شهپر آچان شب پره سوز

پر آچوبسوز عجبا ساحت بیضایه طرف

 

ای چماقدار نه تز دوره دوزتدون اوزووه

فکر ایله گور چکوسن دینی نه مَجرایه طرف

 

بو عمل قابل مطرح دگُل هیچ محکمه ده

شرعون اجراسینه نادان گله دانایه طرف

 

نقدر فاطمه نون واردی بدنده روحی

قویمارام بیر کسی گتسون او دل آریایه طرف

 

علی اوز دوستنی دشمننی یاخشی تانور

روحوزون یوخدی بلور میلی تولاّیه طرف

 

یتوروبسن نه مقامه ایشی ای پیر دنی

زاغ و کرکس دولوشوب لانۀ عنقایه طرف

 

حقّنی غصب ایلدوز،باری قویون اوز باشنا

نفسِ رذلوز آپاروبدور سیز اغوایه طرف

 

زندگینی اوز ایویمده منه چوخ تنگ ایلمه

اولما زهرایه سن ای مرد فرو مایه طرف

 

سیزه همشهریم همسائیم ای ظالم اوتان

دگل انصاف اولا همسائیه همسایه طرف

 

قائل اولمورسان ایویمده منیچون حق حیات

حاضرم کوچ ایلیم دامن صحرایه طرف

 

دیدی ثانی: بیزی چوخ ساخلاما زهرا قاپودا

ویر خبر گلسون عم اوغلون بو احبّایه طرف

 

یوخ السّاعه ووروب اود قاپووی یاندیرام

توستسی پرده چکر عرش معّلایه طرف

 

دیدیگین ایتدی خلاصه او کنج اندیشه بشر

قویدی عقبانی گیدوب دنیوی سودایه طرف

 

اوُد وروب تخت سلیمانیدن افضل قاپیا

او سرادن اوجالوب شعله ثرّیایه طرف

 

بُریدی توسستی جبریل زیارتگاهین

باش چکوب سرکش اَلو گنبد خضرایه طرف

 

ناردن صدمه گوروب یاندی چهارچوبۀ در

حسنینون آناسین چکدی مُعمّایه طرف

 

زور و قهریله ویروبدور قاپیا ثانی تکان

وردی لنگر قاپی صدّیقۀ کبرایه طرف

 

قلبده ایله مجسّم بو چتین منظره نی

جاری ایله گوزوون یاشنی سیمایه طرف

 

وزنی سنگین قاپی، بیر حامله بانوی ضعیف

تلّ دن حمله دی گویا گُل رعنایه طرف

 

طاق در سالدی فشاره بُدنین سرتاپا

گتدی مسمارلری سینۀ زهرایه طرف

 

قاپونون حمله سینه ایلدی دیوار کمک

ایکی حمله اولونوب بیر قد زیبایه طرف

 

اوجالوبدور سسی بیر یول دیدی ایوای بالا وای

محسنون روحی اوچوب شاخۀ طوبایه طرف

 

یخلوب صحنه کنیزین چاغوروب داده بتول

اوزوی فضّه یتور فوری بو ماوایه طرف

 

سندی ظلمیله صدف دُرّم الیمدن گتدی

سن گل امداده الیم یتموری لَعیایه طرف

 

ظلم نمرودی بو گون ثانی منه تازَه لَدی

سامُرلری توکُلوب خانۀ موسایه طرف

 

ویر خبر گلسون علی بو اوشاقی دفن ایلسون

قاصد اول فاطمه دن محضر مولایه طرف

 

عرض قیل گوتورن پنجه ده خیبر قاپوسین

چکدیلر در گهوی آتش بلوایه طرف

 

طاقتیم یوخدی دوشوبدور یره باشیمدن عبا

پیکریم منظره دور دیدۀ اعدایه طرف

 

سهلدی سقط جنین اولدی قابورقامدا سنوب

التفات ایلسون اُنسیّۀ حورایه طرف

 

اولان اولدی منیچون ئولمَلی اولدوم بلورم

دردیمه یوخدی دوا گتسم اطبّایه طرف

 

قویمادی ثانی اوغول قز طوئی گورسون زهرا

گوهر عمری دچار ایلدی یغمایه طرف

 

قویماسون زینب و کلثومی چخا منزلدن

دوشمسون گوزلری بو یاره لی اعضایه طرف

 

اَبدی لعتنه واصلدی او کسلر «انور»

دوتا نادیده خدانی گیده خرمایه طرف

 

مرحوم انور اردبیلی

منبع مجموعه کانالهای مدح و مرثیه

موضوع: حضرت فاطمه زهرا (س) احوالات ,
زبان شعر و شاعر: نوحه ترکی , انور اردبیلی

 

----

 

در احوالات حضرت فاطمه زهرا (سلام الله)

 

قاپی آلشدی شرر اوج ایدوب ثریّایه

اوجالدی توستی علی بیتنه سالوب سایه

 

قرا دومان قاپینون رنگنی عوض ایلدی

آپاردی یل کولونی سپدی قبر طاهایه

 

یانان قاپونی آچان ظالمه ایدون لعنت

مسبّب اولدی او سقط جنین زهرایه

 

قاپونی گر یاواش آچسیدی محسن ئولمزدی

اشاره اهلی سن اول مشتری بو ایمایه

 

قاپیا ضربه توخاندی یاپشدی دیواره

وسطده قالدی خانم دقّت ایله معنایه

 

او حمله حامله بیر عورتی نه حاله سالار

صدف سنوبدی خطر یتدی دُرّ زیبایه

 

جناب ختم پیمبر یوزین قویان سینه

دچار اولوب دم مسماره دوشدی ایذایه

 

کانّه آینیه میخ آهنین دگدی

کچوبدی تیز تیکان یا که برگ رعنایه

 

قاپی دالندا چالوب جان ویرن کیمی اَل اَیاق

چخانمیوردی او یردن بیر آیری ماَوایه

 

قاپی آچلدی خانم سینه تنگ و نیمه نفس

اراده ایلدی گیتسون حضور مولایه

 

نچه قدم گوتوروب دوتدی دیزلری رعشه

گیدنمدی یخلوب صحنه غم افزایه

 

بیر اَلی سینه سی اوسته بیر اَلی پهلوده

گلوبدی غَشوّه او بانوی جنّت آرایه

 

دوشوب باشندان عَباسی، باش آچدی حورالر

حیا گونی گورولوب سر برهنه اعدایه

 

گلوبدی فضّه ندا ایتدی یا رسول الله

یخوبلا عصمت کبرانی گل تماشایه

 

بو فاطمیکه آنا کلمه سیله سسلیدون

آنون یارالی دوشوب گل بو صحن بلوایه

 

ستمله یار علی یاره لندی دادینه گل

اورگووین پاراسی پاره لندی دادینه گل

 

بو داستانه نجه طبعیمی هزاره ایدیم

اورکده کی سوزومون شرحین آشکاره ایدیم

 

سنان قابورقا غمینده شکست ایدیم قلمی

و یا که دفتر اشعاری پاره پاره ایدیم

 

باشا ورا ورا یا مطلبی باشا یتوروم

دوا گوزوم یاشنی قلب بی قراره ایدیم

 

بتولیدن دانشوم یا که سقط اولان بالادان

و یا که درد دل حیدره اشاره ایدیم

 

اوجالدی صحن ده سسلر، چخوبدی ایدن علی

بو یرده وار یری نفرین روزگاره ایدیم

 

گورنده فاطمه نی نقش اولوبدی یرده دیدی

یارالی سویگلومه من نجه نظاره ایدیم

 

بو اُوچولار که دولوب آشیاندن چخادیم

و یا حمایت اَول یاره لی شکاره ایدیم

 

حسن حسینمی یا زینبی ایدیم آرام

و یا که حمل بالام محسنی مزاره ایدیم

 

مدیر دایره ی پایگاه اسلامم

گرکدی دولت قرآنی من اداره ایدیم

 

قاپوم یانوب یخلوب فاطمه، ایویم یخلوب

نه نوعی صبر و توان درد بی شماره ایدیم

 

عم اوغلون اولدی گرفتار یا رسول الله

دوزوم بو درده و یا تکیه ذوالفقاره ایدیم؟

 

قصاص فاطمه نی آلماق ایستورم امّا

وصیّتون قولومی باغلیوب نه چاره ایدیم

 

وفالی دلبریمی دیندیرم اوزوم گلمور

شکسته گوهری سالم نجه دوباره ایدیم

 

امانتوندی سنون، بختیمون ستاره سی دور

گیدور اُفوله نجه صبر بو فشاره ایدیم

 

علی سوزین ایشیدوب بولدی مطلبی زینب

دیدی گیدیم دئیشم معجریمی قاره ایدیم

 

اشاره ایتدی آتام وای منه نه غملی سوزه

ننم گمان ایدورم آز زمان قوناقدی بیزه

 

مرحوم انور اردبیلی

منبع مجموعه کانالهای مدح و مرثیه

موضوع: حضرت فاطمه زهرا (س) احوالات ,
زبان شعر و شاعر: نوحه ترکی , انور اردبیلی

 

----

 

اربعین حسینی

 

محبسدن اولوب عترتون آزاد حسینیم

آهولروی بوشلادی صیّاد حسینیم

 

غم لشکرینی قبرووه تعظیمه گتوردوم

گوزیاشلیلاری مجلس ترحیمه گتوردوم

ویرانه ده بیر ایل یوزیمه گوزیاشیم آخدی

شام اهلی گلوب زینبه تحقیریله باخدی

لیل غمه آخرده سعادت گونی شاخدی

 

صبریله ستم جامنی داشدان داشا چالدوم

مغلوب ایلیوب دشمنی وصلون اله سالدوم

فکریم بیلوسن دائم الاوقات به همدور

کیپریگلریمون اشکی اگر قان اولا کمدور

سندنصورا دنیا منه بیر محبس غمدور

 

قلبیم دوتولار غم گتورر من هارا باخسام

یانّام یارووا هر گجه اولدوزلارا باخسام

مین ایل اولا عمری باجووین روز و شب آغلار

نسگل اودی هر ثانیه ده قلبنی داغلار

قارداشی ئولنده گوزینی باجیسی باغلار

 

ظلم ایتدوگیجن شمر لعین دویمادی قارداش

 قانلی گوزوی باغلاماقا قویمادی قارداش

شوریده سرم عشقیله شور هوسونده

جان مایه سیدی زینبه نطقونده سسونده

گلدوم باشوون اوستنه آخر نفسونده

 

یادیمده دی اوخلار سینه ده جان دوداقندا

مقتلده چالیخلیدون حسین قان دوداقوندا

جان اوسته سنی گوردی باجون اولدی هراسان

خیره گوزیمه سالدی منیم خنجر برّان

جوش ایتدی قانم قاتله یالواردیم حسین جان

 

زینب سنه امداد ائلدی ئوز قدریجه

قاتل سوزینه ویرمدی افسوس نتیجه

امرون یتیشوب ختمه گلوب سولدی چمنده

محنت قوشی پرواز ائلدی اوج بلنده

سندن نگران گیتدوم حسین شامه گیدنده

 

امکانیم اولیدی سنه بیر قبر قازاردوم

مظلوم آدووی داشینه برجسته یازاردوم

حمدیم وار حسین صاحب اجلالیدی قبرون

زوّارلره کعبه ی آمالدی قبرون

ششگوشه دی خوش قطعه دی خوش فالیدی قبرون

 

گلزار وفاده سارالان تپراقا قربان

جان تک سنی آغوشه آلان تپراقا قربان

قلبیم هیجان ایتدی اول قبروی گورجک

چخدوم من ئوزیمدن بو گوزل قبرووی گورجک

کلثومه دیدوم گل باجی گل قبرووی گورجک

 

رنج سفری آتدوم هوسلندوم حسین جان

گویا منه جان گلدی نفسلندوم حسین جان

حسرت اودی خاموش اولوب ای شاه خجسته

اعمال طوافه یتیشه بو دل خسته

رخساره توکوب زلفیمی دوشدوم یوزوم اوسته

 

زینت ایلدوم تپراقا گیسولری قارداش

سالدوم دالیمجان ملر آهولری قارداش

ای محیی الاموات اولان عیسایه ویرن دم

یو قبر منه مایه ی عزّتدی مسلّم

گیتسم هارا شکلین ایدرم دلده مجسّم

 

روحیم قوشی دائم دولانار باشینه قارداش

غم نقشه سینی نقش ایدرم داشینه قارداش

گلدی اسرا دشت غمه قانلاری جوشدی

محزون سسیمه صوت حزینین هامی قوشدی

شیرین دیلوون حیف اولا قارداش یری بوشدی

 

ای کاش رقیّمله حسین با هم اولیدوق

گلزار خزان دیدوه ابر غم اولیدوق

قولّاردا رسن زخم مغیلان ایاقندا

غم بلبلی تک آغلادی محنت بوداقندا

عمری سپری ایلدی محبس بوجاقندا

 

سولموش یوزینه هی اَلَدی گوزلری قان یاش

چیرپندی او قز دامه دوشن قوش کیمی قارداش

آغلاردی ئولونجک ولی هیچ اولمادی خسته

آرام نفس چکمدی اول قلبی شکسته

گه قویدی یوزین تپراقا گاهی دیزیم اوسته

 

گه یاتدی حصیر اوسته بالام گه قوجاقمدا

توکدی هوروگین چگننه گزدی قاباقیمدا

عمری ائله که باشه یتوب گول کیمی سولدی

پیمانه ی چشم اسرا اشکیله دولدی

ویرانه دل آرامیمه آرامگه اولدی

 

 وصله یتیشوب محبس هجراننی یاردی

ذلّتله عزیزه قزوون عمری قوتاردی

کچدی او قیزون درد دلی سخته اوتاندوم

غسّاله لباسین چیخادان وقته اوتاندوم

باخدوم یوئولاندا او قرا بخته اوتاندوم

 

آرامنی قمچی دگوب آلمیشدی حسین جان

اعضاسینی آیری حالا سالمیشدی حسین جان

شوره گتوروب زینبی غم بزمینی قوردی

ضجّه چکوب اهل حرمون باشینه ووردی

غسّاله خلاصه چکیلوب دالدالی دوردی

 

مندن خبر آلدی بو سوزی سینه ده آهی

بو خوردا قیز اللرده ئولوب وار نه گناهی

 

 مرحوم انور اردبیلی

منبع مجموعه کانالهای مدح و مرثیه

موضوع: احوالات اربعین ,
زبان شعر و شاعر: نوحه ترکی , انور اردبیلی

 

----

 

احوالات اربعین

 

شامیدن حسین غصه یورقونی

قلبی یاره لی خونجگر باجون

آلتی گوشه زیبا مزاروین

دیدنه گلور دیده تر باجون

 

بو گئدیش گلیشده من اولموشام

محنت همدمی غصّه یولداشی

غملی بیر سفرنامه یازمشام

یا حسین مظلومیدور باشی

بو گوزل آدا حشره جک آخار

پاک گوزلرون پاک گوز یاشی

عالمی مرید ایلیوب سنه

خدمته اولوب مفتخر باجون

 

مسلک اوسته محکم مجاهدت

مرتضادن ارثیه دور منه

سالدی حیرته هر مجاهدی

سنده که سئون مبارزه

قارداشین باشین کسسلر سوسوز

باجیسی گرک چوللری گزه

گزدی چوللری پوزدی ایللری

غمله ائتدی شام و سحر باجون

 

ذبح اولان باشون شامه جک حسین

نیزه ده منه اولدی رهنما

عشقوه ز بس که اسیریدیم

بیلمدوم اسارت ندور اخا

هر دوشرگه ده آچدی قمچی سین

ووردی باشیمه شمر بی حیا

صادقیدی عشقونده قمچنون

بیلدی زحمتین بی اثر باجون

 

کربلایه ماه محرّمون

دوّمینده چاتدوم جلالیله

اون بیرینده شامه آپاردیلار

زینبی حسین چوخ ملالیله

درد و غم قوجالدیب قیتمیشم

قبرون اوستونه آیری حالیله

شرحه اقتضا یوخدی عرض ائدم

بیر به بیر چکوبدی نلر باجون

 

گاهوراه ده غصّه درسینی

وئرمیشیدی چون غصّه لی آنام

صبریدن صورا چاره یوخ منه

هر اودا گرک لابدم یانام

قامتی کمان پیر خاندان

سینه سی یارا قلبیدن قانام

بختَوَر دگُلدی آنون حسین

دهریده اولا بختور باجون

 

استراحتیله یاتام گجه

روزگار امان وئرمیوب منه

هر نه ظلم اولوب دوزموشم حسین

نچّه یرده قلبیم یانوب سنه

سوزش نهانیم عیان اولوب

گلمیشم صراحتله شیونه

عمری اولسا بو نچّه دردیوه

روزو شب وطنده ملر باجون

 

خاطریمده دور دادیمه سنی

تلّون اوسته من سسلین زمان

حمله ایلیور خیموه قُشون

گل هرایه قارداش دِیَن زمان

ایلدون اراده سورونمگه

زینبه حمایت ائدن زمان

آلدی تئز چوخور یر قوجاقینه

اولدی شمع تک شعله ور باجون

 

بیرده عالمون قلبینی حسین

منجنیق محنت سخان زمان

فاطمه آنام وای اوغول دیوب

ناله سی سمایه چخان زمان

مقتلونده ذبح ائتمگه سنی

قاتلون یوز اوسته یخان زمان

ایندیده همان صحنه نی سالوب

یاده غیرتیندن اسر باجون

 

هامی غملرون بیر یانا حسین

بو غمون منه چوخ گلوب گران

پیشوازیمه نی ده باشوی

شهر کوفه ده گتدی نیزه بان

بیر هلا تک قانلی باشوی

بیر بیره نشان وئردی کوفیان

واضحیدی مطبخده یاتماقون

اولدی دردیوه باخبر باجون

 

خیرِ مقدمِ اهل بیتوه

گلمگونده بیلدیم خیالیوی

چوخ پوزولدی محملده حالتیم

درک ائدنده پوزقون جمالیوی

قانلو کول قیافونده زینبه

روش ایلدی شرح حالیوی

دسترس دئدیم یوخدی نیلیوم

یوخسا باشینه کول سپر باجون

 

ممکن اولمادی غم شریکیوه

صورتونده کی لکّه نی یووا

باشلادی او لبلر تلاوته

جان وئرن زمان دگمدی سووا

غرفه دن سنی داشه باسدیلار

باشوون قانی دولدی آغزووا

نطقیدن حسین سن دوشن زمان

بیلمدی ئوزون دربدر باجون

 

بیلمدیم هاچان محمله باشیم

دگدی عشقیده بسکه عالیام

قزلارون دئدی باغلا یاروی

یوخسا بیلمیوردوم یارالیام

زلفیمون قانین گورجگین دئدیم

باخ منه مرید وفالیام

باشین اوخشادوب باشوه حسین

تابع قضا و قدر باجون

 

ای اسیر دنیای فتنه گر

آغلاما باجی آغلا باجی

منطقاً علی ، فاطمه سیَر

آغلاما باجی آغلاما باجی

 

مرحبا سنون خوش مرادووه

مرحبا سنون خوش مرامووه

مرحبا سنون عشق پاکیوه

مرحبا او زیبا کلامووه

آفرین صد احسن بیانیوه

آفرین دیانت مقامووه

عالمه نظیرون چتین گلر

آغلاما باجی آغلاما باجی

 

بزم عشقیده بی مثال سن

رزم عشقیده قهرمانسن

کوی صبریده بی نظیرسن

سوی حقّیده جاودان سن

سرخ نهضتون صاحبی منم

سن او نهضته پاسبان سن

انقلاب ائدن آغلیار مگر

آغلاما باجی آغلاما باجی

 

قارداشی ئولن غصّه لر چکوب

فوج دشمنه دستگیر اولار

حبس خانه لرده کچر گونی

عالم اسارتده پیر اولار

قارداشی ئولن باجینون قولی

باغلانار طنابه اسیر اولار

قارداشی ئولن چوللری گزر

آغلاما باجی آغلاما باجی

 

آغلاماق سسون قوزانور سنون

قبریده ائدور قلبیمی کباب

پاره پاره جسمیم ائدر منیم

بیر پارا حصیر ایچره انقلاب

ساکت ایله آغلار حرملری

قویما سس قوشا نالوه رباب

درک ائدر سسین اوغلی دیسگینر

آغلاما باجی آغلاما باجی

 

شاهدم نچه خردا قزلاری

سایۀ پناهونده ساخلادون

شاهدم سولان گوللری گهی

ایگلدون گهی اؤپدون آغلادون

شاهدم نچه نازدانه می

سینون اوسته جان تک قوجاقلادون

شاهدم سنی یوردی بو سفر

آغلاما باجی آغلاما باجی

 

نچّه یرده سن یانموسان منه

منده نچّه یول یانمیشام سنه

اوّلی او وقتیدی زینبیم

گتدیلر سیزی بزم دشمنه

مجلسینده ابن زیاد دون

ایستدی اهانت ائده منه

ووردی دیل یاراسی او خیره سر

آغلاما باجی آغلاما باجی

 

سندیورب سکوتی او بزمده

ایلدون زیاد اوغلونی مجاب

مثل اینکه بیر کرکس اوستونه

حمله ایلدی خشمگین عقاب

هر نه سوز دئمیشدی او ظالمِ

بی حیایه ردّ ایلدون جواب

صادر ائتدی بیر حکم پر خطر

آغلاما باجی آغلاما باجی

 

هاشمیّه لر وئردی سس سسه

عمّه وای سوزون دیل حزین دئدی

غیظه گلدی مرجانه اوغلی چوخ

لعن اونا زمان و زمین دئدی

سسلیوبدی جلّادی مجلسه

گل بو عورتین کس دیلین دئدی

قانلو گوزلریم توکدی اشکِ تر

آغلاما باجی آغلاما باجی

 

بیرده نازنین بیر قزیم باجی

سندن ایسته دی بیر گئجه طعام

اولمادی طعامون خرابه ده

ایلدی خجل چرخ بد مرام

سینووه آلوب اوخشادون بویون

هی سیزیلدادی یاتمادی بالام

عندلیب تک چالدی بال و پر

آغلاما باجی آغلاما باجی

 

بیرده یانمشام حالیوه سنون

دهریدن همان قیز دویان زمان

پیکرینه غسّاله غسل ائدوب

کهنه کوینگینی سویان زمان

بیلمدون ئوزونده نه حالداسان

قبره سن او طفلی قویان زمان

زندگانلوقون غمدی سربسر

آغلاما باجی آغلاما باجی

 

مرحوم انور اردبیلی

موضوع: احوالات اربعین ,
زبان شعر و شاعر: نوحه ترکی , انور اردبیلی

 

----

 

کوچ از قتلگاه

 

کهنه پیرهن که گیدون خیمه دن گلنده قارداش

کیم سویوب اونی آپاردی؟ قالمیوب بدنده قارداش

 

عمروون چراغی سوندی، ظلمت ایچره دالدالاندوم

صبحه تک یانان چادردا هجرون آتشینده یاندیم

دست بوسوه باغشلا تز گلمندوم یوباندوم

بیلمدوم گرک گلیدوم ساربان گلنده قارداش...

 

خوش دگل ویرم عریضه، بیر به بیر اورک ملالین

قارداشی ئولنلر آغلار، زینبون ایشتسه حالین

هانسی باجنون زمانه من کیمین پوزوب جلالین؟

هانسی باجنی دوگوبلر قارداشی ئولنده قارداش؟

 

هر قدر بیز اهل بیته، ظلم ایدوبله دویمیوبلار

آل خبر گور هانسی قزدور، ورمیوبلا سویمیوبلار

یاندیرار منی بو نسگل، آغلیاندا قویموبلار

ئولمسم سنه ئولونجه آغلارام وطنده قارداش.

 

مرحوم انور اردبیلی

منبع مجموعه کانالهای مدح و مرثیه

موضوع: کوچ از قتلگاه ,
زبان شعر و شاعر: نوحه ترکی , انور اردبیلی

 

----

 

حضرت امام حسین (علیه السلام)

 

آئین و آرمانیوه قربان اولوم حسین

تاریخ جاودانوه قربان اولوم حسین

 

اندیشه کبیریوه نفس سلیموه

معجز نما بیانوه قربان اولوم حسین

 

عهد قدمده باغلادوقون عهدناموه

پیام باستانوه قربان اولوم حسین

 

ای الی یدی ایل ائدن آزاد زندگی

هر ساعت و هر آنوه قربان اولوم حسین

 

آزادگی مراموه خونین قیاموه

برهان دل ستانوه قربان اولوم حسین

 

تقدیس ائدن دوداقوه زیبا کلاموه

یا حق دین لسانوه قربان اولوم حسین

 

هر کیمسه دوز چاغورسا سنی دوز یولا چخار

کویونده رهروانوه قربان اولوم حسین

 

درگاه لطف و جودون آچیقدور محبوه

الطاف بی کرانوه قربان اولوم حسین

 

یوز قویسا آستانیوه کیم رو سفید اولار

اعجاز آستانوه قربان اولوم حسین

 

نظم مصیبت ایلینه نوحه خوانوه

صدقیله آغلیانوه قربان اولوم حسین

 

آق کوینگه قَرا گینه روضه خوانوه

خدام خاندانوه قربان اولوم حسین

 

ذرات کائناته اثر ائتدی غملرون

محنتلی داستانوه قربان اولوم حسین

 

مامور انتقامون هله منتظر قالوب

مهدی ناگرانوه قربان اولوم حسین

 

ترک ایلیوب دیارینی چولدن چوله دوشن

افسرده کاروانوه قربان اولوم حسین

 

جغد غم اگلشن ائوه غملی عمارته

در بسته خانمانوه قربان اولوم حسین

 

کرب و بلاده منزل اعلای عشقوه

سن خوشلیان مکانوه قربان اولوم حسین

 

پژمرده اهل بیتوه وحشتلی قیزلارا

آشفته زندگانوه قربان اولوم حسین

 

چهره سیه غلاموه حر و حبیبوه

انصار مهربانوه قربان اولوم حسین

 

آب حیاته ناز ایلین تشنه لب لره

افراد تشنه کاموه قربان اولوم حسین

 

پر شور اولان جوانلارا شوق جهادیله

پیران نکته دانوه قربان اولوم حسین

 

عبداللهیله قاسمه عونیله جعفره

اکبر کیمی جوانوه قربان اولوم حسین

 

عباس رزم پرور و حیدر مثالوه

سردار جان فشانوه قربان اولوم حسین

 

سربازلر سرآمدی سر شهادتون

سرباز بی زبانونه قربان اولوم حسین

 

میقات حقده محرم اولان وقته گیدیگون

احرام غم نشانوه قربان اولوم حسین

 

ال سینه اوسته اشگی دالونجا آخانلارا

طفلان ناتوانوه قربان اولوم حسین

 

محنت شریکی قیزلاروون سرپرستینه

شایسته قهرمانوه قربان اولوم حسین

 

میدانده مجاهدت فن رزموه

شمشیر بی امانوه قربان اولوم حسین

 

قانه باتان محاسنوه قانلی گوزلره

دندانوه لبانوه قربان اولوم حسین

 

داش یاراسی دگن یارالی سجده گاهوه

آننوندا لخته قانوه قربان اولوم حسین

 

اوچ پر اوخیله پارچالانان داغلی قلبوه

آه شرر فشانوه قربان اولوم حسین

 

گودالیده سمایه اوجالدان صداسینه

معجر اله آلانوه قربان اولوم حسین

 

قصر جنانیده گوزی یاشلی گلن لره

دل داغلی مهمانوه قربان اولوم حسین

 

خنجر دمینده حنجری یا ربنا دین

جانان اسیری جانوه قربان اولوم حسین

 

غارت اولان لباسوه عریان جنازوه

پاشیده گلستانوه قربان اولوم حسین

 

انگشت زخمداریوه قانلو بیلک لره

مقطوع اولان یدانوه قربان اولوم حسین

 

شام عزاده سینوون اوسته قوناق گلن

دل خسته نوحه خوانوه قربان اولوم حسین

 

یول باشیلیاندا کوفیه یورقون اوشاقلارا

پخش ائتدیگون اذانوه قربان اولوم حسین

 

خیمه یاناندا قوش کیمی اوددان قناد آچان

طفلان پرزنانوه قربان اولوم حسین

 

چوللرده توپراق اوسته یاتوب قول بویون اولان

سرگشته آهوانوه قربان اولوم حسین

 

«انور» همیشه شعر یازان وقته آغلیور

عرض ایلر هر زمانوه قربان اولوم حسین

 

مرحوم انور اردبیلی

منبع مجموعه کانالهای مدح و مرثیه

موضوع: حضرت امام حسین (ع) ,
زبان شعر و شاعر: نوحه ترکی , انور اردبیلی

 

----

 

در احوالات حضرت ابوالفضل (ع)

 

خالقه کیم عبد سزاوار اولور

روحی یقین حقّه طرفدار اولور

 

عالم خلّت ده خلیل اولسا کیم

یاندیران اود صحنۀ گلزار اولور

 

هر بشر اولسا ذکریا روش

مشتری دندۀ مُنشار اولور

 

کهنه جهانون اوخو تاریخینی

مخبر اولان واقف اخبار اولور

 

فکر ایله ایثار مجاهد لره

فکر ایلینلر اُولُوالاَبصار اولور

 

یاخشی ورق وُور شهدا دفترین

گور توکولن قانلارا آمار اولور

 

عادل اولان شخصلر هر دوره ده

ظالمیلن وارد پیکار اولور

 

کیم دوشونوب لذّت حرّیّتی

دشمن سرسخت ستمکار اولور

 

زینت تاریخدی آزاده لر

مستبدون عاقبتی خوار اولور

 

نیلدی فرعون کلیمُ اللّهه

حقّ مگر قابل انکار اولور

 

مکتب توحیدیله دعوا ایدن

مورد خشم حق دادار اولور

 

یا للعجب خوابیده دور مستبد

حتمی یاتوب یاتماسا هشیار اولور

 

بستر غفلت عجبا نرمدور

بستری نرم اولماسا بیدار اولور

 

حیله ده استادیدی هند اوغلی چوخ

حیله مگر جالب افکار اولور

 

کیمدی معاویّه نی تصدیق ایدن

خامه آدین یازماقا ناچار اولور

 

فلسفۀ حیدره اُول آشنا

عدلینه دنیا بوئی اقرار اولور

 

قلبلره سلطنت ایلور علی

عزّت حق وار نقدر وار اولور

 

غیر از علی کیم اَبُوالاَیتامیدور

کیم ایله ایتامه پرستار اولور

 

رهبره باخ رحمینه باخ عدله باخ

الده غذا کوچه نی سیّار اولور

 

خدمت اطفال پدر مُردیه

بیوه زنیله گیدوب همکار اولور

 

یازمالی سوز چوخدی بو عنوانیده

وقتی نه گنجایش اشعار اولور

 

صحبتمیز وار بوگون عبّاسیدن

اوغلونا راجع نچه گفتار اولور

 

فارغ اولوب حملیدن امّ البنین

گرچه او ساعت آنا بیمار اولور

 

دقت ایدوب صورت نوزادینه

گوردی ایوی مطلع الانوار اولور

 

دردینی بِالمرّه فراموش ایدوب

بو گوزل اوغلوم دیدی سردار اولور

 

حیف اولا یثربده دگلدی علی

درّ صدف دن گوره اظهار اولور

 

بیر نچه گون گچدی گلوب مرتضی

شهره ورود شه ابرار اولور

 

قاچدی حسین وجدیله دروازیه

هیکل حق گوردی نمودار اولور

 

گلدی دیله عرض ایلدی السّلام

ساغر رحمت دیدی سرشار اولور

 

پیک بشارتدی حسینون سنه

خاطرون البته خبردار اولور

 

قارداشیم اولدی گوزون آیدین بابا

رشد ایلسه منشأ اخیار اولور

 

گورملی اوغلاندی گئدک گور یوزین

خبره اولان دُرّه خیردار اولور

 

منزلینه گلدی شه لافتا

شاد گوروبدور در و دیوار اولور

 

زینبینی گوردی بشیک تَرپَدور

شوقیله لایلای سوزی تکرار اولور

 

ناز ایله سون مشتری ام نازیوه

غملی باجون مونس گهوار اولور

 

ویر منه مولا دیدی قارداشیوی

اوغلونا هر بیر آتا دلدار اولور

 

آلدی یدالله الینه اوغلونی

عترتی ناظردی نه رفتار اولور

 

گوردیلر عباسه باخور دویمیور

باخدوقیجا طالب دیدار اولور

 

امِّ بنینه بویوروب مرحبا

دوغدوقون اولان دیدی سالار اولور

 

من نجه اسلام علمین ساخلادیم

بو گوزل اوغلومدا علمدار اولور

 

قهر خدایه نجه من مظهرم

بو بالادا مظهر قهّار اولور

 

آت بئلینه چخسا تماشاسی وار

رهگذری منظر نظّار اولور

 

پیکرّ همّت و غیرتدی بو

حق دانشوب حقّه مددکار اولور

 

قولّارینی بوسه ایدوب آغلادیم

محنت آینده سی معیار اولور

 

خانۀ دینه ایکی محکم ستون

آتیه ده بو ایکی قولّار اولور

 

اوغلی حسینه بویوروب مرتضی

بوبالا هر یرده سنه یار اولور

 

مژده ویروبسن منه دروازده

حقّ بشارت سنچون وار اولور

 

خلعت لایق سنه یوخدور حسین

تُحفه کیچیک اولسا منه عار اولور

 

گل تزه مولودی سنه بذل ایدوم

ساخلا پناهونده بهادار اولور

 

گُل گُلی آغوشه آلوب ایگله دی

فکر ایله گور حظّی نه مقدار اولور

 

کیچدی بو جریاندان اوتوز بِش بهار

شوره زمین مثل چمنزار اولور

 

کرب و بلا تپراقی قرمز گیوب

فلسفۀ عشق پدیدار اولور

 

یتمیش ایکی نفس سلیم عاشقون

قانیله زیبا یوزی گلنار اولور

 

هر بیری تپراقه دوشور زینیدن

جلوه سی روشنگر اعصار اولور

 

نوبت ابالفضله یتوب الغرض

سو گتوره خیمیه وادار اولور

 

مشگینی دولدوردی چخوب نهریدن

همّتله عازم دربار اولور

 

پنجۀ مردانه ده شمشیر تیز

قالخور انور صاعقه کردار اولور

 

من دِیَن ابطال عرب قورخودان

معرکه ده بندۀ فرّار اولور

 

رَم ییور آتلار توخونور بیر بیره

هنگلرین صفلری طومار اولور

 

هر کیم علمداره گلور روبرو

باشی گیدور لاشۀ مردار اولور

 

سسلنور ارواح رُسُل مرحبا

هانسی جدلده بئله سردار اولور

 

گور نه دلاور بِجروب مرتضی

دشمنه هر حمله سی اخطار اولور

 

حیف اولا بیر مردک روبه صفت

گوردی فنا لشگر کفّار اولور

 

دالدالانوب بیر آغاجا تولکی تک

روبَهَه سنگر بلی اشجار اولور

 

مذهبی یوخ مسکلی یوخ دینی یوخ

دین سیز اولان ناکس و مکّار اولور

 

شیرون اولوب ساق قولونا مشتری

ظالم اولان مرد رَهَه خار اولور

 

اندی قلج دوشدی اوزون قول یره

قول کسیله پیکره آزار اولور

 

آلدی قلنجین صول اله سسلدی

حامی اولان دینه فداکار اولور

 

ایتسه مجاهد تک الیلن جهاد

فیضی دو چندان و دو صدبار اولور

 

غیرت اسلامی چکن شخصلر

معرکه ده صاحب ایثار اولور

 

صول قولیدا بذل ایلسم صاق کیمی

راه شهادت منه هموار اولور

 

بخت مدد ایتسه علی اوغلونا

ئوز عموسی جعفره اوخشار اولور

 

قان بوروسه مرد مجاهد یوزون

صورتینون جلوه سی بسیار اولور

 

کاش اوشاقلار سوسوز اولمیدیلار

اولماسا سو مرحله دشوار اولور

 

مشگیله سودا ایدورم جانیمی

اولسا آلان گرمی بازار اولور

 

صول قولودا اولدی بدندن جدا

قانلو علم گوردی نگون سار اولور

 

فوری کمند ایتدی ایکی دیرسگین

بیلدی علم گیتسه ئوزی خوار اولور

 

اولدی جری بندۀ فرّارلر

حمله ور مظهر کرّار اولور

 

اوخلار هواده پر آچوب قوش کیمی

نیزه لر اللرده سیه مار اولور

 

من دیمورم آچ باشوی آچما یا

هر کس ئوزی فعلینه مختار اولور

 

دگدی بیر اوخ مشگه بیری آلنینا

سینه ده پیوند اوخا اوخلار اولور

 

صاق گوزیده یاره لنوب دولدی قان

صول گوزونه کرب و بلا تار اولور

 

کاش دیدی باشدا گیده قالمیا

یاره لی باش پیکره سربار اولور

 

دوشدی آت اوستن نجه قالسون هله

شرحه مگر طاقت حضّار اولور

 

ایستور حسین خیمه لری ترک ایده

زینب اونا فوری هم اسرار اولور

 

چوخ نگران سان دیدی قارداش حسین

آهون اوجالدوقجا شرر بار اولور

 

قارداشیم اللرده قالوبدور دیدی

قتلینه میدانیده اصرار اولور

 

قانلو گوزی یولدادی گوزلور منی

یولدا یوبانسام اونا اجبار اولور

 

السیزیمه ال یتورم من گرک

قارداشا قارداشی هوادار اولور

 

قان توکن اون یدّی قلج بیر بدن

فکر ایله گور یاره نه مقدار اولور

 

بنذه دی پیغمبر علمدارینه

وای دیه نی جعفر طیّار اولور

 

بو سوزی هر یرده دیرسن، حسین

اوّل ابوالفضلینه زوّار اولور

 

یغ باشوا عترتیمی قیل نوا

فاطمه ده منله عزاردار اولور

 

مرحوم انور اردبیلی

موضوع: حضرت ابوالفضل العباس (ع) احوالات ,
زبان شعر و شاعر: نوحه ترکی , انور اردبیلی

 

----

 

آمدن ذوالجناح به خیمه ها

 

دل آچوب طوطی طبعیم دانیشور دلبردن

اورگیم غمله دولوب گوزلریم اشک تردن

 

عاشقم عمر بویی دلدن حسینون آدینا

ئوپرم نام حسین زینت اولان دفتردن

 

شکر اولا حقّه منه قدرت تمییز وئروب

آییروب عقل سلیمیم عَرَضی جوهردن

 

کاش ئولنده آقامون قاره سی اگنیمده ئولم

جان چاتا مقصدینه عشق همایون فـَردن

 

پیکریم حمل اولونا بزم عزادن قبره

ائتمیم کوچ ابدی منزلیمه بستردن

 

گوزل آدی آقامون نقش اولا قبریم داشینا

ره گذر یاد ائده مولایه گوره نوکردن

 

لحد آلتیندا بئله واردی بیر آز غصه لی خاک

یادگاریدی قالوب نوحه یازان انوردن

 

ظهریله عصر آراسی دوشدی حسین زین اوستن

صوت عُرّا اوجالوب نُه فلکه لشگردن

 

قاش گوزی صورتی بیر پارچا قیزیل قانیدی

طاقت آلمیشدی تیکانلار او گل پَر پَردن

 

جسم موزونیده یارای تعادل یوخیدی

تیتریوردی بدنی اوخلار ائدن لنگردن

 

یاره لی ال یارالی قلبینون اوستونده امام

آیریلوب گون کیمی سیر ایلدیگی محوردن

 

ایکی سوزش واریدی قانی آخان قلبینده

بیری اوخدان بیریده داغ علی اکبردن

 

تپراق اوسته یخیلان وقته دئدی بسم الله

سجده ی شکریله یاد ائتدی حق داوردن

 

انبیای اولوالعزم آچدی او صحراده باشین

گلدی زهراده اورا جنّت جان پروردن

 

مرکبی باخدی حسینه،ائدوب احساس خطر

راکبین درک ائلدی قوزانا بیلمور یردن

 

هی دولاندی باشینا شیهه سینی ائتدی بلند

بویادی کاکلینی خون شه محشردن

 

اوجونا صاحبینون قانلی لُجامین قویدی

کلمه سیز قیلدی تمنّا یارالی سروردن

 

دور سوار اول سنی فوراً یتوروم خیمه لره

ائتمه شرمنده منی عترت پیغمبردن

 

یاره لی جسموه هی اوخدی گلور داشدی یاغور

چوخدی زجری سنه داش یاره سینون خنجردن

 

هر قدر سنده نفس وار وراجاق کوفه لیلر

بیر به بیر عضولرون آیریلاجاق پیکردن

 

ذوالجناحه بیر اشاره ائلدی سرور دین

گئت خیامه دئدی ال چک منِ بی یاوردن

 

گوزی یولدا قالان اطفاله گوزل قاصدسن

اوجالوب ناله سسی عائله ی حیدردن

 

سوسوز آهولریم ایندی ملشور هجریمدن

گئت حمایت ائله بیر عدّه قرا معجردن

 

ویرمینجا باشیمی شمر دنی نیزه سینه

کوفه نون اهلی بوراخماز یاخامی اللردن

 

حلّ اولان گوردی دگل مشکل لاینحلّی

یارالی مرکب اَنوب خیمیه فوراً تلّی

 

بیر اوجا شیهه چکوب ایلدی اعلان خطر

بیلون ای ختم رسول عترتی ختم اولدی سفر

 

الظّلیمه سؤزی شیهمده شعاریمدی منیم

قاصدم خیمه لره منده دی هر تازه خبر

 

ایسته سوز دردی سیزه روشن اولا صاحبیمون

ایلیون پیکر مجروحیمه دقّتله نظر

 

منه بیر یاره دگنده اونا یوزیوز دگدی

گورون ایندی یاراسی راکبیمون وار نقدر

 

مایلیدیم گتورم،گئت دئدی سن خیمه لره

باشینون اوسته آچوبدور باشینی پیغمبر

 

منتظر قلبلره منعکس اولدی بو صدا

چیخدی پیشوازینه وحشت زده آل حیدر

 

اللری باشدان اوجا، طرّه لری یوزلرده

هاموسی تشنه لبیدی هاموسی تشنه جگر

 

بیر سوری قورخولی جیرانه شبیهیدی اولار

ایلیوردی مَله جک سسلری آفاقه اثر

 

ناقصیم واردی خیال ایلمه تشبیهیمده

هانسی جیران آتاسیز قیز کیمی نسکللی ملر

 

ذوالجناحی بیلوسوز گوردی نه حالدا بالالار

سورونور یرده جلو ، قارنینین آلتیندا اَیَرْ

 

دوره وردی بالالار مرکبی آلدی آریا

بیرده گورمز ائله بیر منظره تاریخ بشر

 

اولمیوب آل عبایه ائله مشکل صحنه

مدرکیم عصرین امامی اوخیان مرثیه لر

 

بیری سویلر نه قرا گونلره قالدوق یارب

نه جوان قالدی بیزه نه قوجا نه بیر صودامر

 

بیری امداده نجفدن چاغورور مولانی

بیری یردن گتوروب باشینه تپراقی سَپَر

 

بیری سویلردی بئله خانه بدوش اولمازدوق

یوردوموزدا اموی لر بیزی قویسیدی اگر

 

قورخودان بعضی قیزون لرزه ائدوردی بدنی

یل اسنده نجه که بیر قوری یاپراق تیترر

 

گتوروبدور او زمان داده علی قیزلارینی

ناگهان کچدی قباقه بالاجا بیر دختر

 

بالاجا اللرینی چکدی آتین کاکلینه

دئدی ای پیک پیام آور و خونین منظر

 

خیمیه سنکه بوحالدا یتوروبسن اؤزوی

قتلگهده بئله معلومیدی وار آیری خبر

 

باباما وئردیله سو یاکه سوسوز جان وئردی؟

قوریان دیل دوداقی اولدی و یا اولمادی تَر

 

آیریلان وقته اُپوشدی منیله دوشدی یولا

واردی بیر خاطره سی ایندیده قلبیم گوینر

 

لبلریمدن بابامون لبلری چوخ ایستیدی

اونی آتش کیمی گوردوم اؤزومی ذرّه شرر

 

اؤ سوسوز ئولسه کول اولسون بو جهانون باشینا

او سوسوز ئولسه سرین سو نجه قیزلاری ایچر

 

اؤ سوسوز ئولسه نه لازمدی بیزه آب فرات

زندگینون بیزیچون فایده سی واردی مگر

 

مرحوم انور اردبیلی

موضوع: ذولجناح ,
زبان شعر و شاعر: نوحه ترکی , انور اردبیلی

 

----

 

  زبانحال حضرت زینب (س)

در شهادت حضرت زهرا (س)

 

دل شب ایلیوب سفر هارا گیدورسن آی ننه

قالوبدی دورد بالون ملر هارا گیدورسن آی ننه

 

توخاندی شانۀ اجل او طرّۀ مُعَنبره

گییندون آغ لباسیوی شکنجه دیده پیکره

شبیه ائدوبدی آغ کفن سنی بیر آغ کبوتره

شکسته دل شکسته پَر هارا گیدورسن آی ننه

 

 

بهار وقتی سن کیمی شکفته لاله سولمادی

تانیشلارون آچوب باشین جنازون اوسته یولمادی

ایوین چوخ ایستیر هامی ایوین سنه ایو اولمادی

ایویندن اینجیین گیدر هارا گیدورسن آی ننه

 

 

مَصون اولار تَعدّی دن او قوش که آشیاندادی

امان سیز اولدی منزلون بلا بو دودماندادی

بو ایو سَنه خوش اولمادی تَزَه ایوین هایاندادی

گیجه زمانی بیخبر هارا گیدورسن آی ننه

 

 

حبیب لَم یَزَل قیزی خدایه سن حبیبه سن

نژاداً هاشمیه سن اصالتاً نجیبه سن

یوخوندی بیر کسون مَگَر بو شهریده غریبه سن

غریبه دَنده چوخ بَتَر هارا گیدورسن آی ننه

 

غمون گَلوسینی دوتوب حسن دینمیور سوزون

گهی باخور جنازووه گهی یومور گوزل گوزون

کیچیک باجیمدا مَطلبی بولوبدی ئولدورور اوزون

قویوب حسینی خونجگر هارا گیدورسن آی ننه

 

گوزینده حیدرین جوشوب آخور سرشک جوهری

وفالی همسر آغلادار مگر وفالی همسری

علی ایوی خزینه دور سنیدون عالی گوهری

قالور خزینه بی گُهر هارا گیدورسن آی ننه

 

چخوبدی گویده سیر ایدور آیین طَرب زمانی دور

نسیم نَرم و سَرد اَسور نه تاب و تَب زمانی دور

باخور ستاره لر یِره نماز شب زمانی دور

توقف ایله مختصر هارا گیدورسن آی ننه

 

شهید محسنون غمی سنی چوخ ایتدی دل کباب

دیدون بالام صود اَمَّمدی گوزوندن آخدی اشک ناب

سنون بو گیتمگون ایدور علینی خانمان خراب

تفاقنه دوشوب شرر هارا گیدورسن آی ننه

 

قوناق سن پیمبره گلوبدی سرّی دعوتی

ولی بو زینبون سنه ئورکده چوخدی صحبتی

گیجه مسافر اولماقین نه حُسنی وار نه لذتی

قالوب ایوینده گیت سحر هارا گیدورسن آی ننه

 

هر اوخشاما دیور قیزون داش اولسا قلبی یاره لر

نمونه بیر سخنورم سوزومده وار اشاره لر

بو قاره که باشیمدا وار دالیجا چوخدی قاره لر

اولام چتیندی بختور هارا گیدورسن آی ننه

 

 

کچیکدی سنّی زینبون بؤیوک ملالیوی قانار

سرشکینی روان ایدر یوزه نقابی ایسلانار

یانان قاپوندی منظره گوزوم باخار اورک یانار

آز اولدی نسگلون مگر هارا گیدورسن آی ننه

 

مدینه نون خانملاری گیدوبدی خوابه چوخ گران

جلال سیز اولور سنون مزاره میّتون روان

بو رسمدور که منزلین جنازه ترک ایدن زمان

عزایه قونشولار گلر هارا گیدورسن آی ننه

 

مرحوم انور اردبیلی

منبع مجموعه کانالهای مدح و مرثیه

موضوع: حضرت فاطمه زهرا (س) زبانحال ,
زبان شعر و شاعر: نوحه ترکی , انور اردبیلی

 

----

 

شجاعت و حماسه

حضرت ابوالفضل العباس (علیه السلام)

 

بو نجه عشقیدی عشّاقی گرفتار ایلیور

بو نجه عشقیدی شوره یری گلزار ایلیور

نخل عرفانی پر از شاخه و پر بار ایلیور

زشت رو برده لری چهره نمودار ایلیور

فی المثل قدرت خلقت دی یوخی وار ایلیور

 

بو نجه عشقیدی ائتمیش اوجا نام بشری

فوق ائدوب سلک ملک دنده مقام بشری

عشق اداره ایلیور آری نظام بشری

میندیروب قدرته نیروی قیام بشری

عشقیدور قدرت ایمانی سزوار ایلیور

 

جاودانه گل خوشرنگ بهار عشقیده وار

حسن عبدیّت و سیمای وقار عشقیده وار

گوهری ناب اولا یاخشی عیار عشقیده وار

قسم اولسون شرف عشقه نه وار عشقیده وار

عشق پیمانیدی پیمانه نی سرشار ایلیور

 

من دیَن عشق کی تعریفینه وار منده قصور

بهترین صحنه سی عاشور گونی ائتدی ظهور

سالاجاق طنطنه ایجادیده تا نفخۀ صور

مغز بیداره وئروب کرب و بلا صحبتی شور

بو حماسه بلی هرغافلی هشیار ایلیور

 

صبح صادق ده حسین پرتو نور ازلی

افق عشقیده زیبا یوزی خورشید جلی

خونی خون نبوی، اللری پیغمبر الی

امر ائدوب اکبره اعلان اذان ایله علی

صبح امّید ئوزین السّاعه پدیدار ایلیور

 

عاشق اعظم ائدوب عشقیله اقدام صَلواة

اقتدا ائتدی اونا صادق و صالح نفرات

فکر بیر قولیده بیر عشق بیر اندیشه ثبات

او جلال و جبروتی ده ملکلر هامی مات

تیپ ارباب صفا سجدۀ دادار ایلیور

 

صوت تکبیر اوجالور عرشه سوسوز لبلردن

قدسیان روحه گلور کلمۀ جان پروردن

بو ندای ملکوتی اوجالوب هر یردن

خلقته بسدی حسین مکتبی پیغمبردن

فخر بو طاعته پیغمبر مختار ایلیور

 

مشعر عشقیده ختم ائتدی نمازین شهدا

صدقیله محرم اولانلار ایلدی فکر مِنا

یار و انصارین حسین ابن علی قیلدی دعا

دئدی هامّوزدا سیزون من گورورم روح وفا

صورتوز سیرتوزون حُسنُنی اظهار ایلیور

 

ظاهراً عدهّ میزون گرچه چوخ آزدور عَدَدی

باطناً بسدی بیزه دولت عشقون مَدَدی

هر کس امضاء ائده بولمز بو خدائی سَنَدی

عشق توحیدیده وار رمز بقای اَبَدی

صود امر طفلیده سلطان جهاندار ایلیور

 

ای مجلّل کیشی لر کی دایانوبسوز بو سیاق

ورمیسوز خاطریمه همسروزی سیز سه طلاق

ساحت پاک خداده گوروم اولسون ئوزوز آق

اولاجاق سوز بو گئجه سفرۀ جاناندا قوناق

جدّیم احمد ده همان سفره ده افطار ایلیور

 

ما حصل اهل ولا فیض شهادت تاپدی

کهنه سرمستلر ئوز عشقینه قیمت تاپدی

تشنه لر اولدی فدا چشمۀ وحدت تاپدی

چوخی گمنامیدی بیر لحظه ده شهرت تاپدی

آری خوش لحظه یولی سالکه هموار ایلیور

 

خیمه لر بوشدی فقط عترت اطهار قالور

نه مهاجردن اثر واردی نه انصار قالور

نه علی اکبر و نه قاسم دلدار قالور

بیر حسین بیر صود امر بیرده علمدار قالور

اودا اذن آلماقا سلطانیدن اصرار ایلیور

 

یاپشوب دامن مولای وفاداریندن

ایله بیل حاجی دوتوب کعبه نین استاریندن

شبنم خجلت آخور لالۀ رخساریندن

یوسف حیرتده قالوب گرمیِ بازاریندن

هاردا یوسف بو قدر رونق بازار ایلیور

 

سیّدی وئر منه رخصت ایله مشمول کرم

مدرک عشقیمی قیل لطفیله توشیح و رقم

سینه می تنگه سالوبدور بیلوسن غصّه و غم

طاقتیم یوخدی سوسوزدان مَلَشه اهل حرم

الطش صوتی آقا روحیمه آزار ایلیور

 

باغلیوبسان نیه شهباز کیمی شهپریمی

گوهریم نابیدی قوی راضی ائدوم مشتریمی

داریخور قلبیم عباده گورورم اکبریمی

منده آزاده ام آزاد ایله سن اللریمی

گور نجه جنگیده اعجاز بو قولّار ایلیور

 

جنبشه گلدی بو سوزدن او کرم دریاسی

شاه دین رزمه مُخیّر ایلدی عبّاسی

امر پروازی آلوب قاف شرف عنقاسی

شاد و بشّاش اولوب مرتضوی سیماسی

گئدور عبّاس، حسد گنبد دّوار ایلیور

 

احسن احسن دیوری روح الامین همّتتینه

قدسیان عالم معنا دیل آچوب مدحتینه

شهدای اُحُدون روحی گلوب خدمتینه

باخور حسرتله حسین قارداشینون قامتینه

ساچلاری الده دعا خورداجا قیزلار ایلیور

 

تلّیدن اندی عقابی پر آچوب مثل عقاب

حکم تمکین وئروب توسنه ناگه او جناب

مسلک ابلیس سیاهه یتیشوب تیز شهاب

موسی تک سامُری سیرت قوشونا قیلدی خطاب

بی بصیرت سُپهه پند اولوالابصار ایلیور

 

ای سپاه اموی حیله مراموزدی سیزون

ننگ تاریخ بشر ننگ قیاموزدی سیزون

ظاهرا کلمۀ حق تکیه کلاموزدی سیزون

دینوز اولسا شه لب تشنه اماموزدی سیزون

ئوز امامینده مگر دینی اولان خوار ایلیور؟

 

دولدورورب قلبوزی عشق زر وسیم عشق جهان

مرغ زیبا پر حُرّیت اوخا اولدی نشان

قورخودوبدور سیزی عفریت محیط خفقان

قابل نفرت و لعنت دی یزید نادان

نه حکومت دی سیزه مردک میخوار ایلیور

 

عار اولا اون ایکی مین نامه یازان ملّتوزه

عار اولا عاطفوزه نیّتوزه غیرتوزه

لطمه وردوز ئوزوز ئوز ارزش و حیثیّتوزه

نه سبب اولدی قیتدوز گنه وحشیّتوزه

روبرو اولماقا انسان سیزیلن عار ایلیور

 

هانسی مسلکده سوئی تشنیه ایلوبله حرام؟

سارالوب ختم نبی گلشنی ای قوم ظلام

یوخدی سو شدّت گرماده یانور اهل خیام

نه کیچیک لرده رمق وار نه بیوک لرده دوام

سعدون اوغلی نیه آل اللهه اجبار ایلیور

 

گلمیشم نهری آلام سو آپارام تشنه لره

اعتنا ایلمرم یوز بئله سایسیز نفره

چکسه شمشیرینی هر کیم الین آتسا سپره

روبرو اولسا منه جنگیده سالّام خطره

نجه که کاهی فنا برق شرر بار ایلیور

 

انتخاب ایله دی هرکیم جدل تن به تنی

ساغر مرگی ایچوب توپراقا دوشدی بدنی

گورمیوب دیدۀ دنیا بئله شمشیر زنی

فِی المَثَل طَیراً اَبابیل پر آچموش عَلَنی

اَبرهه قومینی سجّیله گرفتار ایلیور

 

گوردولر جنگیده ماهردی او عالی هدفی

اختیار ایلدی ابطال عرب پشت صفی

بیلدی عبّاس علی تک باشا یوخدور طرفی

خیمیه باخدی صورا سسلدی شاه نجفی

کارزار اهلینی اوغلون نجه گور زار ایلیور

 

هر نه عّباسی ده واردور باباجان سَندَندور

منده که صدق و صفا نام و نشان سَندَندور

بو قوی پنجه بو بازوی توان سَندَندور

رگ قلبیمده عروقیمده کی قان سَندَندور

سن اؤپن قولدی بو گون صفلری طومار ایلیور

 

بیر نبرد ایلدی میدانیده اول یکّه سوار

قلب لشگرده یول آچدی قوشونا وئردی فشار

سوروشوب مارد بد خو نه قیامتدی نه وار

بیخبرسن دیدیلر جنگیدن ای فتنه شعار

مرتضانون اوجا بوی اوغلیدی پیکار ایلیور

 

خیمه سین ترک ایلدی فوری او غولِ اُموی

گوردی میداندا علمدار سپاه عَلوی

قول اوزون، پرچم اوجا، قامت اوجا، پنجه قوی

ماردون خیمه سینه فوری ائدور پیشروی

برق شمشیری شاخور مارده اخطار ایلیور

 

عصبی ائتدی صدیف اوغلونی کابوس اجل

مرکبه وئردی جلو اولدی مهیّای جدل

فنّ رزمیله آتوب نیزه سین عبّاس اَوَل

اوجالاندی او اوجا نیزه نی دوتدی اوجا اَل

بو نمایش دئدی مارد سنی بیدار ایلیور

 

منیم استاد نبردیم اسدالله علی

ایلیوبدور منه تعلیم رموز جدلی

ناقصون چوخدی سنون رشتۀ دعواده ولی

مردسن نیزه وی آل سن، دالی قیتر بو الی

اشقیا قدرت سرپنجه وی معیار ایلیور

 

نیزه سین آلماقا مارد چالشوب قدرتیله

زور بازوسی نی ویردی عصبانیّتیله

اولدی ناکام سنانه یاپشوب خفّتیله

نیزه سین آلدی علی اوغلی اونون همّتیله

منتطر دی هامی گورسونله نه رفتار ایلیور

 

ماردون مرکبینی پیله دی عبّاس شریف

عرصۀ رزمی ده سر در گُم اولوب کهنه حریف

پنجۀ شیرده روبه تک ئوزین گوردی ضعیف

دیل آچوب عجزه ابوالفضلی ائدوبدور تعریف

منی عفو ایله، بیوک عفو خطاکار ایلیور

 

ایسته دی مارده مرکب گتوره قوم ضلال

اسدالله بالاسی وئرمدی بو امره مجال

اونون ئوز نیزه سین عباس برازنده خصال

بوغازیندان ائله ووردی کسیلوب راه مقال

گوردیلر ترک نفس لاشۀ مردار ایلیور

 

جان وئرور مارد نامرد قشون وحشت ائدور

تلّون اوستونده حسین زینبیله صحبت ائدور

باجی قارداش او گوزل قارداشینا دقت ائدور

ارزش جنگینی زهراده گلوب قیمت ائدور

غبطه بو منظریه جعفر طیّار ایلیور

 

زینیدن اَندی او پروردۀ سلطان نجف

ماردون کسدی باشین قهریله اول کان شرف

بیلدی زینب سوؤونور آتدی اونی تلّه طرف

نیزه نی چالدی قوی پیکرینی قیلدی هدف

دئدیلر ایندی نه دور فکری نه پندارایلیور

 

گوردولر قوش کیمی قالخیزدی نگونسار تنی

آتدی سعد اوغلونا ساری او کثافت بدنی

خوار ائدوبدور اونی بو جنگی نمایش عَلَنی

علی اوغلی دئدی تپراقه سالور هر گئدَنی

صحنۀ عرصۀ بدری بیزه تکرار ایلیور

 

بی توقّف چاپاراق وئردی جلو مرکبینه

سعی ائدوب راه صفاده یتیشه مطلبینه

آلدی دریانی سودان وورمادی امّا لبینه

قویدی قیمت ئوزی ئوز عشقینه ئوز منصبینه

عشقه باخ ایچمگه سو ناز او سردار ایلیور

 

نهریدن چخدی اورکده غمی یوخ مشگی دولی

علمی الده قلج الده سلامتدی قولی

باخدی اطرافه ورانداز ایلدی صاق و صولی

انتخاب ایلدی مقصودینه نزدیک یولی

دل تمنّای حرم خانۀ دلدار ایلیور

 

قویسا اهریمن اگر درک سلیمان ائدرم

سو آغیر قیمت اولوب قیمتین ارزان ائدرم

غشّ ائدن قیزلارا مشگون سویون احسان ائدرم

صود امر اصغریمون دردرینه درمان ائدرم

تشنه لر غصّه سینی تشنه علمدار ایلیور

 

حمله ور اولدی او سایسیز نفره فرد رشید

دفتر رزم و شهامتده آچوب فصل جدید

ما و من اهلینی شمشیر ائدوبدور تهدید

کوفیه ساری فرار ایلدی افراد پلید

الحذر الحذر اُول فرقۀ کفّار ایلیور

 

تیز حملیدی ئوزی مرکب رهواری بُرو

گه ویروبدور آتا مهمیز گهی ویردی جلو

ایلدیریم تک قُشونون خَرمنینه توکدی اَلو

باشلاری داس اَجَل تک قلجی ائتدی درو

روبرو هر کیم اولور فوری نگونسار ایلیور

 

الحق الحق نه گوزل خدمت ائدوب قارداشینا

فرصت جنگی فلک حیف اولا وئردی قوشینا

آغلا آغلا آناسی مشتری دور گوزیاشنا

یازمازیدوم نه بلا گلدی او السیز باشینا

حضرت صادقون امری منی ناچار ایلیور

 

بشرون الدی خطر وقتی نگهبان گوزونه

الّلری اولسا مواظب اولار انسان گوزونه

السیزه چاره نه دور اوخ کچه پرّان گوزونه

یاریلا باش یاراسیندان توکوله قان گوزونه

سیلمه سه گوزلرینی باخماقی دشوار ایلیور

 

لخته قانیله دولان گوز گورر آیا هارانی

گوز دوتولموشدی قبول ایلدی هر بیر یارانی

نه گلن نیزه اوخی گوردی نه یاره ویرانی

نه یانیندان گئچنی گوردی نه یولدا دورانی

دونور هر سمته هدف سینه سین اوخلار ایلیور

 

باغلیوب امّ بنینون یرینه قان گوزونی

ایتیروبدور یولی میداندا ایتیرمور ئوزونی

گلدی بیر ظالم اونون تار ایلدی گوندوزونی

دئمرم آهن عمودیله آچیق باش سوزونی

صبر و طاقت او غمه هانسی عزادار ایلیور

 

بیلمورم اولدی نه رفتار او قوی پیکریله

اوجا قامت اوجا یردن یخیلوب لنگریله

باشینون اوسته گلوبدور آناسی حیدریله

فاطمه سیلدی گهی گوزلرینی معجریله

گه سو تکلیفی اونا حیدر کرّار ایلیور

 

سسلنوب معرکه دن گل منی درک ائت شاهیم

شاهسن سن منه شاهد بیر اولان الّلهیم

قورتاروب الده کی سرمایَم اوجالمش آهیم

سر خونین تن خونین دی قالان تنخواهیم

اونودا مقدمووه نوکرون ایثار ایلیور

 

گرد راه قدمون فخریدی ایجاد ائوینه

شاه عادل سن آقا عدل ائوینه داد ائوینه

آغلاما لطف ائله گل قارداشوون شاد ائوینه

سنی دعوت ائدورم عشقیمون آباد ائوینه

ائوی آباد اولا عشقون یوخ ائوی وار ایلیور

 

((انورم)) نوحه ده صرف ایلمیشم همّتیمی

آرتیروبدور آقامون لطفی منیم شهرتیمی

نیّتیم قلبیده خدمتدی بیلور نیّتیمی

وار امیدیم وئره موعود جزا خلعتیمی

موری تشویق سلیمانِ کَرَم دار ایلیور

 

مرحوم انور اردبیلی

منبع مجموعه کانالهای مدح و مرثیه

موضوع: حضرت ابوالفضل العباس (ع) شجاعت ,
زبان شعر و شاعر: نوحه ترکی , انور اردبیلی

 

----

 

احوالات حضرت فاطمه زهرا (سلام الله)

و گریز به احوالات جناب فضه در روز عاشورا

 

حیرتدیم بیان ایلیم غم مطالبین

شرح ایلیوم نه طرزیله زهرا مصائبین

 

تاب ایلیوب جهاندا او قدری مصیبه

قورتارمیان بلاسی سالور فکری حیرته

 

فکر ایلدوکجه عقل دوشور پیچ و خم یولا

عقلیم چتین مصائبینه بس محیط اولا

 

امر محاله ایلمرم وقتیمی هدر

شرح ایلورم مصیبتنی بیلدیگیم قدر

 

اول گرک عریضه ویرم شأن و شوکتین

امّ الائمه عصمت کبری جلالتین

 

چوخدور نجه مصائب و اندوه محنتی

اونداندا چوخ علاوه دی اجلال و عزتی

 

مرضیه و عفیفه و عین نجیبه دی

شمس حیا و ذات خدایه حبیبه دی

 

کنز حقیقتون گهر پر بهاسیدور

پیغمبرون امیدی حسینون آناسیدور

 

مغلوب ایدور جلالی زبان محرّفی

الله اوزی اولوبدی بتولون معرّفی

 

وار مدرکیم قَویدی کلام خدایه باخ

گر ایسته سن جلالین حدیث کسایه باخ

 

زهرا نجه خانمدی بلور کردگار اوزی

بو وصفلن جهاندا ولی گولمدی یوزی

 

گوز یاشینی جگر قانینا قاتدی روزگار

گولدورمه دی آز عمریده آغلاتدی روزگار

 

پیغمبر خدا ایله که رحلت ایلدی

زهرانون آرتدی درد و غمی شدت ایلدی

 

باب امیدی دست جفا چکدی باغلادی

دولت سراسین ائتدی عزاخانه آغلادی

 

فرش سکوتی بزم عزاده سالانمادی

حقیندن اوتری هر یره گتدی آلانمادی

 

هر قدر ظلم ایدوبله دیمه قانع اولدیلار

دوتسون عزا ایوینده گلوب مانع اولدیلار

 

قویمادیلار انسیه حوراده اختیار

بزم عزانی دایر ایدوب شهردن کنار

 

شعله چکوبدی مجمر غم سینه داغلادی

قویمادیلار ایوینده گیدوب چولده آغلادی

 

هر گون خانم گیدردی ایکی نور عینلن

مسموم اولان حسنلن عزیزی حسینلن

 

بیر نخل سایه سین ایلیردی پناهگاه

جاری ایدوب سرشکنی دلدن چکردی آه

 

ظلمی یتشدی بیر یره قوم منافقین

پیغمبری ایدوبله مزارینده دلغمین

 

ظلم ایتدوقیجا ظلم ایلسونلر تلسدیلر

بر گون گلوب او خرما آغاجندا کسدیلر

 

جام ستم یتیشدی ستملن لبالبه

بسدور سوزون مقدمه سی آغلا مطلبه

 

کام بتوله گرچه بو دوران دولانمادی

ثانی نقدری ظلم ایلیوبدور اوتانمادی

 

شدت ویروبدی فاطمه نون سوز آهنه

اود ووردی تا که درگه عالم پناهنه

 

ظلمون اودی ایدوب غلبه باب اقدسه

یاندی قاپی آچیلدی گلوب فاطمه سسه

 

مسمار باتدی سینه سینی ائتدی زخمدار

سندی قابورقاسی یخلوب گتدی اختیار

 

صدمه یتوب وجودینه سقط اولدی محسنی

گول غنچه سینده آچمادی تئز سولدی محسنی

 

ضعف حالتینده مهر وجودین نفسلدی

ناچار اولوبدی فضه نی امداده سسلدی

 

زهرا چاغوردی فضه نی امداده یوخ سوزوم

بیر نکته وار خیاله دوشور آغلیور گوزوم

 

تاب ایلمز بو محنته کیم اولسا معنوی

اولدی قزی بلا گونی زهرایه پیروی

 

اشک تریله ریشه ی اندوهی بسلدی

کرب و بلاده فضه نی زینبده سسلدی

 

هانسی زماندا یوم بلاگون باتان زمان

مقصودینه او شمر ستمگر چانان زمان

 

سعد اوغلی ایستیوردی یانان قلب لر یانا

امر ایتمشیدی نعش شهیدان ایاقلانا

 

زینب گلوب گولونی گلستاندا گورمسون

لیلا گزنده اوغلونی میداندا گورمسون

 

مشکل اولوب بو محنتی امّ المصائبه

احضار ایدوبدی فضّه نی زهرایه نائبه

 

دردین دیوب کنیزینه ایتدی مشاوره

سرعتله گیت آماندی گمانون گلن یره

 

آز قالدی غم بو زینبی سالسون ثباتیدن

زهرا قزینا ایسته کمک جنگلاتیدن

 

تاب ایتمرم بو ظلمه جفا اهلی ال تاپا

اوراق اولان جنازه لرون اوسته آت چاپا

 

غم گلشنی بو چولده آچا آیری منظره

صدمه یته چمنده پراکنده گوللره

 

علیاجنابی فضه گوروبدور فغانیده

بیر شیر واردی عرض ایلدی نیستانیده

 

ای فاطمه عزیزه سی بانوی محترم

ویرسون اجازه من اونی امداده سسلرم

 

ائتدوم سوزی خلاصه گله مطلبیم اله

آلدی اجازه سرعتلن قاچدی جنگله

 

نه حالیله قاچوردی مجسّم ایله حالین

اللر باشندا قلبی اسردی ایاق یالین

 

سرعتله تا یتیشدی نیستانه سسلدی

بو دللریله شیری یانا یانه سسلدی

 

مشکل گشا قزینی سالوب شمر مشکله

امیدینون سفینه سی مغروقیدور گله

 

بیکس قالوب کمک لیکه اول بی پناهه گل

ترک ایلیوب مقامووی دور قتلگاهه گل

 

فضه سوزین ایشتجک او حیوان بی نظیر

شیر خدا قزینا حمایت ایدوبدی شیر

 

گلدی منایه قاچدی صاقا گه قاچوب چپه

گوداله یتدی باشینه توپراق سپه سپه

 

دُر ولایتون دیمه قدرینی بیلمدی

باشسیز قالان جنازه نی مقتلده ایگلدی

 

هر ایلدوکجه نعره چکوب ئوپدی یاره سین

گچدوم سوزی ولی سوزیمون آل اشاره سین

 

واردور یری حسین آناسی فخر بانوان

شیری ایدوب مخاطب ایده بو سوزی بیان

 

ایله کمک حسینه حسین وای دیه دیه

آهسته ئوپ یارالارینی قویما اینجیه

 

اوراق ایدوبدی پیکرینی تیغ جانستان

شمر اینجیدوبدی سینه سی اوسته چخان زمان

 

سایسیز یارا دگوبدی بو جسم مقدسه

زحمت ویروبدی قاتلی باشین کسه کسه

 

انور مصیبته بو قدر آچما منظره

یازدوقجا سوز سوزی چکه جک آتشین یره

 

 مرحوم استاد انور اردبیلی

موضوع: حضرت فاطمه زهرا (س) احوالات ,
زبان شعر و شاعر: نوحه ترکی , انور اردبیلی

 

----

 

زبانحال حضرت موسی ابن جعفر (علیه السلام)

 

موسى آل نبى درده دچارم یارب

دردیمه یوخدى اَجلدن صورا چارم یارب

 

جسمیمى‏سِجن یوروب‏جانیمى یورقون حَسَمیم

جان تقاضا ائلیور عرضه نگارم یارب

 

کیمدى سندن صورا مظلوم نداسین ائشیدن

سن بیلورسن نجه مظلوم و فکارم یارب

 

اون بیر ایلدى یاتورام گوشۀ زندانلاردا

نقطه تک دایرۀ غمله حصارم یارب

 

سولى وقتى بدنیم هم غمه تاب ایلمیشم

ایندى آخر قوجیام تحتِ فشارم یارب

 

گردنیمدن گوتومور سلسله‏نى صیادیم

بوینى باغلى ایاقى باغلى شکارم یارب

 

نه دلیله منى هارون چکوب زنجیره

نه آچقدور قاپى نه اهل فرارم یارب

 

قدّیمى سلسله اگمیش بوکلوب ساقینیم

آخسا تز دینجلرم عمر ستارم یارب

 

شاهدیم سن ائوه حسرت چوله حسرت قالدیم

بو سیه چاله‏ده بى‏صبر و قرارم یارب

 

ناى جان ناله ائدور بیر قوروموش نى مثلى

شمع تک دامنیمه اشک نثارم یارب

 

اون بیر ایل عمریده اون بیر یاز اولوبدى سپرى

کنج زندانیده بى‏صبح بهارم یارب

 

گورمیشم گل نه گلستانه دوشوبدور گذریم

گونه حسرت گونوزى لیلۀ تارم یارب

 

خلقته گل یارادوبسان سن على اولادین

دوشمیشم خار الینه گور نجه خوارم یارب

 

عُمر نعمتدى خدایا ولى من اینجیمیشم

گئتمگه قبر ائوینه لحظه شمارم یارب

 

یر رطوبت بدنیم خسته هوا ناسالم

کیچیلوبدور بدنیم زار و نزارم یارب

 

اودا دونمش نفسیم سینۀ سوزانیمده

گورورم ذرّه‏لرین اشکیلى مژگانیمده

 

قفس جسمده اى خالق جان، جان یورولوب

عشقویله شریانیمده گَزن قان یورولوب

 

قلبیمون باشینى داغلار تک آلوب غم دومانى

آه سوزان اوجالوب سینۀ سوزان یورولوب

 

چین پیرى دوزولوب آلنیم اولوبدور چین چین

یوزومه‏بسکه‏ توکوب ‏گوزیاشى مژگان یورولوب

 

عشقیم اوّلکیدى مشتاق مناجاتم من

سسلَنن حنجره‏دن حیف اولا اَلحان یورولوب

 

آدوى ذکر ائلین ساحتوه سجده ائدن

عاشق حمد و ثنا قارى قرآن یورولوب

 

ظاهراً سنده اسیرم ، سَنَه باطنده قوناق

ساخلاما مَحبس مرطوبده مهمان یورولوب

 

نچه مدّتدى منه هر نه دِیوب دینمه‏میشم

داى دؤزه بیلمیورم طعنیه وجدان یورولوب

 

گوش مَحبسده توان یوخدى سیزیلتى سسیمه

گئجه گوندوز ائشیدوب نالَمى زندان یورولوب

 

رنگ زردیمدن اثر حلقۀ زنجیره‏ده وار

سلسله زنگ دوتوب سلسله جنبان یورولوب

 

ایاق اوسته اوجالان وقته سیزیلدور سوموگوم

تار و پود بدنیم اى حق سبحان یورولوب

 

یورولان چوخدى سنون دایرۀ عشقونده

هانسى محبسده منیم تک قوجا انسان یورولوب

 

وار یازیمدا گر اولام دینوه قربان یارب

یوبادورسان نیه بو خیر ایشى قربان یورولوب

 

بالالاریم یریمى بیلمدى بیر نامه یازا

منتظردور منه بیر جمع پریشان یورولوب

 

آتا فکرین آتا معصومه اورکدن هیهات

چوخ باخوبدور یولا معصومه‏ده الان یورولوب

 

ائویمون زینتى اهل حرمون دادرسى

گوزومون ‏نورى رضاتک گوزل‏اوغلان یورولوب

 

ائو نه ائو غصه مدارى اولوب اولدوزلاریما

یوخ صفاسى آتادان آیرى دوشن قزلاریما

 

ال اوزوب مندن اولار سسلیور هر لحظه سنى

شامل لطف ائله یارب پوزولان انجمنى

 

قتلیمون نقشه‏سینى طرح ائلیوبدور هارون

دیده گریان بالالاریم گوره بیلمزله منى

 

هر نه بیلدى ائلدى مرد هزار و یک شب

ایاق آلتندادى قانون رسول مَدنى

 

منى بیر حالیده تبعید ائلدى یثرب‏دن

 

حالیمه باخدى بنى فاطمه ‏لر آغلاشدى

 

قاپى آغزیندا اوشاقلار ملشوردى گوردوم

باغبان دوشدى یولا قالدى پوزولمش چَمنى

 

بیر اوشاقلاریما بیرده ائوه باخدیم الله‏

گوزیمون یاشى آخوب قلبیمون آرتدى مُحنى

 

من اوزاقلاشدوقیجا سسلرى قوزاندى گوگه

بویلانوردى دالیمیجا هامى سسلوردى منى

 

نه اولار دیندیره بیلدى منى نه من اولارى

قالدى شیرین دانشانلارون ئورکده سخنى

 

چالشار هر آتا اولادینى خوشبخت ائلیه

قویمادى حیف اولا دشمن بو جلاى وطنى

 

زندگیدن اولارون بهره‏لرى گوزیاشیدور

قبرده خوار گئدوبدور اگر اولسا ئولنى

 

چوخونون ایندى قرا ساچلارى غمدن آغاروب

شمع سوزان کیمى تحلیله گئدوبدور بدنى

 

باغلیدور ائلچى‏لرین‏دَه یولى حتماً ائویمه

قزلاریم بخت اطاقین گورمیه‏جک من بیلنى

 

گورمیوبدور آتاسین قزلاریم اون بیر بایرام

قدغَن‏دور ائویمون وار گلَنى نه گئدنى

 

اون بیر ایلده گینوبلر گوره‏سن تازه لباس

یا گیولّر گِنه یارب من آلان پیرهنى

 

آغلا((انور)) سوزى باریک یره چکدى قلم

سوز دگول سوز بیلَنه اوددى بو سوز بیر عالم

 

مرحوم انور اردبیلی

منبع مجموعه کانالهای مدح و مرثیه

موضوع: حضرت امام موسی کاظم (ع) احوالات ,
زبان شعر و شاعر: نوحه ترکی , انور اردبیلی

 

----

 

احوالات شهادت حضرت زهرا (سلام الله)

و گریز به قتلگاه

 

قلم عاشقدی زبس حضرت زهرا آدینا

باشلیور مطلبی صدیقه ی کبری آدینا

بیر نچه کلمه یازا مفخر لعیا آدینا

مام سبطین آدینا اولسا سرآغاز سخن

وار امیدیم قلمیم ایلیه اعجاز سخن

 

فاطمه آدی گلن مجلسین عزّت واریدی

ارزیابی ایلین یوخدی نه قدرت واریدی

حجّت قائم آل اللهه نسبت واریدی

آغلیوب آغلادانا شخصاً اوزی ناظر اولار

آنانین آدی گلن یرده اوغول حاضر اولار

 

ئوزی تاپشورموشیدی دفنی اودور قالدی گئجه

مرتضی گنج حیانی اوزی دفن ایتدی گئجه

دفن ایدندن صورا بولمم ایوینه گلدی نجه

صبحه تک یاتمادی نوحه ایلدی اوز اوزونه

یارین الدن ویره هر کیم یوخی گلمز گوزونه

 

صبح آچیلدی چاغیروب اوغلون او خلّاق سخن

آناوین ماتمی دور آچ قاپونی اوغلوم حسن

بلکه پیغمبره خاطر بیزه ده اولدی گلن

گیتدی زهرا اطاقیم محبس ظلمتدی منه

کیم بو محبسده تسلّی ویره منّتدی منه

 

مجتبی شخصاً اوزی آچدی او یانموش قاپونی

ظلمیدن توستوسی افلاکه دایانموش قاپونی

ایتمه ایراد دیسم قانه بویانموش قاپونی

نکته باریکدی بو مطلبی هشیار بیلر

سینه ی حضرت زهرا ایله مسمار بیلر

 

باب ماتم آچوقیدی او گون اهل وطنه

مرتضی شخصاً اوزی منتظریدی گلنه

گلن اولمادی خطاب ایلدی اوغلی حسنه

بیز بو یثربده غریبوق، قاپونی باغلیاقون

ویره گون باش باشا ایوده اوزوموز آغلیاقون

 

بزم ماتم بُلوسوز زینتی دور هر ئولنون

کیمی بیزدن صورا بو شهریده وار فاطمه نون

بلبلی زینبیم اولسون بو سارالموش چمنون

من اوزوم گرچه حسن اهل سخن سروریم

بو شیرین دل باجیوین سوزلرینه مشتریم

 

دورت بالا، بیر آتا زهرایه قوروب بزم عزا

روح پیغمبر خاتمده قوشولدی اولارا

ناگهان صحن سراده ایلدی فضّه صدا

یاعلی تیر ستم قلبیوه آز قالدی ساچا

ثانی ایستور خانموم فاطمه نین قبرین آچا

 

فضّه نون غملی سوزی زینبی ایتدی نگران

ایاقا دوردی یریندن چکوب ال اوخشامادان

ذوالفقاری گتیروب گلدی بیانه باباجان

چوخ یوبانسان بولوسن سمت بقیعه قاچارام

آنامون قبرینه ال دگسه اگر باش آچارام

 

گیچدی دیباچه ی سوز مطلبیمه ملتفت اول

بو گریزی یازورام قلب ایلیور وحشت و هول

زینبی واهمیه فضّه سالوبدور ایکی یول

بیری یثربده ایشیتدور بولورم دقّتیله

بیریده کرب و بلاده ایشیدون رقّتیله

 

اسرانی باشینا یغمیشیدی زینب زار

فضّه گلدی الی باشدا اوزی بی صبر و قرار

قلب لشکرده چکور کوفه نین اهلی دیدی جار

سوزی پردیله دیوم ایش چتینه یتدی خانم

آتلارین نعلینی دشمنلر عوض ایتدی خانم

 

دیدی فضّه کیمیمیز وار بیزیم امداده گله

مرتضی یوخدی بو چولده آلا شمشیرین اله

اگلشون سیز، یتوروم من اوزومی تلّه هله

الی باشدا دایانوم قانلی بیابانه باخوم

حرکات سپه فرقه ی عدوانه باخوم

 

چخدی تلّ اوسته نظر سالدی جفا لشکرینه

کوفه نین ملّتینی گوردی دگوب بیر بیرینه

دقّتیله قولاق آسدی اولارین سسلرینه

بولدی شورشدی قوشون ایچره اوجالموش غوغا

حرّون ائل طایفه سی ایستیور ایتسون دعوا

 

آرادان گیتدی دیولّر داخی ملّیّتیمیز

سیزون آت چاپّاقوزا یوخدی بیزیم صحبتیمیز

ولی حرّیله بیزیم وار بولوسوز نسبتیمیز

بی تعصّب دگیلوق آدیمیز اولسون رسوا

بو عملدن ایده سوز حرّی گرک مستثنی

 

سعدین اوغلی ایله که مسئلیه اولدی خبیر

آز قالور گوردی دوشه لشکره بیر جنگ کبیر

امر ایدوب شورش ایدن قومه او ناپاک ضمیر

سیزه من عفو ایلدیم حرّی گیدون کفن ایلیون

هارانی ایسته سه گوگلوز آپارون دفن ایلیون

 

حرّون اقوامی گلوب دوره لدی رهبرینی

قتلگهدن گوتوروبلر یارالی پیکرینی

باخدی زینب اولارا قان ایدوب اشک ترینی

گوردی عزّتله یولا دوشدی حسینون قوناقی

کثرت عشق و تعصّبدن اسوب دل دوداقی

 

دیدی حُرّون واریدی بوردا حمایت ایدنی

حمل ایدوب قویمادیلار زحمته دوشسون بدنی

کمک اولسیدی حسین قویمازیدیم یرده سنی

کیم آدامسیز اولا رخسارینه گوزیاشی آخار

چاره سیز قالسا باجون تک گوزی اطرافه باخار

 

هرباجی لازمه دور حامی اولا قارداشینا

اولماساخدمته آماده کول اولسون باشینا

باجیوین رحم ایلین یوخدی حسین گوزیاشینا

اورگیم پارچالانوب دردیمی هیچ کیم بلمز

نیلیوم دشمنه یالوارماق الیمدن گلمز

 

مقتله یوخسا گتورم قره معجرلریوی

یالواروب دشمنه آلّام یارالی پیکریوی

دوتاروق مرکز میدانیده دور و بریوی

گوتورر نعشیوی یردن بو یورولموش نفرات

قائل اولّوق سنه ده حرّ کیمی تشریفات

 

نه باخان واردی بیزیم ناله جانکاهیمیزه

نه یانان واردی حسین اشکیمیزه آهیمیزه

بیز سنی تاپشوروروق بیر اولان اللهیمیزه

بوندان آرتوق نه روا فاطمه نون قلبی یانا

یارالی سینوین اوستونده سنون آت دولانا

 

ایستیورکوفه نین اهلی ایده بیرظلمه قیامت

ویره لر تندروش آتلارامقتلده لجام

قاریشاخاک شفایه شهداعضوی تمام

دوغرانان جسمیوه سعداوغلی اهانت ایلیه

اهل اسلامه نصاراده شماتت ایلیه

 

مرحوم استاد انور اردبیلی

موضوع: حضرت فاطمه زهرا (س) احوالات ,
زبان شعر و شاعر: نوحه ترکی , انور اردبیلی

 

----

 

احوالات وداع حضرت امام حسین (ع)

 

آغلاما سنده زینبیم فاطمه اقتداری وار

گیتملیدور حسینوین کوفه ده انتظاری وار

 

قالو بلا گونینده سن منله ویروبسن ال اله

عاقبتی بو نهضتین خیریدی ای مجلله

شمر و سنان و حرمله مستیدی بلموری هله

محکمه عدالتین قاضی هو شیاری وار

 

سینماسین اوج غصه دن قوش کیمی شهپرین سنون

پرچم دینی ساخلیار باغلانان اللرین سنون

خنجر و تیر و نیزه دن گوجلیدی معجرین سنون

منطقوین آتام کیمیجنبه شاهکاری وار

 

فصل بهار صحنه دور خلقتین امتیازینه

مانع اولار خزان یلی گلشنین عز و نازینه

آند اولا شیر خوارمین پارچالانا ن بو غازینه

عشقیمیزین خزانی یوخ دائمی نو بهاری وار

 

غم یمه گرد غم قونوب دامن خیمه گاهیمه

صاحب پر چمیم گیدوب رخنه یتوب سپاهیمه

فاطمه یسلیوب سنی ایلمه ذره واهمه

ساقدی حسینیوین هله پنجه ده ذوالفقاری وار

 

اولما رضا حرملری خیمه ده گورمیوم گیدیم

یغ باشیوا قالانلاری سوز لریمی دیوم گیدیم

فاطمه یادگارینی فوری گتور گیوم گیدیم

گورسون هامی او بیکسین گورمه لی یادگاری وار

 

یوسف ختم مرسلم یوخدب سوزوم مشیته

قانیم اخوب او کوینگی میندیره جاقدی قیمته

فاطمیه وسیله دور روز جزا شفاعته

گور نقدر او کوینگین حشریده اعتباری وار

 

اهل مجاز رسمیدی زرین اساسی خوش دوتار

اولسا نقدر خیمه و قصر طلاسی خوش دوتار

عاشق صادق اولسا کیم کهنه لباسی خوش دوتار

عشقبله کهنه پیرهن گیماقون افتخاری وار

 

تازه گلین اوشاقلارین ایله عوض لباسینی

اوخشاد اسیره ایمدیدن خیمده ال یاسینی

سن دله دوت رقیه می من چیخادوم طلاسینی

زجریله خولی الدورر گورسله گوشواری وار

 

ویردی جواب حسینینه زینب مرتضا سیر

مقتدرم اسارته رمز بلایه باخبر

فکر ایلمه باجون سنه ویردیقی قولی ترک ایدر

من بلورم اسارتین زحمتی وار فشاری وار

 

مرحوم انور اردبیلی

منبع کانال گنجینه گذشتگان

زبان شعر و شاعر: نوحه ترکی , انور اردبیلی

 

----