متن نوحه ترکی انور اردبیلی بخش دوم
متن نوحه ترکی اشعار انور اردبیلی ویژه محرم و ایام سوگواری ائمه اطهار علیهم السلام
بخش دوم
در احوالات حضرت ام البنین (سلام الله)
خامه الیمده ایستیور عنوان غم یازا
مطلب اوزانمیا سوزی کوتاه و کم یازا
مبهوتیدور مقدمه نی باشلاسون نجه
یا که سوزون گریزینی هانسی رقم یازا
یوخدور لیاقتیم بیلورم نوحه یازماقا
لایق سوزی بلی گرک اهل قلم یازا
شاعر گرک مطالبینه چوخ دقیق اولا
وجدانین ایلیه سوزه نسبت حَکَم یازا
گوز یاشینه گوره دئمیه ناروا سخن
آل اللهی نظرده دوتا محترم یازا
الحق گرکدی شاه شهیدون مصیبتین
نظم عالمینده مقبلیله محتشم یازا
اما حسین کریمیدی قووماز گلنلرین
فکر ائتمورم که سهو ائده نی مُتَّهم یازا
ئوز ساربانینی یولا بوش سالمیان حسین
نه عیبی وار مُحِبَّه برات کرم یازا
واردور امیدیمیز گله عباس مجلسه
آمار اهل مجلسی صاحب علم یازا
عباس آدین گتوردی قلم کاغذ اوستونه
ام البنین محنتینی لاجرم یازا
غم شعله سینده غصّه لی پروانه تک یانوب
دورد داغی واردی قلبیده دورد اوغلی دوغرانوب
خاک بقیعده قلبه مؤثر مزاری وار
نه سایه بانی وار نه اقلاً حصاری وار
مونس اولار همیشه اوغولسوز اوغولسوزا
اوغلی ئولن رباب کیمی همجواری وار
مین اوچ یوز ایل او قبریده بیر شمع یانمیوب
ظالم جماعتون نقدر گور فشاری وار
قویموللا قویسالار چوخ اولار قبرینی ئوپن
عباس آناسیدور هامونون انتظاری وار
گیزلین گلور اوزاقدا دورور مؤمنه زنان
نزدیک اولا او قبره کیمون اختیاری وار
گیسولرین یولور او مزاره آتور چوخی
اهل محبتون بیله لر اعتباری وار
شمشیر چکمیوب نقدر صاحب الزمان
نسل امیّه نون هله خوش روزگاری وار
خوشدور وئرک بو بزم مصیبتده باش باشا
اولسون ثبوت شیعه لرین حق شعاری وار
ام البنین حسینه گوره هر ندن گئچوب
کرب و بلا چولونده نچه یادگاری وار
ام البنین ، حسینینه عباس بسلیوب
عباسی بسلین آنانون افتخاری وار
دورد اوغلونا دیردی همیشه او خوش مرام
هر دوردوزی حسینیمه من وئرموشم غلام
زینبدن ائتدی کرب وبلا صحنه سین سؤال
شعله چکن زماندا قزیم آتش قتال
عباس حسینه ائتدی نه اندازه ده کمک
تعریف ائله گوروم نقدر ایلدی جدال
هئچ کیمسه روبرو اولا بیلمزدی اوغلوما
دگسون یارا قاباقدان اونا امردور محال
گیزلتمه صحبت ایله نیستان سوزون منه
اوردا ائشیتمیشم بالاما یوز وئروب ملال
زینب دئدی آنا سوزی واضح دینمرم
واضح دئسم اولار سنیچون مایۀ خیال
وار حقی بوینوموزدا اباالفضلووون آنا
ایمنده ساخلامیشدی بیزی اول وفا خصال
نهر فراتی آلدی حسین سیز سو ایچمدی
ائتسون بلند مرتبه سین حی ذوالجلال
راضیدی گوزلرین وئره مشکینده سو قالا
افسوس کوفه اهلی اونا وئرمدی مجال
ام البنین درک ایلینده بو صحبتی
احسن دئدی اوغول صودیمی ایلدیم حلال
سندن باجون رضایت ائدور منده راضیم
یاخشی اوغول ائدر آنانی صاحب جلال
قوی یثرب اهلی شهریده یالقوز دئسون منه
دشمنلریم گورنده اوغولسوز دئسون منه
تا زنده ام شهامتووه آغلارام سنون
صبح و مسا دیانتووه آغلارام سنون
محرابووه دوشنده گوزوم موقع نماز
تکبیریوه عبادتووه آغلارام سنون
قرآن صداسی گلسه هر ائوده قولاقیمه
خوش لحنووه تلاوتیوه آغلارام سنون
یاندیرمارام چراغیمی وقت غروبیده
باشسیز قالان عمارتیوه آغلارام سنون
گورسم بیرین شجاعتیله مرکبین چاپور
یاده سالوب شجاعتیوه آغلارام سنون
سقالری گورنده گوزوم اللرینده جام
سو اوسته که قیامتیوه آغلارام سنون
سایه سالان زمانیده گلزاره سرولر
یانام کشیده قامتیوه آغلارام سنون
شرمنده یاتموسان بالاجا قبریده اوغول
سو گورجگین خجالتیوه آغلارام سنون
هر بیر یارالینون یاراسین باغلاسا طبیب
باغلانمیان جراحتیوه آغلارام سنون
آللام قوجاقه اوغلووی گول مثلی ایگلرم
تاپشوردوقون امانتیوه آغلارام سنون
واردور لیاقتی منه تخفیف درد اولا
رشد ایلسه ئوزون کیمی آزاد مرد اولا
واردور علاقه سی اولا سقا سنون کیمی
سو پایلیا سوسوزلارا حتی سنون کیمی
گوگلوم سو ایستینده دورور جام آلور اله
سو ایلیور بفوری مهیا سنون کیمی
گاهی دیور آنا من علمدار اولام گرک
چوخ عشقی واردی پرچمه گویا سنون کیمی
یاده دوشور باخاندا بونا ئوز اوشاقلیقون
بی مثلدرو بو گوهر یکتا سنون کیمی
شیر خدا نوه سی دی هئچ قورخی بیلمیور
یوخدور بو شیر بچیه پروا سنون کیمی
حتی یریشده ده ئوزوزه اوخشیوب بالون
خوش یول گیدور بو قامت رعنا سنون کیمی
وقت نماز اولاندا یرونده نماز ائدور
ذکری اولوبدی ربّی الاعلا سنون کیمی
مشتاقیم بو صحبت ائده منده جان دیم
اخلاقدور وجودی سراپا سنون کیمی
الله ئوزی بو طفلی پناهنده ساخلاسون
ائتسون غلام عترت طاها سنون کیمی
روشن ائدر چراغیمی گر قویسا بدنظر
مونس اولار منه بو دل آرا سنون کیمی
هر سوز دئسه یره بالامون سالمارام سوزون
دوشسه سوزی یره بی بی سی ئولدورر ئوزون
مرحوم انور اردبیلی
منبع مجموعه کانالهای مدح و مرثیه
موضوع: حضرت ام البنین (س) احوالات ,
زبان شعر و شاعر: نوحه ترکی , انور اردبیلی
----
در احوالات حضرت فاطمه زهرا (سلام الله)
قنفذ ستمیندن سخیلوب قلب عوالم
آلدی الینه هیزم نیم سوز او ظالم
حمله ایلدی سیندی قولوم قالمادی حالیم
مسماریدن هیزم یاراسی چوخ بتر اولدی
قنفذ منی ووردوقجا توانادن ال اوزدوم
یارم واریدی جسمده یارادن ال اوزدوم
سست اولدی قولوم دامن مولادن ال اوزدوم
صیّاد همانی یوروب افتاده پر اولدی
من فاطمیَم قلبیمه غم تیرینی ساچدوم
دوردوم یارالی حالتیله مسجده قاچدوم
مظلومه کمک ایتدوم علینون قولون آچدوم
زهرا کیمی اول سروره حامی مگر اولدی
من فاطمیَم دهرده سلب اولدی قراریم
آخرده جوانمرگ ایلدی درد و فشاریم
نسگل بودی احبابیمه گیزلیندی مزاریم
قبریم هارادور شیعه لریم بی خبر اولدی
من فاطمیَم غصه لیَم قصر جناندا
مندن ایکی اوغلان ایکی قیز قالدی جهاندا
خوش کچدی نه اوغلانلاریما دور زماندا
نه قزلاریم آخرده منیم بختور اولدی
پیغمبر اسلامه سخاده مثل اوغلوم
خوش خلق و خوش اندیشه و تقوا عمل اوغلوم
آرام دلیم قُرة العینیم گوزل اوغلوم
شیرین سو کیمی زهری ایچوب خون جگر اولدی
اما ایکیمنجی بالا شوریده سر اوغلوم
یثربدن ایدن کرب و بلایه سفر اوغلوم
زهرانی ایدن قانلو باشی در به در اوغلوم
یاتدی گیجه مطبخده بیلورسوز نه لر اولدی
فکر ایلمیون کوفه ده تک قالدی حسینیم
گیتدوم گوروشه طاقتیمی آلدی حسینیم
مطبخده دیدیم کیم سنه یر سالدی حسینیم
کوفه سفرون آه نه غملی سفر اولدی
یورقون بالا تجلیل ایله یورقون قوناقوندان
سن سسلن آنا بوسه ایدوم من دوداقوندان
خلقت گلی سن کول یاغور اما اطاغوندان
پیغمبر اسلام ایوی زیر و زبر اولدی
نخل ستمی خولی ستمله بارا گتدی
مهمان سنی بو مطبخه باشدا یارا گتدی
زهرا آنووی گور چکوب هاردان هارا گتدی
وای غملی بالا غملی آنون در به در اولدی
مرحوم انور اردبیلی
منبع مجموعه کانالهای مدح و مرثیه
موضوع: حضرت فاطمه زهرا (س) احوالات ,
زبان شعر و شاعر: نوحه ترکی , انور اردبیلی
----
احوالات حضرت فاطمه زهرا (سلام الله)
ذات خدا حبیبه سی اهل کساده فاطمه
آچدی گوزون بو عالمه امّ قُراده فاطمه
نصّ کبیر کوثره گلدی وجود مستدل
جلوه وئروبدی منزل احمده نور لم یزل
ائتدی خدیو انبیا منّت خالق ازل
خیره یول آچدی خانه ی خیر وراده فاطمه
قوزانوب عرش اعظمه جان خدیجه دن سرور
تهنیته آچوب دیلین باغ جناندا فوج حور
سسلدیلر نبوّتین ائتدی چکیده سی ظهور
نایل ائدوب پیمبری عین مراده فاطمه
آلدی قوجاقه مصطفی ذات خدا عطیّه سین
جاری ائدوبدی بیربه بیر دین هدا رویّه سین
منضم ائدوبدی گل کیمی سینه سینه صبیّه سین
صدره نشین دور دئدی بزم حیاده فاطمه
پاره ی پیکریم منیم سیّده ی جلیله دور
جوهر ذاتی بی مثل محترمه نبیله دور
هر لبی فیض بخش اولان چشمهٔ سلسبیله دور
تازه نفسدی سینهٔ باد صباده فاطمه
کنز عفافیدور چیخوب صورت و ذاتی ظاهره
چرخ رسالته وئرر بهره بو نور باهره
پربرکت وجودیدور هیکل پاک و طاهره
امّتیمه شفیعه دور یوم جزاده فاطمه
نفْس زکیّه دور بونی اینجیدن اینجیدوب منی
کیم منی اینجیده یقین اینجیدوب حیّ ذوالمنی
دشمن حیّ ذوالمنه یوخدی بقاده ایمنی
منتسب الوجودیدور ربّ العباده فاطمه
رحمت هماسی مولدین دوقّوز ایل ائتدی آشیان
مهبط وحی حقّیده اولدی امینه رازدان
وصلتین اختیار ائدوب مرد شریف خاندان
تاپدی حضور منزل میر هداده فاطمه
تازه گلین لیگین گیوب پیکرینه لباسینی
امّ الائمّه جلب ائدوب خالقینون رضاسینی
وئردی گلین گئدن گجه سائله نو لباسینی
گئتدی زفاف اطاقینه کهنه قباده فاطمه
تا ایکی بحر رحمتون خاتمه تاپدی وصلتی
ال اله وئردی مصطفی شاهیله ماه عصمتی
ساخلا بویوردی حیدره حفظیده بو امانتی
آینه مثلی صافدور نقش و نماده فاطمه
وحی ائوینون عزیزه سی قرة العینیدور منه
جان دئمیشم کلامینه یوخدی دوامی شیونه
مرد کریمسن بالام کفوّ کریمه دور سنه
سالکه ی یگانه دور خطّ رضاده فاطمه
حمد ائدورم من اللها پاکیدی اصل و فطرتوز
روشن افق مثالیدور حسن کمال سیرتوز
بش بالا طالعوزده وار پربرکتدی وصلتوز
بش گله باغبان اولور باغ ولاده فاطمه
روح علی و فاطمه بیربیره اولدی سویگلی
پشت سرینده عمرلر ساعتی قویدی آی ایلی
دورد گلی گوردی مصطفی گورمدی پنجمین گلی
قاره لچک گوروب ئوزون دار فناده فاطمه
ختم نبی وصیّتین دوتدی ندیده اشقیا
فتنه بپا ائدوبدیلر وردیلار حقّه پشت پا
گوشه نشین منزل محنت اولوبدی مرتضا
پوزدی نظام کپریگین اشک عزاده فاطمه
باب امامه یوز قویوب فوج شیوخ ریشدار
سس سسه وئردی دستهٔ کرکس شوم و لاشه خوار
درک ائلدی او سسلری بنت رسول باوقار
تتردی برگ گل کیمی باغ صفاده فاطمه
پشت دره گلوب خانم ائتدی او قومیدن سؤال
مطلبوزی دیون گوروم یاخشی دگل بو قیل و قال
شیر کُنامنه گلوب زوزه بلند ائدور شغال
یا للعجب دچار اولوب اهل فساده فاطمه
پینه جبین شیوخیدن قهریله قوزانوب صدا
آچ قاپونی مرادیمیز بیعت شاه لافتا
یوخسا باتار بو درگهون شعله ی ناره برملا
من قاپی آچمارام دئدی قوم عناده فاطمه
رحلت ختم انبیا تار ائلیوب زمانه می
صورته کپریگیم توکور اشک تر روانه می
ساخلامادوز نه علته حرمت آستانه می
قویموسوز ئوز غمین چکه غملی بناده فاطمه
دوشدی شکاف مسلک و دین رسول خاتمه
وردیلا ظلمین آتشین باب رجای عالمه
توستی سالوبدی سایه سین بیت ولیّ اعظمه
دوردوقی یرده دوز دوروب محکم اراده فاطمه
باغ جناندا سسلنوب روح خدیجه جان بالا
قارداشی یوخ ملالی چوخ تیر غمه نشان بالا
حامله سن چکیل دالا یاندی قاپی جوان بالا
محسنوه خطر وار ای احمدی زاده فاطمه
پنجه ی اشقی الاشقیا وئردی تکان آچوب دری
فکر ائله گور نه حالته سالدی خدیجه منظری
خم یدی قدّی سسلنوب سینه سینون سوموکلری
نوگلون آستانیه گوردی فتاده فاطمه
یابن الحسن خبیرسن جور جفای امّته
دست دسیسه ایستیور پرده چکه جنایته
باغلیدی شیعه لر ولی سلسلهٔ روایته
سیّده ی شهیده دور بند بلاده فاطمه
روشن اولان مطالب معتبره نه بند و بست
مردک پست زاده نی عشق خلافت ائتدی مست
سقط جنین ائدوب آنون اولدی قابورقادان شکست
قانه بویاندی درگه شیر خداده فاطمه
ضعف آپاروبدی دوشدوگی یرده قالوب دورانمادی
قامتی صحنه سرو تک نقشه سالوب دورانمادی
گوزلر آخوب ستاره تک یوز سارالوب دورانمادی
چاره یوخیدی سسلدی فضه نی داده فاطمه
فضه گلوبدی هولیله منظریه گواه اولوب
گوردی که توستی قوزانوب روی هوا سیاه اولوب
بوسه گه ملائکه محسنه قتلگاه اولوب
باشدا عباسی یوخ دوشوب چهره گشاده فاطمه
مأمن اصفیا دونوب محور مرگه فی المثل
روحی سخیلدی فضه نون ساچلارینا آتوبدی ال
سسلدی یا ولیّ حق ئولدی خانم هرایه گل
ائوده اوتورما جان وئرور صحن سراده فاطمه
ارث یتیشدی زینبه فاطمه نون بلالری
غصه ده باش آغارماسی نی مثلی نوالری
قمچییله دویولمه سی قاره گونی عزالری
زینبه آغلاسون گرک بزم عزاده فاطمه
قلب ملول زینبی ناوک تیر غم دلوب
باد بلیّه دن هاچان قلبی دقیق دینجلوب
دشت بلاده من دیم قیز ننه دنده باش گلوب
گرچه آز عمریده دوزوب رنج زیاده فاطمه
پرده ده شرمدن اوگون گون دوتولوب باتان زمان
کوفه شیوخی مقصد و مطلبینه چاتان زمان
شمرون ایتی قلنجینا پنجه سینی آتان زمان
زینبه مرحبا دئدی کرب و بلاده فاطمه
بوشلا او تیغ کینه نی سسلدی قهرمان قزیم
کشمکش ائتمه شمردن یوخدی سنه امان قزیم
پنجه وه خنجر ایشلیوب قان بوریوبدی جان قزیم
ذرّه جه رحم گورمیور شمر دغاده فاطمه
خیمیه گئت رقیه مون باشینه ال چک ایله رام
صاحب پرچموز ئولوب شمردن اومما احترام
معجر الیمده اوغلومون باشینون اوسته من وارام
آغلیار ئوز فداسینه قانلی مناده فاطمه
یاره سی چوخدی اوغلومون سینه ده یوخدی مرهمی
پرپر اولوب گوزل گُلوم قرمزی قاندی شبنمی
قیز غمینی چکنمرم بسدی منه اوغول غمی
وای بالا وای دیوب یانار سوز رثاده فاطمه
قرخ ایله آز قالور خیال عالمی عشق و شوریدن
فاطمه نون دخیلیم فیض آلورام حضوریدن
باغ جنانه یوز قویار محکمه ی نشوریدن
سالسا شفاعتون گونی (انوری) یاده فاطمه
مرحوم انور اردبیلی
منبع مجموعه کانالهای مدح و مرثیه
موضوع: حضرت فاطمه زهرا (س) احوالات ,
زبان شعر و شاعر: نوحه ترکی , انور اردبیلی
----
زبانحال حضرت زینب کبری (سلام الله)
در فراق مادر
هایاندا قوش تک ایلدون سن آشیانه آی ننه
محالیدور یولون دوشه بو دودمانه آی ننه
بابام که رحلت ایلدی ائوونده امنه یئتمدون
قوناقلیقا نه گلشنه نه باغه سیره گئتمدون
بو ایکی آی یاریمدا سن گولوب تبسم ائتمدون
گوروم تبسم ائتمه سین لب زمانه آی ننه
نه سرو گورمیوب فلک او قامت وزین کیمی
نه رحمسیز بشر گلر او قنفذ لعین کیمی
چوخ ائوده تای توشون سنون گزور هله گلین کیمی
مزاره قنفذ ایلدی سنی روانه آی ننه
وئرنده غسلووی آتام ائدنده جسمیوه کفن
ایلیکه گِیدی خلعتین او ضربه لر گورن بدن
نظاره ایلدیم ئوزوم بویووا دقتیله من
کفنده هئچ یاراشمیور تزه جوانه آی ننه
یتیم اوشاقلارون آنا نه سختیمیش زمانه سی
سنه بو زینب ایلسون گلایه یوخ بهانه سی
بو رسم روزگاردور قوشون یاناندا لانه سی
اوچوب او لانه دن گئدر بیر آیری یانه آی ننه
هایاندا عندلیبدن گول اوسته خوش ترانه وار
او یرده اووچی وار و یا زمینه سی خزانه وار
هر ائوده شورِ حق وار صفای عاشقانه وار
فلک تئز آیریلیق اوخون قویار کمانه آی ننه
یتیشدی جانی بیر خطر بو غملی خانوادیه
دچار اولوب بویوک کیچیک بلای فوق العادیه
ائدردی غبطه ماخلق آتامدا کی ارادیه
همین اراده صاحبی دویوبدی جانه آی ننه
بو غملی منزله آتام نمازدن گلن زمان
قاپودا مکث ایدور بیر آز ائدور نظاره ناگران
گورور نه غملی منظره بیزه دئمور او باغری قان
یقین یارالی سینه دن قالوب نشانه آی ننه
وجود خرمنی یانور چکنده آه برقی وار
یم غم و مصیبتون مگر بیر ایله غرقی وار
اوشاقلاروندا آغلیور آتامدا لیک فرقی وار
بیز آغلوروق علاقه دن او عاشقانه آی ننه
روا دگولدی بو ائوی صدای الامان دوتا
هوایه توستی قوزانا فضاسینی دومان دوتا
یتیم اوشاقلارون سنون عزای جاودان دوتا
یانان قاپون اولوب بیزه بویوک بهانه آی ننه
قرا گونه قالان قیزون شرار غمده اودلانور
کیچیکده اولسا زینبون مطالبی گوزل قانور
محلّ دفن محسنه گوزوم دوشور ئورک یانور
نه غملی آستانه دور بو آستانه آی ننه
هر عورت اولسا حامله گرکدی چوخ چالشماسون
مواظب اولسون حملینه آغیر شیئه یاپشماسون
نجه بو دردووه سنون ئورک یانوب آلیشماسون
بالوندا زیر ضربه ده بویاندی قانه آی ننه
بلا پیمبر عترتین همیشه پا بپا گزر
وفالی آشناسینی نجیکه آشنا گزر
جنینی سقط اولان خانم طبیبیله دوا گزر
نه ضرب سیلی ایستیور نه تازیانه آی ننه
باشا چخوب عزیز گونوم قرا گونوم قالوب دالا
قاباق که گونلرون گرک ئورکده نقشه سی قالا
بویومی اوخشیوب منیم دییردون آی گوزل بالا
بو تللره بو ساچلارا ووراندا شانه آی ننه
سولار چمنده غنچه لر دچار اولان زمان بادا
ائوون که گئتدی لذّتی آغیز مگر گلر دادا
نه سو دوشور خیالیمه نه بیر غذا دوشور یادا
آناسی صید اولان قوشا نه آب و دانه آی ننه
نباته چکسون آرزو گوروم مدینه داغلاری
بیتورمه سون شقایق و نه لاله غملی باغلاری
غروب وقتی ائولرون یانان زمان چراغلاری
منیمده قلبیمون اودی چکر زبانه آی ننه
مرحوم انور اردبیلی
منبع مجموعه کانالهای مدح و مرثیه
موضوع: حضرت فاطمه زهرا (س) زبانحال ,
زبان شعر و شاعر: نوحه ترکی , انور اردبیلی
----
احوالات شهادت حضرت حمزه سیدالشهدا (علیه السلام) و گریز به قتلگاه
مقدّمه بو سؤزه مختصر خبر یازورام
همین خبر منه چوخ ایلیوب اثر یازورام
یازوللا جنگ اُحدده اولوبدی جنگ شدید
پیمبرون عموسی حمزه نی ائدوبله شهید
نجه شهید ائلیوبلر دینمرم اما
وئریلدی منصب او قربانه سیدالشهدا
نیه بو منصبی آلدی نه علتی واریدی
ز بس شجاعیدی دعواده همتی واریدی
بو امر قتلیله کفار عنادیده دوردی
پیمبرون دیه بیلّم بئلینی سیندیردی
او جنگی آل نظره فکریله تماس ایله
اباالفضیله حسینون غمین قیاس ایله
حسینون حقّی واریدی دیه بئلیم سیندی
کسیلدی چارم امیدیم نیه بئلیم سیندی
دگول خیالیم ائدم شرح محنت عباس
واریمدی آیری سوزوم دقتیله سن قولاق آس
گرک مقدمه ی مطلبی ائدم اتمام
کچم مقدمه دن مطلبه ائدم اقدام
دئسون نه علتیله حمزه سیدالشهدا
پیمبرون بئلینی سیندیروب نیه آیا
یتنده قتله بودور علتی او عالیجناب
یورولدی نظم و نظام سپاه ختم مآب
شهید اولوب ستمیلن دیوم همین قدرین
چخارتدی بیر نفر عورت جفائیلن جگرین
یارالی جسمینی بیر سمتیده قویوبلا اونون
لباسی واردی لباسین دئمه سویوبلا اونون
گینه ده ختم مآب اولمیوب او امره رضا
لباسیلن یارالی پیکری یر اوسته قالا
ائدوبدور امر وفا ریشه سینی اکسونلر
اونون یاراسینون اوسته عبانی چکسونلر
عبا چکیلدی او نعشه کفایت ایلمدی
بورومیوب بدنین چون قناعت ایلمدی
دئدی بیر آزدا علف جمع ائدون بیاباندان
توکون ایاقلارینون اوستونه ائدون پنهان
خبر قتلینی اهل قریش هامی نیلیه جک
خلاصه سوز باجیسی باشی اوستونه گله جک
شهید اولوب قالوب حسرت بوگون بالالارینا
باجیسی گلسه گرک باخماسون یارالارینا
یوزونده درک ائده قان لکه سین دوام ائلمز
یتورر عرشه یقین ناله سین دوام ائلمز
گرکدی قارداشینون حالینی باجی بیلسون
گلنده باجیسینا مانع اولمیون گلسون
واریدی حقی او بیچاره باغریقان اولسون
قویون ئوز حالینه زلفینی یولسادا یولسون
ز بس باخوب چیخاجاق آهی عرش اعلایه
قویون نه سؤز دئسه فوراً سوزونی اجرایه
قلم مقدمه نی گتدی مطلبون باشینا
دولاندی سؤز گینه مظلومه زینبون باشینا
گلنده قتلگهه اول عزیزه ی دو سرا
گزنده نعش حسینی دینده واویلا
یوخیدی اوندا یری ریشه ی وفا اکسون
حسین جنازه سینون اوستونه عبا چکسون
حسین بیلوردی دؤنر قلبی زینبون قانه
عبا یوخیدی بورونموشدی قرمزی قانه
علف یوخیدی ائده جسم پاکینی پنهان
بوروموشیدی ولی سینه سین سینیق پیکان
بیلوردی غم ائده جک قاره زینبون گونوزین
اودور که داشلارون آلتیندا گیزلدوبدور ئوزین
هامی غمین بیلورم آشکار ائدوب دیورم
یوز اوسته یاتماقینون علتین بیلنمیورم
چوخور یره یتیشوب بنت حضرت زهرا
گئدنمدی دایانوب دوردی زینب علیا
نظر ائدوب او یرون نیزه سین داشین گوردی
خیال ائتمه او بیچاره قارداشین گوردی
نیه دایاندی حسین عطری ایلدی مدهوش
او قان اولان اورگینده ائدوب محبتی جوش
باخوبدی حیرتیلن اوخلی بیر بدن گوردی
دوشوب تلاطمه اعضاسی حیرت ال وئردی
بو فکره دوشدی محبت اودین آلیشدیرسون
او نعشیکه اؤزی اوسته یاتوب دانیشدیرسون
دئدی شهِ حرمین سن؟ منه تانتدیر ئوزون
آنامون اوغلی حسین سن؟ منه تانتدیر ئوزون
حسینیم اولسون اگر اوخ سینیقلارین درّم
اذیت اولسادا من آرخون اوسته دوندرّم
او قدری سینوه من زلفیمی یولوب توکرم
کفن تاپولماسادا زلفیمه سنی بوکرم
بو قتلگاهیده من قویسالار مکان ائدرم
سینون یاراسینا صبح و مسا فغان ائدرم
سنی کنار ائدرم من بیر آز داشون اوستن
ئولینجه اگلشرم دورمارام باشون اوستن
دوداقلاریمی کسیلمیش بوغازوه قویارام
آچوب حورکلریمی لخته قانیلن بویارام
بیر آیری چاره بو دردیمه گورمرم قارداش
ئولینجه زفلریمی آچسام هورمرم قارداش
ائدر بو سؤزلری انور قیامته توشه
گله زیارتیچون مرقد طلا پوشه
مرحوم انور اردبیلی
منبع مجموعه کانالهای مدح و مرثیه
موضوع: حضرت حمزه (ع) ,
زبان شعر و شاعر: نوحه ترکی , انور اردبیلی
----
احوالات مجلس یزید
کج مدار ایلدون ای چرخ کهنسال و پیر
طُلقا زادیه آزاده لری ایتدون اسیر
دیوی دیوان سلیمانلاروا قیلدون امیر
حزب شیطانیله سرکوب اولوب حزب نجبا
خاتمه تاپمادی ای چرخ مدارون عجبا
تخت عاج اوسته یزید ایلدی نخوتله مقام
اوینادی نرد شراب ایچدی اولوب مست تمام
نحس جسمنده سراپا قزشوب لحم و عظام
چشم بدبینی مدارینده ایدوبدور دَوَران
سینه سینده ایلدی آتش ظلمی فَوَران
سینیِ زرده کسوک باشه دوشوبدور نظری
برج عقربده باخوب گوردی پریشان قمری
باخسا آیینیه بدچهره لر آرتار کدری
غیظیله تختنون اوستن ایاقا دوردی یزید
زشت گوردی اؤزین آئینه نی سندیردی یزید
خیزرانه حرکت ویردی سیه مار کیمی
یاره لی لبلره اندیردی اونی خار کیمی
خیزرانیله حسین بوسه لشیب یار کیمی
سینی زرده اولوب مجلسه غم صوتی طنین
زینب غمزده نون لرزیه سالدی بدنین
شیرتک غیظه گلوب شیرزن کرب و بلا
امن العدل سسین درک ایلدی گوش سما
وورما پیغمبر اؤپن لبلری یابن الطُلقا
خیزرانون نه جسارتله بیله اندیروسن؟
ووروسان فاطمه اوغلین منی دیلَّندیروسن
جده سی هند جگرخواره اولان شخص دنی
دین و قرآنه ایدر سن کیمی توهین علنی
قولی باغلی گوروسن اولما بو مجلسده منی؟
یخموسان آل علینی سن اگر حنجریله
نختدن من سنی سالام بو قرا معجریله
ظلمیله یر یوزینون کوکب رخشانلارینی
شاه خیبر شکنون شیردل اوغلانلارینی
کسدیروب باشینی توکدون یره سن قانلارینی
قالدی چوللرده کفنسیز شهدانون بدنی
اللره دوشدی حسینون سویولان پیرهنی
عمده نعمتدی شهادت بیزه ارثیه چاتوب
قارداشیم نازیله رؤیای شهادتده یاتوب
خیزرانیله وروبسان دوداقی قانه باتوب
مکّه و زمزم و هم کوه منا اوغلیدی بو
عرفاتون شرفی مروه صفا اوغیلدی بو
قالمیوب گرچه بو عالمده بیزیم بیر کسیمیز
یوخدی سندن ابداً ذرّه دل واپسیمیز
گوش احراره رسادور بو یانقلی سسمیز
بیزی اوَّلده گرامی یارادوبدور یارادان
وجهمیز قتلیله کشاریله گیتمز آرادان
سن گیوبسن بدنه جامۀ زربفت و زری
اولوسان زینت تالاروه باخدوقجا جری
هیچ خیال ایلموسن وار بوگون بیر سحری
قورخ اوگوندن بو آخان قانلارا خونخواه اولاجاق
فاطمه شاکی قضاوت ایدن الله اولاجاق
معنی عدل و عدالت بودور ای فتنه شعار؟
بیز دوراخ مجلس اغیاریده بی معجر و خوار
ایچه سن می اولاسان سن ولی مشغول قمار
داغلانان سینه لره اود وراسان داغلیاسان
عندلیبان غمون بال و پرین باغلیاسان
آز زماندان صورا ویرانه دی بو قصر جفا
انتقامین آلاجاق روح بزرگ شهدا
سنی مغلوب ایده جک بو قولی باغلی اسرا
ثمره ویرمیه جک سنده کی نیّات پلید
اوندا معلوم اولاجدور یخلان کیمی یزید
زینبون منطقی حضاره گتوردی هیجان
صندل اوستن ایاقا دوردی بیری ناله کنان
اعتراضیله یزیده دیدی ای هرزه روان
زشت صورت کیمی آیینه نی سندیرما یزید
ووردوقون لبلری پیغمبر اؤپوب وورما یزید
دولت روم نماینده سی بیر شخص کبیر
هیجانیله خبر آلدی او شایسته سفیر
کیمدی بو یاره لی باش کیمدی بو عورتلر امیر؟
جرئت می ایلمشدی او جفاکاری جری
سویلدی رأس حسیندور دل زهرا ثمری
دیمدی ظلمیله ملیّتون اوستنده ئولوب
شخص آزاده دی حریّتون اوستنده ئولوب
جرمی واردور دیدی امنیّتون اوستنده ئولوب
آناسی ختم پیمبر قزی مرضیّه مقام
اؤزی بو مملکتون ضدینه ایتمشدی قیام
بیر یهودی ایاقا دوردی بنام جالوت
سینیِ زرده کسوک باشه اولوبدور مبهوت
صورا بیر باخدی قولی باغلیلارا ایتدی سکوت
وصل معشوقه یتن عاشقه مستانه کیمی
نوراسلامی تاپوب ذوقلی پروانه کیمی
تختون اوستنده یزیده ایلدی قهر و عتاب
عصر داودی دیدی آل نظره ایله حساب
نچه یوز ایل کچور اُول عصردن ای خانه خراب
نسبتیم واردور اونا ایلورم اظهار وجود
ساخلیور حُرمتیمی ایندیده ابنای یهود
ختم مرسل او سخنگوی بزرگ صمدی
وحی اولوبدور سیزه تعلیم ایلدی نیک و بدی
آز زماندرو آلوب آغوشه سرای ابدی
آتشین داغ چکورسوز دل پیغمبروزه
ئولدوروب اوغلین حنا سیز یاخاسوز اللروزه
یوزه چشم اسرادن توکولن یاشه باخون
عشق سرگشته لری بو باجی قارداشه باخون
سینی زرده او دالدان کسلن باشه باخون
خیزران پارچالیوب لبلرینون قانی آخور
آغلیان قزلارینا گور نه محبتله باخور
عاشق اولدوم او باشون قانه باتان گوزلرینه
شیردل زینبنون گوش ایلدوم سوزلرینه
گتدوم ایمان بولارون سوزلرینه اؤزلرینه
داغلانان سینه لری رحم ایلیون داغلامیون
بوندان آرتوق ایاق اوسته بولاری ساخلامیون
حکم صادر ایلیوب قتلنه فی الفوری یزید
ظلمیله ائتدیله اول تازه مسلمانی شهید
قد بلند ایلدی بیر صاحب نیّات پلید
التجائیله یزیده یتوروب خواهشنی
حرم آهولرینون سلب ائدوب آرامشنی
نحس انگشتین اشاره ایدوب اول هرزه روان
فاطمه آدلی چوخ ایستکلی قزی ویردی نشان
ای خلیفه سنی غالب ایلیوب دور زمان
کرمونله منی بو بزمده گل ایله عزیز
بو ادبلی قزی ویر ساخلیوم ایومیزده کنیز
مرد شامی ایله که اوز سوزینی قیلدی ادا
بیربیره دگدی او مجلسده ردیف اسرا
قزلار آغلاشدی بیوگلر ایلدی شور و نوا
سخلوب فاطمه نون روحی دل اولمادی دینه
گوز یاشین توکدی یوزه باخدی خانم عمه سینه
دیدی زینب او پریشان قزا صبر ایله بالا
هیچ کیمون قدرتی یوخدور سنی بیزدن آیورا
هامودان چوخدی غمون واردی قولاقونده یارا
سینه می نار غمونده بُلوسن داغلامشام
گوشوارون آلناندا سنه چوخ آغلامشام
او هیاهوده رقیه ایلیوب درک خطر
بوئی چاتموردی باخا طشته او فرخنده سیر
بارماقی اوسته اوجالدی ایلدی باشه نظر
گرچه بیر پاچا او باش طشتون ایچینده قانیدی
هالیه دوشموش آیین غصّه لی اولدوز تانیدی
اورگینده نه خیال ایلدی یارب گوره سن
ایستیوردی باشا ساری گیده قویموردی رسن
کنترل ایلیه بلمز روشین هیچ تله سن
تله سوردی اورگی حیف اولا باغلیدی الی
ایستیوردی آچا بندین آچا بلموردی ولی
دئدی زینب نیه آرامیمی الدن آلوسان
عندلیب غم اولوب گویلومی درده سالوسان
شهپرون باغلیدور آخر نیه شهپر چالوسان
ویرمدی سس او یتیمه او محبت سسنه
باخدی قانلو باشا بیر سوز دیمدی عمه سینه
روحینه ضربه یتوردی او قزون درد فراق
اسرا که گیجه مخروبه یره گلدی قوناق
یورولانلار هر بیر گوشه ده یاتدی نه سیاق
غم دیزین باشینه حسرتله مکان ویردی او قز
سحره چاتمادی ویرانه ده جان ویردی او قز
(انورا) اهل سخن یاخشی سوزی گنج بیلر
سخنون قدرینی البته سخن سنج بیلر
بی ادبلر ادبی صحبتی بغرنج بیلر
ولی بلموله سوزی ثقل ایلین لنگریدور
اکثر مردم ادیبانه سوزه مشتریدور
مرحوم انور اردبیلی
منبع مجموعه کانالهای مدح و مرثیه
موضوع: احوالات مجلس یزید ,
زبان شعر و شاعر: نوحه ترکی , انور اردبیلی
----
ورود به شام
قرا گونه او زمان قالدی زینب علیا
قریب شامه یتشدی قطار آل عبا
نجه یتیشدیله سوز چوخدی شرحی مشکلدی
دیوم عریضه ویریم گر چه عمده نسگیلدی
حسین باشی گونه بنذر دالندا اولدوز وار
گلن او باش دالیسیجا نچه اوغولسوز وار
علی قیزی اوتوروبدور شکسته محملده
تکوبدی گوز اونا بیر عده خیرداجا قیز وار
اوزاق سفر ایلیوبلر چکوبله درد فراق
سولوبدی رنگلری یوزلرین دوتوب تپراق
او خورداجا بالالار شمر دون طلسمینده
باخان دئیر بولارون روحی یوخدی جسمنده
ز بس که شمر ستمگر قویوبدی ظلمه اساس
اوجا سسی ائشیدن وقته ایلیولر هراس
رقیه نی خبر آلما نه حالدا رنگی قاچوب
گورنده شمر اونی هر یرده تازیانه آچوب
دئنمورم تیکان اوستونده هی قاچوب یخیلوب
دوه نون اوسته او بیچاره قوش کیمی سیخیلوب
باخار جداده گوز آلتیجا اکبرین باشینا
سوزون دینمیور اما یارالی قارداشینا
او وقته شمر دنی ترک کاروان ائتدی
یزید حضورینه کسب اجازیه گیتدی
ویروبدی مژده فتحین او مرد خون آشام
دئدی ایدوم نجه آل عبانی داخل شام
او بی حیا دئدی من غرفه ده رجالیلن
اوتورمشام باخورام شوکت و جلالیلن
گیدوب حسین حرمین قزلارین گتور شامه
ورودی ده گرک اجرا اولا بو برنامه
بو داش اولان اورگیمده بیر آیری نیت وار
توقف ایله او دروازه ایکه ساعت وار
گر ایسته سون ایده سن فکریمی منیم راحت
اسیرلر گرک اوردا دایانسون اوچ ساعت
حسین باشینی جدا اوسته ساخلیاندا ئوزون
باخوب بو غرفه نون اوسته منه دوشنده گوزون
خدنگ ظلم او زمان قلب عالمه دگسون
جدانی اگ منه زهرا بالاسی باش اگسون
باش اگمدی منه چون ساغلیقیندا سبط علی
بو آرزومی گرک ایندی ائلییم عملی
باجیسینا نه قدر نسگیل اولسادا اولسون
بالاجا قزلاری باشینی یولسادا یولسون
یوزینه نازلی بالالارینون ویرون سیلی
بالاجا گوزلری قانیله دولسا قوی دولسون
او بی حیایه ایلیکی یتیشدی بو فرمان
جفا و ظلم و عداوتده قویمادی نقصان
گرک بو یرده سرشک بصر دونه نهره
گورک نه حالیله زینب گلوبدور اول شهره
علی قزیدی گورک کیم گیدوبدی پیشوازه
و یا او غمکشه مسکن اولوبدی دروازه
یوخیدی ذره ای نقصانی طمطراقینده
حسین گلور باجیسی زینبون قباقینده
دایاندی قافله ساعتده اضطرابیله
همان زمانیده شمر لعین شتابیله
اراده ایتدی جفا تیری عالمه دگسون
جدا باشیندا حسین تا یزیده باش اگسون
همان زمانیده معجز نما کسوک باشدان
تلالو ایلدی نور خدا کسوک باشدان
یزید چشمنه گویا بیر اوخ چخوب دگدی
به فوری دوشدی یوز اوسته حسینه باش اگدی
دئین یوخیدی او شمره اوتان حیا ایله
عزیز فاطمیه ظالم آز جفا ایله
مجازی اوخ بلی لوح حقیقته دگمز
حسین جداده ده اولسا یزیده باش اگمز
اوتانمادی گنه اول شمر بی حیای شرور
بیر آیری ظلم ایلسون ایلدی ئوزون مامور
دوشوب بو فکره دل کایناتی یاندیرسون
بنات فاطمه نی شهریده دولاندیرسون
حسین عیالینی گور شهر چار راهینده
قالوبدی یوزلری ابر سیه پناهینده
بو سوزی عرض ائدورم گر ئورک داش اولسا یانور
یاخونلاشان اولارا خارجی دئور دایانور
امام ئولوب اوزینه خون کبریا یاخیلوب
نیه او شامیده بس اللره حنا یاخیلوب
نیه علی قیزینون یوخدی سس وئرن سسینه
نیه چکوله قطاری یهود کوچه سینه
حسین که نیزه نون اوستونده کشف ایدور اعجاز
نیه او قانلی باشی داشلار ایلیور پیشواز
لباس قاره اونون خیردا بیر قیزی گئینوب
نیه او شامون اوشاقلاری قرمزی گئینوب
امام ساجده باخ رخت محنته بوکولور
مریضدور باشینا باملردن اود توکولور
حسین که قاسمه طوی ائلیوب او غملی چاقی
عروسی ناقه نون اوسته هانی عروس اطاقی
گوروله اوغلی ئولوب محنت و غمی چوخدور
نیه او غمزده لیلانی دیندیرن یوخدور
دئین او منقذه یوخ اودلانور فراقینده
اوغول باشین آنانون ساخلاما قباقینده
وئروب او غمزدیه دل یاراسی ائنجیتمه
جدانون اوسته دی نورس بالاسی ائنجیتمه
او قدری سسلیوب اکبر گلنده یوللاردا
رمقی یوخدی باتوبدور صداسی اینجیتمه
او باشی وئر آناسی پاک ائدوب یوزین سیلسون
گلوب ترحمه الله رضاسی انجیتمه
اوغول باشی سینه سی اوسته شهرده گزسون
بله هامی بودور اکبر آناسی ائنجیتمه
ویرنده جان ملک الموته گل بویور شاها
بو (انورون) واریدور چوخ خطاسی ائنجیتمه
مرحوم انور اردبیلی
منبع مجموعه کانالهای مدح و مرثیه
موضوع: احوالات شهر شام ,
زبان شعر و شاعر: نوحه ترکی , انور اردبیلی
----
زبانحال حضرت رقیه (سلام الله)
در راه شام
من یاتمشیدیم قافله کوچ ایتدی الهی
هانسی طرفه هانسی یولا گیتدی الهی
چوخ یورقونودوم بو چولی مأوا ایلینده
گلموردی دیزیم ناقه نون اوستونده اننده
بسکه اثر ایتمشدی یولون زحمتی منده
گون ایتدی اذیت گیدوب هریانه سیخلدوم
چارم یوخیدی خار مغیلانه سخلدوم
شهزاده لیگون عزّتنی فکردن آتدوم
گویا یورولان وقتیده راحت لیگه چاتدوم
لای لای دیمه میش خار مغیلان منه یاتدوم
آهو کیمی کاشانۀ آسایشیم اولدی
بیراهه چولون ایستی قومی بالشیم اولدی
غفلت یوخوسیمش بو یوخی دوتدی گوزیمدن
افسوس آیلاندان صورا مأیوسم اوزیمدن
یارب کمک ایت قورخی منی سالدی دوزیمدن
دل داغلی یتیمم منه زندانیدی فرشون
آهیمده اثر واردی نیه تیترمور عرشون
عهد ایلیورم یتسه الیم غملو قطاره
یول زحمتی یورقون بدنی یورسا دوباره
عریان دوه لر هر نقدر سالسا فشاره
منزلده دوشنده بدنیم اولسادا خسته
گورسم که یوخوم گلدی دایانام ایاق اوسته
ای یوسفی زندانیدن آزاد ایدن الله
طوفانیده نوحون اورگین شاد ایدن الله
بیچاره لره غم گونی امداد ایدن الله
نه اینکه گوزومدن توکولن یاشلارا خاطر
رحم ایله منه نیزه ده کی باشلارا خاطر
ظلمت گورونور گون چکیلور جانب غربه
صحرا قرالور قورخی دولور قورخولی قلبه
قورخوم بودی یارب یتیشه روحیمه ضربه
یل دگدوگجه تتریور اگنیمده کی کوینگ
لرزان اولورام دیسگینورم کولگه می گورجک
عزّت گونومون عمری آزیمیش بو جهاندا
ناز ایلریدوم اکبریم آغوشه آلاندا
یوخدور خبری من گزورم ایندی هایاندا
گول چولده تیکان سایه سینه دالدالانوبدور
قورخی اثریندن دوداقیم پارچالانوبدور
لطف ایله سونن شمع وصالیم گینه یانسون
بیربوگجه محنتله یاتان بختیم اویانسون
مظلوم آتامون باشی جدا اوسته دایانسون
رمزیله یتورسون بیبیمه یولدا قالان وار
بلسون او گیدنلر منیده یاده سالان وار
من تک بیری هیهات اولا قلبی شکسته
بیچاره اولا بو گویون آلتندا یر اوسته
بار غم و محنت ایلیه جسمنی خسته
دنیا نظرینده اولا بیر گوشه محبس
یورقون سسیله سسلنه سس ویرمیه هیچ کس
من مرغ شب آهنگ گلستان بلایم
یا بلبل شوریده گلزار عزایم
وار غملو سسیم زنگ قطار اسرایم
گر قافله غم بو چولون ترکنی ایتدی
هی فکر ایدورم بلمورم عمم نیه گتدی
آهیم اوجالوب قافلیه گیتمه دایان دی
اپدوقجه تیکانلار ایاقمدان منه جان دی
هر مأذنه ده ایندی موذن لر اذان دی
گلدسته لر اوسته دیولور جدیمون آدی
چوللرده هراسان گزورم من نه روادی
غملردن الهی اورگیم بیخبریمش
هرکیم کی یتیم اولسا نظردن دوشریمش
دنیا نقدر مرکز خوف و خطریمش
شهزاده لرون عزتی بیردن یوخ اولارمش
نیسان یاغیشندان آخان اشکی چوخ اولارمش
غارت گونی دوشدوک ائله گرداب بلایه
مال و حشم و بستریمز گئتدی فنایه
گلسیدی گمانیم بو گیجه کهنه عبایه
مابین ایکی خار مغیلانه سالاردوم
بیرخیمه قوراردوم اونون آلتندا قالاردوم
مرحوم انور اردبیلی
منبع مجموعه کانالهای مدح و مرثیه
موضوع: حضرت رقیه (س) زبانحال ,
زبان شعر و شاعر: نوحه ترکی , انور اردبیلی
----
احوالات دیر راهب
خولینی وئردی نشان پیر کنشته اشقیا
روبرو اولدی او نامرد و عدالت گستره
خولیدن آلدی خبر سویله نه وار بو جعبه ده
نیمه شب قالخوردی نوری گنبد نیلوفره
راس مرد خارجیدور سویلدی صندوقیده
نهضت ایتمشدی فنا ایتسون یزیدی یکسره
سویلدی آدین بیان ایله دیدی آدی حسین
فاطمه دخت پیمبر اوغلون ساتموسوز سیم و زره
سهلیدور قرآن سیزه لعنت اوخور انجیلیده
قابل لعنتدی هر کیم خیرینی ساتسا شره
زحمت پیغمبر اسلامه قیمت قویمادوز
صفحه تاریخده اعرابه حرمت قویمادوز
ایستورم تاریخیده بیر افتخار اولسون منه
سیز حسین باشینویرون دیریمده یار اولسون منه
نصب شبدن چشمه اسلامه عطشان اولموشام
جرعه نوشی اولماسام صدقیله عار اولسون منه
فاطمه اوغلی گرکدور دیریمه وئرسون صفا
مسلک عرفاندا صاحب اختیار اولسون منه
سفره فیضینده فکریم وار اولام من ریزه خوار
ایستورم سفرمده عیسی ریزه خوار اولسون منه
ایستورم طوق صلیبی گردنیمدن رد ایدم
گردنیمده طوق اسلام اعتبار اولسون منه
ویرمرم خولی دئدی راهب بو باشی من سنه
قورخورام دشمن یزید فتنه کار اولسون منه
پیر روشندل وئروبدور خولیه بیر کیسه پول
پول دیدی گئتسون ولی خوش روزگار اولسون منه
ادی اونمیندرهمه قانلی باشین بیر ساعتین
قوی دیدی عمرون خزانی نوبهار اولسون منه
یوسف عشقی اوجوز ساتدوز وای اولسون سیزلره
طول عمرومده بو آل ویر یادگار اولسون منه
خولی آچدی جعبه نی باشی ویروب نصرانیه
ویر دیدی مهمان شه والا تبار اولسون منه
قانلی باشی آلدی دقت ایلدی سیماسینه
دیرده همدم دیدی بو گلعذار اولسون منه
چوخ گوزلدور صورتی افسوس کول آثاری وار
لکه قویسام بو گوزل صورتده عار اولسون منه
سو دگل لایق گرک مشک و گلابیلن یووام
تا جمال حق نماسی آشکار اولسون منه
میزبان اهل دل اولسا دینجلر یورقون قوناق
میهمان دینجلسون اجر بی شمار اولسون منه
قانلی باشی شست و شو ایتدی قویوب سجّادیه
قیمت عشقیم دیدی خوشدور بیان اولسون منه
ای یاراسی مرحمه حسرت قالان منلن دانش
صومعه ام قصر بهشت لاله زار اولسون منه
بوینوما سالدیم قرا اولدوم عزادارون آقا
زندگی دنیاده سنسیز ناگوار اولسون منه
گل دیله دیندیر منی انجیلیدنده ال چکوم
عهد ایدوم بوندانصورا قرآن شعار اولسون منه
رخصتون اولسا حسینیّه دوزلدوم دیریمی
سجده گاهیم خانه عشق و نگار اولسون منه
گنبد دیره و یا بیر قاره پرچم نصب ایدوم
حشره تک مبهوت چرخ کجمدار اولسون منه
خوشدی یازسام شقّه پرچ مده یا مظلوم حسین
پرچمین گورسون کمک هر رهگذار اولسون منه
راضی اولسان باشیوی محرابیده دفن ایلیوم
باشوه هر گون دونوم کسب وقار اولسون منه
قیلدی فرمایش حسین توحیده اقرار ایله سن
مُسلم اوُل جنت ده قصرون همجوار اولسون منه
گوزلریمدولموشدی مقتلده یودون خاکسترین
حرمت ایتدون قویمادون کولدن فشار اولسون منه
اللریم یوخدور سیلردیم گوزده کی گوز یاشوی
دوزمزیدیم من او گوزلر اشگبار اولسون منه
من حسین کیم منه ساری گوتورسه بیر قدم
مین قدم گللم یقین امیدوار اولسون منه
پاک عزاداریم و یا زوّاریم ئولسه قوخماسون
قبرینون اوّل شبینده انتظار اولسون منه
باشیمی دفن ایتمه قوی چوللرده سرگردان گزوم
هر باخاندا باشیمه زینب خمار اولسون منه
فاطمه اوغلی مگر عیسادی دار اوستن قاچا
شامه جک هر گون گرک تکلیف دار اولسون منه
ویرمرم مین بیله دیره خیزرانون خیرینی
بوسه آلماقدا اودا معشوقه یار اولسون منه
مانعی یوخدی گوزومدن دیشلریمدن ئوپسه ده
مجلس شُربون گرک تالاری تار اولسون منه
گُل نثار ایللّه سلطانه گلی من نیلورم
طشتده ئوز لبلریم گوهر نثار اولسون منه
قانه باتمیش لبلریمله دمبدم یاهو دیوم
خالقیم باخسون ئوزی قیمت گذار اولسون منه
انتقامیم آلماقا مجلسده دیلّنسون باجیم
منطق برّانی مثل ذوالفقار اولسون منه
(انورم) بو نوحه نون نظمینده پرشور اولموشام
ارزشی وار دفتریمده شاهکار اولسون منه
مرحوم انور اردبیلی
منبع مجموعه کانالهای مدح و مرثیه
موضوع: احوالات دیر راهب ,
زبان شعر و شاعر: نوحه ترکی , انور اردبیلی
----
وداع حضرت امام حسین (علیه السلام)
ای بتوله نائبه درد و غم چکن باجی
گئت حسینیوه گتور کهنه پیرهن باجی
آخرین وداعیدور واضحین سنه دیَم
یوخدی گلمگیم اودور کهنه کوینک ایسیَم
بُلمک ایستسون نیه کهنه پیرهن گیَم
سویماسا عدو اولا نعشیمه کفن باجی
بادۀ وفائیلن قارداشون اولوبدی مست
آخره گرک یته عهد نامۀ الست
ایلورم سنی بالا قزلاریما سرپرست
من کیمی نوازش ائت اهلبیته سن باجی
ترک موطن ایلدوک دوشدوک آیری مشقه بیز
عاشقوک گرک یتک شاهراه عشقه بیز
ائتمشوک معاهده تا گئدک دمشقه بیز
سن سنق کجاوه ده نیزه اوسته من باجی
بو خلاصه مطلبه آگه ایلورم سنی
نزد اهل بیتده سن اوجالتما شیونی
من خیامه گلمرم گوگلون ایستسه منی
قتلگاهه ساری گل تلّون اوستن اَن باجی
باشیمی گورن زمان نیزه اوسته صبر ایله
سینم اولسا تیریلن گر شکسته صبر ایله
آتلو دولسا خیمیه دسته دسته صبر ایله
هر بلاده صابر اول چخما صبردن باجی
کشف حال ائدوم سنه سرنوشتوزی بیلوز
یاندیرار بو قلب تک کائناتی نسگلوز
شهر کوفه دور سحر ابتداده نسگلوز
منده کربلا چولون ایلرم وطن باجی
گئتسوز هر یره حسین سرفراز ائدر سیزی
خلق اچینده صاحب امتیاز ائدر سیزی
کوفه ده کسوک باشیم پیشواز ائدر سیزی
بیر عجوزه زن ائدر ظلمنی علن باجی
هر مکانیده وارام اهل بیتلن ئوزوم
آغلیار ملالوزه نیزه اوسته قان گوزوم
وقت یوخیدی صحبته چوخدی قلبده سوزوم
شرحیلن چتین یته آخره سخن باجی
داد او وقتیدن سنه راه چاره سد اولار
قامتون کمان کیمی بیر خمیده قد اولار
هر غم و ملالیدن بو غمون اشدّ اولار
خارجی دیوب وورار طعنه هر گلن باجی
ای شریک محنتیم ای بتوله نور عین
حالیمه گرک ائده اهل کوفه شور و شین
نیزه اوسته آیۀ کهفی ذکر ائدر حسین
حیرته دوشر کسوک باشیمی گورن باجی
«انورم» یازوب سنه نوحه ایلرم نوا
خلقه دار فانیده یوخدی ذره ای وئفا
بو سوزی دئدی همان وقته شاه کربلا
ای بتوله نائبه درد و غم چکن باجی
مرحوم انور اردبیلی
منبع مجموعه کانالهای مدح و مرثیه
موضوع: حضرت امام حسین (ع) وداع ,
زبان شعر و شاعر: نوحه ترکی , انور اردبیلی
----
وداع حضرت امام حسین (علیه السلام)
تعجیلیلن گئتمه حسین میدانه صبر ایله
سالما بلالی زینبی هجرانه صبر ایله
گر چه سنی جذب ایلیوبدور وصل دلدارون
گورم حسین عمر ائتمگه یوخ رغبت آثارون
آغلار قالوبدور خیمه ده آخر بالالارون
کیم سرپرست دور بیر بُلوک طفلانه صبر ایله
بیر درد مشکلدور حسینجان محنت هجران
هجرانیوه یوخ طاقتیم ای شاه مظلومان
سالما فشاره روحیمی رحیم سنه قربان
دوندرمه داغلی قلبیمی القانه صبر ایله
خیمه سراده اولمادی ممکن ائدم صحبت
واردور خیامه گلمگون کشف ائت اولوم راحت
بو ساعتوندور جان حسین جان آخرین ساعت
بیلدیر اؤرک سرّین منِ نالانه صبر ایله
تأخیر قیل قوی اخذ ائدیم توشه جمالوندان
پروانه تک من نور آلوم شمع وصالوندان
دویدون نه تئز قارداش حسین اهل و عیالوندان
سرعتله یولّاندون بیله میدانه صبر ایله
غربت مکان سنسن امیدیم تک حسین قارداش
گئتسون باجون ایلر نوا نی تک حسین قارداش
گیدون ایلیکه کهنه بیر کوینک حسین قارداش
بُولدوم همان ساعت دویوبسان جانه صبر ایله
گلدی حسین گویا دیله ائتدی بئله گفتار
یول گوزلمه زینب خیامه گلمرم زنهار
بو ساعت آخر ساعتیمدور آخرین دیدار
نزدیکدور عمریم یته پایانه صبر ایله
مرحوم انور اردبیلی
منبع مجموعه کانالهای مدح و مرثیه
موضوع: حضرت امام حسین (ع) وداع ,
زبان شعر و شاعر: نوحه ترکی , انور اردبیلی
----
تنور خولی
حسین شام غریباندور سنه یار اولماسام اولماز
چوخور یرده دوتوب ماتم عزادار اولماسام اولماز
سنون عشقون سالوب چولدن چوله بو غملی زهرانی
اولام لازمدی بو صحراده ناچار اولماسام اولماز
غم اهلی رسم عالمدور همیشه غملینی خوشلار
سنون تک غملی بیر سلطانه غمخوار اولماسام اولماز
شکسته دللرون قدرین شکسته دل بیلر اوغلوم
ئولوب اوغلون سنوب قلبون طرفدار اولماسام اولماز
بو باشسیز پیکره اولّام نگهبان ساربان قویسا
او گلسه دیده سی مقتلده خونبار اولماسام اولماز
نه لر اولدی خانم زهرا دوروب ترک ایتدی گودالی
دیدی هر یرده من درده گرفتار اولماسام اولماز
یوخ امکان اگلشم بوردا حسین جان ال کسن گلدی
ندور چاره گیجه وقتنده سیّار اولماسام اولماز
خرابه کوفه ده مطبخ سرادور مسکنیم بیلدوم
گلوب صبحه کیمی مشغول گفتار اولماسام اولماز
اولوبسان خولیه مهمان سنه گلم قوناق اولام
عزیزیم سن اولان منزلده من وار اولماسام اولماز
بلالی باشوون دردی باشا گلدی و یا اینکه
گنه بیر آیری دردون وار خبر دار اولماسام اولماز
منیم ئوز نازدانم سن منیم ئوز پروریدم سن
امیدیم سن پناهیم سن پرستار اولماسام اولماز
زیارت فیضینون مشتاقیم قصدیم زیارتدور
دوداقوندن ئوپوب مطبخده زوّار اولماسام اولماز
گلوب تاپدی اوغول باشین مرامی حاصله گلدی
کولون سیلدی گوزون اوپدی یوزون اوپدی دیله گلدی
دیدی اوغلوم آنون گور ایندی افغانه گلر گلمز
سرشگین گوزلرینده دوندروب قانه گلر گلمز
اوغول چولدن چوله دوشسه اوغول ایودن ایوه گیتسه
آنا آیا دالیجا خانه بخانه گلر گلمز
قابورقام سینماقیمداندا باش اولدی باشون دردی
بالا یاتسا کول اوستونده آنا جانه گلر گلمز
سنون پروانوم سنده منیم روشن چراغیم سن
چراغ هر یرده روشن اولسا پروانه گلر گلمز
گیدنده موکب سلطان عزیزیم شهریدن شهره
مگر شهرون رجالی دید سلطانه گلر گلمز؟
جلوس شاه شاهانی بیلنده دردمند اشخاص
عریضه الده درباره ذلیلانه گلر گلمز
قوناقسان بو ایوه افسوس خوشگلدون دِیَن یوخدی
گور ایندی قلبیمون آلامی طغیانه گلر گلمز
ئوزون غملی یرون غملی گلن یوخدی گیدن یوخدی
قوناق گلسه ایو اهلی نزد مهمانه گلر گلمز
مسلمان ابتلا گورمز مسلمانه قوناق گیتسه
بو ظلمی درک ایده رقّت مسلمانه گلر گلمز
کول اولسون باشینه اسلامه توهین ایلیوب خولی
بو توهیندن شماتت اهل قرآنه گلر گلمز
بو باشین قدرینی زهرا بیلر چون اهل عرفاندور
صفا عارف اولاندا بزم عرفانه گلر گلمز
بیر آز گیت هوشه محسن اَممیَن پستانلارون اوسته
کسوک باش قان دولان پستانه درمانه گلر گلمز
ئورک دردین آنا اولادینه بیر بیر مقال ایتدی
جوابینده اوغول گویا بو نوعی کشف حال ایتدی
آنا قانلو باشیم مطبخده بی پیکر قالوب قالسون
جنازم صفحۀ میدانیده بی سر قالوب قالسون
قولون قنفذ جفاسیندن اوجالمور غم یمه نینک
منیمده اللریم اللرده ای مادر قالوب قالسون
او داغلی دلده سن ساخلا حسن داغین حسین داغین
منیم قلبیمده داغ اکبر و اصغر قالوب قالسون
قویوبلار خارجی آدی حسینه غصّه سین ایتمه
شماتتده نوامیس حق داور قالوب قالسون
قیزیم صغرا فراقیمدن تیکوبدی گوز یولا تیکسون
آنام ام البنین یثربده بی یاور قالوب قالسون
سویولمش خسته قیزلاریم قولون بالش ایدوب ایتسون
مریض اوغلوم یانان چادرده بی بستر قالوب قالسون
رقیه قولارین قمچی گویَرتسون مانعی یوخدی
منه ناز ایلین بلبل شکسته پر قالوب قالسون
عروس قاسمی بی شرم اولان دشمن سویوب سویسون
گیدوب گوشواره سی تاراجه بی زیور قالوب قالسون
قوجالتسون غصّه کلثومی آغارتسون زینبین زلفین
ویروب قارداشلارین الدن قرا معجر قالوب قالسون
منیمدور جاودانی سلطنت هند اوغلی دنیاده
بِش اون گون آبروسیز ملّته رهبر قالوب قالسون
فقط قرآن وار اولسون پرچم دین اهتزاز ایتسون
اسارت پنجه سینده آل پیغمبر قالوب قالسون
بو بزم انسده اولما پریشان آغلاما نِینَک
کسوک باشیم سنان قولاره قربان آغلاما نینک
آنا کرب وبلانون محشریندن من دیوم یا سن
شهادت نامه نون غم دفتریندن من دیوم یا سن
حسینون دردینه سن که ئوزیندن یاخشی واقف سن
نه لر گوردوم او شامون لشگریندن من دیوم یا سن
حبیب ابن مظاهردن ایدک یا حریدن صحبت
شجاعان حماسه آفریندن من دیوم یا سن
گوزل اوغلوم اَوَل گیتدی عبا پیچ ایلدوم گتدوم
رسول اکرمون ئوز بنذریندن من دیوم یا سن
وفالی عمه سی میدانه گلدی باش آچوق گوردون
آناسی لیلینون اشگ تریندن من دیوم یاسن
ربابین شیر خوار اوغلی اوخی پستان کیمی اَمدی
نجه قان جاری اولدی اوخ یریندن من دیوم یا سن
قوی پنجه قوی بازو قوی هیکل علمدارون
سو اوستونده کسیلمیش اللریندن من دیوم یا سن
بلالی زینبیم من ذبح اولان ساعتده مقتلده
نجه شمرون یاپوشدی خنجریندن من دیوم یا سن
او پیراهن که ویرمیشدون من آلدوم فضّه دن گیدوم
نجه چخدی حسینون پیکریندن من دیوم یا سن
سویا حسرت اولان قیزلاریمی اود چکدی آغوشه
سوسوز بلبللرون یانمش پریندن من دیوم یا سن
بیری خندقده جان ویردی ایکیسی قول بویون ئولدی
باجیم ئوپدی یومولموش گوزلریندن من دیوم یاسن
یزیدی مست ایدوب دنیا اله مستانه جام آلسون
بو قانی قویماسون یرده خداوند انتقام آلسون
مرحوم انور اردبیلی
منبع مجموعه کانالهای مدح و مرثیه
موضوع: احوالات تنور خولی ,
زبان شعر و شاعر: نوحه ترکی , انور اردبیلی
----
حضرت امام حسین (علیه السلام)
ای بیشۀ جدلده اولان ضیغم افکنیم
وی گلشن صفاده منیم سرو گلشنیم
یاتما کنار نهریده دور اکبری چاغور
قارداش گلون اوخی اؤرگیمدن چکون منیم
گلدوم جنازوز اوسته سیزون ای باوفا شعار
سینوزدن ائتدوم اوخلاری من بیر به بیر کنار
تنگه دوشوب منیم نفسیم یوخدی اختیار
اولمون رضا بو حالتیله زیندن اَنیم
قارداش گلون اوخی اؤرگیمدن چکون منیم
من بزم پنج تنده اوزوم زیب و زینتم
ریحانۀ معطر گلزار خلقتم
گلگون قبای وادی عشق حقیقتم
رنگین اولوبدی قرمزی قانیله دامنیم
قارداش گلون اوخی اؤرگیمدن چکون منیم
مشگل یره دایاندی ایش ای حافظ علم
طومار زندگیمه چکیلدی منیم قلم
ائتدوم جدایه تکیه بیر آز بلکه دینجلم
فرصتدن استفاده ولی ائتدی دشمنیم
قارداش گلون اوخی اؤرگیمدن چکون منیم
بیر اوخدی بو عداوت اوخی واری اوچ پری
سیراب اولوبدی زهریله برّنده پرلری
اودلاندی قلبیمون باشی گتدوم اجل تری
اولدی گوزومده تیره گجه روز روشنیم
قارداش گلون اوخی اؤرگیمدن چکون منیم
اولماز بو اوخ کیمی هدفه دوز گلوب چاتان
گول برگینی نشان ایلیوب خارتک باتان
قویدی رقیه می آتاسیز بو اوخی آتان
بند دلیم قریلدی سسه گلدی جوشنیم
قارداش گلون اوخی اؤرگیمدن چکون منیم
مرحوم انور اردبیلی
منبع مجموعه کانالهای مدح و مرثیه
موضوع: حضرت امام حسین (ع) ,
زبان شعر و شاعر: نوحه ترکی , انور اردبیلی
----
احوالات حضرت فاطمه (سلام الله)
سدره مکاندی بزم جلالتده فاطمه
هم کفّو مرتضادی لیاقتده فاطمه
اهل کسانون عزّتی خلقت چکیده سی
بی مثلدور نژاد و نجابتده فاطمه
محبوبه دور صفات گرانقدر و قیمتی
محموده دور مقام عبادتده فاطمه
ام الائمه جدّۀ سادات روزگار
آئینه دور پیمبره طاعتده فاطمه
مرضیه و محدثّه ، صدیقه طاهره
خطی جلیدی لوح شرافتده فاطمه
اوغلانلاری مسیحدن افضلدی تک به تک
مریمدن آشنادی دیانتده فاطمه
قدسیّه دور عصارۀ جسم رسول دور
خوش غنچه گلدی باغ رسالتده فاطمه
قدری بُلونمیوب هله بو روزگاریده
یوخدور بیلن نه شخصیدی خلقتده فاطمه
بیر گون اولار ولی بیلونر قدر و قیمتی
ظاهر اولاندا یوم شفاعتده فاطمه
پیراهن حسینی سالان وقته باشینه
عباس الی الینده قیامتده فاطمه
بیرگوندی که اوگون غم و محنت رواجی وار
پیغمبرونده فاطمیه احتیاجی وار
افسوس بو جلالت و بو اعتباریله
صد حیف بو اصالت و شأن و وقاریله
خاک بقیعیده ایله پوزقوندی مدفنی
مونس اولوبدی تودۀ گرد و غباریله
قربان او آغلیان گوزوه یابن العسکری
قالسون نقدری شیعه لر آخر فشاریله
سن که گونوزلرون چوخی حتما بقیعده سن
زوّار و آشناسن او پوزقون مزاریله
هیچ گورموسن مدینه نون عورتلری گله
قبر بتولی شوط ایلیه افتخاریله
الله رضاسی بیرکس او قبرون توزون سیله
یاسین تلاوت ایلیه یا آه و زاریله
یوخدور دییَن مدینه لیلر ایلیون حیا
هم مسلک اولمیون فلک کج مداریله
زهرا سیزون پیمبروزون یادگاریدور
علت ندور عناد ایلوسوز یادگاریله
سیز ایستمورسوز، ایستیَنَه مانع اولمیون
دلخواهی وار گلور دل امیدواریله
حجاجه یول ویرون او مزار اوسته آغلاسون
انصاف ایدوب بیر آز گئچینون رهگذاریله
مغضوبسوز شمول ضلالتدی ملّتوز
بیراهیه چکوب سیزی شیخ طریقتوز
اجدادوز اینجیدوبدی پیمبر نشانه سین
جاری ایدوبدوله یوزه اشک روانه سین
پیغمبرون یاشیدی وجودینده خلعتی
الده بهانه ائتدیله بیعت بهانه سین
اود ویردیلار آلیشدی ملک اوز قویان قاپی
توستی دومان کیمی بورؤدی وحی خانه سین
عفت هماسینون گوزی حسرت باخا باخا
نمرود ثانی چکدی اودا آشیانه سین
ناگه تکان ویروب قاپونی آچدی قهریله
دیوار سیخدی امن ایوینون نازدانه سین
مسمار سردی گرم ایلمیشدی زبس اَلُو
ائتدی قرا اودور که بتولین زمانه سین
داغلاندی سینه قان توکولوب داغلی سینه دن
زیبا گولون خزانه ویروبدور جوانه سین
گول ، فاطمه جوانه سی محسندی عارف اول
زینب هزاره سیدی اوجاتدی ترانه سین
رکنیدی فاطمه او ایوه یخدیلار یره
مقتل ایدوبله محسنینه آستانه سین
دیوار و در ، که ائتدیگین ائتمیشدی بُلمورم
قنفذ نَیَه اوجاتدی گوگه تازیانه سین
صادق امامیمیز بو سوزی ایلیوب پیام
مضروب اولوبدی قبره شهیده گیدوب آنام
شیخیندن شکسته دلیدی او دلنواز
علت اودور که دفنی ایله اولدی جانگداز
تاکیدیله وصیت ایدنده او باوفا
عرض ایلدی ابوالحسن ای میر پاکباز
بو دلشکسته نی دل شب دفن ایله ئوزون
بیگانه لر گله قاپوما ائتمورم مجاز
اوغلانلاریم نمازیمه دورسا غم ائتمرم
کافیدی قیزلاریم باش آچوب ائتسه سوز و ساز
شیر خدا چوخ ایستدیگین قویدی مغسله
باخدی وفالی همدمینه آغلادی بیر آز
غسلین ویروبدی شخصاً ئوزی ایلدی کفن
یدی نفرله قیلدی او مظلومیه نماز
تابوته ویردیلر حرکت زینب آغلادی
گویا ایدوب آناسینا بو نوعی کشف راز
ظلمت گئجه آنا گیدوسن هانسی منزله
ترک ایلوسن حسینوی ای بانوی حجاز
قال بو گئجه بیزیله گونوز باری دوش یولا
شب زنده داریلر گئجه دن ائتمز احتراز
صبحه کیمی آنا دیرم یاتمارام آنا
چیخسون گوزوم اگر گوزومه گلسه خواب ناز
سندنصورا مصیبت عالم منیمکیدور
ماتم منیمدی آه منیم غم منیمکیدور
تابوتیله او یدّی نفر غملی آشنا
مشغول اولوبلا گیتمگه آرام و بی صدا
آهسته یول گیدوردوله بیر کس اویانماسون
ایجاد زحمت ایلمه سون قوم اشقیا
اذن اولمادی همان گئجه معناده جبرئیل
یثرب فضاسینی دولانوب ایلیه نوا
اهل مدینه بیر اویانون خواب نازیدن
شهروزده بی خبرسوز عجب واردی ماجرا
شهبانوی حجاز گیدور قبره یاتمیون
قبر رسول اکرمه باری چکون قرا
تابوته ای مهاجر و انصار ایدون کمک
گلمور ایاقی گیتمگه یورقوندی مرتضا
هر مشکلوز اولاندا الوزدن دوتوب علی
سیزده دوتون الین بو گیجه ایلیون رضا
یخدی ایوین یانان قاپوسین باغلادی فلک
گلچین روزگار ایلدی گلشنین فنا
گیتسون حرملروز قیزینی ساکت ایلسون
زینب قرانلوق ائوده قوروب مجلس عزا
الله رضاسی دور کیم اونا تسلیت دیه
محکوم ایدوب بلایه اونی حاکم قضا
سیز بیلموسوز باشیندا اونون چوخ بلاسی وار
یثرب غمی قالوبدی هله کربلاسی وار
زهرانی الغرض یتوروبلر مزارینه
ایستکلی یاری قبر آچوب ایستکلی یارینه
گنجینۀ شفاعتی دفن ایلدی علی
تاپشوردی مه لقاسینی قبرون غبارینه
گتدی دیله ئورک غمی شاه ولایتی
باخدی او قبره گوز یاشی آخدی عذارینه
تاریک منزلی دیدی خوش منزل ایلدون
دنیانون اُفّ اولا شرف و اعتبارینه
ای گول سنی خزان ستم پرپر ایلدی
یتدی خزانون آفتی خلقت بهارینه
بوشدور یرون گئدنمیورم خانمانیمه
سنسیز ایویم قفسدی بو محنت دچارینه
ایوای بو سیل تک توکولن اشک حسرته
ای وای منیم بالالاریمون روزگارینه
سن بیر ایشیقلی اولدوزودون چرخ عصمته
دوشدون منیم ایویمده مصیبت مدارینه
گورمز حریم ملک فنا سن کیمی حرم
تاب ایلیه زمانه سینون هر فشارینه
هیچ دوقّوز ایلده بیر یول اوتاندیرمادون منی
قیمت همیشه ویردون علینون وقارینه
آغوش سرد قبره سخلدون قرا گئجه
من استراحتیله گیدوم صبح ایدوم نجه
آغلار گوزیله گلدی علی غم سراسینه
حسرت نگاه ایدوب چمن بی صفاسینه
افسرده دل بالالارینی یغدی باشینه
خوش انجمن قوروبدی بتولون عزاسینه
هر قلبی یاندیرار آناسیز قیزلارون سوزی
قیلدی خطاب زینب بخت قراسینه
قلبیم دولوبدی مشتریم اوخشاما دِئسون
ترویج ویر قیزیم آناوین بزم یاسینه
اما ئورکده کی سوزووین هاموسون دیمه
ساخلا بیر آزدا قارداشوون کربلاسینه
خاموش ایله چراغی قرانلوقدا اگلشک
چون قاره یر قفس اولوب عفّت هماسینه
زهرا رضاسی بو گیجه شب زنده دار اولاق
شب زنده دار اولاردی آنوز حق رضاسینه
ماتم دوتوب همان گیجه نی ائتدیلر سحر
کیملر گورک گلوبدی او محنت بناسینه
ثانی گئنه بیر عده منافق جماعتی
گتدی او دودمانه باخون مدعاسینه
مقداد گلدی آلدی خبر مطلبوز ندور
گلدوک دئدی حمایت ایدک آل یاسینه
تُوأَمدی خدمتیله بیزیم اتحادیمیز
بنت رسولی دفن ایلمَکدی مرادیمیز
مقداد او شوم و بد منشه ایلدی جواب
دفن ایلیوب بتولی دل شبده بوتراب
ثانی ایشیتدی کلمۀ دفنی آجیقلانوب
گِئتدی الی هوایه انوب ائتدی انقلاب
بیر سیلی ویردی صورت مقداده قهریله
مقداد الین قویوب یوزینه ایلدی خطاب
زهرایه سیلی کیم ویرا مقدادی تِز ویرار
دنیا عجب سنی ایلیوب مست و کامیاب
چوخ آغلادوب علینی گیجه سیلیوون یری
ال غسلدن چکوب ایلدی عالمی کباب
بی حاصل اولدی منطق مقداد ثانیه
قیلدی همان زمانیده بیرفکر ناصواب
قبر بتوله سوق ایلیوبدور جماعتی
شهر مدینیه او دنی سالدی اضطراب
گلدی خبر سکوت ایلمه یا ابالحسن
ثانی مزار فاطمه نی ایلیور خراب
گیزلتدیگون خزینیه دور قویما ال تاپا
فوراً ایله او پیر جفا پیشه نی مجاب
چوخ اینجیبدی فاطمه پهلو شکسته دور
ثانی او روحسیز بدنه وئرمسون عذاب
افسرده زینبی نگران ائتدی بو خبر
اشکین توکوبدی چخدی اوزوندن او خونجگر
سرعتله ذوالفقاری گتوردی او خوش مرام
عرض ایلدی اوتورما بابا ایله بیر قیام
قربان اولا گوزوم او قلنج اندیرن اله
هر ظلمه تاب ائدوب نیه آلمورسان انتقام
ثانی جری اولوبدی نیه دینموسن بابا
آسایشی او ظالم ایدوبدور بیزه حرام
قویما منافقین ال آچوب نبش قبر ائده
واردور یاراسی رحم ایله بیچاره دور آنام
مظلومیه کمک ایلمک حق رضاسی دور
مظلومه دور منیم آنام ای برگزیده نام
اولسون قسم دیانتیوه مهربان بابا
منده او مهربان آناما دائم آغلارام
قبر اوستونه یتشسون اول خواهشیم بودور
بخت قرا قیزون دی سنه گوندروب سلام
احوالیمی سوروشسا بویور اوخشاما دیور
اما نه اوخشاما ئورک ایستور ائده دوام
رجعت ائدن زمان الی بوش گلمه منزله
خاک مزارینی گتور ای سید انام
نسگل ایدوم او توپراقی من باشیمه سپوم
زینت ایدوم هورکلریمه زلفیمه مدام
مرحوم انور اردبیلی
منبع مجموعه کانالهای مدح و مرثیه
موضوع: حضرت فاطمه زهرا (س) احوالات ,
زبان شعر و شاعر: نوحه ترکی , انور اردبیلی
----
زبانحال حضرت رباب (سلام الله)
اصغریم شام عزادور گجم اولموش یاری
دور ایدوب لشکر غم غصه من بی یاری
رنگینی توستی بوغان خیمه ده سرگردانم
گرمدور ناله و زاریمله عزا بازاری
باخورام کرب و بلا جوینه حیران حیران
آسماندا گورورم ثابتیله سیاری
آی چیخوب بیربیرینه قاش گوز آتور اولدوزلار
من قرانلوقدا ؛ ایشیقدور فلکون رخساری
یاتمیوبدور سنه خاطر ملشور آهولر
طعن ایدولر بیلورم حرمله ی خونخواری
بیلمورم بولگی بولندن نه شکایت ایلیوم
سنه یاتماق یتیشوبدور آنووا بیداری
ایش بله دوشدی سنون ذره گناهون یوخدی
هم منیم سینمی ترک ایلدون هم گهواری
ولی من خیمه ده کیچمیش گجه لر مثلینده
اویاقام هی سنه لایلای دیورم تکراری
او دونن کی گجمیدی منی قویدون یوخوسوز
قوش کیمی چیرپینوب ایتدون قفسونده زاری
کاش اولیدی بو گجمده او دونن کی گجه تک
جان دیوب تشنه دوداقوندن ئوپیدیم باری
نه سسون وار نه سیزیلتون نه ئوزون وارسان اوغول
دلیمون طاقتی یوخ آختارورام دلداری
اوجادان آغلامورام عمون اویاقدور بیرده
سس اوجالسا اویادار هوش آپارا قیزلاری
قولونی بالش ایدوب نازلی رقیمده یاتوب
یورقون آهولره واردور باجوون اوخشاری
یثربه ساخلامیشام اوخشاماقی آغلاماقی
آغلیوب آغلادارام اوردا در و دیواری
مرحوم انور اردبیلی
منبع مجموعه کانالهای مدح و مرثیه
موضوع: حضرت رباب (س) ,
زبان شعر و شاعر: نوحه ترکی , انور اردبیلی
----
احوالات حضرت ابوالفضل (علیه السلام)
ساغر مرگی ایچوب تپراقا دوشدی بدنی
گورمیوب دیده دنیا بئله شمشیر زنی
فی المثل طیرا ً ابابیل پر آچموش علنی
اَبرهه قومینی سجّیله گرفتار ایلیور
گوردولر جنگیده ماهر دی او عالی هدفی
اختیار ایلدی ابطال عرب پشت صفی
بیلدی عبّاس علی تک باشا یوخدور طرفی
خیمیه باخدی صورا سسلدی شاه نجفی
کارزار اهلینی اوغلون نجه گور زار ایلیور
هر نه عّاسی ده واردور باباجان سن دن دور
منده که صدق و صفا نام و نشان سن دن دور
بو قوی پنجه بو بازوی توان سن دن دور
رگ قلبیمده روقیمده کی قان سن دن دور
سن اوپن قولدی بوگون صفلری طومار ایلیور
بیر نبرد ایله دی میدانیده اول یکّه سوار
قلب لشکر ده یول آچدی قوشونا وئردی فشار
سوروشوب مارد بد خو نه قیامتدی بو نه وار
بیخبرسن دیدیلر جنگیدن ای فتنه شعار
مرتضانون اوجابوی اوغلیدی پیکار ایلیور
خیمه سین ترک ایله دی فوری او غول اموی
گورید میداندا علمدار سپاه علوی
قول اوزون پرچم اوجا قامت اوجا پنجه قوی
ماردون خیمه سینه فوری ائدور پیشروی
برق شمشیری آخور مارده اخطار ایلیور
عصبی ائتدی صدیف اوغلونی کابوس اجل
مرکبه وئردی جلو اولدی مهیّای جدل
فنّ رزمیله آتوب نیزه سین عبّاسیه اول
اوجالاندی او اوجا نیزه نی دوتدی اوجا ال
بونمایش دئدی مارد سنی بیدار ایلیور
منیم استاد نبردیم اسدالله علی
ایلیوبدور منه تعلیم رموز جدلی
ناقصون خچدی سنون رشته دعواده ولی
مردسن نیزه وی آل سن،دالی قیتر بو الی
اشقیا قدرت سرپنجه وی معیار ایلیور
نیزه سین آلماغا مارد چالشوب قدرتیله
زور بازوسی نی وئردی عصبانیّتیله
اولدی ناکام سنانه یاپشوب خفّتیله
نیزه سین آلدی علی اوغلی اونون همّتیله
منتطر دی هامی گورسونله نه رقتار ایلیور
ماردون مرکبینی پیله دی عبّاس شریف
عرصه رزمی ده سر در گم اولوب کهنه حریف
پنجه شیر ده روبه تک ئوزین گوردی ضعیف
دی آچوب عجزه ابوالفضلی ائدوبدی تعریف
منی عفو ایله بیوک عفو خطاکار ایلیور
ایسته دی مارده مرکب گتوره قوم ضلال
اسدالله بالاسی وئرمدی بو امره مجال
اونون ئوز نیزه سین عباس برازنده خصال
بوغازیندان ائله وردی کسیلوب راه مقال
گوردیلر ترک لاشه مردار ایلیور
جان وئرور مارد نامرد قشون وحشت ائدور
تّلون اوستونده حسین زینبیله صحبت ائدور
باجی قارداش او گوزل قارداشینا دقت ائدور
ارزش جنگینی زهراده گلوب قیمت ائدور
غبطه بومنطریه جعفر طیّار ایلیور
زینیدن اندی او پرورده سلطان نجف
ماردون کسدی باشین قهریله اول کان شرف
بیلدی زینب سوئونور آتدی اونی تلّه طرف
نیزه نی چالدی قوی پیکرینی قیلدی هدف
دئدیلر ایندی نه دور فکری نه پندار ایلیور
گوردولر قوش کیمی قالخیزدی نگون سار تنی
آتدی سعد اوغلونا ساری او کثافت بدنی
خوار ائدوبدور اونی بو جنگی نمایش علنی
علی اوغلی دئدی تپراقه سالور هر گئدنی
صحنه عرصه بدری بیزه تکرار ایلیور
بی توقّف چاپاراخ وئردی جلو مرکبینه
سعی ائدوب راه صفاده یتیشه مطلبینه
آلدی دریانی سودان ورمادی امّا لبینه
قویدی قیمت ئوزی ئوز عشقینه ئوز منصبینه
عشقه باخ ایچمگه سو ناز او سردار ایلیور
نهریدن چخدی اورکده غمی یوخ مشگ دولی
علمی الده قلج الده سلامتدی قولی
باخدی اطرافه ورانداز ایله دی صاق و صولی
انتخاب ایله دی مقصودینه نزدیک یولی
دل تمنّای حرم خانه دلدار ایلیور
قویسا اهریمن اگر درک سلیمان ائدرم
سو آغیر قیمتن اولوب قیمتین ارزان ائدرم
غشّ ائدن قیزلارا مشگین سویون احسان ائدرم
صود امر اصغزیمون دردرینه درمان ائدرم
تشنه لر غصّه سینی تشنه علمدار ایلیور
حمله ور اولدی او سایسیز نفره فرد رشیبد
دفتر رزم و شهامتده آچوب فصل جدید
ما و من اهلینی شمشیر ائدوبدور تهدید
کوفیه ساری فرار ایله دی افراد پلید
الحذر الحذر اول فرقه کفّار ایلیور
تیز حملیدی ئوزی مرکب رهواری برو
گه وئروبدور آتا مهمیز گهی وئردی جلو
ایلدیریم تک قشونون خرمنینه توکدی الو
باشلاری داس اجل تک قلجی ائتدی درو
روبرو هر کیم اولور فوری نگونسار ایلیور
الحق الحق نه گوزل خدمت ائدوب قارداشینا
فرصت جنگی فلکی حیف اولا وئردی قوشینا
آغلا آغلا آناسی مشتری دور گوزیاشنا
یازمازیدوم نه بلا گلدی او السیز باشینا
حضرت صادقون امری منی ناچار ایلیور
بشرون الدی خطر وقتی نگهبان گوزونه
الّلری اولسا مواظب اولار انسان گوزونه
السیزه چاره نه دور اوخ کچه پرّان گوزونه
یاریلا باش یاراسیندان توکوله قان گوزونه
سیلمه سه گوزلرینی باخماقی دشوار ایلیور
لخته قانیله دولان گوز گورر آیا هارانی
گوز دوتولموشدی قبول ایلدی هر بیریارانی
نه گلن نیزه اوخی گوردی نه یاره ورانی
نه یانندان گچنی گوردی نه یولدا دورانی
دونور هر سمته هدف سینه سین اوخلار ایلیور
باغلیوب امّ بنینون یرینه قان گوزونی
ایتیروبدور یولی میداندا ایتیرمور ئوزونی
گلدی بیر ظالم اونون تار ایلدی گوندوزونی
دئمرم آهن عمودیله آچیق باش سوزونی
صبر و طاقت او غمه هانسی عزادار ایلیور
بیلمورم اولدی نه رفتار او قوی پیکریله
اوجاقامت اوجا یردن یخلیوب لنگریله
باشینون اوسته گلوبدور آناسی حیدریله
فاطمه سیلدی گهی گوزلرینی معجریله
گه سیو تکلیفی اونا حیدر کرّار ایلیور
سسلنوب معرکه دن گل منی ائت شاهیم
شاهسن سن منه شاهد بیر اولان اللهیم
قوتاروب الده کی سرمایم اوجالمش آهیم
سر خونین تن خونین دی قالان تنخواهیم
اوندا مقدمووه نوکرون ایثار ایلیور
گرد راه قدمون فخریدی ایجاد ائوینه
شاه عادل سن آقا عدل ائوینه داد ائوینه
آغلاما لطف ائله گل قارداشوون شاد ائوینه
سنی دعوت ائدورم عشقیمون آباد ائوینه
ائوی آباد اولا عشقون یوخ ائوی وار ایلیور
(انورم) نوحه ده صرف ایلمیشم همّتیمی
آرتیروبدور آقامون لطفی منیم شهرتیمی
نیّتیم قلبیده خدمتدی بیلور نیّتیمی
وار امیدیم وئره موعود جزا خلعتیمی
موری تشویق سلیمان کرم دار ایلیور
مرحوم انور اردبیلی
منبع مجموعه کانالهای مدح و مرثیه
موضوع: حضرت ابوالفضل العباس (ع) احوالات ,
زبان شعر و شاعر: نوحه ترکی , انور اردبیلی
----
زبانحال حضرت لیلا (سلام الله)
آنالار ایچره اوغول رسمیدی وار بو جریان
ایکی یول هر آنا ئوز اوغلونی اوخشار اوجادان
بیری داماد اولان وقتیده هر تازه جوان
باجیسی عمه سی ترتیبه سالالار طویونی
ایله کی یاخدی حناسین آنا اوخشار بویونی
بیرده ئولسه آنانون تازه جوان اوغلی اگر
خویش و اقوامی گلوب شمعلرین قاره بزر
ایله کی غسلی تمام اولدی کفن ایلدیلر
باغلیاندا کفنین حاضر ائده لر آناسین
هامی اوخشار آنا آخرده دییر اوخشاماسین
او که طوی صحنه سیدور گورمدون ای ماه لقا
نه گیوب جامه شادی نه اله یاخدون حنا
آنالار تک بویووی اوخشامادیم منده بالا
ماتمونده وورولار قمچی بو یورقون نفسه
قورخورام باشووی منقذ دیزیمون اوسته کسه
مرحوم انور اردبیلی
منبع مجموعه کانالهای مدح و مرثیه
موضوع: حضرت لیلا (س) ,
زبان شعر و شاعر: نوحه ترکی , انور اردبیلی
----
احوالات مجلس یزید
آفاق اولوبدی مهد فتن یابن العسکری
دین چهره سین دوتوبدی محن یابن العسکری
غول ضلالت ایلیوب انسانلاری اسیر
فسق و فساد اولوبدی عَلَن یابن العسکری
دینون نظامی آز قالوری نظمیدن دوشه
آگاهسن عوالمه سن یابن العسکری
محجوبه لر چخوبدی حریم حجابدن
یوخ سلطۀ حجابه چکن یابن العسکری
گوینده لر نظرده دوتور ئوز مریدینی
آزدور رضای حقّی دیَن یابن العسکری
طفلان عصر فلسفه دن صحبت ایلیور
خاموش اولوبدی پیر سخن یابن العسکری
یا للعجب سالوب سنی تأخیره روزگار
تنگه دوشوبدی اهل زمن یابن العسکری
ای عدل مشتهر گلوب آچ عدل مکتبین
سنسن جهاندا عدل ائلیین یابن العسکری
تکبیروون سسی اوجالا کاش مکّه دن
چوخدور وصالوه تَلسن یابن العسکری
ای رازدار معنی قرآن هایانداسان
بلموک سنه هایاندی وطن یابن العسکری
گل انتقام پرچمین آچ یرده قالماسون
خون حسین و خون حسن یابن العسکری
طعنه ورولا جدّوه ماتم دوتانلارا
طغیان ائدوب شماتت ائدن یابن العسکری
امّا بیز ئوز عقیده میزون پایبندیوک
چون عاشقوزدی روح و بدن یابن العسکری
وار عشقیمیز غمی چوخ اولان زینب عمّوه
سنده اونی چوخ ایستیوسن یابن العسکری
دژخیم ظلمی یخدی بی بون شهر شامیده
باشدا قرا قولوندا رَسَن یابن العسکری
بزم یزیده چکدی سوزی مطلع کلام
سندن توجه ایستورم ای منتقم امام
ائتدی جلوس کرسی گوهر نشانیده
نخوت بروز ائدوبدی او فرعون ثانیده
تالاره سالدی گوشۀ چشمیله بیر نگاه
گوردی ئوزون اریکۀ زور و توانیده
دولموشدی باده نون اثری مغز و جسمینه
گرمیتی واریدی رگ و استخوانیده
میخواریدن حیانی آلوب مِی جسور ائدر
امّ الفسادون اهلی فساد ایلر آنیده
درک ائتدی مجلسینده اونا یوخدی بیر حریف
فکر ایلدی مقام ائلیوب کهکشانیده
فکر ائتدی جنگ بدرون آلوب انتقامینی
فکر ائتدی کامیاب اولوبدور زمانیده
اوّل تبسّم ائتدی صورا چالدی قهقهه
شاد اولمیوم دئدی نیه من زندگانیده
بیر مدّعی حسینیدی جاه و جلالیمه
مغلوب ائدوب مرادیمه یتدوم جهانیده
لایق بولوردی مندن همیشه ئوزون حسین
تقوا دیوردی یوخدی سیزون خاندانیده
ویردوم مقام وعده سی منله کِچنمدی
اقبالیمه حسد ائلدی هر مکانیده
دوشدی هوای سلطنته گلدی کوفیه
ملک وطنده قالمادی امن و امانیده
کرب و بلاده ایلدی بختیم کمک منه
غرق اولدی آز سپاهی ئوزی لخته قانیده
خاکستر ائتمیشم حَشَم و خیمه گاهینی
اهلین مقیّد ایلمیشم ریسمانیده
طشت طلاده تختیمون اوسته کسیک باشی
کیم من کیمی موفّق اولوب آرمانیده
بیر آرزو واریم اونادا ایلرم عمل
همّت اگر تاپولسا بو گون خیزرانیده
ای خیزران نه خوشدی حسینون دوداقلاری
اشن ظشتده قوجاقلا سئوندور قوناقلاری
آخر یزید عمل ائلدی مدّعاسینه
دستینده چوبدست اوجالوب مِی هواسینه
طشته دینمورم نچه یول اَندی خیزران
قان قطره سی اوجالدی او طشتون فضاسینه
راهب یووان دوداقدان آخوب قطره قطره قان
زینت وئروبدی صورت قرآن نماسینه
فکر ایلمه دوداقلارینا دگدی ضربه تک
پرده چکم محال یزیدون جفاسینه
گه لبلره گهی گوزونه دگدی خیزران
گاهی توخاندی دیشلرینه گه محاسنه
پوزدی او منظره اُسرانون ردیفینی
یوز وئردی غفلتاً هیجان آل یاسینه
هر کس ائله دایاندیقی یرده سیزیلدادی
جان سَسلنوب سرشکینی توکدی لقاسینه
امّا رباب یومدی گوزون طشته باخمادی
باخسیدی دوزمزیدی او باشون بلاسینه
قزلار گهی کسوک باشا گه باخدی زینبه
باخماق اشاره ئیدی یزیدون اداسینه
دیل یوخدی بیزده سن نیه دیلنموسن بی بی
دیلَّن دیلون فداسی دانش حق رضاسینه
قویسون یره یزیده بویور خیزراننی
محکم جواب ویر دئدیگی افتراسینه
یا وئر اجازه تخته طرف حمله ایلیک
لرزه سالاق بو قصر جفانون بناسینه
زهرا قیزی گوروب اسرانی سراسمه
حتّی باخور رقیّه ده تزتز آتاسینه
تَرپنمیون هامی بیر ایپه باغلانوب دئدی
سجّاد باغلانوب باشا من انتهاسینه
ساکت دایانماسوز خفه لر ایپ کیجیک لری
صبر ایلیون یزید چاتار اوز جفاسینه
قیلدی بیان یزیده او گنجینۀ وقار
ای حاکم سیه دل و جبّار روزگار
چکدون بیزی ستمله بو بزم عداوته
ئوز زوروی نشان وئروسن بو جماعته
بازیچۀ زمانه دی تختون ریاستون
مغرورسن نیه متزلزل ریاسته
یتمز باشا بو سلطنتون بی دوامدور
چون متکی دی پایه سی ظلم و جنایته
بیز بزم مِی ده اهل و عیالون حریمده
کیم درج ائدوب بو حکمی کتاب عدالته
فکر ائلمه حسینیم اولوب فاتح اولموسان
بو فتح لر سنی یتورنمز سعادته
یِلّتمه چوخ دماغوی اویناتما چگنوی
یاوه سَرالوق ائتمه دیل آچما شماتته
معصومدور حسین ، ائلمه متّهم یزید
سن کفره مشتری سن حسینیم دیانته
سن مجلس خماریله مستون عزیزی سن
امّا حسین عزیزیدی بزم شهادته
سن زندگینی مرز جنایتده تاپموسان
لیکن حسین امیندی مرز امانته
جدّیم نه سوز دئمیشدی حسین ده اونی دئدی
سن ملّتی حریص ائلدون قتل و غارته
یر گوی نوا ائدور یره گوی خیزرانوی
قوی طشت زرده گئتسون حسین استراحته
قرآنه آشنا دوداقین توکمه قاننی
تاب ایلمز جراحتون اوستن جراحته
حقّه ثنا او لبلر ائدوب اَللّی یِدّی ایل
دائم علاقه سی چوخودی ذکر و طاعته
حتّی باشندا وئردی نماز اوسته قاتله
مشغولیدی باشی کسیلنده عبادته
قرآن اوخوردی طشتده افسوس قویمادون
قرآنه ضِدّ اولان بلی دوزمز تلاوته
موسای کربلادی چخوب گشته قارداشیم
یحیای عصردور سخلوب طشته قارداشیم
تقدیس ائدوبدی زینب حسینون قیامینی
تشریح ائدوردی خلقه مراد و مرامینی
گوردی حسین آچوبدی گوزون طشتدن باخور
قیلدی عوض او بزمده طرز کلامینی
ای مکّه و منا و صفا عزّتی حسین
وی ساخلیان حریم خدا احترامینی
ای جدّیم احمدون آنامون نور دیده سی
وی فرشیدن باخاندا گورن عرش بامینی
من عاشقم سنه آنام اوغلی ئوز عشقیمون
آهیمدی پشتوانه سی زلفیمدی ضامنی
چاتمور اَلیم دوداقلاروون قاننی سیلم
عطرون معطّر ایلیه زینب مشامینی
محملده یوخدی کوفه کیمی باشیمی یارام
شام اهلینه بُلندیرم عشقون مقامینی
قانه بویاندیرام بو پریشان هوروکلری
برهم ائدم بو مجلس ظلمون نظامینی
واردور باشمدا کی بو قرا معجرون گوجی
قانلی دوداقوون آلاجاق انتقامینی
مین نوعی اود منی بوریوب هانسینا یانوم
هانسی اودون حسین گتوروم من دوامینی
سجّادوی یزید ایاق اوسته ساخلیوب
چوخ محترم دوتوب ولی زنگی غلامینی
ساقیلری صدا ائلیور القدح دیور
نرد اوینیور چکور باشا مشروب جامینی
بو صحنه چوخ چتیندی منه قتلگاهیدن
مِی مجلسنده کیم گوروب عصرون امامینی
یا للعجب بو گون اوزانوب گونده باتمیور
قورمور گیجه نه علته ظلمت خیامینی
یورقونلارون گیجه گوره سن هاردادور یری
طبخ ایلیوبدی کیم اسرانون طعامینی
قول باغلیلار هاچان اولور آزاد بندیدن
آهولرون هاچان چخاجاقدور کمندیدن
گویا جواب گلدی او رأس خبیریدن
زینب شکایت ایلمه فاسق امیردن
یخدون یزیدی سن آیلاندان صورا بولر
آلدون خوش انتقام او مرد شریردن
محکم سوزون توخاندی اونا محکم اوخ کیمی
محکم سوزون اذیّتی آرتوقدی تیردن
سن شیر لم یزل قیزیسان شیر سن باجی
روباهلر شکست تاپار عالمده شیردن
نطقون چوخ آتشینیدی یاندیردی دشمنی
چون سوزلرون چخوردی یانقلی ضمیردن
تاریخده گورن دیه جک گورمینلره
باخ بیر سوزه قالوب قولی باغلی اسیردن
یاخشی دئدون اونا دگولوک خارجی یزید
پرده عجب گوتوردون او راز کبیردن
آز بیر زماندا دور زمان پیر ائدوب سنی
نیلک گلایه ایلمه دنیای پیردن
ویرانه ده باجی گیجه الله قوناقی سوز
یوخدور اثر او یرده لحاف و حریردن
بیر خشت پاره دور او اوین ناز بالشی
بی سقف اطاقدور دوشنوبدور حصیردن
یورقوندی قزلاریم بو گیجه ایستمز طعام
یورقون همیشه تئز یاتار عالمده سیردن
توردان چخوب تورا دوشه جکر عندلیب لر
غم اَل چکن دگول بو بیر عدّه صغیردن
خوشدور رقیّمه سینوی بستر ایلسون
حق دستگیریدی ئوزی هر دستگیریدن
آخر وداعیده دئمیشم ایندیده دیم
ایله مواظبت او شیرین دیل سفیردن
«انور» سنه همیشه حسین ایلیوب کرم
شاهلار محال لطفونی کسسون فقیردن
مرحوم انور اردبیلی
منبع مجموعه کانالهای مدح و مرثیه
موضوع: احوالات مجلس یزید ,
زبان شعر و شاعر: نوحه ترکی , انور اردبیلی
----
احوالات رأس مطهر حضرت قاسم (ع)
گلون اشکیله یازاق یوزده رموزِ محنی
باشلیاق قاسمون آدیله بو گون سر سخنی
مجلسه دعوت ائد‌ک شخصاً امامِ حسنی
ساخلاسین مدِ نظرده هر اورک داغلیانی
واردی گورسون نقدر قاسمینون آغلیانی
گرم ائدوب قاسمون عشقی بیزی باشدان ایاقا
الیمیز یتمیور افسوس او حنالی اطاقا
حجله گاهینده اراده ایلیک آغلاماقا
بو یری خیمۀ شاهِ شُهدا فرض ائده روک
قاره کوینکله مبارکدی طویون عرض ائده روک
خوش سنون حالیوه ارشاد ائدنون اولدی امام
اون اوچ ایلده ائلدون دورۀ عرفانی تمام
هانی سندنصورا تاریخده بیر اهل قیام
طوی لباسون کفنه توی گونو تبدیل ائتدون
مرگی پیشواز ائلیوب جنگه زره سیز گئتدون
ای وفا مجلسینون شمعِ فروزان شِیَمی
یوسفه نسگل اولان طرّه‌سینون پیچ و خمی
اکبرین راهِ شهادتده اولان هم قد‌می
نامزد عشقینی بلمرّه یادیندان چخادان
مجلسِ وصلتینی آتلار ایاقیندا تاپان
صبریده قویدی زلیخانی عروسون حیران
نی ده سن گزدون او صحرانی گزوب سرگردان
نسگلوزله دولیدی سینۀ صندوق جهان
پشتِ پا وصله ووروب صبریله یومدوز گوزوزی
دللره سالدی زمانه نجه گور طوی سوزوزی
اهلِ اخبار مقاتلده یازوب بو خبری
مرغِ روحون ایشید‌ن وقته سینور بال و پری
یاندیران سوزدی سالور رقّته قلبِ بشری
شام ویرانه اولان گونده ورود اُسرا
یوز وئروب قاسمِ شهزاد‌یه بیر آیری بلا
خطِ سیرِ اُسرا دولموشیدی ملَّتیله
هرزه عورتلریله مردُمِ کم همّتیله
جشنه مشغولیدی شهر اهلی نه کیفیتیله
گه باخوردیلا یولون صاقینه گاهی صولونا
گوزلری منتظریدی اُسرانون یولونا
ناگهان شهره ورود ایلدی بیر تیپ سوار
اُمرا اوّلِ صفده گورونوب مست و خمار
ائتدی تشویق او سرکرده‌لری فرقۀ نار
مرحبا صوتی بلند اولدی گوگه هر یاندان
مرکب اوسته سئونوب فخر ائلدی شمر و سنان
ازرقون زوجه‌سی بیر غرفه ده ائتمیشدی مقام
اُمرانین صفینه باخدی او ناپاک حرام
گورمدی همسرِ خونخوارینی تئز ائتدی قیام
اولدی آگاه او ملعونه طریقت خطره
غرفه‌نین پلّه‌لرین سرعتیله اندی یره
ئوزونی شمرِ دغایه یتوروب آلدی خبر
هانی ازرق هانی اوغلانلاریم ای منبعِ شر
گورمور‌م هئچ بیرینی ایلیر‌م اطرافه نظر
ئوزلرین شامه اولار فکر ائلیوردوم یتورر
سن کیمی هر بیریسی نیزه ده بیر باش گتورر
دئدی غفلتده سن عورت خبرون یوخدی مگر
دورد جوان اوغلوولان ازرقی ای خاک بسر
بیر اون اوچ سنّیده اوغلان ولی مردانه سیر
رمۀ روبهه حمله ائله بیل شیر ائلدی
بیربه‌بیر یخدی یئره طعمۀ شمشیر ائلدی
دئدی عورت ئوزی بس نولدی اونون سویله منه
نیلدوز سیز منیم اوغلانلاریمی ئولدور‌نه
دئدی آهو کیمی یخدوق اونی دشت و دمنه
نگران اولما او قدری اونا دگمیشدی یارا
عموسی ایلیه بیلموردی خیامه آپارا
دئدی گوستر یارالی باشینی ای هرزه روان
قاسمون باشین اونا شمرِ لعین وئردی نشان
ئولدوروبدور دئدی اوغلانلاروی باخ بو جوان
یاره‌لی باشه او ملعونه نظر ائتدی بیر آز
انتقام آلماسام الان دئدی قلبیم سوئوماز
قیدوب منزلینه قیزلارینا قیلدی خطاب
بی‌خبرسوز بیزی بو جنگ ایلیوب خانه خراب
انتقامه اولون آماده دگل موقعِ خواب
یوزه گورمورسوز آنوز اشکینی حسرتله الور
آتا قارداشلاروزی ئولدوره نون باشی گلور
دولدورون دامنوزی سنگِ عداو‌تله هاموز
پیشوازینه گئدین قصد اهانتله هاموز
نیزه نی دوره‌لیون فکرِ خیانتله هاموز
سنگ باران ایلیون باشینی مقصوده چاتون
هر داشیکه آتوسوز سعی ایلیون محکم آتون
یاندیرین ظلمون اودیلا اُسرانین جگرین
سندیرون غصّه‌لی بلبللرینون بال و پرین
غرقِ اندوه ایلیون خانه بدوش عمّه‌لرین
یاره‌لنمیش باشینون نیزه‌ده آرتسون یاراسی
مله‌سون ناقه نون اوستونده پریشان آناسی
یتورم بو سوزی یارب نجه پردیله باشا
بیلمیر‌م ائتدیله حمله نئچه یاندان او باشا
گوزینی یومدی سریه باخا بیلموردی داشا
کیم دوز‌ر ایستدیگین گوز قاباقندا ورالار
بالا باشین آنانین اوز قاباقندا ورالار
اُسرا بیربیره دگدی ائله سخت اولدی محن
سسلنوب زینبِ کبراده باجون ئولسون حسن
نه اولار قاسموی گورمگه شامه گله‌سن
یوخدی امداده گلن فکریمیزه سن قالاسان
اوغلوی بو داش آتانلارون الیندن آلاسان
داش آتان شخصلرون درک ائلیوبدور عملین
بویننی چگنینه حسرتله قویوب تازه گلین
قاره بختیم دئدی من بیربیرینه وردی الین
دشمنون ائتدی فلک گور نجه قوّتلی قولون
هر طر‌فد‌ن یوزومه باغلادیلار چاره یولون
رشتۀ عشقی عم اوغلی ائله فکر ائتمه قرام
باشووی داشلیالار ساکت و آرام اوتورام
توپراغا چاتمور الیم باشیمه توپراق سوورام
یانورام اودلانورام باشوه ائتدوگجه نظر
پر شکسته قوشا تشبیهم الیمد‌ن نه گلر
دوزمیشم شامه کیمی هر محنه دینمه میشم
زجر چوخ قمچی وروب یولدا منه دینمه میشم
غرفه‌لرد‌ن باشیما کول توکنه دینمه میشم
چوخدی دردیم نه روا آیری ستم باشلیالار
من باخیم نیزه نین اوستونده سنی داشلیالار
یوسفیم غملی زلیخایه نشان وئر ئوزوی
گوزومه تیره‌دی دنیا نه یوموبسان گوزوی
شامین اهلی ائشیدوب اولما سنون طوی سوزوی
اودور ایستولَّه تسلّی اولا غم یولداشوا
داش آتوللار سنه یا نُقل سپوللر باشوا
کول ائدوب حجله‌میزی آتشیله اهلِ قتال
نه دانشدوم سنیله اولدی نه گفتاره مجال
نه گلین‌لر کیمی سالدیم باشما قرمزی شال
طوی گونی تللریمی شانۀِ محنت دارادی
دئمورم چوخ سوزی الاندا قولاقیم یارادی
گوردوک اشعاریده اولکی طویون زینتنی
سفره عقدینی مهمانلارینی نعمتنی
عشرت و عیشینی ساقی لرینی شربتنی
سوزی سوزدن اوکه عاریفدی گرک فوری سچه
ایکیمینجی طویون اهلی سو تاپانموردی ایچه
قوشلار اولکی طویون اولدی غزل پردازی
اوج ایدوبدور گوگه هر تک تکنون آوازی
نغمه خوان اولدولا گه ایلدیلر گه بازی
ایکیمینجی طویون آهنگ عزاسی واریدی
نغمه خوانی ایلینلر آتاسیز قزلاریدی
قلبدن شادیدی اولکی طویون حضاری
یوخیدی قاره گین اگننه آری آری
هر کنیزین واریدی معجر زرین تاری
ایکیمینجی طویون حضاری جگر قانیدی
تللری زلف بنفشه کیمی افشانیدی
جلوه ویرمیشدی اولکی طویا داماد و عروس
گینوب ایتمیشدی هر بیری بیر تخته جلوس
ایکی جان اولموشیدی بیر بیره گویا ماءنوس
میل ایدوب نقل و نباتین هامی شیرین لبیدی
بو طویون سفرهء عقدین دوشین زینبیدی
او طویون فر و شکوهنده نظیری یوخیدی
صیغه الفت پیوندنی آصف اوخودی
بو طویون لذتی یوخ نسکلی اما چوخودی
صیغه جاری ایده نون چاره یولی باغلیدی
نوجوان اکبری اولمشدی اورک داغیلدی
او طویون اولدی سلیمان نبی دامادی
بزه نوب اولمادی طوی حجله سنون ایرادی
نو عروسنده خانم بلقیسدی آدی
کد خداسی بو طویون قاسم اون اوچ یاشدیدی
گلینی فاطمه قارداش قره سی باشدیدی
چهره بشاشیدی اول طویدا عروس و داماد
عکسنه دونمشیدی لیک بو طویدا هرزاد
هم گلین تشنه جگر هم تزه داماد ایداد
اوجالوب آهی لری سینه لرین داغلیدی
هی باخوب بیر بیرینه هر ایکسی آغلیدی
مختصر کچدی اولان اولدی سوزین ماحصلی
قاسمون پرپر اولوب جسمی شقایق مثلی
قان حناسیله خضاب اولدی او صحراده الی
قالدی آتلار ایاقیندا حسنون گل بالاسی
آلدی دامادینی آغوشه اوز قیناتاسی
حمل ایدوب خیمه سرایه او داغلمش بدنی
قانان الوانیدی نازک عربی پیرهنی
قرمزی پرده ده پنهانیدی وجه الحسنی
تازه دامادیدی چون ختم رسولون ایلنه
ایستی یل دگدوگجه شانه وروردی تلنه
یری وار حضرت زهرا آچا بو نوحه ده باش
در اشکین ایلیه قاسمنه نقل شاباش
داش اورکلر اقدر جسمینه ویرمشدیلا داش
نقشه پیکری گتمشدی بکلی آرادان
قرمزی نقل کیمی قان توکلیدی یارادان
دوءلی ات کیمی اولموشیدی جگربند حسن
سورونوردی ایاقی یردن اوزانمشدی بدن
قدم آتدوقجا حسین دلدن ایدوردی شیون
تازه دامادینون اوخشوردی اوزی یولدا بویون
نه گوزل پیرهنون واردی مبارکدی طویون
حقی واردی عمووین ناله سی نی تک اوجالا
محنتون داغ چکلن قلبمون آرامین آلا
گوزل اکبر کیمی یومدون گوزوی سنده بالا
نه اونون نسکلی گلمز سانا اوغلوم نه سنون
هم حسینون چراغی کچدی بوگون هم حسنون
یتوروب خیمیه جانسز جسدی قویدی یره
عرضمه دقت ایله منظره نی آل نظره
طوی گونی قاره گینلر یغشوب دور و بره
گوردیلر قان بورین قاره گوزین قاره قاین
آناسنداندا قاباق عمه لری آچدی باشین
آناسی گلدی گوروب لاله پرپر مثلین
اورگی اوستونه قویدی بالانون قانلی الین
دیدی داماد گلوب هاردادی بس تازه گلین
قسمتی اولمادی افسوس دیون ماه عسلی
سنی اکبر جانی یورقوندی عم اوغلون تزگل
فاطمه حجله ده جریانه خبر دار اولدی
دیدی بختیم کیمی روشن گونوزوم تار اولدی
گتدی یاریم بلورم غصه منه یار اولدی
دور ایدوب ماه کیمی غصه لی اولدوزلار اونی
اوزی گلموردی گله گتدی سوسوز قزلار اونی
قاسمه ایتدی نظاره اولوب آشفته گوگل
شکوه ایتسم ددی هر چند برازنده دگل
نو عروسه تازه داماد ویرور قرمزی گل
وای منه توکدی فلک باشمه غم وغصه کولون
اللرون بوشدی عم اوغلی هانی بس دسته گولون
مرحوم انور اردبیلی
منبع مجموعه کانالهای مدح و مرثیه
موضوع: حضرت قاسم ابن حسن (ع) ,
زبان شعر و شاعر: نوحه ترکی , انور اردبیلی
----
شام غریبان حضرت امام حسین (ع)
ای نصفی یانان خیمه عجب پر محن اولدون
بو غملی گیجه زینبه بیت الحزن اولدون
غم دوده سینه ظلمیله گوندوز بویانوبسان
قیزلار یانان اوتدا بیلورم سنده یانیبسان
تغییر ویروب رنگوه توستی قرالیبسان
یا قاره گییوب رنگووی بو رنگه سالیبسان
سن خیمه شه سن نیه بو حاله قالوبسان
یانمیش اتگون یوخدی بو محنت چاقی فرشون
آی نوری چراغوندی یرون تپراقی فرشون
برنامه سین اجرا ایلدی لشگر جانی
سالدی بو حالا کوفه نون اهلی اسرانی
باخدوقجا سنه قلبوون آرتور هیجانی
گوندوز کی کشاکش دایانور گون قاباقیندا
قلبیمی دوتوللار ایله بیل کوز قاباقیندا
صحن غمه بو وضعله محنتلی نماسن
غم مرکزی صورتده ولی خیمه سراسن
دلدن دوشن آهولره یا دام بلاسن
یا بلبل شوریدلره غملی قفس سن
سعد اوغلی سنی هر گجه ویرسه بیزه بس سن
کچمیش گجه سنده واریدی جاه و جلالت
دوتموشدی سنی پرتو انوار سعادت
قالخاردی گوگه زمزمه ذکر و عبادت
یاران حسین طیب و النفاسه نه گلدی
قران اوخیان اکبر و عباسه نه گلدی
اولدون بو گجه سن آتاسیز قیزلارا مإوا
آغوشوه نالان سیخیلوب عترت طاها
بیر گوشه ده کلثومیدی بیر گوشه ده لیلا
دل زورقینی بحر غمه غرق ایلیبسن
گور بیر گون ایچینده نقدر فرق ایلیبسن
صبحه کیمی باجادی اگر گوز یاشی آخسا
طوفان بلا قببه وه غم گردینی یاخسا
پروا ایدر هرکیمسه یوخوندان سنه باخسا
چوخ قورخولی بیر منظره وار بو گجه سنده
بو قورخولی قیزلار یاتاجاقدی نجه سنده
قیزلار متحییردی سالوب قورخی کمنده
گوزلر باخور هرچند رمق یوخدی بدنده
اوستوندن اگر سرعتیلن کچسه پرنده
بو نظم و سکوتی بیلورم سیندیراجاقدور
هولیله یاتان اولسادا یردن دوراجاقدور
واضحدی دگول قلبلر عادی ضرباندا
بیر حالدا بولار قاچدی چوله خیمه یاناندا
زینب چوخونی بیلمدی گیزلندی هایاندا
وحشت اوخی هر قلبه دیوب قهریله بولدی
چوللرده ایکی خیردا بالام قورخودان اولدی
بیلسم اسرا اتمییه جک بو گجه پروا
الان گیدرم مقتله بو لیل محابا
قارداشیمی گوررم ایدرم کشف قضایا
اوضاعی گزارش او شهه ویرممیشم من
نعشی سویولاندان صورا هچ گورممیشم من
خلوتدی داخی راه جفاده دوران اولماز
قلبیمی بو وقته بیلورم سیندیران اولماز
گوندوز ویران اولدی گجه اما ویران اولماز
بختیم منه یار اولسا حسینی گوروب ئوللم
قالسام دیری یا صبح آچیلاندان صورا گللم
زینب بو خیالاتیله سرگرمیدی گویا
معناده اگر وار یری گلسه دیله زهرا
بو دللریله سوز دیسه صدیقه کبری
زینب آنوون اولگیلان حالی هدفیندن
باشون صاق اولا اول حسینون طرفیندن
گوندوز سنی یوردی بالا طوفان مصیبت
شاهددی آنون قددویی اگدی غم ومحنت
دردیم سنه باخدوقجا منیم ایلدی شدت
ظلمیله سولان صحنه گلشنده واریدیم
هریرده قیزیم سن واریدون منده واریدیم
هر خدمت شایانوه حسن نظریم وار
مقتلده حسیندن سنه تازه خبریم وار
تازه خبریمده ولی رمز خطریم وار
دیدارینه گیتسون دیمورم حنجرین اوپمه
پردیله دییم قارداشوین اللرین اوپمه
فکریم قالوب اوچ یرده قزیم اولی گودال
دوم بو یانان خیمه سرا منزل اطفال
اوچ مینجی سین اما دئمورم بسدی بو منوال
آهیله آنون آغلاداجاق داغداشی اوردا
مهماندی جلالیله حسینون باشی اوردا
درد و غمیلن جام دلیم اولدی لبالب
سن ساخلا بو دلدن دوشن اطفالی مرتب
منده گیدورم اوغلوما خوش گلدینه زینب
گورسون که عدو کوفه ده مقصوده چاتوبدی
حتما بیلجکسن که حسین هاردا یاتوبدی
مرحوم انور اردبیلی
منبع مجموعه کانالهای مدح و مرثیه
موضوع: حضرت امام حسین (ع) شام غریبان ,
زبان شعر و شاعر: نوحه ترکی , انور اردبیلی
----
احوالات حضرت امام حسین (علیه السلام)
مست جام ازلم بسکه دولوب مغزیمه شور
ایستورم بزم تقربده تاپام فیض حضور
خوشدی بو غملی بشیکده منه گهواره گور
ایستورم شهپر آچام شاخه طوبایه گیدم
یوموب آغلار گوزیمی سینه زهرایه گیدم
کوفه اهلینده لیاقت هانی ویرسون سنه سس
گُله دشمندی همیشه بولوسن خاریله خس
گنه اوز خیمه وه گل ای شه پاکیزه نفس
جستجو ایتسن اگر بی نظر عاشق تاپولار
نوجوان اولماسا دا سود امر عاشق تاپولار
دورما بازار محبتده پریشان الی بوش
اولانا ایله قناعت ایله سن حالوی خوش
آنامی غمزده لیلایه منی اکبره قوش
باخدیقیجا یوزومه عمه لریم وای دیمسون
آغلیا آغلیا قیزلار منه لایلای دیمسون
شیر همت منه مدت دی ویروب سودسوز آنام
مرتضی نسبتم ای سید والای اَنام
قورخوران زنده قالام عمه لریمدن اوتانام
پیر کامل ایله عشقونله بو دلسیز بالانی
غمی یوخ تحفه کیچیک اولسا بویوک دور آلانی
یورولوب ناله سسیمده بو گونی قاره آنام
دردیمه چاره تاپانمور قالوب آواره آنام
من اولاندان ایله زحمتده دی بیچاره آنام
گوندوزی جان دیَنیمدور گیجه لایلای دیَنیم
آلتی آی دی بابا یوللاردا اسیریمدی منیم
بسلیوب حرمله نی کوفه ده دنیای دنی
گوجلیدور پنجه و بازوسی , قوی دور بدنی
بسکه ماهر اوخ آتاندور ویراجاق فوری منی
دوزرم تیر جفایه دوزوموم چوخدی بابا
بوغازیمدان صورا آیری سپریم یوخدی بابا
ایله که نیته چاتدیردی فلک حرمله نی
اوز الونله اوخی چک راحت ایله سنده منی
الوین اوستن آلان اولماسا اوخلی بدنی
یوزوه قویما آخا گوزلروین اشک تری
گزمه میدانیده مایوس چاغور شیعه لری
مرحوم انور اردبیلی
منبع مجموعه کانالهای مدح و مرثیه
موضوع: حضرت امام حسین (ع) احوالات ,
زبان شعر و شاعر: نوحه ترکی , انور اردبیلی
----
احوالات یعقوب کندی
شاه اقلیم وفا عاشق پرشور حسین
لَله سی روح الامین جاریه سی حور، حسین
جدّینون طاق جبینینده اولان نور حسین
سوزی ا... سوزیدور، دستی خدانون دستی
جرعه نوش ازلی جام الستون مستی
متن منشوری چراغ ره ابنای بشر
فوج کفر و ظُلمه نهضتی مبنای خطر
لحمی لحم نبوی، چهره سی سیمای ظفر
آستان شرف افزاسی اولان ایمن گاه
خامس اهل کسا مرتبه سی ثارا...
وسعت دایره ی معدلتی دامنه دار
پند پیرانه سی احراری ایدن مست و خمار
اهل عرفانه سوزی گوهر پر ارج و عیار
یتمیش عاشقله اولان کنگره ی کبراسی
لیلة القدره دونن لیله ی عاشوراسی
تیغ منطقله کَسن یاوه سرالر دهنین
خونی سرسبز ایلین دائمی دینین چمنین
باغبان تک بجرن لاله لرین یاسمنین
بزمیدن بزمه سوزی درد و بلاسی چکیلن
هر محرّمده سماواته قراسی چکیلن
مهر مکنونی دل مومنه پر شعله سراج
صله ی مرحمت و جودینه عالم محتاج
باشینون قانی یارالی باشنا قرمزی تاج
تالانان خانه سی، اهل حرمی خانه به دوش
عندلیبان پَر آشفته سی کاشانه به دوش
مُفتی کوفه شریحون قلمی ایتدی فساد
ابی عبدالَلهه قویدی او دنی خارجی آد
پخش ایدوب یازدیقی فتواسین اونون ابن زیاد
خانه به خانه ویروب مردمه جنگ اخطاری
یخدی زهرانون ایوین کوفه نین استانداری
اسلحه سازلری ویردی او ظالم پیغام
گرم اولون صنعتیزون اوسته ایدون سعی تمام
نیزه شمشیر دوزَلدون بیز اوچون صبحیله شام
مرکز صنعتینی باغلاسا هر اسلحه ساز
ایلسون گوشه ی زنداندا گرک سوز و گداز
کوفه نین اولدی جری ملّت پست افکاری
بی اراده بشرون مقصدی اولماز آری
دولدوروب اسلحه نون مشتریسی بازاری
تنگه بیربیرلرینی مردم نادان سالدی
ویردی موجود پولون اسلحه ی جنگ آلدی
هره بیر آلت ظلم و خطر آلدی اوزونه
بیری نیزه بیری امّا سپر آلدی اوزونه
اوچ عدد حرمله تیر سه پر آلدی اوزونه
اوخلارا سالدی نظر گَلدی او ظالم سخنه
هدفه دگسه بو اوخلار دیدی کافیدی منه
خطری چوخدی نشانه ایلسم من هایانی
داغ دیده ایده جاق هر بیر اوخوم بیر آنانی
هر قوی مرده توخونسا چخاجاق فوری جانی
پرلریندن هر اوخون فکر ایدورم قان سوزولر
شیرخواره اوشاقا دگسه بوغازی اوزولر
الغرض زاده ی مرجانه او خونخوار و لعین
گَلدی هر قدری قوشون اسلحه ایتدی تامین
کربلا دشتینه هر گون یولا سالدی نچه مین
بیر کس اولمادی دیسون بو سوزی اول فتنه گره
نه قدر گوندروسن قاتل او یتمیش نفره
بیر قبیله واریدی اهلی بصیر و هشیار
کوچری خیمه نشین کوفه دن البتّه کنار
اوردا بیر عورت دیندار و برازنده شعار
باشه یِتمیشدی بیاباندا گئجِیله گونوزی
مرتضی شیعه سی، چوخ یاخشی حسینچیدی اوزی
طائر روحی پریشانیدی افسرده خیال
شهر عشقه گیده بُلموردی او شایسته خصال
آرزومندیدی لطف ایلیه حیّ متعال
قلبیده سو سَپیله نایره ی حسرتینه
شهر یثربده حسینون یتیشه خدمتینه
هی دیوردی منه یارب سن اوزون ایله کرم
گوگلوم ایستور آقامی حال حیاتیمده گورم
گورمه میش صورتین انصاف دگول قبره گیدم
ا... ا... ایله زائل بو اورک درد و غمین
تیز نصیب ایله او سلطانین اُپوم من قدمین
کوفه اشراری یازوب نامه او مهر شرفه
حرکت ایلیوب حتماً گله جاق بو طرفه
کوفیه گَلسه مسلّم یترم من هدفه
اولالار شهرنشین خیمه میزی ترک ایدرم
ایوینه خدمت اوچون هفته ده بیر یول گیدرم
بو خیالاتیله سرگرمیدی اول پاک خصال
اوغلی یعقوب گَلوب گوردی اونی غرق ملال
دیدی دردون ندی ای مام گرامی بو نه حال
ندن اوتری بو قدر قلبیده فکر ایلورسن
منه باخمورسان حسین آدینی ذکر ایلورسن
دیدی هجران گور نه خوشدی وصال اولسون اوغول
چاره ایله، من اوچون رفع خیال اولسون اوغول
ویردیقیم صود سنه تا اینکه حلال اولسون اوغول
آقامین عشقی ووروب باشیمه گوزیاشیم آخور
بیر علاج ایله اماندی منه، قلبیم داریخور
دیدی ای عالم هجرانیده بی تاب آنا
عشقینون قیمتی گوهر کیمی نایاب آنا
وضع مالیم ایلمور گیتماقا ایجاب آنا
خرج راه سفره اولسا گر امکان گیدرم
گوزومون اوسته آپارّام سنی الآن گیدرم
دانشور اهل قبیله آنا بیر تازه خبر
یتیروم محضریوه ایله سن اظهار نظر
مفتی کوفه ایدوب ملّته اعلان خطر
ضدّ اسلامه یازوب خارجی ایلوبدی قیام
کوفه نون اهلی مسلّحدی مجهّزدی تمام
سیل تک کرب و بلا دشتینه لشکردی گیدور
یاغلیوب پیر و جواب یکسره خنجردی گیدور
تک نه شهر اهلی قبایلده مکرّردی گیدور
گور صلاح اولسا آنا محضریوین ترکین ایدوم
اجری وار خیر عمله هامّی گیدور منده گیدوم
اولسا هم دست اگر دست طبیعت الیمه
اُلمه سم دوشسه منیم جنگیده نصرت الیمه
ویرورم قول شرف گَلسه غنیمت الیمه
سهم تاراجیمی بازاریده دینار ایدرم
نگران اولما حسینه سنی زوّار ایدرم
اوغلینون سوزلرینی درک ایلین وقته آنا
وار امیدیم دیدی اللهه یاتان بخت اویانا
گیت گوروم جنگیده منجر اولاجاق ایش هایانا
تاپاسان کاش بو گیتماقدا سعادت گَله سن
الده سهمیّه ی تاراج سلامت گَله سن
بیرده بیر سوز سنه اظهار ایدورم قلبیوه یاز
لنگدور کوفه لیلر راه دیانتده بیر آز
صدق گفتار او منافق کیشیلرده اولماز
دللرینده اولارین نور وفا فوری سونر
دینیدن گورسه طلانی چوخی بیر گونده دونر
کربلایه یتیشن وقتیده قیل اخذ کمال
گیت امیر سپهین محضرینه ایله سوال
دینه گور کیمدی خروج ایلین آدین خبر آل
کورکورانه گیدوب رزمگهه قان توکمه
غارت خاطر اوغول بیر کسه خنجر چکمه
زندگیده بشرون فکری گرکدور دوز اولا
چشمه ی حقّی تاپا ساغر آمالی دولا
آنادان درس ادب آلدی اوغول دوشدی یولا
عصر عاشور گَلوب چاتدی بلانون چولینه
باخدی دقّتله بیر آز کرب و بلانون چولینه
گوردی لشکر دایانوب دشت و بیابان دولوسی
کشته لر یرده پراکنده دی میدان دولوسی
قان ایدوبدور او یرین چاله لرین قان دولوسی
باخوسان هر یره اندوه بلا صحنه سیدور
قانلی خنجردی، سنق اوخدی، کمان پاره سیدور
ولی بیر یاندا دوتوب نچّه حرمخانه قرار
او حرمخانه لری خندق ایدوب دوره حصار
مقتل و خیمه آراسیندا اوجا تلّیده وار
بیر خانم اوردا ایدور ناله توکور گوزدن یاش
سسلنور هارداسان آخِر نگرانم قارداش
دیدی یعقوب اولوب کوفه لیلر فارغ عمل
نه مبارز گورونور عرصه ده نه اهل جدل
هامی حیران دایانوب پنجه ده شمشیر اجل
او چوخور یرده نه وار چوخدی تردّد او یره
اوردا حتماً یخیلوب خارجی دوشموش خطره
قتلی واجبدور اودور هامّی بیله شرکت ایدور
اوخچیلار اوز عملینده نجه گور سرعت ایدور
داش آتانلار داش آتور بیربیرینه سبقت ایدور
اَُلسه اول شخص یقیناً گله جاق مقصد اله
یا که لشکر ایلیور غارته خاطر عجله
یوخدی اقبالیم اودور اولدی منیم تاخیریم
باتمادی قانه بو صحراده کسن شمشیرم
سهم تاراجه نه وار نقشه نه وار تدبیریم
آنامون بختی منه ایتمدی بیر ذرّه کمک
دست خالی قِییدم خیمه میزه ایمدی گرک
محضر زاده ی سعده یتیروم صحبتیمی
چاره یوخدور اونا تشریح ایلیوم نیّتیمی
نظره شاید آلا گَلماقیمی زحمتیمی
واگذار ایتسه هر ایش حکمینی اجرا ایدرم
ایتدیقیم خدمتیمی خوشلاسا دلخوش گیدرم
گَلدی سعد اوغلونا اوز مطلبین اظهار ایلدی
عذریله علّت تاخیرینی گفتار ایلدی
او زنازاده ده تقدیر سزاوار ایلدی
ناامید اولما دیدی کوکب اقبالوندان
قصد خدمتله گَلوبسن گورونور حالوندان
مردسن ایله عمل امرینه مردانه بو گون
نائل اول جایزه و فدیه ی شایانه بو گون
الیوی فوری یتور خنجر برّانه بو گون
سعی و کوشش ایله وور سینوه خدمت داشینی
اور چوخور یرده دوشَن خارجینون کس باشینی
گیدرم قتلینه واردور دیدی بیر شرطی امیر
منی اول خارجینون آدینه سن ایله خبیر
آیریلیق وقتی آنام ویردی منه پند کبیر
بوشلا گر شیشه ی جام عملوز صاف دگول
کورکورانه گیدوب باش کسم انصاف دگول
دیدی سعداوغلی عجب مطلبی واهی سانوسان
بیر نفر خارجینون حالینه بیجا یانوسان
دی گوروم کوفه ده یعقوب، شریحی تانوسان
کوفیانون اونا که فقهیده تابعدی چوخی
مُفتی اعظموزون آل اله فتواسین اوخی
جانب مقتله یعقوبی غرض ایتدی روان
ایستموردی گیده امّا او جوان بخت جوان
الده خنجر لب گوداله یتیشدی نگران
گوردی بیر یاره لیدور سینه سی پیکان دولوسی
ایکی زیبا گوزینون کاسه لری قان دولوسی
تیر و پیکان الینه ویرموش اجل نامه سینی
داغیدوب نیزه لر اگنینده اولان جامه سینی
تاج یاقوتی ایدوب قان یاشیل عمّامه سینی
هر یریندن یارالی سینه ده وار چوخ یاراسی
قلبینون جعبه سینی پارچالیوب اوخ یاراسی
ساق الینده قلجی یوخدی صول الده سپری
آچیلوب پاره لنوب بِلده کی بند کمری
بیربیریندن آرالانموش زرهین حلقه لری
تار موی رُخی خوش منظرینه قان دوزولوب
شطّه شطّه ایله بُل نظمیله مرجان دوزولوب
سوز گرمای بیابان نفسین تنگه سالور
ایستی یل پیکرینه دگدوقیجا عطر اوجالور
دورا بُلمور ایاقا چاه بلاده چابالور
یاخشی لحنیله گوزل سوز او دل آگاه دیور
تک نه قانلی دوداقی قلبیده ا... دیور
ایتدی یعقوبه اثر حال غم افزای امام
قتلینه اولسا دیدی منده بونون روح قیام
آنامون شیر بهاسی من اوچون اولسون حرام
منه اثبات دگول بو یارالی مجرمدور
گوزین آچسِیدی دانیشسِیدی بُلردیم کیمدور
ذات حقّین عجبا بنده ی زیباتری وار
حیف اولا قامت زیباسینه قان بستری وار
لهجه سیندن که حجاز اهلینه چوخ بنزری وار
گوردی مهمانینی آواره رئیسُ الثّقلین
جدّی پیغمبر اُپن گوزلرینی آچدی حسین
گُل کیمی لبلری گولدی ایدوب آغاز سخن
دیدی یعقوب گَلوبسن باشیمی کَسماقا سن
ذبح ایله فکر ایلمه مانع اولام فعلیوه من
تیز قِییت منتظرون وار ایدور السّاعه دعا
ابن سعده باشیمی ویرمه، آپار ویر آناوا
قویدی یعقوبی تحیّرده امامون سخنی
قلجی آتدی یره، برگ تک اَسدی بدنی
سن گوروبسن دیدی آیا دی گوروم هاردا منی
اورک آئینه سینون گردینی سیلدون یارالی
دل آچوب من دیمه میش آدیمی بُلدون یارالی
دیدی هر مقصد و منظوره گَلوبسن بُلورم
آناوین خاطرینه شوره گَلوبسن بُلورم
فکر خدمتله او مهجوره گَلوبسن بُلورم
نیّتوز وار گهر عشقوزه قیمت ویره سوز
شهر یثربده حسن ابن علینی گوره سوز
گیتمیون یثربه تغییر مکان ایتدی حسین
تاپدی میقاتینی ترک سر و جان ایتدی حسین
عترتین چوللره سالدی نگران ایتدی حسین
او حسین که توکولور ظلمیله قانی او منم
آدی اولموش آناوین ورد زبانی او منم
کمکیم قارداشیم اوغلوم هاموسی قانه باتوب
بیر ردیفه دوزولوب خیمه قباقینده یاتوب
دلسیز اوغلومدا بو چولده بِشیگین گوزدن آتوب
آتش ظلمیله زهرا آنامین قلبی یانوب
تلّین اوستونده الی باشدا باجیمدور دایانوب
او چادرلار که نماسی گورونور محنتیله
عترتیم دالدالانوب اوردا نه کیفیّتیله
قیزلاریم اللری بوینوندا دوروب وحشتیله
گوزلرین یولدا قویوب حال پریشان گَلدیم
نه اولار دویدی نه من دویدوم اولاردان گََلدیم
بیر قیزیم وار سارالان گلشنیمه گُل سیاقی
سوسوزوندان قوروموشدی او قیزین دل دوداقی
یالواروردی منی ایله باباجان سو قوناقی
من دوشنده یولا سو جامین الیندن آتدی
بوینونی چیگنینه قویدی منی چوخ آغلاتدی
چوخ تلاش ایتدی آنان گورمدی دنیاده منی
جریانه گیدوب آگاه ایله اول پیره زنی
کربلا دشتی دینه اولدی حسینین وطنی
کاش ایستَکلیسینه سن یتیرِیدون آناوی
یولداش ایلیِیدون اوزونله گَتیرِیدون آناوی
دیدی یعقوب تانیتدوردون آقا سن اوزیوی
جدّون احمددی، آنان فاطمه، بُلدوم سوزیوی
دگولم لایق اُپم قانیله دولموش گوزیوی
یا جسارتدی منه قانلی دوداقوندان اُپوم
اورگیم یاندی، اجازه ویر ایاقوندان اُپوم
درک ایدِیدی آقا ای کاش اجل یولدا منی
یا گوزوم کور اولِیدی بیله گورمِیدی سنی
من یتورّم آناما بو جریانی علنی
دیرم آغلا آنا مشتری وار گوزیاشوا
انتظار اولما آقام اُلدی کول اولدی باشوا
مرحوم انور اردبیلی
منبع مجموعه کانالهای مدح و مرثیه
موضوع: سایر موضوعات ,
زبان شعر و شاعر: نوحه ترکی , انور اردبیلی
----
وداع حضرت امام حسین (علیه السلام)
منیم پناهیم امید‌گاهیم
دایان حسینیم سنه سوزوم وار
اوپوم ایاقون یانان دوداقون
امان حسینیم سنه سوزوم وار
دایان براد‌ر عزیز مادر
گلیر دالینجا پیاده زینب
هارا گئدیرسن؟ شتاب ائدیرسن
قالوبدی بحربلاده زینب
نه چاره ائیلیم یانیر بو قلبیم
چکیبدی درد زیاده زینب
وداع آخر توقف ائت بیر
زمان حسینیم سنه سوزوم وار
باجووا لطف ائت بیر آز دایان گئت
اماندی قارداش آماندی ئوللم
گوزومده یاشیم آغاردی باشیم
غمیم بیلیرسن گراندی ئوللم
اؤییلدی قدیم، یارالی قلبیم
خدنگ ظلمه نشاندیر ئوللم
ترحم ائیله آتیوا وئرمه
عنان حسینیم سنه سوزوم وار
بو غمده قیزلار غمه گرفتار
حرمسراده قالیبدیر آغلار
او فوجی آیا بو چولده تنها
بلالی زینب نه نوعی ساخلار
تعجبیم وار مگر آتالار
بالالارینی بو نحوی یوخلار
کومکلری یوخ، بلالری چوخ
اینان حسینیم سنه سوزوم وار
اگربراد‌ر قییتماقین وار
او کهنه کوینک ندیر بدنده
ئورک سیخیلدی ایویم ییخیلدی
او کوین‌گی سن آلیب گینده
منه بس اولدی، مشخص اولدی
سنی سویارلار یقین ئولنده
همیشه مغموم همیشه مظلوم
اولان حسینیم سنه سوزوم وار
قیزون رقیه دیینده عمه
هانی بابام بس ائدیم نه چاره
نئجه دئییم من گئدیبدیر الان
خیامه گلمز بابون دوباره
او باغری قانلار او آغلیانلار
بالالاروندور ائدیر نظاره
آتیب گئدیرسن اولارا سن سن
گمان حسینیم سنه سوزوم وار
مرحوم انور اردبیلی
منبع مجموعه کانالهای مدح و مرثیه
موضوع: حضرت امام حسین (ع) وداع ,
زبان شعر و شاعر: نوحه ترکی , انور اردبیلی
----
حضرت امام حسین (علیه السلام)
ای کفن پوشان عاشورا سلام اولسون سیزه
جان نثاران ره معنا سلام اولسون سیزه
پیروی اولسون گرکدور عالم امکان سیزه
رهبر اولدی راه حقده جلوه جانان سیزه
حجّت ابن العسکری سویلر آتام قربان سیزه
شأنوزه الحّق او دور دار السلام اولسون سیزه
ای طرفداران احکام خدای ذوالجلال
یازماقا اوصافوزی عاجزدی هر صاحب کمال
ساحت قرب الهیده عجب تاپدوز وصال
گلمیوب گلمز سیزه همتا سلام اولسون سیزه
دعوی حقّ ایلدوز نا حقّی یخدوز آشکار
مکتب قرآنه آرتوردوز جهاندا افتخار
قویمادوز آیینه اسلامی اولسون لکّه دار
ایلدوز اوز عهدوزه ایفا سلام اولسون سیزه
اهل لاهوثه ثبوت ایندوز که قادر دور بشر
معنوی نیروئیله اولسون ملکدن فوق تر
علویان ناسوتیانه غبطه ایتسون سربسر
مدرکیم قرآندا پابر جا سلام اولسون سیزه
ای حسین ای فاطمه دلبندی روح مرتضی
مهجه قلب پیمبر خامس اهل کسا
ویردی سنله ال اله هیجاده یتمش برقدا
بیربیریندن هر بیری اعلا سلام اولسون سیزه
ای بقای دینچون جاری اولان القانلاری
ای منای کربلانون شیر دل قربانلاری
ای خانیم امّ البنینون نامدار اوغلانلاری
قهرمانان صف هیجا سلام اولسون سیزه
ای علی اکبر قتیل اوّل کوی وفا
آلتی گوشه قبره دنیاده مسبّب مه لقا
وی سو اوستنده بوغازی اوخلانان دیلسز بالا
فدیه گاه حضرت زهرا سلام اولسون سیزه
ای موثر تر دل آفاقه درد دل لری
لوح محنتده سر لوحه اولان نسگل لری
ای جناب زینبون خوش عطر و زیبا گول لری
گل رخان گلستان آرا سلام اولسون سیزه
ای اوکس لر که کنار کوفه دن چخدوز گجه
خانمانوزدن اوزوز بیلدوز که آیر یلدوز نجه
ای حبیب باوفا وی مسلم ابن عوسجه
کشتگان حقّ و حق بینا سلام اولسون سیزه
ای ایکی نورس جوان خوش نهاد و با وقار
محنتوز آلدی حسین ابن علیدن اختیار
قاسم شهزاده عبدالله طفل جان نثار
نوجوانان ملک سیما سلام اولسون سیزه
ای طبیب عیسوی اسلامه یول تاپدون عجب
ای عقیلون صف شکن اوغلانلاری والا نسب
ای زهیر ای حرّ خوشخو ای بریر و ای وهب
ناصران سرور بطحا سلام اولسون سیزه
باشیوه ای نو عروسیکه فلک سالدی قرا
ای او بانولر که اولدوز شاهد درد و بلا
امّ کلثوم و سریّه لیلی عصمت لقا
ای رباب ای زینب کبری سلام اولسون سیزه
ای ایکی لب تشنه قیز که حالوز اولدی دردناک
لبلروز اولدی سوسوز لوق شدّتیندن چاک چاک
سینوزی قوبدوز قوم اوسته ایستیدن اولدوز هلاک
نطفدن سالدی سیزی گرما سلام اولسون سیزه
ای ایکی غم کش باجی بر قارداشون جانداده سی
شمع رخسار علی اکبرون پروانه سی
اولدی اکبر سیز سیزه دنیا بلا کاشانه سی
ای رقیّه ای خانم صغر اسلام اولسون سیزه
انورا پرشور اولور مغزون یارلدوقجان کلام
بو مطالبدن نقدری شرح اولا اولماز تمام
ویر جناب مسلمه اوغلانلاریلا بیر سلام
ایت خلوصیله صورا انشا سلام اولسون سیزه
مرحوم انور اردبیلی
منبع مجموعه کانالهای مدح و مرثیه
موضوع: حضرت امام حسین (ع) ,
زبان شعر و شاعر: نوحه ترکی , انور اردبیلی
----
تنور خولی
عاشق حقون گرک باشنده شور اولسون آنا
منزل شاهانه سی کنج تنور اولسون آنا
عشقه جان بذل ایتمینلر بلمز عشقین لذتین
عاشقه زیبادی نوش ایتسه شهادت شربتین
عاشقین زیبنده دور فردوس چکسون حسرتین
آغلیانی عالم معناده حور اولسون آنا
راه جاناندا باشندان کچمین عاشق دگل
ایلین فکر سر و پا و بدن عاشق دگل
قالمیان گونلر ایوینده بی کفن عاشق دگل
پیکر صد پاره سی لازمدی عور اولسون آنا
من شراب عشقیله پیمانمی ایتدیم دولی
مجلس روحانیت هر یرده اولسا روح اولی
محفل ارواحه جسمین شبه سیز یوخدور یولی
یار بزمنده گرگ اغیار دور اولسون آنا
عشقمه نقصاندی قالسام باجی قارداش فکرینه
عالم وحدتده کثرت یار و یولداش فکرینه
کچمیشم باشدان انا حاشا قالام باش فکرینه
عاشقه شایسته دور محنت سرور اولسون آنا
بلبلون عشقی مجازیدور گل اوستون خوش دوتار
گلشن ایچره گل بوداقین سنبل اوستون خوش دوتار
اوغلوون عشقی حقیقی دور کول اوستون خوش دوتار
خوابگاهین ایستر اوز عشقیله جور اولسون آنا
خولیدن یوخدور گلایم یوخدی حق بینا گوزی
خوش دگل بزم محبتده اولا دشمن سوزی
یر ویروب مهمانه کول اوسته یاتوب راحت اوزی
حقی هر گوز گورمسه لازمدی کور اولسون آنا
من شهید اولدوم که قسمت وصل یار اولسون منه
منزل ایتسم هر یری بزم نگار اولسون منه
سنده که گلدون گرک خوش روزگار اولسون منه
نیلورم سن سیز یریم دایم قصور اوسلون آنا
من دیمم بلبل کیمی قوی گل بوداقوندن اوپوم
یانمیشام نار فراقونده دوداقوندن اوپوم
باشیمی قوی تپراقون اوسته ایاقوندن اوپوم
مایه فخریم منیم تا وار دهور اولسون آنا
قیلسون (انور حافظی) شکر خدای بی نیاز
درگهمده نوکراولماقدا تاپوبلار امتیاز
چوخ چتین اولسون میسر بو قدر نعمت بو ناز
هامودا ممکن دگول ذوق وفور اولسون آنا
مرحومین حافظی تبریزی و انور اردبیلی
منبع مجموعه کانالهای مدح و مرثیه
موضوع: احوالات تنور خولی ,
زبان شعر و شاعر: نوحه ترکی , حافظی تبریزی , انور اردبیلی
----
احوالات حضرت علی اصغر (علیه السلام)
نازک بوغازون رگ لرى باریکدى مودن
مو تک او دامارلار قیریلوب تیر عدودن
پیروزى سرودون اوجالوب قانلى گلودن
چوخ شکر ائدورم دشمنه تاپدون ظفر اوغلوم
اسماعیل ایاقلارینى ویردى یره بیر دم
الله اونا ایجاد ائلدى چشمه ى زمزم
هاجر کیمى بختیم یوخوموش اى گل خاتم
چالدون ال ایاق وئرمدى اما ثمر اوغلوم
گر ائتسه فلک حرمله سیرتلرى ساقى
سو سهلدى وئرمز بویار القانه قوناغى
خیاط قضا دوتسا گرامى هر اوشاقى
فورا اونا بیر قرمزى دوشلوک بیچر اوغلوم
گلدون یارالى گوردوم اوزاقدان سنه یاندیم
الدن اله گزدون الى قوینوندا دایاندیم
ایستوردوم ئوپم یاره وى عموندن اوتاندیم
زهرا بو ربابون عوضینده ئوپر اوغلوم
صود اممسه هر خوردا اوشاق رسمدى یاتماز
لایلایدا دئسون وئرمز اثر مقصده چاتماز
آخر گجه ون دردین آنون هچ غمه قاتماز
چالدون یارالى قوش کیمى هى بال و پر اوغلوم
صغرا سنه یثربده تیکوب یولادى جامه
آق دوشلوگیدى ، کوینگیدى خوردا عمامه
گلمیدى اونون تحفه سى ایکاش خیامه
اولمیدى ربابه اودا بیر دردسر اوغلوم
تا وار نفسیم عشقووى ترک ائتمرم آنى
باران کیمى اشک تریمون وار جریانى
یل لر گله لایلاى دئسه هر صبح زمانى
منده سنه لایلاى دیه رم هر سحر اوغلوم
مرحوم انور اردبیلی
منبع مجموعه کانالهای مدح و مرثیه
موضوع: حضرت علی اصغر (ع) احوالات ,
زبان شعر و شاعر: نوحه ترکی , انور اردبیلی
----
مجلس یزید
حسیندور باغ عشقین باغبانی
حسیندور مرز دینون مرزبانی
حسین بیت خدایه قویدی قیمت
حسین آباد ایدوبدور کربلانی
حسین محبوب ذات حق تعالی
حسین دلبند خاتم روح زهرا
حسین میدان محنتده توانا
حسین تخت ولاده شاه والا
حسین ملک شهادت حکمرانی
حسیندور مشرق الانوار ایمان
حسیندور منجی آیات قرآن
حسین سرمطلب طومار عرفان
بلا گلدوقجه اولدی شاد و خندان
صفا ویردی اونا عشقون زیانی
حسینون شاهکار اولدی قیامی
عجب پرافتخار اولدی مقامی
جهاندار یادگار اولدی مرامی
حسینون تار و مار اولدی خیامی
حریم دینی ایتدی جاودانی
حسین باخدی فرآته جان ویرنده
کفنسیز دفن اولوب قبره گیدنده
یتوردی حق اونی جاه بلنده
حسین موسی دگل ارنی دینده
جوابینده ائشیتسون لن ترانی
حسیندور ساقی غمدن قدح گیر
حسیندور مرد علم و مرد شمشیر
حسین عنوان کرُمنایه تفسیر
چوخور یرده اولاندا ذکری تکبیر
ثبوت اولدی کمال امتحانی
حسین مبنای رحمت اهل خیره
شفاعت ایلمز محشرده غیره
حسین چخدی جدانون اوسته سیره
یاتوب مطبخ سراده گئتدی دیره
ویروبدور راهبه رمز جنانی
حسینده چوخدی اوصاف حمیده
آتام قربان ایله مظلوم شهیده
قلم چکدی سوزی بزم یزیده
ولی باغلی بیر عده داغدیده
او کافر کیشون اولدی میهمانی
مُرَصَّع تختده اول مست کردار
اوتوردی زادۀ هند جگر خوار
قدحلر باده دن مملو و سرشار
یوخیدی خالی یِر دولموشدی تالار
جلوس ایتمشدی یار و پیروانی
مُقدَّس قانلو باش طشت طلاده
ایاق اوسته حرملر سرگشاده
یورولمش خردا قزلار فوق العاده
وروبلار سلسله زین العباده
اؤرکده قالمیوب تاب و توانی
اسارت گرد و خاکی یوزلرینده
سرشک درد و ماتم گوزلرینده
چکوبلر غم گیجه گوندوزلرینده
شهامت واردی اما اؤزلرینده
سالوبلار حیرته پیک بلانی
یزید ایچدی شراب سرخ فامی
اونا نخوت گتوردی اوز مقامی
مخاطب ایلدی رأس امامی
نجه سندن گور آلدوم انتقامی
منه اولدی گوارا زندگانی
گهی سن زهد و تقوادن دانشدون
گهی میعاد و معنادن دانشدون
علیدن گاهی زهرادن دانشدون
گهی فردوس اعلادن دانشدون
گهی چکدون گوزه ذکر و دعانی
گزوردون چون خلافت امتیازی
عراقون عشقنه ویردون حجازی
نجه گوردون خدای بی نیازی
یخلدی پرچمون یوخ اهتزازی
فنا اولدی علینون خانمانی
سنه هر قدری گوستردوم صداقت
منی بلدون همیشه بی لیاقت
دیدوم بیعت ایله ایتدون اهانت
ولی حق ایلدی صاحب خلافت
گتوردوم بیعته نصف جهانی
یخلدی یان یانا یکسر سپاهون
یانوب اوددا کول اولدی خیمه گاهون
اسیر اولدی عیال بی پناهون
یتیم اولید بنات دل بخواهون
سیزه تار ایلدوم دور زمانی
خواتین حریمون دل شکسته
طنابه باغلانوبدور خسته خسته
قیاقیمده دوروبلار دست بسته
بوگون چوخ خوشدی مِی بو مِی پرسته
مبارکدور بو عیش شادمانی
تمام ایتدی سوزون اول پست پایه
اوئجالدی خیزران سمت هوایه
اننده سس دوشوب طشت طلایه
پیمبر باش آچوب گلدی نوایه
دوتوب لرزه زمین و آسمانی
هوایه خیزران قالخوب اننده
حسینون لبلری ضربتلننده
دوداقندن او طشته قان گلنده
سخلدی زینبون روحی بدنده
سکوتین سندیروب زهرای ثانی
خطاب ایتدی یزید فتنه کاره
نشان گل برگین ایتمه نیش خاره
او لبلر حمد ایدوبدور کردگاره
پیمبر قلبین ایتدون پاره پاره
گتوردون شیونه آل عبانی
حبیب ذوالجلالی ورما ظالم
شه خونین جمالی ورما ظالم
شهید بی مثالی ورما ظالم
دوزنمور اهل عیالی ورما ظالم
حیا ائت قوی کناره خیزرانی
عزیز ماسوانی ورما ظالم
گل اهل کسانی ورما ظالم
غریب کربلانی ورما ظالم
قتیل نینوانی ورما ظالم
یارا اوستن روا گورمه یارانی
حسین دلبند ختم الانبیادور
حسین ریحانۀ خیرالنسادور
حسین آرام جان مرتضی دور
او لبلر ذکر حقه آشنادور
قزل طشته توکلدی لخته قانی
تکبُّر ایلدون چخدون اوزوندن
یاغور نخوت قیافوندن یوزوندن
او باشون آهی تئز دوتسون گوزوندن
یانان قلبیم یانور ناحق سوزوندن
اوتان دیندیرمه بو آتش زبانی
او قدری ظلم ایدوب دوردون عناده
دانشدیردون منی بزم جفاده
حسینیم پاکدور سن مست باده
پلیده بیعت ایتمز پاکزاده
غلطدور ایلمه بو ادعانی
پناهیدی حسین هر بی پناهه
همیشه سجده ایلردی الهه
شهامتله یخلدی قتلگاهه
سیزون دامانوز آلوده گناهه
مُنَزَّه دور علینون خاندانی
عدالتدن دگل ای مرد خمّار
پیمبر عترتی بی یار و غمخوار
طناب ظلموه اولسون گرفتار
دایانسون بیر بیله مجلسده ناچار
تماشا ایلسون هر مرد جانی
او گوندن خوف ایله ذات الهی
قیلار حشره عدالت دادگاهی
ائدر زهرا شکایت دلده آهی
سوزون روح الامین ایلر گواهی
تاپارسان اوندا نار بی امانی
روایتدور بو سوز اهل خبردن
یازوب عذر ایستورم من شیعه لردن
او مجلسده اولان سایسیز نفردن
بیری ناگه ایاقه دوردی یردن
دمشقی نام اولوب نام و نشانی
ادوب قول باغلی قزلاره نظاره
گوزی دوشدی اونون بیر اشگباره
یوزون دوتدی یزید فتنه کاره
عروس قاسمه ائتدی اشاره
دئدی بیر کلمه مشکلدور بیانی
یزید شومدن ائتدی تقاضا
اوزاقدان ایلورم اول قز که ایما
قولون آچ بو غلامه ایله اعطا
سنون که اقتدارون واردی حالا
منه وئر جاریه اول مبتلانی
اولوبدور نو عروسه کشف مطلب
وفالی عمه سین ائتدی مخاطب
اورک جامین ائدوب غمله لبالب
نه ایستور مرد شامی عمه زینب
یزیده گوسترور بو بینوانی
بی بی من دختر شاه حجیزم
علی اکبره آخر عزیزم
اسیرم چوخدا ایندی اشگریزم
کنیز اولسام سنه تنها کنیزم
نیه بیگانه ایلور بو گمانی
سوزوم یوخ هر فشاره عمه دوزدوم
آخوب اشگیم عذاره عمه دوزدوم
آلیندی گوشوارم عمه دوزدوم
قولاقیم اولدی یاره عمه دوزدوم
بو درده قلبیمون یوخدور توانی
اوجالدی دلدن آهیم عمه دوزدوم
فنایه گئتدی جاهیم عمه دوزدوم
شهید اولدی پناهیم عمه دوزدوم
کول اولدی حجله گاهیم عمه دوزدوم
عروسون چوللر اولدی آشیانی
قنادی باغلی بلبل تک وطندن
کناره دوشموشم پوزقون چمندن
ولی آیریلمارام ئولسمده سندن
گوزون قربانیم ال چکمه مندن
گرامی ساخلا بو گیسو فشانی
سنه اورگتدی فنّی شعری «انور»
جناب «یحیوی» دانا سخنور
اودور رابط کلامون اولدی بهتر
بُلن شاگرد اولور استاده مظهر
ائله تجلیل او پیر نکته دانی
مرحوم انور اردبیلی
منبع مجموعه کانالهای مدح و مرثیه
موضوع: احوالات مجلس یزید ,
زبان شعر و شاعر: نوحه ترکی , انور اردبیلی
----
زبانحال حضرت رقیه (سلام الله)
شمع بزم حق را مرغ دلم پروانه است
گرچه طفل خردسالم منطقم پیرانه است
عزت دنیا به چشم عاقلان افسانه است
زائرین قبرمن این شام عبرت خانه است
مدفنم آباد و قصر دشمنم ویرانه است
گوهری بودم به صرّاف خرد شایسته تر
بلبلی بودم به باغ غم سر اندر زیر پر
آهویی بودم به دشت غصه ها شوریده سر
دختری بودم سه ساله دستگیر و بی پدر
مرغ بی بال و پری را این قفس کاشانه است
شکوه ها دارم به دل از شیوه قوم عنید
آنچنان کردند ازعمر و حیاتم ناامید
از تن رنجور و خسته طایر روحم پرید
بود سلطان ستمگر صاحب قدرت یزید
فخر میکرد او که مستم در کفم پیمانه است
من به فکر غصه های خویش درحال ستوه
عنصری از پا فتاده درد و محنت همچو کوه
زجر دیده دل بریده ناامید ازهر گروه
داشت اوکاخ مجلل دستگاه باشکوه
خود چه مردی کز غرور سلطنت دیوانه است
خاطرش آسوده از فکر جحیم و از بهشت
بد صفات و بدنهاد و بدمآل و بدسرشت
غرق در غرقاب نعمت گشته بود آن مرد زشت
داشتم من بستری از خاک و بالینی ز خشت
همچو مرغی کاو بسا محروم زآب ودانه است
ناوک مژگان من دائم غریق اشک شور
کودک شب زنده دار منزل بی شمع ونور
برکتاب غصه میکردم به چشم دل مرور
تکیه میکرد او به تخت ناز با کبر وغرور
این تکبر ظالمان را عادت روزانه است
قلب زارم از جفای آن ستمگر ریش ریش
بردلم می زد بسی چون عقرب جرّار نیش
غرق آسایش همی بود آن لعین و کفر کیش
من به دیوار خرابه می نهادم روی خویش
زین سبب من ردسفیدم شهرتم شاهانه است
غصه مرگ هجر گشتم اندر این بیت الحزن
حسرت یثرب کشیدم شام را کردم وطن
رام آغوش مزارم خفته ام نیلی بدن
برتن رنجور من شد کهنه پیراهن کفن
پرشکسته بلبلی را این خرابه لانه است
گرچه خوش میداشت خصمم زحمت وآزار من
تادم جان دادنم شد دشمن جبار من
این من و این بقعه ی زیبا و این زوّار من
محو شد آثار او تابنده شد آثار من
ذلّت او عزّت من هر دو جاویدانه است
(انورا) با اهل ایمان و حقیقت یار شو
بر حیات جاودان اندیشه کن دیندار شو
خادم دربار پاک سرور ابرار شو
(کهنموئی) چشم عبرت باز کن بیدار شو
هر که از اسرار حق آگه نشد بیگانه است
مرحوم انور اردبیلی
تضمین از مرحوم کهنمویی
منبع مجموعه کانالهای مدح و مرثیه
موضوع: حضرت رقیه (س) زبانحال ,
زبان شعر و شاعر: نوحه فارسی , انور اردبیلی , کهنمویی
----
در احوالات حضرت موسی ابن جعفر (ع)
دین اوسته هر کیم ئولسه تا روز محشر ئولمز
واردور شهید حقه اجلال برتر ئولمز
یاخشی مرور ایدنده تاریخ هر کتابی
فوج مجاهدینون وار آتشین خطابی
بسترده ئولمیوبدور مردان انقلابی
آزاده آری آری مابین بستر ئولمز
روحه صدای یاحق آواز زندگیدور
دینه مجاهد اولماق اعجاز زندگیدور
ایثار جان و پیکر آغاز زندگیدور
پرشور روح و قانه غلطیده پیکر ئولمز
لحن صراحتیله قرآن ایدور گواهی
مردان جان نثاری احیاء بیلور الهی
منشور حقّون اولماز واللهی اشتباهی
ای مدّعی کلام خلّاق داور ئولمز
نازل اولوب او گوندن قرآن لایزالی
نشر اولدوقیجا آرتور معناسینون جلالی
بیر نقطه‌سین پوزانمز عمّال لاابالی
نامرد الینده ذکر الله و اکبر ئولمز
سالار انبیانون وحدت نشان لواسی
غار حراده زیبا تکبیرینون صداسی
فریاد وحدۀ حق یا تُفلِحوا نداسی
پیغام دلربا و ارواح پرور ئولمز
آخدی اُحُد داغیندا قانلار که اتقیادن
دامانی اولدی جنت یاحق یازان دمادن
حمزه یاتوبدور اوردا دوشمز او داغ صفادن
هر یرده جاری اولسا خون مطهّر ئولمز
گیتمز فنایه هرگز فرمانی مرتضانون
برنامه سینده واردور تأمینی آرمانون
نهج البلاغه سیله روشن ره امانون
وار جان جاویدانی منشور حیدر ئولمز
هنداوغلی چوخ چالشدی دینی سالا اثردن
چوخ استفاده ایتدی مردان کم نظردن
حُکّام بی‌پدردن نیروی سیم و زردن
درک ایتمدی خَذَفله پر ارج و گوهر ئولمز
مرآت دینه گرد ذلّت قویان دوشونسون
مردان حقّه رنگ تهمت قویان دوشونسون
اسلامی فطرتی‌ده بدعت قویان دوشونسون
زور و زریله مطلق محراب و منبر ئولمز
مختصّ‌دور بو مجلس چون هفتیمن امامه
یوخ ارزشی بُکایه خاطر تاپا ادامه
مجلس گرک هدفدن اوتری اولا اقامه
ناحق بیله جهاندا یاحق دین‌لر ئولمز
هارون مستبدّ اول غول ره مناهی
بغدادیده واریدی فرعونی دستگاهی
میخانه ایتدی بزمین تاریخ ایدور گواهی
فکر ایلیوردی اهل باده ایله ساغر ئولمز
یوز کعبیه قویوبدور مرد هزار و یکشب
تکوین اولا او یرده مذهب علیه مذهب
یثربده اوّل ایتدی پیغمبری معذّب
بیلموردی حیله ایله شرع پیمبر ئولمز
بیر بزم ویردی تشکیل احضار ایدوب رجالی
شهرون اعاظمیله سادات خوش خصالی
ئوز زور و قدرتیندن افکاری ایتسون حالی
تهدید اولونسا روح مرد دلاور ئولمز
ناگاه بیر مگس که چوخ ریزیدی سبک بال
طیّار اولوب فضای مجلسده ایتدی اخلال
سیماسینه قونوبدی اولدی خلیفه بدحال
قوودی نه گوردی آچمش پروازه شهپر ئولمز
گلدی دیله دانشدی سبط پیمبریله
صادق امامون اوغلی موسی بن جعفریله
سیز آشناسوز آخر هر علم برتریله
هر قلبی نور عِلموز ایسته منوّر ئولمز
وار خلقت مگسده آیا نه استفاده
حضرت جواب مثبت ردّ ایتدی فوق العاده
حکمتله خالق ایلور برنامه سین پیاده
علم ازلده هر نه اولموش مقدّر ئولمز
چون که لیاقتون یوخ بو صنعت ظریفه
ایراد خلقت ایتمه ای بی خبر خلیفه
نخوت گوزیله باخما بیر پشّۀ ضعیفه
وعظیله روح جهلون ای مرد خودسر ئولمز
مغروردیدی سنون تک نمرود شوم و جانی
عمرون اونون مگسله معبود ایتدی فانی
چکدی حضیض ویله او مطلق العنانی
فکر ایلیوردی سن تک اول فتنه مصدر ئولمز
هارون پست ایشتدی بو آتشین کلامی
درک ایتدی مجلسینده سلب اولدی احترامی
دستور ویردی فوراً جلب ایتدیلر امامی
درکی یوخیدی بیلسون آزاده رهبر ئولمز
هر مُستبدّ ایشیتسه منطق ایدر تعلّل
تشخیص ویرسه تاج و تختین ایدور تزلزل
هارون کیمی تِز ایلر سر نیزیه توسّل
نیزیله بیلمز اهل ایمان و باور ئولمز
مسجد‌ده ایتدی توهین مأمورلر امامه
قویمادیلار نمازه حضرت ایده اقامه
حسرتله باخدی قبر پیغمبر اَنامه
جدّا دیدی غرور عمّال کافر ئولمز
فیض جوارون اولماز بیرده منین نصیبیم
اولدوم دچار درد هجرانوه طبیبیم
واردور یری بویورسون وای دربدر غریبیم
هیچ بیر غریب من تک بی یار و یاور ئولمز
جُرم اولدی حق دانشماق اولادوه وطنده
هارونه حق دانشدیم سالدی منی کمنده
سن اول بابا گواهی تقصیر یوخدی منده
تبعید ایدن اوتانمور زیبا سخنور ئولمز
من سالخورده سیّد پیرم کثیرُ الاولاد
ایو سرپرستین الدن ویرسه گر اولماز آباد
آخر نیه یاخامدان ال چکمیور بو جلّاد
ظلم ایلیور عیال موسایه پی در ئولمز
مشکلدی چوخ وطنده معصومیه فراقیم
شیرازه سینده قالماز اوراق اتّفاقیم
من سیز ایوه گلنده مأیوس اولور قوناقیم
گور عترتیم بو غمدن ای شاه محشر ئولمز؟
هر ایو بُیوکسیز اولسا اجلال و جاهی اولماز
تنگه دوشنده اهلی بیر دادخواهی اولماز
افتاده‌سی مریضی اولسا پناهی اولماز
ناخوش دواسیز اولسا گور زار و مضطر ئولمز؟
جدّا روادی هارون چاتسون هر امتیازه
اما منیم بناتیم دوزسونله سوز و سازه
بیر چادریله دورسون اون یدّی سی نمازه
سخت اولسا زندگیسی گور غملی دختر ئولمز؟
هارون شوم و ناکس بو حکمی ایتدی جاری
عصمتلی قیزلاریمدان کیم ایتسه خواستگاری
چخسون گرک وطندن اولسون گرک فراری
هر امر دل بخواهین ایلر مقرّر ئولمز
جدّا خلیفه آل اطهاری تنگه سالدی
قلبیم باشین دومانلی داغلار کیمی چم آلدی
قیزلاریمون آغاردی باشی ایویمده قالدی
حسرتلی اولسا هر قیز آیا مکدّر ئولمز؟
هر بیر کیشی وطنده مشهور اولسا جدّا
خوش زندگینی ایلر قیزلارینا مهیّا
کهنه لباسی اولماز اگننده ئولسه حتی
باشینده قیزلاریم تک بیر کهنه معجر ئولمز
حاصل او دردمند هجر اولدی بی معالج
مأموریلر امامی مسجددن ایتدی خارج
سربسته قالدی گویا قلبنده کی حوائج
حکمت نه دور خدایا جانی ستمگر ئولمز
ظلم ایله دی امامه عمّال بی شرافت
ئوز کوچه‌سین کچنده درک ایلدی او حضرت
ایودن چخوب هراسان یکسر بنات عصمت
قیلسا آتا او حالی آیا مصوّر ئولمز
اول سیّد اَعاظم دوتدی یوزون رضایه
فرمایش ایتدی قویما قیزلار گله نوایه
تقدیردن عزیزیم سیز ایتمیون گلایه
هارون ئولر رضاجان موسی بن جعفر ئولمز
پیغمبرون مزارین هر گون زیارت ایله
موسانی سال خیاله قصد نیابت ایله
نایب منابیم اولدون خلقی هدایت ایله
ابناء ال هاشم سَروَردی سَرور ئولمز
حق لعنتی دمادم عمّال جیره خواره
اولسون درود بیزدن مردان حق شعاره
آزاده شاعران و ابرار جان نثاره
آزاده شاعر اولسا اشعار(انور) ئولمز
مرحوم انور اردبیلی
منبع مجموعه کانالهای مدح و مرثیه
موضوع: حضرت امام موسی کاظم (ع) احوالات ,
زبان شعر و شاعر: نوحه ترکی , انور اردبیلی
----
در شهادت امام حسن مجتبی (ع)
اجل اویاتدی غرض خواب نازدن حسنی
گوروب سوسوزدی سوایستور وجودینون چمنی
ایدوبدی نوش او سودان دوشدی لرزیه بدنی
بیلوب جگرلری اول زهریدن یارا گورجک
بفوری سوده الماس قانه جذب اولدی
ئورک پیاله سی مسموم قانیله دولدی
جگرلری آلیشوب رنگی گل کیمی سولدی
دیدی بو حالی نجه خویش واقربا گورجک
گیجه زمانی کیمی داده سسلیوم یارب
حسین دوام ایلمز کشف اولونسا بو مطلب
سزلتمی ایشیدوب ایندی دیسگینر زینب
نقدری معجرینی زینبیم قرا گورجک
بوسوزی بیر نفر عالم بویوردی منبرده
یازوب اونون دیدیگین چکمورم سوزه پرده
گوروب آلولانور اکبادی چوخ گلور درده
فلک او خانه آبادی غم سرا گورجک
حسیندن ایستدی بیر طشت ایهاالاحباب
حسنه باخدی شه کربلا اولوب بی تاب
چخارتدی زینبی دهلیز خانیه اوجناب
بیلوردی قالسا خفا دردی برملا گورجک
اطاقدن ایلدی مظهر بتولی کنار
امام قی ایلدی طشته یا اولوالابصار
جگرلری متلاشی اولوبدی گیتدی قرار
مسلم اولدی حسن عمرینی فنا گورجک
اوجالدی ناله سسی گتدی زینبی درده
دوزنمدی اطاقا یوز قویوب دل افسرده
حسین عباسینی طشت اوستنه ایدوب پرده
جهان مگر او محبتده بیر اخا گورجک .
جنازه نی گتوروبلر غم وملالیله
حریم احمده یوز قویدیلار جلالیله
چخوبدی عایشه پیشوازه آیری حالیله
دیدی مگر هر ایشی آل مصطفی گورجک
ایویمده دفن ایده سوز مجتبانی یوخ امکان
دگل پیمبر رحمت جواری قبرستان
جنازه نی دالی قیتر مه سوز همین الان
مدینه نبوی شورش خطا گورجک
محمد حنفیه قیلوب اونا اظهار
جمل عسکره اولدون اوگون ستمله سوار
بوگونده استرون اوسته ویرورسن آیری شعار
نقدری سندن علی عترتی جفا گورجک
خطر جنگی گورن وقته سیدالشهدا
خطاب قیلدی بنی هاشمه اومیر هدا
قلنج چکمگوزه قارداشیم دگلدی رضا
قویون نه ایش گوروری گورسون اشقیا گورجک
طلیق زاده لره ایندی که کمکدی فلک
بقیع سمتنه تابوتی قیترون نیلک
جنازیه توخانان اوخلاری کنار ایلیک
قوناقدی فاطمیه اوغلونی آنا گورجک
اگر چه جنگ و جداله یوخوزدی دلده هراس
گرک توکولمیه قان بیز دوتاق بقیعده یاس
قویوب غلافینه شمشیرین آغلادی عباس
دیدی بو قوللار هاچان بس ئوزون رها گورجک
امامون امرینی اجرایه قویدی هاشمیان
جنازه نی یتوروبله بقیعه ناله کنان
نماز قیلدی حسین قبره قویدی ایتدی بیان
بوقبری هر کیم اوپه نور کبریا گورجک
غمونله قارداش حسن قلبیم اولدی مالامال
سنه نوا ایدرم گوز یاشیم اولا سیال
محالیدور ایلیم بیرده عطر استعمال
گوزوم بو عالمی بی وقروبی بها گورجک
داخی لباس نشاطی وجودیدن سویدوم
زمانه لذتنه پشت پا وروب دویدوم
سنون باشووی قرا تپراق اوستنه قویدوم
تصور ایتمه حسین نرم متکا گورجک
حجاز تپراقی هر قدر لاله زار اولسا
صبا یلی نقدر گلستانه یار اولسا
کبوتران هوا یا که اشکبار اولسا
حسین ئوزون اوقدر عاشق نوا گورجک
زیان گورن اودگل ای همای صلح وصفا
اثاث منزلی یا خیمه سی اولا یغما
زیان گورن اودی که قارداشین مزاره قویا
یقین ایشقلی گونون لیله الدجا گورجک
یوزوی گورسه حسین خوابیده تسلادور
یوخوما گل دانشاق خواهش وتمنادور
ئولنلرون بیلورم وعده گاهی رویادور
گوزوم سنی یوخودا گورسه مطلقا گورجک
مرحوم انور اردبیلی
منبع مجموعه کانالهای مدح و مرثیه
موضوع: حضرت امام حسن مجتبی(ع) احوالات ,
زبان شعر و شاعر: نوحه ترکی , انور اردبیلی
----
غزل
سوکیمی چشمهٔ طبعیمدن اولور جاری غزل
اوره‌گیمدن آپاریر درد دل زاری غزل
واردی هردرده دوا، اولسا اگرنسخه یازان
عاشقین غصّه‌سینون نسخه‌سیدور آری غزل
غزل عاشق سوزو یانمیش اوره‌گین نغمه‌سی‌دیر
ارزشی‌یوخدو‌سیزیلداتماسا گر تاری غزل
مِیِ معنانی ایچیب، مست اولوب اعجازینی گور
اوخو قوی صبح ائله‌سین فوری شب تاری غزل
عشق فرهنگی تغزّلده تجلی ائلیوب
شعرگنجینه دیر اما دُرِ شهواری غزل
یادجانانیله جان دام بلادن قورتار
دار وصل ایْلَدی منصوره نئجه داری غزل ؟
سوزو ساز اولسا غزلده بیلیرم مثل طبیب
جان وئرنده باشیم اوسته گَتیرر یاری غزل
عشقوون قدرتی(انور) گر اولا عرفانی
مژه‌وی خامه ائدرسن،در ودیواری غزل
مرحوم استاد حاج انور اردبیلی
موضوع: غزل ,
زبان شعر و شاعر: نوحه ترکی , انور اردبیلی
----
احوالات حضرت ابوالفضل (علیه السلام)
زینبیم گل ئولدی سو اوستونده سقّا گل باجی
نهر القمدن حسینون گلدی تنها گل باجی
دوره ی دوران دولاندی دشمنون اقبالینه
دیده ی عالم حسینون آغلاسون احوالینه
یتدی سعد اوغلی ستمله نیّت و آمالینه
کامیاب اولدی جفادن قوم اعدا گل باجی
محنت آل محمد چاتدی اعلا حدیّنه
کاروان عزّتوز چاتدی فنا سرحدّینه
ایستسون محنت عیارین باخ حسینون قدّینه
قیل نکات دردیمی قلبونده معنا گل باجی
گل نظر قیل گور منیم گوزدن آخان گوز یاشیمی
چاره می دشمن کسوب سالدی بلایه باشیمی
ویر خبر قزلاریمه ئولدوردیلر قارداشیمی
مجلس ترحیمینی ایله مهیّا گل باجی
خیمه دن آلدوم سسین گتدوم نجه سیز بیلمدوز
باشی اوسته ناگران یتدوم نجه سیز بیلمدوز
بیر الیم بئلده نوا ایتدوم نجه سیز بیلمدوز
سس سسه ویردی عربلر چکدی عُرّا گل باجی
باشی اوسته داغلی قلبی داغلادوم ال چالدیلار
شوریله پرونده ی غم باغلادوم ال چالدیلار
باشینی آلدوم دیز اوسته آغلادوم ال چالدیلار
اولدی قارداشی ئولنلن بو مدارا گل باجی
یاندی قلبیم اولدی قان نسگل سوزوندن گولدیلر
لخته لخته قاننی سیلدوم گوزیندن گولدیلر
یوز یوزه قویدوم صورا ئوپدوم یوزوندن گولدیلر
دیده ی پر اشکیمه تار اولدی دنیا گل باجی
خیمیه وار علّت اول کان شجاعت گلمدی
مایلیدوم ویرمدی اما رضایت گلمدی
سو کنارین خوشلادی چکدی خجالت گلمدی
شاخه سیز قالدی او سرو گلشن آرا گل باجی
سو سسین درک ایلدی ائتدی سوا اظهار عشق
پاسگاه عشقده قالدی او پرچمدار عشق
گلشن جسمین قوجاغه آلمیشیدی خار عشق
قامتی گلزاره بنذردی سراپا گل باجی
گلشنون اولماز صفاسی اول یارالی سینه تک
دانه ی مرجان توکردی تپراقا گنجینه تک
سینه نه سینه داغلمیشدی سینان آیینه تک
ویرمیشیدی شکلین الدن یکسر اعضا گل باجی
مرحوم انور اردبیلی
منبع مجموعه کانالهای مدح و مرثیه
موضوع: حضرت ابوالفضل العباس (ع) زبانحال ,
زبان شعر و شاعر: نوحه ترکی , انور اردبیلی
----
در احوالات حضرت امام محمد باقر
و گریز به قتلگاه
بو خبر که خامه یازدی معتبر اخباریدن
مطلبی آرسته قیلدی کسوت اشعاریدن
نقل اولوبدور جابر عبداللهی انصاریدن
ایلیور شخصاً روایت احمد مختاریدن
حضرت خیرالبشر پیغمبر اخیاریدن
قیلدی فرمایش منه صدّیق اعظم مصطفی
پیشگولوق ایلدی یعنی او فخر انبیا
حق تعالی عمر طولانی سنه ایتمش عطا
ساخلا فکرونده بو عنوانی نشان مدّعا
موقعنده آل نتیجه ایتدیگیم گفتاریدن
درک ایدرسن هفتمین معصومی ای جابر یقین
جدینه همنام اولار اول حجت جان آفرین
باقر رمز علوم اولین و آخرین
وارث شایستۀ اوصاف زین‌العابدین
مشرق علمی مشعشع مطلع انواریدن
مسند پاک امامتده اودور پنجم امام
درس آلار زیبا کلامیدن اونون اهل کلام
بیر سفارش ایلورم گورمک همین قیل احترام
محترم دوت مقدمین ویر اوغلوما مندن سلام
آل رسول‌اللهون عطرین اول گل بی‌خاریدن
هجرتون پنجاه و هفتی سوم ماه صفر
ویردی ترتیب اثر فرمایش خیرالبشر
حضرت سجاده لطف ایتدی خدای دادگر
نور ابن‌الخیّرین تابان اولوب وقت سحر
نور آلوب بیت امامت اول ملک رخساریدن
چار سالیدی او نور دیدۀ زین العبا
واقع اولدی کربلاده انقلاب کربلا
کوفه و شامی گزنده عترت خیرالورا
هر یری فوج اسیرانیله گزدی جابجا
گوردی چوخ ظلم و شکنجه اهل استعماریدن
دام جور و ظلمه دوشدی مثل نخجیر آغلادی
لوح قلبه غم سطورین قیلدی تحریر آغلادی
گه آناسین درک ایدوب محزون و دلگیر آغلادی
گه آتا بوینوندا باخدی گوردی زنجیر آغلادی
گه گلایه ایلدی دنیای کج رفتاریدن
زحمت ویرانه دن قورتاردی آل اللهیله
دست و پنجه نرم ایدوب یولّاردا رنج راهیله
رشد ایدوب شهر پیمبرده جلال و جاهیله
مکتب سجادی درک ایتدی دل آگاهیله
کرسی حقده بصیر اولدی اولوالابصاریدن
هجرتون دوخسان بشی رحلت ایدوب زین العباد
صاحب اولدی مسند پیغمبره اول خوش نهاد
سینۀ علمی شکاف ایتدی امام پاکزاد
عصرینون دانالری تحصیل ایدوب اوندان مراد
گوهر حکمت یاغوبدور کنز گوهر داریدن
حیف اولا افسوس اولا هم عصردی هشّامیله
صبح صادق روبرو اولموشدی گویا شامیله
یول گیدر ظالم همیشه مسلک ظلامیله
اینجدور وارسته شخصی ناروا اقدامیله
غول استبداد ال چکمز بلی احراریدن
مرحوم انور اردبیلی
منبع مجموعه کانالهای مدح و مرثیه
موضوع: حضرت امام محمد باقر (ع) احوالات ,
زبان شعر و شاعر: نوحه ترکی , انور اردبیلی
----
مناجات حضرت امام حسین (علیه السلام)
در قتلگاه
ایله شور شهادتدن حسین دلگرم اولوب یارب
اوزون یاددان چیخاردیبدور فقط قصد فنا واردی
بلا گوندر بو نقدجانیله یارب خریدارم
دیسونله قتلگاه ایچره عجب بیع و شرا واردی
نقدری اوخ گلور گلسون نقدری داش گلور گلسون
نه شمشیر و نه تیر و نه سنانه اعتنا واردی
اوزون دعوت ایدوبسن سسلیون من سسلورم یارب
یقین فلیستجیبوا امرینه منده وفا واردی
دیمم اطفالیمی شام اهلینون حفظ ایت جفاسیندن
دیمم مندنصورا یورقون بناته چوخ جفا واردی
دیمم قالدی رقیم هاردا زینب هاردادور الان
دیمم سجادیمه خیمه یاناندا مین جفا واردی
کچوب مندن او بی صاحب خیامون صاحبی سنسن
نه تقدیر اولسا تسلیمم سوزوم یوخدی رضا واردی
یانان یانسون قاچان قاچسون ایاق آلتدا قالان قالسون
پری سینسون نه قدری خیمه ده یورقون هما واردی
یتیمه قیزلاری یارب اوزون سن یاخشی ساخلارسان
سینیق قلبیمده الساعه بیرآیری مدعا واردی
عزاداریمله زوارین نجاتین ایستورم یارب
بو عرضیم گر قبول اولسا حسینه اکتفا واردی
استاد انور اردبیلی
منبع مجموعه کانالهای مدح و مرثیه
موضوع: حضرت امام حسین (ع) مناجات ,
زبان شعر و شاعر: نوحه ترکی , انور اردبیلی
----
در مدح حضرت امام رضا (علیه السلام)
و گریز به وداع
چهره پر طلعت مرآت خلقتدور رضا
پیکر موزون تقوا و فضیلتدور رضا
ملک ایراندا پیمبردن امانتدور رضا
آفتاب هشتم برج امامتدور اوزی
باب امیدینده واردور اهل ایرانون گوزی
پاکدل اجدادی تک سلطان ملک ارتضا
نفس سلمون صاحبی حکم مشیّتدن رضا
مظهر اوصاف و هم نام علی المرتضی
عالم آل محمد مقتدای روزگار
حضرت موسی بن جعفردن جهاندا یادکار
صورتین ظاهرده طوسون تپراقی پنهان ایدوب
باطنی انواری اما عالمی حیران ایدوب
مشرق ایران زمینی مجلس جانان ایدوب
حایر پاکینده دائم نقد جان صوداسی وار
طوریدن آرتوق ترانی سسلنن موساسی وار
صبحلر که بارگاهی صبحه بذل ایلور صفا
مین امیدیله قویور یوز صحننه اهل ولا
باغلانور صفلر نمازه باشلانور ذکر و دعا
آسمانه سس ویرور صلوات و تکبیرون سسی
اهل توحیدون طنین انداز اولور حق نغمه سی
بی حیا هارونون اوغلی یعنی مامون دنی
عترت طاها و قرآنون مزوّر دشمنی
تاپّادی نرمش حسادتدن او قلب آهنی
اهرمن سیرت گوروب دور اوجده اوز بختینی
ایستدی یخسون سلیمان زمانون تختینی
نفس نحسی روحینی آلوده ایتدی ننگیله
سندیروب آئینه ایمانی گویا سنگیله
یازدی بیر نامه امام هشتمه نیرنگیله
نامه ده بی پایه مطلب درج ایدوب بیر سلسله
شهر مروه حضرتی دعوت قیلوب تاکیدیله
شهر یثربده او دعوت نامه نی آلدی امام
نکته نکته نیّت مامونی بلدی بالتمام
گتمگه مجبور اولوبدی ایتمدی رد پیام
آیرلیق برنامه سین ویردی قضا اول سروره
گلدی اولده جوار حضرت پیغمبره
قویدی حسرتله یوزون قبر رسول اکرمه
آغلادی دردین دیدی بیربیر او روح اعظمه
آل عباسون جفاسیندن دچار اولدوم غمه
حقّی غصب اولموش رضا اوغلون وطندن آیریلور
گوز یاشی گوزده بابا اولده سندن آیریلور
سن بلورسن بو سفردن یوخ امیدیم رجعته
زادگاهیمدن چکور پیک شهادت غربته
منتقل اولدوم بو تربتدن بیر آیری تربته
گرچه محزونم فراق اعل عیالمدن بابا
ناگرانم چوخ جواد خردسالیمدن بابا
جدینون قبرون وداع ایتدی ملول و دیده تر
اهل بیتین قیلدی اوز آیرلماقندان باخبر
قوم و خویش و آشنایه امر ایدوب اول خوش سیر
سربسر بزم فراقه فکر یاسیلن گلون
گیمیون قارع هله فاخر لباسیلن گلون
مجلس هجران قورولدی قیلدی فرمایش امام
عازمم مروه سیز ایله قالماقم اولدی تمام
جانشینیمدور جواد اوغلوم منه قائم مقام
دفتر وصل رضانی سیز بو گوندن باغلیون
ئولمه مش الان منی هم اوخشیون هم آغلیون
رقّت اوز ویردی بو سوزدن مجلسون حضارینه
اشکینی توکدی خانم معصومه گل رخسارینه
آغلادی ایتدی تعجب حضرتون گفتارینه
عرض ایدوب قارداش بو نه شیون بو نه دل داغلاماق
خوش دگل آخر مسافرلر دالیجا آغلاماق
قیلدی فرمایش سوزون دوز دور باجی افسوس اولا
ویرمشم امضا گرک آرمگاهیم طوس اولا
رجعتندن هر مسافر من کیمی مایوس اولا
ئولمگین غربت مکاندا من تک اقرار ایلیه
عترتین هجرینده لازمدی عزادار ایلیه
رسمیدور بو ئولمگین کیم گیتسه خوشلار شیونی
آغلیون ملک وطنده بیرده گوره سوز منی
ایسترم اما اوزوم ایرانه نامیله سنی
درک ایدر پیک اجل یولدا سنی گوزیاشیله
شانی آرتار طوس و قمّون بیز باجی قارداشیله
اهلبیت و اقرباسین بیربه بیر گوردی رضا
آخره یتدی و داعی دوشدی عزّتله یولا
مختصر گتمشدی درک ایتدی گلور دالدان صدا
دوندی باخدی اوز غلامین گوردی اول صاحب رموز
ناله ایلور وار قوجاقنده ولی بیر خوردا قز
عرض ایدور تاخیر ایله ای محنتی دّن فزون
سن گیدورسن گون کیمی آغلور دالونجا اولدوزون
صبر ایدوب دیندیرمسون گیتسون ئولر الان قزون
دیندیروب حضرت محبتله اونی رام ایلدی
گوز یاشین سیلدی یوزوندن اوپدی آرام ایلدی
هر سوزون اولسا گریزی ای قلم آرتار دوزی
طلعتی آرتار سمانون آرتوق اولسا اولدوزی
کربلاده آلدی آغوشه حسینده بیر قزی
حضرت خیرالنّسانون داغلی قلبین داغلادی
خیمه و میدان آراسیندا اوتوردی آغلادی
یالوارور سلطان مظلومان قزیم گیت خیمیه
عمه لردن خورداجا قزلاردان آیرلدون نیه
آغلاماق قویمور ولی اول خوردا قز دردین دیه
نقطه وصل اوستونه عارفدی جدول چکمیور
اللرین سالمش حسینون بو یننا ال چکمیور
قوزانوب عرشه محیط خیمه لردن شور و شین
یان یانا یاتمش منا قربانی تک یار و معین
بیر طرفده شمر ظالم سسلنور گل یا حسین
وار هراسون سن ئولومدن شانه خالی ایلوسن
گلموسن الده بهانه اهل عیالی ایلوسن
(انورا)ایسته خدای لم یزلدن پشتکار
چارده معصومه لایق سوز یاز اولسون یادگار
دوستان خصم سیرتدن همیشه قیل فرار
یار بد طینت جهاندا بدتر از اغیاریدور
باطنی چوخ تلخدور ظاهرده شیرین کاریدور
مرحوم انور اردبیلی
منبع مجموعه کانالهای مدح و مرثیه
موضوع: حضرت امام رضا (ع) مدح ,
زبان شعر و شاعر: نوحه ترکی , انور اردبیلی
نظرات (۰)
هیچ نظری هنوز ثبت نشده است