متن نوحه ترکی اشعار انور اردبیلی بخش چهارم
متن نوحه ترکی اشعار انور اردبیلی ویژه محرم و ایام سوگواری ائمه اطهار علیهم السلام
بخش چهارم
----
خطبه حضرت امام سجاد (علیه السلام) در مسجد شام
کرسی دینه جلوس ایتدی ستم پیشه یزید
مست اولوب دوشدی غلط فکره بد اندیشه یزید
ریشه نو گل اسلامه ویروب تیشه یزید
ظالم اجدادی گیدن یولدان او ظالم گئتدی
روح تقواسی اولان شخص لری خوار ایتدی
ویردی ناپاک آتاسی جمع ایلین سیم و زری
اولدی تامین فرومایه لرون بد نظری
آری قشری اولا کیم دینیده گورمز ثمری
پول سسی گلسه هایاندان اورا سرعتله گئدر
ساتوب ایمانینی وجدانی سر افکنده ایدر
ایکی عاملدی بیر پول بیری روحانی نما
هر زمان متحدا ویرسه له تشکیل قوا
قاباقیندا بولارون کیم دورا ایللوله فنا
نئجه خالص زریله کلک شریح بی دین
یخدیلار مشترکا خاتم پیغمبر ائوین
نینوا فاجعه سین بو ایکی نیروی قوی
قیلدی تکمیل ایدوب اهل ستم پیشروی
مشعل ظلم یانوب سوندی چراغ علوی
ئولن ئولدی بیلوسوز تنگه سالوبلار قالانی
چکدیلر رشتیه بیر عده یتیمه بلانی
سارالان گللری ظلام سالوب پیچ و خمه
شام ویرانه سی ماوا اولوب اهل حرمه
قالدیلار منزل مخروبه ده پیچیده غمه
سوزش درد مصیبتله اورک داغلادیلار
باش باشا ویردیله نوحه دیدیلر آغلادیلار
نجه کی شمع چکر شعله حرارت ده یانار
یاندوقیجا اریوب دامنینه اشکی آخار
شعله چکدی اریدی غمدن او یورقون بالالار
چوخ اسفلی حالا غصه اولاری سالمیشدی
بیر دری بیرده بدنلرده سوموک قالمیشدی
فکر بیر قطریه تشبیه مصیبت دریا
قطره دن بحرین حسابین گورر اهل معنا
اولدی هر ثانیه زهرا قیزینا عاشورا
کربلادن اورانون محنتینی آز بیلمه
سن رقیه ئولومون زیبنه آز غم بیلمه
او قیزون سنّی آز اولدی غمی بی حد و حساب
دوره لردی بالاجا قبرینی لیلی و رباب
زینبون اوخشاماسی عالمی ایلردی کباب
تاپمادوم جان بالا سویلردی علاج ئولمگوه
آغلارام گوشه ویرانه ده آج ئولمگووه
قلبیمه محنت اوخون هر بیری مین اوخدی قیزیم
یازمیشام سینمه نسگللی سوزون چوخدی قیزیم
قبروون اوسته چراغ روشن ایدم یوخدی قیزیم
داد آلان دادوی آلسون سنه امداد ایلسون
بو قرانلوق ایووی حق اوزی آباد ایلسون
چوخدی سوز یازماقا یوخ فرصتیم ای اهل عزا
بیر گیجه گوردی خانم عمّه سینی زین العبا
اوتوروب نافله لیلی ایدور یرده ادا
دیدی سن کامله سن عالمه سن محرم راز
نیه اوتدوق یری بس ایلیوسن عمّه نماز
خبر آلدون نیه مندن دیدی بو سرّی بالا
قویمادون قلبیده کی دردیمی قلبیمده قالا
اوچ گونون آجلیقی اوغلوم منی سالمیش بو حالا
ویرورم خیرداجا قیزلاره غذا حصّه می من
یاتورام آج دیمورم بیر کسه ئوز غصه می من
زینبون قیلدی سوزی حضرت سجّاده اثر
آغلادی ایتدی جمال اللهی گوز یاشیله تر
دیدی اقدام موثر ایدرم عمّه سحر
سن گرک قارداشوین گورملی قبرین گوره سن
قویمارام خیردا باجیم تک بی بی آج جان وئره سن
گئجه کی اولدی سحر باشلادی برنامه سینی
چوخ مرتب ایدوب اگننده اولان جامه سینی
آچدی سیلدی توزونی باغلادی عمّامه سینی
دیدی زهرا قیزینا سیّد ابناء بشر
گیدورم مسجده عمّه گوروم الله نیلر
ترک ویرانه ایدوب مسجده یوز قویدی امام
گوردی سجّادی گیدور ایلدی زنبده قیام
بار الها دیدی رحم ایله کمک سیزدی بالام
صورا یوز دوتدی خانم اگلشن عورت اوشاقا
ویردی فرمان گلین قیز هامی دورسون ایاقا
بیزیچون راهنمادور دیدی بو زین العبا
نچه یول قاتل الیندن بیبوز ایلوبدی رها
گیدگون مسجده شاید خطر اولدی بالاما
عهد همت هاموموز عهد ایلیون باغلاشاقون
وروب اینجتسله اطرافین آلوب آغلاشاقون
اموی مسجدی بیر مسجد زیبا و کبیر
روز جمعه ائیدی جماعت دولی حضار کثیر
دور منبرده شیوخ اموی، تیره ضمیر
وزرا هیات مخصوصیله سلطان پلید
مسجدین شاه‌نشینینده اوترموشدی یزید
ناگهان داخل اولوب مسجده فرزند نبی
جنب منبرده جلوس ائتدی شریف علوی
حیر‌ته دوشدی هامی گو‌رجک او والا نسبی
آچیلیب رمز و اشاره یولی هر مرد و زنه
دیدیلر خارجی گلدی نیه بو انجمنه
وقت او وقت اولدی چیخیب منبره ناپاک خطیب
جیره‌خوار اموی خودسر و بی‌باک خطیب
پرده شرمی خطابیله ائدیب چاک خطیب
قیلدی تعریف ازل نسل ابوسفیانی
صورا هذیان دانیشیب سب ائله‌دی مولانی
مسجده بیر ملکوتی سس اوجالدی او زمان
توتولوب هرزه خطیبین دیلی، سیندی خفقان
او صدا صاحبی گفتاره گلیبدیر اوجادان
ای خطیب اموی ساخلا خطابه ادبین
خلقی راضی ائلیوب خالقین آلدون غضبین
صورا یوز دوتدی یزیده دئدی اول میر گرام
اذن وئر‌سن منه بو تخته‌نین اوسته چیخارام
رخصت آلدی اوتوروب عرشه منبرده امام
ذاتی اعلایه فصاحتله ائدیب حمد و ثنا
او دانیشدیقجا خانیم عمه‌سی ایلوردی دعا
ایها الناس، اولون مطلبه آگاه بیلین
بیزه بذل ایلیوب آلتی صفت الله بیلین
یئتدی نعمتله ویروب مرتبه و جاه بیلین
ارثدور جود و فصاحتله شهادت بیزده
واردی اخلاق و عبادتله شجاعت بیزده
قلب مومن‌ده اولان مهر سزاوار بیزیم
انبیاء زمره‌سینه سید و سالار بیزیم
خلقتون مفخری پیغمبر مختار بیزیم
حافظ قلعه دین حیدر کرار بیزیم
حضرت حمزه بیزیم، جعفر طیار بیزیم
لیل اسرا ملکوته گئده‌نین اوغلی منم
ساحت اقدسه معراج ائدنوناوغلی منم
قاب قوسینفتدلا گوره نون اوغلی منم
اوکی گویلرده ائدیب راز و نیاز اوغلی منم
قبله‌تینه اوکی ائیلیبدی نماز اوغلی منم
زمز‌مون اوغلی منم، مکه منا اوغلی منم
مشعرین اوغلی منم، مروه صفا اوغلی منم
عرفات اوغلی منم، غار حرا اوغلی منم
مسند عدلیده داد ایلیون اوغلی منم
ایکی نیز‌یله جهاد ایلینون اوغلی منم
گلشن کربوبلاده سولانون اوغلی منم
لخته لخته گوزونه قان دولانون اوغلی منم
قانلی باشی دالیدان ذبح اولانون اوغلی منم
سویولوب کوینگی عریان قالانون اوغلی منم
پیکری خاکیله یکسان اولانوین اوغلی منم
تانیون سیز منی مظلوم آتانون اوغلی منم
باش وئریب محضره حقه چاتانون اوغلی منم
قیزلاری چولده هراسان یاتانون اوغلی منم
نیزه لر اوسته باشی داشلانانون اوغلی منم
ئولمه میش تعزیه‌سی باشلانون اوغلی منم
خارجی آدیله مظلوم ئوله‌نون اوغلی منم
ئوزی مهمان سوسوز جان وئره‌نون اوغلی منم
اوزوگی بارماقی الده گئده‌نون اوغلی منم
ساربان اللرینه ال تاپانون اوغلی منم
سینه‌سی اوسته قوشون آت چاپانون اوغلی منم
ختم پیغمبره سیز ساخلامادوز ذره حریم
بیر اوچوق یرده یاتیب ایندی نوامیس حریم
غصه دن زلفون آغاردوب قوجالیب عمه‌لریم
طلقا‌زاده بیزی ایسته‌مور آزاد ائله سین
غیر‌ت و دینی اولانلار بیزه ایمداد ائله سین
حضرتون خطبه سی حضاره گتوردی هیجان
اعتراض ایلدی شام اهلی یزیده اوجادان
اوزنا زاده اولوب عاقبتیندن نگران
ابن مرجانه دیدی ایتدی سیزه بیدادی
قصر خضرایه ئوزیله آپاروب سجادی
معذرت ایستدی حضرتدن او نامرد و دغا
گتوروب قویدی حضور شهه بیر کیسه طلا
دیدی بو سکه لری قانلاروزه ایله بها
ضمنا هر خواهشون اولسا منه خدمتده وارام
دیدی سجاد گوتور بو قیزیلی ایله حیا
گر یرون تپراقی داشلری اولا مغز طلا
اکبرون فکر ایلمه کاکلینه قیمت اولا
خون بها سندن ئوزی حشریده خونخواه آلاجاق
قیمتی چوخدی آخان قانلارین الله آلاجاق
اوچ تمنا ایدورم بسدی قبول ایتسون اگر
آتامون قانلی باشون ویر اَوَل ای فتنه سیر
قانلی لبلردن ایدوم بوسه توکوم اشک بصر
ایکیمینجی بیزه لازمدی لباس شهدا
وطنه الده گرک تحفه آپارسون اسرا
اذن ویر بیرده شهیدانه قوراق بزم عزا
قیلسون آزاد خانم عمّه لریم آه و نوا
اوّلین خواهشی ردّ ایتدی رئیس طلقا
دوّم و سوّمینی ایلدی ناچار قبول
قصره گلسون دئدی یاس دوتماقا اولاد رسول
سویدوروب بیر اطاقین پرده سینی زینتینی
قاره چکدیردی عزاخانه ایدوب صورتینی
هنده آلدی نظره یاسلیلارون حرمتینی
قصریده کیم واریدی بیر بیر ایدوب اهل عزا
ئوزیده قاره گیوب سالدی کنیزلرده قرا
وقت اولوب اهل حرم قصره گلوب داخل اولا
زینبی گوردیله حیران باخوری صاق و صولا
گیدروک کاش رقیمده دیدی بیزلن اولا
بالامون دردی یانان قلبیمی بی جا سیخمور
خیرداجا قبرینون عشقی ئورگیمدن چخمور
زینبی دوره لدی عترت سلطان نجف
ترکویرانه ایدوب قویدیلا یوز قبره طرف
هاموسی گوز یاشی گوزده هاموسی دلده اسف
هنده پیشوازه چخوب آچدی محبت علمین
یوزی اوسته یخیلوب زینبون اوپدی قدمین
خوش گلوبسن بو ایوی ایله عزاخانه خانم
هئچ برازنده دگولدی سنه ویرانه خانم
من کنیزم سنه فرض ایلمه بیگانه خانم
هنده نون گوزلری قربان اولا بو گوز یاشوا
بویور اگلش سنه قربان دولانوم من باشوا
قسمت اولمادی گورم حیف اولا دلبر قیزوی
ئوزی زیبا سوزی شیرین و سخنور قیزوی
آقامون گوزلرینه گوزلری بنذر قیزوی
گلون ایندی هامومیز عهد و وفا باغلاشاقون
ویره گون باش باشا ایوده او قیزا آغلاشاقون
اطاقا چکدیله زینب یادا سالدی وطنین
سوزش غصه قیزیشدیردی او یورقون بدنین
دیدی هنده گتورون قارداشیمون پیرهنین
ویرمه سوز کوینگی بو قصریده طوفان ایدرم
نیلورم مسکنی ویرانیه دورّام گیدرم
گتدیلر پیرهنی ایتدی تبرک گوزونه
اوپدی اوخلار یرینی چکدی سارالمیش یوزونه
صورادان الده دوتوب منظره ایتدی ئوزونه
سسلنوبدی آنا زهرا سوزووه ائتدیم عمل
آلمیشام یوسفوون کوینگینی باخماقا گل
مرحوم انور اردبیلی
منبع مجموعه کانالهای مدح و مرثیه
موضوع: حضرت امام سجاد (ع) احوالات , احوالات شهر شام ,
زبان شعر و شاعر: نوحه ترکی , انور اردبیلی
----
در وصف کربلا
یتوروب وجود حسین سنی ابدی سعادته کربلا
خود کعبه سن کیمی یتمیوب شرف و جلالته کربلا
نه یازوبلا و صفیوی کاملانه گلوبدی ذهن مؤلّفه
نه گلوب کتاب مصّفنه نه گلر زبان محرّفه
سنیچون معرّف اولا چتین نقدر قلم یازا تعرفه
حق اوزی اولوبدی معرفون یوخون حاجت آیری معرفه
نجه فکر قصریله و صفیمی گتوروم کتابته کربلا
سنی خلق ایدن ایلیو ب عزیز اودی که عزیزیدی تپراقون
قاریشوب حسین قانینا زبس ایله مشگبیزیدی تپراقون
اورگی دوتوبگ وزی آغلادان ولی مهرخیزیدی تپراقون
نظر حقیقتی وار کیمون گورر اشکریزیدی تپراقون
دل اهل دل سنی درک ایدوب دوشر آیری حالته کربلا
شب قدر تک گجه لر یتر دل زندیه ثمرون سنون
خود باد صبحه صفا ویرور آچلاندا هر سحرون سنون
مرض گناهه طبیب تک اولاجاق یقین ظفرون سنون
ابدی مقامه گیدن زبان اودی که محبّت لرون سنون
گوزی اوسته تربتوی قویوب آپارورو ساطته کربلا
هانی بواراضی دهرده اوجالان سنون کیمی پرچمی
اولاشأن تربتی پاکنون بوقدر کتاب مترجمی
گل آچوبدی معنوی گلشنون قطرات خونیدی شبنمی
کیم آلافراتیده دستماز گتورردله نجه زمزمی
هانی بس سکندر باج گیر باخا بو شرافته کربلا
افقون طلوع گهی درد و غم شرر غمون کوزی سنده دور
بالا قزلارون بابا وای سسی اورگ اودلیان سوزی سنده دور
گوزینی تیکوب چوخی کعبیه ولی کعبه نون گوزی سنده دور
او حسینی که آدی کیمیا هامی آختارور اوزی سنده دور
بوسوزون دلایلی بسته دور یتشن روایته کربلا
خوش او زایری که تلاش ایدوب سنی گورمگه آلا تذکره
گله صادقانه یوزین قویا شه مشرقین یخیلان یره
او خیا زیارت وارثی یتوره سلامینی آخره
چخادور بهشتی خیالیدن اله سالسا کیم ایله خاطره
چکه جک بهشت اونون حسرتین گله جک سماجته کربلا
ایلیور مقامیوه اکتفا سینووی یاروب ایلدون شکاف
یارالی حسینی قوجاقلادون دولانوبدی صحنون اولوب مطاف
یتوب افتخاره مقاموه گلوب انبیا ایلدی طواف
سپیلوب جریدۀ دعوتون در رحمت حق اولوب اضاف
گلنون مطافوه حاجتی یتشوب اجابته کربلا
سن او مهد روح نواز سن بوریوب نهادوی عاطفه
هانی مستحبّی سنون کیمین گله واجبیله ترادفه
عملی فنادی او زاهدون ایده گر سنیله مخالفه
یازورام بوبیتی توخونسادا سنی ساده یِر بیلن عارفه
بلی یوخدی معنوی ارزشی دوزه هر ریاضته کربلا
اله ملک وصفوی چوخ چتین گتورم نقدری آچام علم
نجه تند بادیده بحریدن چخادار کناره اوزین بلم
او صفات حسن که سنده وار یازا بیلمورم که قلم قلم
نقدر ادامه ویرم سوزه او قدر فشاره دو شر قلم
منه بس محالیدی مدحوی یتورم نهایته کربلا
نظریم دولاندی دولاندیرام سوزی شرح ایدم غم و محنتون
یری واردی حشره تک آغلادا مژۀ محبّی مصیبتون
غمیلن سرشتیدی فطرتون گرک اشگیلن اولا زینتون
نیه اولمادی بو جهان فنا آچلاندا صبح قیاتون
ایله صبحگه که نظیر دور سحر قیامته کربلا
یادیمادوشنده محرّمون اونی سنده که دوشن اتفاق
اورگیم یانور نجه که یانار آلیشاندا مجمر احتراق
شه مشرقینی عراقه گر گتیمیشدی کوفه لیلر قوناق
نیه باغلیوبلا سویون یولین ایلیوبله ظلمده اتفاق
سو آخا آخا بالا قیزلاری یتشوب هلاکته کربلا
ایلدی یورش سپه بلا بوریدی شهنشه بیکسی
سو کیمین گول اوزلی جوانلارین یره آخدی خون مقدّسی
یخلان زمانیده قلبنون یره میوۀ تر و نورسی
سسه گتدی رشتۀ قلبینی علی اکبرون اوجالان سسی
یاخون اولدی اوغلونی گورجگین یتیشه شهادته کربلا
دیه بلمورم که اوشه گلوب گوروب اوغلنی ایتوروب اوزون
بالا وای دیه دیه باشینی دیزی اوسته آلدی أوپوب یوزین
گوزینی سیلوبدی بونیّته آچا قانیلن دوتولان گوزین
یوزینه باخا دم مرگیده گتوره بیانه اورک سوزین
دیله گلمیو بدی دچار اولوب گلی باد آفته کربلا
گل باغ احمدی بیر به بیر یوزی اوسته یخدی ستم بِلی
چمن حسینی فنا ایدوب ایله داشلانوبدی جفا سِلی
بنی هاشمون آئی باتجاقین دوتولوبدی هاشمیان ائلی
شه مشرقینون اسوب دیزی کسیلوب امیدی سینوب بِلی
یره قانلو پرچمی دوشجگین کچوب ایش وِخامته کربلا
دیله قارداش آدی گتورمین گتوروب مناده گلوب سسه
نه زمانیده یخیلوب یره قوشون ایستیردی باشین کسه
یتوروب منایه حسین اوزون غم اولوب مؤثر او بیکسه
یارالی باشینی دیز اوستونه او شه آلدی دیز لر اسه اسه
اوخ آتوب هوایه گلوب قوشون دل آچوب شماته کربلا
صف محنتی شه خون جگر دل آلشدی سندیرا بلمدی
قوشون ال چالوردی وزیرینه اودی بزم غم قورا بلمدی
یانایانه ایستدی آیریلا ایاقا دورا دورا بلمدی
گوزینون بیرینی سیلوب ولی بیری قالدی ال ویرا بیلمدی
چون اذیتیدی عقیدمه یتشن جراحته کربلا
مرحوم انور اردبیلی
منبع مجموعه کانالهای مدح و مرثیه
موضوع: احوالات کربلا ,
زبان شعر و شاعر: نوحه ترکی , انور اردبیلی
----
راه شام
چاتدی اِئله کی قافیلیه یولدا قالان قیز
غم چتری بلالی باشینا سایه سالان قیز
یول زحمتی دلدن سالوب آرامین آلان قیز
سر نیزده گوردی آتاسین فوری دل آچدی
گویا سارالان غنچه گلستاندا گل آچدی
سن محض کرم من باباجان عشقیده کامل
کامل اولان البتّه اولار خیر ایشه عامل
افتاده لره ائتدون عجب لطفوی شامل
سن شه ولی من غرقۀ دریای تأثّر
سندن نه دلیلیه ائدوم اظهار تشکّر
ائتدون منی سن قافلۀ غمده سرافراز
اولدون اوجا نی ده بو گونی قاریه دمساز
مثلون آتالیق عالمی عالمده تاپولماز
وار باغ بهشتون نه صفاسی سنه گلسون
قانلی باشیوین درد و بلاسی منه گلسون
بیر قمچی وئروب زجر اَلینه چرخ جفاکار
پیچ و خم ائدور قالخوب اَننده چو سیه مار
قول قوّه لی بازوسی قوی ای شه ابرار
قمچیله بالا قیزلارین آرامینی آلوبدی
سالم یتوشاخ مقصده اقباله قالوبدی
منکه سنی امداده چاغوردوم بابا غمله
گلدی بو دَنی تاپدی منی فکر ستمله
قالخیزدی گویه قمچی سینی ایلدی حمله
صیّادی گورنده اوزومی قوش تک ایتوردوم
تعظیم ائلدم یولداشینی درده گتوردوم
یا شیخ دئدوم قویما منی وورسون اماندی
ئولّم بو بیابانیده قلبیم نگراندی
بیر حالدا گوروب دشمنیم احوالیمه یاندی
زجرین نقدر کینه و اجحافی واریمیش
یولداشی گینه اهلیمیش انصافی واریمیش
هر چند منی گوردی بی بیم زینب علیا
پیشواز ائدوب آغوشه آلا اولدی مهیّا
هی سسلدی گَل سینمه من گئتمدوم امّا
گویلوم سینوب اوندان سوزی گیزلتماقا گلمز
بو تئزلیگه قلبیم هله عمّمله دوزلمز
اول خرداجا قیز درد و دلین ایلدی اظهار
با جائیدی ائتسیدی حسین نیزه ده گفتار
سیل گوزیاشیوی چکمه قیزیم آه شرربار
من نیزه نون اوستونده دایاندوم سنه خاطر
گئت عمّه وین آغوشینه سنده منه خاطر
ایّام اسارت قوتارار ایلمه افغان
نه زجر اولی نه قمچی و نه خار مغیلان
نه سیلی وورالّار نه ایاقوندن آخار قان
تاب ایله مصیباته اوزوندن بئله چیخما
مظلوم بالا یورقون بالا صبر ایله داریخما
مرحوم انور اردبیلی
منبع مجموعه کانالهای مدح و مرثیه
موضوع: احوالات راه شام ,
زبان شعر و شاعر: نوحه ترکی , انور اردبیلی
----
احوالات راه شام
غروب اولاندا گیدر قلبیدن قراری یتیمون
قرا گیینده هوا قالماز اختیاری یتیمون
شفق رنگ طلایی گیور لباس شبانه
دوشر بیر آیری حالا حال اضطراری یتیمون
هزار هزاریه نسگل اولور سرود عزاسی
هزار درده دونر دردی از هزاری یتیمون
ائدر یول اوستونی دیواریلر کنارینی ماوا
گر اولماسا ایوی آرتوق اولار فشاری یتیمون
ایکی الیله گوررسن ایکی دیزینی قوجاقلار
توکر سرشگین ایکی چشم اشکباری یتیمون
اولا محال گل آرزوسی بیرده شکوفا
طبیعت ایتسه کمک اولسا مین بهاری یتیمون
ساتار گلیب گیدنه در اشگینی آلان اولماز
عیاریدن کم اولار در پر عیاری یتیمون
کمان دلدن اوچار تیر آهی مقصده چاتماز
فقط یانقلی ئورکلر اولار شکاری یتیمون
یوخوسی گلسه قولون بالش ایلیوب گیدر هوشه
دوشر نظردن ایکی نرگس خماری یتیمون
دارار قرا تلینی لایلای دیر قره یللر
یل اسدوقیجه گیدر طره دن غباری یتیمون
گوتورور عکسینی عکاس عالم ملکوت
پوزار ملکلریده غملی یادگاری یتیمون
اوجا سسی ائشیدر دیسگینر دورار یوخوسوندان
ئورکده وحشتی آرتار بلا دچاری یتیمون
قویار بلالی باشین چیگنینه بنفشیه بنذر
اولار بنفشه مثالینده رنگی ساری یتیمون
گینه ده اوغلان اوشاقی اولا نه غصه سی واردی
دوزر بلایه اولار غمله سازگاری یتیمون
آتاسی ئولسه اوغولدان قیزا موثر اولار چوخ
آنا باجینی کباب ایلر آه و زاری یتیمون
خصوص بیر قیز اوشاقی اولا خوش ادا و صحبتی شیرین
آنا باجینی کباب ایلر آه و زاری یتیمون
حسین کیمی آتانون سینه سینده پرورش ائتسه
علی نشانی اولا عمِّ نامداری یتیمون
دوشر نه حاله او قیز ساربان قویوب گیده چولده
اوزه ائلیندن الین بوش قالا کناری یتیمون
گوزون آچوب یوخودان پهن دشته ائتدی نظاره
گوروبدی کوچ ائلیوب مقصده قطاری یتیمون
اگر چه آج سوسوزیدی غذاده چیخدی یادیندان
مدار غصه ده تنگه دوشوب مداری یتیمون
صاقا صولا نچه یول عمه عمه سسلدی قاچدی
دیدی هایانداسان ای غم گونونده یاری یتیمون
سسینه اولمادی سس ئوز سسین ایشیتدی او چولده
ئوزون یوروب آزالیب قدرت فراری یتیمون
قدم آتیب بو قیزون نیش خار ایاقینی ئوپدی
اورک قانی ایاقیندان اولوبدی جاری یتیمون
کسیلدی چاره سی یورقون بالا یول اوسته اوتوردی
دوشوب خیالینه ئوز شهری ئوز دیاری یتیمون
گوگول قوشی پر آچوب اکبرین اتاقینه گیتدی
گوروبدی اوردا دگول قاره گوز نگاری یتیمون
کمال یأسیله یوز دوندروبدی راه دمشقه
دیدی گیدیب بو یولی شامه غمگساری یتیمون
هایانداسان علی ایستکلین اولدی چوللر اسیری
نه قورخولی یئره گل گور دوشوب گذاری یتیمون
آتام بابام کیمی سنده علی یتیمه نواز اول
محبته واریدی سندن انتظاری یتیمون
بی بی لریمه گلایه ایله منیم طرفیمدن
آزالدی تئز نه سببدن گور اعتباری یتیمون
اوزوم یوخودان اویاندیم نه چاره بختیم اویانمور
اویانسادا دی گوروم بختینون نگاری یتیمون
اثر ایدیبدی سوزی پهلو شکسته فاطمیه
پوزوبدی حالتینی حال انکساری یتیمون
گلوب او خیردا قیزون باشینی دیز اوستونه آلدی
اوپوبدی لبلرینی مادر کباری یتیمون
جمالینه توکولن تللرین اویان بویان ایتدی
مجسم اولدی نظرده صولان عذاری یتیمون
گوزل بالا دی گوروم کیم ووروب جمالیوه سیلی
قصاص بیلموب آلار حیِّ کردگاری یتیمون
دچار ثانی اولوبسان بویوک ننون کیمی سنده
اونا چتین یتیشه تیره روزگاری یتیمون
گوزوندن اشگیوی سیلم بو چولده همدمین اولام
دوزنمرم قالا تنها سینا وقاری یتیمون
داریخما شامه گیدنلر گلر سراقیوه الان
که چوخدی غافله ده یار هوشیاری یتیمون
او خردا قیز او خانم عورتین ائشیتدی کلامین
دیدی گمان ایدیرم آرتدی افتخاری یتیمون
بی بیم کیمی بو خانم دم بدم اوپور دوداقیمدان
ایکی گوزوندن ایدیر اشگینی نثاری یتیمون
بهشت عطری گلور حوریدی گلوبدی بو دشته
ملکدی یا کی گلوب اولدی یار و کاری یتیمون
اگر بو حور و ملکدور نیه قرا گییونوبدور
عجیب غصه لیدور یار دلفکاری یتیمون
غریب آتامون آدین ازبر ایلیوبدی دیلینده
چوخ آشنادی بونا باب تاجداری یتیمون
گوزلدی گوزلری عینا بی بیمه بنذری واردی
باخاندا گوزلرینه قالمور اختیاری یتیمون
مدینه اهلیدی اولما دوشوب گذاری بو یردن
عجب کمک یتیروب آفریدگاری یتیمون
تانیمورام ولی بو دیندیریر منی ئوز آدیملا
نه غصه سی وار اولا بیله غصه خواری یتیمون
اورکلنوب دیدی بیردن خانم گلورسن هایاندان
فدا او گوزلریوه قلب پر شراری یتیمون
سنون بو یاخشیلیقون لازم هدیه دی نیلوم
نه واردی قولباقی نه واردی گوشواری یتیمون
بیزیم قبیله میز اهلی سخادی ایش بیله دوشدی
اولان بو گوز یاشیدور یوخدی آیری واری یتیمون
من آغلورام آتامین باشینی ووروبلا جدایه
آتاسی ئولسه اولار اوخشاما شعاری یتیمون
سنون ئولوبدی کیمون آهون اوستن آه چکیرسن
باخور سنه چوخالور درد بیشماری یتیمون
نفسون اودلیدی قدین خمیده ساچلارین آغدی
قرا گونون قره ائتمه به حق تاری یتیمون
جواب وئردی منه فاطمه دیلّر عزیزیم
شریک محنتیوم جداً آری آری یتیمون
بالام حسینه جگر گوشه سن بویوک ننووم من
منه موثر اولار بزم سوگواری یتیمون
بیبوندن ائتمه گلایه قیزیم بیبونده نه چاره
فلک یوروبدی اودور مام بردباری یتیمون
جزای خیره چاتار پیشگاه حقّیده (انور)
رفیق قلبیله کیم اولسا دوستداری یتیمون
مرحوم انور اردبیلی
منبع مجموعه کانالهای مدح و مرثیه
موضوع: احوالات راه شام ,
زبان شعر و شاعر: نوحه ترکی , انور اردبیلی
----
کوچ از قتلگاه
گیدورم شامه حسین سرور و سرلشگرسیز
سروریم یات یارالی کرب و بلاده سرسیز
سندیرار ابر گلی گلشنه توکسه دولونی
تازیانه ایله سندیرمش اوشاقلار قولونی
بودا بیر قافله دور باشلیوب عشقین یولونی
زنگی بیر خورداجا قیز ناخوشی وار بسترسیز
وار قاباقدا یورولان قیزلارا طولانی مسیر
زندگیدن گورورم عترت پیغمبری سیر
شهدانون آنالارین ایلیوب شمر اسیر
صود دوشونده ملیورغملی رباب اصغرسیز
قوجالان وقته آنا عمری اولار بی پایه
سرو قد اوغلی سالارباشینون اوسته سایه
اوغلونون بیر تلینی ویرمزیدی دنیایه
لیلیه چاره ندور شامه گیدور اکبرسیز
اللی بش ایلدی سپهر مُحَنون اولدوزیام
مونسیم غمدی ئوزوم سُفره ماتم دوزیام
ورولوب الده ئولن بیر آنانون من قزیام
اورگیم آه سیز اولماز گوزوم اشک ترسیز
روزگارون روشی گورمنی نه حاله سالوب
مَحرَمَم وحی ایوینه دوره می نامحرم آلوب
یوخ جلوداری علینون قزی آواره قالوب
گورورم محملین اطرافین علی بنذرسیز
قاسمین اولدی طویی گورمدی نُقل وشاباش
آناسی نُقل کیمی توکدی ایکی گوزدن یاش
دی حسن قارداشیما گوزلرون آیدین قارداش
قولاقی یاره گلین شامه گیدور معجرسیز
مرحوم انور اردبیلی
منبع مجموعه کانالهای مدح و مرثیه
موضوع: کوچ از قتلگاه ,
زبان شعر و شاعر: نوحه ترکی , انور اردبیلی
----
کوچ از قتلگاه
یوز قویوب مقتل عباسه پریشان زینب
یتیشوب گوردی عجب منظره وار یاللعجب
بیر خانیمدور اوتوروب باشدا قرا چادر شب
باخور السیز بدنه ذکری فقط اوخشامادی
ایله آغلور ایله بیل اوغلی ئولن بیر آنادی
دئدی کیمسن اوتوروبسان بو بیابانیده تک
مسکنون کرب و بلادور مگر ای قاره لچک
گوز یاشون آخدوقیجا ایلوری زهرایه کمک
گلوسن شدتیله نالیه تیترور بدنون
مثل اینکه داغیلان پیکر ئوز اوغلوندی سنون
زینبون اوخشیوسان یاخشی عزیز قارداشینی
سوزوون سوزشی رخساره چکر گوزیاشینی
او خانم ضجه چکوب بیردن اوجالتدی باشینی
دئدی گل وئر منیله باش باشا من فاطمیم
قیزیلان خوشدی آنا آغلاشا من فاطمیم
نچه گوندور منه مسکن دی قیزیم کرب و بلا
نوفلین ظلمی سالوبدور بالامی گور نه حالا
من دیوم اوخشاما یا سن دیوسن غملی بالا
سن دنن بو داغیلان جسمه هما سایمدی
من دیوم اللری محشر گونی سرمایه مدی
مرحوم انور اردبیلی
منبع مجموعه کانالهای مدح و مرثیه
موضوع: کوچ از قتلگاه ,
زبان شعر و شاعر: نوحه ترکی , انور اردبیلی
کوچ از قتلگاه
زبانحال حضرت زینب (سلام الله)
قالیبدور اللریم قوینومدا ای الده ئولن قارداش
هارای ، ای قلبینی اوچ شعبه لی پیکان بولن قارداش
ائشیدسون زینبین اعلانینی آزاده انسانلار
حقیقت خطّینی سیر ایلینلر پاک وجدانلار
منای کربلاده آل احمد دن آخان قانلار
حقیقت اوسته آخدی ظلمی ائتسون ریشه کن قارداش
شریح بی حیااسلامه قوی فتوا اوخون آتسون
تعدی ایلیوب شرعه رسول اللّهی آغلاتسون
آنام زهرایه آند اولسون باجون قویماز بو قان باتسون
ئولوبدور شیر مردون حمد اولا وار شیر زن قارداش
قسم اولسون داغلمیش صفحه وه ای جلد سیز قرآن
حقیقت قویمارام اولسون ریایی پرده ده پنهان
وظیفمدور امامت مکتبینده وارثم الآن
علی المرتضی تک منده اولّام بت شکن قارداش
اگر من من دئمک نقصانیدور اهل فضیلتده
سهیمم سیزده کی ناموس وغیرتده شرافتده
به حول قوه حق بو سفرده بو اسارتده
اوزی اوسته گتیرم کرسی طاغوتی من قارداش
بو منطق کی وئریب الله منه شمشیر برّادور
توانا منطقیم هر یرده حلّال معمادور
دمشقین فاتحی زینبدی گون مثلی هویدا دور
اگرچه قالمیوب آل اللهه شمشیر زن قارداش
الولی ائلدیریم تک خرمن اشراری یاندیرام
حسینیم وای شعاریله دل اغیاری یاندیرام
دوولسمده چراغ حیدر کرّاری یاندیرام
زیاد اوغلی ائدورائتسون نبرد تن به تن قارداش
نئجه گور جسمووی صد چاک ائدیبدور نیزه وخنجر؟
نئجه گور قان وئرور جدیم پیمبر اؤپدیگی حنجر
ایشیم یتدی هارا گور روزگار اولدی هارا منجر
سن اولدون قرمزی گل تک من اولدوم یاسمن قارداش
سوزوم چوخدو اؤرکده بیلمورم سوز باشلیام هاردان
خیامون تار وماراولدی الیم چخدی یوخا واردان
منیم بخت اولدوزوم روشنگریدی کهکشانلاردان
مدارینده ایتیردی سیرینی غم غصه دن قارداش
بو خسته جان حسین جان جانوه جانانوه قربان
رسا فریادوه پر طنطنه برهانووه قربان
یوز اون دورد سوره نی تضمین ائدن القانوه قربان
سنه قربان آتام جدیم آنام مظلوم حسن قارداش
حسین سن ساغلیقونداآختاراردون آجی عریانی
وئرردون خانه خانه مردمه پوشاک الوانی
گوروم ویران قالا بو سفله پرور هرزه دنیانی
نه دنیادور سنه اوندان یتیشمز بیر کفن قارداش؟
وقارون عرشدن اعظم یاتیبسان بیرچوخور یرده
تالانمش کوینگون یوخدور برهنه سینوه پرده
آنام دوزمزدی بیرزلفون او شاقلیقدا باتا گرده
اوتورمازدون مگر مهر نبوت اوسته سن قارداش؟
اگر امکانیم اولسیدی ائدردیم بو چولی مأوا
جنازون دفن ائدردیم قویمازیدیم آغلیا زهرا
گلینجه اربعینون قبریون اطرافینه حتّی
اکردیم قرمزی گوللرگوگردردیم چمن قارداش
نه باش آچدیم بو نعش اوسته نه بزم ماتمون قوردوم
بالا قزلاری قمچیله ورولّار چاره یوخ دوردوم
بو عریان پیکرون من بیراولان اللّهه تاپشوردوم
بدون معجرم سن یات بدون پیرهن قارداش
گوروم سعد اوغلنی اولسون حسین خوار و سرافکنده
عرب تاریخینی تار ایلیوب جان قویمادی منده
چوخ عضوون بیربیریندن آیریلیب اولموش پراکنده
مناسبدور مگر آتلارایاقیله بدن قارداش
اوزاق یول یولداشیم عورتدی یا اطفالیدورخردا
هاراگئتسم اوزوم اما خیالیم بوردادور بوردا
دوشم قوی بندیدن بنده کوچوم قوی یوردودان یوردا
اوزوه سن وطن تاپدون منه یوخدور وطن قارداش
حسین جان سنسن ایستکلی رسول اللهه اللّهه
بو کوفه اهلی کج فکر ایلیوبلرگئتدی بی راهه
قسم اولسون سویولموش نعشوه بو چکدیگیم آهه
یخلمازهئچ زمان الله پیمبر ایستین قارداش
مرحوم انور اردبیلی
منبع مجموعه کانالهای مدح و مرثیه
موضوع: کوچ از قتلگاه ,
زبان شعر و شاعر: نوحه ترکی , انور اردبیلی
----
واقعه دیر راهب
راس حسینی راهب ائدوب دیره میهمان
قارداش قوناق گیدوب باجیسی قالدی ناگران
تزتز اوجاتدی آهینی قلب ملولیدن
حقی واریدی چون گوزی قوخمشدی خولیدن
فکر ایلیوردی ئوز ئوزونه اول وفاسیر
ترسا ائوینه هانسی مسلمان قوناق گئدر
هم دینیدی حسینمله خولی هم کتاب
مطبخ سراده کولدن اونا آچدی رختخواب
هم دین اولان منی گتوره بیله شیونه
نصرانی نیلر الله ئوزون رحم ائله منه
بیر باش که سندن ئوزگه نی معبود بیلمیه
بیر باش که غیر بیرکسه یارب اگلمیه
اون یدی یاره سی اولا تکبیرینی دیه
محرابی قان اولا دوشه عشقیله سجدیه
شمر دنی عناد ایلیه ظلمده دورا
دالدان کسه او باشی سنان نیزیه ورا
کهف آیه سی اونا اوجا نی ده شعار اولا
بازار کوفه نی دولانا سنگسار اولا
قانه باتان محاسنینه تازه قان آخا
قرآن صداسینی کسلر قیزلاری باخا
مرجانه اوغلی قرب و مقامین بوله بوله
معصومی متهم گوره توهین ائدوب گوله
حق سوز دیین دوداقلارینا خیزران ورا
معناده فاطمه باش آچوب الامان ورا
قورخوم بودور که راهب اونا ایلیه جفا
قارداشمون یری بوگیجه راحت اولمیا
دنیا حسینه عیسوی نی میزبان وئروب
هیچ بولمورم او باشه هایاندا مکان وئروب
دیر ایچره کاش مطبخ و خاکستر اولمیا
تا کول یارالی قارداشیما بستر اولمیا
ایکاش عیسوی چالشا امر خیرده
یورقون باشا مکان وئره محراب دیرده
قانلی یوزون یووا قوریان لبلر ایسلانا
آئینه نون توزی سیلینه دیر ایشقلانا
راهب اونون جمال دل آراسینه باخا
ذکر ایلین دوداقینه سیماسینه باخا
توفیق اولا دانشدیرا تا نیتین بیله
دیندیرسه میزبان قوناقی تز گلور دیله
گلسه حسین بیانه دئیر اصل مطلبی
راهب تمام عمرینه وئرمز بو بیر شبی
جام آلسا خضر عشقیدن عالمده مست اولار
دین مسیحدن چکر ال حق پرست اولار
مظلوم حسین دیوب گیجه دیره قرا چکر
خوشبخت اولار مسیح گلر لبلرین اوپر
عیسا ئوزی حسینچیدی اخیاریلن گزور
باشین آچوبدی احمد مختاریلن گزور
زینب بو فکریله گیجه نی ایلدی سحر
آماده اولدی گیتمگه اول قوم فتنه گر
غم سیرینه دوشوبدی بنات محمدی
رهبانیدن کسوک باشی سعداوغلی ایستدی
راهب دئدی او باشیله من الفت ائتمیشم
اعجازینی گوروب گیجه چوخ صحبت ائتمیشم
سیزسوز گناهگار عملوز جرموزه گواه
ناحق کسوب بوباشی ائدوبسوز بیوک گناه
انجیلی قویموشام یره قرآنی دوتموشام
مریمدن ال چکوب داخی زهرانی دوتموشام
اول گلون کسوک باشی مندن آیرمیون
آلسوزدا باری نیزیه یوللاردا ویرمیون
قانین یووب یارالارینا سپمیشم گلاب
نازک حریریدن یوزونه چکمیشم نقاب
غم بوسه سین گیجه لب و دندانه ویرمیشام
چوخ عشقیله محاسنینه شانه ویرمیشام
انصافیدن دگول باتا زیبا یوزی توزا
یل تند اسوب محاسینینون نظمینی پوزا
وئرسوز منه بوباشیله خوش الفت ایلرم
سجادهء عبادتیمه زینت ایلرم
واردور یری بیانه گله سبط بوتراب
اعجاز منطقیله وئره راهبه جواب
آت بوخیالی قیزلاریم آغلار،قالمارام
قیرخا یاخین گوزتلینیم وار قالمارام
دوندر بو دیری مسجد ائله یغ جماعتی
شرح ایله دردیمی اول عزادار قالمارام
بزم یزیده زینبی تک قویمارام گئده
شمر و سنانه ائلمه اصرار قالمارام
من خیزرانه مشتریم خوشدی گئتمگیم
گل برگینه گرکدی دگه خار قالمارام
چیخ دیردن کناریده باخ اهل عیالیمه
چوخ ناگراندی قورخولی قیزلار قالمارام
ویرانه ده رقیمه من باش چکم گرک
آخر نفس اولام اونا دلدار قالمارام
قویسام دوداق دوداقه بالام تز یومار گوزون
اولماز دوباره شمره گرفتار قالمارام
مرحوم انور اردبیلی
منبع مجموعه کانالهای مدح و مرثیه
موضوع: احوالات دیر راهب ,
زبان شعر و شاعر: نوحه ترکی , انور اردبیلی
----
زبانحال حضرت رسول اکرم (صلی الله)
در دفن حضرت زهرا (سلام الله)
دل شب نه ولوله سالموسان دل دهر فانیه یا علی
یورولان همانی گتورموسن عجب آشیانیه یا علی
بلوسن نه مدت اولار اونون چکور انتظارینی بو گوزوم
الون اوسته ساخلاما ویر منه محن فراقنه یوخ دوزوم
سارالان جمالنه بیر باخوم بالامی مزاره قویوم اوزوم
اوز الیمله گوهر عصمتی یتوروم خزانیه یا علی
بو هما عفیفه دی خلقتاً مثلی یوخیدی عفافده
که شعاع عصمتی گون کیمی گورنوردی صورت صافده
بو گلی امانتی مصطفی سنه ویردی لیل زفافده
سنی باغبان ایلدیم اوزوم گل جاودانیه یا علی
سن امین مطلق عم اوغلی جان بو منیم امانتمون یوزی
بو سنان قولی بو قابور قاسی بو یارالی سینه سی بو گوزی
دیمز علتین منه فاطمه سن اوزون بیان ایله بو سوزی
نه گناهون اوسته دچار اولوب بیله زندگانیه یا علی
زحمات امتی من قبول ایلدیم ایگرمی اوچ ایل تمام
دم واپسین دیمدوم مگربو قزیمدی واجب الاحترام
دفعات تاپشورا تاپشورا نیه بس شهیده گلوب بالام
ال آچوب نه علته اشقیا بیله نازدانیه یا علی
نیه قویدون آخر حریموه سالا یول او فرقه ناکسی
نیه قویدون ال تاپا قهریله آچا خصم باب مقدسی
نیه تز هراینه گلمدون اوجالاندا فاطمه نون سسی
نیه قویدون اللری قنفذون گیده تازیانیه یا علی
نه روا مداریده تنگ اولا فلکی ایشقلی ستاریه
نه روادی گلشن زندگی اولا غم محلی هزاریه
نه روا ملک لر اوپن قاپی یانا ظلم الیله شراریه
دم در چوخ ایستدیگیم قزی یخا آستانیه یا علی
یخلاندا قارداشی اولمادی چاغورا هراینه قارداشین
چاغوراندا فضه نی دادینه یوزه تو کدی غصه لی گوز یاشین
نه من اولدوم آغلیا آغلیا دیزیم اوسته باری آلام باشین
نه خدیجه اولدی فغانیله گله صحن خانیه یا علی
سن اوزون که صحنه قدم قویوب ایلدون مشاهده بر ملا
یخلوب نه حالیله فاطمه بالا وای دیور ایلیور نوا
یتشوب خزان سارالوبدی گل توکولوبدی غنچه سی توپراقا
نچه غم ترانه لی بلبلی دل آچوب ترانیه یا علی
گوزی یاشلی قورخلی قزلاری آناجان ، ایدردی خطاب اونا
نه واریدی دورماقا طاقتی نه واریدی حالت خواب اونا
یوخیدی باشندا عباسی تز ایلدون عبانی نقاب اونا
باش آچوخ دوام ایده بلمدون قالا آن و ثانیه یا علی
بیر عباده چوخ خوش اولار اگر ایده سن تهیه سن ایندیدن
گله سن دمشقه یزید دون ایلینده ظلم لرین علن
ویره سن عبانی او بزمده سالا باشه زینب پرمحن
آناسندان آرتوق اسیر او قز اولا جاق زمانیه یا علی
مرحوم انور اردبیلی
موضوع: حضرت فاطمه زهرا (س) زبانحال ,
زبان شعر و شاعر: نوحه ترکی , انور اردبیلی
----
زبانحال امیرالمومنین حضرت علی (علیه السلام)
بر مزار حضرت زهرا (سلام الله)
آی عمری آز ملالی چوخ باشی بلالی فاطمه
پیمبرون خانم قزی ئورک یارالی فاطمه
عم اوغلووام فراقدن یوخیا گئتمیوب گوزوم
بالالارون یاتوب گئجه بقیعه گلموشم ئوزوم
بیرین تاپوب دینمدوم ز بس یانقلیدور سوزوم
رضای حقدی اول منیم سوزومه حالی فاطمه
حبیب حیّ داورون اگر چه من حبیبیم
اسیر جَوّ محنتم مدینه نون غریبیم
او منبریکه من اونون سخنور و خطبیم
علینون اوردا قطع اولوب گوزل مقالی فاطمه
صحابه لر اسیر اولوب وطنده هیچ کاریه
یانولّا خشکه عود تک ئورکده که شراریه
نه وقت اولار اوزاق دوشوب چخانمیور مناریه
پیمبرون موذِّنی حبَش بلالی فاطمه
اولوبدی باغلی قوللاریم مشیّتون طنابینه
مواظبم پیمبرون شریعت و کتابینه
ائویمده گوشه گیر اولوب اوتورموشام صوابینه
نه ایستورم خلافتی نه قیل و قالی فاطمه
شباهتیم وار اول کسه چو غنچه باغریقان اولا
امرو مسلمیندن همیشه ناگران قالا
گوزونده زهرلی تیکان گلوده استخوان قالا
کیم عُمر ائدور جهاندا گور علی مثالی فاطمه
چکنده مسجده منی او قوم پست و بد روان
حسین دینده آی ننه حسن دینده الامان
دوباره قنفذ دنی سنی ووروب یخان زمان
عم اوغلووندا بوینونا دولاندی شالی فاطمه
وئرنده غسلوی گئجه آلولانوب آلیشدی دل
باخاردی اشکلی گوزوم جنازووه خجل خجل
او ساعتی که پیکرون مزاره تاپدی منتقل
صفادن اولدی مرتضی اطاقی خالی فاطمه
خلافتون عواملی علیده گوردی نرمشی
قاپیمدا قتل محسنه یتیشدی ثانینون ایشی
گرک عیالین حفظ ائده خطر زمانی هر کیشی
فلک بو یرده وئرمدی منه مجالی فاطمه
دئمم چتیندی مرد ایچون غم زمانه یوز وئره
دیمم چتندی دشمنی ووروب عزیزین ئولدوره
چتین بو غمدی هر کیشی چخوب اطاقدن گوره
یارالی صحن خانیه دوشوب عیالی فاطمه
عبامی چکدیم اوستووه گورنده حالیوی بهم
گوز آچ دئدیم که عم قزی باشوون اوسته که منم
دور آشیانه شهپر آچ سن ای کبوتر حرم
دئدون نجه اوچا قوشون سناندا بالی فاطمه
نه نوعی هجر دفترین آچوب وَرَقلَه سون علی
نجه ائوینده اگلشوب دیزین قوجاقلاسون علی
اوزوندن ایلورم سوال ننوعی ساخلاسون علی
او دوُرت کیچیک گوزل باخیش مَلَر غزالی فاطمه
نجه بو قبری تک قویوم دوام ائدوم فراقیوه
نجه گئدوم انیس اولوم او بش قالان اطاقیوه
دانش گوروم سوزون ندور او دوُرت یتیم اوشاقیوه
دئمورسن هئچ نه حالدادور حسینون حالی فاطمه
گونوز چوخ آغلادی حسین گئجه دیل اولمادی دینه
بنفشه مثلی بوینونی اوتوردی قوید چیگنینه
دئدیم که هر گجون کیمی اوغول منه دانش گینه
دانیشدیرانمادیم ولی او خوش مقالی فاطمه
سوزی خلاصه ایلیوم عم اوغلوون سنوب بِئلی
بهار زندگانیمی خزان ائدوب ستم یِئلی
پوزولدی غملی صورته توکولدی زینبون تِئلی
ئولونجه زلفی تک اولار اونون خیالی فاطمه
مرحوم انور اردبیلی
منبع مجموعه کانالهای مدح و مرثیه
موضوع: حضرت فاطمه زهرا (س) زبانحال ,
زبان شعر و شاعر: نوحه ترکی , انور اردبیلی
----
خروج از مدینه
مدینه دن آنا جان ایندی باغری قان گیدورم
مسافرم سنی گَلدیم گورم اویان گیدورم
جلالیلن دوزولوب ناقه و کجاوه مرتّب
سنون اجازویله همرهیمدی ای آنا زینب
وطندن آیرولورام ایندی خائفاً یَترقب
گجه زمانی وطندن چخوب نهان گیدورم
اجازه ویر سنه عرض ایلیوم نجه گیدورم
سالوبلا قافلۀ عشقمی گجه گیدورم
آنا بو یولدا ولی آی کیمی گجه گیدورم
گونوز نهان گجه لر آی کیمی عیان گیدورم
اگر چه ظاهر صورتده واردی چوخلی جلالیم
بو باره دن اورگیمده یوخومدی درد و ملالیم
قطا قوشی کیمی زیر پریمده اهل و عیالیم
گجه نون عالمی آهسته پر زنان گیدورم
ایاقه دور آغاران زلفلری بودم اَله آل
منه بالالاریما ایلیوب دعا یولا سال
بو آیریلوق منی ایلیوب ولیک غرق ملال
یوزومده اشگ روانیم اولوب روان گیدورم
ایاقه دور نه سوزون وار بیور منه گیدورم
وطنی ترک ایلیوب آیری مسکنه گیدورم
علیله بیر قیزیمی تاپشوروب سنه گیدورم
یتیمدور آناسی یوخ ایدر فغان گیدورم
بو قبرون اوسته که تک دورموشام بیله الان
بقیعه گَلماقی گیزلین ایتموشم هامودان
باجمدا بولموری الساعه هاردایام آنا جان
دیدیم باجیما حسن قبرینه بو آن گیدورم
منه وطن یازولوبدی دیار کرب و بلا
گر ایسته سن گوره سن اهل بیتوی گَل اورا
محرّم آئی گَلنده اولاندا عاشورا
منه اولاندا نهان ظلملر عیان گیدورم
دیوم ملالیمی چون نی نوایه گَل آنا جان
دیمم که غم منی سالسا بلایه گَل آنا جان
گر ایسته سن منی کرب و بلایه گَل آنا جان
دیار کرب و بلادور منه مکان گیدورم
دیمم او دشت غم افزایه سن اوگون نجه گل
ولیک قافلۀ عشقی سالما چون گجه گل
گونوز ایشیم چوخ اولار فرصت ایله سن گجه گل
اولاندا مطبخ خولیده میهمان گیدورم
او یر آدی هامویه محنت و بلا گتورور
منیم بو قلبیمه آدی ولی صفا گتورور
بو قبریوه دیرم آهیمی صبا گتورور
حسیندن اولا تا اینکه بیر نشان گیدورم
گَرک کومکلوق ایدم دینه نقد جانمله
او یرده قانه باتام اکبر جوانمله
صفا ویرم او بلالی چوله بو قانمله
او شوره زاری ایدم طُرفه گُلستان گیدورم
یزید مجلسینه دعوت ایلیوبله منی
باشیمی یاره لی ایستور گوره او شوم و دنی
منیم یانمدا تظاهر بکفر ایدر عَلَنی
و لیک بولموری کفرون جهانیان گیدورم
او بزمده اوخورام من کلام سبحانی
باخار دوباره گَلَر غیظه اول جفا کانی
او پست و شوم دوگر اوز ایوینده مهمانی
اوپر دوداقلاریمی چوب خیزران گیدورم
بو شعره باعث اولوبدی حسین آزادی
گیده زیارته بو جمعیلن اولار دادی
سالا اَله « حسنی » گر زیارت اَسنادی
دییر گَرَکدی اولا همرهیم جوان گیدورم
مرحوم انور اردبیلی
منبع مجموعه کانالهای مدح و مرثیه
موضوع: احوالات خروج از مدینه ,
زبان شعر و شاعر: نوحه ترکی , انور اردبیلی
----
خروج از مدینه
آناسینون دوشوب عشقی او قان اولان اورگه
گلوبدی حضرت زهرایه دردینی دئمگه
یتوب بقیعده جام محبّتی داشدی
اوتوردی گیزلین اولان قبریله قوجاقلاشدی
دئدی یوزوم گرک اشک فراقیله بویانا
آتام اجازه وئروبدی گئدم عراقه آنا
بو آیریلیق منیچون مایه ی خیال اولدی
مزارون اوسته داخی گلمگیم محال اولدی
نئدوم که ایش بئله دوشدی منی باغیشلا آنا
حسنی ساخلا یانوندا حسینی بوشلا آنا
یری واریدی اگر سس گلیدی زهرادن
او قبر ایچینده یاتان دلشکسته اعضادن
سنیده گیزلین اولان قبره چوخ گوروبدی فلک
مزاریمه داخی بوندان صورا کیمیم گلجک
مرحوم انور
موضوع: احوالات خروج از مدینه ,
زبان شعر و شاعر: نوحه ترکی , انور اردبیلی
----
ازدواج امیرالمؤمنین با خانم ام البنین (سلام الله)
و ولادت حضرت ابوالفضل (علیه السلام)
و گریز به امان نامه
اثبات مطلبه گرک الده دلیل اولا
محکم شهودیلن یازیلا سوز ثَقیل اولا
واردور محل شُبهه مگر بو روایته
بیر حال دا کی روایته راوی عقیل اولا
بیر گون دیور بویوردی منه قارداشیم علی
بیر عورت ایستورم ائویمه تا کفیل اولا
شرط ازل منزّه اولا خانواده سی
خویش و تبار و طائفه سی چوخ اصیل اولا
عورت اوزی محجّبه پابندِ حکم دین
قدّی کشیده صاحب خُلقِ جمیل اولا
فکریم بودور کی حق منیچون بیر اوغول وئره
یومِ بلاده حامی آل خلیل اولا
ارباب حاجتون ایلیه حاجتین روا
درمانده لر گئدوب قاپوسیندا دخیل اولا
پرچم گوتورسه جعفر طیّاره اوخشیا
عیناً شباهتی منه از هر قبیل اولا
صف سیندیرا جهاد ائده ، سرلشکر ئولدوره
معناده آفرین دیه نی جبرئیل اولا
عشقِ حسینه روحینی تعلیم ائدم اونون
آخر نفس حسین دیوب اوندان قتیل اولا
یئتسه الی فراته حسین سیز سو ایچمیه
مشتاقِ حوضِ کوثر و یا سلسبیل اولا
آبِ روانِ نهره باخوب شرمسار ائده
تیپِ مجاهد همّتینه افتخار ائده
آگاه اولوب عقیل ، امامون مرامینه
جهد ایلدی یئتیرسون او سلطانی کامینه
بیر بیر گزوب قبایل ملک مدینه نی
بیر قیز تاپوبدی لایق امامین مقامینه
بو قرعه ی سعادت و عزّت نتیجه ده
خوشبخت ائدوبدی فاطمه نین چیخدی نامینه
قویدی یوزون گلنده او پاک آستانیه
تسلیم اولوب یانان قاپینون احتشامینه
زوّار اولوبدی محسنون اوپدی مزارینی
یوز وئردی اشک غصه ، دولوب چشم جامینه
باشلاندی عمرونون عظمتلی زمانه سی
عزّت یئتیشدی گوندوزونه صبح و شامینه
مجذوب اولوب علی قیزی صدّیقه زینبون
سیر سلوک و طرزِ سجود و قیامینه
تفسیر ائدردی آیه خواتین یثربه
آگاه ائدردی خلقی حلال و حرامینه
روحاً اولاردی ام بنین بس کی شادمان
حمد و سپاس ائدردی خدای گرامینه
یارب دییردی ائتدون عجب بختور منی
چکدون کمینه بنده وی عزّت مقامینه
خوش حالیمه منیم کیمه گور اولموشام آنا
بختیم هماسی شهپر آچوب عرش بامینه
توفیق اولوب رفیق یئتیشدیم مرامیمه
زهرا ائوینده لطف ائت اولوم یاخشی خادمه
خدمتله جلب ائدیم حسنینون رضایتین
بیر مهربان کنیزی اولوم آل عصمتین
دورد گل قویوب بتول بو منزل ده یادگار
هر دوردونون یقین آپاروب قبره حسرتین
اما حسینه چوخدی علاقم بو قلبیده
اوز منطقی حکایت ائدر اوز لیاقتین
بیر وعده ایلورم سنه ای حیِّ ذوالجلال
افزون ایله بو جاریه نون قدر و قیمتین
لطف ایله بیر اوغول من ، حسینه غلام ائدیم
دوتسون گرامی مقدمینون خا‌کِ عزّتین
ام البنین دعاسینی حق ائتدی مستجاب
آرتوردی دودمانِ علی ده شرافتین
چاتدی او گون مرامه دوغوب ارشد اوغلونی
شیر خدایه مژده وئروبلر ولادتین
مولود اطهری او شه آلدی قوجاقینه
باخدی مُعاینه ایلدی قدّ و قامتین
بی اختیار کوینگینون قوزادی قولون
مدّ نظرده دوتدی نیستان مصیبتین
نوفل قلینجینون یئرینی اوپدی آغلادی
تحریک ائدوب آتا ، آنانین دل ده رقّتین
عرض ایلدی آقا ندور ایرادی اوغلومون
بو آغلاماقیوین منه کشف ایله علّتین
فرمایش ائتدی باخما منیم اشک و آهیمه
ایرادی یوخدی اوغلوون هیچ ائتمه واهمه
ذاتِ یگانه گوهر اعلا وئروب منه
باغِ ولاده نوگل زیبا وئروب منه
گر موته غزوه سینده شهید اولدی قارداشیم
جعفر شبیهی ضیغمِ هیجا وئروب منه
بوش قویمادی جهاندا عموم حمزه نین یئرین
حمزه کیمی دلیر و توانا وئروب منه
عباس آدیله سیز بالامون سسلیون آدین
بوالفضل ائدوب فضیلته دارا وئروب منه
ممکن دگول بو صدق و صداقت ده بیر اوغول
وئرسین جهاندا بیر کسه ، اما وئروب منه
چوخداندی بو ولادته من انتظاریدیم
مقصودیمی خدای توانا وئروب منه
قویدی قدم جهانه حسینون کمکچیسی
علت او دور کی قلبیده یارا وئروب منه
احسن سنه مجاهد صالح دوغان آنا
جان آفرین نه پنجه لی عنقا وئروب منه
آل اوغلووی قوجاقیوه صود وئر ، سن آغلاما
باخما منه کی اوز غمِ عظما وئروب منه
نازیله بسله گوزله ایکی گوزلرون کیمی
حیِّ قدیر گور نه مزایا وئروب منه
اما مواظب اول اوجا یئردن ییخیلماسین
چون حق بو طفلی سالمُ الاَعضا وئروب منه
هر ساعتی که گلسه حسینیم سراغینه
گر یاتمیش اولسا فوراً اویات وئر قوجاغینه
ام البنین اولوبدی ابوالفضله دلنواز
باغِ ولاده رشد ائدوب اول سروِ سرفراز
شیر خدا مربّی روحانی سی اولوب
بوالفضلینه فضیلتیله وئردی امتیاز
گاهی آلاردی سینه سینون اوسته مجتبی
منله دییردی گل دیله قارداش دانش بیر آز
گاهی آلوب قوجاقینه مظلوم کربلا
عشق عالمی قیلاردی ابوالفضله کشف راز
ای عشقیمون اسیری منه عاشقانه باخ
دلداده مشتروندی سنون قیل حسینه ناز
آچ قوللارون گورنده منی بوینوما دولا
سن شوره گلدوقیجه چکیم آهِ جانگداز
قارداش دئ قارداشون سنه عشقیله جان دئسون
قوی رشک آپارسون عشقیمیزه عالمِ مَجاز
ثابت قدم سن عشقیده سنده حسین کیمی
حاشا اولا سنون کیمی سربازِ پاکباز
غمدن قوتاردی لطف خدا آل هاشمی
گورمز سنون کیمی بیر اوغول یثرب و حجاز
خوش قامتون مجسّمه ی صدق و سِلمدور
روحون ائدر اطاعتِ معبودی پیشواز
اولادِ مرتضی اولانون افتخاریدور
هم عاشقِ جهاد اولی هم عاشقِ نماز
بیز دلخوشوق عبادت و راز و نیازیله
پیمان نا گسسته میز وار نمازیله
عباسین حق چوخالتدی جلال و وقارینی
عزّت وئروب عزیز ایلدی روزگارینی
هر کوچه دن دوشردی گذاری مدینه ده
مردم چکردی مقدمینون انتظارینی
بعضی دییردی یول وئرون حیدر یئریش گلور
آرام اولون زیارت ائداخ گل عذارینی
بعضی دییردی زینب عجب اولدی بختور
یدّی وفالی قارداش آلوبدور کنارینی
بعضی دییردی پنجه و بازو لره باخون
الدن آلاردی هر باخانون اختیارینی
بعضی دییردی عابدِ صالح دیون بونا
تقدیس ائدر خضوعیله پروردگارینی
بعضی دییردی کاش ائویمه بیر قوناق گله
صحبت ائده گورم او لبِ دُر نثارینی
چرخ اولمادی بو سوزلره افسوس مشتری
طوفان ائدوبدی پوزدی امامت بهارینی
ییخدی ائوین جلای وطن ائتدی زینبی
کرب و بلایه چکدی حسینون قطارینی
روزِ نهم ، غروبه یاخین ، عالم هولناک
وحشت آلوب بناتِ حسینون قرارینی
شمر اولدی خیمه گاهه سرازیر تلّیدن
وئردی محیط نوریده ظلمت شعارینی
قیلدی بیان منیم باجیم اوغلانلاری هانی
فرمان گتیرموشم اولارون آخماسین قانی
شمرون نداسی منعکس اولدی خیامیده
تولید وحشت ائتدی حریم امامیده
عباس اولوب او پیر ظلالتله روبرو
عادل دایاندی ظالمیله بیر مقامیده
تسلیم ائدوبدی نامه نی شمر ، آچدی صحبتی
محبوب سن دئدی نظرِ خاصّ و عامیده
علّت او دور امیر ائدوب حقونده التفات
وئرموش امان نویدی بو حکمِ گرامیده
ال چک حسیندن آخر حسینده نه گورموسن
غیر از ئولوم نه حاصلی وار بو قیامیده
وئردی جواب شمره ابوالفضل نامدار
غفلت واروندی زندگی بی دوامیده
سنله منیم نه نسبتیم ای اشقی الاشقیا؟
سن آییری بیر روش ده من آییری مرامیده
شاه و سپاهووی گوزومه چکمه چوخ منیم
دعوانی ارزیابی ائده لر ختامیده
بیز فاتحوخ ئولنده ده ئولدورنده ده
بیز حاکموخ محاکمه ی انتقامیده
ویرانه قویدی یثربی ظاهرده گر یزید
یثرب لیلر علم ووراجاخ قلبِ شامیده
طرد ایلدی او ظالمی قهر و عتابیله
قارداشلارین حضوره چاغوردی شتابیله
ادامه دارد...
مرحوم انور اردبیلی
موضوع: حضرت ام البنین (س) احوالات ,
زبان شعر و شاعر: نوحه ترکی , انور اردبیلی
----
زبانحال حضرت موسی ابن جعفر (علیه السلام)
و گریز به قتلگاه
ای خدا من کیمی بیر حالی پریشان اولماز
نقدر وار نفسیم خوش گونه امکان اولماز
من سنون حجّتوم حجّته باخمور هارون
نفی برهان ایلین شخصده وجدان اولماز
موسی جعفری بی جرم ایلیون زندانی
اوزی مجرمیدی منیم جرممه برهان اولماز
آچمیور سلسله‌نی خصم دنی بوینومدان
بیلمیور سلسله‌دن شیر هراسان اولماز
او ریاست رَوِشینده من عبادت روشم
عابد صالح اولان شخصده نقصان اولماز
نچه محبسده منی قهراً ایدوب زندانی
گویون آلتدا یرین اوسته بیله زندان اولماز
ارزش مرد حقی سندیرا بلمز زندان
حق دیین هاردا یاتا عزّتی خذلان اولماز
دشمنون منزلی روشندی ولی قلب ایوی تار
قلبی تاریک بشر شریدی انسان اولماز
من قرانلقدادا یاتسام اورگیم روشندی
بندۀ عشقوه بوندان بیوک احسان اولماز
ای سنق قلبلرین پاک و گوزل مهمانی
قوناق اولسون اورگمده غم هجران اولماز
منه خلوتکدۀ عشقیدی زندان بلا
من تک عارف بیله بیر مجلس عرفان اولماز
حرمِ قُدسه هُمایم قفسیم زیر زمین
دوزمسه زحمته جان لایق جانان اولماز
تنگ یرده سنی تقدیس ایدورم سینه گشاد
غصّه پایانه چاتار عشقیمه پایان اولماز
سجده ایتدوقجه سنه روحمه لذّت یارانور
بیله لذّت بلورم بیر کسه ارزان اولماز
ای اولان نفس تبارک نه مبارکدی یریم
بو مبارک ایوه مندن صورا سلطان اولماز
یتورن یوسفی ای تخت جلاله قویودان
مصر عزیزی کرم ایتسون منه دربان اولماز
خلقت انگشترینه مثل نگینم الآن
حشمتندن نجه حیرتده سلیمان اولماز
حیف سنگینی زنجیر اگوب قامتمی
خم اولان سرو داخی زینت بستان اولماز
دوزرم سلسلیه کُنده‌نی ایکاش آچالار
هیچ قفسده ایاقی کنده لی طرلان اولماز
ایاق اوسته دورورام تتریور اعضای بدن
هر بدن بنده دوشه قاندادا جریان اولماز
بند بندیمده نوا واردی سزیلدور سوموگوم
یخلان وقته یره دورماقیم آسان اولماز
هر غمیم بیر طرفه بیر یانا سندین ستمی
ایله ناکس ایله بیر فاقد ایمان اولماز
دیورم وور منی ظالیم ولی توهین ایلمه
پیرمرده بوقدر طعنه و طغیان اولماز
آچما زندان قاپوسین آب و غذا ویرمه منه
کِشی لایق دانشار تابع هذیان اولماز
بارالها یاخامی سندین الیندن قورتار
پندیله بو قره داش لعل بدخشان اولماز
عترتیم غصّه کمندینده اوزوم زنداندا
بالالاریم نجه گور بی سرو سامان اولماز
نچّه ایلدور ایویمی قزلاریمی گورممشم
آیریلق عالمی موسی کیمی ویلان اولماز
گوز تیکیبدور بلورم یولارا اون یدّی قزیم
استراحت اولا بلاکشلره بیر آن اولماز
بیلمیّولر یریمی نامه یازوب گوندره لر
سوزلری چوخدی ولی یازماقا امکان اولماز
قاپوسین باغلادی هارون قوناقلی ایویمون
اولدی بی صحاب او غم خانه ده مهمان اولماز
بیر بُلوک عترتیمی ضیقه سالوب اهل عناد
بیر رضادن صورا اطفاله نگهبان اولماز
غصه لی قزلاریمون غصه آغارتدی ساچنی
زندگیسی او پریشانلارین الان اولماز
اَلیور گوز یاشی رخساره گوزل معصومم
آغلیان چوخدی ایله دیده سی گریان اولماز
ال اورکده گوزی یولدا قولاقی سسده قالوب
آتا هجرینده ایله قلبی هراسان اولماز
دوگولنده قاپی اَوّلده او بیچاره قاچور
دردمندیمدی او قز دردینه درمان اولماز
قز که شرعاً یتیشر حدِّ بلوغه یارب
ائوده گر قالسا اونا حاصل شایان اولماز
قزلاریم بالغه‌ده ایلچی گله قویمادیلار
هر نه روشندی سنه ظاهر و پنهان اولماز
بخت قاره بالالار بخت اطاقین گورمدیلر
اولارا رحم ایله سندن صورا رحمان اولماز
ای قلم چوخدی مناجات ایلین اللهه
هیچ بیری لیک حسین شاه شهیدان اولماز
نه حرم خانه‌سی دوشدی یادا نه اهل حرم
نه دیدی غصه‌لره منده دوزن جان اولماز
نه دیدی یورقونام الله نه دیدی چوخدی یارام
نه دیدی من کیمی بیر لبلری عطشان اولماز
نه دیدی قلبمه اوچ شعبه اوخون زحمتی وار
نه دیدی من کیمی بیر قاننه غلطان اولماز
نه دید پارچالیوب جدّیم اُپَن آلنمی داش
سینه اوسته نه دیدی بیر بیله پیکان اولماز
نه دیدی گوزلریمون کاسه‌سی قانیله دولوب
نه گوز اوستونده بو مژگان کیمی مژگان اولماز
نه گلایه ایلدی نیزه قلجدان اوخدان
نه دیدی من کیمی یارب سنه قربان اولماز
یاره‌م آرتدوقجا دیدی روحمون آرتور هوسی
جسمیم اوراق اگر اولماسا قرآن اولماز
ورماسام قانیله شیرازه کلام اللهه
دیولر کامه چاتار عدلیله دیوان اولماز
من جهاد آیه‌سنی قانیله تفسیر ایلدیم
نجه تفسیر که دنیا بوئی نقصان اولماز
باغ قرآنده مین لاله‌دی هر قطره قانیم
شکری واردور بیله بیر پربرکت قان اولماز
تا جهان واردی بو قان جوشلاناجاق داشلاناجاق
جوشماسا داشماسا دین باغی شکوفان اولماز
خط سرخیله بوگون شیعه‌لره یول چکورم
کیم بو خطّی ایتوره راهی رضوان اولماز
اولین شخصکه بو خطی گلر زینبدی
چرخ عشومده ایله کوکب رخشان اولماز
من ایچن جرعه‌دن اوَّل گونی زینبده ایچوب
تالانار خیمه‌لری صبر ایوی تالان اولماز
ایندیدن شام غریبانمده فکر ایلیوب
بیکسم یوخسا منه شام غریبان اولماز
آلاجاق چگننه مندنصورا اسلام علمین
قهرماندور بیر ایله صاحب عنوان اولماز
مرکب منطقنه غیظیله جولان ویرسه
کوفه ده زادۀ مرجانیه میدان اولماز
ذوالفقاریم دوشوب الدن باجمون واردی دیلی
سوزی بُرّادی ایله خنجر برّان اولماز
داش دگنده باشما باشنی ممکندی یارا
هیچ کیم عشق عالمی زینب کیمی حیران اولماز
دشمنون مجلسنه ساچلاری قانلاری گیده جک
گورسه جلّادی گنه دیده‌سی گریان اولماز
مرتضی غیرتی ارثیه چاتوبدور باجما
یالواروب بیر کسه نه دست بدامان اولماز
آتام اوّلده دیوب زینبه ماشاءالله
بیله بیر باجی بو دنیاده حسینجان اولماز
سوز یازاندا ادبی ایله مراعات (انور)
مشتری هر سوزه مجلسده سخندان اولماز
مرحوم انور اردبیلی
منبع مجموعه کانالهای مدح و مرثیه
موضوع: حضرت امام موسی کاظم (ع) احوالات ,
زبان شعر و شاعر: نوحه ترکی , انور اردبیلی
----
زبانحال حضرت رباب (سلام الله)
یوزوی گورمگه هر چند ایدوردوم عجله
آنوا اولمادی ممکن باشوون اوسته گله
مهربان عمه لرون وئردی سنی الدن اله
یارون اوسته آپاروب معجریمی سرمدیلر
قرمزی دوشلوگوی هیچ منه گوسترمدیلر
هاردا ای گنج شفاعت سنی شاه ائتدی نهان
یوزوی قویدی قرا تپراقا ای مونس جان
بالاجا قبروی عمون منه گر وئرسه نشان
قالمارام خیمه ده گللم اورگیم داغلیارام
صودیمی قبرون اوسته ساغارام آغلیارام
دیل بیلن رحم ایلیور رسمیدی دیل بیلمینه
چونکه دیل بیلمینون حاجتی وار دیل بیلینه
سنکه دینموردون او ظالم نیه اوخ وردی سنه
هانسی جلادون او قدرتده کمان چکدی الی
هانسی طفلون بوغازین اوچ پر اوخ اوچ بولدی علی
(انورا) طاقت انسانی آلان سوزدی بو سوز
ساده دور لیکن اورک پارچالیان سوزدی بو سوز
نوحه خوانلاره اولان ورد زبان سوزدی بو سوز
آغلادان گوزلری سوز یوخ سوزوون نسگلیدور
گوئیا اوغلی ئولن بیر آنانون ئوز دیلیدور
مرحوم انور اردبیلی
موضوع: حضرت رباب (س) ,
زبان شعر و شاعر: نوحه ترکی , انور اردبیلی
----
حضرت علی اصغر (علیه السلام )
با مقدمه شور و احساسی در
مدح و منقبت حضرت اباعبدالله الحسین (علیه السلام)
یا حسین عالم سنی بیر رهبر والابولر
وجهوی مرآت وجه خالق یکتا بولر
مفتخر اولدی وجودوندن سنون نسل بشر
آدمون ارزش یوخیدی اولماسیدون سن اگر
نکتهُ عبد اطعنی بوسوزی تأئید ایدر
نّص کر ّمنا سنی هر عاقل و دانا بولر
نیّر دانشله نابود اولسا جهلون ظلمتی
کاروان راه علمون آرتوق اولسا سرعتی
بالا ّخص گر عالم اولسا عالمون جمعیّتی
یکدل و یکجا سنی بیر فرد بی همتا بولر
جدّ پاکون مصطفی صدّیق اعظمدور سنون
مرتضی باب کبارون میر اعلم دور سنون
عصمت کبرا آنوندور فخر مریمدور سنون
امتیاز معنویسین صاحب معنا بولر
عرشیده زینتدی مصباح الهدی نامون سنون
کهنه بر پیراهن اولدی لیک احرامون سنون
منطق اسلامی احیأ ایتدی اقدامون سنون
ارزش اقداموی ادنا و هم اعلا بولر
فکر ایدوب هر بر بشر که حقّی ناحقدن سچور
حقوی تأیید ایدوب تز عشقوون جامین ایچور
مین نچه یوز ایل سنون گر چه قیاموندن گچور
منصفان شخص اوّل نئشه سین حالا بولر
کیم دیر سن کعبه مقصوده شاها یتمدون
سن شهامتله قبول بیعت ننگ ایتمدون
زیر بار ظلم و استعماره هرگز گئتمدون
مرد اولان چون ظلمه تابع اولماقی بیجا بولر
سن دلیل راه حقسن خط مشیون مستقیم
میر قربانگاه اعظم سن اوزون ذبح العظیم
نقشه سفیانیانی محو ایدوب قویدون عقیم
فاتح اولدون در نتیجه مردم دنیا بولر
نور تک سن دینون اوستن دفع ظلمات ایلدون
ضد استبداد اولوب رفع خرافات ایلدون
حاکمیّت حقّلندی مطلق اثبات ایلدون
حکمیوی هوشیار اولانلار حشره تک مجری بولر
سن سپهر کائناته نیّر تابنده سن
مجری برنامهء آزادی ارزنده سن
حقّون اوسته ئولموسن چون ئولمیوبسن زنده سن
زنده مدرک آیهء قرآن سنی احیا بولر
وار سنون اعظم قیامونده مفصّل فلسفه
حق گلوسین قویمادون دست جفا ایتسون خفه
صبح عاشوراده سن آز عده وی دوزدون صفه
کیم سپاه کوفه نون آمارینی امّا بولر
لشگر دشمن مسلّح نیزه و پیکانیله
کوفه نون ارذل نفوسی خنجر برانیله
سیز ولی اولدوز مجهّز قدرت ایمانله
دینه ایتدوز استعانت دشمنوز حتّی بولر
جان عالم عدّه ای جانبازوه قربان سنون
کشته گان ساحت ممتازوه قربان سنون
آلتی آیلیق صودامر سربازیوه قربان سنون
خلق اونی زیب بساط یوم عاشورا بولر
آخرین جانباز جبهوندور او طفل بی زبان
نحوهء قتل فجیعین یازماقا یوخدور توان
بو چتین محنت گرگ اولسون نوائیلن بیان
رمزلن هوشیار اولان عنوانی سرتاپا بولر
اللرون اوسته بالون دورموشدون ای مظلوم امام
سن دانشدوقجا تو کردی اشکنی قوم ظلام
صحبتون بردن نیه آغزوندا قالدی ناتمام
کیم بو اعظم محنتون معیارینی آیا بولر
آتدی بر اوخ حرمله قهریله اما اوخ نه اوخ
زهریلی پیکان هدفده استقامت ذره یوخ
جان ورینجک من بیله بولّم بالون چرپندی چوخ
علّتین هر کیم سوروشسا اوخ کسن اعضا بولر
صورتاً پیکانیدی کسدی ولی خنجر کمین
اصغرون پر ووردی شاها مرغ خونین پرکمین
قانلو لبلرده تبسّم غنچهء احمر کمین
غنچه سین گورسه اوحالدا باغبان زیبا بولر
حیف او زیبا غنچه دن صد حیف نامیزانیدی
آفت باد اجلدن شبنمین ریزانیدی
بوطه دن سنمشدی شاخی اوسته آویزانیدی
مطلبی سر بسته کچدوم سوز بیلن ایما بولر
بوندان آرتوق شرح و بسطه فکریمون یارا یوخی
روز و شب بو دردیوه احبابون آغلار چوخی
اوغلوون قانلو بوغازیندن نجه چکدون اوخی
بر اوزون بلدون اونی بر خالق الاشیأ بولر
متن پیمان الستی ایتدون اجرا موبمو
محنتون اعظم گوروب ویردی تسّلی ذات هو
اللرون اوستنده قالدی اصغرون خونین گلو
صبرده هر مرد حق بینا سنی دریا بولر
قانیله گوردون چکوبدور اصغرون قرمز نقاب
اوخلانان قربانیوه گویا بله ایتدون خطاب
احترامون بیلمدی بو فرقهء ظلم و عذاب
قدروی معناده اوغلوم گیت آنام زهرا بولر
من سنی گتدوم سو فکریله اوخ آتدی حرمله
ضعفدیدون گوز آچانموردون اویاتدی حرمله
ظلمیله خرسند اولوب مقصوده چاتدی حرمله
لذت ظلمی همیشه ظالم و ادنا بولر
بر کسیم یوخدور سنی مندن آلوب دفن ایلیه
تسلیت یا اینکه قربانون قبول اولسون دیه
قانلو قونداقون بو حالیله آپارسام خیمیه
سرنوشت جانگدازون عترت طاها بولر
(انورا) گوز یومسا دنیادن سخن گویان حق
ئولمیوب گر یاخشی سوز قویسا اوزیندن بر ورق
زنده آثاری اولانلار خیره اولموش مستحق
سوزلرین ذوق اهلی دائم انجمن آرا بولر
مرحوم انور اردبیلی
منبع مجموعه کانالهای مدح و مرثیه
موضوع: حضرت علی اصغر (ع) احوالات ,
زبان شعر و شاعر: نوحه ترکی , انور اردبیلی
----
زبانحال حضرت موسی ابن جعفر (علیه السلام)
و گریز به قتلگاه
بارالها تنگ اولوب زندان منه
حبسده بیر ایل کچور هر آن منه
موسی جعفر ابا ابراهیمم
یاخشی ئوز گوسترمدی دوران منه
صادقم صادق امامون اوغلیام
عبد صالحدور گوزل عنوان منه
اولدوم اول گونکه امام کاینات
یتدی سندن رتبۀ شایان منه
شاهد عادل ئوزونسن حالمه
استراحت اولمیوب امکان منه
ایستدوم سندن ئوزوم خلوت مکان
فیض سجده تا اولا ارزان منه
عرضیمی ائتدون خداوندا قبول
خوان لطفوندن یتوب احسان منه
سلسله جاندان سالوب چارم ندور
دورماقیم یردن دگول آسان منه
نچه ایلدور گردنیمده سلسله
مونسیمدور اولموش آویزان منه
بصره ده زنداندا قالدوم مدتی
اوردا خوش کچدی گونوم بوردان منه
فضل زندانبانیمیدی روز و شب
ائتمیوردی سند تک طغیان منه
هانسی ظلمی ائتمیشم هارونه من
تیره محبسده ائدور جبران منه
آدیمی قویدی منیم اخلالگر
قورخمادی سندن دئدی بهتان منه
خانواده م بیلمیور من هاردیام
منتظردور بیر بُلوک طفلان منه
ناگرانم چوخ قزیم معصومه دن
سخت اولوبدی عالم هجران منه
نامه یازمور نیلسون اوغلوم رضا
نامه یازسا یولّاسون هاردان منه
چاره ساز الله ئوزون بیر چاره قیل
ال تاپوب درّندۀ خوانسان منه
محبسه هر ئوقت گلور توهین ائدور
دشمن جاندور بو زندانبان منه
تنگ یرده تنگه گلدوم نیلیوم
حکم ایله گلسون اجل الان منه
اولمیوم سندیله بیرده رو برو
آچماسون قمچی او بی ایمان منه
زهرلی خرمانی جبریله وئروب
قویمیوب قالسون او ظالم جان منه
ای قلم کرب و بلایه چک سوزی
یوز ویروبدور حالت افغان منه
مقتله دوشمشدو شاه نینوا
هیچ دیموردی ارحم ای سبحان منه
سسلنوردی یا غفور و یا رحیم
خیمه‌لردن خوشدی بو میدان منه
نوح عشقم قالمشام طوفاندا من
ذرّه تأثیر ایلمز طوفان منه
گلشن اولدی جدّیمه نمرود اودی
اود توکور خورشید نورافشان منه
یر قزوب قوملار قزوب داشلار قزوب
آتش جانسوز دور هر یان منه
دوشدی یوسف چاهه دوتدی جبرییل
ویرموسن بو باره‌ده رجحان منه
چاه عقشیمدور چوخور یئر چخمارام
غبطه ایلر یوسف کنعان منه
کولگه یرده کسدیلر یحیی باشین
بنذمز یحیی‌ده ای منّان منه
شمر کسمز کولگه یرده باشمی
آغلاسون یحیی گرکدور قان منه
نیزه اوسته باشلاسام تکبیریمی
مات اولور داوود خوش الحان منه
مَدیَنَه موسی قاچوب فرعوندن
واله اولسون موسی عمران منه
من عمر سعدون الیندن قاچمادیم
عاشقم حاشا یته نقصان منه
دارون اوستوندن قاچان عیسی هانی
دار محنتده اولا حیران منه
یولّادون اسماعیله یارب فدا
واردی شکریم گلمدی قربان منه
گتدی یتمش بیر نفر اسماعیلیم
خوشدی لفطون اولسا پشتیبان منه
خضر دشت کربلایم باخمارام
چکسه حسرت چشمۀ رضوان منه
باشیم اوسته باش آچوبدور ابجدیم
هی باخولّار دیده‌سی گریان منه
حضرت زهرا الینده معجری
مجتبائیله گلوب مهمان منه
عاشقم من عاشق کامل عیار
ذات پاکوندور سنون جانان منه
تلون اوستن قتلگاهه بویلانور
گوز تیکوب اطفال سرگردان منه
عترت و اطفالدن گوز یوموشام
بسدی یارب ذکر الرحمان منه
اکبریمدن اصغر و عباسدن
خوشدی یارب ایتدیگیم پیمان منه
امر ایله گلسون بلا اوستن بلا
حاضرم سن ویر فقط فرمان منه
شاد اولور روحیم قوشی شهپر آچور
دگدوقیجه نیزه و پیکان منه
جان ویرن وقته باجیم زینب گلوب
قتلگهده تاپماسون درمان منه
مانعی یوخ جسمم اولسا پایمال
قالماسون بو سینۀ شان شان منه
باش یارا آلنیم یارا آغزیم یارا
سجده چوخ لذت ویرور الان منه
ناطق قرآنم عاشقلر دییر
جلدسیز شیرازه سیز قرآن منه
(انورم) ای شاه گردون تاج حسین
سند ایدوبسن لطف بی پایان منه
مرحوم انور اردبیلی
منبع مجموعه کانالهای مدح و مرثیه
موضوع: حضرت امام موسی کاظم (ع) احوالات ,
زبان شعر و شاعر: نوحه ترکی , انور اردبیلی
----
احوالات تنور خولی
حسین شام غریباندور سنه یار اولماسام اولماز
چوخور یرده دوتوب ماتم عزادار اولماسام اولماز
سنون عشقون سالوب چولدن چوله بو غملی زهرانی
اولام لازمدی بو صحراده ناچار اولماسام اولماز
غم اهلی رسم عالمدور همیشه غملینی خوشلار
سنون تک غملی بیر سلطانه غمخوار اولماسام اولماز
شکسته دللرون قدرین شکسته دل بیلر اوغلوم
ئولوب اوغلون سنوب قلبون طرفدار اولماسام اولماز
بو باشسیز پیکره اولّام نگهبان ساربان قویسا
او گلسه دیده سی مقتلده خونبار اولماسام اولماز
نه لر اولدی خانم زهرا دوروب ترک ایتدی گودالی
دیدی هر یرده من درده گرفتار اولماسام اولماز
یوخ امکان اگلشم بوردا حسین جان ال کسن گلدی
ندور چاره گیجه وقتنده سیّار اولماسام اولماز
خرابه کوفه ده مطبخ سرادور مسکنیم بیلدوم
گلوب صبحه کیمی مشغول گفتار اولماسام اولماز
اولوبسان خولیه مهمان سنه گلم قوناق اولام
عزیزیم سن اولان منزلده من وار اولماسام اولماز
بلالی باشوون دردی باشا گلدی و یا اینکه
گنه بیر آیری دردون وار خبر دار اولماسام اولماز
منیم ئوز نازدانم سن منیم ئوز پروریدم سن
امیدیم سن پناهیم سن پرستار اولماسام اولماز
زیارت فیضینون مشتاقیم قصدیم زیارتدور
دوداقوندن ئوپوب مطبخده زوّار اولماسام اولماز
گلوب تاپدی اوغول باشین مرامی حاصله گلدی
کولون سیلدی گوزون اوپدی یوزون اوپدی دیله گلدی
دیدی اوغلوم آنون گور ایندی افغانه گلر گلمز
سرشگین گوزلرینده دوندروب قانه گلر گلمز
اوغول چولدن چوله دوشسه اوغول ایودن ایوه گیتسه
آنا آیا دالیجا خانه بخانه گلر گلمز
قابورقام سینماقیمداندا باش اولدی باشون دردی
بالا یاتسا کول اوستونده آنا جانه گلر گلمز
سنون پروانوم سنده منیم روشن چراغیم سن
چراغ هر یرده روشن اولسا پروانه گلر گلمز
گیدنده موکب سلطان عزیزیم شهریدن شهره
مگر شهرون رجالی دید سلطانه گلر گلمز؟
جلوس شاه شاهانی بیلنده دردمند اشخاص
عریضه الده درباره ذلیلانه گلر گلمز
قوناقسان بو ایوه افسوس خوشگلدون دِیَن یوخدی
گور ایندی قلبیمون آلامی طغیانه گلر گلمز
ئوزون غملی یرون غملی گلن یوخدی گیدن یوخدی
قوناق گلسه ایو اهلی نزد مهمانه گلر گلمز
مسلمان ابتلا گورمز مسلمانه قوناق گیتسه
بو ظلمی درک ایده رقّت مسلمانه گلر گلمز
کول اولسون باشینه اسلامه توهین ایلیوب خولی
بو توهیندن شماتت اهل قرآنه گلر گلمز
بو باشین قدرینی زهرا بیلر چون اهل عرفاندور
صفا عارف اولاندا بزم عرفانه گلر گلمز
بیر آز گیت هوشه محسن اَممیَن پستانلارون اوسته
کسوک باش قان دولان پستانه درمانه گلر گلمز
ئورک دردین آنا اولادینه بیر بیر مقال ایتدی
ئورک دردین آنا اولادینه بیر بیر مقال ایتدی
جوابینده اوغول گویا بو نوعی کشف حال ایتدی
آنا قانلو باشیم مطبخده بی پیکر قالوب قالسون
جنازم صفحۀ میدانیده بی سر قالوب قالسون
قولون قنفذ جفاسیندن اوجالمور غم یمه نینک
منیمده اللریم اللرده ای مادر قالوب قالسون
او داغلی دلده سن ساخلا حسن داغین حسین داغین
منیم قلبیمده داغ اکبر و اصغر قالوب قالسون
قویوبلار خارجی آدی حسینه غصّه سین ایتمه
شماتتده نوامیس حق داور قالوب قالسون
قیزیم صغرا فراقیمدن تیکوبدی گوز یولا تیکسون
آنام ام البنین یثربده بی یاور قالوب قالسون
سویولمش خسته قیزلاریم قولون بالش ایدوب ایتسون
مریض اوغلوم یانان چادرده بی بستر قالوب قالسون
رقیه قولارین قمچی گویَرتسون مانعی یوخدی
منه ناز ایلین بلبل شکسته پر قالوب قالسون
عروس قاسمی بی شرم اولان دشمن سویوب سویسون
گیدوب گوشواره سی تاراجه بی زیور قالوب قالسون
قوجالتسون غصّه کلثومی آغارتسون زینبین زلفین
ویروب قارداشلارین الدن قرا معجر قالوب قالسون
منیمدور جاودانی سلطنت هند اوغلی دنیاده
بِش اون گون آبروسیز ملّته رهبر قالوب قالسون
فقط قرآن وار اولسون پرچم دین اهتزاز ایتسون
اسارت پنجه سینده آل پیغمبر قالوب قالسون
بو بزم انسده اولما پریشان آغلاما نِینَک
کسوک باشیم سنان قولاره قربان آغلاما نینک
آنا کرب وبلانون محشریندن من دیوم یا سن
شهادت نامه نون غم دفتریندن من دیوم یا سن
حسینون دردینه سن که ئوزیندن یاخشی واقف سن
نه لر گوردوم او شامون لشگریندن من دیوم یا سن
حبیب ابن مظاهردن ایدک یا حریدن صحبت
شجاعان حماسه آفریندن من دیوم یا سن
گوزل اوغلوم اَوَل گیتدی عبا پیچ ایلدوم گتدوم
رسول اکرمون ئوز بنذریندن من دیوم یا سن
وفالی عمه سی میدانه گلدی باش آچوق گوردون
آناسی لیلینون اشگ تریندن من دیوم یاسن
ربابین شیر خوار اوغلی اوخی پستان کیمی اَمدی
نجه قان جاری اولدی اوخ یریندن من دیوم یا سن
قوی پنجه قوی بازو قوی هیکل علمدارون
سو اوستونده کسیلمیش اللریندن من دیوم یا سن
بلالی زینبیم من ذبح اولان ساعتده مقتلده
نجه شمرون یاپوشدی خنجریندن من دیوم یا سن
او پیراهن که ویرمیشدون من آلدوم فضّه دن گیدوم
نجه چخدی حسینون پیکریندن من دیوم یا سن
سویا حسرت اولان قیزلاریمی اود چکدی آغوشه
سوسوز بلبللرون یانمش پریندن من دیوم یا سن
بیری خندقده جان ویردی ایکیسی قول بویون ئولدی
باجیم ئوپدی یومولموش گوزلریندن من دیوم یاسن
یزیدی مست ایدوب دنیا اله مستانه جام آلسون
بو قانی قویماسون یرده خداوند انتقام آلسون
مرحوم انور اردبیلی
منبع مجموعه کانالهای مدح و مرثیه
موضوع: احوالات تنور خولی ,
زبان شعر و شاعر: نوحه ترکی , انور اردبیلی
----
شاهزاده زبانحال حضرت لیلا (سلام الله)
به حضرت علی اکبر (علیه السلام)
ای حسینین دوغرانان قربانی، اکبر آچ گوزون
سالما گوزدن بینوا لیلانی، اکبر آچ گوزون
عمروم اولسا هر قدر من آغلارام صبح ومساء
لیلینی بیر درده سالدون ای شبیه مصطفی
درد جسمانی دگیل تاپسین طبابَتلن شفا
بیر طبیب ایستر اولا روحانی، اکبر آچ گوزون
ای نژاد هاشمیده نورس و رعنا قدیم
ائیله فکر ائتمه کی گلدون، خیمییه من بیلمدیم
گلمگون بیلدیم ولی عذریم واریمدی گلمدیم
عفو ائله بو خانمان ویرانی، اکبر آچ گوزون
پایین پایونده اگلشدیم من ای نورسته گول
چون حیا مانعدی باشو اوسته گچسم خوش دگیل
لاعلاجم سویله لیلا باشینه توکسون نه کول
گورمر‌م اول صورت تابانی، اکبر آچ گوزون
آتش قلبیمه وورموش داغ هجرانون اتک
یاندی قلبیم بو یانار اوددان منی بیر یانه چک
طوی ائدیبسن، خلعتیم بس هانی ، اکبر آچ گوزون
حقّی واردور لیلنین گوزدن توکه خون جیگر
من سنی میدانه بو نوعی یولا سالدیم مگر
باشون اوسته آچماسیدی باشینی عمّه‌ون اگر
زلفیمله پاک ائدردیم قانی ، اکبر آچ گوزون
بیر کنیزم باوفا اکبر قبول ائتسون منی
سن بیلیرسن کی نه قدری ایستئییر قلبیم سنی
قلبیمین باشینه ضم ایتدیم بو قانلی چکمه‌نی
تاکی شدّت ائتمسین جریانی ، اکبر آچ گوزون
قانلی گوزیاشیم سارالمیش رو‌یمی وئرمیش سئله
قلبیمی سیندیرما ائتمه ناامید اوغلوم بئله
خواهشیم واردور عبانی گول یوزوند‌ن ردّ ائله
بیر منه گوستر رُخ زیبانی اکبر، آچ گوزون
ای جمال عالم آراسی اولان شمع ارم
یاروه قان پرده چکمیش قویمیور حدّین بیلم
بیر عبادور رویتا قرمز وجودون گورمر‌م
گیزلدیبدیر دوغرانان اعضانی ، اکبر آچ گوزون
برگ تک قلبیم اسیر، هجرونده اولموش قان اوغول
گل یوزون گوستر آنوندان ایلمه پنهان اوغول
گلسه شهزاده سفرد‌ن ذبح اولار قربان اوغول
ائیله قربان جانیوه بو جانی، اکبر آچ گوزون
ثبت ائدر «انور» سنین درد و ملالون دفتره
توشه تا اخذ ائیلسین دار فناد‌ن محشره
زایر اولسون ایستیر بیرده مزار انوره
اوردادور چون دردینین درمانی، اکبر آچ گوزون
مرحوم انور اردبیلی
منبع مجموعه کانالهای مدح و مرثیه
موضوع: حضرت لیلا (س) ,
زبان شعر و شاعر: نوحه ترکی , انور اردبیلی
----
شاهزاده حضرت علی اکبر (علیه السلام)
ای مظهر پیمبر و صاحب وقار اوغول
حسن جمالی خلقته وی شاهکار اوغول
فخر ایله سه خلیل اگر ئوز ذبیحینه
ایلر بلی حسینده سنه افتخار اوغول
خوان کمالوه سنون ای یوسف حسین
مین یوسف ایستیور اولا تا ریزه‌خوار اوغول
یوسف هارا سن هارا یعقوب هارا حسین هارا
اولسا اگر مقایسه چوخ فرقی وار اوغول
کرب و بلا صبور اولان عاشیق مکانی‌دور
دوزمز بلایه عاشیق بی اقتدار اوغول
عاشق اودور که سن کیمی سرمایه‌سی اولا
بذل ایلیوب نگاره تاپا اعتبار اوغول
عاشیق اودور که طعنه‌ی اغیاره صبر ایده
عاشیق اودور کی قلبی اولا داغدار اوغول
عاشیق اودور اوغول گوزونون قانینی سیله
ای‌وای دیوب نه ایلمیه آه و زار اوغول
آخر نفسدی بیر آتا دی جان دیوم سنه
آز قالدی جنّته اولاسان رهسپار اوغول
قلبیم چوخ ایستیور آچاسان قانلی گوزلرون
بیرده گوروم گوزوم گیله‌سین آشکار اوغول
بیر یول نگاه ایدوب گنه یومسوندا یوم گوزون
باخسا اوغول آتا یوزینه اَجری وار اوغول
جدّیم دوشوبدی یادیمه ای مصطفی باخیش
سن باخ منه اولوم باباما اشگبار اوغول
قویدی یوزون اوغول یوزونه قلبی رام اولا
گورسون دیدی بوحالیمی پروردگار اوغول
ناگه قولاقینه یتشوب آغلاماق سسی
تِز تِز دیور هایانداسان ای زخمدار اوغول
فوراً حسین اوجالتدی باشین گوردی زینبی
بیر آیری مشگله دیدی اولدوم دچار اوغول
عمّوندی سر برهنه گلوب من دوزنمرم
مهر حجاب پرده‌دن اولسون کنار اوغول
دوردی ایاقه تِز ایاقا دور میان حسین
سن قال دیدی قوم اوسته هله گل‌عذار اوغول
سالدی عباسینی باشینا زینبون، دیدی
بو سن بو حق یولوندا ایدن جان نثار اوغول
اگلشدی عمّه‌ده آتادا قتلگاهیده
زینب دیدی بی‌بوندی گلوب بی‌قرار اوغول
عمّون گلنده فوری دوراردون ایاقینه
سن دونموسن دونوبدی و یا روزگار اوغول
یا چوخ یارالی‌سان ایاق اوسته دورانموسان
هانسی یارون سنه ویروری چوخ فشار اوغول
قاسم عم اوغلووی چاقوروم ال اله ویرون
باهم گیدون خیامه ایکی غمگسار اوغول
آز قالدی نوریدن دوشه قارداشمون گوزی
کام آلدی گورنجه فلک کج مدار اوغول
مرحوم انور اردبیلی
منبع مجموعه کانالهای مدح و مرثیه
موضوع: حضرت علی اکبر (ع) زبانحال ,
زبان شعر و شاعر: نوحه ترکی , انور اردبیلی
----
معجزۀ حضرت موسی بن جعفر (علیه السّلام)
و گریز به روضۀ غارت خیام
قلم ایدور بو حدیثی که زینت دفتر
دیوبدی شرحینی بیر اهل ذکر و خبر
اوشخص لر که امام ایلیوبدی ذات اله
هاموسی پاک و منزه دیلر بدون گناه
لباس عصمته قامتلری برازنده
هاموسی مخبر علم گذشته آینده
مقام معنوی و عزو جاهده برتر
بشردی هر بیریسی خلقتده کیفه بشر
صفات ذات خدایه مثال آیینه
ایدوبله فیض افاضه جهان دیرینه
هاموسی واقف اسرار اعظم و ممتاز
هاموسینا ویروب الله قدرت اعجاز
سند بو عرضیمه وار چوخ کتابیده زنده
عجیب معجزه لر گوسنوب محلنده
بو گونکه سکه بازار عشقه قیمت وار
بنام موسی جعفر بو بزمه زینت وار
به عون حضرت معبود جلت العظمه
او اهل ذکر دین معجزی چکوم قلمه
عقیده آئینه سی نور کبریا تاپسون
صفالی قلبلروز جلوه صفا تاپسون
وطندن ایتدیله تبعید سبط طاهانی
ایدوبله بصرده اول امام زندانی
حدود دورد ایل الوبدور اوشهرده محبوس
ایدوبله کنده و زنجیر ظلمیله مآنوس
رئیس محبس شهریدی فضل کج رفتار
امامی راکع و ساجد گوروبدی لیل و نهار
اورکده حجت حقدن خطر ایدوب احساس
یازوب خلیفیه ای مفخر بنی عباس
پوزوبدی موسی جعفر نظام زندانی
بو شهر دن آپارون آیری شهره موسانی
یتشدی نامه سی هارون پست و بیداده
یازوب اوسیدی تبعید ایله بغداده
اهانتیله ولی سال یولا او دلگیری
ترحم ایلمه بوینوندان آچما زنجیری
مطیع امر خلیفه امامی خوار ایلدی
نجه دیمیشدی خلیفه ایله سوار ایلدی
مراقت ایتدی نچه جیره خوار او رنجوره
فلک اسیر سلیمانی ایلدی موره
واریدی کشتی ایچنده مسافرین زیاد
هاموسی چهره سی بشاشیدی اورکلری شاد
طوییدی مجلس عیشه قورولموشید بساط
اوجالمشیدی سمایه صدای شور و نشاط
گتورموشیدی دله سازنی نوازنده
گیدوردی کشتی اوخوردی ترانه خواننده
هاموسی جشن ایلیوب بیر بیره چالوردی الین
مسافرین آپاروردی اوزیله تازه گلین
سفینه اوسته قضا جشنی ایلدی معکوس
پوزوبدی مجلسی گلدی نوایه تازه عروس
سوروشدیلار ندی دردون ندور بو آه و نوا
بویون باغیم دیدی ناگه آچیلدی دوشدی سووا
او سلسه منه سرمایه جلالتیدی
بهاسی چوخ چوخیدی گردنیمده زینتیدی
تاپولماسا او جواهر منه وار ایرادی
گلین عزیز دوتار یادگار دامادی
او غنچیم گل آچا لحظه لرده من سولدوم
آپارمیون منی بغداده قاره بخت اولدوم
طوی اهلینی بوقضیه ایدوبدی سر گردان
دیدیله آعلاما بو درده یوخدی بیر درمان
شناور اولسا دا کشتی ایچنده دوشسه سویا
بویون باغین اله گلسین بو نهردن حاشا
واریدی کشتی ده بیر سر نشین فرزانه
خطاب ایدوب الارا چاره وار بو عنوانه
دیدیله ساغر مقصود چوخ چتیندی دولا
بو درده چار تاپولسا گرگدی معجز اولا
دیدی گدانی بلی اهل تاج ایدن واردی
همین بو کشتیده درده علاج ایدن واردی
اوسیدی که گورور سوز چکوبله زنجیره
قلمله گلمز اونون وصف حالی تحریره
جناب ختم رسولون اودور عزیز اوغلی
بلالی فاطمه نون غملی اشگریز اوغلی
قسم بیزی یارادان خالقه سوزوم دوز دور
امام میزدی سراپا وجودی معجز دور
گیدون جضورینه یا حجت جلیل دیون
اتگینه ال آتون دلدن الدخیل دیون
طوی اهلی ملتجی اولدی حضور والایه
الندن ئوپدیله یالواردیلار او مولایه
دیدیلر ای نفسی اهل حقه سرمایه
سنی قسم ویروروک احترام زهرایه
فدا اولاق او خدا ذکرینی دین دوداقا
بیزیم بو تازه عروسه آقالیق ایله آقا
گلین ایتورسه اگر طوی گونونده گردنبند
نه اوزی شاد اولی نه ایل قبیله سی خرسند
بیزیم عقیده میزه ای ریاض عصمته گل
بو ایشین عاقبتی نو عروسه یاخشی دگل
امام ذکر ایدوب اسمای ذات یکتانی
ستایش ایلدی پروردگار سبحانی
یوزینی شطه دوتوب صادر ایلدی فرمان
اوزون بو نهرده ای ماهیان سرگردان
ئوزوزی سلسله هریرده دور اورا یتورون
بیروز بو تازه عروسین بویون باغین گتورون
شناوران ایشیدبدوراطاعت ایتدی سوزه
بالیقلارون بیری فورا سودان چخوبدی اوزه
اوجالدی آغزین آچوب عقدی کشتیه آتدی
امامه عرض سلام ایلدی سویا باتدی
بو اقتداری تحیرده کیم گوروب قالدی
گتوردی سلسله سین بوینونا گلین سالدی
یتشدی سوز بو یره اشگیمی گرک الیم
سوزون گریزینه کرب و بلایه گتملیم
اوچولده بیر طوی اولوبدور طویون چراغی سونوب
تزه گلین گینوب قاره، طوی عزایه دونوب
باشنا نقل و شباش و نه شاخه گُل سَپلوب
یانوبدی حجله سراسی باشنا کول سَپلوب
اولوبدی سُرمه سی دود سیاه مژگاندا
باتوبدی نامزدی قاننه بیاباندا
گلینلیگین گینوبدور نه آغ حریر دونون
نه قند اووبدی باشی اوسته اقرباسی اونون
اَشدّ محنته طاقت اگرچه یوخ سنده
نچاره دقّت ایله ایندی بو نچه بنده
بو غملی طویدا گلون اشک چشمی نقل ایده‌گون
حُسینیله حسنی راضی ایلیوب گیده گون
سُرادقاتده شعله طلایی چتر آچدی
الی باشندا چخوب چوللره قاچان قاچدی
هراسدن بالالارین اسوردی دیل دوداقی
قووردی اُوچی کیمی هر عرب یتیم اوشاقی
اَدبلی قزلار اسیریدی قوم بی ادبه
تزه گلین‌ده دچاریدی وحشی بیر عربه
عرب دیمه نه عرب غول پست دشت و دمن
عروسی قودی او چولده دوشوبدی حوصله دن
غضبلنوب ایلدی نیزیه شکاری هدف
یارالانوبدی یخلدی نوۀ شاه نجف
توانی اولمادی دورسون ایاقه غشّ ایتدی
قولاقلاریندا اولان گوشواره‌سی گیتدی
نفس چکوردی او بیچاره قز چوخ آهسته
جناب زینب کبری گلوب باشی اوسته
باخوب باخوب دیدی جان جان گلین بالام لای لای
قانیلا تل‌لری اَلوان گلین بالام لای لای
اورگی غملی گونی قاره غصّه‌لی بی‌بوین
غریب جانی سنه قربان گلین بالام لای لای
یاخار حنا النه طوی گونونده تازه عروس
حنایه اولمادی امکان گلین بالام لای لای
الون حنالی دگُل، قاره زلفوی امّا
حنا کیمی بوریوب قان گلین بالام لای لای
دیون بو اوخشامانی شأنوه گوزل یاراشور
قولاقی یاره لی جیران گلین بالام لای لای
مثال شانه سنون قانلی زلفون دردی
ایدر اورکلری شان شان گلین بالام لای لای
گلین قویار باشنا تاج، دوزموسن سنده
تِلوه قرمزی مرجان گلین بالام لای لای
گلین فراغتیه تختده گیدر هوشه
گوز اوسته سُرمه‌لی مژگان گلین بالام لای لای
گلین قویار باشنی ناز بالشون اوسته
یرون اولوبدی بیابان گلین بالام لای لای
سنون کیمی دوگولوب باش آچیق قالار هرگز
آتاسین ایتسلر عریان گلین بالام لای لای
ایاقه دور آپاروم یاتسون حجله گاهونده
دِیَرَم اوردادا هر آن گلین بالام لای لای
مرحوم انور اردبیلی
منبع مجموعه کانالهای مدح و مرثیه
موضوع: حضرت امام موسی کاظم (ع) احوالات ,
زبان شعر و شاعر: نوحه ترکی , انور اردبیلی
----
زبانحال حضرت موسی ابن جعفر (علیه السلام)
و گریز به قتلگاه
من ای سِند ستمگر حجَّت سبحانم ئولدورمه
امامم رهنمای عالم امکانم ئولدورمه
سالانمزدی منی زندانه هارون ستم پرور
مشیّتله اسیر گوشۀ زندانم ئولدورمه
رضای حقّه خاطر گردنیمده سلسلم واردی
و اِلّا کائناته سلسله جُنبانم ئولدورمه
آتام صادق فروغ آسمان دین و مذهبدور
ئوزومده منطقیمده صادق البرهانم ئولدورمه
بو سیما که گوررسن منده سیمای عدالتدور
ئوزوم آزادمرد آزاده بیر انسانم ئولدورمه
رئیس ملّت اولماز مُستبدّن بی لیاقتدن
یوخومدور فلسفمده نقص، بی‌نقصانم ئولدورمه
ستمگردور عدالتدن اوزاقدور بی حیا هارون
او ضدّ دیندور من هیکل ایمانم ئولدورمه
دیوب حق سوز وطندن اون بیر ایلدور اولموشام تبعید
نچه محبسده بیر مدّت دی سرگردانم ئولدورمه
آپار بو زهریکی خرمانی ایتمه سن منه تکلیف
دوشونمورسن خبیر ظاهر و پنهانم ئولدورمه
ز بس نامردسن نابود اولوبدی روح وجدانون
اگر وجدان مثلده یپکر اولسا جانم ئولدورمه
وطنده بیر بُلوک اوغلوم قیزیم سردرگریباندور
اولاردان ئوتری هرگون دیده‌سی گریانم ئولدورمه
سنه قول باغلیام اینجیتمه ظالم تازیانیله
غمیم چوخدور اورکده خستۀ هجرانم ئولدورمه
مُسنّ اشخاصه جدّیم امر ایدوبدور ایلیون حرمت
ضعیفم سیّدم پیرم اورک سوزانم ئولدورمه
آغیر زنجیری بوینومدا ئولونجه ساخلارام نِینک
اگرچه یورقونام افتادۀ دورانم ئولدورمه
بوکوب ساقینیمی کُنده قیامه طاقتیم یوخدی
طبیبیم یوخ دچار درد بی‌درمانم ئولدورمه
اهانت ایلمه ظالم اوتان بو آق محاسیندن
من آخر پیشوایم صاحب عُنوانم ئولدورمه
مسلمان‌سان اگر قرآن واردور معرفت سنده
حساب ایله منی بیر قاری قرآنم ئولدورمه
ندن پروا یوخوندور روز رستاخیز و میزاندان
عمل معیارینه منکه گوزل میزانم ئولدورمه
کیمه سیلی ویرورسان بی‌مروّت یاخشی فکر ایله
یخور سیلون یره چون قالب بی‌جانم ئولدورمه
نیه معبودی ناظر گورمیورسن باشوون اوسته
گناهیم یوخدی بی‌جرم و بلا عصیانم ئولدورمه
وفادارم قضانون حُکمینه ای روبَه ترسو
شجاعت بییشه‌سینده یوخسا من اصلانم ئولدورمه
قلم بوردان سوزی دوندر حسینون مقتلیندن یاز
اودا شمره دیوردی رحم ایله عطشانم ئولدورمه
قوناق دعوت سیز اولسا حرمتی واجبدی هریاندا
نچه مین دعوتیم واردی سیزه مهمانم ئولدورمه
یانور قلبیم دیدوم بیر شُربه سو ویر ویرمدون ویرمه
چخورسان سینم اوسته سینه‌سی شانشانم ئولدورمه
اوتان ای جیره‌خوار زادۀ هند جگرخواره
حسینم ریزه‌خوار سفرۀ منانم ئولدورمه
چوخور یِر چاه عشقیمدور منی ئوز باشیمه قوی گیت
بیلورسن افتخار یوسف کنعانم ئولدورمه
ئوزوم فُلک نجاتم سالمشام گردابیده لنگر
نجی اللّهه اما مُنجی طوفانم ئولدورمه
تَجرّدده مقامیم فوقیدور عیسا و موسادن
نه عیسی و نه موسی مظهر یزدانم ئولدورمه
ولادتده دیوب روح الامین گهواره مه لای لای
پیمبر زادیم شاه ملک دربانم ئولدورمه
منیم شخصیّتیم هر عارفه گون تک نمایاندور
ضیاء بخش و صفای مجلس عرفانم ئولدورمه
فراتی ایسته‌سم آب حیاته ایلرم پیوند
ولی من تشنة سرچشمة جانانم ئولدورمه
یارام چوخدور اورکدن چکمیشم اوچ شعبه پیکانی
گوروسن قتلگهده قانیمه غلطانم ئولدورمه
صفای عشقیدن مقتلده اوخدان شهپریم واردی
هُمای اوج قدسم طایر رضوانم ئولدورمه
مقام حکمتیمده خضرلر مبهوت و سرگردان
طبابت‌ده طبیب حاذق لُقمانم ئولدورمه
باجیم زینب الی باشدا قویوب یوزه مقتله گلسون
گیدوب قاصد بیلور من زینت میدانم ئولدورمه
ویروب سعد اوغلی فرمان قتلیمه سن قانیمی توکمه
جلالت مصدریندن صاحب فرمانم ئولدورمه
کنار اول قوی هواداریم گلنده ایلیوم پیشواز
قرا گونلی باجیملا شرکت پیمانم ئولدورمه
گلوب زینب یتشدی شمره قهریله خطاب ایتدی
او قربان که کسورسن من اونا قربانم ئولدورمه
گورورسن جان ویرور ظالم دایان قوی قیزلاری گلسون
منی ئولدور اونا رحم ایله بی‌سامانم ئولدورمه
مرحوم انور اردبیلی
منبع مجموعه کانالهای مدح و مرثیه
موضوع: حضرت امام موسی کاظم (ع) احوالات ,
زبان شعر و شاعر: نوحه ترکی , انور اردبیلی
----
زبانحال حضرت موسی ابن جعفر (علیه السلام)
سالوب قضا منی سیزدن کناره معصومه
بو آیریلیق غمنه یوخدی چاره معصومه
گجه گونوز سیزی سردابده دعا ایدورم
آخور سرشک گوزومدن عذاره معصومه
سنون عوضوه زنجیر بوینوما دولاشوب
سیخوبدی بوینومی ایلوبدی یاره معصومه
سسیمه سَس ویرنیم محبسیمده سلسله دور
نجه که سس ویروری یاره یاره معصومه
وصیّت ایلیورم قارداشون گَلنده منی
قویا بو سلسلئیله مزاره معصومه
قوجالسا رسمدی هر کیم اَله عصا گتورور
دوران زمانده دوشمز فشاره معصومه
قیام ایدنده منیم لنگره دوشور بدنیم
دورانمورام ییخیلاندا دوباره معصومه
یخلانون گَرک اوغلی قیزی دوتا اَلینی
اَلیم چاتور سیزه نه رهگذاره معصومه
فلک منی نجه گور حسرت ایتدی عترتمه
نه ایتمیشم فلک کجمداره معصومه
بر آتانون اوتوز آلتی قیزیلا اوغلی اولا
هی آدلارین ایده دلده شماره معصومه
یادیمدا واردی اولاندا مدینه دن تبعید
اسیریدوم سپه ظلمکاره معصومه
یولومی سالدیلا عمداً بو گیدنده کوچه مزه
گورم سیزی چکه قلبیم شراره معصومه
هاموز دوروب قاپودا شدّتیله آغلوردوز
دولانمشیدی گونوز لیل تاره معصومه
گلنمدوم قاباقا بیر دییم خداحافظ
نوازشیم اولا خورد و کُباره معصومه
دوشنده من یادوزا عطریمی رضادن آلون
انیس اولون او گل نوبهاره معصومه
گِلایه ایلمیون یازمورام سیزه نامه
گرکدی نامه چاتا انتظاره معصومه
یازاندا نامه نی کیمدن یولا سالوم وطنه
گَلن تاپانمیورم اول دیاره معصومه
بو محبسون قاپوسین سنّد باغلیوب محکم
که یوخدی بر کسه حقّ نظاره معصومه
گَلن تاپولسادا قویمور گَله ملاقاته
نه باخمیور منه نه کردگاره معصومه
اوزومه بیر یول آچور گونده محبسون قاپوسین
ویرور غذا قفسنده شکاره معصومه
نجه غذا نجه سو شرحی ناگوارادور
طعامی زهردی بو دلفکاره معصومه
نه راضیم سو ویره نه منه غذا گتوره
ایدم اوزوم اوزومی من اداره معصومه
فقط آچا قاپونی دستماز آلام بیر یول
دوشم عبادت پروردگاره معصومه
آچور قاپونی گورور سجدده غریب آتاوی
به فوری قمچیه ایلور اشاره معصومه
نه من کیمی قولی باغلی نه سنّد تک مأمور
محالیدور گله بو روزگاره معصومه
یورولموشام نفسیمدن اَجله منتظرم
خوشام بو یرده دوشم احتضاره معصومه
گوزومی باغلاماقا فاطمه آنام گلسه
باشون آچوب گَلَجک آه و زاره معصومه
عنایت ایلسه جدّیم حسینیده گَتورر
بو بیکسی یتورر افتخاره معصومه
نه وقت اولور بالا من کربلایه گِتمَمیشم
وار عشقیم اول حرم مُشکباره معصومه
بو حالیله دوشرم جدّیمون اَیاقلارینا
محاسنیمی باتورّام غباره معصومه
چَکر بو گردنیمه ساربان کَسن اَلینی
غریب آتون چکر عزّ و وقاره معصومه
دیزینون اوسته آلار باشیمی یارالی طبیب
گورر دوداقلاریمی پاره پاره معصومه
مرحوم انور اردبیلی
منبع مجموعه کانالهای مدح و مرثیه
موضوع: حضرت امام موسی کاظم (ع) احوالات ,
زبان شعر و شاعر: نوحه ترکی , انور اردبیلی
----
شجاعت حضرت امام محمد باقر (علیه السلام)
در مجلس یزید
او آغیر کلمه لری درک ایلدی هند اوغلی
اولدی حیرتزده زینبده اولان جرأتدن
ایستدی مجلسین احوالینه تغییر ویره
حضرت باقره دوتدی یوزونی رأفتدن
دیدی کیمسن ندور آدون نه گوزل اوغلانسان
چوخ شجاعتله سنی درک ایدورم دقتدن
واردی میلون دوتاسان کُشتی منیم اوغلوملا
جایزه ویرم اگر کام آلاسان سبقتدن
دیدی باقردی آدیم جدیم او طشتونده کی باش
جلوه گر دور یوزی انوار الوهیتدن
اسرا سلسله سینده دایانوب باشدا آتام
سلسله ثقلی یوروب گردنینی شدتدن
کُشتی دوتماق بیزه تحقیر لیاقتدی یزید
فکر قیلما سوزوی رد ایدورم وحشتدن
ایکی شمشیر گتورسونله سوله الساعه
بیرین اوغلون بیرینی من گوتوروم قسمتدن
فرصت جنگی سنون اوغلوا ویرم اول
واردی ارثیم اسدالله دا اولان سیرتدن
گورمیوبسن شهدا جنگینی خوشدور الان
بیرنمونه گوره سن بیزده اولان صولتدن
سنون اوغلون منی ئولدورسه بو دعواده اگر
قانیمی یوخدی آلان سن کیمی بدفطرتدن
یامن ئولدورسم اگر اوغلوی مردانه یزید
عوضین چیخمیاسان طایفه ی عصمتدن
اوغلوون خاطرینه عمه می اینجیتمیه سن
طشتیده قانلی باشی سالمیاسان حرمتدن
هندون اوغلی دیدیگی سوزلری آلدی دالیا
هاشمی لر دیدی مشهوردیلر صولتدن
حضرت باقره زینب دیدی قربانون اولوم
گل قباقه بیر ئوپوم تر بورین صورتدن
اوجالاندی باشیمیز قوی دولانوم من باشوا
بدنظر چوخدی دگر گوز سنه ضدیتدن
آی بالام سید سجادون ایشیقلی چراغی
دشمنیم قوزیا بیلمور باشینی خجلتدن
مرحوم انور اردبیلی
منبع مجموعه کانالهای مدح و مرثیه
موضوع: حضرت امام محمد باقر (ع) احوالات , احوالات مجلس یزید ,
زبان شعر و شاعر: نوحه ترکی , انور اردبیلی
----
حضرت ابوالفضل العباس (علیه السلام)
شیرمردون یخلوب توپراقا قارداش یارالی
ایلورم سجده جبینیم یارالی باش یارالی
اوج اعلاده قوشون دگسه یارا شهپرینه
قادرتی اولماز حمایت ایلیه پیکرینه
مرد شمشیرون اگر یتسه خطر اللرینه
کسیلر چاره سی دشمن قباقیندا سخلار
قارداشون تک یخلاندا یوزی اوسته یخلار
دولسا هر بیر گوزه قان لخته سی گورمز قاباقی
سندیرار شخصی مسلّم قولونون اولماماقی
یخلان وقیتده بند اولسا رکابه ایاقی
مرکبی گیتدوقیجا لرزه دوشر قامتینه
یوزی توپراقه دگر صدمه یتر صورتینه
سرو نسگللی اولار دوشسه بوداقسیز چمنه
ایتمورم دردیمی اظهار اولان اولدی منه
گَل اوزون ال یتور ای شاه بو السیز بدنه
دیمورم مهلکه دن جسمیمی قارداش چکه سن
ولی چوخ خوشدی بو السیز باشیما باش چکه سن
ایتموسن سن گوز آچاندان منه تعلیم وفا
دیمیشم امریوه بیر عمریدی لبّیک و بَلی
سایه تک پشت سرونده دولانوب صبح و مسا
قاباقا گیچمه میشم ایمدی گینه گیچمیورم
ساقی کوثر آتام سو گَتیروب ایچمیورم
من اوتوز بش ایله بالغ قاپیوین نوکریم
خوان اجلالیوین عالمده نمک پروریم
دیمورم کنز وفا و ادبین گوهریم
هر نیم صحنه ی عشقونده اوزومدن گیچنم
تیر عشقون پر آچان وقته گوزومدن گیچنم
خدمتیم اولسا برازنده یوبانما اُلورم
گَل طبیبانه باشیم اوسته، دایانما اُلورم
خیمه لرده الی بوینوندا دولانما اُلورم
دشمنه وقریمی ای میر امم ویرمه میشم
ویرمیشم اللریمی الدن علم ویرمه میشم
دلخوشام گوزلریمی فاطمه لطفیله سیلور
سینمون یاره سینه باد بهشتی اَسیلور
دلخوشام باشیوه نذر ایلدیقیم باش کسیلور
شاد اولوب نوکریوین روحی آقا غم یرینه
شکری وار نذریمی بو چولده یتورسم یرینه
آلدی قارداش سسینی قتلگهه گَلدی امام
گوردی عبّاسی چالیخلور یوخودی حال قیام
دیدی جان قارداشیوین قارداش ایشی اولدی تمام
اکبری گیتمیشیدی اصغری دوشدی خطره
زینبون باشدا قرا معجری دوشدی خطره
برج محنتده که اولدوزلاریمون وای گونونه
قورخولی چولده آدامسیزلاریمون وای گونونه
سایه وه دالدالانان قیزلاریمون وای گونونه
صف عشقه دوزولنلر سنه قربان یارالی
الی الدن اوزولنلر سنه قربان یارالی
مایلم نطقیوه گفتاریوه قارداش دی منه
قلبیوین دردینی اظهار ایله قارداش دی منه
دمبدم آدیمی تکرار ایله قارداش دی منه
چرپنان قلبیمون آرام ایله چرپنماقینی
بیلیمون بلکه یادیمدان چخادام سنماقینی
من حسینم غم هجرونده یانان قارداشوام
نوجوان اوغلی اُلن قدّی کمان قارداشوام
یخه سی خیمه ده اللرده قالان قارداشوام
گوزیوین قانینی حسرتله سیلن قارداشوام
قوجا وقتینده علاجی کَسیلن قارداشوام
نه قدر چوللری حیران دولانوم آه چکوم
نه قدر اشک ملاله بویانوم آه چکوم
نه قدر آتش هجرونده یانوم آه چکوم
نه قدر قلبیمی پیکان مصیبتله یانوم
نه قدر خیمیه بیر گونده جنازه آپاروم
من نجه دشمن ایچینده سنه غم بزمی قوروم
من نجه طعنه وورانلار قباقیندا اوتوروم
من نجه سن یخلان یرده ایاق اوسته دوروم
من نجه ایمدی بو قولسوز بدنین ترکین ایدوم
من نجه خیمه سرایه الی بوینومدا گیدوم
یاندورار حشره کیمی عالمی درد و محنون
شاخه سیز سروه مثلدور کچیلیبدور بدنون
قالسون اللرده او ال که الیوی کسدی سنون
بِلی سنسون ستمیله بِلیمی سندیرانون
گوزی چخسون آتام اوغلی گوزیوه اوخ آتانون
مرحوم انور اردبیلی
منبع مجموعه کانالهای مدح و مرثیه
موضوع: حضرت ابوالفضل العباس (ع) زبانحال ,
زبان شعر و شاعر: نوحه ترکی , انور اردبیلی
----
زبانحال حضرت زینب (سلام الله) به
مادر بزرگوارش در حال احتضار
غربتده آنا زینبی ئولدوری مُحن گل
هی سسلدیم امداده، حسین گلمدی سن گل
قلبیم ورم ایلوبدی آنا یوخدی دواسی
بیمار حسینم منه یوخ عمر صفاسی
آدی دیلمون ازبری باشیمده قراسی
قربان ایدورم جانیمی جانانمه من گل
آند اولسون او سالار بزرگ شهدایه
یوخدور آرامزدا ابداً ذرّه گلایه
خدمتده قصوریم اولا شاید اُسرایه
گلمور باشون اوسته او اللرده ئولن گل
عمروم یتیشوب باشه عزا منظره سیله
سازش ایلدیم غم یولونون داغ دره‌سیله
ای کاش گیدم قبره حسینون قره سیله
رغبت ایلمز آق کفنه قاره گین گل
هجر عالمی سر رشتة آسایشم ایتدی
سانکی منی غمر کیپریگمون اوسته یریتدی
شمعی اریدر شعله منی غصّه اریتدی
ذوب اولدی یانان شمع مثالنده بدن گل
خوشدور سنه نسگل‌لریمی ویرسم عریضه
وار هر بیر عیادت ایدنه اجر فریضه
تحفه گتورلّر آنا دیدار مریضه
تربت منه بسدی دیمورم الده کفن گل
زینب داخی جان قورتارا بلمز بو خطردن
سینم اوجالور هر نفس آلدوقجا جگردن
واضحدی وفاتیم منه آلنمداکی تردن
حتماً ایدرم شام کنارینده وطن گل
سودا ایلدیم عمریمی نقد غمه ساتدیم
طوفان زده کشتی کیمی امواجده باتدیم
سن شانه وران قاره ساچی تِل تِل آغارتدیم
آی نازیله گیسولریمی گونده هورن گل
سندندی بو پیکرده اولان جوهر و شیرم
جسممده توان یوخ اورگی یاره‌لی شیرم
یثربده‌دی افسون قالان قوم و عشیریم
یوخدور بو بلالی باشمون اوسته گلن گل
زینت اولا آز قالدی وجودیم دل قبره
رخساریمی مونس ایدم آب و گل قبره
آز قالدی گیدم حسرتیله منزل قبره
آی منزل قبره گیجه گزلنده گیدن گل
گون مثلی تجلّی ایلدی عاطفه منده
آز قالدی اولا هر سوموگوم سرمه بدنده
نوحه دیمشم سوزیله هر اوغلون ئولنده
سنده بو آدامسیزر قزووا نوحه دیین گل
روشن گونوزوم سن کیمی اولمادی منمده
رنگیم سارالوب سولدی قرا پیرهمنده
وار قمچیلرین نقشه‌سی یورقون بدنمده
ای کوچه‌ده گُل صورتینه سیلی دگن گل
امکانی وار عشقیم آنا چوخ باشدا تاپولسون
شوقیم ایکی سیّد ایکی قارداشدا تاپولسون
گلسون وار امیدیم سنه یولداشدا تاپولسون
بلکه سنیله گلدی حسینیله حسن گل
مرحوم انور اردبیلی
منبع مجموعه کانالهای مدح و مرثیه
موضوع: حضرت زینب کبری (س) زبانحال ,
زبان شعر و شاعر: نوحه ترکی , انور اردبیلی
----
حضرت زینب کبری (سلام الله)
ترک ائده آز قالور حسین تیره جهانی زینبون
گوزلری آختارور سنی فاطمه جانی زینبون
الّی بئش ائیلدی سایه لطفوه دالدالانمیشام
عشقیوه دستگیر اولوب شهرلری دولانمیشام
شمع یانوب خموش اولار منکه همیشه یانموشام
اللی بئش ائیلده سونمیوب سوز نهانی زینبون
آزقالوری یومولماقا اشک تری آخان گوزوم
میلۀ غصّه سُرمه سین کیپریگینه یاخان گوزوم
قتلگهونده نعشیوه حسرتیله باخان گوزوم
منتظروندی دیدۀ اشک فشانی زینبون
شامه اوزاقدی کربلا چوخدی اگر چه فاصله
سن آقاسان اوزاق یولون زحمتینی قبول ائله
بیر یول ایشیم دوشوب سنه گلمسن ایلرم گله
غملی باشین دیز اوستونه یوخدی آلانی زینبون
هر باجی جان وئرن زمان من کیمی اولسا دربدر
صاق وصولا باخار گوزی قارداشین آرزو ائدر
قارداشی دفنه گلمسه قبرینه ناگران گئدر
گل نگران گئدور بو گون روح روانی زینبون
یاسین اوخوردون هر شب جمعه آنام بتوله سن
فکره گئدوردوم عالم عشقیده فوق العاده من
کاش دیردوم ای حق قادر و حیّ ذوالمنن
زینب ئوله حسین اولا فاتحه خوانی زینبون
من دئدوم عمرومون گلی عزّتیلن سولار حسین
تربتیوی ئوپر باجون جام صفا دولار حسین
غصّه لی روحی غصّه دن اوردا خلاص اولار حسین
گورمدی جان وئرن زمان کرب و بلانی زینبون
یتمه دی بهری زینبه قارداش او خاک اقدسین
درک ایلیم مزاریده اصغرین آغلاماق سسین
خاطرین ایستین قزون ساخلادی یورقون عمه سین
قونشی اولار رقییه خوشدی مکانی زینبون
یدّی وفالی قارداشین خواهر مهربانیم
کرب وبلا ددیارینون غصه لی مهربانیم
شمره اسیر اولانلارون حافظ و پشتبانیم
ایندی اجل گلوب حسین یوخدی توانی زینبون
سنسیز حسین یاتاندا من هر گجه غمله یاتمشام
غصه لرون دوشوب یادا ئوز ئوزومی اویاتمشام
قدّیمی غملرون بوکوب پرچمووی اوجاتمشام
آدون اولوبدی دم بدم ورد زبانی زینبون
یاخشی دگل گتورسه کیم ائتدیگی خدمتین دیله
خدمت ائده وظیفه دور شوقیله باغبان گُله
گُللرووه ئوزون کیمی یِتشمدیم گذشت ائله
عذره یول آختارور دئدی بو جریانی زینبون
سوز غمونده قلبیدن عود کیمی آلیشمیشام
هاردا دئیوبله آدیوه خارجی من دانیشمیشام
هاردا سالوبلا مشکله عترتیوی چالیشمیشام
عزّتیله دولاندیریب آل عبانی زینبون
رخت اسارتی گیوب پاک و خجسته ساخلادیم
دوره می آلدی بیر بُولوک قلبی شکسته ساخلادیم
ساخلا دئدون رقیه می سینمون اوسته ساخلادیم
پرورشنده غفلتی اولمادی آنی زینبون
رنگی سارالدی گون بگون بیلدیم او قز خطرده دور
هی سنی مندن ایستدی منده دئدوم سفرده دور
یومدی گوزون خرابه ده داغی یانان جگرده دور
حیف او بالا ئولن زمان چخمادی جانی زینبون
باشیوی آلدی سینه سی اوستونه دقت ایلدی
دوردی چکیلدی گوشیه ، مجلسی خلوت ایلدی
سنله خصوصی بیر نچه ثانیه صحبت ایلدی
باشیوه اوخشاما دئدی قینه دی قانی زینبون
نُطقی کسیلدی غفلتاً درک ائده بیلمدوم سوزون
فکر ایلدیم یاتوب بالون گُل یوزووه قویوب یوزون
گوردوم او طفل نازنین یومموش همیشه لیک گوزون
وای دئدی داده سسلدی زین العبانی زینبون
میّتی جابجا ائدم یاخشی اطاقیم اولمادی
باشینون اوسته یاندیرام شمع و چراغیم اولمادی
یاخشی حسین خرابه ده ئوزگه قوناقیم اولمادی
ایلدی رو بقبله اول خردا بالانی زینبون
گوردوم اونون قرا تلی گُل یوزون ایلیوب نهان
دوزمدی قلبیم ایلدوم طره لرون اویان بویان
گوزلرینی ئوپوب دئدوم آچ گوزوی رقیه جان
گلمدی نطقه بلبل باغ خزانی زینبون
مرحوم انور اردبیلی
منبع مجموعه کانالهای مدح و مرثیه
موضوع: حضرت زینب کبری (س) زبانحال ,
زبان شعر و شاعر: نوحه ترکی , انور اردبیلی
----
زبانحال حضرت زینب (سلام الله)
در حال احتضار
من عزیز فاطمیم فلک منه حرمتون ندن اولمادی
الورم کنار دمشقیده باشیم اوستونه گلن اولمادی
رقم ملال و مصیبتیم یازیلا چتیندی قلم قلم
بیر حسینیمیدی بلی دین محن زمانیه بیر منم
هانی بیر اسیره منیم کیمی آغاروب ساچی اولا قدی خم
محنیم کیمی هیچ عزالینون محنی کمر شکن اولمادی
غم وغصه دن قوتارور اجل سویورام قبای اسارتی
گونی ایل کیمی گچن عمریمون یتیشوبدی آخره ساعتی
یری واردی سنگ مزاریمه یازالا بو غملی عبارتی
یر اوزونده زینب زار تک یورولوب بلا چکن اولمادی
نقدر نفس ویروب آلمیشام او قدر منه یتیشوبدی غم
هایانا مسافرت ایتمیشم منیله بلا اولوب همقدم
بو جهاندا دینجله بولمدیم گیدورم مزاریده دینجلم
باشیم اوسته باش آچا حیف اولا نه حسین و نه حسن اولمادی
اریدوبدی غصه وجودیمی نه رمق قالوب نه دوزوم قالوب
شرر مصائبه یانمیشام اورگمده اودلی سوزوم قالوب
نفسیم دوشوبدی شماریه گنه کربلاده گوزوم قالوب
چکورم او توپراقین حسرتین منه حیف اولا وطن اولمادی
یورولان مسافره بنزیرم یولون اوسته خار وخس اینجیدوب
قنادی سنان قوشا اوخشورام سیخوب اللی ایل قفس اینجیدوب
نفسیله خلق خوش اولسادا منی چکدیقم نفس اینجیدیب
او نفس که سینمی یاندیروب ولی سوزشین گورن اولمادی
ره ابتلانون اوزوم کیمی غمه مبتلاسینی گورمدیم
گجه استراحتیم اولمادی سحرین صفاسنی گورمدیم
من ئوزوم وفالیم عالمون ابداً وفاسینی گورمدیم
گیجه آغلادیم گونوز آغلادیم گوزومون یاشین سیلن اولمادی
شهدا غمین اسرا غمین چکوب هر مصیبتی گورموشم
الی باشدا مقتله قاچمیشام عمل جنایتی گورموشم
کسیلنده قارداشیمون باشی علناً قیامتی گورموشم
باخوب آغلادیم کمک ایستدیم منه بیر کمک ایدن اولمادی
ستمیله اولدی ورق ورق ایاق آتدا فاطمه نون گلی
من آتوردوم ال دم خنجره باشیما یاغوردی بلا کولی
رمقی یوخیدی حسینیمون گنه ال گوتورمدی قاتلی
یوزی اوسته قالدی جنازه سی دالی اوسته دونده رن اولمادی
او حسین که ملک حجازیده هامی گورموشیدی عطاسنی
ضعفا غمینده آتام کیمی قوجالوب آغاردی محاسنی
چخادوب ویرردی مدینه ده فقرایه تازه لباسنی
ایله رادمرد زمانه نون ئوزونه ولی کفن اولمادی
مرحوم انور اردبیلی
منبع مجموعه کانالهای مدح و مرثیه
موضوع: حضرت زینب کبری (س) زبانحال ,
زبان شعر و شاعر: نوحه ترکی , انور اردبیلی
نظرات (۰)
هیچ نظری هنوز ثبت نشده است