متن نوحه ترکی هادی اردبیلی

متن نوحه ترکی از اشعار هادی اردبیلی ویژه محرم و ایام سوگواری ائمه اطهار علیهم السلام 

 

احوالات حضرت رسول اکرم (صلی الله)

 

ئورک اراده ایدوب احمدین ارادتینه

پر آچدی اگلشه تا قلۀ سعادتینه

 

تجسس ایتدی گوره کیمدی احمد مختار

شرف دخیل دوشوبدور اونون شرافتینه

 

ادب ایاقین اوپور ، علم الین ، هنر ایاقین

مروّت عاشق اولوب وسعت عدالتینه

 

نه واژه یه سقیشور ، نه سوزه نه توصیفه

قلم سخن تاپا بیلمور یازا سخاوتینه

 

امینِ خلق اولوب اوّل صورا نبی اله

نبوّت علمی نماینده دور نجابتینه

 

زمین زیارت ایدور زائرانه اقدامین

سما سجود ایلیور ساحت متانتینه

 

چاتور نه علمین الی دامنین دوتا نه ادب

سقور نه قاضی اندیشه نون قضاوتینه

 

جمالینی گله اوخشاتماقا حیا ایدورم

گولین گوز لیگی چاتماز بونون ملاحتینه

 

گوزلیک عالمی گلشن گدادی کُوینده

ذکات حسنی سبب دور گُلین طراوتینه

 

وقاریلن گُتورنده قدم بو قبلۀ دل

جلالی بنذور اوجا داغلارین صلابتینه

 

زلال چشمه لرین نقره ای آخان سولاری

شبیه دور بو شهین زمزم صداقتینه

 

شهابِ شعله فشان گوگده اولسا گر ظاهر

او لحظه اوخشار عملدن بونون بلاغتینه

 

نسیم عبور ایلین وقته گلّلر اوستندن

او صحنه سی یاراشار حضرتین فصاحتینه

 

منیله سیزده اولون هم قدم گئدک باهم

محمد عربینون دم ولادتینه

 

یازوللا پانصد و هفتاد ویکّم میلاد

گلوب بو عالمه تاریخین اوز روایتینه

 

ربیع اوّلین اون یدی سینده جمعه گونی

یتوردی ما خلقی عّزت نهایتینه

 

طلوع فجریده مکّه بوروندی انواره

جمالی چیخدی سماده گونون رقابتینه

 

توّلد اولدوقی منزل صورا اولوب مسجد

محل سجده اولوب مکّه نون جماعتینه

 

گوروندی عالم آرا بیر نچه علائم او گون

بولار دلالت ایدور شوکت و جلالتینه

 

گزردی گوگلری شیطان یوخیدی هیچ مانع

یولی کسلدی او گوندن گوگون سیاحتینه

 

سرای کعبه ده بت لر توکولدولر بیردن

قدمومی ویردی بها کعبه نون قداستینه

 

شکاف دوشدی مدائنده طاق کسرایه

یتشدی صدمه او قصرین کشیده قامتینه

 

ترابه ساوه ده دریاچه نون سوئی باتدی

اولوب مقدمه ظالملرین ذلالتینه

 

سماوه آدلی که چای واردی شام دشتینده

واریدی آز سوئی نسبت اوز استطاعتینه

 

گلوبدی جوششه دریا کیمی اوجالدی سوئی

یاییلدی دشتی ایدوب شامل اوز عنایتینه

 

نبوته یتشوب قرخ یاشندا القصه

مبادرت ایلدی امتّین هدایتینه

 

اثر قویوبدی سلاطین عصره فرهنگی

گتوردی شه لری اوز سلطۀ سیاستینه

 

نه مال یغدی نه عنوانه اولدی آلوده

نه باغلادی اورگین عالمین عمارتینه

 

نه اهل زوره باش اگدی نه صاحب ملکه

نه گلدی صاحب قدرتلرین اسارتینه

 

بدون واهمه قرآن دئین یولی گیتدی

هامی باش اگدی بو شاهنشهین رشادتینه

 

او باشلاریکه باش اگمزدیلر هیچ انسانه

گتوردی منطقیلن حیطۀ اطاعتینه

 

رواج ویردی عبودیت خداوندی

بشر ایناندی خدای ازل عبادتینه

 

قیزین دیری دیری تپراقه دفن ایدن اعراب

تفاخر ایلین اوز جورینه جنایتینه

 

هدایت اولدی محمد دئین یولا گلدی

غلبه ایلدی رقّت اورگ قساوتینه

 

محبّتیله قساوت یرین عوض ایلدی

ویروبدی خاتمه اوز جرم و قتل و غارتینه

 

زمان سووشدی غرض چاتدی شصتم هجرت

نشان اولوبدی بو شه امتین شقاوتینه

 

یهودی بیر خانم ایتدی بو حضرتی مسموم

باخون یهودیه نون جرأت و جسارتینه

 

قاریشدی قانه جفا سمّی دولدی رگلرینه

سبب اولوبدی او سّم حضرتین شهادتینه

 

یغشدی سینیه جان دوشدی بستر مرگه

خیانت اولدی بها زحمت رسالتینه

 

یانوردی شدت تَبدن میان بسترده

توکوردی گوز یاشی زهرا او غملی حالتینه

 

قاپی دوگولدی گیدوب آچدی فاطمه قاپونی

گوروبدی بیر عرب آماده عرض حاجتینه

 

سوال ایدوب نه سوزون وار دئدی غریب عربم

اراده ایلمشم احمدین زیارتینه

 

خانم بیوردی دگل خوش پیمبرین حالی

مریض حال دوشوب رخت استراحتینه

 

عرب قیتدی گیدوب بیرده ایلدی رجعت

دئدی اجازه ویرون حضرتین عیادتینه

 

پیمبر آچدی گوزین اذن ویر بویوردی قیزیم

گلوب او منده اولان آللاهین امانیتنه

 

او عزرئیلدی هیچ ایودن اذن آلوب گچمز

اونون تسلطی وار عالمین مسافتینه

 

بیریندن اذن آلوب اوندان گلوب جانین آلماز

نیاز یوخدی اونون اذنون اجابتینه

 

بو منزله فقط اذن ایستور اولا داخل

اوزوی حاضر ایله غملرین قیامتینه

 

بتول آچدی دَرِ رحمتی او دم حاصل

ایوه نسیم کیمی وارد اولدی عزرائیل

 

پیمبرآچدی گوزین نرگس چمن سیاقی

سارالدی رنگی گوزی آخدی تتردی ایاقی

 

جهانِ جسمینی ترک ایتدی روحِ پیغمبر

یومولدی نرگس مخموری تک ،گوزل گوزلر

 

علی اگلدی دوداقلارینی قویوب گوزینه

صورا عباسینی چکدی او حضرتین یوزینه

 

سرشگ حسرتیلن دولدوروب گوزین چکوب آه

دئدی قوتاردون اوزون ایندی یا رسول الله

 

سنوبدی سّد دلیم داشلانور جماله سئلیم

دیزیمده قالمادی طاقت عم اوغلی سیندی بلیم

 

بو سیل خونیدی دلدن جماله باغلیورام

شکسته دل قیزون اوخشور سنی من آغلیورام

 

قرار صبریمی آز قالدی دردون الدن آلا

عم اوغلیجان هله گور فاطمه ون قالوب نه حالا

 

یانان اورک باشنا اللرین قویوب ملیور

دوشوب قدملروه گوز یاشین یوزه الیور

 

غرض بو فاطمه یتمش گون ایتدی آه ونوا

نوالریندن اولوبدی مدینه غرق عزا

 

آتا فراقی اریتدی وجود اطهرینی

مفصلاً ایشدوبسوز حدود غملرینی

 

قاپوسی یاندی قولی سیندی محسن اولدی شهید

وریلدی سیلی گوزینده اولوبدی لکّه پدید

 

او فاطمه که فلک بیر زمان اوجالتدی اونی

جوانلقیندا ولی غملری قوجالتدی اونی

 

او فاطمه که اوجاتمشدی عرشه باشلاری

زمانه نیلدی بلمم آغاردی ساچلاری

 

کتاب سینه سینه بسکه درد و غم یازدی

دیوله آخر عمرینده هیچ تانینمازدی

 

سولان جمالینی غرق ایلیردی گوز یاشنا

قویاردی یاره لی لر تک الین اورک باشنا

 

غم ایتدی نیمه نفس دوشدی رخت بیماره

سوزی اسه اسه جان اوسته گلدی گفتاره

 

دیلی قالوب گوزینون اشگی یازدی رخساره

الهی چاره سیزم ایله دردیمه چاره

 

دونن قاپومی اوپن کس قاپومی یاندیردی

ایویمده دوز یین انسان قولومی سندیردی

 

گوزومده تار ایلیوبلر ایشقلی دنیانی

الهی راحت ایله بو مریضه زهرانی

 

شکسته قلبیله مدتدی نالیه گلرم

یورولمشام داخی گیتسم مزاره دینجلرم

 

جهاندا اولمادی اوردا منه فراغت اولار

مزاریده یوزومون سیلی ردّی راحت اولار

 

اورگ باغیندا بو اندازه غم گُلی بیتمز

قابورقامون قولومون یاره سی چوخ اینجتمز

 

منه که فرق ایلمور عالمین گجه گونوزی

حسینیدن داخی گزلتمرم بو نیلی یوزی

 

نوایه آیری دوشن آهولر کیمی گلروک

او قبرین اوسته ، مزارین ایچینده من ، ملروک

 

نلر گلوبدی آز عمرینده فاطمه باشنا

یازار سرشگیله زینب مزاریمون داشنا

 

هادی اردبیلی

موضوع: حضرت محمد (ص) احوالات ,
زبان شعر و شاعر: نوحه ترکی , هادی اردبیلی

 

زبانحال حضرت صغری (سلام الله)

 

اکبریم هجرون ایدوب محشری برپا باجوا

درد و غم همدم اولوب ایوده بو صُغری باجوا

 

شمعی شعله اَریدن تک اَریدوب غصّه منی

باورون اولماسا گل ایله تماشا باجوا

 

یاندروب شمعی شراری قوتارار بیر گیجه ده

اوخشامور یانماقیلان شمعدن حتّی باجوا

 

اکثراً شمع گونوز یوخ،گئجه لر شعله چکر

یانماقا فرق ایلمور روز و شب امّا باجوا

 

من او شمعم گئجه گوندوز یانورام علّتی وار

چونکه هجرانون ایدوب عالَمی یَلدا باجوا

 

بیر گئجه یانماقی سن شمعه گوروبسن نیلر

سن گیدندن غم اولوب شعله سراپا باجوا

 

قالمشام بیر گونه احوالیمه بیگانه یانار

یوز ویروبدور نجه گور حال غم اَفزا باجوا

 

یاره لی قوش کیمی روحیم چالیشور سینمده

عین زنداندی علی، مسکن و ماوا باجوا

 

رو به قبله اوتوروب آغلامشام چوخ گئجه لر

رحم ایدوب فکر ایدورم اُول گئجه رویا باجوا

 

گورموشم عالم رؤیاده گچن گونلر تک

اَلده گُل باش چکوسن ای گُل طاها باجوا

 

گوردوگوم دن دیمورم گُل گتور الده قارداش

الی بوش بیر گونی باش چک سنی زهرا باجوا

 

هجروین ناخوشیام آیری دوا ایستمورم

باخِشونلا ایله بسترده مُداوا باجوا

 

بلمزیدیم غم هجران بو قدر سختیمیش

قویمیوب غصّه و غم جسمیده یارا باجوا

 

بیر سنِق کشتی کیمی موج بلا اوستونده

یول ایتوب فرق ایلمور ساحل و دریا باجوا

 

روحیمه سنسیز اولوب سن دولانان ایو زندان

خوشدی الان بیله ایودن، ایله صحرا باجوا

 

طاقت ایستر اودا ایودن چخا انسان صحنه

قالمیوبدور ولی قارداش جانی یارا باجوا

 

چیخا بلسم سنه بیر آهیله نامه یازارام

گر یازان لحظه صَبا اولسا هم آوا باجوا

 

آهیمون نامه سینی باد صبادن یِل آلوب

آچار آهسته ایدر ناله ثُریّا باجوا

 

طیّ ایدوب گر بو اوزاق یوللاری چاتسا الیوه

یاز جوابینده ئوز احوالووی یوللا باجوا

 

نچه گون چکسه جوابی قالارام چوللرده

زحمت و رنجی چولین ایلمز ایذا باجوا

 

قلم اِئت قاشوی ئوز آهیمه یاز یوللا علی

بو سنان قلبیده واردور بو تمنّا باجوا

 

هارداسان، نیلیوسن، اصغر ایمکلور یا نه؟

طوی نجه اولدی علیجان ایله اِنشا باجوا

 

قاسمین قلبی سنقدور منیده دعوت ایدون

ایتمسون بیر کس ئوگی لیک سوزی ایما باجوا

 

نسبتی وار منیلن چون گلینین دامادین

انتظارم دیه سوز لِیل مُحنّا باجوا

 

غم آغاردوبدی خِضابی ساچمون قالدی طویا

مُلهم غیبی دیوب بو سوزی گویا باجوا

 

قاسمه خلعت آلوب ساخلامشام طوی گونینه

اودی که گلمگه وار دیلده تقاضا باجوا

 

ولی طوی خلعتی بعضاً گوزومه قاره گلور

نیه قاره گورونور خَلعت حَمرا باجوا؟

 

کاش بیلیدین نَدور علّت که قرا جلوه لنور

قاسمه آلدیقیم اُول خلعت دیبا باجوا؟

 

عوضینده گوزمون یاشی دونوب قرمزیدی

یارادوب هر بیری بیر درد مُجزّا باجوا

 

سیز گیدندن ایله بیل وسعت عالم کیچیلوب

تنگ زندانه دونوب واسعه دنیا باجوا

 

زحمتیلن چخوب ایودن ایدرم صحنی مکان

بَزم ماتم گورونر منظر زیبا باجوا

 

باخارام باغلی اطاقلار منه غم فصلی آچار

آغلارام رحمه گلر کافر و تَرسا باجوا

 

تکیه دیواره ایدوب قدّی کمان یول گیدرم

خم ایدر قامتینی اوخشادا طوبا باجوا

 

چون گورور یوخدی تسلّا ویره نیم رَحم ایده نیم

بو دیلیلیه او ویرور بیله تسلّا باجوا

 

شمعیلن چوخ گئجه باهم او اَرور من اَرورم

آغلیار شمعیده باخدوقجا بو تنها باجوا

 

صبح اولونجاق قوتارار او گنه قالّام هله من

یار اولار شمع دِگر نوبت فردا باجوا

 

شمع نیم سوزی گوروبسن که نه احواله قالار

درد هجرون یارادوب بیر ایله سیما باجوا

 

شمع نیم سوزیده شعله یِری واضحدی ولی

یانقی دلده دی یوخ شعله پیدا باجوا

 

«هادیه» حشریده بیر قانلی گوزونله نظر اِیت

گئجه بیدار قالوب شعر ایدوب انشا باجوا

 

حاج غلامرضا هادی اردبیلی

موضوع: حضرت فاطمه صغری (س) ,
زبان شعر و شاعر: نوحه ترکی , هادی اردبیلی

 

در احوالات حضرت علی (علیه السلام)

و گریز به قتلگاه

 

بلاد دینی بلادن علی رها ایلدی

اولوبدی ئوز باشنا تاج انما یاراسی

 

بنای خانۀ حقی بو قان ایدوب محکم

ویروبدی عمر بقا دینه مرتضی یاراسی

 

یتشدی خانۀ حقده او مرد حق حقه

باتوردی عالمی اندوهه منتها یاراسی

 

او کلبۀ فقرانی گجه گزن مولا

اوزی قدم گتوره ایتمور اقتضا یاراسی

 

گتوردیلر گلیم اوستنه الغرض شاهی

ایوینده آچدی عجب غملی بیر نما یاراسی

 

هامی کناره گیدوب زینب وفاپرور

یاخنلاشوب گوره ایا دگوب هارا یاراسی

 

بتول سینه سینون یاره سین گورن بالانی

گتوردی نالیه اول شاه لافتی یاراسی

 

دولاندی یاسه گنه فاطمه ئولن گون تک

علینون ایتدی ایوین محفل عزا یاراسی

 

ملائک اذنیله وارد اولان ایوی ایلدی

بتول گللرینه گلشن نوا یاراسی

 

گهی بابا گهی ایوای ننه دئدی بالالار

وجوده گتدی عجب مجلسی رثا یاراسی

 

یارالی قلبلری رافتیله مرحم ایدن

یارالانوبدی قبول ایلمور دوا یاراسی

 

غرض ایکیمجی قرا دوشدی زینبون باشنا

ئورکده بیر بیره چاتدی آتا آنا یاراسی

 

قاریشدی باشی کیمه بلمور ایلسون چاهر

چوخالدی دلده او بانوی با وفا یاراسی

 

همیشه پیرهن غم بیچیلدی قامتینه

وورلدی گه آنا گه قلبینه آتا یاراسی

 

فلکون اولمادی زینبله هیچ مداراسی

ستمله ویردی دل زینبه بلا یاراسی

 

مدام آغلادی بیر لحظه گولمدی بو خانم

ایدوب ملال و غم و درده مبتلا یاراسی

 

یارالی قلبیمنه هی یاره دگدی قان اولدی

اوچومجی یاره اولوب دست آشنا یاراسی

 

حریم خانه ده ئوز محرمی امام حسنون

نقدری عمده دی سن سویله عارفا یاراسی

 

ایچرتدی زهری جگر پارچالاندی نیمۀ شب

توکولدی طشته عیان اولدی تا خفا یاراسی

 

ننه سی فاطمه دنده گونی قرا گلدی

ئورگینه توخانان وقته مجتبا یاراسی

 

هامی ئولنلرینه زینب آغلیوب آزاد

ساغالمیان یارادور شاه کربلا یاراسی

 

یغشسا دهرین اطباسی گلسه لقمانلار

دگل دوا اولونان دشت نینوا یاراسی

 

او چولده بسکه یارا گوردی قلبی بو خانمون

شمارشیله   چتیندور  گله  سانا  یاراسی

 

بشر داغ اولسا ئورک داش بو یاره لر داغیدار

ایدر ایشقلی گونون  لیلۀ  دجا یاراسی

 

خانم نه گوردی او صحراده بلمورم یارب

باشین آغارتدی اونون رنج ابتلا یاراسی

 

یتشدی مرحم ایده قارداشا چوخور یرده

نه گوردی اوخ یرین ایلوب رفو  جدا  یاراسی

 

اولان اولوب باجی قارداش یخلدی یان یانه

دئه  زینبده  اولوب  الده  «هادیا» یاراسی

 

 هادی اردبیلی

موضوع: حضرت علی (ع) احوالات ,
زبان شعر و شاعر: نوحه ترکی , هادی اردبیلی

 

در مدح و میلاد امام حسن (علیه السّلام)

 

جان  ولا  نور  هدا دور حسن

قلبلـره     قبلـه    نمادور حسن

 

صبح ازل صورتینون  جلوه سی

لیل  دجـادن ده  سیـه طره سی

نشر کرم بیر گوزینون گوشه سی

 خلقته  بیر  لطف  خدادور حسن

 

هر گوزی بیر جام می یاریدور

هر قاشی  تیغ  کف احراریدور

هر  مـژه سی   ساتـر اسراریدور

روح  ثنا  روح  دعـادور  حسن

 

آلنی   اولان    اللهین   آئینه سی

عشق  و  ادب  عادت  دیرینه سی

سعی و صفا مروه بونون سینه سی

 معـرفتـه    یعنی    منـادور حسن

 

معرفتین   منزلت   و مصدری

  معدلتین    مرتبت   و   محوری

صلح و صفا مکتبینون رهبری

کعبه کیمی راهنما دور حسن

 

کعبه بو  محدودده   پا   لنگدور

 چونکه اوزی خشت و گِل و سنگیدور

کعبه حسندن ساری دل تنگدور

چونکه اخی الکرب و بلادور حسن

 

لعل لبی  جاری  ایدور جان سسی

 نشر ایلیور جان سسی سبحان سسی

جاری ایدور  جانلارا وجدان سسی

دقت  ایلـه  هانسی  صدادور حسن

 

طرز  تکلمده   سوز   استادیدور

صید اورک ، جلب گوز استادیدور

شیر خدا  چونکه اوز استادیدور

هم علی  هم  خیرورادور حسن

 

لعل لبی  جوهر  جان باریدور

 سوزلری   قرآنه  طرفداریدور

جَنت و من  تحت الانهاریدور

 فخر فقیـه   و  علمـادور حسن

 

رسم رهی یول گزنه راهیدور

 لیـل    سیـاه  ادبـه  مـاهیدور

سّـر  سمـاواتیـدن  آگاهیدور

 راهنمـای    عـرفـادور  حسن

 

شهپر آچوب فکره گیدوب عرشه جک

فکرینه   حیرانـدی  تمام  ملک

علم الینه بوسه ویرور  طفل تک

مکتب   قـرآنـه  رجادور حسن

 

سَتر ایلیوب صورتینی موی یار

دالدالانوب   مولرینه  روی یار

بوی جنان پخش ایلیور بوی یار

جان جنان صدق و صفادور حسن

 

صورتی  سیمای  خدا  منظری

طوف  ایلین  شمع  جمالین پری

فرشی ایاق آلتدا ملک شهپری

 زیب زمین فخر سمادور حسن

 

 هادی اردبیلی

موضوع: حضرت امام حسن مجتبی(ع) مدح ,
زبان شعر و شاعر: نوحه ترکی , هادی اردبیلی

 

زبانحال حضرت امّ البنین (سلام الله)

 

ای ماه جبین قامتی طوبا آی ابوالفضل

تنگ اولدی گوزومده منه دنیا آی ابوالفضل

 

روحیم قوشی یوروقون دوداقمدا سنی گوزلر

گوز یاشی توکر غملی بلوطلار کیمی گوزلر

هی سوژه ویرور گوز یاشنا غصه لی سوزلر

دردیم کیمی اشگیم اولی دریا آی ابوالفضل

 

دل ملکینه رعدی پیاپی شاخور آغلور

گوز یاشی سارالمش یوزومه هی آخور آغلور

گل برگی کیمی لبلر اسور گوز باخور آغلور

آغلار منیم احوالیمه اعدا آی ابوالفضل

 

آی تک باتورام دورمه آهیم یایلاندا

گورم سنی بیر لحظه یاتان بخت ایلاندا

من باشدیام آواره لر آدی سایلاندا

گوزلور سنی بو کلفت زهرا آی ابوالفضل

 

گلمور گوزومه خوش نه چمن زار و نه گلشن

چونکه گوزلیم گوزدن آتوبسان آناوی سن

جانیم چالیشور سینه ده یول گوزلیورم من

قویما ننوی بیکس و تنها آی ابوالفضل

 

غربتده اوغوللار اولالار یا که وطنده

گوزلر آنـا اوغلانلاری جان اوسته ئولندها

تابوت ال اوستنده گئده قبره گئدنده

گرچه کسیلوب اللرون اما آی ابوالفضل

 

مدتدی فراقونده سنون غرق عزایم

ئوز حالیمه یوخ من سنه مشغول رثایم

قلبی یارالی عورتم امّ الشهدایم

زنداندی منه منزل و ماوا آی ابوالفضل

 

جان اوسته رضایم که غمیم قلبیمی سیخسون

هجران سیلی دیوار سـرای دیلی یخسون

گل بیرده ئوپوم صاق گوزوی جان صورا چیخسون

بی کس ننوم عازم عقبا آی ابوالفضل

 

 هادی اردبیلی

موضوع: حضرت ام البنین (س) زبانحال ,
زبان شعر و شاعر: نوحه ترکی , هادی اردبیلی

 

 ورود به کربلا و

 گریز به حضرت علی اصغر (علیه السلام)

 

عشقیده قدرته باخ عارفی عاشق ایلیور

عارف و عاقلی عشقون الی لایق ایلیور

علمینه عامل اولور سالم و صادق ایلیور

آچیلور قلب گوزی چاهی گورور راهی گورور

هارا سالسا نظرین گوزلری آللهی گورور

 

عشقون اکسیری دگور هر اورگه طاهر اولور

یوخ زوالی گه اورکلرده دی گه ظاهر اولور

عشق نیرو ویرور عاشق ایله بیر ماهر اولور

بیر باخشیدا گورسن دیللری تسخیر ایلیور

نیزه نی منبر ایدور حق سوزی منبرده دیور

 

عشق اوزاق یوللاری عاشق گوزینه کوته ایدور

عشق ، جُونیله حسینی گتورور همره ایدور

عشقدور خولی ایوین خلقه زیارتگه ایدور

عشقون اعجازینون اثباتینه بو بسدی بیزه

قانلی باش ساکن اولان ایوده مقدسدی بیزه

 

عشق گه نار اولی گه خار اولی گه غنچه و گل

عشق اگر عاشقی یاندرماسا هیچ عشق دگل

عشق اودور سینۀ عاشقده آچا قرمزی گل

عشق او دور عاشق اونا عامل اولاندا قوجالا

ظاهراً دوشسه ایاق آلتنا عرشه اوجالا

 

عشق اودور روح کیمی قلب و رگ وجسمه دولا

عشق اودور عاشقی محنتلی اولا رنگی سولا

عشق اودور عاشقی بیر گون بشره کعبه اولا

کعبه نی ترک ایلیوب کعبه دیگر یارادا

وصل اولا یاره داخی قالمیا مانع آرادا

 

من بیر عاشق تانورام بو سوزی اثبات ایلدی

ترک آسایش ایدوب قصد بلیات ایلدی

کعبه نی یوخ اوزینه بیر چولی میقات ایلدی

تپراقی محضر جاناندا ز بس طاهریدی

کعبه دنده قباق عرش اهلی اورا زایریدی

 

کعبه دن من دئین عاشق غرض ایتدی حرکت

کربلا دشتینه تقدیر اولارا ویـردی جهت

دشت گمنامه چاتوب ویردی او دشته عظمت

ایلدی عرش فضیلتده مهِ ارض حلول

پر آچوب فوج ملک ایتدی او صحرایه نزول

 

دایانوب باخدی حسین دقتیلن صاق صولینا

تلینه عرصه سینه نهر فراتین یولونا

ویردی دستور او موقفده توقف اولونا

آل حیدر او بیابانیده خرگه قورالار

ناقه لر اوستن آی اولدوز کیمی اندی بالالار

 

آشنا گلدی بلا دشتی امامین گوزینه

فکری گیتدی باباسی خاتم مرسل سوزینه

بعضی سوزلرکه بویورمشدی حسینون ئوزینه

سابقاً آگهیدی بادۀ معنا دادینا

دوشدی پیغمبر اکرم بویوران سوز یادینا

 

گوردیلر غملی باخورگه سویا گه گوگده گونه

اللی بش ئیل ایله بیل منتظریمش بو گونه

بیلدیلر بو سفرین رشته سی دوشدی دوگونه

کربلا تپراقینا داشلارینا دقّت ایدور

نخلزاره سویا دقت ایلیور فکره گیدور

 

زینبون قلبینه باخدوقجا بلا رعدی شاخور

او مناظر که گورور قارداشی زینبده باخور

حضرتین صورتینه گوزلرینون یاشی آخور

بارش رحمتی آغلار گوزی احسان ایلیور

بالالاردان ولی گوز یاشینی پنهان ایلیور

 

پهنۀ دشته باخور صحبت ایدور ئوز ئوزینه

یرده بیر خار مغیلان ساتاشانـدا گوزینه

تز باخور محملین اوستنده رقیه یوزینه

آغلیان گوزلری گویا بالاسیلان دانشور

بی خبـردی بالا امّا آتا قلبی آلیشور 

 

دوندی عباسه دئدی عمده نشان وار یرده

گزدیگیم یر بورادی سّر نهان وار یرده

اندیرنده بالامی گوزله تیکان وار یرده

گوزله قارداش بو گل نازیمی قویما سولسون

هله تزدی هدف خار مغیلان اولسون

 

بیر مناسب یری تعیین ایله قور خیمه لری

خیمه لرده بالالار دینجله امکان قدری

راحت ایله یورولان قیزلاریمی صود امری

داشلانور نهر فراتین سویی قارداش چوخدی

سو گتورمک هله آزادیدی مانع یوخدی

 

نظره بیر یری آل نهره یولون آز قالانی

او یریکه دیورم شرطی بودی یاخچی تانی

اولماسون خیمه لرون دوره سینون داش تیکانی

لازم اولسا بالالار قوش کیمی شهپر آچالار

اللری باشدا قاچان وقتیده راحت قاچالار

 

چک خیامین یرینی بو اجا تلین دالینا

اورا بهتردی یقین اهل خیامین حالینا

اوچوخور یرده گرک عشق خیامی سالینا

احتمالاً بورا آینده ده میدان اولسون

نگرانم حرمین اهلی هراسان اولسون

 

رعب و وحشت بو بیابانیده شاید سالالار

بیزدن آزادی امکانی بو لشکر آلالار

بعضی پیش آمداولا سس اوجالا ال چالالار

قیزلاریم رشتـۀ درد و محنی هـورمیه لر

باش کسن اولسا اگر باش کسنی گورمیه لر

 

بوردا شاید صود امر قنداقی قانیله دولا

حادثه دوشسه گوز اوخلانسا قلج دگسه قولا

عرصه گورسنمیه بو تّل آرادا مانع اولا

باخسالاردا نگران علقمه نون یوللارینا

دوشمیه گوزلری قولدان کچه نون قوللارینا

 

گرک اطفالی بشر قورخولی یردن قوریا

هاردا وحشت وار اوشاق یاخمیا هرگز اوریا

قورخوب آغلاشمالاری قوی هله قالسون صوریا

گورسه لر لشگری ممکندی ملاله باتالار

نچه گون قوی بو بیابانیده راحت یاتالار

 

بالالار خسته دیلر ایله بیر آزجا عجله

اکبری قاسمی یوللا سو گتورسونله اله

بعضی سولزلرکه دئدیم بیرکسه فاش ایتمه هله

گوزلریم قارداش او قاره گوزه اولسون قربان

بلسه لر مطلبی قیزلاریم اولالار نگران

 

قویدی ال گوزلره عباس بدیع السیما

امر مولاسینی تز باشلادی ایتسون اجرا

ایلدی خیمه لری تّل دالندا برپا

خیمه لر مأمن اولوب عترت خیرالبشره

سو مهّیا اولوب اوّل ویریلوب صودامره

 

آلوب آغوشه رباب اصغری سیراب اولونا

صودامنده بالانی تکیه ایدوب ئوز قولونا

صورا سالدی بشیگه قویدی نسیمین یولونا

تا نسیمین یلی یورقون گُله احسان اولسون

یاتسون اولدوز ، اونا آی گویده نگهبان اولسون

 

او گجه کوفه لیلر سو یولونی باغلامادی

سو ایچن ایچدی ، یاتان یاتدی اورک داغلامادی

صودامر صود اموب آسوده یاتوب آغلامادی

کوسممشدی هله سو ، بخت ربابه یاریدی

او گجه هم سو مهیائیدی هم صود واریدی

 

نهریدن بو گجه ایستوردی سو صحرایه آشا

نچه گون کچدی او چولده ولی سو چیخدی داشا

خوش گونی چاتدی ربابین داخی دنیاده باشا

بالانون آغلاماقی قویمادی قالسون اونا تاب

گوز قباقینده چالشدی بالاسی باخدی رباب

 

آناسیلان سوزولن گوزلـه دانشدی بالاسی

ماهی تک اللری اوستنده چالشدی بالاسی

تشنه لیک بیر اود اولوب یاندی آلشدی بالاسی

بالیا باخدی آنا اذن ویروب گوز یاشنا

بالاسی الده دولاندی قوری مشگین باشنا

 

مشگ چشمین سوئی داشلاندی قوری مشک اوسته

هم بالا هم آنا اولدی سو غمیندن خسته

مشگین اوسته بالانون قویدی یوزین آهسته

یعنی باخ گور ننوون آخرینه دلخوشدی علی

سینمون مشکی کیمی مشک ئوزیده بوشدی علی

 

 غلامرضا هادی اردبیلی

موضوع: احوالات ورود به کربلا ,
زبان شعر و شاعر: نوحه ترکی , هادی اردبیلی

 

وصیت حضرت زهرا (سلام الله)

به حضرت علی (علیه السلام)

 

دنیاده منی سالدیلا قیمتدن عم اوغلی

قلبیم سینوب علت اودی امتدن عم اوغلی

 

غسلمده شتاب ایتمه دایان قوی گجه چاتسون

یورقون بالالاریم کیمی ایللر هامی یاتسون

آی چیخسادا صبرایت اودابختیم کیمی باتسون

آل بهره بیله وقتیده فرصتدن عم اوغلی

 

دل دردیمه دریا،گوزومون یاشینه چای دی

مظلومیتی بولگی بولندن منه،پای دی

سوتوکدوگیجن پیکریمه فاطمه وای دی

دفن ایت صورا آچ پرده شهادتدن عم اوغلی

 

قویدون که منی قبره کسیلدی اوجادان های

قوی یوز یوزه منلن دی جوان فاطمم ای وای

قبره بدنی   یاره گیدن  فاطمه لایلای

شادایت صورا قبرایچره تلاوتدن عم اوغلی

 

 غلامرضا هادی اردبیلی

موضوع: حضرت فاطمه زهرا (س) زبانحال ,
زبان شعر و شاعر: نوحه ترکی , هادی اردبیلی

 

حضرت امام حسین (علیه السلام)

 

عالَمین عالِم نما جاهللریندن قورخورام

عدلی اعدام ایلین عادللریندن قورخورام

 

وحشتیم یوخ باش کسن قاتل نقدر اولسا قوی

رحم و انصاف وادب قاتللریندن قورخورام

 

ظاهراً طوفان دریا پرخطردور قورخولی

من ولی دریا قالوب ساحللریندن قورخورام

 

سایمارام قدرتمداران قوی شوکتلری

مصلحت دنیاسینون سائللریندن قورخورام

 

ارذله عادتدی ال کسمک خیانت ایلمک

بو ریا بازارینون باذللریندن قورخورام

 

فهم و علم و دانش آرتوب یوخدی تقوادن خبر

عالَمین ائولر یخان فاضللریندن قورخورام

 

هاردا آللاندیم تملق باعث اولدی آللانام

گورجگین اهل تملق دیللریندن قورخورام

 

"هادی ام" سوز اهلینی گورسم عملسیز سؤمرم

بزم عشقین بی عمل عاقللریندن قورخورام

 

حاج غلامرضا هادی اردبیلی

موضوع: حضرت امام حسین (ع) ,
زبان شعر و شاعر: نوحه ترکی , هادی اردبیلی

 

احوالات تنور خولی

 

ای خولی تنوری بو گجه طوره دونوبسن

موسی باشی سینونده یم نوره دونوبسن

 

سینونده یاتوبدی بو گجه سرور خوبان

سینون اودی کی فخر ایلیور گوگلره الان

خوش حالوه باخ گور کیم اولوبدور سنه مهمان

بیر لطف ایلیوب جنت پر شوره دونوبسن

 

بیر حده چاتوبسان بورا حوراده گلوبدی

عیسائله     موسائله    طاهاده   گلوبدی

ئوز اوغلونا باش چکمگه زهراده گلوبدی

عاشقلره ایچون نقطه منظوره دونوبسن

 

فرصت بو مکاندا هله ذکر غمه واردور

گیت گل بورا چوخدی بو گجه همهمه واردور

هر گوز گوره بیلمز نه گوزل زمزمه واردور

بو  زمزمه دن   لانه   زنبوره   دونوبسن

 

غلامرضا هادی اردبیلی

موضوع: احوالات تنور خولی ,
زبان شعر و شاعر: نوحه ترکی , هادی اردبیلی

 

در مدح حضرت علی (علیه السلام)

 

داشدا، تپراقدا، بیاباندا علی عاشقیدی

گلده، گلشنده، گلستاندا علی عاشقیدی

نهریده، بحریده، باراندا علی عاشقیدی

هر او کس که بو شهه سینه سی صد چاک دگل

گئت سوروش،نطفه سی حتماً اوکسین پاک دگل

 

لاله ده، غنچه ده، ریحاندا علی عاشقیدی

شریانلاردا گزن قاندا علی عاشقیدی

جسملرده دولانان جاندا علی عاشقیدی

هر کسین یوخدی علی حقینه گر ایمانی

چیخوب اسلام یولوندان تانمور قرآنی

 

هر نه خلقتده دی هر یاندا علی عاشقیدی

گبر و ترسا و مسلماندا علی عاشقیدی

ملکوت اهلیده ، انساندا علی عاشقیدی

حقنی غصب ائدن انسانلارا انسان دئمرم

قاپوسین اودلیان ارزلدی مسلمان دیمرم

 

 هادی اردبیلی

موضوع: حضرت علی (ع) مدح ,
زبان شعر و شاعر: نوحه ترکی , هادی اردبیلی

 

حضرت امام زمان (عج)

 

باشیسز دولانور عالمی بو قافله مهدی

گل قویما مسلمان بوقدر اسگیله مهدی

 

قویما دوشه ایش مشکله یولدان آقا تزگل

باش گوتدی چخور قافله یولدان آقا تزگل

هر گون چوخالور فاصله یولدان آقا تزگل

گل دوز یولی گوستر یتیشک منزله مهدی

 

سن گلسون آقا جامعه دن ارزش آزالماز

هر کیمسه ده ساتسا شرفین آیری کس آلماز

دوزعاشقیون قلبی جاوانلقدا قوجالماز

دیوانه لر ایراد ایلمز عاقله مهدی

 

چوخ مزبلیه بنذر او گیزلینده کی سس وار

یا منزوی یازمیش نجس اوستونده مگس وار

هر بزمیده یوز شمر و سنان ابن انس وار

هر شهریده واردور نچه مین حرمله مهدی

 

ویردی بشر الدن شرف وحجب وحیاسین

سندردی غلط فکریله ئوز قدرو بهاسین

نا حق عملی کسدی خداوندین عطاسین

یتمور عمل ونذر رو دعا حاصله مهدی

 

دوران الیوب ایش بیلنه گوندوزی ظلمت

ظلمت ویروب هر خائنه امکان تاپا فرصت

فرصت تاپوپ هر خائن اولوب صاحب جرأت

قابل باش اَیور دهریده ناقابله مهدی

 

آیا بیله بیر خلقه گوره اوخلانوب اصغر؟

گول جسمینی شمشیره ویروب دوغرانوب اکبر؟

مقتلده، دعا کیملری ایلوب شه محشر؟

کیمدور بوسوزی شرح ویره مین ئیله مهدی

 

 شهرام هادی اردبیلی

موضوع: حضرت امام زمان (عج) ,
زبان شعر و شاعر: نوحه ترکی , هادی اردبیلی

 

مبعثت حضرت رسول اکرم (ص)

 

زینت یارادوب خلقته خلقتده محمد

تا رهبر اولا شهر شریعتده محمد

 

سیار صراط حق اولوب پایه به پایه

آهو کیمی دوشدی ئورگی دام خدایه

قانون خدا نازل اولوب آیه به آیه

حفظ ائتدی اونی پنجه همتده محمد

 

قلبین ائلدی وحی خداوند مکانی

گلدی یوزونه ذات حقون نور و نشانی

آی مثلی منور ائلدی غار حرانی

یوزدن یاییلان نوریله بعثتده محمد

 

تبدیل اولونوب غار حرا محفل عشقه

امر ائتدی خدا چک بشری ساحل عشقه

درمان سنی خلق ایلمیشم مشکل عشقه

تا قالمیا عشق اهلی ضلالتده محمد

 

بیر عصری کی اعرابی آلوب جهل و جهالت

جهلین آثراتی ائلیوب عالمی ظلمت

ناگه دل ظلمتده چیخوب شمس هدایت

تابنده اولوب گون کیمی ظلمتده محمد

 

گل لر گل آچوب ، بلبل ائدر نغمه ترنم

گلزار اسر یل ،‌ایلیر گل ده تکلم

تبریک دیور خنده کنان بیر بیره انجم

اگلشدی بو گون تخت نبوتده محمد

 

امواج کیمی فرشه طرف گوگدن انور نور

پروانه تک انواره آچوب پر ملک وحور

دنیانی دوتوب جشن وسرور وشعف وشور

معنانی قویوبدور یم حیرتده محمد

 

قوشلار پر زرین آچوب سیره هواده

تقدیس ائلیور پرلری پهنای فضاده

صنع ازلی صنعتیلن لوح طلاده

منقوش ائلیوب نقشه ی زینتده محمد

 

دنیانی دوتوب طنطنه لطف خدایی

ناسوته سرازیر اولونور نور سمایی

آی سان وئرور اولدوزلار ائدور جلوه نمایی

یل ثبت ائلیور جو طبیعتده محمد

 

لب لر متبسم اوتوروب یوزلره خنده

گوگلرده ملائک پر آچوب عین پرنده

یل شاخه ی طوبایه طرف هر دم اسنده

آهسته دیور یاپراقی جنتده محمد

 

عرش اهلی ملائکلن اولوب گوگده هم آوا

ایلولله محمد آدینا جمله سی ایمان

یکتا یاراداندا یارادوب خالق یکتا

هم صحبت وهم صورت وسیرتده محمد

 

عالمده نبوت اونا هر سری ائدوب فاش

چاتدی او یره زمزه ی عشاقه اولوب باش

تا محضر حقدن آلوب ئوز عشقینه پاداش

بیرفاطمه آدلی گلی قسمتده محمد

 

گل حضرت زهرا اولا گل صاحبی احمد

شایسته دی الحق گل اولسون گل سرمد

اون بیر خول آتوب هر گل اولوب زینت ابجد

هرتک تکی بیر مقصد وحدتده محمد

 

هرشاخه سینه فاطمه آد قویدی مجزا

فخر ائتدی همان آده ثرائیله ثریا

بیر شاخه نون آدینده حسین ائتدی مسما

ایگلردی اونی دامن عصمتده محمد

 

ایللر دولانوب بو گله بیر مسئله دوشدی

طوفانه دوشن گل کیمی الدن اله دوشدی

پرپر ائلیوب خار اونی مقتله دوشدی

گلدی او گلی تاپدی نه حالتده محمد ؟

 

از بسکی اونا اوخ توخائوب یوخدی شماری

داشلار توکولوب اوستینه آرتوبدی فشاری

قانی یارالاریندن اولور تپراقا جاری

آخدوقجا یازور صفحه ی تربتده محمد

 

قلبین داغیدوب اوخ ،‌داغیلان خیمه سرا تک

جسمین ائلیوب نیزه زره مثلی مشبک

اطرافینه تل تل سپیلوب آغ قره بیرچک

غرق اولدی ئوزی بحر مصیبتده محمد

 

سرچشمه کوثر تک اولوب پیرکی گوز گوز

قانیله دولوب آغزی بیلینمور نه دیور سوز

ایستور گوزون آچسون ولی قانیله دولور گوز

باخدوقجا باتور قلزوم محنتده محمد

 

بیر ناله دوتوب گوردی او صحرانی سراپا

دقت ائلینده تانیدی اول سسی طاها

اونداندا قاباق گوردی گلوب حضرت زهرا

سسلور یتیش امداده بو ساعتده محمد

 

القصه سوزوب مغربه عشقون گونی چاتدی

زهرا بالا وای سسلدی ال زلفینه آتدی

بو غمده نبوتله امامت یاسا باتدی

 

هادی اردبیلی

موضوع: حضرت محمد (ص) مبعث ,
زبان شعر و شاعر: نوحه ترکی , هادی اردبیلی

 

حضرت موسی بن جعفر (علیه السّلام)

 

بعضی بشر عالم بوئی شرمنده دی دائم

مظلوم قباقنده سرافکنده دی دائم

حاکم لره ظالملره چون بنده دی دائم

انصافی اسارتده ئوزی شهرت اسیری

قدرتدی بو ارذل صفت انسانون امیری

 

تابع اولی بو کس بلی قدرت قاباقندا

یاددان چیخادوب عزتی شهرت قاباقندا

قربان ایلیوب غیرتی ذلت قاباقندا

دین و شرفین شهرت دنیایه ساتوبدی

بلمورئوزی بازنده دی غفلتده یاتوبدی

 

عارف ولی آگهدی بو دنیا بئله قالماز

ظالملر الندن ئودی هرگز صله آلماز

دنیا هوسیلن ئوزینی داغ داشا چالماز

ئوز مقصدینون سیرینی هرگز عوض ایتمز

الله یولونی طی ایلیر کج یولا گیتمز

 

دونمز ره حقدن ایلیر ظلمی تحمل

جسمنده چکر قمچیلرین ضربه سی گوی گل

زنداندا ایدر زینبه ظلمتده توسل

یوز شامه طرف دوندرر اول مرد مودب

آهسته دیر هاردا قالوبسان بی بی زینب

 

یالوارماز اگر یانسادا قمچیله وجودی

تقدیس ایلیر لعل لبی حی ودودی

سنماز نه ستم چکسه نماز اوسته سجودی

ذکره قاریشار قالتدقیجان سوز و گدازی

دشمن لره تاثیر ایلیر راز و نیازی

 

کیمدور سوزی گلدی بیله سربسته قلمده

زندانیده مستغرق اولوب محنت و غمده

هانسی گنه اوستنده قالوب سجن ستمده

قوی فاش ایلیوم کیمدی بو بی یاورو بی کس

زهرانون عزیزی اوغلودی موسی یری محبس

 

گوز یاشنی سجادیه گوزلردن اَللردی

سجاده نی مرطوب ایلیوب اشگه بَلردی

ظلمت گجه لر ناله سسی غملی گَلردی

ناله سسی زندانه سراسر یاییلاردی

فوراً یوخودان سِند ستمکار آییلاردی

 

قویمازدی ایده ساحت سبحانه ستایش

ایذا ایلیردی او شهه وقت نیایش

قمچیله ایدردی اَرین جسمی نوازش

صبر دل زهرانی اونون ظلمی آلاردی

هر ناله سسی لرزه سماواته سالاردی

 

اسلامه گوره نوشیدی هر نیش جسارت

زحمتله ایدردی او قدر ضربیه طاقت

انسانلارا معلوم اولا تا ارزش طاعت

یورقون بدنی قمچیلر آلتدا آلیشاردی

قمچی سسینه ذکر و توسل قاریشاردی

 

ایانه ویروب سجده نی سجاد ه نون اوسته

گوزیاشلی اورک غملی اوزی قلبی شکسته

باش سجده ده باشلاردی مناجاته او خسته

آغلاردی بلوط تک گوزینون یاشی یاغاردی

دردی اریدوب پیکرینی باشی آغاردی

 

اولموشدی ایشی ذکر و دعا ناله جانکاه

گوز یاشلی قرانلوقدا دیردی او دل آگاه

ای گوگلری داغ داشلاری خلق ایلین الله

سندن صورا فریادیمی زنداندا آلان یوخ

سن یاد ائله یارب منی بیر یاده سالان یوخ

 

ای حکمتی تغییر ویرن سیر زمانی

ای نظمیله ترتیبه سالان نظم جهانی

وی پیکره تزریق ائلین روح و روانی

رحم ایله داخی جسمیده روحیم یورولوبدی

عمرم گلی آفت زده گل مثلی سولوبدی

 

ای ساحتینون سّری سر آغازجوانی

وی بذل ایلیوب سلب ایلین تاب و توانی

شریانیده ایجاد ایلین قان جریانی

یورقون ضربانیمده ثنا واردی دعا وار

عرضیم بودی الله منی ئولدورداخی قورتار

 

ای بیکس و بی یار صداسین آلان الله

درمانده لرون فکرینه دائم قالان الله

ای جان ویروب اوز ویردیگی جانی آلان الله

آل جانیمی راحت ایله موسانی قفسدن

قلبیم آلیشور سینه ده بو اودلی نفسدن

 

ای خاک سیه ده یاردان روح بهاری

همراه ایلین گلشن آرا لالیه خاری

آسایش ایچون خلق ایلین لیل و نهاری

زنجیر آلوب طاقتیمی یول گیده بللم

ئولدور منی دای قمچیلره تاب ائده بلمم

 

ناله ایلیوب هی چکورم آه دیریندن

سندن صورا امداد منه یوخدی بیریندن

هر قمچی دگور اود اوجالور سانکی یریندن

بیر حاله سالوب غم یوزومون رنگی سولوبدی

جسمیم بی بیمون قوللاری تک یول یول اولوبدی

 

هارون کیمی هیچ کیم اروگه اوخ ساچا بیلمز

درک ایلمور آهو یارالانسا قاچا بیلمز

بیر قوش که سنا بال و پری پر آچا بیلمز

انصافی اولان حبل حیانی بیله قیرماز

قوش که قفسه دوشدی قفسده اونی ویرماز

 

اولسا نقدر سنگ دل عالم آرا صیاد

صیدی قفسه سالسا قفسده قویار آزاد

اولسون گوروم الله بولارین ایولری برباد

گل بوته انصافی جفائیله قیروللار

زندانیده هرگون من مظلومی ویراللار

 

 هادی اردبیلی

موضوع: حضرت امام موسی کاظم (ع) احوالات ,
زبان شعر و شاعر: نوحه ترکی , هادی اردبیلی

 

حضرت امیرالمومنین علی ابن ابیطالب (علیه السلام)

 

مستی عالم همه از چشم مست حیدر است

آری آری باده ی مستی به دست حیدر است

 

علم و دانش گر کلید باب انسانیت است

هستی علم و خرد از اصل هست حیدر است

 

معنی آزادگی در صدر فصل معرفت

درسی از دیباچه ی دیوان دست حیدر است

 

مردی و مردانگی بی یاوران را یاوری

حاصل هنگام پیمان الست حیدر است

 

در خرابه با فقیران آنچنان افتاده بود

گوییا آن پیر بیکس سرپرست حیدر است

 

در عبادت بنده ی زار و ذلیل و دردمند

در رشادت راز رعد از خیز و جست حیدر است

 

گاه از حال وله بیهوش می شد در صلات

گاه خیبر تابع یک ضرب شصت حیدر است

 

رو مگردان از در عالم پناهش عارفا

فیض علم کُلّ عالم یک نشست حیدر است

 

« هادیا » دل بر مکن از مهر مولا در جهان

شافع ما همسر بازو شکست حیدر است

 

هادی اردبیلی

موضوع: حضرت علی (ع) مدح ,
زبان شعر و شاعر: نوحه فارسی , هادی اردبیلی

 

حضرت امام حسین (علیه السلام)

 

من بکوی پاکت از دیوانه گانم یا حسین

رانده از خلوتگه فرزانگانم یا حسین

 

قصه ها از غصه دیوان دل دارم به تو

از ضمیرم خود بخوان من بی زبانم یا حسین

 

گرچه موهای سرم چون برف گردیده سپید

تا بدل عشق تو را دارم جوانم یا حسین

 

رفعت اجلال من از پادشاهان برتر است

همچو زینب در عزایت نوحه خوانم یا حسین

 

هر چه دارم از تو و از خاندان پاک توست

ورنه نی یک کلب بی نام و نشانم یا حسین

 

صورت نا پاک خود سایم به خاک پاک تو

جان زهرایت از این درگه مرانم یاحسین

 

من سگ کوی توام عمریست عوعو می کنم

پیرم و عاجز بـده یک استخوانم یاحسین

 

حرمت باب تو گر با ماندنم محفوظ هست

خود نرانی گر ز در همواره مانم یا حسین

 

شاعرم گویند اگر گویم در غم بسته اند

من سگ آزادۀ آن آستانم یا حسین

 

سینه ای دارم همه دنیای آن درد و غم است

دفتر دردم سرا پا داستانم یاحسین

 

آنچه در دریای دل دارم ز گوهرهای درد

فاش اگر سازم نگنجد در بیانم یا حسین

 

من جوانی را به راه عشق تو کردم فدا

حال در پیری بکویت ده امانم یا حسین

 

قصه های غصه ی دل را به برگ زرد رخ

می نویسد با مژه اشگ روانم یا حسین

 

هادیم شعری سرودم گر نشاید شأن شه

خوب دانستم سرودم در گمانم یا حسین

 

هادی اردبیلی

موضوع: حضرت امام حسین (ع) ,
زبان شعر و شاعر: نوحه فارسی , هادی اردبیلی