متن نوحه ترکی مرحوم شانی تبریزی بخش اول
مجموعه اشعار نوحه ترکی مرحوم شانی تبریزی ویژه ایام عزاداری محرم و صفر و
--------------------
در مدح حضرت علی (ع) و گریز به احوالات شهر شام و حضرت علی اصغر (ع)
فقیر عشق که مداح مدح مولادور
لباس فقرده سلطان تخت والادور
عبث دگول فقرا فقر اختیار ایلر
که فقر رتبه سی شهدن همیشه بالادور
ریاضت عالمی بیر سلطنتدی درویشه
که خاک مسندی فرش حریری خلقادور (1)
(1)خَلقا : الخلقاء مونث اَلاَخلق : لباس کهنه و مندرس
او تاج فقر که درویشلر قویار باشینا
کیانیان اونی حسرت گوزیله جویادور
دییله نقل قلندر ندور غلط دی بو سوز
لباس فقردن اول فرقه کیم معرّا دور
لباس فقره حقارتله باخما انصاف ائت
صفایه باخ گوگل آئینه سی مصفّا دور
گییلّه خرقۀ پشمینه خلعت کرباس
که اهل عشق نه زیبا حریر دیبادور
ائدلَّه ترک وطن چوللری گزلَّه مدام
که خوش او طایفیه دشت کوه و صحرادور
سوروش بو نکته نی مجنون رن شیدادن
که ترک جاه نجه سود بخش سودادور
دلیل عقلیله هر کیمسه عشقه منکر اولا
وار حقی نکتۀ اصلی اونا چون اخفادور
نه منده وار او لیاقت نه سنده حال سماع
دیم سنه نه محبّت نه می نه مینادور
جمال یوسف مطلوبه دل وئرن طالب
بولر نه سرّی وار آشفته دل زلیخادور
گریز به مدح مولا علی (ع)
علی محبّتینه ترک جاه ائدر درویش
عوالماتی اودور خلقدن مجزّادور
یتنده بیر بیره هو حق دیر بو معنایه
که اسم حقّیله مولا آدی مسمّادور
خدایه بنده دی اما خدای عالم دور
عزیز حقدی ولیِّ علیِّ اعلادور
مطیعدور اؤزی حقّه مطاعدور خلقه
گونه آیا یره مخلوقه حکم فرمادور
علی خدا دگول اما بشر لباسینده
هامی صفاتی اونون بی نظیر و همتادور
من آزمارام سوزی سن آزما مطلبی زاهد
نه جای بحثدی بو یر نه بزم شورادور
یوخیدی عالم و آدم ولی علی واریدی
دیر که آدم آتاسی آناسی حوّادور
هامی پیمبره عصرونده نصرتی یتدی
همین بو نکتیه آگه خدای یکتادور
علی خلیله گهی ناری گلستان ایلور
چکنده داره گهی دادخواه عیسادور
علینی بیر تانور احمد بولوندورن شأنین
همان قضیّۀ معراج و لیل اسرادور
احد دانیشدیروب احمد علی سسین ائشیدوب
هانی کمال دلیمده دییم نه معنادور
بنای خلقت کونه وجدی باقی دور
باباسی بیت خدایه اگر چه بنّا دور
شرف هواسینه یوز سورتن آستانه سینه
هزار قیصر و فغفور هزارد ارادور
غدیرده اوجالان نور جلوه گردی هنوز
او نوری درک ائده بولمز او گوز که اعمادور
تولّدوندن ازل اولدی اؤز آناسینا یار
سوزیمه شاه همان نقل شیر غرّادور
تولّدی اولونوب مکّه ده قیامته دین
بو فخر مفتخری امّهات آبادور
علینی مدح ائله زاهد که حق ائدوب اونی مدح
نه قصر و حوردی سدره دور نه طوبادور
عبادتینده هامی اهل زهده افضلدور
شجاعتینده هامی رزمه شیر هیجادور
اگر نجف یری فخر ائتسه عرشه ذیحقدور
که ساکنانی علی خدمتینده برپادور
قویا او کسکه قدم کتف میر بطحایه
اونون مقامی نه قوسیندور او ادنادور
ندور مراد یداللهَ فوقَ ایدیهم
او هانسی الدی هر الدن بلند بالادور
گریز به خرابه شام
دیار شامده درویشلر گوزوزدن ایراق
علی عیالینه کنج خرابه مأوادور
آچقدی باشلاری اورتوکدی بولمورم امّا
نقاب یوزلرینه گیسوی سمن سادور
اسیر اولوبدی یزید حکمنه او زینب که
کنیزی درگهنون مریمیله سارادور
علی قزیدی اوزی فاطمه نشانه سیدور
حسین باجیسیدی ملجأء اسارادور
هامی مصیبته چون حق یولوندا صابریدی
اودور که جانب حقدن مقامی علیادور
همان علینون علی آدلی بیر مریض اوغلی
بویوندا سلسله سی دستگیر اعدادور
اولوردی جلوه نما نور مظهر یزدان
خرابه منزل اودور رشک طور سینادور
نه صورتیله او ویرانه رشک طور اولماز
عصا الینده مداماً کیشکچی موسادور
بو قدرتیله او فرزند قدرت اللهه
گئنه یتیشدی او که محنت و بلایادور
نقدر یتدی بلا لا گتورمدی دلینه
که حُبّی زایل ائدن کلمه کلمۀ لادور
ز بسکه عارض اولوب تب وجودینی اریدوب
قوای جسمی گئدوب بیر قوری مقوّادور
بویوندا سلسله سر سلسلیدی بیر جَمعَه
نه سلسله هامی ماتم زده معزّادور
گوروردوی عمّه لری آج یتولّا چوخ گجه لر
ائشیتمه سون بونی سادات عجب قضایادور
گون اوزلیلر یوزی یانموشدی گون حرارتینه
اگر چه ابر صفت زلف عنبر آسادور
توکلله گوز یاشی شبنم کیمی گل عارضه هی
اولار که گوزلری نرگش مثال شهلادور
عروس الینده خصوصاً نشانه وار تاننور
که خون طرّۀ دامادیله مُحَنّادور
علاوه آیری علامتده وار قولاقینده
یارالیدور قان آخور یادگار یغمادور
فسون عشقیدی لیلا دیردی زنجیریم
او نوک نیزه ده کی کاکل چلیپادور
نقدر ئولمه میشم وای اوغول علی دیرم
طریق مهر وفاده بو شرط ایفادور
جوان اوغول داغی دلدن محالدور ساغالا
دؤنوبدی قانه گوگل دیده خون پالادور
صراحتاً دئماق اولمور مقاتلین یازیسین
باخان بولر نجه شرح خبرده انشادور
چوخونی شدّت جوع و ظَماء ساراتمیشدی
قسیم رزقه بو سوز گرچه ناگوارادور
قسیم رزق عیالین نظرده خوار گوروب
تصوّر ائتدیله محتاج نان و خرمادور
ائله حقارت اولوب هر باخان دیردی بولار
اسیر روم و حبش دیلم وبخارادور
گریز به احوالات حضرت رقیه (س)
رقیّه بیر گجه یاتموشدی گوردی رویاده
فراق باشه یتوب فصل وصل پیدادور
او تیره شامده ظلمات غمدن اولدی خلاص
گوروب که مظهر حق نوری پر تجلّادور
دیردی درد دلین مهربان آتایه بالا
او گلدی بو دیه سن عندلیب شیدادور
او خوش سخن ائله شیرین زبانلق ایلردی
معاینه سخن طوطی شکر خادور
غریبه ساعتیدی وصل شهله دلخوشیدی
آییلمییدی خدا بولمییدی رؤیادور
اویاندی وحشتیله اضطرابیله گوردی
همان خرابه همان منزل غم افزادور
چاغوردی عمه هانی بس بابام هارا گئتدی
آلان قراریمی الدن او ماه سیمادور
گورون بو وقته اونی بیرده ساکت ائتماق اولور
قضیّه صعبدی مطلب دئمه که صغرادور
قاریشدی بیر بیره دل دغدارلر بیردن
نوایه گلدیله گویا که حشر کبرادور
ائله سیزیلتی ائله شور و شیون اولدی پدید
که شامیده دیه سن شور حشر بپادور
اوجالدی ناله یزیدون یتوب قولاقینه
دئدی ندیمینه آیا نه شور وغوغادور
دئدیله بیر قیز آتاسین گوروبدی رؤیاده
حسینی ایستوری فریاد واحسینادور
بولوب قضیّه نی گوندردی شاه دین باشینی
دئدی او درده بو باش یاخشی بیر مداوادور
گلون دیاخ هامی ای وای بلالی زینب وای
تعجّبم او خانمدا بو نه شکیبادور
آلوب او باشی بیر اؤپدی رقیّیه وئردی
گوروب رقیّه که رأس امیر بطحادور
طریق عشقی او دم اهل عشقه گوستردی
گوروب که جلوۀ معشوقدن بیر ایمادور
بلالی جانینی ائتدی او باشه پای انداز
که یعنی مفتی عشقیم وئرن بو فتوادور
بهای جان ندی نقد وصال اولان یرده
که جان بو بیع و شراده قلیل کالادور
ایا امام زمان عمّه وین بو حالینه
جهاندا آغلیاسان حشر اولونجا باجادور
وئرنده غسلینی غسّاله پیره زن یاندی
بو چرخ کینه شیَمده عجب مداوادور
یزیدی بیر نچه مطلب که ایلدی نادم
گوروبدی خلق ارا وَقری گیدوبدی رسوادور
بیری رقیّه وفاتینده نقل غسّاله
بیریسیده بو که نطقیم او شرحه گویادور
شهادت نعمان در شهر شام
واریدی شامیده نُعمان آدینلی پیشنماز
گلوب نمازه گوروب صبح بختی یلدادور
بیری اونا دیدی ویرانه ده بو ناخوش کیم
دیولّه خارجی مُسلم دی بو نه ترسادور
گلنده مسجده گوردوم ائدوب نمازین ادا
دعا اوخور دلی حمد خدایه گویادور
دیدیم دیولَّه سیزه خارجی ولی بوعمل
طریق شیعه دی نه شیوۀ نصارادور
دیدی امام جماعت اگر منی تانوسا
داخی جماعته گلمز بولر که بیجادور
ائشیتدی بو سوزی نعمان او مرد راویدن
دیدی که وای منه بو کلمه بیر معمّادور
بو کلمه نی دیه بلمز مگر امام زمان
یقین امامیدی محبوب ربّ اعلادور
همینکه مطلبی بولدی پوزولدی احوالی
طلای صافدی قلبی نه که مُطَلّادور
دوروب ایاقه سریعاً خرابیه گلدی
ایله دولوب گوزی گویا که جام صهبادور
دوشوب ایاقینه بیمار امامون عرض ایلدی
مقصّروخ ولی لطفوز قصور فرسادور
منی گذشت ایله مولا سیزی تانیمامیشوخ
باغشلا سیّدی سیزلرده عادت اعطادور
سالوبدی بوینونا تحت الحناک آچوب یخاسین
دوشوب محلّه لره دلده وا امامادور
حسین حسین دیدی شوریله شهری دولدوردی
حسینه عاشق اولان قلبیده نه پروادور
یزید او مؤمن دینداری دوتدی ئولدوردی
عجب سعادت بیحدّ و فیض عظمادور
بلی علاقه کسن عزّ و جاه دنیادن
سعادته یتیشور بهره مند عقبادور
آمدن آهو به خرابه شام
ندامتینده یزید ستمگر و شومین
بیر آیری قصّه ده وار شرح اولونسا حُسنادور
خرابه شامیده ویرانیه گلن آهو
بولر خبرلره هر کیم بصیر و دانادور
گلوب خرابه ده درد دلین امامه دیدی
بولوب امامین هامی خلقه حکمی مُجرادور
سوروشدولار ندی مولا مرامی آهونین
بیزه نهاندی ولیکن سیزه هویدادور
دیدی بونون بالاسین صید ایدوبدی بیر صیّاد
گلوبدی سینه سینه سود دُچار ایذادور
گرک گیدوب بونی راحت ایدم اولام راحت
تقیّه وقتی دگل موقع تقلّادور
یغوبدی بوینونا زنجیری خسته حالیله
که یعنی بیکسه نصرت اولونسا اولادور
اونیله منزل صیّاده گلدی زین العباد
بیان ایدوب او که دلده اولان تقاضادور
جواب ویردی یوخ امکانی ویرمرم هرگز
بو صیدیدن منه مقصود بو تمنّادور
یزیدین اوغلونا تقدیم ائدوب آلام انعام
او شاهزاده دی جود و سخایه دارادور
بویوردی ایمدی که مطلب بیله اولور معلوم
بو صیددن سنه منظور مال دنیادور
دایانما آچ اتگون من سنه ویروم زر و سیم
دئمه اسیریدی عاجزدی ناتوانادور
اوزاتدی شاه ولا کیمیا اثر الینی
گوتوردی یردن اله قدری ریگ و حَصبادور (2)
(2) حصبا : سنگریزه
توکوبدی دامن صیّاده سیم و زر اولدی
غریبه معجز عجب قابل تماشادور
اسیره باخ اؤزی زنجیره باغلانوب امّا
باخون جلالته حکمی جماده مجرادور
گتوردی ویردی او آهو بالاسینی صیّاد
دیدی بو معجزه عاجز قالان مسیحادور
گینه امامیله آهو خرابیه گلدی
بالاسین امجگینه سالمادی نه معنادور
گلوب خرابه قاپوسیندا سالدی امجگینه
گوزوم دایانما توک اشکین که جای ابکادور
نه گوردولر که درون خرابه دن ناگاه
ایله سیزیلتی گلور گوئیا که ثکلادور (3)
(3) ثکلا : مادر جوان مرده
سوروشدولار ندی بو ناله آغلیان کیمدور
رباب ناله سیدور یا که امّ لیلادور
دیدیله اصغر آناسی گوروب بو آهونی
سوسوز بالاسین ائدوب یاد اشکی دریادور
گلوبدی سینه سینه سود دیر علی اصغر
اوغول دیمه سوسوزام ایمدی سود مهیادور
گریز به حضرت علی اصغر (ع)
امان او وقتدن حسین آلدی اصغرین الینه
گورن دئدی گون الی اوسته بیر ثریّادور
سوسوزدی لیک سووا میلی یوخ اوخ آختاروری
جان الده مجلس جانانه راه پیمادور
دئدی جماعت اولور اوچ گون اوچ گجه بو بالام
سوسوز قالوبدی عموسی اگر چه سقّادور
ولی نه قایده سیزدن اولان شقاوتدن
اودا سو اوسته قطیع الیمین و یسرادور
سالوب شرار عطش جانینه شرر یانوری
سولوبدی غنچه دوداقی اگر چه حمرادور
ندور گناهی بونون سود امردی دیلسیزدی
طرف منم سیزه قصدوز منیله دعوادور
ائشیتمدی سوزینی کینه دن او تشنه لبون
اولا که مَشرَب دنیائیله سُکارادور (4)
(4) سکارا : مست
حیاسیز حرمله باخموب پیمبر اوغلودی بو
آتاسی شیر خدادور آناسی زهرادور
قویوب کمانه بیر اوچ شعبه سهم مسمومی
نجه دیوم دئماقا هانسی دیلده یارادور
دگنده اوخ گوزینی آچدی باخدی بیر گولدی
که یعنی اوخ منه سوددن سودان گوارادور
اگر چه زهریله سیراب دور بو اوخ امّا
وفا یولوندا یتوب حلقیمه چوخ اَحلادور (5)
(5) احلا : شیرین
امام او قانی دوتوب اوجونا گوگه سپدی
وار ایمدیده گورر هر گون او گوز که بینادور
اوتاندی خیمیه گئتسون بولوردی خیمه ده چون
چوخ انتظار بنات بتول عذرادور
الینده اصغری گلدی جنازه لر اوسته
گوروب او عرصه عجب گلشن دلارادور
بهشت عدنیدی گویا او قان دولان صحرا
یاتان قوم اوسته باتان قانه پیر و بُرنادور
دوشوب او دشتیده باشسیز جنازه لر گویا
منای عشق وفا روز عید اضحادور
دئدی دورون آلون الدن بالام جنازه سینی
کومکسیزم گوروسوز شهریار تنهادور
گئدون کفن گتورون دفن ائدون بو گل بدنی
بو رسم و قاعده چون شیوۀ احبّادور
نجه حسینه اولاردان جواب اولور بیرده
که یوخدی جسمده جان پاره پاره اعضادور
یازیلّا بعضی آپاردی خیامه اصغرینی
بیر آیری طرزیله بعضی کُتُبده طُغرادور
سعادتینده بئله نقل ائدوبدی دربندی
اونون روایتی اغراقدن مُبرّادور
غلاف تیغیله حفر ائتدی بیر کیچیک گودال
قویوب بالاسین او یر کیم شریف غبرادور (6)
(6)غبرا : روی زمین – خاک
قوییدیلر اونی ای کاش هامن او مدفنده
اولنمییدی او ظلمیکه ظلم اخرادور
حسین او گونکه گون اوچ دفعه قان گوگه سپدی
بیری بو قان بیر خون شبیه طاهادور
او ساعتیکه اوغول باشینی آلوب دیزینه
گوزینده اشک بصر دلده وا علیّادور
دوتوب یارالارینون قانینی سپردی گوگه
که یعنی فدیۀ حق بو جوان رعنادور
بیریده اوندا که جسمی اوخیلا دولموشدی
گورن دیَردی که بال و پر آچمیش عنقادور
عزیز شاه ولا سجده گاهینه بیر داش
ووروب بیری او سپهدن که بی تولادور
داشین یریندن آخوب قان بویاندی قانیله
او یوز که نور خدا اوندا پر تجلّادور
گوتوردی دامن پیراهنین او قانی سیله
بولود دا قلامیا گوندن او یوز که زیبادور
همان عمل ولی کامه یتوردی حرمله نی
بو چرخ سفله بلی خیر خواه ادنادور (7)
(7) ادنا : پست
قویوب کمانه او اوچ شعبه لی اوچومجی اوخی
قلم حیا ایله گر چه او بی مهابادور
اوچومجی قاندا بولوندی که هانسی بیر قاندور
هنوز ایمدیده زیب سپهر مینادور
مرحوم شانی تبریزی
منبع مجموعه کانالهای مدح و مرثیه
موضوع: حضرت علی (ع) مدح , احوالات شهر شام ,
زبان شعر و شاعر: نوحه ترکی , شانی
-------------------------------
احوالات کوفه
قارداش باشون جداده قرآن تلاوت ایلر
هر یرده اهل کفری اسلامه دعوت ایلر
دونموش سَنان سِنانی نورونله نخل ِطوره
گلِّم یوزون گورنده بی اختیار شوره
خولی قویوبدی باشون بولدوم گئجه تنوره
کول رنگی گُل یوزونده حالون حکایت ایلر
سن نیزده یارالی ، من ناقه ده پریشان
سن قانیله مُزیّن من زار و دیده گریان
دیندیر من غریبی ای خسروِ لب عطشان
باجی اولاندا غمگین قارداش محبّت ایلر
تا وار نفس ئولونجه کسمم علاقه سندن
بو یولدا گوز گوتورمه سنده بیر آنی مندن
من سندن اؤتری قارداش آیریلمیشام وطندن
هانسی باجی منیم تک قارداشه خدمت ایلر
هر یانه گئتسه باشون نوکِ جداده گلَّم
هر بیر قدمده قارداش فریاد و داده گلَّم
گئتسن دالونجا بزمِ ابن زیاده گلَّم
هر بیر غمونده تک تک زینب شراکت ایلر
یوللار توزی سالونجا مه طلعتون خسوفه
ای کاش حسین دوشیدی عمریم گونی کسوفه
نه عصریدور نه گوندوز بو وضعِ حالِ کوفه
صبریم ائوین عزیزیم یکباره غارت ایلر
بولمولَّه بس کیموخ بیز بو اهل کوفه آیا؟
رحم ایلیوب ویرولَّه اطفاله نان و خرما
کلثومی مندن آرتوخ اودلار بو محنت امّا
ناحق گورر بو ظلمی حقّه شکایت ایلر
قان توکسه گوزدن آزدور بو چشم ِاشگریزیم
بش ایل بو کوفه ده من خاتونیدیم عزیزیم
دنیایه باخ ، منه باخ ، گور ایندی اوز کنیزیم
بو دخت ِمرتضایه صدقاً حمایت ایلر
بیجا دگل که نطقیم بو نوع دل نشین دور
خردا اوشاقلار آهی از بس که آتشین دور
هر بیر مصیبتیندن بو چوخ منه چتیندور
اطفالون آغلیاندا دشمن شماتت ایلر
بیرحم ساربانلار اللّرده تازیانه
اطفالووین فغانین الده ائدر بهانه
یوخ بیر دیَن بو شمره بو زجر و بو سَنانه
مسلم اسیره بیله کافر اذیت ایلر؟
بیر نوعیله ائدوللر اطفالیوه اذیّت
شاماتیدن حجازه بیرده ائدنجه رجعت
قالماز تمام اوشاقلار قارداش یقین سلامت
سندن منی بو مطلب بولَّم خجالت ایلر
(شأنی) (حسین کاتب) ایلوبدی بیله تصیب
بو ناتمام نوحه اولسون تمام تعقیب
مرحوم اولان (شهابی) یاده سالور بو ترتیب
قارداش باشون جداده قرآن تلاوت ایلر.
مرحوم شأنی تبریزی
منبع مجموعه کانالهای مدح و مرثیه
موضوع: احوالات کوفه ,
زبان شعر و شاعر: نوحه ترکی , شانی
-------------------------------
احوالات حضرت علی اصغر (علیه السلام)
سپاهِ غم گینه دل مُلکنه ایدوبدی هجوم
گلوبدی نالیه اعضا ، سیزیلدار عَظم و لُحوم
عظم : استخوان ، لحوم : جمع گوشت
گلور قولاقیمه بیر سس که ای علی اصغر
بو قدر آغلاما آغلار گوزون فداسی اولوم
ایدوم نه چاره بالا منده سن کیمی سوسوزام
نه واردی سینه ده صود نه سوا واریمدی یولوم
بو ماجرا که دل عالَمی کباب ایلر
یازوبدی بعضی کتابینده راویانِ علوم
بالا بو حالیده امّا آتاسی میداندا
دیردی لشکره هل من معین او دل مغموم
سسین آلان کیمی گهواره دن آتوب اوزینی
گوروب بو حالی گلوب داده زینب و کلثوم
نه حاله قالدی خانیملار نه عالَم اولدی خیام
او عالَم اولدی دلِ قلبِ عالمه معلوم
قایتدی خیمیه سسلندی گَل باجی زینب
گتور منه ویر علی اصغریمی بیرده گوروم
گتوردی عمّه بالانی آتاسینا ویردی
آلوب ال اوسته او قنداقی سیّدِ مظلوم
گوروبکه سوز ِعطش غنچه لبلرین قورودوب
عطشدن آز قالوری جان ویره اولور مفهوم
هوسلنوب قوریان لبلرینی بیر ئوپسون
بنا روایته اولدی بو فیضدن محروم
یتشمه موشدی دوداقی دوداقینه بالانون
یتشدی حلقنه تیرِ سه شعبه و مسموم
بو بیر خبردی ، ولی اکثرِ رواتِ خبر
کتابِ غمده ایدوب بو غمی بیله مرقوم
گتوردی اصغری صفلر برابرینده دوروب
آلوب اله او صف انبیالره مخدوم
بویوردی سیز دیوسوز بیز پیمبر امّتیوخ
اولوبسوز هرملل ایچره بو اسمیله موسوم
وصیِ ختمِ رسل جانشین ِشیرِ خدا
بو گون منم یر اوزینده بیر امردور محتوم
بتولِ اطهره مَهریّه دور بو شطّ فرات
من ِغریبه آنا ارثیدور بنا به رسوم
روادی اصغریمون لبلرین عطش قورودا
سو تاپمیوم بالاما چشم ِحسرتیله باخوم
گورون نئجه الیم اوسته سولوب خزان گلی تک
بهارِ عمرینه گویا اسوبدی بادِ سموم
بونون بو حالینه هر ملّت اولسا رحم ایلر
گر اهلِ گبر و فرنگ و گر اهلِ دیلم و روم
سیزون مراموزیله من گناه کارم اگر
صغیر اوشاخ که گناه ایلمز اولور معصوم
قوناق آدیله گتوردوز منی بو صحرایه
سو ویرمه ماق قوناقا هانسی دینده وار مرسوم
گَلون آچون یولومی ال چکوم جلالیمدن
گیدوم فرنگه ، یزیدین اولا بو مرز و بو ، بوم
یزیده بیعت ایدون سیز ، گرک جهاندا اولا
یزید تک بیر امامه سیزون کیمی مأموم
یانیقلی دل دئدی از بسکه دللری آلدى
قتالینه یغشان دشمنی اولوب مهموم
گوروب که همهمه وار لشکر ائیچره غوغادور
باخوب بیر حرملیه ابن سعدِ ناکسِ شوم
دئدی اماندی دایانما حسینی ساکت ایله
هدردی زحمتمیز شورش اولماسا مختوم
حیاسیز حرمله سعد اوغلینون بولوب قصدین
گوروب اطاعتِ فرمانی لازم و ملزوم
آلوبدی وعدهٔ انعامی شادکام اولدی
او حکمه بولدی اوزین بیر امیدیله محکوم
دیزین ووروب یره بیر تیر ایتدی وصلِ کمان
ترحّم ایتموب او آثار ِرحمدن معدوم
او اوخ نجه اوخیدی بولمورم یازیلّا ولی
بیچلدی خنجر ِتیزیله گوئیا حلقوم
قایتدی خیمیه آخموش ستاره الده او ماه
عزا بساطی قوروب آسمانِ غمده نجوم
بیوردی گَل باجی آل اصغریمی راحت اولوب
اگر چه حلقینه پیوند اولوب اوخیله قولوم
نه تک آناسی ، نه تک عمّه سی ، نه تک باجیسی
قاریشدی بیر بیره اهلحرم پوزولدی عُموم
باخوب آناسی دئدی جان اوغول آنان ئولسون
نه گونده من سفر ایتدیم بیله اولوب میشوم
غریب آتان باخوری شرم اولور منه مانع
ولیک باشه ووروب زلفیمی سزادی یولوم
دئدیم که( شأنی) بو طفل ِصغیره چوخ آغلا
دئدی ئولنجه یازوب حالین ایلرم منظوم
دئدیم که کیمدی ایدن درسِ نظموی تکمیل
دئدی که ظاهر ِصورتده (ذهنی) مرحوم.
مرحوم استاد حسین شأنی
منبع مجموعه کانالهای مدح و مرثیه
موضوع: حضرت علی اصغر (ع) احوالات ,
زبان شعر و شاعر: نوحه ترکی , شانی
-------------------------------
زبانحال حضرت رباب (سلام الله)
آغلاما ای گُلِ خندانیم اوغول
نیلیوم یوخ سووا امکانیم اوغول
ای گُلِ نورسِ گلزارِ وفا
باغلیوب سو یولونی اهلِ جفا
قویمیوب سَنده عطش رنگ و صفا
سارالوب سولدی گلستانیم اوغول
ای یوزی صورتِ جانانه زُجاج
هم سوسوزسان بولورم سن همی آج
نیلیوم واردی الیمده نه علاج
قوریوب هر ائیکی پستانیم اوغول
سَنَه باخدوقجا بالا اودلانورام
یوخ علاجیم ندی دردون قانورام
منده سن تک سوسوزومدان یانورام
آلشور سینهٔ سوزانیم اوغول
گوزیوه اوچ گئجه دور گلموری خواب
یورولوب خسته دی بیچاره رباب
سهلدور عمّه لرون اولدی کباب
یاندی بو جمع پریشانیم اوغول
ایلوری رنگِ رخون حالیوی فاش
ساکت اول ایلمه بیر بیله تلاش
داغلانان سینمی چوخ ایتمه خراش
بویادی اللروی قانیم اوغول
بولور عالَم بونی ای طاقتی طاق
رسم دور بو صود امر یوخلار اوشاق
بو قوری سینه او خشکیده دوداق
وار عجب حالیوه میزانیم اوغول
آغلاماقدان دوتولوب بیله سسون
یا دوشوب یوخسا شماره نفسون
تنگ اولوب طایرِ روحه قفسون
نطقه گَل مرغ ِخوش الحانیم اوغول
بالاجا گوزلرون آچ باخ یوزیمه
تا ویروم بیرجه تسلّی اوزیمه
بو نه حالتدی بالا کول گوزیمه
چخماز آخر نیه بس جانیم اوغول
گر چه چوخ گُل هامی گلشنده سولار
آچمامیش غنچه سولا مشکل اولار
سارالان رنگیوه باخدوقجا دولار
ابر تک دیدهٔ گریانیم اوغول
نسگلیم آرتار آچاندا گوزیوی
باسارام باغریما جان تک اوزیوی
قیمارام اوپماقا امّا یوزیوی
اود ویرور چون لب ِعطشانیم اوغول
اوزگه بیر شوقیله نچه آی علی
گجه گوندوز دیمیشم لایلای علی
ایمدی یانّام دیرم ایوای علی
اوجالور گوگلره افغانیم اوغول
(شأنی) بو طفل ربابون گوزیدور
دم ویرن نوحیه مطلق اوزیدور
سوز ربابوندی نه صابر سوزیدور
آغلاما ای گل خندانیم اوغول.
مرحوم شانی و مرحوم صالح تبریزی
منبع مجموعه کانالهای مدح و مرثیه
موضوع: حضرت رباب (س) ,
زبان شعر و شاعر: نوحه ترکی , شانی , حسین شانی , شانی تبریزی
-------------------------------
احوالات حضرت علی اصغر (ع)
از میدان تا خیمه گاه
هر عاشقون که عمری گئچوب انتظاریله
احوالیمی بولر او منیم بیر نظاریله
عاشق جمالی آئینهٔ دل نمادی چون
نقشِ نگاری گوستری رنگِ عذاریله
یوخ بیر نفر نگارِ وفاداریمه دیسون
کسمه اماندی لطفوی بو بیقراریله
مدّتدی روحیمون قوشنا تنگ اولوب قفس
گوندوز گوزیمده بیردی منیم شام ِتاریله
جانیم ضعیف ، لیک قوی پنجه دور فراق
آیا قالوم نه وقته کیمی بو فشاریله
یوخ قدرتیم خلاصیمه مُهلک بو دردیمون
واردور علاجی سنده اولان اقتداریله
من کسموشم علاقه می خلقِ زمانه دن
فقر اختیار ایلموشم اختیاریله
کشکولِ اهل فقری سخی طبعلر هاچان
بوش قیتروله بیر کرمِ بیشماریله
اولموب رضا تجرّده یتمش ایکی یارا
الفت ایدوبدی بیر بو دلِ داغداریله
گیتمور اورکدن هیچ بیری یالقوز قالان زمان
گویا علاقه باغلیوب عاشق ، نگاریله
بیر گون بو یاره لر صاغالور ، دل صفا تاپار
مین ایل غلاف ایچینده یاتان ذوالفقاریله
خامه آلاندا من اله بولمم نه سِرّدور
وا اصغرا صداسی گلور آه و زاریله
یا صاحب الزمان اوزون امداد ایله منه
شرح ایلیوم شهادتینی اعتذاریله
راوی دیر گَلنده حسین خیمگاهدن
یا قصد حملِ نعشیله یا کارزاریله
میداندا گورمدیم اونی اولسون فسرده حال
گوردوم تمام صبریله ، چوخ بردباریله
آثارِ انکسار گورونمووراو شاهیده
رخساری لاله گون گورونور افتخاریله
گیتدوقجا یار و یاوری قلبی تاپور صفا
صبر اهلین حیرته سالوری اصطباریله
مطلق گورن دیردی شهِ لافتادی بو
لشکرگهه گلوردی ایله بیر وقاریله
بیرده باخوب نه گوردوم ایله صبر صاحبی
میدانه دلشکسته گلور انکساریله
پوزقوندی حالی رنگی سولوب گوزلری دولوب
ایلور گوزی مقابله ابرِ بهاریله
صفلر قباقینه یتوب آلدی ال اوستنه
بیر سودامر که مُشرفیدی احتضاریله
کافر باخاندا حالینه رحم ایلوری اونون
اسلامیان اوتانموری بو ننگ و عاریله
از بس سالوب شرارِ عطش جانینه شرر
غنچه دوداقلاری قوریوبدور شراریله
باشی آخوب ، آتا قولی اوستونده ضعف ایدوب
کیم تاب ایدر سوسوزلقا سِنّ صغاریله
گوستردی تا او طفلی سپاهه شهِ حجاز
دل آچدی نطقه گلدی لبِ دُر نثاریله
سسلندی ای جماعت اولور او چگون اوچ گئجه
عطشان قالوب بو طفلِ صغیر انزجاریله
من یاغیم یزیده ، گناهی ندور بونون
بو نه مخالفت ایلیوب شهریاریله
نه بیر گناه ایدوبدی نه بیعت بولور ندور
نه واردی جنگه قدرتی جسمِ نزاریله
زهرا آنامدی ، حیدر آتام ، مصطفا بابام
وار نسبتیم رسولِ حق کردگاریله
واردور ایچوزده چوخ تانیانلار سئوال ایدون
تا باور ایلسون سوزیمی اعتباریله
بیر شربه سو ویرون سوسوزوندان یانوربالام
اجری سو ویرماقین اولی پروردگاریله
از بس یانیقلی دل دئدی یاندیردی دللری
آغلاتدی لشکر اهلینی بو وضع ِکاریله
پیغمبر اوغلنون ایله پژمرده حالینه
أتلاردا یـاندی آغلادی حتّی سواریله
فرماندهِ سپاهِ ستم پیشه تا گوروب
بو شورشی ، او قوم شقاوت شعاریله
قالمور او قدراولا هامی زحمتلری هدر
لشکر دونوکلوق ایلیه اول تاجداریله
بیر باخدی اوخ اتانلارا تا نحس گوزلری
ناگه ساتاشدی حرملیه بیر نظاریله
سویلوب ندن دوروب باخوسان گورموسن مگر
افواجیمی پوزور بو همهمهء بیشماریله
چوخ سخت بیر مقامه یتوب امر چاره سی
اولسا اولور سنون کیمی بیر نامداریله
ساکت ایله حسینی یاخوندی ریاستیم
رخنه تاپا بو خسروِ گردون مداریله
مقصودِ ابن سعدی بولوب تا او سخت دل
اوچ شعبه لی اوخ آلدی اله افتخاریله
سویلوب حسینون اصغرینی قویمارام سوسوز
ویرم سو ، نوکِ ناوکِ زهر آبداریله
تا وصل ایدوب کمانه او اوچ شعبه لی اوخی
اوچ دل دوتوب شراره همان استناریله
جتّنده قلبِ فاطمه میداندا شاهدین
قلب ِرباب خیمده یاندی بو ناریله
اوچ قلبی یاندیروب بیر اوخ هم ووردی اوچ نشان
عرض ایلرم نشانه لرین اختصاریله
حلقِ علی اصغر و بازوی شاهدین
گئچدى یتشدی قلبِ رسوله گذاریله
بولمم او اوخ نه حاله سالوب شاهزاده نی
مقتلده شرحی کشف اولونوب اختباریله
سیزدن ولی بو بیر سوزی من ایلورم سئوال
گُل برگینون نه نسبتی وار نوکِ خاریله؟
گُلدن او خاری خارج ایدوب باغبانِ دین
همناله اولدی باغِ وفاده هَزاریله
قان اوخ یریندن آخدی دوتوب سپدی گوگلره
ثارالله ایتدی عرشی مُزیّن او ثاریله
عرض ایتدی لطف اوزیله الهی قبول ایله
بو جانسپاریمی او هامی جان سپاریله
یاتما نجفده یا على دور کربلایه گَل
گور نور ِعینون حالتِ دل ناگواریله
اصغر جنازه سی الی اوسته فسرده حال
صاق و صولا باخور هوسِ انتصاریله
نه واردی بیر نفر آلا الدن جنازه سین
نه بیرجه غمگسار او بی غمگساریله
شرم ایلوری خیامه آپارسون بالاسینی
گورمور روا بو خجلتی اول شرمساریله
هر قدر فکر ایدوب داخی گوردی علاجی یوخ
چاره کسوب علاقه سین اول غم دچاریله
آهسته گلدی زینبی سسلوبدی تا دیسون
درد ِدلین او فاطمیه یادگاریله
دیشره چیخوب خیامدن علیا مکرّمه
اولسون انیسِ محنت امامِ کباریله
بولمم نه گوردی سسلدی جان ای عزیزِ دل
گورسون باجون سنی نجه بو روزگاریله
سالما باشون اشاقه بیله توکمه گوز یاشون
یاندیرما قلب ِزاریمی بو حالِ زاریله
من غم شریکیم سنه ویر اصغرون منه
غم الفت ایلیوبدی منِ اشکباریله
اوخلی بالانی آلدی آتاسیندان عمّه سی
گَتدی آناسینا ویره قلبِ فگاریله
قونداقی قانلی یوز گوزی قانلی بوغاز یارا
ممکندی گور بو مطلب اولا استتاریله؟
من بولمورم آناسی نه حاله قالوب ولی
آنلار او که علاقه سی وار شیرخواریله
آلدى قوجاقینه دئدی پَربسته بلبلوم
کسدون نه تئز علاقه وی بو لاله زاریله
کیم اوخلادی بوغازوی؟ دیوان ِحشرده
دیوانیوی خدا ایده قومِ شراریله
سن ایچمدون سو کسدون علاقه فراتدن
منده گرک علاقه کسم جویباریله
گهواره دن آتاندا ئوزون سن ، من آنلادیم
باشوندا شوریوی هوسِ وصل ِیاریله
ویرسه اگر اجازه بابان ترک ائیلرم
جاه ِجهانی امر ِامام ِفخاریله
دیوانه لر کیمی گزرم چوللری مدام
درد دل ائیلرم گئجه لر کوهساریله
قنداقوى ئولنجه دولاندیرام آغلارام
آغوشی مادرون ندی فرقی مزاریله؟
(شأنی) بو شاهزادهٔ باب الحوائجه
اولموش دخیل بیر دلِ امید واریله.
مرحوم استاد شأنی
منبع مجموعه کانالهای مدح و مرثیه
موضوع: حضرت علی اصغر (ع) احوالات ,
زبان شعر و شاعر: نوحه ترکی , شانی , حسین شانی , شانی تبریزی
-------------------------------
در احوالات حضرت علی اکبر (ع)
همیشه عشقیله هجرانه اِنفصال اولماز
وصاله نایل اولان طالبِ وصال اولماز
علاقه کسمین عالمده قیدِ اُلفتدن
طریقِ اهلِ محبتّده اهلِ حال اولماز
عَبثدی اهلِ ولایه محبّتِ دنیا
حقیقی عاشق اولان ، بندِ مُلکِ و مال اولماز
محبّت اهلیسن ای دل اوتورما غفلتیله
بو قدر اهل محبتده اِغتفال اولماز
توک اشک حسرتی ، یول سال نگار محفلینه
نشانه اولماسا عاشقده اشکِ آل اولماز
حسینون اکبرینه باخ محّبتی اورگش
ایله مُحبّ خداوندِ ذوالجلال اولماز
اتادان اِذن آلوب ، ایلور وداع ئوز آناسین
ایله وداع ، ایله بیر پر ملال ، حال اولماز
بولوردی گِتسَه اولور راه حقّده قربان
آناسی ایتمه سه گر حقّینی حلال اولماز
ایله توکور گوزونون یاشین حسرتیله آنا
بهار فصلی بولوددا او اتّصال اولماز
گنه بونیله اَل اوزدی ایله جوانیندن
که هیچ آناده ایله حُبِّ لا یزال اولماز
غم فراقی مؤثر بولوب ئوزی گیتدی
بولوب آناسینا بیر ئوزگه اشتغال اولماز
اولاندا جلوه نما جلوهء جمال علی
قوشون دیردی بشرده بیله جمال اولماز
دیردیلر که پری دور بشرده بیله یقین
بو صورت و بو وجاهت بو خطّ و خال اولماز
و یا گلوبدی پیمبر ، حسینه امداده
اونیله اُمت اولان طالبِ قتال اولماز
گوروب بو شورشی وقّاص زاده لشکرده
دیدی جَدلده بو شورش بو قیل و قال اولماز
دگول بو احمدِ مُرسل اونا شباهتی وار
مگر بشر بشره صورتاً مثال اولماز؟
حسینون اوغلیدی بو نوجوانِ مه سیما
بو قتله یتسه ، حسین قادرِ قتال اولماز
دوشر قلنجی اَلیندن اولار خمیده قدی
بو غمده سرو قدی گور مثالِ دال اولماز
تانیتدی یوسفِ مصرِ وفانی ، سعد اوغلی
اگر چه حُسنده یوسف اونا مثال اولماز
جفا کمندی قورولموشدی هر طرفده نجه
ایله کمندِ شکاری ، ایله غزال اولماز
اگر چه قیردی قوشون ، پهلوانلار ئولدوردی
ولی او شرحه بو بیر جمله ده مجال اولماز
بویاندی قانینه ، گیدی لباس عزّ و شرف
بیله جلالت و عزّت بیله جلال اولماز
دولاندیروب یوزونی خیمه گاهه حسرتیله
ایله جوان مودب اولار ؟ محال اولماز
باخوب آتاسینا سویلوب عَلیک و مِنّی سلام
که یعنی رسمِ ادب کلمهء تَعال اولماز
سو جامی اَلده گلوب باشی اوسته پیغمبر
غم ایلمه بیله خوش حالت ایله حال اولماز
شه آلدی خیمه ده شهزاده نون سسون ، گلدی
نه حالیله؟ نجه بو نطق بوردا لال اولماز
وقار معدنی ، شه ، رزمگه دولی دشمن
بو یرده لنگ ، نجه توسن خیال اولماز
اوزون آتا یره آتدان ، دیزی دیزی سورونه
ندن بو عالم ایجاد پایمال اولماز؟
جوان اوغول باشین آلدی قوجا آتا دیزینه
گوروب حیاتینه قالماقه احتمال اولماز
اگیلدی قویدی یوزون شاهزاده نین یوزونه
الف قدی نجه گور مثلِ حرف دال اولماز
او آق محاسنی نی قانیله خضاب ایلدی
ایله خضاب ، ایله عالی رنگِ آل اولماز
باسوب اوغول باشینی اودلانان اورک باشنا
گوروب او شعله بو قیمتله اعتدال اولماز
اوجا سسیله دئدی یدّی دفعه وا ولدا
بو ناله نون سبب سِرّینه سؤال اولماز
ایله جوانی الیندن گیدن آتا ، آیا
وقارینی ویروب الدن فسرده حال اولماز؟
دئدی سن اولدون علی هَمّ و غمدن آزاد
اورکده سن گیده سن محنت و ملال اولماز
ولیک قالدی آتان دشمن ایچره فرد و وحید
هدایت ، حقّه طرف ، لشگرِ ضلال اولماز
آتا بالانی چوخ ایستردی بیر دانشدیرسون
گوروب و لیک اوغول قادرِ مقال اولماز
یغوب عبایه داغیلموش جنازه سین ، گوردی
جنازه اوزگه طریقیله انتقال اولماز
دئدی جوانلارا اکبر جنازه سین گوتورون
بیله بیر امره مگر فوراً امتثال اولماز؟
حرمده سس دوشوب اکبر جنازه سی گلدی
آناسی لیلیده گور حالِ ارتحال اولماز؟
آناسی دوزدی ، ولی چخدی عمه سی حیران
اگر چه عصمت حق ، منظرِ رجال اولماز
امام گوردی حیا سدّ راهِ لیلادی
دئدی بو مرحله ده شرم و انفعال اولماز
اوغول جنازه سی اوسته آناسی اوخشماسا
عزانون عزّتینه نقص اولار ، کمال اولماز
ستاره تک ، گوره مه پیکر اوغلونون یوزونی
آنا قدی نجه گور ضعفدن هلال اولماز
دئدی که ای فَلکِ حُسنده ایشیلقی گونوم
نه تز غروب ایلدون؟ بیله تز زوال اولماز
نجه زمانه ده عمروم گلی ، گولر سن سیز
که باغِ عمریمه سندن صورا نهال اولماز
بو فخر بسدی که یتدی قبوله قربانیم
مگر بو فخره عوض ، رنجِ ماه و سال اولماز
توجّه اولماسا اول شاهزاده دن (شانی)
ضعیف جسمده بو نطق و بو مقال اولماز.
مرحوم شانی تبریزی
منبع مجموعه کانالهای مدح و مرثیه
موضوع: حضرت علی اکبر (ع) احوالات ,
زبان شعر و شاعر: نوحه ترکی , شانی
-------------------------------
احوالات حضرت فاطمه زهرا (سلام الله)
جهانی دولدوروب گینه غم و ملال فاطمه
باتوبدی ماتمه بو گون تمام آل فاطمه
اشاره ایلسم اگر مصیبت بتولیدن
رساله الده شرم ایدر خجل اولار رسولیدن
سوروش بتوله نائبه فسرده دل ملولیدن
هنوز زینبی ملول ایدوب ملال فاطمه
او گونکه تاپدی خلقت بشرله ماسوا نظام
عطا اولوندی حقّیدن بتوله عالی بیر مقام
که یتمیوب بیر عورته بیر ایله رتبه ی عظام
جهانیانی حیرته سالوب جلال فاطمه
او گونکه اهل محشره خدای حیّ کائنات
حساب خیر و شرّ اوچون ویرور دوباره دن حیات
او سخت گیر و داریده چتیندی هر کسه نجات
گر اولماسا شفاعته او گون خیال فاطمه
بو شان و بو مقامیله بو عزّت و جلالیه
گورون بو چوخ آز عمرینی ویروب باشا نه حالیله
انیسیدی گجه گونوز مصیبت و ملالیله
سارالدی سولدی گل کیمی جمال آل فاطمه
گلوبدی بیر گونی ایوه علی ولیّ کردگار
پیمبرین عزیزه سین گوروب ملول و دلفگار
یاتوبدی قبلیه طرف فسرده دل غریب و زار
او شهریار حالینی پوزوبدی حال فاطمه
شروع ایدوب اویاتماقا عزیزه سین ابوتراب
نه دللریله سسلدی ایدوب نجه گوزل خطاب
ملول اولوب سوالیدن گوروب که گلمدی جواب
اورکلنوب او بلبل شکسته بال فاطمه
اولوب سرشک حسرتی عذاره سیل تک روان
دیدی عم اوغلوام سنون نه یاتموسان گوز آچ اویان
نه دل دیدیم دانشمادون، نولوب او نطق خوش بیان
علینون آلدی طاقتین بو نطق لال فاطمه
سنون بو دینمماقلیقون ز بس ایدر اثر منه
که قورخورام اورک یانا گلم دله ایدم گله
اورکده چوخدی درد دل اماندی بیرده گل دله
فرح ویرور روانیمه او خوش مقال فاطمه
آچوب گوزین او حالیده او نور دیده ی رسول
رسول جانشینینه ادبله عرض ایدوب بتول
سنون ملالون ایلیوب منی عم اوغلی جان ملول
فراق باشلانوب یتوب باشا وصال فاطمه
یاخونلاشوب اوشاقلاریم یتیم اولا عم اوغلی جان
واریمدی بیر نچه سوزوم اجازه ویر ایدوم بیان
ازلکه خواهشیم بودور گر عورت آلسان هر زمان
بیر عورت آل که تا اولا رئوف آل فاطمه
منیم که قویمادی فلک زمانه ده یوزوم گوله
شبیهیدیم همیشه بیر خزان اولوب سولان گله
جنازه مین گوتورماقین مباد اهل کین بوله
گرکدی خلقیدن نهان اولا رحال فاطمه
ئولومده گوردوم عاقبت فشاریدن نجاتیمی
اودور که حقدن ایستدیم گجه گونوز وفاتیمی
هانی بولن نه چکمیشم بو مدّت حیاتیمی
بو مطلبی بولور فقط او ذوالجلال فاطمه
اگرچه غمده زینبیم سببدی شور و شینیمه
او چوخ علاقه منددور بو ایکّی نور عینیمه
اونون جهاندا منجه وار محبّتی حسینیمه
او بلبلی ملول ایدر بو گل جمال فاطمه
عبث دگل که گوزلریم بهار ابری تک دولار
صغیر اَکَن بو نازنین بالالاریم یتیم اولار
حسن پوزولسا دل یانار، حسین سارالسا گل سولار
چمنلری خزان ایدر بو نونهال فاطمه
باخاندا زینبه دولور سرشک چشمیله گوزوم
آنا فراقی قیزلارا چتیندی گورموشم اوزوم
بو محنته بو فرقته محال امردور دوزوم
آنا دیوب نه قدر وار یانار مثال فاطمه
بو فصل تازه « شأنیا » ملول ایتمه سین دلون
تانور تمام اهل دل سنون سوزون سنون دلون
نجه جهاندا حلّ اولور تمام سخت مشکلون
یقین جزاده ده یتر سنه نوال فاطمه
مرحوم شانی
منبع مجموعه کانالهای مدح و مرثیه
موضوع: حضرت فاطمه زهرا (س) احوالات ,
زبان شعر و شاعر: نوحه ترکی , شانی
-------------------------------
مناجات
ای خداوندِ رئوف و فرد و رحمان و رحیم
خلق ایدن ایجادی یوخدان ، قادر و حیّ و قدیم
لاشریک و لامکان و لایزال و لاینام
چاره ساز و دلنوازِ پیر و برنا ، خاصّ و عام
اعترافیم وار منیم بو خصوصیّاتده
عینِ معنا مثلِ صورت گوسترور مرآتده
بولموشم قادر هامی امرِ بِالاِطلاقه سنی
لطفوه چوخدور امیدیم ناامید ایتمه منی
بی نیازه کشف راز ایتسون گرک اهلِ نیاز
بی نیاز عالَمده کیمدور؟ کیمده وار بو امتیاز؟
هر بشر بو داریده محتاجِ مایحتاجدور
انبیا و اولیا و اوصیا محتاجدور
بی نیاز اوز ذاتِ پاکوندور سنون بی شک و رِیب
سنسن آگاهِ ضمایر ، عالِمِ اسرارِ غیب
منده مدّتدی دچارم چوخ فشار و زحمته
اوز فشاریمدور منی وادار ایدن بو جرئته
خاصّه قرآنِ مجیدونده ایدوبسن فتحِ باب
وار بئله بیر آیه سیزدن سسلماخ مندن جواب
هر کس اوز دردین گرک عرض ایلسون یارب سنه
وار علاوه بیر خصوصیّت بو بابتده منه
سؤیگلون شاه ِشهیدین آستانینده ایتم
چخ دیوب قؤوماز منی ، اولماز رضا گوزدن ایتم
سوز بیوک دوشدی بو سوزده وار بیر اوزگه داستان
رتبه چوخ عالی اولور گر یازسا کلبِ آستان
نیلیوم وقتیمده فرصت یوخ ، ولی چوخ ایسترم
عشقیمی بو عاشقانه کلمه لرده گوسترم
بلبل ِگلزارِ عشق نورِ عین ِحیدرم
باغِ عشقنده امیدیم وار گوزل گللّر دَرَم
چوخ امیدیم وار او نورِ چشمِ زهرای بتول
من دئدیم بیر ایت ، اوزی نوکرلیقا ایتسون قبول
گور او شاهون نوکری آیا روادور دهرده
نوکر اولسون گونده بیر شخصه بو غربت شهرده؟
گورمسون عالَمده خوش گون ، گولمسین هرگز یوزی
خاطری دردیله ، دایم اشگلیله دولسون گوزی
اول یگانه شاعرِ دانشورِ نیکو سیَر
جدّه سین ایلوب مخاطب بیر گوزل مصرع دییر
(مصرع از مرحوم حسینی سعدی زمان می باشد)
(یوخسا بو نوعی سووَر چرخ ِکهن یافاطمه
گورمسون خوش گون حسینی هر سووَن یافاطمه)
نچه مدّتدور دوشوب امر ِمعاشیم مشگله
صبر ایدردیم ضیقه ، اصلا ایلمزدیم من گِله
لیک بعضی نکته لر وار صبری ایلر پایمال
صبری نه پامال ایدر ، آنلار اونی اهلِ کمال
بیر نفر فرضاً اولا هر بیر علومه آشنا
حق سوزون ایللّه تکذیب ، اولماسا اهلِ غِنا
سوز گینه چخدی کناره قالدی مطلب ناتمام
مقصده یول تاپماقا لازمدی سعی و اهتمام
کثرت ِجرم ِمعاصیدن داخی یوخدور یوزوم
عرضِ حاجت ایلیوم درگاهِ معبوده اوزوم
بوردا تنگ اولماز کُمیتِ فکره میدانِ وسیع
ایلرم درگاهینه بیر آبرومندی شفیع
حق یانندا آبروسی چوخدی ، گئچگیندی سوزی
حق قبول ایلر سوزونی ، اولماسا کم لطف اوزی
بو مقامین صاحبی کیمدی آدین آلسان خبر
دخت ِشاه اولیا ، اُختِ شُبریله شَبَر
بانوی زهرا شیَم ، مریم کنیز ، عیسی' غلام
صاحبِ شأن و شرف دارای عزّ و احترام
اسمِ مسعودی نجه مرسوم بر زینب اولوب
بی مسمّا اولمیوب ، واقعده زینِ اَب اولوب
زین ، عرب لفظنده زینتدور ، مراد ابدن آتا
بو خانملان تاپدی زینت اسمِ شاهِ لافتا
کشف اولا لازمدی اهلِ بزمه بو مطلب نجه
ویردی زینت اسمِ شیر داوره زینت نجه
دینِ حق بیر باغدور ، خوش منظر و عالی فضا
باغبانیدی اونون هم مصطفی' هم مرتضا
بیر زمان اولدی که آز قالدی سولا گلزارِ دین
قویمادی اما سولا بو ، رونقِ بازار ِدین
رونق ِبازار ِدین کیمدور آدین ایتسن سؤال
عرض قیلّام من ، بو شرطیلن نثار ائت اشگِ آل
وار گوزل بیر آدی امّا آدینون چوخ عاشقی
وار گوزل بیر قبری ، امّا قبرینون چوخ شائقی
آدینی ذکر ایلسم اشگیم آخار بی اختیار
قبرینی فکر ایلسم دلدن گیدر صبر و قرار
وصلینه یتسم غمِ هجرین فراموش ایلرم
قبرینه گیتسم دوشوب توپراقه کرنوش ایلرم
آدی اهلِ ذوق ایچون دار ِبقایه توشه وار
تربتی خاکِ شفادور ، مرقدی ششگوشه وار
آدی قبریندن بولوندی (شانیا ) گچ مطلبه
شرح ویر بیرده شئوناتِ جنابِ زینبه
ویردی گر گلزارِ دینه خونِ شاهِ دین صفا
بو خانمدا ایتدی اوز عهدینده بیر عالی وفا
او شهید اولماقدا اسلامین اوجالدوب بیرقین
بو اسیر اولماقدا گوردی دینِ حقّین رونقین
او شهید اولدی مخالف شرّینه ایتدی علاج
بو اسیر اولدی ویروب احکامِ قرآنه رواج
او سویَردی قانیله الوان اولا گل پیکری
بو سویردی قوللاری ، کتفی اولا نیلوفری
او سووب چیخسون جِدا باشندا سِیره باشیله
بو سووب اولسون او یولدا همسفر قارداشیله
او سویردی خیمه گاه و شوکتی تاراج اولا
بو سویردی کوفه ده تیرِ غمه آماج اولا
او سویردی بزمِ شرب شامده گورسون اوزون
بو سویردی خیزران ظلمون گوروب یومسون گوزون
او نماز ِظهر قیلدی چاک چاک اعضائیله
بو نمازِ شب قیلاردی هر گیجه ایذائیله
نه نماز شب؟ نجه سجده نجه راز و نیاز
نه عبودیّت نجه طاعت نجه عالی نماز
بو عبودیّت فقط بیر زینبه زیبنده دی
حشره دین بو بنده لیقدان بنده لر شرمنده دی
سیّد ِسجاد اوزی نقل ایلوری بو مطلبی
بیر گیجه ویرانسراده گوردوم عمّم زینبی
نصفِ شبده بی نیازیله ایدور راز و نیاز
حالِ ضعفیله قیلور اگلشدیقی یرده نماز
یا دوزلمیر بار ِمحنتدن خمیده قامتی
یا که وار ضعفِ قواسی یوخ قیامه طاقتی
سِرّین استفسار ایتدیم مطلبین ، علیا جناب -
گوزلرین دولدوردی اشکیله بیله ویردی جواب
من پرستارِ یتیمانم بو واضحدور سنه
تاپشوروب قارداشیم اطفالین وداعنده منه
آتموشام باشدان اودور هر حالیده اوز غصّه می
ویرّم اطفاله غذا سهمیّه سنده حِصّه می
شدّتِ جوع ، آلموش الدن قوّهء جسمی تمام
بو سببدن قالمیوبدور منده یارای قیام
مقصدیم بوردا دگل کیفیّتِ ویرانسرا
شرکتِ زینب گرکدور کاملا" اثبات اولا
او آلوب آغوشه قبر ایچره علی اکبری
بو ایدوب همراه اوزینه لیلیِ غم پروری
او آلوب اطرافه یتمیش بیر نفر نیکو سرشت
بو یغوبدور باشه هشتاد اوچ خواتینِ بهشت
او یاتیردوب سینه سینده اصغری لایلای دیَر
بو ربابین ناله سینه سس چکوب ایوای دیر
او کنارِ نهر علقمده قویوب بیر پاسبان
بو دیارِ کوفه ده کلثومه اولموش همزبان
او گیدنده تاپشوروب زینُ العبایه عترتین
بو اولوب سجّاده هر یرده طرفدار و معین
او جدا باشندا چخدی گردشه خورشیدوار
بو سنق محملده اولدی راهِ شامه رهسپار
او تلاوت ایتدی شهر ِکوفه ده کهف آیه سین
بو ایشیتدی نیزه اوسته قارداشین دلکش سسین
او ویروب قرآن سسیله زینبه رمزاً صدا
بو سسین آلجاق دئدی ای نطقوه روحیم فدا
خوش سسون کسمه قولاقیمدن باجون قربان سنه
صوتِ قرآنون جداده قوّتِ دلدور منه
ای هلالِ یک شبه ، انگشت نمای مرد و زن
دوتقون آی اطرافینه گوز یاشین انجم تک دوزن
چون هلالِ نو گورور بو اهلِ کوفه قاشیوی
بیر بیرینه گوسترور نوکِ جداده باشیوی
خامه دن فریاد ایشتدیم من ، کیم آنلار مطلبی
کیم بولر کیفیّت حالِ جنابِ زینبی
گور نه حالتده گورور قارداش باشین بو بینوا
گه هلاله اوخشادور ، گه نیزده دوتقون آیا
آخرینده هر آئین غایب اولور آی اوچ گجه
رؤیتِ رأسِ حسینده آی کیمی دوشدی گجه
یعنی اولموشدی او باشدا اهلِ بیتیندن جُدا
کوفه ده اولدی قمر تک مرکزی نوکِ جِدا
غفلتا" گوردی جِدا اوسته باجی قارداشینی
بو سببدن اوخشادوب تازه هلاله باشینی
گوز یاشی قویماز بو گوز گورسون او غمناک عالَمی
دیدهء دلده مجسّم قیل او شورِ اعظمی
خرمنِ ماهه باخوب آختارما پروین خوشه سی
آی خسوفه دوشسه گورسنمز مگر بیر گوشه سی
زینبون منظوریده شاید بودور اوزگه دگول
شه جمالین بیر دوتولموش آی کیمی دوتموشدی کول
گورماقا قارداش جمالین ایتدی هر قدر اهتمام
گوردی بیر ذرّه نمایاندور ، دگل مرئی تمام
تار ایدوب بیر منخسف آی تک او بدرِ کاملی
چولقیوب یولّار توزی ، قان پرده سی ، مطبخ کولی
باجی فکر ایتدی مبادا قارداشی دلتنگ اولا
بولدی لازم مهربان قارداشیله همرنگ اولا
نیلدی؟ واضح بیانِ حاله یوخ دلده توان
گوردولر جاری اولور قان ، چوبِ محملدن روان
بو وفاده باجی قارداش گورمیوب چشمِ جهان
(شأنی) ختم ائت ، برقِ خامه آز قالور اولسون جهان
اوچ نفر زوّارِ سلطانِ سریرِ ارتضا
نوکرِ شاهِ شهیدان ، زایرِ قبرِ رضا
بیر رحیم ، ایکی حسین ، بانی اولوب بو طلبه
هر کیمین وار مشگلی ، ایتسون توسّل زینبه.
مرحوم شانی
منبع مجموعه کانالهای مدح و مرثیه
موضوع: مناجات ,
زبان شعر و شاعر: نوحه ترکی , شانی
-------------------------------
در ولادت حضرت زینب کبری (سلام الله)
ویردی گر گلزار دینه خون شاه دین صفا
بو خانمدا ایتدی اوز عهدینده بیر عالی وفا
او شهید اولماقدا اسلامین اوجالدوب بیرقین
بو اسیر اولماقدا گوردی دین حقین رونقین
او شهید اولدی مخالف شرینه ایتدی علاج
بو اسیر اولدی ویروب احکام قرآنه رواج
او سویردی قانیله الوان اولا گل پیکری
بو سویردی قوللاری کتفی اولا نیلوفری
او سووب چخسون جدا باشندا سیره باشیله
بو سووب اولسون او یولدا همسفر قارداشیله
او سویردی خیمه گاه و شوکتی تاراج اولا
بو سویردی کوفه ده تیر غمه آماج اولا
او سویردی بزم شرب شامده گورسون اوزون
بو سویردی خیزران ظلمون گوروب یومسون گوزون
او نماز ظهرقیلدی چاک چاک اعضائیله
بو نماز شب قیلاردی هر گیجه ایذائیله
نه نماز شب نجه سجده نجه راز و نیاز
نه عبودیت نجه طاعت نجه عالی نماز
بو عبودیت فقط بیر زینبه زیبنده دی
حشره تک بوبنده لیقدان بنده لر شرمنده دی
سید سجاد اوزی نقل ایلوری بو مطلبی
بیر گیجه ویرانسراده گوردوم عمم زینبی
نصف شبده بی نیازیله ایدورراز و نیاز
حال ضعفیله قیلور اگلشدیقی یرده نماز
یا دوزلمیر بار محنتدن خمیده قامتی
یا که وار ضعف قواسی یوخ قیامه طاقتی
سرین استفسار ایتدیم مطلبین علیا جناب
گوزلرین دولدوردی اشکیله بیله ویردی جواب
من پرستار یتیمانم بو واضحدور سنه
تاپشوروب قارداشیم اطفالین وداعنده منه
آتموشام باشدان اودور هر حالده اوز غصه می
ویرم اطفاله غذا سهمیه سنده حصه می
او آلوب آغوشه قبر ایچره علی اکبری
بو ایدوب همراه اوزینه لیلی غم پروری
او آلوب اطرافه یتمیش بیر نفر نیکو سرشت
بو یغوبدور باشه هشتاد اوچ خواتین بهشت
او یاتردوب سینه سینده اصغری لایلای دیر
بو ربابین ناله سینه سس چگوب ایوای دیر
او کنار نهر علقمده قویوب بیر پاسبان
بو دیار کوفه ده کلثومه اولموش همزبان
او گیدنده تاپشوروب زین العبایه عترتین
بو اولوب سجاده هر یرده طرفدار و معین
او جدا باشندا چخدی گردشه خورشیدوار
بو سنق محملده اولدی راه شامه رهسپار
او تلاوت ایتدی شهر کوفه ده کهف آیه سین
بو ایشیتدی نیزه اوسته قارداشین دلکش سسین
او ویروب قرآن سسیله زینبه رمزاً صدا
بو سسین آلجاق دیدی ای نطقوه روحیم فدا
مرحوم شانی تبریزی
منبع مجموعه کانالهای مدح و مرثیه
موضوع: حضرت زینب کبری (س) میلادیه ,
زبان شعر و شاعر: نوحه ترکی , شانی
-------------------------------
مناجات
یارب بو گون ایتدیم وفا اوز ایتدیقیم پیمانیمه
ویردیم رضا تیر جفا آلدیم یارالی جانیمه
باخدیم ازلکه عهدیمه ترک جهان ایتدیم بو گون
من یَشتری سوداسینون شرحین بیان ایتدیم بو گون
دشت بلانی قانیله باغ جنان ایتدیم بو گون
حتّی اوزومده لاله تک آخِر بویاندیم قانیمه
بیر بیله ساعت ای خدا بیر عمر ایلردیم سراغ
صد شکر اولدی قسمتیم اغیاریدن تاپدیم فراغ
زاغ و زاغن خالی اولوب اطرافیدن خلوتدی باغ
بلبل کیمی دل آچموشام راز دله جانانیمه
جسمیمده قانلی یاره لر نی تک گلوبدی نالیه
درک ایلدیم بو عالمی یتدیم مقام عالیه
گیسوی اکبر تک خدا پرتاب و چین پر غالیه
دوندردی چینه بو چولی باخ دسته ی ریحانیمه
دوغراندی بیر اکبر کیمی پیغمبره بنزر بالام
واردور یری اکبر دیوب عالملره شیون سالام
چون سن رضاسن یانمارام منده گرکدور کام آلام
باخدوقجا القان ایچره بو آهو صفت قربانیمه
سمّ ستوران ایلیوب پامال جسم قاسمی
قولسوز یخوب آتدان یره دشمن رشید عبّاسیمی
زینب گرکدور شامیده دوتسون منیمده یاسیمی
مسکن اولاندا گوشه ی ویرانه اول نالانیمه
ایستردیم اهل عالمه مفتوح اولا باب فرج
اتمام حجّت ایلدیم تا ایتمه سون افواج لَج
من سهلم، عبّاس ئولماقی افلاک قدّین ایتدی کج
ماه فلک افسوس ایدوب یاندی مه تابانیمه
من باخمارام اوغلوم ئولوب چوخدور ملال و محنتیم
قارداشسیزام آرتوب غمیم اولموش خمیده قامتیم
یارب تمام عمریدن خوشدور منه بو ساعتیم
عالملری ویرسن اگر اولماز عوض بو آنیمه
بیر ضعفیله شدّت یتوب بو گون گونون احراقینه
یر ایسّیسی ایلر اثر بو آتلارین دیرناقینه
امّا خوشام من دوشموشم کرب و بلا توپراقینه
آختارمارام بیر کولکه یر راحتدی بو یر جانیمه
غم ایتمرم یالقوزلیقا نه یار و نه یولداش قالوب
نه قارداش اوغلی نه اوغول نه مهربان قارداش قالوب
گلمز ندن شمر شقی گورمور مگر بو باش قالوب
امّا گلنده شمر دون زینبده گلسون یانیمه
هر نه گمانیم واریدی تقدیم ایتدیم من سنه
سنده بغیشله جدّیمون امّتلرین یارب منه
ویر بیر امان نامه اولار یتسون مقام ایمنه
سن قیل کرم اکرام ایدوم منده گلن مهمانیمه
ناگه حبیبه بیر ندا ایتدی او دم محبوبیدن
ای سویگلوم بو حالتون آلدی شکیب ایّوبیدن
میلون نه قدر اولسا جوان و پیر و زشت و خوبیدن
عفو ایلرم قویمام بیری قویسون قدم نیرانیمه
امّت غمینده ایمدیکه چوخ آه و زارون وار حسین
غم ایتمه عفو ایتدیم حسین چوخ اعتبارون وار حسین
هر بیر کسه ایتسن عطا ایت اختیارون وار حسین
محکوم حکم ایتدیم سنه سن حاکم اول رضوانیمه
بو کارگاهیمده اولان وار هر نه بیش و کم سنون
حور و مَلَک، عرض و فلک، حتّی تمام عالم سنون
آب فراتی ایستمه کوثر سنون زمزم سنون
بیرده دیمه اوچ گوندی سو دگموب لب عطشانیمه
ای نور عین فاطمه محبوب حیّ ذوالکرم
بیر لطف قیل ویرّم قسم قارداشون عبّاسه قسم
ایسته شِفا ویرسون خدا هر چاره‌دن بی‌چاره‌ام
دکترلر امّا گورمه سین عاجزلیوب درمانیمه
مرحوم شانی تبریزی
منبع مجموعه کانالهای مدح و مرثیه
موضوع: مناجات ,
زبان شعر و شاعر: نوحه ترکی , شانی
-------------------------------
زبانحال حضرت رقیه (سلام الله)
من نه مدّتدور بابا بیر بیله ساعت آختاروردوم
محضرون درک ایتماقا درکِ سعادت آختاروردوم
گر چه بو طولِ فراقین علتِ اصلین بولوردوم
بلبل مهجوریدیم ، گل وصلینون فصلین بولوردوم
بیر شیرین جاندور بهاسی ، مژدهء وصلین بولوردوم
نقدِ جان الده اودور بیر وقتِ فرصت آختاروردوم
قلبیمی هجرانیله بیجا هم آغوش ایلمزدیم
من سنی ویرانه ده بیر آن فراموش ایلمزدیم
گورمسیدیم گل یوزون ، جامِ اجل نوش ایلمزدیم
سَمّ هجره شَهدِ وصلیله حلاوت آختاروردوم
قلبِ عالَمسن بابا یوخ حاجتِ شرح و تذّکر
تنگ اولور بو وسعتیله فکره میدانِ تفکّر
بلمورم نه دللریله ایلوم اظهارِ تشکّر
شکرینه عاجزدی دل ، تاپدیم او نعمت ، آختاروردوم
دمبدم من بو دَمون سرنقشهء آمال ایدردیم
بلمدیم یوخسا سنون تشریفوه اِجلال ایدردیم
خسته جانون آبله پائیله استقبال ایدردیم
چوخ مُشَرَّف قیلموسان ، بیله شرافت آختاروردوم
قرخ گجه گوندوز بابا ، قرخ منزلی چکمشدیم هو حق
اهلِ ذکر ایچره منه لطف ایتدی پاداشِ نِکو حق
اهلِ ذکر ایچره منه ویردی عجب بیر آبرو حق
بیله بیر جاه و جلالت ، بیله عزت آختاروردوم
کربلادن شامه چکمشدیم بابا بیر چوخ مَشَقَّت
آج سوسوز یورقون پیاده ، ایلمشدیم مَشیه طاقت
جمله سینه واقعا" ایمدی عوض اولدی بو ساعت
چون همین بو ساعتی ، بیر طولِ مدّت آختاروردوم
مقدمون ویرانه نی ایلوب برابر گلشنیله
تازه دن تشریف آپارما ، کسمه اوز لطفون منیله
بیر دویونجا بو گجه قوی دردِ دل ایلوم سنیله
دردِ دل ایتماقلیقا چوخدان فراغت آختاروردوم
دوزموشم گوز یاشیمی اَنجُم کیمی رخسارِ ماهه
دُر نثار ایتسون گرک شهزاده لر دامانِ شاهه
نچه مدّتدی باخاردی گوزلریم حسرتله راهه
دُر نثار ایتماقه من بیر موقعیّت آختاروردوم
هر کیمون گلسه سفردن بیر چوخ ایستکلی قوناقی
شاد اولور قلبِ ملولی ، دلده آرتار اشتیاقی
منزلین ایلر مُزیّن ، فرش ایدر عالی اتاقی
منده بو تشریفوه زیبنده زینت آختاروردوم
شوقدن آغلار بیله شدّتله چشمِ اشگریزیم
چون اوزاق یولدان گلوبدور سنکیمی مهمان عزیزیم
آندورار اوز ذوقیمی بو گفتگوی عشق خیزیم
اِقتضای وقت و اثباتِ محبت آختاروردوم
اوز وقار و (شأنوی) سن ایمدیکه قویدون کناره
خوش دگل اما قوری یر ، مَسند اولسون شهریاره
ویر اجازه زلفیمی فرش ایلیوم اگلش دوباره
یوخ یولوم نیلوم دوتوم شاهانه زینت آختاروردوم
گونده اوچ ساعت منه تأثیر ایدر چرخین جفاسی
واردی بو اوچ ساعتین عالَمجه الحق ماجراسی
تا مؤذّن سسلنر یاده دوشر اکبر صداسی
سسلرم آه ای گوگل ، من بیله حسرت آختاروردوم
روز و شب عمّم منی اوز لطفینه شامل ایدردی
دردیمی دلدن آلوب ، اندوهیمی زائل ایدردی
شمرِ دون قمچی ویراندا قولارین حائل ایدردی
چون گورردی بی معینم ، استعانت آختاروردوم
بَدوِ ایّامِ طفولیّتدن ای شاهِ ولایت
نظمِ اشعاره واریمدی شوق و ذوقِ بی نهایت
لیک بولمزدیم اوزومده من بو نوعی قابلیّت
دائما" (شأنی) کیمی من قابلیّت آختاروردوم.
مرحوم شانی
منبع مجموعه کانالهای مدح و مرثیه
موضوع: حضرت رقیه (س) زبانحال ,
زبان شعر و شاعر: نوحه ترکی , شانی
-------------------------------
احوالات اربعین
شامدن گلدیم خدایه شکر اولا قارداش حسین
قسمتیم اولدی دوباره کربلا قارداش حسین
واردی دنیاده مگر بوندان گوزل بیر آرزو
باجی قارداش قبرینه اشگیله ویرسون شستشو
دویمارام قبروندن اصلا مدفن روحیمدی بو
قبریوه اولسون قوری جانیم فدا قارداش حسین
هاردا وار باغ جناندا بیله عالی منظره
بوطه گل تک اوشاخلار صف چکوبله یکسره
یوزلرین هر چند سیلی دوندروب نیلوفره
وار ولی ذاتی طراوت مطلقا قارداش حسین
ای ویرن ذوق کمالیله تمیز خوب و زشت
گور بو قبرین عطری خوشدور ، یا گلستان بهشت؟
فرش ایدوب زلفین بو قبره بیر نچه حوری سرشت
سایه طوبادی گویا برملا قارداش حسین
اولما رنجیده گیدنده کربلادن شامه من
سن اوزون گوردون امان ویرمردی اشرار زمن
یوخسا قویمازدیم سنی توپراقلار اوسته بی کفن
گون اوگنده جسمده سانسیز یارا قارداش حسین
سن ایکی دریا یانندا تشنه لب اولدون قتیل
منده قیلام قبرون اوسته گوز یاشین سو تک سبیل
ایلرم جاری فرات اوستنده نهر سلسبیل
تا فرات و شط غمدن قان اولا قارداش حسین
ایندیکه یوخ فوج دشمن ، قبریوه قربان اولوم
دولمیوب نامحرمیله سربسر صاق و صولوم
ویر اجازه قبرون اوسته باش آچوم بیر ساچ یولوم
آغلیام ویرمزدی مهلت اشقیا قارداش حسین
کوفه ده ایستردیم اول بولمسونله من کیمم
اولمادی ممکن ، بولوندی زینبم زهرا شیم
من نجه یاندیم؟ نجه بیر حالته قالدیم او دم؟
نه بیلور بیگانه ، آنلار آشنا قارداش حسین
ایستدیم حق اوسته مقهور اولماقیم اولسون ثبوت
آتشین بیر نطقیله ویردیم او دم امر سکوت
باشلادیم بیر خطبه دلده نام حی لایموت
کوفه ده یاد اولدی نطق مرتضی قارداش حسین
سنده گوردون غم هجوم آور اولوب از بس منه
اودلی سوزلر دلده یاندیم ، یانمادی بیر کس منه
آیه کهفیله ویردون نوک نی دن سس منه
نخل طور اولدی منه نوک جدا قارداش حسین
هیچ یادیمدان چخمیوب چخماز بو مطلب روز و شب
گوردی اطفالون پریشان کوفیان بی ادب
غفلتا ویردی بیر عورت بیر قیزا نان و رطب
وردی کلثومه خبر امر قضا قارداش حسین
قارداشی عباس تک غیظ تمامیله ازل
بو اسفلی حاله باخدی حیرتیله ماحصل
ورمیون سویلوب بالالار نان و خرمایه سیز ال
گور نه گونلر گوردی آل مصطفی قارداش حسین
شرحه گلمز مجلس ابن زیادین محنتی
بو قدر وار مایه خجلتدی ذکر صحبتی
وار یادوندا منده گوردون تا او پوزقون حالتی
گوزلرون یومدون گوزیمده ای ضیا قارداش حسین
بیر گجه یولدا قوناخ گیتدی کلیسایه باشون
گویدن عیسانی گتوردی دیر ترسایه باشون
ویردی بیر توضیح نسخ دین عیسایه باشون
راهبه اولدی بو یولدا رهنما قارداش حسین
شامده چوخ کوچه و بازاری گزدوخ هر طرف
وای یهودی کوچه سندن صبریمی ایتدی تلف
غرفه و بامه کلیمیلر دوزولدی صف به صف
ایله بیر کوچه هارا زینب هارا؟ قارداش حسین
بی سبب سجاد ایتمز داد ظلم شامدن
انتقام آلدی یهودی ملتی اسلامدن
توکدیلر بی شرم رولر اودلی نی لر بامیدن
اود دوتوب عمامه زین العبا قارداش حسین
گر دئسم قوردی یزید بی حیا بزم طرب
خدمتونده چوخ جسارتدور اولور ترک ادب
باخ حیایه ، اوچ امامون محضرینده بی سبب
باشلادی بی دین کلام ناسزا قارداش حسین
چوخ سوال ایتدی اوشاقلاردان یزید بی حجاب
بیر قیزون اما او شومه ویردی بیر کافی جواب
ایله مجلسده بیر قیز بیر شهی ایتسون مجاب
وار یقین بو ایشده بیر سر خدا قارداش حسین
آدینی قویموشدی ظالم پیشوای مسلمین
خلقه اولموشدی پیغمبر مسندنده جانشین
نهی ایدوب پیغمبر امرین نه بولوب مذهب نه دین
نه اوتاندی نه ایدوب حقدن حیا قارداش حسین
ایستدی اشیاخ بدره سندن آلسون انتقام
ال آپاردی خیزرانه دلده نالایق کلام
گوزلرین یومدی سکینه سس چکوب قزلار تمام
گتدی درده عترتون بو ماجرا قارداش حسین
باجی قارداشلقدی نیلیوم گور اولور الفت کسم
یوخسا گلموردی یوزوم گلماقه ، وار حقیم دئسم
خجلتیم چوخدور بو توزلی قبریوه اولسون قسم
ئولدی یولاردا نچه خوردا بالا قارداش حسین
بیر قیزون اما خرابه شامده شام و سحر
آتشین آهیله یانمش قلبیمه سالدی شرر
شام اولاندا هر گجه آلدی سنی مندن خبر
نه دییدیم ایله وقته من اونا قارداش حسین
گورمیوب دنیا گوزی ایله ادبلی بیر اوشاق
گزلدوردی آجلقین ایلردی اظهار فراق
طاقت کلثومی اما بیر گجه ایتمشدی طاق
نه دیمشدی من اونی بولدوم صورا قارداش حسین
بیر گجه چرخ صبایادن باتوب بیر اولدوزون
غصه می ایلوب نجوم چرخ اطلسدن فزون
وای منه ویرانه یرده ئولدی بیر نازلی قیزون
چوخ موثر ویردی جان اول مه لقا قارداش حسین
بیر نفر یوسف آدنلی سید عالی نسب
هم بیزه اولاد هم صاحب عزادور روز و شب
اوچ مریضه بش نمازنده شفا ایلر طلب
قلبنی سیندیرما لطفاً ویر شفا قارداش حسین
بیرده بیر عهد ایلیوبدی (شانیمیز) (خوش خوانیله)
ایستوری ویرسون او عهدی باشه سالم جانیله
ویر شفا ایسته تمامی آرزومندانیله
قبریوه گلسون سنه دوتسون عزا قارداش حسین
مرحوم شانی
منبع مجموعه کانالهای مدح و مرثیه
موضوع: احوالات اربعین ,
زبان شعر و شاعر: نوحه ترکی , شانی
-------------------------------
غارت خیام
یادیمه دوشدی گینه بیر ماجرای جانگداز
یتدی قلب ِداغداره تازه دن سوز و گداز
دلده سوز چوخدور و لیکن دلده یارا یوخ سوزه
اولماسا اظهارینه دل یار ، دل مشگل دوزه
عشقیده دلدنده بیر امداد لازمدور گوزه
یانماسا دل گوز یاشی آخماز اولونماز کشفِ راز
اولماسا عشق عالمنده اوزگه بیر مخفی رموز
بو سیزیلتی جمله اعضادن نئجه ائیلر بروز
دیدهٔ فکریمده هر ساعت مجّسمدور هنوز
عالَمِ مجنون و لیلا ، حالِ محمود و ایاز
نه دویار دل ناله دن نه اسگیلور اشکِ بصر
نه اولور محبوبدن لطفاً توجّه مختصر
نه منیم آهیمده واردور قلبِ جانانه اثر
نه اونون هجری گلور صبر دلیمله هم طراز
الغرض صبر اولسا افزون طاقت ایّوبدن
عاقبت اولماز نتیجه طالبه مطلوبدن
اولماسا یعنی توجّه حضرتِ محبوبدن
چاره یوخ دردِ فراقه ، شاهدیمدور چاره ساز
مسئله آساندی سالما اوز اوزون چوخ مشگله
ناقهٔ فکری آپارما دشتِ پُرآب و گله
گورمسه گوز مقصدی یوخ قلبدن جای گله
یعنی چشمِ دل گرک اولسون رخ ِجانانه باز
هر نظرده جلوه لنمز عارضِ ماهِ حسین
قلبیمه آگهدی بوللم قلبِ آگاهِ حسین
صبر ایوین تاراج ایدر تاراجِ خرگاهِ حسین
وار او اودلانموش چادرلاردان بو دلده سوز و ساز
آه او ساعتدن جلوریز اشقیای شامِ شوم
ایتدیلر سمتِ خیام ِآلِ اطهاره هجوم
من دیمم نه وضعیله اما یازار اهل ِعلوم
نیزه لر الده ایدوب اعرابِ وحشی ترک تاز
شرحیله اوضاعِ غارت اولمیوب اولماز ادا
آتلی لار آت اودینادوردی دشتی دوتموشدی صدا
بیر بولور زهرا نشانی بیرده عالِمدور خدا
واردی اشرار ِشریر شامده نه حرص و آز
خامه عاجز دور او حالین شرحین ایتسین آه آه
آت دوشُنده چوللره سالمشدی اطفالی سپاه
سن تصوّر ائت او اوضاعی نه لازمدور گواه
گور نولی حالی اولا صَعوه اسیرِ شاهباز
آشیانی اودلانان قوش تک اوشاقلار بالتّمام
بیر بیرینون سایه سینده دالدالانمشدی تمام
ظلمیله بال و پری مکسور بیر دسته حمام
گوئیا اولموشدی نخجیرِ ستم صیدِ گراز
بیر بالا قیز یوز قویوب صحرایه چون صیدِ حرم
رحم سیز صیّاد الیندن گوئیا ایلوبدی رم
بیر یانا امّا قاچانماز بانوانِ محترم
اودلانان خرگاهی مسکن فرض ایدیر ناچار باز
حالی اطفالین مجسمدورگوزومده تک به تک
بعضینون اعضاسی تترر قورخودان گُلبرگ تک
بعضی جویای نجفدور چون گورر یوخدور کمک
گور نجف شاهی یانار بو حاله آغلار آغلاماز؟
بیر طرف دشمن سسی بیر یاندا شورِ انقلاب
بیر طرف اود شعله سی بیر یاندا سوز ِآفتاب
غصّه دن یانمیش جگر ، سوزِ عطشدن دلکباب
صیحه دن دوتقون صدا غمدن گره لنموش بوغاز
پردهٔ عصمتده بسلنمیش بیر اطفالِ عزیز
گور قالور نه حاله اصلا گورمیوب جنگ و گریز
ایله بیر هنگامه اولدی ایله شور ِرستخیز
قومیله بیگانیه اولمازدی ویرماق امتیاز
مطلبی آنلار او کس که اهلی اولسا مطلبین
قالدی غارتده نه حاله دخترانِ مه جبین
بولدی بیر زینب ولی حالین جنابِ زینبین
خالقِ عالَم بولور بیرده شهنشاهِ حجاز
ایستدی اوز خدمتین اتمام ایده قارداشینه
جمع ایدوب چولدن قاچان اطفالی یغدی باشینه
ال چکوب لطفیله بیر بیر زلفینه گوز قاشنه
نازینی چکدی نجه که دائماً چکمیشدی ناز
بیر به بیر سایدی بناتی گوردی یوخدور بیر عروس
بیر بیره حسرت الین وررُدی چکوب آه و فسوس
داد ظلموندن سنون ، آه ای سپهرِ آبنوس
کینه دن دویماز بو چرخ ِکینه ساز و حقّه باز
شرحینه مانع اولور شرمِ امامِ ممتحن
ایتمیوب شرم ائیلدی بیر ظلم بو چرخِ کهن
لیک لازمدور بیان ِمجملیله بو محن
ذکر اولا ، چون حضرت صادق ئوزی ائیلوب مجاز
قان دولان دشتی گزوب حالِ خروش و جوشده
عمّه سی تاپدی اونی ضعف عالمنده هوشده
قانی زلفوندن آخور ، یوخ گوشواره گوشده
آلدی دیز اوسته باشین علیا جنابِ دل نواز
تاپمادی سو چشمهٔ چشمین عذاره باغلادی
هوشه گتدی مجتبا قلبین دوباره داغلادی
عمّه توکدی گوز یاشی ، قارداش بالاسی آغلادی
گوردی باشدا معجری یوخ ایلدی ابرازِ راز
عمه جان دورما گورورسن دور برده وار رجال
تیز تدارک ایله بیر معجر منیم باشیمه سال
سویلدی یوخ منده ده معجر آلوب قومِ ضلال
آغلاما چوخ قلبمی یاندیرما ساکت اول بیر آز
من دیمم غارت گونی اولدی حقارت زینبه
ظلم الین آچدی ایدوب بیر کس جسارت زینبه
اولدی امّا مین قیامت بیر او غارت زینبه
شرح ویرسم مطلبه سوز چوخ تاپار طول دراز
اوزگه بیر هنگامه اولدی شوریله باشین آچان
هولیله صحرایه بیر باش اللری باشدا قاچان
بیر بالا سویلر عموم یارب گلور آیا هاچان
بیر بالا شه انتظارینده قاباقدا جانماز
شه نمازندن صورا هر گونده بو شهزاده نی
همدم ایلردی اوزونه نازیله آزاده نی
گونده کی حالیله سالمیشدی یره سجّاده نی
نولدی سویلردی نمازه گلمدی رکنِ نماز
سنده بو محنتده قان آغلا ایا صاحب زمان
داخل اولدی خیمیه شمرِ ستمگر ناگهان
نحس الینده بیر کسوک باشدان آخاردی تازه قان
یعنی آندیردی بابان قانیله آلدی دستماز
ذکر اولوب از بس بو سوزلر هی منابرده کرار
خلق ایچینده عادی بیر سوز فرض اولورافسانه وار
بو نه سوزدی خیمه لر اودلاندی اود چکدی شرار
قالدی بیمار اوردا ایتدی حقیله راز و نیاز
حشره دین سونمز دلِ اهل محبتدّن او نار
قلب ِزهراده او اوددان ایمدیده واراستنار
ایلدی بیماری اوددان زینب کبرا کنار
دینه امداد ایلیوب اسلامی ایتدی سرفراز
نقل ایدر راوی که گوردوم بیر قیزین دامانینی
اود دوتوب بولمور اوزی یاددان چخار دوب جانینی
ایتما قاخاموش او طفلین آتشِ سوزانینی
من آتا مهمیز گوستردیم او ایتدی احتراز
احتراز : دوری کردن ، فرار کردن
گوردی آز قالدیم یتم بولموردی چون آهنگیمی
دوردی ناچار بولوب مأمن رکاب خنگیمی
بیرسلام ایتدی گتوردی رحمه قلب سنگیمی
آتشین آهیله آهن قلبیمه سالدی گداز
دامنین خاموش ایتدیم ورمادیم اینجتمدیم
مهربانلوق گوردی باخدی حسرتیله اول یتیم
آنلادیم وار دردی اظهار ایلینمور من دیدیم
هر نه وار دردون دئ قوخما باخما چون اهلِ نیاز
رمزیله اول نازدانه ایتدی اظهار ِعطش
دفعتاً سو حاضر ایتدیم ، ایچمدی اول ماه وش
سویلدی بو خیمه گهده بیر باجیم ایتمشدی غش
تا سوسوزدور او سویی من نفسیمه بولمم جواز
گر چه سولموشدی یوزی پژمرده وَردِ یاس تک
بیر وفا امّا نشان ویردی شجاعِ ناس تک
اولمادی سیراب عموسی حضرتِ عباس تک
بو وفائیله بودا تاپدی بیر عالی امتیاز
آه او ساعتدن که تاپدی امرِ غارت خاتمه
دستگیر ِاشقیا اولدی بناتِ فاطمه
یوخ بیر اوزگه شاهدیم بو مطلبه اثباتیمه
لیک حاضر اولدی امّا نچه ناقه ، بی جهاز
چوخ بیوکدور چون مقامِ زینب علیا جناب
آشکار اولمازدی شأنی عالمه چون آفتاب
کوفیه وارد اولان ساعتده بو عصمت مآب
ائتمیدی شه باشی نوک جداده پیشواز
بولدی شهزاده گلور شه چخدی استقبالینه
لطفِ شه شهزاده نون تغییر ویردی حالینه
تا ساتاشدی گوزلری شاهون جمال آلینه
بولدوروب خلقه ندور اصلِ حقیقت یا مجاز
گوردی قانی ابر تک حایلدی بدر ِکامله
اولمادی ممکن او قانی شه جمالندن سیله
اوزلقندان چیخدی باشین چالدی چوبِ محمله
دوزدی بولمز اوز اوزون عشق عالمنده عشقباز
کوفه نه کوفه نه بازار و نجه بیر رهگذار
تنگ ایدوب راهِ عبوری ، جمع خلق انتظار
ناقه ده نی تک سئیزیلدار آغلاشور اطفالِ زار
دولدوروب مُلک ِعراقی نغمهء شور و حجاز
گئچمرم اندازه دن چوخ ایتمرم واضح بیان
محنت ِکوفه ایدوب کلثومی امّا باغریقان
نان و خرمانی اوشاقلاردان آلوب سویلوب عیان
حق تصدّقدن ایدوب بیز اهلبیتی بی نیاز
تنگ اولوب گوگلون ایدوب سن (شأنیا) یادِ وطن
صبریوی الدن آوبدور ذوق ِاستادِ وطن
یعنی (سعدیّ زمان ) اول فخرِ افرادِ وطن
سنده فخر ائت سوز یازاندا اوّل آغلا ساده یاز
یادیمه دوشدوقجا جور ِشمرِ شوم و زجرِ زجر
روحیمه واللهی معناده ویرر اول زجر ، زجر
باعثی بو نوحه نون البّته ایستر اجر اجر
یادیمه دوشدی گینه بیر ماجرای جان گداز.
مرحوم شانی تبریزی
منبع مجموعه کانالهای مدح و مرثیه
موضوع: احوالات غارت خیام ,
زبان شعر و شاعر: نوحه ترکی , شانی
-------------------------------
خطبه حضرت زینب(سلام الله)
خطبه زینب به کوفه من نمی دانم چه کرد
یافت نظم سلطنت اما که در شام اختلال
وه چه خطبه چه تکلم وه چه نطق آتشین
داشت دخت شاه مردان نطق و گفتار رجال
گفت راوی من گمان کردم علی گوید سخن
عقل هی زد این بود دخت ولی لایزال
حیرتم افزوده شد گفتم به خود یاللعجب
داغ دیده یک اسیره این چمین نطق و مقال
چون سر سلطان دین در نیزه اشرار دید
خواهرش دارد به تبلیغات احکام اشتغال
خواست حرف خواهرش را بیشتر باشد اثر
آیه قران تلاوت کرد شاه خوش خصال
تا صدای شه به گوش زینب کبری رسید
گفت ای زینب فدای این جمال این خط و خال
خوش بخوان قران مرام خود به عالم فاش کن
داده ام من امر ساکت نیست داد و قیل و قال
دست من کوتاه اما نیزه اعدا بلند
خاک و خون را پاک کردن کی توانم زان جمال
کوفیان بی بصیرت نان و خرما می دهند
بر یتیمان پیمبر زین سخن (شانی)بنال
مرحوم شانی
منبع مجموعه کانالهای مدح و مرثیه
موضوع: حضرت زینب کبری (س) احوالات ,
زبان شعر و شاعر: نوحه فارسی , شانی
-------------------------------
زبانحال حضرت لیلا (سلام الله)
شام هجرانیم خدا نصف اولدی ماهیم گلمدی
رزمگهدن اکبر آهو نگاریم گلمدی
بوینینا گرچه کفن سالدیم رضایتله اوزوم
اوغلومی میدانه گوندردوم قالوب یولدا گوزوم
یا یتور بیرده بالامی صاغ گوروم یا ویر دوزوم
دادیمه سن یت الهی دادخواهیم گلمدی
مایلم بیرده جمال عالم آراسین گورم
دوشمه مش تپراقه سروقد بالاسین گورم
قان خسوفه سالمامیش بیر ماه سیماسین گورم
قامتیم غمدن هلاله دوندی ماهیم گلمدی
راضیم هرچند کوی عشقده اولسون شهید
ایسترم گلسون اُلنجه بیرده ایلوم بازدید
هیچ کیمون یارب امیدین ایلمه سن ناامید
قالدی میداندا گوزوم امیدگاهیم گلمدی
قانلی میدانه او وقتدن کیم بالام اکبرگیدوب
اولموری آرام قلبیم طاقتیم یکسر گیدوب
قالمیوب روحیم بدنده اکبریله همره گیدوب
گلسه روحیمده گلور عادل گواهیم گلمدی
دولدوروب دشت عراقی شوریله غوغا سسی
اوج ایدوب افلاکه لشگر نعره سی آت شیحه سی
سن اوزون تشویشدن قورتار خدا بو بیکسی
بی پناهم بی کسم پشت پناهیم گلمدی
بیله بیر غوغادن آیا ایلمز اندیشه دل
قانه دونمز گوزدن آخماز صبری ایلر پیشه دل
سسلنور تیز ألدورون لشگر دوشور تشویشه دل
ملک دلده خیل صبره سر سپاهیم گلمدی
بو سببدندور که سوز آهیم افلاکه چخار
هرکیمون اُلسه جوان اوغلی اولور دنیاده خوار
چون آنالار اوز جوان اوغلیله ایلر افتخار
افتخاریم اعتباریم عزّ و جاهیم گلمدی
هجر اودیله اودلانوب دل آهیم آتشبار اولوب
شعله آهلمه خرگه مطلع انوار اولوب
گوزلریم میدانه باخماقدان خدایا تار اولوب
بخت و روزیم تک گوزی زلفی سیاهیم گلمدی
بیر بالام الدن گیدوب مین دل اونون پا بسته سی
بیر امامتدن صورا هر منصبون شایسته سی
اولما دوشدی چنگ گلیچنه او بیر گلدسته سی
باغ عمریمده گویرمیش گل گیاهیم گلمدی
اوندا که عزم ایلدی اوغلوم اُلوم میداننه
شوقیله اوز جاننی ایتسون فدا جاناننه
حسرتیله بیر قدر باخدیم ره رخشاننه
دوتمادی دل سهلدور دلدنده آهیم گلمدی
گلسه دعوادن بالام یعنی امان ویرسه سپاه
اشکیله سیللم اگر دوتسا جمالین گرد راه
بولمورم نه وار باشیندا حال دل اولدی تباه
صبریمون غارتگری طاقا تباهیم گلمدی
انتظارنده نه تک آغلار آناسی خیمه ده
گوز تیکوب میدانه جمله اقرباسی خیمه ده
دشمنی چوخدور قالوب یالقوز آتاسی خیمه ده
شاهزاده انتظاری قالدی شاهیم گلمدی
گتدی یثربدن بورا شوق علی اکبر منی
محمله میندیردی هر یرده او مه پیکر منی
گر اسیر ایلوب آپارسا شامه بو لشگر منی
بس منه کیم رهنما دور شاهراهیم گلمدی
اوندا که اهل ریاضت جمع اولور دم خانیه
بیر تبرزین تک گلور الده گُمانیم خامه یه
وه نه عالی بیر شرف دور شاه درویشان دیه
هاردادور «شأنی»مرید خانقاهیم گلمدی
مرحوم شانی
منبع مجموعه کانالهای مدح و مرثیه
موضوع: حضرت لیلا (س) ,
زبان شعر و شاعر: نوحه ترکی , شانی
-------------------------------
زبانحال حضرت فاطمه صغری (س)
در خروج از مدینه
ایتمیسن قارداش علی مندن عیادت سن اگر
لطفوه قربان ندن بس گیمیسن رختِ سفر؟
من بیله بیر ساعتی هر ساعت و هر روز و شب
سجده ده حالِ دعاده حقدن ایلردیم طلب
وصلوی لطف ایتدی حق ، هجرانه نه اولدی سبب
آیریلیخ طرحین چکوبدور یوخسا نقاشِ قدَر
سن اولان یرده ملال اولماز بونا یوخدور سوزوم
شوقدن آغلار اودور وجهی بو شدّتله گوزوم
آغلادور وصلون منی ، گور هجره ممکندور دوزوم
هانسی باجی من کیمی قارداش فراقنده دوزر؟
اولموشام گر چه نه مدّتدور مریض و بستری
لیک لازم دور دوروم ایمدی یغوم بو بستری
اولماسون قلبون ملول ای صبحِ عزّت اختزی
یتمه سون بلکه صفالی گوگلوه گَردِ کدر
یاتماقیم ترکِ ادبدور یوخ بونا جای کلام
لیک قالموب قدرتیم ای مظهرِ خیرُالاَنام
تا دوریدیم خدمتونده ایلیدیم بیر قیام
باجی قارداش خدمتیله افتخار ایتمز مگر؟
هر قدر ناز اولسا سنده منده وار آرتوخ نیاز
بولمدیم بو لطفِ محضون ای خدیوِ دلنواز
خسته جانیله سنی یوخسا ایدردیم پیشواز
سو سپردیم اشکیله یاتسون غبارِ رهگذر
اشگِ چشممدن ملول اولما عزیزیم وجهی وار
دوزموشم زَر فام عذاره دُرّ تک اشکِ شاهوار
مقدمِ شهزادیه لازمدی اولسون دُر نثار
اشکدن آرتوخدی آیا هانسی بیر دُرّ و گهر؟
بیرده بو رنج و مرضدن ایتمرم اصلا گِله
نیلورم ، حاذق طبیبه احتاجیم یوخ گیله
سن که گَلدون گِتدی دردیم ، گَلدی بهبودی اله
دردیم ئولدورمز منی ، قالسان یانیمدا سن اگر
من بو لطفه او گلَن یولاریوا قربان اولوم
گَل رضا اولما دچارِ محنتِ هجران اولوم
گیتمه قال ، تا خدمتونده هر زمان هر آن اولوم
ناخوش اولسامدا گینه سن اولسان عمریم خوش گچر
من بو فکریله علی دلتنگیدیم لیل و نهار
اهلِ بیت ایچره آناسیزلیق منی ایلیوبدی خار
نه باجی ایلر عیادت ، نه گلوب قارداش باخار
نه اولور جویا عمولار ، نه گلر بیر عمّه لر
ایمدی بولدوم ایتموشم بو باره ده من اشتباه
اولمیوب کم لطف لیخ سیزدن ولو بیر پرّ کاه
کسمیوب مندن توجّه ، اقربا شهزاده شاه
یانیمه بیر بیر گلور قوم و قبیلم سر به سر
ای قدی سروِ چمن ، زلفی سمن ، رخساری گُل
مظهرِ ختمِ رُسُل ، صورت نمای عقلِ کلّ
محضرِ شاهه شرفیاب اولماقیم ممکن دگل
التقات ایلر منه امّا او دیداره گلر
رنگِ آلیمدن مُبرهَندی اگر چه حالتیم
گلسه شه دیداریمه آرتار و لیکن خجلتیم
شه قباقینده قیامِ خدمته یوخ قدرتیم
خدمتِ شاهی دوتوم شهزاده قیزلار چوخ سُوَر
حسّ ایدنمز هر قدر اولسون بشر فکری دقیق
شخصِ بیمارون نه اندازه اولور قلبی رقیق
هر طریقیله اولا ، توفیقِ حق اولسا رفیق
(شأنی) صغرادن شفا آلماخ یولین یاخشی بولر
منکه چوخ سعی ایتمیشم بو نوحه اولسون دلنشین
نا امید ایتمز منی صغرا ، علی اکبر یقین
دردیمه بولّم ویرور قطعی شفا جان آفرین
اوندا وار چشمِ امیدیم منده یوخ اوزگه نظر
دوزدی درد و غم ِمصیبت ، شخصی ایلر نیک بخت
اجر اولور آرتوخ نه اندازه مصیبت اولسا سخت
خشک اولور چون شاخ و برگِ میوه دن عاری درخت
قورخورام تیغِ اجل ایتسون منی بی شاخ و بر
سگّز آیدی درد الیندن گولمیوب بیر آن یوزوم
سهلدور گولموب یوزوم ، آغلار گجه گوندوز گوزوم
ائل سوزین نیلوم؟ دوتوم وار زحمتِ درده دوزوم
ائل سوزی نیلر؟ اونی کیمدن سوروشماخ؟ کیم بولر؟
مرحوم شانی
منبع مجموعه کانالهای مدح و مرثیه
موضوع: احوالات خروج از مدینه , حضرت فاطمه صغری (س) ,
زبان شعر و شاعر: نوحه ترکی , شانی
-------------------------------
مناجات و احوالات حبیب ابن مظاهر (علیه السلام) و احوالات حضرت ابوالفضل (علیه السلام)
ای خداوند رئوف و مهربان
طایر پربسته ام بی آشیان
ای اولان آگه رموز غیبدن
وی منزّه ذاتی هر بیر عیبدن
ائتمرم شِکوه بلای عشقدن
خوشدلم بو ابتلای عشقدن
بُلموشم گَلمَز اله بی رنج گنج
خوش گلور عشق اهلینه رنج و شکنج
نچه مدتدور ولیکن بو مرض
صبری بی طاقتلیقا ایلوب عوض
ضعفلی جانیله بو قوّتلی درد
امر مشکلدور که اولسون هم نبرد
کئچدی اوچ ایل دورت ایله بیرآز قالوب
جانیمی بو رنج طاقتدن سالوب
خوش دگول گرچه مصیبتدن گِله
دوشدی امّا ناقۀ صبریم گِله
تنگ اولوب گوزده بو وسعتلی جهان
برق آهیم آز قالور اولسون جهان
سن بولورسن نه موثردور دِله
بعضی سوزلر وار اولار گلمز دِله
شاهبازون دوشسه گر بال و پری
سهلدور صَعوِه اولار پشّه جری
جانیمی هر قدر درد ایلر ضعیف
بو مسلّم دور تاپار قوت حریف
حمد اولا قلبیمده وار ذوق و صفا
ایسترم منده اودور سندن شفا
باخبرسن واردی نچه حاجتیم
بیر به بیر اظهارینه وار خجلتیم
ایلرم اما بیرین واضح بیان
تا دئسون آمین آمین شیعیان
یوخدی قلبیمده منیم اوزگه غرض
صبریمی تالانه وئردی بو مرض
رحم قیل اطفال رنگ زردیمه
سن دوا ایله دواسیز دردیمه
من سنی ویرّم قسم پیغمبره
اون بیر اوغلیله جناب حیدره
هر مریضون دردینه ایله دوا
مومنینون حاجتین ایله روا
هر قدر تنگ اولسا بو دنیا منه
یوخ علاجیم منده یالوارّام سنه
بو مرضدن من اگر تاپسام شفا
وار گمان چوخ قلبلر تاپسون صفا
سن منه لطف ائتمیسن شیرین زبان
ایلیوبسن اهل ذوقه مهربان
بیر فصاحت وئرمیسن گفتاریمه
خلقی مایل ائتمیسن اشعاریمه
یوخ اوزومدن بیر زادیم هیچم اوزوم
هر زادیم سندندی شیریندور سوزوم
یوز مین ایل عمریم اولا مین مین دلیم
شکر ائدم اولماز گئنه کامِ دلیم
ذرّه ام کیم درک ائدر آیا منی
قطره ام لطفون ائدوب دریا منی
سن وئروبسن قدرت نظم و سخن
نظمه عاشقدی منصف اهل فن
اولماز اولماز اوملماسا سندن مدد
مدعی بیجا یره ایلر حَسَد
اولموشام منکه پناهنده سنه
سنده توفیقون رفیق ایله منه
گئتمسون بلکه هدر بو زحمتیم
هر عملده خالص اولسون نیّتیم
چوخ عطا قیل عمر کامیمجه قالوم
تا حسینون خدمتیندن کام آلوم
قویسا بو چرخ جفا جو کیم قویار
بو گوزل خدمتدن آیا کیم دویار
کیم دیر خدمت بولر افسانه دور
اهل ذوقه منصب شاهانه دور
گوردی رؤیاده حبیبی بیر نفر
عرض ایدوب اول مؤمن نیکو سیَر
سن کیمی تاپموب سعادت بر سعید
بو مقامه یتمیوب هئچ بر شهید
زائران قبر شاه تشنه کام
قبریوه ایلر ایکی دفعه سلام
عالی بر توفیقدور دنیاده بو
قالدی قلبونده داخی بیر آرزو؟
تا ائشیتدی بو بیاناتی حبیب
قالمادی قلبینده آرام و شکیب
بو سؤاله ذوق اوزیله اولجناب
ردّ قیلدی عاشقانه بیر جواب
دوزدی اولدی بو سعادت قسمتیم
وار ولی دلده بُیوک بیر حسرتیم
ایلرم دائم بونی من آرزو
بیر نولور ممکن اولیدی کاش بو
تا گلوب دنیاده هرصبح ومسا
ساخلییدیم شاه عطشانه عزا
سس چکیدیم بیر دییدیم وای حسین
وای حسین ایوای حسین ایوای حسین
ایندی که ای خالق کلّ انام
وار عزادار حسینده بو مقام
بیزلره توفیقوی ایله رفیق
سن دِیَن طرزیله نه اوزگه طریق
تا حسینه ناله وفریاد ائداخ
مصطفانی حیدری دلشاد ائداخ
خوش او گوزدن اشکی عشق آلود اولور
فاطمه اوندان یقین خشنود اولور
خوش او گوزدن چشمه تک اشکی آخا
عرش اعلادن اونا زهرا باخا
قیل ترحم بو پریشان حالیمه
سن منی یارب یتور آمالیمه
واردی نئچه حاجتیم ایله روا
دردیمه عباس الیله قیل دوا
گور اولور دنیاده بو بیر درد اولا
راه چاره بولمیه عبّاس اونا
بوندان ایستر چاره سین هر دردمند
هر مریض هر بینوا هر مستمند
آستانندن بو سردار سعید
قویمیوب بیر کیمسه اولسون ناامید
گورموشوخ لطفون مکرّر بر ملا
سهلدور شعیه مسلمان آشنا
درگهینده کامه بیگانه یتوب
ارمنی لر دردی درمانه یتوب
درگهیندن کیمسه مأیوس اولمیوب
یاس حرمانیله مأنوس اولمیوب
بیر بونا مخصوصیدور بو امتیاز
بوندان ایستر حاجتین اهل نیاز
گر ایدم کشف کراماتین بیان
شوکت و جاه مقاماتین بیان
مثنوی مین بیت پایانه یتر
باشدا کی سر رشتۀ مطلب ایتر
ایتمشم تصمیم بو منوالیله
مطلبی شرح ایلیم اجمالیله
بیر نفر عالِم شریعت زیوری
گوردی رویاده بتول اطهری
لیک مُغرِضدور او کسدن فاطمه
دوشدی قلبی خوفه ائتدی واهمه
توکدی رخساره گوزوندن اشک آل
ایلدی بو نکته نون سرّین سؤال
فاطمه سویلوب که غفلت ایلوسن
اوغلومی سن آز زیارت ایلوسن
عرض ائدوب حاشا جسارت ایلرم
من حسینی چوخ زیارت ایلرم
گَتدی لطفین آشکاره فاطمه
ائتدی فرمایش دوباره فاطمه
نه حسین اوغلوم اباالفضل اوغلومی
بحر بخشش معدن بذل اوغلومی
بیرده آیری یرده زهرای بتول
بو وفاداره خطاب ایلر اوغول
اوندا که هنگام رستاخیز اولور
عرصه گاه حشر شیون خیز اولور
گون اَنوب گویدن جهانه اود وورار
باشلار اوسته بیر جدا بویدا دورار
انبیا جوش و خروش ایلر تمام
مغزلر باشلاردا جوش ایلر تمام
آل محشر جمله وانفسا دیر
مصطفا وااُمَّتا امّا دیر
یا اوزی یا ابن عمّی بوتراب
دوندروب زهرایه یوز ایلر خطاب
ای اولان غمخوار امت فاطمه
وار نه اسباب شفاعت فاطمه
عرض ائدر بسدور کفایتدور منه
عمده اسباب شفاعتدور منه
اوغلوم عباسین کسیلمیش اللری
ایلرم بیر اوزگه محشر محشری
بو کسیلمیش اللره جانیم فدا
گوز تیکوب بو اللره شاه و گدا
بیر الون که بو قدر وار قیمتی
خالق عالم یانیندا حرمتی
بس سبب نولدی که عاشورا گونی
اهل بیته محشر کبری گونی
بو بهالی اللره قوم عدو
کربلاده ویرمدی بیر مشک سو
یوخ مصیبت ذکرینه بوردا نظر
مطلبی اهل محلّینده دیر
ایسترم توفیق وئرسون خالقیم
لایق اولسون خدمت نالایقیم
من هارا مدّاحی عباس هارا
صفحۀ دنیا هارا قرطاس هارا
حشر اولونجا کاتب اولسا کائنات
مدح عباسی یازا هیهات هات
بُلموشم عباسی من بو جاهیله
بیر رعیّتلیقدی فرقی شاهیله
یعنی هر خدمت ائدوب دینه امام
بو همان خدمتدی ائتدی اهتمام
اولسا توفیق ایلرم شرح و بیان
بو نه خدمتلر ائدوب دینه عیان
مرحوم شانی تبریزی
منبع مجموعه کانالهای مدح و مرثیه
موضوع: احوالات حبیب ابن مظاهر (ع) ,
زبان شعر و شاعر: نوحه ترکی , شانی
نظرات (۰)
هیچ نظری هنوز ثبت نشده است