متن نوحه ترکی حسین شانی تبریزی بخش سوم

بخش سوم از مجموعه اشعار نوحه ترکی  مرحوم حسین شانی تبریزی در رثای اهلبیت علیهم السلام

-------------------------------

در احوالات حضرت ابوالفضل (ع)

 

شوشتری مرحوم اول نیکو سیر

اوز بیاناتِ شریفنده دیَر

 

قارداشا قارداش دیموب بو مدّتی

چوخ گمانیم وار بو اولسون علّتی

 

فکر ایدردی گر چه حیدر دور آتام

لیک واضحدور دگل زهرا آنام

 

فخر ایدر زهرا حضورنده یقین

بیر کنیز اولسا آنام امّ البنین

 

لایق اولساخ اولّوخ عالمده عزیز

من حسینه قول او زهرایه کنیز

 

اونداکی گتمشدی قول ، دوشموشدی خود

بیر ستمگر گلدی الده بیر عمود

 

بولمورم نولدی اوزی یا مرکبی

کیم گوروب من ذکر ایدم بو مطلبی

 

ناگهان گوردی آچوب زهرا قولون

گل اوغول گوزلر آنان زهرا یولون

 

احمدِ محموده ریحانه بتول

تا ابوالفضله خطاب ایتدی اوغول

 

اولدی مُستَغرَق فَرَح دریاسینه

یتدی قارداش لفظنون معناسینه

 

کوکبِ بختین گوروب تابنده دور

بولدی قارداش سسلسه زیبنده دور

 

سسلدی قارداش حسین امداده گل

داده گل آتدان یخلدیم داده گل...

 

مرحوم استاد شأنی

منبع مجموعه کانالهای مدح و مرثیه

موضوع: حضرت ابوالفضل العباس (ع) احوالات ,
زبان شعر و شاعر: نوحه ترکی , شانی

-------------------------------

زبانحال حضرت امام حسین (علیه السلام) در بالین حضرت ابوالفضل (علیه السلام)

 

دین اسلام عالمنده سن بو گون الحق ابوالفضل

گلستان دینه ویردون قانیله رونق ابوالفضل

 

جدیمین دینی بو گون تاپدی ایله رونق الونده

بولدی عالم، وار بو دینون رونقی مطلق الونده

تا اسردی قدرتوندن برملا بیرق الونده

قورخودان یاتمازدی راحت خولی و ارزق ابوالفضل

 

دوشدی بیر بیرق الوندن، مین یاتان بیرق اوجالدی

مقصده یتدی قوشون، اهل عداوت کامین آلدی

های و هوی اهل کوفه، اهل بیتی خوفه سالدی

بیرده آسوده یاتانماز عترتیم مطلق ابوالفضل

 

عالم کل علومم، واقف اسرار مبهم

کاشف کل رموزم، هر نهان بیر علمه اعلم

من او عالمدن بولوردوم وار بو گون بیر بئله عالم

زینبیم اما اوزوندن چخسا وار ذیحق ابوالفضل

 

غرق ایدر بو حالتون عالملری بحر ملاله

اولمادی سو، دوندی اشکون چشمه ماء زلاله

سو کنارنده سنون جسمون باتوب قانه چو لاله

زینبین ده قولاری سنسیز اولار زنبق ابوالفضل

 

تا علم دوشموب یره، لشگر قیتمز رزمگهدن

بیر علمداری دوتار سلطان مقدم بیر سپهدن

یاتسا بیرق گورسنور مطلق شکست آثاری شهدن

بیرده سنسیز کیم باشیم اوسته آچار بیرق ابوالفضل

 

داغ بر دلدور زبس سندن بو گون کفار کوفه

قورخورام بیردن توکولسون خیمیه اشرار کوفه

ئولدورب سرداری، مقصوده یتوب سردار کوفه

حقیمی انکار ایدوب بو فرقه ناحق ابوالفضل

 

چکمه خجلت، آچگوزون قالموبدی طاقت منده قارداش

شرمسیز دشمن سنی ایتدی بئله شرمنده قارداش

دوزمرم هجرانوه گلم دالونجا منده قارداش

قویمارام یالقوز سنی اولام سنه ملحق ابوالفضل

 

ایسی گون، یورقون بدن، سوز عطش، رنج جراحت

یاتمامشدون سن علاوه بو گجه بیر لحظه راحت

قورخودان گلمز قوشون وار فرصت، ایله استراحت

قان حریریندن دوشنموش فرش استبرق ابوالفضل

 

مرحوم استاد حسین شانی

منبع مجموعه کانالهای مدح و مرثیه

موضوع: حضرت ابوالفضل العباس (ع) زبانحال ,
زبان شعر و شاعر: نوحه ترکی , شانی

-------------------------------

شهادت حضرت موسی بن جعفر (ع) و گریز به قتلگاه

 

یاتما آسوده نجفده ای ولیّ لم یزل

بیر کفن ایله تدارک محبسِ هارونه گَل

 

ئولدوروب موسانی هارون ایلیوب عزم ِشکار

بیر نفر یوخ نعشین ایتسون باری زنداندان کنار

گَل اوزون بغداده قویما نعشینی زنداندا خوار

هاردا لایقدی امام ِهفتمه بیله محل

 

شهرِ غربتدور دگل یثرب یغیشون اقربا

نعشینی یردن گتورسون ایتسون اظهارِ وفا

نه روادور جسم ِپاکی قعر ِمحبسده قالا

گر چه درک ایتمیش امامی کنجِ زنداندا اجل

 

اون بیر ایل محبوس کیمدور کنج ِزنداندا هاچان

زهریله مسموم اولوب آخر ویروب زنداندا جان

نه گلن وار نه گیدن نه بیرجه زنجیرین آچان

حل ّمشکل سنده دور بو مشکلی گَل ایله حَل

 

دور ایدر دوران ِدون دائم دنی لر کامیجه

شیعه نون باغری بو غمده دونمسون قانه نجه

قالدی زنداندا جنازه آخر اوچ گون اوچ گجه

نه اولوب تشییعه اقدام و نه تدفینه عمل

 

اوچ مصیبت بو جهاندا لرزه افلاکه سالوب

اوچ غم آرام ِبتولِ اطهری الدن آلوب

اوچ امامون نعشی اوچگون اوچ گجه یرده قالوب

هر اوچی اولماز ولکن بیره بیره هرگز مَثَل

 

زهر ِکین گر چه بو شاهون دوغرادی اکبادینی

ئولمه میشدی گیتدی امّا گوردی اوز اولادینی

گورمدی اوغلی تقی تک چرخین هر بیدادینی

نظم ِعالم ظلم ِاُم الفضلیدن تاپدی خلل

 

بی سبب گوز یاشی یوزده بیله رنگین اولمیوب

عشقیده نقصان اولور تا اشک خونین اولمیوب

هیچ امامون نعشینه بیر بیله توهین اولمیوب

بامیدن نعشین سالان اللّر اولیدی کاش شَل

 

جان ویرنده کنج ِزنداندا امامِ هفتمین

الده بیرکاسه سو دورموشدی مُسیّب دل غمین

جان ویرن وقته حسین امّا دئدی شمرِ لعین

ساقی کوثر آتان جنّتده ، وار نهرِ عسل

 

ایلیوب از بس بو سوز قلبِ شه ِدینه اثر

سوزشِ دل اولدی افزون تازه دن یاندی جگر

دل یاراسی اوخ یاراسیندان چتین دور مختصر

گورمیوب گورمز روا بو ظلمی بیر اهلِ جدّل

 

قالدی اوچ گون نعش موسیٰ لیک عریان اولمادی

زینبون زلفی کفن ، یا غسلى القان اولمادی

نسگل اولدی کربلاده بیر سلیمان اولمادی

تا بو محنت لر اولیدی عرّته بلکه بَدَل

 

نه سببدور بلمورم کرب و بلاده شیعیان

نه تاپولدی دورت نفر حمّال نه بیر نردبان

اون نفر لشکردن آیریلدی دلیم لال اول دایان

قورخورام آهِ بتول آفاقی ایتسون مشتعل

 

بیر نفر اولموب دیسون ای قوم ِبی رحم و شرور

هانسی مذهبده روا بیر بیله جور و ظلم اولور

بیر بدنده قالمیوبدور طاقتِ سُمّ ستور

باشینی از بس کَسَنده اینجدوب شمرِ دغل

 

یا شهید ِکربلا ، وی خامس ِآل عبا

(شأنینون) آگاهسن قلبینده وار بو مدّعا

فیضِ عظمایه یتوب قسمت اولیدی کربلا

حالینه شامل اولیدی حقّدن معنای گَل.

 

مرحوم شانی

منبع مجموعه کانالهای مدح و مرثیه

موضوع: حضرت امام موسی کاظم (ع) احوالات ,
زبان شعر و شاعر: نوحه ترکی , شانی

-------------------------------

حضرت امام حسین (علیه السلام)

 

به سر باز دارم هوای دگر

پرد مرغ روحم به جای دگر

 

ندا آید از خامه پر نوا

گذر کن سوی عرصه کربلا

 

بیابان پر از داد و شور شر است

همانا که هنگامه محشر است

 

بر آن دشت هی لشکر آید فرود

کند مرد جنگی به هر دم ورود

 

همه غرق آهن همه کینه خواه

همه دشمن حق همه دین تباه

 

همه دشمن ملک و مال علی

همه تشنه خون آل علی

 

چو زجز و چو خولی چوشمروسنان

گرفته به کف آب داده سنان

 

به سرداری ابن سعد عنید

فرستاده بی حد لشکر یزید

 

به سرعت دوان و دمان آمدند

به قتل امام زمان آمدند

 

جهان آفرین تا جهان آفرید

چنین بی حیایی نیاید پدید

 

ندید است چشم جهان خراب

به مهمان خود کس کند منع آب

 

نویسد کسی نامه دعوت کند

به مهمان چنین هتک حرمت کند

 

ندیدم کسی این چنین رای و کیش

کندمیزبان قصد مهمان خویش

 

که مهمان خود را کشد تشنه لب

که کشتند آن فرقه بی ادب

 

به دل ها بسی کینه ها داشتند

بسا این عمل نیک پنداشتند

 

همه دین و ایمان ز کف داده بود

همه بر قتال شاه آماده بود

 

ولی آن سپه را به دل بیم بود

دل جنگجویان به دو نیم بود

 

همه ترس از اشجع ناس داشت

همه بیم از تیغ عباس داشت

 

به مردانگی گر کند قد علم

نماند ز لشکر بپا یک علم

 

یکی گفت این ثانی حیدر است

یکی گفت به میدان کین اژدراست

 

یکی گفت گر تیغ گیرد به کف

نماند بجا دست و تیپ و نه صف

 

اگر آن نباشد میان سپه

کنیم این سپه را به زودی تبه

 

چنین گفت شمر ستمکار دون

من اکنون ز لشکر در آرم برون

 

به صد دام تزویر و افسون کنم

ز اردوی آن شاه بیرون کنم

 

روم وعده جاه و غزت دهم

نوید امید و ریاست دهم

 

بیامد به مکر و فسون آن لعین

به نزدیک خرگاه سلطان دین

 

کنار خیام امام انام

چو ایستاد آن شوم و بی ننگ ونام

 

مخاطب نمود اشجع ناس را

رشید و هنرپرور عباس را

 

به نزدیک شمر آمد آن خوشکلام

قمر شد مقابل به ابر ظلام

 

پس آنگه بگفت آن لعین عنید

که ای نامدار و شجاع و رشید

 

دریغا از این جلوه روی تو

دریغا از این زور و بازوی تو

 

دریغا از این قد دلجوی تو

دریغا از این زور و نیروی تو

 

امان نامه دارم ز میرم برات

که یابی از این ورطه راه نجات

 

تو هستی مرا هم قبیله از آن

نمی خواهمی مرگ تو بی گمان

 

که حیف است این قامت افتد به خاک

شود چون تو یک شیر جنگی هلاک

 

چنین پاسخی داد آن پنجه شیر

مرا نیست غیر از حسینم امیر

 

امیری حسین و نعم الامیر

بدور ای سمتکار شوم و شریر

 

تو ای ناخدای یم کربلا

رضای خدا را تو گفتی بلا

 

به (شانی) کرامت نما از کرم

سراید رثای شما این رقم

 

مرحوم شانی

منبع مجموعه کانالهای مدح و مرثیه

موضوع: حضرت امام حسین (ع) ,
زبان شعر و شاعر: نوحه فارسی , شانی

-------------------------------

زبانحال حضرت امام حسین (علیه السلام) به خواهرشان

 

گل مصیبت عالمنده سخت اولوب کاریم باجی

قارداشیم ئولدی، پوزولدی ایمدی پرگاریم باجی

 

گر چه ذلت تاپماز اصلاً عز و جاه مطلقیم

ظاهراً اما بو صحراده پوزولدی رونقیم

ئولدی انصاریم، قشون سیندی، یخلدی بیرقیم

قالدی قولسوز خاک و خون ایچره علمداریم باجی

 

دوشمه میشدی قارداشیم عباس الیندن تا علم

لشکرین بولمزدی فاتح، ابن سعد بد شیم

سالدیلار فرصت اله، بوندانصورا اهل ستم

هر نه گلسه فکره ایلر قوم خونخواریم باجی

 

کوفه نین اول بی حیا خلقی ایله جرات تاپار

اون نفر آتلی، یارالی سینم اوسته آت چاپار

دیزلریم گلمیر، اوزون گل اوخلانان مشگین آپاردی

چکمسین سو انتظاری، خوردا قیزلاریم باجی

 

گرچه اولدن اولوب دام بلایه رام، دل

ایمدی الدن گیتدی اما تاب دل، آرام دل

نه گلور دیز، نه گورور گوز، نه اولور آرام، دل

نه دوتور دل، نه قالوبدی نطق گفتاریم باجی

 

گلمسون مطلب عجب، وار حقی گوزلر گورمه سین

هیچ اوغولسوز بیر آتا، داغ برادر گورمه سین

عصر اولاندا نعشنی، ای کاش حرملر گورمه سین

من گورن تک گورسه دوزمز، آل اطهاریم باجی

 

جان ویرنده اکبر اودلاندی جگر، یاندی دلیم

وار دئیدوم عباس تک بیر مهربان آرخام ایلیم

ایمدی ال اوزدوم حیاتیمدن داخی سیندی بلیم

گوئیا گیتدی الیمدن جمله انصاریم باجی

 

ایستدیم قربانگه حقده اوجالدام باشیمی

راه حقده ویردیم اون یدی جوان هاشمی

اکبریم تک بیر اوغول، عباس تک قارداشیمی

یاره تقدیم ایلدیم، اولسون رضا یاریم باجی

 

جدیم ابراهیم آپاردی گر منایه بیر اوغول

حق عوض گوندردی فوراً اولماسین هاجر ملول

لطفه باخ، بیر گونده یتمش بیر نفر مندن قبول

ایلدی، منت بو جانه قویدی دلداریم باجی

 

قوه حسمده بو مطلب بله احساس اولور

نه جهاندا بئله بیر عالم، نه بئله یاس اولور

چوخ اولور ایستکلی قارداش، لیک نه عباس اولور

کیم اولور عباس تک، محنت گونی یاریم باجی

 

وار یری ویرسون اجازه روز و شب گوز یاشینه

آغلاسون کلثوم بو کان وفا قارداشینه

دور گتور بیر قاره معجر سال سکینه باشینه

من عزادارم اولون سیزده عزاداریم باجی

 

گلشن غمدن گتوردوم هر قدر غم یاسینی

لیک آه و ناله دن، منع ایتدیم آل یاسینی

ایمدی رخصت وار، دوتون بو نامدارون یاسینی

من اوزومده آغلارام، وار چشم خونباریم باجی

 

یوخ آناسی کربلاده باجی چوخدور نسگلی

اوخساسین عباسیمه وار هر کیمون ثکلا دلی

بیرده مشگل حل اولار، آل عبانین مشکلی

گیتدی الدن بیر امیدیم بیر هواداریم باجی

 

گر چه نسگلدور یانندا اولمادی ام البنین

لیک اولسیدی اولاردی چوخ اونا مطلب چتین

من گورن حالتده گورسیدی اوز اوغلون حشره دین

آغلیوب یانسیدی حقیدی وار اقراریم باجی

 

سو گتورمشیدی اله چوخ رنج و زحمتدن صورا

زحمتی گیتدی هدر، انجام خدمتدن صورا

یعنی اوخلاندی سو مشگی بئله همتدن صورا

خیمه گاهمدن گوز اوتدی، تشنه سرداریم باجی

 

رزمگهده هر قدر قان توکدی بو حیدر خواص

شامه و کوفه لشگری، بوندان صورا ایلر قصاص

من ئوزومده ئولم، اولام رنج دنیادن خلاص

وای سنون احوالیوه، ای یار و غمخواریم باجی

 

(شانی) چوخداندی دخیل اولموش سنه عباسیمه

یالوارور گاهی سنه، گه اکبره، گه قاسمه

حال یاسیله گلور الحق گلنده یاسیمه

ایستوری اولسون منیم بیر وقفه زواریم باجی

 

مرحوم استاد شانی

منبع مجموعه کانالهای مدح و مرثیه

موضوع: حضرت امام حسین (ع) زبانحال ,
زبان شعر و شاعر: نوحه ترکی , شانی

-------------------------------

در احوالات حضرت ابوالفضل (علیه السلام)

 

آه از آن ساعت که بر کون انقلاب افتاده بود

بر تراب غم، عزیز بو تراب افتاده بود

 

آه سرد باد، آتش روی آب افکنده بود

آفتاب از گرمی خود در عذاب افتاده بود

 

نوک پیکان سه شعبه، بین طاقین خورده بود

ناله و شیون به طاق نه قباب افتاده بود

 

بسکه لرزان گشته بوده، گاه افتادن علم

بر دل اطفال زهرا اضطراب افتاده بود

 

دست از تن رفت، اما در یسار و در یمین

یک لوا آلوده خون، یک مشک آب افتاده بود

 

پیکرش از نوک پیکان، پاره پاره، چاکچاک

زخم شمشیرش بر اعضا بی حساب افتاده بود

 

خون اعضایش ز گرمی در بدن خشکیده بود

زخم بر سوزش ز تاب آفتاب افتاده بود

 

شه به بالین سپهبد در همان ساعت رسید

بین لشگر بهر قتلش انقلاب افتاده بود

 

دید جسم ناخدا را غرق خون فلک نجات

یک چمن گل گوئیا بحر گلاب افتاده بود

 

(شانی) آن روزیکه این اشعار دلکش می نوشت

جسم بی یارش میان رختخواب افتاده بود.

 

 مرحوم شانی علیه الرحمه

منبع مجموعه کانالهای مدح و مرثیه

موضوع: حضرت ابوالفضل العباس (ع) احوالات ,
زبان شعر و شاعر: نوحه فارسی , شانی

-------------------------------

در احوالات حضرت ابوالفضل (ع)

 

هزار شکر اولا پروردگارِ لیل و نهاره

موفّق ایتدی منی خدمتِ حسینه دوباره

 

حسینین اوز آدی گُلدور ، عزا اولان یری گلشن

توک اشک ، گلشنِ عشق ایچره قیل صفایه نظاره

 

سوز عاشقانه دی اربابِ فضل ایلمز ایراد

اوزومی سایسام او غم گلشنینده منده هَزاره

 

دوشنده یادیمه کیفیّتِ شهادتِ عبّاس

دونر گوزوم یاشی ، سقّا غمنده ابرِ بهاره

 

یاتوب اونون علمی تا ، یاتان علملر اوجالدی

چالیندی طبلِ بشارت ، ویریلدی کوس و نقاره

 

و لیک عترتِ شیرِ خدایه اولدی قیامت

دیمه او گون او یر اولماز شبیه ، یومِ شماره

 

دیولّه مِهریله ماه اِقتران ایدنده قیامت -

اولور ، او اولدی ، اونا وار بو مطلبده اشاره

 

تاپاندا قولسوز علمدار پیکرین شهِ عطشان

قوجاقلیاندا ، قویاندا یوزون او قانلی عذاره

 

گونیله آی ایکیسی بیر یره یغشدی او ساعت

قیامت اولدی خیام حرمده زینبِ زاره

 

او بدرِ کاملی سالمیشدی دستِ چرخ خسوفه

که باتمیشیدی خاک و خونه ، گرد و غباره

 

او گُل وجوددن اول باغبانِ باغِ محبّت

چکردی خار کیمی اوخلاری ، آتاردی کناره

 

نه گوردی ماهِ بنی هاشمون او شمسِ امامت

بدنده گلموری زخمی شماره ، مثلِ ستاره

 

بیوردی آچگوزون عبّاس اولوم اوزوم سنه قربان

اماندی ویرما یانان قلبیمه شراره دوباره

 

کمکسیزم گوروسن چوخدی دشمنیم آتام اوغلی

فلک قویوب منی حسرت بو چولده یاور و یاره

 

آخان ستاره کیمی زخموین آخار قانی

نفس گیدوب قیدنده آتار بسان فواره

 

هامی شهید باشین من بو گون دیز اوسته آلدیم

ویرلمامیشدی ولی هیچ شهیده بیر بیله یاره

 

آزالدی چارم ، امیدیم کسیلدی اولدی قدیم خم

ایشیق گونوز گوزی دوندی گوزومده بیر شبِ تاره

 

بو بیر بولوک حرمیم ، بو اوزوم ، بو دشمن ، اوتوز مین

بو سرنگون علمیم بس ایدوم بو چولده نه چاره

 

اگر بو حالیوی بولسه سنون هامی قوشون اهلی

هجومیله توکولر خیمیه پیاده سواره

 

سنون وجودیویدی حِصنِ امن آلِ عبایه

دوشلّه سنسیز اولار ورطهء بلاده حصاره

 

سن ئولدون ، ایمدی تاپار شام و کوفه لشگری جرأت

آچار جفا الی ، اهلِ جفا ، صِغار و کُباره

 

کبار ، غارته تیز رام اولار گورر یوخ علاجی

ولی سویلماق حقیقتده چوخ چتیندی صِغاره

 

سن ئولدون ای اسداللهه سهم و صولتی ثانی

شکار اولور بالاسی روبهانِ شیر شکاره

 

که یعنی زینبمون قولّارین طنابیله باغلار

سَنان و شمر چکر بزمِ عیش و شرب و قماره

 

او گوزلریکه یاتانمّازدی قورخودان گجه راحت

یاتالّا ایمدی ، گیده لّر دویونجا خواب خُماره

 

و لیک بیرده یاتانمّاز حرملریم داخی راحت

اسیر اولور چکلور گه بو شهره گه او دیاره

 

او سیّدیکه منی ایلدی بو خدمته وادار

اودا منیم کیمی حسرتدی آلتی گوشه مزاره

 

آدی محمّد اسلام زاده ، شهرتی خوشزاد

امینِ (شأنی دی) امّا چکوب اوزینی کناره.

 

مرحوم شأنی

منبع مجموعه کانالهای مدح و مرثیه

موضوع: حضرت ابوالفضل العباس (ع) احوالات ,
زبان شعر و شاعر: نوحه ترکی , شانی

-------------------------------

احوالات حضرت زهرا (سلام الله)

 

عجب خیالیله بو خامه فکر خامه دوشوب

خیالی وار یازا مدح بتول عذرانی

 

نه قابلیتله من بتوله مدح یازوم

بو نقص، نیک عمل، بو وفور عصیانی

 

یاراتمیوبدی بیر عورت خدا بو عزتده

عزیزه دور ایکی دنیاده بو حیا کانی

 

اگر چه قدری بو دنیاده اولمادی معلوم

ولی جزاده گوررسن مقام زهرانی

 

نقدری عرصه گه حشره قویمیوبدی قدم

که بیر پیمبره اولماز شفاعت امکانی

 

خدای خلق او گون بولدورور مقامتین

تمام خلقه بونون پای حشر دیوانی

 

بو شان صاحبینه من نجه اولوم مداح

نه وار جلالنون حدی نه شانی پایانی

 

خانم اوزی بولور اما عمل خجالتیم

بو درد خجلتیمون واردی اوندا درمانی

 

بولاردا رسمیدی ایتمزله سائلی مایوس

بو آستانه گلن گورمیوب پشیمانی

 

پناهیمزدی بو اون دورت وجودین هر بیریسی

خصوص فاطمه نون وار بو امره رجحانی

 

سوزوم بو باره ده چوخدی، فرصتیم یوخدی

گرک یازام ازل باشلانان بیر عنوانی

 

نجه جلالتینون یوخ نظیری بیر کسده

اولوب مصیبتیده اوز جلالی میزانی

 

یازولا عمرینی اون سگز ایل، بو آز مدت

آغاردی زلفی اولوب سرو قدی چوگانی

 

آتاسنون کفنی خشک اولمامیشدی هنوز

توکولدولر ایوینه تابعان شیطانی

 

قاپی دالنا گلوب فاطمه، دئدی اوتانون

قویون اوز حالنه بو بیکس و معزانی

 

گیدون کناره عزاداروخ، ال چکون بیزدن

هنوز تازه آتام ترک ایدوب بو دنیانی

 

جواب ویردی اونا ثانی ستم پیشه

گرکدی بیعته گلسون علی عمرانی

 

یتشدی بیر یره امر، آخر اود دوتوب یاندی

او باب امن که روح الامیندی دربانی

 

دایاندی فاطمه اما قاپو دالسندا

که داخل اولمیا صحنه مدینه دونانی

 

بالاسی محسن، آتاسی امیر بطحایه

خبر آپاردی بو اوضاع ناگوارانی

 

بویان طرفدن علی گوردی سسلنور فضه

که ای الینده اولان جمله مشکل آسانی

 

دایانما گل، خانمیم قانینه بویاندی آقا

اولوبدی سینه سیمینی رنگ مرجانی

 

چخوب ولی خدا صحن خانیه گوردی

یخوبلا فاطمه دلفکار و نالانی

 

عباسینی گوتوروب آتدی فاطمه اوسته

گوزومده اولدی مجسم بلا بیابانی

 

نه سری وار او گون گلمدی بلا چولنه

همان ولی خداوند و سر یزدانی

 

غرض یدالله الیله او قدرت داور

دوتوبدی فوراً او ناپاک اولان گریبانی

 

یخوب یره دئدی بو جراتی ایدنمزیدوز

گر اولماسیدی منیله رسول پیمانی

 

بولوب او ظالم علی بیرده تیغ چکمیه جاق

علی او کس دگی ترک ایلسون وصایانی

 

همین بو مطلبه عمرومجه آغلاسام آزدی

نجه بیان ایلیوم بو ملال عظمانی

 

قولونی باغلادی روباهلر اسیر ایتدی

چکوبله مسجده جبرا او شیر هیجانی

 

گوروب بو حالتی زهرا دوتوب علی اتگین

که ساخلاسون او ولی علی اعلانی

 

اولار چکردیله اما بتول قویمازیدی

چکوب یخاردی یوز اوسته او قوم نادانی

 

دولاندیروب یوزینی قنفذه دئدی ثانی

بتولدن داخی سلب ایله بو توانانی

 

گوتوردی شمر کیمی تازیانه سین قنفذ

ووروب او بی کسی یاندیردی قلب طاهانی

 

علی ولی خدا شهریار خیبرگیر

گوروب بو حالتی دولدوردی چشم گریانی

 

بیله گمان ایدورم دوشدی زینبی یاده

مجسم ایتدی گوزونده او قانلو میدانی

 

ووراندا زینبه ده تازیانه شمر لعین

اوجالدی روح ابوالفضلین عرشه افغانی

 

بوراخما توسن طبعون لجامینی(شانی)

بتول غش ایلدی، اول سخن نگهبانی

 

او وقت هوشه گلوب گوردی عرض ایدیر فضه

آپاردی مسجده ظلم اهلی شاه مردانی

 

ایدوب اوزینه ایکی نور دیده سین همراه

گوزینده اولموشدی چون جهان ظلمانی

 

یتشدی مسجده بوبکری گوردی منبرده

پوزولدی زلفی کیمی حالت پریشانی

 

نقدری سخت اولی گور قضیه زهرایه

تصور ائت ایله ببر حالت غم افزانی

 

آتا یرینده گوره خصم کردگار اوتوروب

ولی دوروب ایاق اوسته ولی رحمانی

 

مرحوم شانی

منبع مجموعه کانالهای مدح و مرثیه

موضوع: حضرت فاطمه زهرا (س) احوالات ,
زبان شعر و شاعر: نوحه ترکی , شانی

-------------------------------

زبانحال حضرت رقیه (سلام الله) به حضرت زینب (سلام الله)

 

عمّه جان اینجوری جانیم گئجه لر صبحه کیمی

اوجالور عرشه فغانیم گئجه لر صبحه کیمی

 

ایلورم سعی گیچن گونلریمی گوزدن آتام

یوخلیوم بلکه بیر آز مقصد و مقصوده چاتام

عادتیم یوخدی ازلدن قوری یرلرده یاتام

اورگنوب بستره جانیم گئجه لر صبحه کیمی

 

هر قیزون بیت خدایه آتاسی ایتسه سفر

او قیزون مسکنی آیا اولی ویرانه مگر؟

واردی نه سرّی ندن بس منیم ای نیک سیر

اولدی ویرانه مکانیم گئجه لر صبحه کیمی

 

گر گیدوب حجّه بابام، شبه پیمبر هانی بس؟

قاسم تازه جوان، اصغر و اکبر هانی بس؟

نولوب عبدا...، ابوالفضل دلاور هانی بس؟

اوییدی عمده امانیم گئجه لر صبحه کیمی

 

بُلورم قلب شریفونده سنون یوخدی توان

دیسم احوالیمی اشکون اولی رخساره روان

صبریمی الدن آلوب فرقت عبّاس جوان

کسیلوب تاب و توانیم گئجه لر صبحه کیمی

 

آیریلیق دردی ای عمّه منی بو حاله سالوب

آپاروب صبریمی درد دلیمی الدن آلوب

منتظردی نجه یوخلار گوروسن یولدا قالوب

دیده ی اشک فشانیم گئجه لر صبحه کیمی

 

نه گلور بیر گئجه شیرین یوخی عمّه گوزومه

نه تسلّی ویره بُلّم گونوزی اوز اوزومه

گوزیاشیم گوزده گواهیمدی بو اودلی سوزومه

که آخور اشک روانیم گئجه لر صبحه کیمی

 

وار نه قلبیمده منیم ذوق صفای چمنیم

نه هوای فرح نسترن و یاسمنیم

فکر زلف علی اکبر اولوب هر لحظه منیم

محرم راز نهانیم گئجه لر صبحه کیمی

 

خانم عیشیمی غارتگر گردون تالادی

خُم محنتده فلک رختیمی قاره بویادی

اورگیم بیر بونیله خوشدی علی‌اکبر آدی

گه اولوب ورد زبانیم گئجه لر صبحه کیمی

 

دیمورم "شانی" ملاحتده مسلّمدی سوزوم

بو قدر وار که بهار ابری تک آغلاردی گوزوم

حیف اولا طبع کتابه دگولم قادر اوزوم

ورنه وار نطق و بیانیم گئجه لر صبحه کیمی

 

مرحوم شانی

منبع مجموعه کانالهای مدح و مرثیه

موضوع: حضرت رقیه (س) زبانحال ,
زبان شعر و شاعر: نوحه ترکی , شانی

-------------------------------

در احوالات حضرت زهرا (سلام الله)

و گریز به شام غریبان امام حسین (علیه السلام)

 

بو گیجه ای شیعه دلدن خانۀ زهرایه باخ

بوینی چیگنینده پریشان زینب کبرایه باخ

 

ائتسه هرکیمسه تصوّر مرتضانون حالینی

اودلانار قلبی توکر رخساره اشک آلینی

باشینه ایمدی او مولا جمع ایدوب اطفالینی

بیر پریشان اهلبیته بیر شه والایه باخ

 

رسم عالمدور جهاندا هر کسون ئولسه کسی

خویش و ایل شام غریباندا اولور همناله سی

اوز یتیم اولادینون گوز یاشلاری شیون سسی

حیدرون اولدی انیسی بو دنی دنیایه باخ

 

بیر طرفده زینب کبری دیور ایوای آنا

بیر طرفده غم دیزینه باش قویوب دور مجتبی

بیبر طرفده باش آچوب گلگون قبای کربلا

دیده گریان مو پریشان عترت زهرایه باخ

 

گه باخوب اطفالینه اشکین توکر شیر خدا

گه سیلر گوز یاشلارین آرام ایدر میر هدا

گور نه چکدی بو گیجه صبحه کیمی اول مقتدا

آیت کبری گوزوندن موج ایدن دریایه باخ

 

شام هجرانی دوزنموب صبح فرقت ایتمدی

صبح اولونجا فرقت زهرایه طاقت ایتمدی

فرقته دوزدی دیمه دیداره سبقت ایتمدی

نصف شب دوردی ایاقه همت مولایه باخ

 

یوز قویوب قبر بتوله دیدۀ گریانیله

قبرینه گلدی دوشندی شیون و افغانیله

درد دل آچدی او بزم رازیده جانانیله

بزم وصل خاصّه باخ خلوتگه و ماوایه باخ

 

سویلدی توپراقلار آتدا یاتما راحت فاطمه

بو ترابون قلبینه ویرما جراحت فاطمه

دورگیداخ گور زینب ایلور نه قیامت فاطمه

ساکت اولمور ناله دن فریاد وآه و وایه باخ

 

آغلادی قلبین بوشاتدی بسکه افغان ایلدی

کلّ ایتامه آتا یاد یتیمان ایلدی

دوردی دولت خانیه رجعت شتابان ایلدی

گورنجه گلدی نه گوردی حال غم افزایه باخ

 

دل داش اولسا بو ملال و محنته مشگل دوزه

گوردی یا بیدار اولوبلا یا یوخی گلموب گوزه

قول بویون اولموش آناسیزلار قویوبلار یوز یوزه

آغلاشولا شدتیله شور جان فرسایه باخ

 

ویردی چوخ شیرین دیلیله تسلیت اطفالینه

گوز یاشین سیلدی ایدوب بیر بیر نوازش حالینه

وای خانم کلثومه ایوای زینبون احوالینه

آچگوزون ای دل اویانمیش خیمه ده غوغایه باخ

 

ایستدی خوار اولماسین شام غریبان حسین

جمع اولوب بیر خیمیه اطفال نالان حسین

صبحه دین نی تک سیزیلداشدی یتیمان حسین

عزّت شام غریبان شه بطحایه باخ

 

نه قالوردی قاسم واکبر نه عباس جوان

زینب وکلثوم اوزی اولموشدی گویا پاسبان

بسکه چوخ خستیدی زینب گئتدی خوابه بیر زمان

استراحت سیرین ایله گوردوقی رویایه باخ

 

هولیله بیردن اویاندی سسلدی کلثوم اویان

یوخسا یاتمیشدون منیم تک سنده باجی باغریقان

دور گوراخ هانسی بالاگیتدی کناره باجی جان

قورخولی چولدور گورورسن پر خطر صحرایه باخ

 

سسلدی اطفالی زینب ویردیلر بیر بیر جواب

هر قدر سسلندیلر سس ویرمدی امّا رباب

عمّه لر قارداش بالاسین تاپماقا ایتدی شتاب

زینب و کلثوم ایدن بیر همّت عظمایه باخ

 

چیخدیلار یانمیش چادیردان دلده بی حد اضطراب

قویدولار یوز قان دولان صحرایه با چشم پرآب

گه گیدوب گه سسلنوبله هارداسان سس ویر رباب

صورت مطلبده بیر محصول اولان معنایه باخ

 

شه دلیل اولدی اوزی گوستردی خط جاده نی

تاپدیلارآغوش شهده نازنین شهزاده نی

باغرینا جان تک باسوب شهزاده ی آزاده نی

دویمیوب دل پاره سیندن چاک چاک اعضایه باخ

 

بی ثمردور «شانیا» بو عالم پر شور و شر

گورمیوب بوندان ثمر کام دلینجه بیر بشر

ایسته سن گر نونهال عمریدن شیرین ثمر

سوز یازاندا شور گوز یاشین توکوب قتلایه باخ

 

مرحوم شانی

منبع مجموعه کانالهای مدح و مرثیه

موضوع: حضرت فاطمه زهرا (س) احوالات ,
زبان شعر و شاعر: نوحه ترکی , شانی

-------------------------------

در احوالات امام حسین (علیه السلام)

 

آه او ساعتدن که دشت کربلاده شاه دین

گیتدی انصاری الیندن، قالدی بی یار و معین

 

گوردی موقع مقتضی دوران یتوب گل فصلنه

یعنی فرصت یار اولوب، یتسون مرام اصلنه

باش ویروب جانیله، یول تاپسین نگارین وصلنه

بئله بیر فرصت اله دوشسون دئدی بیرده چتین

 

ایله مست ایتمشدی شاهی نشاء جام الست

تا جهان وار اولمیوب اولماز بیر عاشق، ایله مست

ایتمسه گوردی حرمدن، رشته الفت گسست

کامیجه اولماز حریم وصلی جانانه قرین

 

گوردی بیر جان نقدی ایستیر بو گرانمایه متاع

ترک جاه ایتسون گرک، تاپسون مقامی ارتفاع

خیمیه یوز قویدی دلده الوداع الوداع

ایلسون آل عبائیله وداع آخرین

 

شه سسین آلدی توکولدی خیمدن دیشره تمام

اضطراب و وحشتیله عترت خیرالانام

سرزنان، مویه کنان، بلقیس رولر بالتمام

اول سلیمان زمانه دور ایدوب مثل نگین

 

بیر سارالموش گل کیمی، قاچمشدی یوزدن رنگ لر

دل آچوب بلبل کیمی گل اوسته خوش آهنگ لر

صید اولان بسمل کیمی داده گلوب دلتنگ لر

بیر دلیله هر بیری تقریر ایدور درد دلین

 

گل آچوب گویا چمنده گل سوزین بلبل دئر

دل آچوب شیرین سخن لر هر بیری بیر دل دئر

بعضی بیر حسرتلی کلمه، بعضی بیر نسگل دئر

بعضی ایلر داد و شیون، بعضی افغان و انین

 

آه او عالمدن نه عالم؟ محشر کبرائیدی

آه او محشردن نه محشر؟ محشر عظمائیدی

آه او شورشدن نه شورش؟ شور عاشورائیدی

حشرده مشکل اولور اولسون ایله بیر شور و شین

 

بیر بالا دوتموشدی ینگیندن، قباسیندن بیری

توپراقا دوشموشدی دوتموشدی عباسندن بیری

دامن وصلین دوتوب، هجران هراسندن بیری

کسسون آیا رشته الفت نجه حبل المتین؟

 

گوردولر چوخ تشنه دور، دارای آب سلسبیل

ایتدیلر زمزم کیمی گوز یاشنی گوزدن سبیل

آغلادی ساقی کوثر، باشین آچدی جبرئیل

وا حسینائیله دولدی روضه خلد برین

 

خون دل گوزدن توکوب رخساره، اشگه قاتدیلار

سو سپوب شهزاده لر، شه دامنین ایسلاتدیلار

آغلیوب اول سروری، مظلوم لر آغلاتدیلار

توکدی زهراده بهشت عدنده اشگ ترین

 

سوز غلط دور مطلق عرض ایتسم ایتیردی شه اوزین

جنبه خاص امامت دور، امام آزماز سوزون

آنلادی زینب ولی اشگیله دولدوردی گوزین

قولارین سالدی حسینون بوینونا زار و حزین

 

عرض ایدوب کای یادگار مصطفا و مرتضا

وی گوگل آرامی، نور دیده خیرالنساء

نه آنام وار نه آتام، سنسن نشان مجتبا

سنده گیتسن بس نیدوم؟ ای اوچ وجوده جانشین

 

قلب عالم قیلدی قلب زینب زاره نگاه

گوردی وحشت وار او اندازه اسیر، چون پر کاه

قوه حسیله اولدی مطلبه آگاه، شاه

فوج غم آلموش امیرزاده اعظم دلین

 

قلبینه قویدی الین، امر ایتدی آرام اول باجی

سنده من تک هر بلایه قلبدن رام اول باجی

کربلادن شامه دین سر خیل ایتام اول باجی

حافظون اولسون سنونده خالق عرش و زمین

 

ایله شیرین دل اوشاقلاردان نه نوعی چکدی ال

بیر اوزی بولدی اونی بیرده خدای لم یزل

گوستروب معشوقه ایله عاشقانه بیر عمل

عشقنه تحسین ایدوب، احسن دئدی جان آفرین

 

باخمادی بیر قیز دئور گیتمه، بیری سسلیر دایان

سانمادی بیر قیز دیور، یاندیم سوسوزدان الامان

باخدی لازمدور که ایتسون ترک سر، ایثار جان

گوردی خنجر الده دورموش منتظر شمر لعین

 

فطرت قوم لئامی کاملاً ایتمشدی حس

شاه مظلومان اودور زینبدن اولدی ملتمس

ویر منه بیر پیرهن، اما که اولسون مندرس

علتین زینب خبر آلدی، بویوردی شاه دین

 

لشگر کفرون گرک ظلمنده نقصان قالماسون

رختیمی سویسون اولور بیر جامه جان قالماسون

باری ایسی قوملار اوسته، جسمیم عریان قالماسون

اولماسین میلی او کهنه کوینگه غارتگرین

 

آغلادور اوچ غم امام عصری، هر شام و صباح

بیر سوسوز جان ویردی جدی، ایچمدی آب مباح

بیر او میداندان گلنده ماجرای ذوالجناح

بیر بو میدانه گیدنده، حال شاه نشاءتین

 

ایستدی باب مصیبت خلقه اولسون افتتاح

گوردی یوخ شاهین جلوداری، بیله بولدی صلاح

زینب کبرا اوزی فوراً گتوردی ذوالجناح

ساخلادی کلثوم علم، عباس اولدی شرمگین

 

زینب عرض ایتدی حسین، یورقوندی جانون خسته سن

دوت عنان تک بو آغارموش ساچلاری بیر دسته سن

قوی قدم نازیله بو حسرتلی گوزلر اوسته سن

چون رکابون یوخ دوتان، بو باره ده اولما غمین

 

آتلاناندا شه چالولار طبل شاهانه حسین

منده وورام سینمه، منتدی بو جانه حسین

اولماسین نسگل سنه تک گیتمه میدانه حسین

 

(شانی) لطف خاصدور بو نطق و گفتار فصیح

شور گوز یاشون توک، اولسون شیرین اشعارون، ملیح

عاشقانه شعره مربوط اولماز اخبار صحیح

آغلیان گوز، مقتلی گورمز، گورر اوز مقتلین

 

تنگ اولوب گوگلوم گینه غربتده، قربانون اولوم

یاحسین لطف ائت، دوشوبدور باشیمه سودای بوم

نه دلیمده وار منیم ذوق بهارستان روم

نه باشمدا نشاء رشگ نگارستان چین

 

مرحوم شانی

منبع مجموعه کانالهای مدح و مرثیه

موضوع: حضرت امام حسین (ع) احوالات ,
زبان شعر و شاعر: نوحه ترکی , شانی

-------------------------------

وداع حضرت امام حسین (علیه السلام)

 

حسرتیله او تشنه لب خوردا اوشاقلارا باخور

ایستوری گیزلده ولی، اشگی دایانموری آخور

آه سکینه یاندیرور، قلب شریفینی یاخور

بیر ایله مهربان آتا، نازلی بالادن آیریلور

 

باشلیوب آل مصطفی، داد و فغان و شور و شین

یانمش اورگلیلر چکر، قلبیدن آه آتشین

وجهی بود که حضرت خیرالانامه جانشین

نائبه ستم کش خیر نسادن آیریلور

 

مجملی مطلبین بودور، سوزده چوخ اولماسین صداع

منده نه وار او نطق دل، سنده نه حال استماع

کیم بولوری نه آیریلیق؟ کیم بولوری نجه وداع؟

کیم بولوری که کیم نچه حور لقادن آیریلور

 

تکمیشدی حسینه گوز، جمله داغ دیده لر

گوردی وداع شاهی تا محنت و غم کشیده لر

یاسه دونوب امیدلر، اشکیله دولدی دیده لر

قلبه رجوع ایدن باخوب گوردی رجادن آیریلور

 

مانع اولوب بیوکلره عفت و عصمت و حیا

لیک اوشاقلار آغلادی، باشلادی شیون و نوا

قلب حسینه گور نجه ایتمز اثر بو ماجرا

بیر دولی خیمه ناله واابتادن آیریلور

 

بعضی ساچین یولور، وورور بعضیسی باشه سینیه

بعضی دیور اسارتی، گورمه روا سکینیه

گل بیزی تازه دن بابا، قیتر آپار مدینیه

حب وطن مگر اهل وفادن آیریلور

 

بعضی کناردن باخور، بعضی گلور قوجاقینه

بعضی دوتور الین اوپور، بعضی دوشور ایاقینه

مشگل اولور صغیر اوشاق، دوزسون آتا فراقنه

هانسی بالانی گر فلک قویسا آتادن آیریلور

 

نه آنالار کنارده، آه و نوادن ال چکور

نه بالالار کنار اولور، چنگ ردادن ال چکور

آل عبا نه دامنین بوشلور، عبادن ال چکور

اهل کسا نه خامس آل عبادن آیریلور

 

قارداشینی قوجاقلادی باجی بیر اضطرابیله

سویلدی کسمه الفتون زینب دل کبابیله

عزم ایدوسن ئولوم یولون، سن که بئله شتابیله

روح بدندن آیریلور، جسم قوادن آیریلور

 

ویردی جواب شاه دین، صبر ایله فرقتیمده دوز

عمر یتوبدور آخره، مندن آنام باجی ال اوز

خوش گونه اهل دل اولان، حسرت اولور گجه گونوز

اهل ولا اولان مگر درد و بلادن آیریلور

 

(شانی) عزیزیوین دلین روز وداع داغلادون

سیل سرشگون عارضه گوردیله خلق باغلادون

یعنی (صحافیله) ایله قول بویون اولدون آغلادون

یاد ایلدون حسین نجه آل عبادن آیریلور

 

مرحومین شانی و صحاف

منبع مجموعه کانالهای مدح و مرثیه

موضوع: حضرت امام حسین (ع) وداع ,
زبان شعر و شاعر: نوحه ترکی , شانی , صحاف تبریزی

-------------------------------

ندامت یزید و آمدن آهو به خرابه شام

 

یزیدی بیر نچه مطلب که ایلدی نادم

گوروبدی خلق آرا وقری گیدوبدی رسوادور

 

بیری رقیه وفاتینده نقل غساله

بیریسیده بو که نطقیم آو شرحه گویادور

 

واریدی شامیده نعمان ادینلی بیشنماز

گلوب نمازه گوروب صبح وقتی یلدادور

 

بیری اونا دیدی  ویرانده بو ناخوش کیم؟

دیوله خارجی اسلام دور نه ترسادور

 

گلنده مسجده گوردوم ایدوب نمازین ادا

دعا اوخور دلی  حمد خدایه گویادور

 

دیدیم دیوله سیزه خارجی ولی بوعمل

طریق شیعه دی نه شیوه نصارادور

 

دیدی امام جماعت اگر منی تانوسا

داخی جماعته گلمز بلر که بیجادور

 

ایشتدی بو سوزی نعمان او مرد راویدن

دیدی که وار منه بو کلمه بیر معمادور

 

بو کلمه نی دیه بلمز مگر امام زمان

یقین امامیدی محبوب رب اعلا دور

 

همینکه مطلبی بلدی بوزولدی احوالی

طلای صافیدی قلبی نه که مطلادور

 

دوروب ایاقه سریعا خرابیه گلدی

ایله دولوب گوزی گویا که جام صهبادور

 

دوشوب ایاقینه مظلوم امامین عرض ایلدی

مقصرم ولی لطفوز قصور فرسادور

 

منی گذشت ایله مولا سیزی تانو ماموشوخ

باغشله سیدی سیزلرده عادت اعطادور

 

سالوبدی بوینونا تحت الحنک اچوب یخاسین

دوشوب محله لره دلده وا امامادور

 

حسین حسین دیدی شوریله شهری دولدوردی

حسینه عاشق اولان قلبیده نه بروادور

 

یزید او مومن دینداری دوتدی الدوردی

عجب سعادت بیحد و فیض عظمادور

 

بلی علاقه کسن عز و جاه دنیادن

سعادته یتوشر بهره مند عقبادور

 

ندامتینده یزید ستمگر و شومین

بیر ایری قصه ده وار شرح اولونسا حسنادور

 

خرابه شامیده ویرانیه گلن اهو

بلر خبرلره هر کیم بصیر و دانادور

 

گلوب خرابده درد دلین امامه دیدی

بلوب امامین هامی خلقه حکمی مجرادور

 

سوروشدولار ندی مولا مرامی اهونین

بیزه نهاندی ولیکن سیزه هویدادور

 

دیدی بونون بالاسین صید ایدوبدی بیر صیاد

گلوبدی سینه سینه سود دچار ایذادور

 

گرک گیدم بونی راحت ایدم اولام راحت

تقیه وقتی دگل موقع تقلادور

 

یغوبدی بوینونا زنجیری خسته حالیله

که یعنی بیکسه نصرت اولونسا حسنادور

 

اونیله منزل صیاده گلدی زین العباد

بیان ایدوب اوکه دلده اولان  تقاضادور

 

چواب ویردی یوخ امکانی ویرمرم هرگز

بو صیدیدن منه مقصود بو تمنادور

 

یزیدین اوغلونا تحفه ویرم الام انعام

او شاهزاده دی  چود و سخایه دارادور

 

بویوردی  ایمدی که مطلب بیله اولور معلوم

بو صید یدن سنه منظور مال دنیادور

 

دایانما اچ اتگین من ویروم سنه زر و سیم

دیمه اسیریدی عاجزدی ناتوانادور

 

اوزاتدی شاه ولا کیمیا اثر الینی

گوتوردی یردن اله قدری ریک  صعبادور

 

توکوبدی دامن صیاده سیم و زر اولدی

غریبه معجز عجب قابل تماشادور

 

اسیره باخ اوزی زنجیره باغلانوب اما

باخون جلالته حکمی جماده مجرادور

 

گتوردی ویردی او اهو بالاسینی صیاد

دیدی بو معجزه حیران قالان مسیحادور

 

گینه امامیله اهو خرابیه گلدی

بالانی سینه سینه سالمادی نه معنادور

 

گلوب خرابه قابوسیندا سالدی دوشلرینه

گوزوم دایانما توک اشکین که جای ابکادور

 

نه گوردولر که درون خرابه دن ناگاه

ایله سیزیلتی گلور گوئیا که ثکلادور

 

سوروشدولار ندی بو ناله اغلیان کیمدور

رباب ناله سیدور یا که ام لیلادور

 

دیدیله اصغر اناسی گوروب بواهونی

سوسوز بالاسین ایدوب یاد اشکی دریادور

 

گلوبدی سینه سینه سود دیر علی اصغر

اوغول دیمه سوسوزام ایمدی سود مهیادور

 

مرحوم شانی

منبع مجموعه کانالهای مدح و مرثیه

موضوع: احوالات خرابه شام ,
زبان شعر و شاعر: نوحه ترکی , شانی

-------------------------------

زبانحال نوعروس

 

نیر رویون جداده پرتو افکندور عم اوغلی

من کلیمه بو بیابان دشت ایمندور عم اوغلی

 

اوندا کی جسمون نشانه ایتدیلر شمشیر و تیره

شام هجرانون گوزیمده ایلدی دنیانی تیره

وعده وصلون گلوم ویردی صبا خرداد و تیره

تیره گون تیر اولدی تیریم، تیره بهمندور عم اوغلی

 

نیزیه چوخ باخماسام آز غم اولور سوزان دلیمده

چوخ باخوب چوخ آغلارام، قالسون آدون هر آن دلیمده

من گلنده نالیه وار نه اثر بولمم دلیمده

سس چکور آغلار آنان، مطلب مبرهندور عم اوغلی

 

یا جواب لن بویور، صونرا منیله الفتون کس

یا کی نورین مبداءین بو ابر آسا زلفیدن کس

آغلارام شام و سحر، یانام که یانماز حالیمه کس

گورموسن مستخفظ و مامور، دشمندور عم اوغلی

 

بیر دگول داغ قلبیمده واردور نچه داغلار

آتشین نسگللریم علت اودور دنیانی داغلار

برق آهیمدن آلوب اود، شمع تک سوزاندی داغلار

کوه و هامون گورموسن یکباره روشندور عم اوغلی؟

 

گر سنون جسمون بویاندی قانیله مانند لاله

نیش هجریله منیمده وار دلیمده نچه لاله

مرشد عشق اولموشام دم ویرمیشم هر نطق لاله

گور نجه بو کاروان بیر پارچا شیوندور عم اوغلی

 

نیزده گوردوم باشین صبح ایلدیم چون تیره شامی

رهنما بولم اونی طی ایلرم بو راه شامی

کوفیان بعضی گولر، ایلر شماتت بعضی شامی

گور شقی نیلر اسیره؟ بو مبرهندور عم اوغلی

 

جلوه ایتدوقجا عم اوغلی سنده کی حسن خداداد

عاشقانه آغلارام فریاد ایتمم چکمرم داد

بولمیشم مظلوم ایچون بیر گون یتر هنگامه داد

عدل دیوانین قوران خلاق ذوالمندور عم اوغلی

 

مرحوم شانی

منبع مجموعه کانالهای مدح و مرثیه

موضوع: فاطمه بنت الحسین ,
زبان شعر و شاعر: نوحه ترکی , شانی

-------------------------------

کوچ از قتلگاه

 

گچدی جدایه چون سر سلطان تاجدار

اولدی بتول قیزلارینا محشر آشکار

 

دوردی جدا باشندا حسین باشی گون کیمی

یاندی او حاله گون اوزی، آفاق آلوب شرار

 

آتلار قویانمازیدی ایاق ایسیدن یره

گویا دوتوب جهانی شرر، گویدن اود یاغار

 

نحالدیدی گور او سوسوزدان یانان بنات

اوچگون سو ایچممشدی چوخی بعضیلر یازار

 

دوتموشدی کفر ظلمتی کرب و بلا چولین

مستور ایلمشدی چو حق نورین اهل نار

 

ایتمشدی هم خسوف بنی هاشمون آئی

اولموشدی دشت ماریه چون شام تیره تار

 

تا گون کیمی اوجالدی جداده حسین باشی

عالم ایشقلانوب شب تاریک اولوب نهار

 

خرگاه اودلاناندا داغلشمدی چوللره

اطفال بی پناه حسین، بالغ و صغار

 

ایستردی اهل بیتی یغسون کنارینه

سسلردی نوک نیزه ده تکبیر او شهریار

 

بولدورماقا بو عالمه اوز معنویّتین

اوچ دفعه ایتدی نیزه ده تکبرینی کِرار

 

یعنی بولون بو باشی نماز اوسته ویرمیشم

اولسون جهاندا جدیمون احکامی پایدار

 

بو ئولماقیم دیریتدی پیغمبر شریعتین

تکبیریمون نتیجه سی تا وار زمانه وار

 

بی اختیار سسلدی تکبیر هامی قوشون

سس ویردی شاه دین سسینه لشگر شرار

 

جمع اولدی اهل بیتیده نیزه ایاقینه

بیر محشر اولدی، حشرده اولماز او آه و زار

 

شهزاده لر جدایه باخوب توکدی گوز یاشین

شه باشی قیزلارینا باخوب اولدی اشکبار

 

خوردا اوشاق گورنده جداده آتا باشین

نه حالته دوشر، نولور احوالی؟ کیم قانار؟

 

باجی گورنده سویگلی قارداشنون باشین

اوز قاتلی جدایه ووروب، تازه قان آخار

 

قان اولسا اشگی، چوخ دگی، وار حقی واقعاً

آز ایلیوب اگر اوزینی ایتسه انتهار

 

اما عجبدی دوزدی بو قدری مصیبته

وار بیر بشرده گور بو دوزوم یا بو اصطبار؟

 

یوخ یوخ عجب دگل، اوزی آخر وداعده

امر ایلمشدی صبره امام بزرگوار

 

تاپمشدی قوه قلبی، قویاندا الین امام

اولموشدی صبر معدنی دریای بردبار

 

باشین گوروب جداده دوزوب، نعشنی ولی

تاپجاق نه حاله قالدی؟ بولر حی کردگار

 

باجی نه نوعی قاداشنی تاپدی، شرحنه

معذورم ایلورم آناسندان من اعتذار

 

دلده عزیز قارداش آدی، گوزده گوز یاشی

باشدا هوای شور حسین، دلده اضطرار

 

نه دیز گلور نه گوز گورور، آختاردیقین تاپا

نه گیتماقا توان نه دورماقه اختیار

 

یورقوندی یاتمامشدی گجه پاسبانیدی

یانمش چادردا دربدر اطفاله خوار و زار

 

دل قارداش عطرینی آلوری، گورموری گوزی

بولمور نه دور بو حالته آخر مآل کار

 

قارداش دیوب گزوب دولانوب قان دولان چولی

داش اولسا دل او حاله دوام ایلمز یانار

 

گوردی جواب اولمادی، قطع اولدی چاره سی

زهرا آدین آپاردی او زهرایه یادگار

 

ویرم قسم سنی آنامون حقنه دانش

سس ویر سسیمه ای یارالی جسم زخمدار

 

باخ بیر آنا اوغول آراسندا علاقیه

گور الفت و محبته وار حد و انحصار؟

 

منظور ایدوب آنا آدینون احترامینی

باشسیز بدن کلامه گلوب، دوتمادی قرار

 

سسلندی گل گل ای آنامون یادگاری گل

چوخ گزمه قان دولان چولی حیران و دلفکار

 

قارداش سسی گلن طرفه یوز قویوب باجی

گویا که گل سراغین آلوب عندلیب زار

 

فوراً اوزین یتوردی همان سس گلن یره

گوردی دوننکی یر دگی، ایتمشدی کم گذار

 

سوز بیر مقامه یتدی که توضیحه شرم وار

اولسون گوروم او لشگری محشرده شرمسار

 

یا صاحب الزمان آقا مستوریدی بدن

من ایلیوم بو مطلبی نه نوعی استتار؟

 

هر قدر ایتدی دقت او مظلومه جهان

گوردی بدن گورونموری ای رب کردگار

 

داشدور، شکسته نیزه دی، خنجر قلجدی، اوخ

بیر یرده چوخ توکوبدیله اشرار بدشعار

 

بیر بیر گوتوردی نیزه لری اوخلاری آتوب

گوردی گوروندی جسم، اولوب اسلحه کنار

 

اما نه جسم؟ باشکه یوخ، اللرده قطع اولوب

حتی سویوب لباسنی اعدای نابکار

 

گلشندی جسمی، هر یارا بیر گل کیمی آچوب

دل آچدی گلدی ناله و فریاده چون هزار

 

حالی پوزولدی، چخدی اوزیندن فغانیله

بیر نوعی نوحه باشلادی اول معدن وقار

 

سس چکدی حال زینبه دشمنلر آغلادی

زهرا بهشتی ایتسه عزاخانه حقی وار

 

گاهی باساردی باغرینا صد پاره نعشنی

گاهی یاخاردی زلفینه قانین خضاب وار

 

بیر بیر هامی یارالارینی اوپدی ایگلدی

دوشمز گوروب اله ایله گلشن ایله بهار

 

اوپدی هامی یارسنی، اوچ شعبه اوخ یرین

قلبینده گوردی، اولدی گینه قلبی داغدار

 

سویلوب دگیدی کاش بو اوخ قلب زینبه

تا دلمییدی قلبیوی بو تیر جان شکار

 

زینب او دوغرانان بدن اوستنده نیلدی شرحیله

شأنی اولماز ادا، ایله اختصار

 

مرحوم شانی 

منبع مجموعه کانالهای مدح و مرثیه

موضوع: کوچ از قتلگاه ,
زبان شعر و شاعر: نوحه ترکی , شانی

-------------------------------

وداع حضرت امام حسین (علیه السلام)

 

نقدر ساقی غم، ساغر شراب دوتار

او قدر دردیله الفت، بو دل خراب دوتار

 

آلوبدی قلبیمین اوستین، قرا بولود کیمی غم

بهارده چمن اوستین نجه سحاب دوتار

 

من ایستورم غمیله الفت ایتمیوم، اما

منیله الفت او، چون باوفا صحاب دوتار

 

محبت اهلنه درد و غمین، محبتی وار

بولوب که راحت آتار، اهل دل عذاب دوتار

 

حسینه باخ نجه گوزدن هامی جهانی آتار

رضای یاری مقدم، او مستطاب دوتار

 

حرملرینی اوتوزمین جماعت ایچره توکور

گیدور ئولوم یولونا، مرکبین شتاب دوتار

 

بونون وداعنه عصرین امامی چوخ آغلار

اگر چه یاسنی هر یرده شیخ و شاب دوتار

 

نجه وداعیدی؟ نه آیرلیق؟ نه هنگامه؟

یازیلسا شرحی، هامی عالمی کتاب دوتار

 

سوسوز امام گیدور، قزلاری ایله آغلور

سوسوزلوق اولماسا روی زمینی آب دوتار

 

علاوه آیریلقین وار اوزینده ایله بیر اود

او مشتعل اولا، اود طاق نه قباب دوتار

 

ابوتراب بویوردی وداع اولان یرده

سرشگ اولماسا، شعله یقین تراب دوتار

 

حسین ایستوری گیتسون، اوشاقلار ال چکمور

عباسین عاتکه سی، دامنین رباب دوتار

 

سو یوخدی دولدوروب اشگیله گوز پیاله سینی

سکینه سی عوض شیشه گلاب، دوتار

 

یولا سالاندا باجی قارداشین مسافرته

بیر الده آئینه، بیر الده جام آب دوتار

 

ولی بو امره خانم زینبون یولی یوخیدی

بو باره دن دلنی غصه، بی حساب دوتار

 

یولا دوشنده مسافر آلوب، اوپر قرآن

بو رسم عالمی منظور، اول جناب دوتار

 

قویار دوداقلارینی فخر ساجدین یوزینه

دوباره تشنه لبی، تبدن التهاب دوتار

 

باخار بو رسمدی آئینیه دوشنده یولا

مسافریکه اوزاق بیر سفر صواب دوتار

 

شهید عشقده، مرآت حق نمایه باخار

جمال یاری گورر، قلبین انقلاب دوتار

 

که یعنی حسرتیله زین العابدین یوزینه

باخار، ایکی یولا توشه او پور و باب دوتار

 

باجیسی گوردی حسین، چوخ باخور اویان بویانا

گوزینی حسرت اوزیله سرشگ ناب دوتار

 

دئدی حسین بئله حسرتیله صاق و صولا باخما

بو خسته قلبیم او باخماقدان اضطراب دوتار

 

سنی بو حالیله یالقوز گورنده، یاشلی گوزوم

مگر شکسته گوگل اوز یرینده تاب دوتار؟

 

غم ایتمه قالمیوب عباس و اکبر و قاسم

مکدر اولما، سنه زینبون رکاب دوتار

 

باخوب فراته طرف، چکمه آهی آه اوسته

لوای عشقی بو کلثوم دلکباب دوتار

 

هوا چوخ ایستی دی، بو سهلدور سوسوزلوق وار

علاوه گون یوزیوی تاب آفتاب دوتار

 

باشی اوسته چتر کیمی دود آهی آچارام

گونون قباقینی آخر، او احتجاب دوتار

 

یازاندا (شانی) بو در خوشابی(خوشخوانه)

خجالتندن اوزین لوءلوء خوشاب دوتار

 

مرحوم استاد حسین شانی

منبع مجموعه کانالهای مدح و مرثیه

موضوع: حضرت امام حسین (ع) وداع ,
زبان شعر و شاعر: نوحه ترکی , شانی

-------------------------------

زبانحال در کوچ از قتلگاه

 

دور بو دربدر عیالون سالدیلار نظامه قارداش

کربلالیلر دوباره عازم اولدی شامه قارداش

 

تاپماسون گرکدی احکام، نفخ صور اولونجا تغییر

چون سن حق سوز اوسته ئولدون، وار سوزونده بیله تاثیر

سسلدی یارالی باشون تا جدا باشندا تکبیر

صف چکوب اسیر عیالون، دوردولار قیامه قارداش

 

گلمیشم بو سرزمینه اکبر جوانیله من

عون و فضل و قاسمیله، اشجع زمانیله من

ایمدی شامه عازم اولدوم شمریله سنانیله من

سن بو کربلاده خوش یات، یتموسن مرامه قارداش

 

قویموری عدو دویونجا بیرجه آغلیوم گیدوم من

دوغرانان جنازن اوسته سینه داغلیوم گیدوم من

قان ویرن یارالاریوی باری باغلیوم گیدوم من

گر چه حشر اولونجا یتمز زخمون التیامه قارداش

 

گیرم ال تاپوب سنه بو کوفیان نامسلمان

سو یانندا ویرمیوب سو، باشوی کسوب لب عطشان

زینبون ئوله ندن بس جسموی قویوبلا عریان؟

داد کوفیان الندن، نولدی کهنه جامه قارداش؟

 

سن بویورموسان دوزوم من، ای شهنشه مدینه

هر قدر بروزه ویرسه کینه سین گروه کینه

من دوتاخ دوزوب دایاندیم، نیلسون قیزون سکینه؟

گور دوزر بو جور و ظلم لشگر ظلامه قارداش؟

 

اوندا که قوشون خیامه گلدی قصد غارتیله

خوفه دوشدی اهل بیتون، وحشت اذیتیله

برگ گل کیمی اسیله ایمدیده او وحشتیله

گلمیوب هله دوتولموش دللری کلامه قارداش

 

نه مصیبته تحمل ایلسون مگر بو عورت

عزتی گیدوب الندن، خیمه سی اولوبدی غارت

هر مصیبتمدن آرتوخ یاندیرور بو بیر مصیبت

ووردیلار غل و دوشاخه بو علیل امامه قارداش

 

بیر مریض که اونیله دردینی تاپار معالج

قالدی اوددا یاندیم، ویردی یانماقیم نتایج

ایلدیم اونی او اودان بیر مشقتیله خارج

ایلدی اثر او حالیم فرقه لئامه قارداش

 

قسمت ایتدیلر یتشدی اوچ اسیره بیرجه ناقه

اگلشنمیوب دوشنده هر یتیمه قیز اشاقه

شمر النده تازیانه تا یتور یتیم اوشاقه

کینیله ویرور او ظالم ظلمنی تمامه قارداش

 

یوخ الیمده اختیاریم دیندیروم عطوفتیله

ناقه لر بیری بیریندن چون گیدیر مسافتیله

کافر اولسادا یتیمی دیندیروله رافتیله

نه ووروب دوگله دونسون روزگاری شامه قارداش

 

بیر دانش بو مرده جسمه عیسی زمانه جان ویر

من مسافرم دالمنجا باری دور اوزون اذان ویر

نیزه ده کسیک باشیله دوش قباقه یول نشان ویر

تا باشون دالنجا باشلار دوشسون انتظامه قارداش

 

ایتمرم سنی فراموش من دعای نیم شبدن

سو گورنده یاد قیلام هر زمان بو خشک لبدن

قویمارام گوزیوی یولدا شام و کوفه و حلبدن

پیک آهیله یتورم نامه اوسته نامه قارداش

 

ای ترابی مقتلنده قانیله اولان ملمخ

شأننون آلوبدی جانین خوف دوزخیله برزخ

اولما راضی حشر اولاندا اولسا گر مکانی دوزخ

اوز اودیله اودلانوبدی باخ النده خامه قارداش

 

مرحوم شأنی

منبع مجموعه کانالهای مدح و مرثیه

موضوع: کوچ از قتلگاه ,
زبان شعر و شاعر: نوحه ترکی , شانی

-------------------------------

در احوالات حضرت ابوالفضل (علیه السلام)

 

آلدی ناگه دوره سین جلادلر

الده عریان خنجر فولادلر

 

گوردیلر یوخدی الی ایتسون دفاع

باشینی کسماقدا باشلاندی نزاع

 

بیر بیره اون یدی جلاد عنید

سبقت ایلور ایتسون عباسی شهید

 

ایلدی عباس او قومه خطاب

ایتمیون بو امره بیر بیله شتاب

 

ایتمرم من عجز گر چه دشمنه

بو قدر اما ویرون مهلت منه

 

باشیمی ای قوم عدوان کسمیون

تا گلینجه شاه عطشان کسمیون

 

گورموسوز سلطانی گوزلر گوزلریم

صون نفس جانانی گوزلر گوزلریم

 

من سلوک راه عشقه سالکم

بو باشا فکر ایتمیون من مالکم

 

بو باشون واردور بیر اوزگه صاحبی

او منی ایلیوب سعادت طالبی

 

وار بو ذوقون اشتیاقینده بو باش

تا کسلسون شه ایاقینده بو باش

 

دهرده بو باش گرک ممتاز اولا

خاک پای شاهه پای انداز اولا

 

ویرمرم بو باشی سلطان گلمسه

باشیم اوسته شاه عطشان گلمسه

 

خوشدی آخر ساعت ای قوم ظلام

شه رکابندن دوروب اوپسون غلام

 

مرحوم استاد شانی

منبع مجموعه کانالهای مدح و مرثیه

موضوع: حضرت ابوالفضل العباس (ع) احوالات ,
زبان شعر و شاعر: نوحه ترکی , شانی

-------------------------------

امان نامه

 

عصر تاسوعا قریب شام عاشورائیدی

چخدی لشکردن کناره شمر شوم نابکار

 

یوز دوتوب سمت سپاه شاه دینه دادیله

سسلدی أَینَ بنو أُختی؟ سوزون ایتدی کرار

 

بولدی شمرین مقصدین پور رشید مرتضی

باشینی سالدی اشاقه با کمال انکسار

 

شاه دین یوز دوتدی عبّاسه بویوردی یا أَخا

شمر ذی الجوشن سیزی سسلور گورون نه قصدی وار؟

 

ایلدی عبّاس فوراً امر شاهه امتثال

خارج اولدی خیمه لردن مرتضایه یادگار

 

یوز دوتوب اکراهیله شمره دئدی قصدون ندی؟

وئردی عبّاسه بو طرزیله جواب اول کین شعار

 

هم قبیلم دور آنان سن قتله یتسن تا وارام

اوز قبیلم ایچره اولّام بو عملدن شرمسار

 

گئت گوتور قارداشلارون گَل ملحق اول بو لشکره

اول سپه سالار لشکر واردی سنده اقتدار

 

هر ریاست ایسته سن وار سویسن هر بیر منصب آل

سر سپه حتّی سنه اوز شغلون ایلر وا گذار

 

آلمیشام کتباً امیریمندن امان نامه سنه

یوخ تعرّض سیزلره گر اولسا هر شهر و دیار

 

تا ایشیتدی بو سوزی پور غیور مرتضی

تیتردی اعضاسی اولدی طبعینه چوخ ناگوار

 

سویلدی ای بی حیا دنیاده عار اولسون سنه

شرم ائدورسن اوز آنامدان ایتمیسن زهرادن عار

 

فاطمه اوغلون قویوم یالقوز گلوم سردار ئولوم؟

یوخ بو منصبده شرافت ، وار مذلّت زینهار

 

نه امان نامه نه منصب نه ریاست نه جلال

بیر گونوم اولسا حسین سیز عالم اولسون تار و مار

 

سن خیال ائتمه حسینه قارداشام سر لشکرم

بیر غلامم گر قبول ائتسه بو شاه تاجدار

 

طول وئرمه صحبته قورخار حسینون قیزلاری

خیمه لردن گورموسن زهرا قیزی زینب باخار

 

فکریمه بیر سوز گلور نوعاً چوخ استبعادی یوخ

تا خیمده بو خبر نشر اولدی تاپدی انتشار

 

شمر عبّاسیله میداندا ائدنده گفتگو

خیمه لرده زینبه یوز وئردی حال انکسار

 

یوز دوتوب درگاه حقّه یادگار فاطمه

عرض ائدوب ای دادگر ای مهربان پروردگار

 

قارداشیم عبّاسی آیا بس آنام امّ البنین

بسلموب اولسون حسینه بیر بئله موقعده یار

 

شمر آییرسا بیربیریندن بو ایکی قارداشیمی

وای منه اولّام یقیناً تا وارام دنیاده خوار

 

شمر گوردی ایلمز عبّاسه افسانه اثر

شاهباز اوج همّت کرکسه اولماز شکار

 

او قیتدی لشکره عبّاس خجلتدن ولی

شرم ائدردی بیرده سمت خیمیه ائتسون گذار

 

شه توجّه ائتدی لطفاً با وفا سردارینه

گوردی عبّاسه وئرور دنیای دون بی حد فشار

 

آز قالور ئولسون خجالتدن او غیرت معدنی

ایلدی احضار حضوره قیلدی رأفت بی شمار

 

هر سوزی گرچه امامون قولیجه اولماز دئماخ

وار ولی شهرت بو سوزده منده ائتمم استتار

 

ایتدی فرمایش ابوالفضله غریب کربلا

میلون اولسا گیتمگه قارداش واروندی اختیار

 

بولمورم بو سوز ابوالفضله نقدر ائتدی اثر

دوشدی توپراقه قدوم شاهه اولدی خاکسار

 

عرض ائدوب مولا قاپوندان قوما بیر عبدم ذلیل

اولماسام قابل ، قبول ایله واریمدی اعتذار

 

سیّدی سنسیز حیاتی نیلورم دنیاده من

خوش دگل سندن صورا عمر اولسا گیرم صدهزار

 

فرض ائله من بیر غلامم شاهزاده اکبره

تا ائدوم احراره بیله بندلیقدان افتخار

 

وئرماقا پایانه اوز پیمانیمی خوشخوانیله

ایسترم توفیق حقدن عهدیم اولسون استوار

 

خالقیم قیلسون عطا سالم بدن آسوده دل

دلنشین اولسون سوزوم چون شعر «شأنی»  آبدار

 

مایلم بیر اربعین اوچ اکبر آدلی نوحه خوان

اتّفاقیله نصیب اولسون او شش گوشه مزار

 

مرحوم شانی

منبع مجموعه کانالهای مدح و مرثیه

موضوع: حضرت ابوالفضل العباس (ع) امان نامه ,
زبان شعر و شاعر: نوحه ترکی , شانی

-------------------------------

زبانحال دختر امام حسین (علیه السلام)

در وداع آخر

 

چیخدی امام خیمه دن یوز قویدی مقتله

بیر قیز یولونی کسدی بنا شرح مقتله

 

عرض ایلدی اماندی بابا گیتمه دایان

بو حالیمی بهشتده یاده سالاندا یان

 

ان ذولجناحدن داخی آرامیمی آز آل

اگلش یرده منی دیزون اوسته دوباره آل

 

اولما رضا غمونده گوزوم اشکیله دولا

نازیله بیر او قولارون آچ بوینوما دولا

 

مطلق علاقه مند اولی بلبل گولن گله

بیرده گولر، گولوم منی دیندیر گله گله

 

بو سرعتیله اولما قتاله روانه سن

سالما شراره بو دل و جان و روانه سن

 

گورمورسن اشقیا نجه ایلوله قیل و قال؟

گتسن شهید ایدر سنی، گیتمه یانمدا قال

 

نه قارداشیم قالوب نه عموم وار نه بیر کسیم

بو حالده علاقه می تندن نجه کسیم؟

 

هیچ قیز بلایه دوشمسون عالمده من کیمی

سنسیز بولوم پناه اوزومه بیرده من، کیمی؟

 

بو آیرلیق زبسکه شراره سالور دله

وجهی ندور که جراتیله گلمیشم دله

 

آیا روادی سن کیمی بیر مهربان آتا

گوزدن جهاندا من تک عزیزه قیزین آتا؟

 

بولمم نه قدر عشق محبتده وار اثر

قلبیم فراق آدین ایشیدوب بید تک اسر

 

خار فراق برگ گل وصلی گر یارا

عالم طبیب اولسا، ساغالماز او بیر یارا

 

بو غنچه لیقدا اولما رضا گل کیمی سولوم

اولسون کبود سیلی زجریله صاق صولوم

 

آیا نجه بو دامن وصلوندن ال اوزوم؟

بیرده منیم زمانه ده سنسیز گولر اوزوم؟

 

بو وضعیله که ناقه صبریم دوشوب گله

ایتموم نه نوعی گردش ایامدن گله

 

بو نسگل اوسته آغلارام عمروم نه قدر وار

صحرالری دولانام همیشه مجنون وار

 

شاهی سالولا عزت و اجلالیله یولا

سالدی سنی بی بیم یولا، زلفین یولا یولا

 

قوی منده کوی عشقه ادب پرچمین ساچیم

فرش ایلیوم یول اوسته اولا فرش ره، ساچیم

 

سنسیز اسیر ایدر بیزی بولم سپاه شام

شامون یولون پیاده چکر شامه صبح و شام

 

من سنله بازدید ایدرم قتلگاه آرا

سنده خرابه ده گلوب آختار منی بابا

 

رسم وفانی عالم الفتده گوزلرم

گئت تیز قیت، یولون بو یول اوسته گوزلرم

 

هر کیم باخا دئر بو بیاناته(شانیا)

روح القدس بو نوعی دوزوب نظمه (شانیا)

 

سنده حسینه عرض ایله دردون نقدر اولا

صاحب سخا و کان کرمدور، دیمز او ، لا

 

مرحوم استاد شانی

منبع مجموعه کانالهای مدح و مرثیه

موضوع: حضرت امام حسین (ع) وداع ,
زبان شعر و شاعر: نوحه ترکی , شانی

-------------------------------

 احوالات جناب حبیب ابن مظاهر

 

چون حسین وارد شد اندر کربلا

حجّت حق، زیب عرش کبریا

 

چند نامه آن امام انس و جان

کرد در نزد محبّانش روان

 

نامه ای زان نامه ها نزد حبیب

شد روان از آن امام غم نصیب

 

بهر او بنوشت سبط مصطفی

ای حبیبا کن به عهد خود وفا

 

هر عاشقین که اولا عشقی غیریدن عاری

ایدر وجودینی رخت حیاتیدن عاری

 

گورن حقیقتِ معنانی صورته باخماز

که نقش لغو اولی نقّاشون اولسا آثاری

 

اولار که آتدی بو دنیانی، دوتدی عقبانی

یازلدی آدلاری دینِ مبین انصاری

 

قضیّه شاهدی میثمدی، باخ حکایتینه

آچوب اورک گوزونی گور او مرد دینداری

 

کَسوبله اَل اَیاقین، دل علی علی دیوری

دلین کَسونجه کَسیلموب او حق گفتاری

 

بلی بو عشقیده اشخاص چوخ گَلوب گیتدی

وجودین ایتدی فنا، ایلدی رضا یاری

 

حسین صحابه سی امّا اولوبدی چوخ ممتاز

خدا سویوبدی او یِتمیش ایکی وفاداری

 

حبیبی گوردوله رویاده عرض ایلدیلر

عجب سعادت دارِین ایدوب سنه یاری

 

حسینه باشیله جانیله ایلدون خدمت

که آخِر عمریده اولدون قوجا علمداری

 

داخی زمانه ده قالدی بیر آرزون آیا

سنی زیارت ایدر ایکی دفعه زوّاری

 

جواب ویردی بودور آرزوم اولا ممکن

گَلوب جهاندا حسینون اولام عزاداری

 

یازولّا بیر گونی عطر محبّتله حبیب

معطّر ایتمیشیدی بیر دکان عطّاری

 

حنا آلوردی که ایتسون محاسنینی خضاب

خبر یوخیدی ندور چرخ دون رفتاری

 

مصادف اولدی او دم مسلم بن عوسجیه

وفالی یاریدن حسّ ایتدی جور اغیاری

 

سوال ایتدی نه وار شهر کوفه ده آیا

تاپوب رواج چوخ آلاتِ حرب بازاری

 

جواب ویردی یوخوندور مگر حبیب خبر

که داغلیوبدوله قلب رسول مختاری

 

حسینی دعوت ایدوبله عراق جانبینه

خلاف وعده ایدوب شام و کوفه کفّاری

 

ایدوبله قتلینه اقدام قانینی توکَلَر

بو خلق کوفه ده یوخدور مروّت آثاری

 

بُلوب قضیّه نی ترک ایلدی او مقصودین

حنانی آلمادی، اولدی بلا خریداری

 

دیدی محاسنیمی قانیله خضاب ایدرم

گَلنده محشره اولّام عُذاری گُلناری

 

همان گونون گئجه سی نامه ی حسین یتدی

ایدوبدی نصرتینه دعوت اول وفاداری

 

بو نامه دن اولی واضح ندور مقام حبیب

بلی، محبّتین عالمده واردی معیاری

 

حسین بیر کسه گوندَرمیوبدی نامه، ولی

گَلوبدی کتباً حبیبه حسینون احضاری

 

نه نامه، شرحینی دل ایستوری بیان ایلسون

گوروب حسین کیمی کیم بی معین و بی یاری

 

بلی، بو رسمیدی شه نامه سین دوتالّا عزیز

نثار ایده لّه زر و سیم، اولماسین خواری

 

حبیب ایلدی رسم جهانیله رفتار

ایدوب او نامیه دُرّ سرشک ایثاری

 

پوزولدی حالی بُلن تک حسینون احوالین

او پاک روحینه جاندان گوروندی بیزاری

 

او گئجه قارداشی اوغلانلاریدا حاضریدی

خیال خامیله مست ایتماقا او هوشیاری

 

دیدیله بنزور حسینون ایشی سینیق گَمیه

سو اوسته غرق اولار هر کس گیده اونا ساری

 

جواب ویردی حسینه کمک گیدن دگلم

او تیره دللره ویردی دلیله دلداری

 

اولار دوروب گیدوب، اوز عورتی حبیبه دیدی

گَتورمه قهره بیله کردگار قهّاری

 

عزیز فاطمه یالقوزدی، گیت کمکلیق ایله

بو غم گونونده اونون یوخ معین و غم خواری

 

دیدی گیدوب سنی باشسیز قویام نجه اولی بو

زمانه ده اولوسان درد و غم گرفتاری

 

دیدی غم ایلمه، توپراق ییوب دیریلّم من

گیدوب او شاهه ایله بو سلامیمی جاری

 

جهادی عورته پیغمبر ایتمه سِیدی حرام

گَلوب اوزومده ایدردیم آقا سنه یاری

 

وفالی زوجه سین ایتدی حبیب آسوده

که یعنی دلده کی مقصودین اولدی اظهاری

 

آتین غلامی آپارمیشدی خارج شهره

که پرده لی اولا محکوم حکم سِتاری

 

یتوب نه گوردی آت آغلور غلامیده آغلور

دیور غلام آتا چوخ ایتمه ناله و زاری

 

حبیب گَلمسه قوخما، مینوب اوزوم گیدرم

حسینون اولّام او یالقوز زمان مددکاری

 

آتین غلامیدن آلدی، دیدی گیت اول ازاد

غلام آغلادی عرض ایلدی سنی تاری

 

آپار منیده یانونجا، گرک جهاندا اولا

غلام خواجه نین هر حالیده پرستاری

 

لیاقت اولماسا منده، حسینیده چوخدی

قبول ایلر او نخل مروّتین باری

 

بو قصّه نی بیله تحریر ایدوبدی دربندی

صحیح دور بُلور عالَم او عالِمِ اخباری

 

باخوردی زینب کبری که هی گَلور لشکر

حرملرین غمی آرتور گورنده اشراری

 

ایکی سواره گوروب سمت کوفه دن گَلدی

پوزوب بو حالت او تن خسته و دل افکاری

 

ایدوب حضورینه شبه پیغمبری احضار

مخاطب ایتدی او گُل رویِ ماه رخساری

 

بویوردی اکبره اول سروِ بوستانِ حیا

که ای عُذاری ایدن شرمسار گُلزاری

 

بو ایکی آتلی که یولدان یِتیشدی کیمدی بولار

دی بیر خلاص ایله تشویشیدن بو دلزاری

 

کمک گَلوبدوله یا اینکه واردی نامه لری

کمک ده اولماسالار دشمن اولمیا باری

 

ادبله عمّیه قارداش بالاسی عرض ایلدی

حبیب دور بو، حبیبِ خدانون انصاری

 

صفا دلینده وار، اهل جفا دگل قوخما

صفالی شخصلر اولمازلا دشمنه یاری

 

تصوّر ایلسه هر کیم بو ماجرانی بُلر

نه قَدر سختیمیش آل پیمبرین کاری

 

همینکه بُلدی حبیبون ورودینی زینب

بویوردی اکبره بیر رمزی کلمه اسراری

 

یتور حبیبه بو نوعی منیم دلیمجه سلام

حسینیمون گوروسن یوخ داخی هواداری

 

سپاهی آزدی بو صحراده، دشمنی چوخدی

گرکدی شهلرین اولسون سپاه و سرداری

 

او شاهزاده، خانم زینبون سفارشینی

دیدی حبیبه، اولوب گوز یاشی یوزه جاری

 

ووروب باشا گوتوروب سَپدی باشینه توپراق

دیدی که وای منه، گوز یاشین ایلدی جاری

 

مگر کیمم منه زینب سلام گوندَرسین

عجب فشاره سالوب روزگار او ناچاری

 

بلی، حبیب تانور زینبی نه هر کیمسه

علی قیزیدی، واریدی بتول کرداری

 

سنون گوزوندن ایراق ای حبیبِ با همّت

نجه بو زینبون آخِر پوزولدی پرگاری

 

گَلوب گورِیدون همان ساعتین بو خاتونین

یانوردی خیمه سی، قالموشدی اوددا بیماری

 

اوزون وورار اودا پروانه وار بی پروا

خلیل جدّی کیمی گلستان سانور ناری

 

کنار اولان کیمی اوددان نه گوردولر او خانم

باسوبدی سینه سینه بیر علیمِ تبداری

 

آچیق مصیبتی (شانی) چوخ ایلمه اظهار

اورکده ساخلا گلن، اول سخن نگهداری

 

کیچیک کرمدی خدایا باغشلاماق سنه بیر

منیم کیمی یوزی قاره بیوک گنهکاری

 

مرحوم شانی

منبع مجموعه کانالهای مدح و مرثیه

موضوع: احوالات حبیب ابن مظاهر (ع) ,
زبان شعر و شاعر: نوحه ترکی , شانی

-------------------------------

احوالات راه شام

 

چون اسیر ایتدی بنات مصطفانی اهل شام

باشلیوب یول شامه، امّا سرعتیله صبح و شام

 

جاده دن بیراهه دن گوندوز گجه یولّار اوزاق

آج سوسوز اطفال خسته، ناقه لر عریان تمام

 

شدّت جوع و ضمادن گل کیمی سولموشدولار

رنگلر تغییر تاپموشدی هوادن بالتّمام

 

گوئیا گل اوسته شبنم اوستون آلموشدی غبار

اشکبار اوزلرده اگلشمیشدی ازبسکه قتام

 

از قضا بیر گون ایله شدّـ تاپوب گون ایسّیسی

اود ویروردی یر دیسم مطلبده یوخ جای کلام

 

ناقه آت آتلی پیاده ساربان ناقه سوار

مَشیه قادر اولمادی هرقدر ایتدی اهتمام

 

عاقبت ویردی امیر قافله امر نزول

نصب ایدوب بیر نچّه قرخ آرشین چادر اشرار شام

 

سو تاپوب اطرافیدن گتدی قوشون سقّالری

آه یاصاحب زمان اولموب زمان انتقام

 

بویلانوب قیزلار باخاردی سو ویرن سقّالره

یول گلوب تشنِیدی ازبس آل شاه تشنه کام

 

بو مصیبت سختیدور، نه اوخ قلج کیفیّتی

حشر اولونجا سینه ده تاپماز بو یاره التیام

 

سو ویرردی آتلارا لشکر، باخاردی اهل بیت

دولدوروردی اشک حسرتله گوزون مانند جام

 

سپدیله آرتوخ سویی سُمّ سمنده اشقیا

بولدولر آل رسول اکرمه امّا حرام

 

من نجه عرض ایلیوم یافاطمه شرم ایلورم

سن بولورسن ایتدیلر اولادیوه نه احترام

 

دینجلوب لشکر چادردا استراحت ایلدی

گون قباقینده قالوب اطفال شام مستظام

 

بعضی ناچاراً آپاردی بوته ی خاره پناه

دالدالاندی بعضی پشت سنگیده یاندی رُخام

 

ایتسه سن شاهد اگر بو مطلبه عرض ایلرم

اونداکی یولّاندی لشکر، کاروان تاپدی نظام

 

کاروان گیتدی، او چولده قالدی بیر خوردا اوشاق

فکر ایله گور هاردا قالموشدی او طفل خوش کلام

 

یوخلاموشدی یا که ضعف ایتموشدی گویا بولمدی

لشکرین کوج ایتماقین اول دختر نیکو مرام

 

حاله گلدی ناگهان گوردی ایا صاحب زمان

نه اثر وار کارواندان نه او نصب اولموش خیام

 

سسلدی ایوای منه قالدیم بو چولده بی پناه

یاتدی بختیم تک گوزوم، آه ای خدای لایَنام

 

اضطرابیله قاچوب صاق و صولا چکدی فغان

اوز باجیسین سسلدی بو دللریله بی دوام

 

ناقه دن دوشدوم اماندی گیتمه من قالدیم باجی

ناقه نی ساخلا دایاندور، گیتمه من قالدیم باجی

 

قورخولوق بیراهه یول، تاریک شب، یالقوز اوشاق

گور نولی حالی عیاندور گیتمه من قالدیم باجی

 

قدرتیم یوخ قاچماقا واردور ایاقیمده قابار

خاصّه قلبیم ناتواندور گیتمه من قالدیم باجی

 

یا خبر ویر عمّمه گلسون اوزی، یا بیر زمان

کاروان اهلین دایاندور گیتمه من قالدیم باجی

 

حالیمی بولسه خانم عمّم یقین گیتمز دورار

چون منه چوخ مهرباندور گیتمه من قالدیم باجی

 

تنگه گلمیشدون باجی جان سنده نالمدن مگر؟

یوخسا بو رسم جهاندور؟ گیتمه من قالدیم باجی

 

یانماسان سن حالیمه بس کیم یانار احوالیمه

کیم دیر اشکی رواندور گیتمه من قالدیم باجی

 

گورموسن آیا جدا اوسته آتام باشی دوروب

مندن آخِر ناگراندور گیتمه من قالدیم باجی

 

شانیه بیر روضه خوان دم ویردی من ایتدیم مدد

سوز اودور چوخ خوش بیاندور گیتمه من قالدیم باجی

 

دلده کی ثابت علاقه ناله نی جذب ایلدی

دل جوابه اولدی گویا ایتدی آغاز کلام

 

ساربان ساخلا قطاری گیتمرم قالدی باجیم

قلبیمون وار انتظاری گیتمرم قالدی باجیم

 

هم ردیفیمدور منه کوچ ایلینده کاروان

تاپشیروب عمّم او زاری گیتمرم قالدی باجیم

 

آغلیوب سسلور اماندور گیتمه من قالدیم باجی

وار غریبه آه و زاری گیتمرم قالدی باجیم

 

یا قویون گیتسون خانم عمّم اوزی تاپسون اونی

یا سالون لنگه قطاری گیتمرم قالدی باجیم

 

قورخورام قالسون بو چولده قورخودان اولسون هلاک

کوهسار اولسون مزاری گیتمرم قالدی باجیم

 

تازیانه قورخوسوندان سس اوجالدانمور داخی

قالمیوب صبر و قراری گیتمرم قالدی باجیم

 

گلمسه سالّام اوزیمی ناقه دن منده یره

آخِر اولّام همجواری گیتمرم قالدی باجیم

 

سوز بو تیزلیقدا گله نظمه عجبدور شانیا

او دیدی ساخلا قطاری گیتمرم قالدی باجیم

 

بو ایکی شیرین زبانون ناله سی ایتدی اثر

نیزه باشیندا دایاندی راس شاه مستظام

 

ویردیلر بو ماجرانی عابد زاره خبر

هر نهان بیر سرّه چون عالِمدور عالَمده امام

 

سویلدی خوردا اوشاقلاردان بیری یرده قالوب

گوزلر ایستکلی بالاسین، گلمسه گیتمز بابام

 

یوز دوتوب زجر ابن قیس بی حیایه شمر شوم

غیظیله ایتدی خطاب اول مرتد بی ننگ و نام

 

تاپماسان گر بو یتیمی بول بودور مطلب گرک

حشر اولونجا کاروان ایتسون بو صحراده مقام

 

راوی مطلب دیر یاندیم او طفلین حالینه

تاپسا بولدوم اُلدورر سردسته ی قوم لِئام

 

منده گیتدیم زجریله باهم، نه گوردوم اول یتیم

تا بیزی گوردی دوروب قاچدی چو کبک خوش خرام

 

سسلدیم قاچما بالا بیز سندن اوتری گلمیشوخ

وورسا مامورون سنی اینجیتسه قورخما قویمارام

 

تا گوروب بو رافتی مندن قِییتدی قاچمادی

اولدی اول کعبه غزالی لاجرم صیّاده رام

 

سویلدیم گل کاروان گیتدی سوار اول ترکیمه

تیز یتیش مقصود قلبه ایت گیلن تحصیل کام

 

سویلدی جدّیم بو امری شرعیده نهی ایلیوب

ویرمیوب رخصت بو امره حضرت خیر الانام

 

سیز سورون آت، منده آردوزجا سورونّم چاره یوخ

اولسا هر قدری مسافت ایلرم صبر و دوام

 

بیز سواره اول پیاده بیر قدر طیّ ایتدی یول

گوردوم اگلشدی داخی یوخ اوندا یارای قیام

 

قان ایاقیندان آخور باشدان گوتوردی معجرین

ایلدی فوراً ایکی حصّه او بانوی کرام

 

باغلادی بیر پارچاسین مجروح ایاقه آغلادی

باشینه سالدی او بیرسین اولمادی کشف لِثام

 

چوخ مشقّتله یتوردی کاروانه تا اوزون

داد ظلموندن سنون آه ای سپهر نیل فام

 

اللرین قویدی ادبله سینه سی اوسته او قیز

نیزه باشیندا آتا باشینه بیر ایتدی سلام

 

سویلدی باخ گور باباجان عاجزم رفتاریدن

آبله اولموش ایاقیم قالمیوب یارای گام

 

اینجیدوب بو یولدا چوخ بیرحم ماموریم منی

تازیانه قورخوسوندان جراتیم یوخ آغلیام

 

ایسته ای شه شانیه چوخ عمر ویرسون خالقی

آخِر عمرونده اولسون مدفنی دارالسّلام

 

چون سیزون مدّاحوزام درویش عشق حیدرم

خوشدی دفن اولسون اُلنده شه جوارینده غلام

 

اولدی بو اشعاره بانی میرزا مهدی نوحه خوان

شرکتی وار اجرینه خالق ویرر یوم قیام

 

 مرحوم شانی

منبع مجموعه کانالهای مدح و مرثیه

موضوع: احوالات راه شام ,
زبان شعر و شاعر: نوحه ترکی , شانی

-------------------------------

احوالات راه شام

 

ساخلا ناقه‌می کاروانیدن واردی بیر قالان گیتمه ساربان

گرتاپولماسا سویگلی بالام گیتمرم دایان گیتمه ساربان

 

آخر وداعنده قارداشیم تاپشوروب منه بیربیر عترتین

ایتمرم فراموش اؤلونجه من قارداشیم حسینون وصیّتین

شه اوزی بولوردی یقین همین شاهزاد ه‌نین بیله ساعتین

ناقه‌دن ییخار ساربان قالور چولده باغْریقان گیتمه ساربان

 

چُوخدی گرچه اوز اهل‌بیتنه اُول شه رَؤفون محبّتی

وارخصوص بو نازنینله شاه بی‌کسون اوزگه اُلفتی

نیزه‌ده یارالی باشی دوروب گیتموری او اُلفتدی علّتی

گیتمز اوز بالاسی تاپولماسا حَشره‌دین اینان گیتمه ساربان

 

گورموسن نجه سوز آهله کلِّ عالمی یاندیرور یاخور

نیزه‌ ده آچورقان دولان گوزون متّصل گَلن یولّارا باخور

توز کُوله بَلَشمیش جمالینه اشگ دیده‌سی دمبدم آخور

من دؤزنمرم ایتسه قارداشیم گوز یاشین روان گیتمه ساربان

 

نیزه اوسته حسرتله صاق صولا قانلو گوزلرین هی دولاندیرور

اوز بالاسینون چولده قالماقین سیزه‌لره او رَمزیله آندیرور

گر دایانماساز سیز اوباش دورار اهل کاروانی دایاندیرور

سانما بیر کسیک باشدی نیزه‌ده بولمه ناتوان گیتمه ساربان

 

کیم بولور اونون اقتدارینی هر باخان گورور بیر یارالی باش

چوخ چالیشمیون بیجهت قویون من ایدیم سیزه ماجرانی فاش

ویرمیون عَبث نیزیه تکان ایتمیون عبث کوشش و تلاش

نه گیدر او باش نه قویار اولا کاروان روان گیتمه ساربان

 

بولمورم ییخوب ایمدی ساربان یا یئره دوشوب ناقه‌دن گیجه

گرگیجه دوشوب بوگیچن گیجه صبحه‌دین بالام صبح ایدوب نجه

تیز گیدون اونی آختارون تاپون سرعت ایلیون قویمیون گیجه

چوخ یوبانسا قورخوم بودور ویره چوللّر ایچره جان گیتمه ساربان

 

گر آلام اَله قانلو زلفومی کلّ عالمی زایل ایلرم

اشگیله بو صحرانی ایسلادوب کاروانی پا بَر گِل ایلرم

کاروانی لنگ ایلیوب سیزه گیتماق امرینی مشکل ایلرم

بیر قدم قدمدن گوتورمسون ناقه ساربان گیتمه ساربان

 

گرچه بو بالا قید عشقله تار زلف اکبرده بسته‌دور

لیک قالمیوب مَشیَه طاقتی یول گلوبدی یورقوندی خسته‌دور

ناله‌سی گلور هی قولاقیمه صبریمی آلور دلشکسته‌‌دور

گه بابا بابا سسلنور گهی عمّه عمّه جان گیتمه ساربان

 

بو یتیمه قیزلار آرا بونون ناله‌سینده وار اوزگه اختصاص

نالیه گلنده سبب اودور حالینه یانار جمله عام و خاصّ

رنج و زحمت تازیانه‌دن ایستیوب اونی ایلسون خلاص

ناقه‌دن ییخوب ساربان یئره وار بیله گمان گیتمه ساربان

 

داغلانوب دل داغداریمیز اودلانان زمان خیمگاهیمیز

یوخدی گیتماقا اختیاریمز گیتمسه اگر شاهِ راهمیز

قالمیوب داخی غمگسارمیز نیزه‌ده او باشدور پناهیمیز

تا دوروب او باش بیزده‌ بوچولی ایلروخ مکان گیتمه ساربان

 

من فدا او باشون وفاسینه وفا یولون گوزلر آشکار

بیر سپاهی لنگ ایلیوب دوروب اؤز بالاسینی گوزلر آشکار

بنزمور عبث نوک نیزه‌ده منتظر گوزه گوزلر آشکار

گورمیوب بیله مهربان آتا دیدۀ جهان گیتمه ساربان

 

 مرحوم شانی

منبع مجموعه کانالهای مدح و مرثیه

موضوع: احوالات راه شام ,
زبان شعر و شاعر: نوحه ترکی , شانی

-------------------------------

احوالات شب عاشورا

 

از جفای مردم دنیا پرست

قلب زینب چون دل لیلاشکست

 

برد آنگه برخدای خود پناه

که ای خدای نور ونار ومهروماه

 

اندر این صحرا حسینم بیکس است

گرچه او را یک اباالفضلش بس است

 

ای پناه بیکسان رب جلیل

ترسم این عده معدود وقلیل

 

نبود اندر یاریش ثابت قدم

یک یک اینها هم رودتاصبحدم

 

این خبررا قاصد باد صبا

بردبرگوش حبیب باوفا

 

جمع کرد آن باوفا اصحاب را

تا کند آگه حبیب احباب را

 

گفت زینب درحرم ناراحت است

قلب اطفال حسین در وحشت است

 

تیغ بران برکشیدند ازنیام

آمدندآن جمع برجنب خیام

 

هلهله می کرد بر دور حرم

تاشود راحت بنات محترم

 

مست جام عشق آن دیوانه ها

دور می گردید چون پروانه ها

 

جانثاران حسین یاران دین

با زبانحال می گفت اینچنین

 

برنمی داریم دست از شاه دین

تاشویم آغشته خون در راه دین

 

مرحوم شانی

منبع مجموعه کانالهای مدح و مرثیه

موضوع: احوالات تاسوعا و عاشورا ,
زبان شعر و شاعر: نوحه فارسی , شانی

-------------------------------

در شهادت حضرت امام حسن مجتبی (ع)

 

نقل اولوب روز وفات مجتبی

شاه عطشان خامس العبا

 

قبره قویدی تاحسن قارداشنی

توکدی رخساره حسین گوزیاشنی

 

قبری اوسته قوردی بزم تعزیه

باشلادی بیر نسگل اوردا مرثیه

 

سویلدی قارداش حسن بونلان سورا

بثربی قیلام سنه ماتم سرا

 

ایتمرم من بیرده استعمال عطر

تایازیلسون صفحه لرده سطر سطر

 

هرقدر اسسه درختان حجاز

اولسا خوش اهنگ قوشلار نغمه ساز

 

منده گلم دادواه وشیونه

اغلارام شام وسحر قارداش سنه

 

گیتسه هرمالی الندن برکسین

خانه برباداولمیوب اولماز یقین

 

خانه سی برباد اودور اوزقارداشن

دفن ایدوب رخساره توکسون گوزیاشن

 

ای حسین ای شرع انوریاوری

نوجوانان بهشتین سروری

 

قلبده سوزش گوزومده اشگ ال

ایلورم شاها جنابوندان سوال

 

قارداشین ای نورعین بوتراب

دفن ایدن ایااولورخانه خراب

 

یاکه قارداشن گوره صدپاره تن

خاک وخون ایچره دوشوب قولسوزبدن

 

نه تاپاچاره اونی دفن ایتماقا

نه دوزه قلبی کناره گتماقا

 

ویرمیه فرصت اوقدر اهل نار

تاایده اتلار ایاقیندن کنار

 

مرحوم شانی

منبع مجموعه کانالهای مدح و مرثیه

موضوع: حضرت امام حسن مجتبی(ع) احوالات ,
زبان شعر و شاعر: نوحه ترکی , شانی

-------------------------------

 زبانحال حضرت ابوالفضل (علیه السلام)

 

داده گل یا سیّدی یوخ اختیاریم من گلم

قولّاریم دوشدی بدندن قالدی بی صاحب علم

 

چوخ جسارتدور سنه من عرض ایدوم میدانه گل

گل یارالی نعشیمه باخ ناله و افغانه گل

تاجداریم حسرتیله دوندی باغریم قانه گل

اولمادی افسوس قسمت پای بوسه من گلم

 

دگمه سیدی مشکیمه اوخ گیتمه سیدی سو یره

محضریوه من گلردیم سورته سورته رو یره

یخدیلار آتدان منی بو فرقه ی جادو یره

ای کلیم اللهه وارث غرق دریای الم

 

من نه قدر ایتدیم بو مشکین حفظینه سعی و تلاش

گوزلریمدن اوخ دگیدی دگمییدی مشکه کاش

اولسا سو قول سهلیدور ویرّم آقا مین دفعه باش

بیله سودا ایتسه دشمن ایلرم بیع سلم

 

توکمرم بو صون نفسده بی سب گوزیاشیمی

بوندان اوتری سالّام آخِر زحمته قارداشیمی

بیر ایاقون آلتنا سورتم یارالی باشیمی

سن گوزیمدن لخته قان، من گرد ایاقوندان سیلم

 

بیرق اسلامه بولموشدون منی زیبنده سن

یاتماسون بلکه بو بیرق ایلدیم چوخ سعی من

نیلیوم گوردوم کسیلدی چارم ای شاه زمن

اقتداریم گیتدی الدن قولّاریم اولدی قلم

 

ساچموشام سنبل کیمی اوخ سینه ده بیر دسته من

ایتمیشم کوشش دفاعه اولموشام چوخ خسته من

سسلرم اَدرِک اَخاکَ یا اخی پیوسته من

وار امیدیم گل جمالون بیرده گورسم دینجلم

 

وار باشیمدا شور عشقیم ای شه مُلک حجاز

گل غلامون قیل اوزون دشمن یانندا سرفراز

ایلرم مولا یوزوم اوسته جنابون پیشواز

گر اسه باد خزان هنگام تشریفون بولم

 

من اگر بولسیدیم اولّام بیله سندن شرمسار

قیزلارا سو وعده سی ویرمزدیم ای شاه کبار

مشکیمی گورسه سکینه یاخشی درک ایلر نه وار

چوخ تقلّی ایتدیم امّا قویمادی قوم ظلم

 

آغلا (شانی) یالوار عبّاسه گینه بخت اولدی یار

مشکلون حلّ ایلسین مشکل گشایه یادگار

فکریوی ایلوب پریشان بو وفاسیز روزگار

یوخسا عاجزلر نه نطقون نه گیدر تاب قلم

 

مرحوم شانی

منبع مجموعه کانالهای مدح و مرثیه

موضوع: حضرت ابوالفضل العباس (ع) زبانحال ,
زبان شعر و شاعر: نوحه ترکی , شانی

-------------------------------

حضرت موسی ابن جعفر (علیه السلام)

 

دولاندور شیعه بیر قلبون کنار جسره گل داده

اولوب تابوت بیر تخته غریب ملک بغداده

 

نجه تابوت نه تخته اولور فکرینده دل مبهوت

ایله تابوت مثلین گورمیوب بو عالم ناسوت

قویوب زهرانی گوزیاشلی ایله تخته ایله تابوت

توکر خلد برین ده ایمدیده اشگین گلر داده

 

بیله تشییع اولموب بیر شهه عالمده واویلا

او تشییعین دلیم عاجزدی اولسون شرحینه گویا

بیله معلوم تخته بیر در زندانیمیش گویا

دونر قانه گوگل سالدیقجا حال غربتین یاده

 

دگل بیجا دولوب گوگلوم سپاه غم له مالامال

او محنت موجیدور ایلوب بو ملک صبریمی پامال

دیللر گلدی اوچ گوندن صورا بیر تخته دورت حمال

روادور دورت غلام اولسون مُشیِّع شاه آزاده

 

بو تشییعیدی گور حال حیاتینده نلر چکدی

وفا گلزارینه تخم گل مظلومیت اکدی

اوز عصرینده بودا مظلومیتده واقعاً تکدی

عموسی مجتبا تک گلمیوبدور مثلی ایجاده

 

دیللراون بیر ایل هارون بو مظلومی ایدوب محبوس

نجه محبوسیدی اما بولن یوخدور اونی محسوس

مناجاتینده واضح دور حیاتیندن اولوب مأیوس

نجات ایستردی زنداندان خلاص اولسون بو دنیاده

 

امامین علمی حلمی قدرتی بیر جنبه دور ذاتی

او قدرت گور اولور آیا بو مظلومیت اثباتی

علاوه یاخشی بیر شاهد دی تغییر مناجاتی

دیله گلمز مصیبتلر مسلم دور او معناده

 

او شاعر که مسلط اولسا اخباره سوزین آزماز

ادب باغینده کی نخل وفانین ریشه سین قازماز

بیلر اوز بیلدیقین واضح بیان حال ایدوب یازماز

اشاره عرض ایدر همناله اولسون تا که زهراده

 

نه بیر عالم یازوب نه یازمالی سوزلردی مقتلده

نه بیر ذاکر دیوب نه ذکر اولوب بو قصه اولده

بیلراهل دل اولسا قصه نی شرح مجملده

گلنده مهدی غایب تاپار صورت او معناده

 

مصیبت چوخدی امّا شرحینه کیمده جسارت وار

دلیلی گرچه چوخ واضحدی مضمون زیارت وار

معذب اولماقا عیناً زیارتده عبارت وار

نصیب اولسون مزارینده دیاخ بیزده گلاخ داده

 

بونا سوز یوخدی دشت کربلاده روز عاشورا

وداعینده حسینین ظاهر اولدی محشر کبرا

او حاله ایمدیده آغلار ولیّ عصر هم زهرا

او چوللرده توکر گوز یاشینی بو خلد اعلاده

 

ولی موسی ابن جعفر بیر وداع ایتدی عیالیله

اولونموب بیر وداع اولسون جهاندا بیله حالیله

ئوزی مسموم بلکه محتضر حال رحالیله

علاوه اوت سالوب زهرین شراری اودلی اکباده

 

سالوب شهزاده لر شه دامنینه ئوزلرین بیربیر

دیردی ئوز دلینجه هر بیری ئوز سوزلرین بیربیر

دوتوب بوینون قوجاق لاردی ئوپردی یوزلرین بیربیر

ویرردی تسلیت شاه رئوف اطفال واولاده

 

بو نسگل اوسته یانّام آغلارام هرقدر عمریم وار

وداع ایتدی خواتینی حَرَم لَه سید ابرار

بالاجا قزلارین اما یوخودان ایتمدی بیدار

بیوک لر گور دوشر نه حالته آیا او اثناده

 

تصور قیل بو مطلب گور نچه بیر اودلی نسگلدی

اولور معلوم مطلبدن امام ئوز بولدوقون بیلدی

یوخودان خردا اطفالی اویاتسا گوردی مشکلدی

دوزوب صبر ایلسون هجران شاهه نازلی شهزاده

 

بو سوزلر (شأنیا) اولماز بشر فکرینده گُنجیده

یقین تأئید شه وار سنده شکر ایله او تأییده

فشار فقردن چوخ تنگه گلمه دوشمه تردیده

فشار قبریده موسی ابن جعفردور یتن داده

 

 مرحوم شانی

منبع مجموعه کانالهای مدح و مرثیه

موضوع: حضرت امام موسی کاظم (ع) احوالات ,
زبان شعر و شاعر: نوحه ترکی , شانی

-------------------------------

زبانحال حضرت موسی ابن جعفر (علیه السلام)

 

گل اوغول قتلیمده هارون ایلین تدبیره باخ

گوشه زندانیده بوینومدا کی زنجیره باخ

 

ایلیوب جانان منی مدعو محنتدن خلاص

عاشق صادق اولان لازمدی تاپسون اختصاص

ویرمسم جان اولمارام بو کنج بزم قربه خاص

لوح محفوظ قضاده ثبت اولان تقدیره باخ

 

اون بیرایلدی اولموشام اهل ضلالتدن کنار

ایتمیشم بو گوشه زنداندا غربت اختیار

همدمیم غم مونسیم ناله انیسیم ذکر یار

اوج ایدن افلاکه دلدن ناله شبگیره باخ

 

بسکه واردور ناله و آهیمده تاخیر هر گیجه

نالم ایلر عالمی معناده دلگیر هر گیجه

منله همناله اولور بوینومدا زنجیر هرگیجه

گور سیزیلتی سوزشین بیر ناله ده تاثیره باخ

 

صبحدن شامه کیمی زنداندا هر گون صایمم

شامدن صبحه کیمی گه راکعم گه قایمم

سجده مه اما ادامه واردی ساجد دایمم

ثقلت زنجیر کینه سیرایله تفسیره باخ

 

بو نچه مدتده ایتدیم بیرنچه زندان عوض

اولمادم دلتنگ هیچ زنداندا بونجا الغرض

یوخ گناهیم گر مقصر فرض اولونسام لو فرض

یوخ دین هارونه عفو ایت بخشش تقصیره باخ

 

چون گورور یوخ بیرنفر ویرسون منیله سس سسه

وار بو یالقیز قالماقین تاثیری چوخ بو بی کسه

گونده بیر دفعه گلور سندابن شاهک محبسه

دشمنیم یالقیزلیقیمدا ایلین تدبیره باخ

 

قوی بونی زنداندا داد و ناله و افغانیله

بیر دولان باخ کربلایه دیده گریانیله

جان ویرور سلطان مظلومان لب عطشانیله

سینه سینده دورت مین اوخ جسمینده مین شمشیره باخ

 

بیرنفرمظلوم اوتوز مین لشکر بی ننگ و نام

بیریارالی شاه نچه فوج اشرار لیام

یاغدیرور بیر فرقه داش بیر فرقه اللرده حسام

بیرجماعت نیزه لی بیر فرقه الده تیره باخ

 

شرحینی بوماجرانین ایتمرم واضح بیان

ساخلارام قلبیمده یانام اهل اولسان سنده یان

شرم ایدوب نه شامیان نه رحمه گلدی کوفیان

شرم ایدور اما اوشرحه خامه تحریره باخ

 

ایسته سن(شأنی)اولا اثبات عین و قاف و شین

نوحه یاز گل شیونه چک دلدن آه آتشین

ویردی دم(صحاف)اودور سوز گلدی بیله دلنشین

گل اوغول قتلیمده هارون ایلین تدبیره باخ

 

مرحوم شانی تبریزی

منبع مجموعه کانالهای مدح و مرثیه

موضوع: حضرت امام موسی کاظم (ع) احوالات ,
زبان شعر و شاعر: نوحه ترکی , شانی

-------------------------------

حضرت قاسم ابن الحسن (علیه السلام)

 

گل عمو اماندی قالدیم قوم کوفیان الینده

آلدی دوره می بو لشکر خنجر و سِنان الینده

 

بیر یارالی آهو تک من یوز مین اوچیه شکارم

قان آخوب گیدوب توانیم، بیر غزال زخمدارم

گوزلریم قالوب یولوندا گل اماندی انتظارم

قالدی بیر یارالی جانیم مین یارا ووران الینده

 

هم یارالیم هم عطشان پیکریم تمام اوخدور

یالقوزام اوزوم گورورسن دشمنیم علاوه چوخدور

واضح امردور بو مطلب شرحه احتیاجی یوخدور

دفعه اقتدار اولماز تشنه بیر جوان الینده

 

اَندی تیغ باشیم اوسته دولدی گوزلریمه القان

یتدی زخم قاشیم اوسته صورتیمی ایتدی الوان

سن گلینجه باشیم اوسته جان ستانه ویرمرم جان

خوشدی طالب وصالون اولسا نقد جان الینده

 

جسمیمی ستمله اوراق ایتدیلر گل چمن تک

قانیله بویاندی زلفوم دسته دسته یاسمن تک

هانسی نوجوانون اولدی بو فنا جهاندا من تک

حجله گاهی طوی اتاقی طوی حناسی قان الینده

 

صاغ دگل آتام بولورسن چوخدی نسگلیم عموجان

گَل او گُل جمالون آخِر بیر گوروب اُلوم عموجان

دسته لر کسوب یولومی قویموری گلوم عموجان

سن قبول زحمت ایله وار سنون توان الینده

 

سسلمزدیم ای عمو گل نیلیوم کسیلدی چاره

دورهمی آلوبدی لشکر قویموری چخوم کناره

ووردولار او قدر یاره جسمیم اولدی پاره پاره

هر طرفدن اوخ آتانلار صف چکوب کمان الینده

 

سن بو گون جوانلاریله یار حضورینه گیدنده

ایستورم اولوم عم اوغلوم اکبرین یانندا منده

آز دگل یارام بدنده افتخار ایله سنده

خوشدی دسته قرمزی گل اولسا باغبان الینده

 

مرحوم شانی تبریزی

منبع مجموعه کانالهای مدح و مرثیه

موضوع: حضرت قاسم ابن حسن (ع) ,
زبان شعر و شاعر: نوحه ترکی , شانی

-------------------------------

حضرت قاسم ابن الحسن (علیه السلام)

 

آلوب بو لشکر منی آرایه اماندی ویرمز امان عموجان

تلطّفاً گل اوزون هرایه یوخومدی اوزگه گمان عموجان

 

نه قدر الیمده واریدی شمشیر مقابلیمدن قاچاردی دشمن

قلج الیمدن دوشوب نه تدبیر ایدوم دفاعه سپاهیله من

بو روبهان زمان اولوب شیر تاپوبدی فرصت اولوبدی ایمن

همین اسفلی بو ماجرایه سببدی مطلق همان عموجان

 

آتام اُلندن عمو سنیله ملال قلبیم اولوردی زایل

چوخ الفتون وار سنون منیله اودور اولوب دل دوباره مایل

یتم مرامه بو شیونیله اولام بو گونده او کامه نایل

گلم دوباره حرم سرایه سلام شاهه بیر آن عموجان

 

بدن یارالی وجود خسته نه قولدا قوّت نه تنده یارا

دوزولموش اوخلار بو سینم اوسته اولوبدی بیر گلشن دل آرا

گلن بو دسته گیدن او دسته نه رحم ایدوب نه ایدر مدارا

گورر دوشنده گوزوم هارایه سِنان و تیغ و کمان عموجان

 

گون ایستی یورقون بدن لب عطشان دوتوبدی قلبیم شرار عطشدن

بو کینه جویان بو کفر کیشان خیال ایدولّه بیزی حبشدن

اولوبدی جسمیم تمام شان شان منی خلاص ایت بو کشمکشدن

اوزون باخورسان بو ماجرایه اماندی لطف ایت امان عموجان

 

بویان طرفدن جگرده آتش اویان طرفدن قوشوندا کوشش

بویاندا واردور عجب کشاکش اویاندا واردور غریبه کوشش

گوز انتظار و گوگل مشوّش بو شرطیله با هزار پوزش

سنی چاغورّام بو گون هرایه ادب سیز ایتمه گمان عموجان

 

مرحوم شانی تبریزی

منبع مجموعه کانالهای مدح و مرثیه

موضوع: حضرت قاسم ابن حسن (ع) ,
زبان شعر و شاعر: نوحه ترکی , شانی

-------------------------------

شهرت و عزت حسینی

 

کیم حسینین درگهینده شهرت خدمت تاپار

هم بو دنیا هم او دنیاده گوزل عزّت تاپار

 

بو مقدّس آستاندا صدقیله خدمت ایدن

آند اولا بو آستانه گون به گون قیمت تاپار

 

آستانیندا حسینون سیندیران شخصیّتین

سانما شانی آزا لار سیندیقجا شخصیّت تاپار

 

خادم اولماق هر کسه ممکن دگل بو درگهه

سالنما بو توفیقی هر کس ایتمسه همّت تاپار

 

شرطی وار بو منصب پر افتخاره یتماقین

بیله بولمه بو مقامی هر بشر صورت تاپار

 

اولین شرطی بو عالی منصبین اخلاصیدور

منزلت تاپماز ریائیله گلن نکبت تاپار

 

اولمیوب بیر کس صفائیله گله نومید اولا

هاردا بیله بیر قاپی عالمده بیر ملّت تاپار

 

هیچ درگاهه قیاس اولماز حسینون درگهی

خوش اونون احوالینه بو حضرته نسبت تاپار

 

بیرده لازیمدور حسینون خادمی یکرنگ اولا

کیم بیر اوزلی گلمسه بو درگهه خفّت تاپار

 

منصب دنیایه توولانماز حسینون خادمی

خیر گورمز کیم بو شهدن چکسه ال خسرت تاپار

 

بیر ائله شان و جلالت حق بو درگاهه ویروب

کیم اوزون بو درگهه ییخسا بویوک رفعت تاپار

 

قونمیوب ذلّت توزی قونماز بو عالی درگهه

بیله فکر ائتمه حسینون خادمی ذلّت تاپار

 

چون حسینیلندی هر آزادی و آزادگی

عبد اولان آزادمرد انسان(حریّت) تاپار

 

بیر نچه یرده حسین اوز خادمین یاده سالار

بیر بو دنیاده او دم که چوخ غم و محنت تاپار

 

بیرده لطفیله گلر جان تاپشوران ساعاتیده

چون بولر انسان ائله ساعتده چوخ زحمت تاپار

 

قابض روحه دیر رحم ائت بیزه خادمدی بو

گوندن آیدین دور که عزرائیل او دم رقّت تاپار

 

بیرده اوندا که اونی ائل لر قویار قبره گیدر

تک قالارکن قبر اویی ظلمت گورر وحشت تاپار

 

وار عقیدم بیر ائله وحشتلی ساعتده حسین

خادمین غمدن قوتارسون حقّدن رخصت تاپار

 

اوندا کی گوردی ایشیقلاندیردی قبرین نور حق

قلبده وحشت گیدر اوز قبرینه الفت تاپار

 

بیرده محشرده شفاعت ایتماقا اوز خادمین

لطف اوزیله آختارار بی شبهه اول حضرت تاپار

 

اوندا کی هر کس قالار اوز قیدینه فریاد ایدر

او حقیقی خادمین اول شافع امّت تاپار

 

هر آدین خادم قویان خادم اولانماز بو سوزون

حکمتین دنیاده اهل منطق وحکمت تاپار

 

عمده شرطی بیرده تقوادور بئله بیر منصبین

اولماسا تقوی چتین بیر کس بئله رتبت تاپار

 

بوردا خوشدور (شانی) مرحومدن خوش یاد اولا

چونکه دوز خادمدی دوز خدمت ائدوب رحمت تاپار

 

مطلبین حقّین گوزل بیر طرزیله ایلوب ادا

حالینه طوبی ، گوزل خدمت گوزل اجرت تاپار

 

مرحوم شانی

منبع مجموعه کانالهای مدح و مرثیه

موضوع: حضرت امام حسین (ع) ,
زبان شعر و شاعر: نوحه ترکی , شانی

-------------------------------

حضرت ابوالفضل العباس (علیه السلام)

 

قلم ایدر گینه طرز کلامی بوردا عوض

قلم اولان قولا یعنی که آغلاماقدی غرض

 

چخوب فراتدن یوز قویدی خیمه گاهه طرف

کسوب قباقنی دوت مین نفر شریر طرف

 

چکوبدی نعره آلوب غیظیله اله شمشیر

آتاسی شیر خدا تک او پور شاه نجف

 

ایشتدی نعره سینی خیمه گاهیده بالالار

او تشنه دلّلره یوز ویردی بو سسیله شعف

 

باخوردی زینب کبری گوزی حسین یوزینه

گوروب سارالدی سولان گل کیمی او کان شرف

 

دیدی نه وار مگر عباسی ییخدیلار آتدان

چالّولا طبل بشارت گلور ترانه دف

 

بیوردی باجی سلامتدی قارداشیم امّا

قلج آلوب صولا اول قلزم هنرده صدف

 

دوشنده بیر قولی عباسون ای امام زمان

حسین بیله پوزولور یوز ویرور بو حال اسف

 

نه چکدی بولمم او دم که گلوردی سرعتیله

گوروب دایاندی آدی ذوالجناح اوزی رف رف

 

باخوب نه گوردی که یرده ایکی کسوک ال وار

تأسفیله او مظلوم ویردی بر بره کف

 

گوتوردی قولّاری بر اوپدی باغرینا باسدی

او قدر قالمادی اولسون قوای جسمی تلف

 

اوجالدی شیونی سهم و صلابتی چوخالوب

گوروب او صولتی دشمن فرار ایدوب صف صف

 

یتیشدی بیر یره گوردی یخوبلا قارداشینی

آلوبلا دوره سین اون یدّی بی حیا و شرف

 

داغتدی دشمنی گوتوردی تراب ذلّتدن

آلوب باشین دیزی اوسته ابوترابه خلف

 

پیمبر اوغلونون احوالینه او ساعتده

چکوب سس آغلادی یکسر پیمبران سلف

 

عجبدی یانمادی افلاک حسینون آهندن

که سوز اولاندا اورکده چوخ آهده تف

 

گوروب بدن دولوسی نیزه دور قلج خنجر

علاوه سانسیز اوخا سینه سی اولوبدی هدف

 

دیدی بو گلدی که خندان اولوبدی بر دسته

و یا دوشوب یره اوراق اولوبدی بر مصحف

 

چکوب کناره نچه اوخ او گل عذاریندن

یولالّا اولسا گر اطراف گلده خار و علف

 

آچوب گوزین دیدی ای کربلا سلیمانی

غلامیدیم سنه ایتدون حساب بیر آصف

 

بو حالتیمده مشرّف بیوردون ایتدون یاد

که ای باباسی هامی انبیالره اشرف

 

یوخومدی تحفۀ قابل ولی قبول ایتسن

نثار مقدموه بر حقیر جاندی بکف

 

قصور خدمتدی عفو ایله بو گون سندن

خجالت ایتدی منی بو گروه مستضعف

 

بو آرزونی ایدر (شأنی) ای شه ذیشان

اُلن زمانیده اولسون یری زمین نجف

 

مرحوم شانی

منبع مجموعه کانالهای مدح و مرثیه

موضوع: حضرت ابوالفضل العباس (ع) احوالات ,
زبان شعر و شاعر: نوحه ترکی , شانی

-------------------------------

آرزوی زیارت کربلا 

 

باشیمه دوشدی گینه شوق هوای کربلا

آتشین دلدن گلور نی تگ نوای کربلا

 

کربلا شوقی اگر چه واریدی دلده کرار

آتش حسرت سالوردی قلبیمه دائم شرار

اولمامیشدیم هیچ زمان اما بو قدری بیقرار

آلمامیشدی صبریمی الدن هوای کربلا

 

دسته دسته هی دوشور هر گونده زواری یولا

نار حسرت شعله سی آرتارگوگلده برملا

سسلرم آهسته دلدن کربلا یا کربلا

کشتی صبریم سینوب ای ناخدای کربلا

 

کربلا آدی گلن وقته گیدر دلدن توان

چشمه چشمیم اولور خط عذاریمدن روان

جلوه ایلر گنبد و صحن ابوالفضل جوان

نصب ایدوب اوردا لوا صاحب لوای کربلا

 

ای اولان هر دردمندین دردینه آدی دوا

تربت قبر شریفی عالمه خاک شفا

بو مرضدن جانه گلدیم قبریوه جانیم فدا

دردمندم آختارور دردیم دوای کربلا

 

آرزوی کربلا الدن آلوب آراممی

امر ایله عباسوه لطفیله وئرسون کاممی

دفتر زوار دربارونده یازسون ناممی

نه گوزل یردور او یر ای من فدای کربلا

 

بیر نولور بو جمعیله پائین پایوندا دوراخ

نوجوان اوغلون علی اکبره ماتم قوراخ

سس چکاخ ایوای حسین وای سسلیاخ سینه وراخ

عالی بیر لذت وئرور روحه عزای کربلا

 

یاد ایداخ شاها او وقتی قلب بی آرامیله

یوز یوزه قویدون ئوز اوغلون اکبر ناکامیله

ایله زیبا قامتیله ایله خوش اندامیله

تاپدی زینت روز عاشورا منای کربلا

 

بیرده گورسیدیم او شمع وصلوه پروانیم

قبرون اطرافین دولانام عاشق دیوانیم

دوزدی من اصل حقیقتدن ئوزوم بیگانیم

لیک لطفون اولسا اولام آشنای کربلا

 

بار الها قسمت ایله آرزومندانیله

قول سالاخ قبر حسینه دیده گریانیله

باشلیاخ بیر شعر و نوحه ناله و افغانیله

باشلاسون شوریله شانی ماجرای کربلا

 

مرحوم شانی

منبع مجموعه کانالهای مدح و مرثیه

موضوع: در آرزوی زیارت ,
زبان شعر و شاعر: نوحه ترکی , شانی

-------------------------------

 شاهزاده حضرت علی اکبر (علیه السلام)

 

من بوگون جانانه قربانم خداحافظ آنا

فرصتیم یوخدور شتابانم خداحافظ آنا

 

گرچه اولدن آنا منظور لطف شاهدیم

لیک شاهون اولدی بو لطفی او لطفه شاهدیم

ایستدی شهده نجه که ایستمیشدی شاهدیم

فدیۀ مقبول جانانم خداحافظ آنا

 

تنگ اولوب بو طایر روحه بدن مانند فخ

سسلنور الْعشق اودور تار وجودیم نخ به نخ

جان متاعیم مورتک فرق ایتمشم پای ملخ

من بو فخر اوسته سلیمانم خداحافظ آنا

 

وارثم من آدم و نوح و کلیمه وارثه

یادگارم خامسه نور دو عینم ثالثه

یوخدی باکیم اشقیادن یوز ویره هر حادثه

پور پور شیر یزدانم خداحافظ آنا

 

گلماقا مانع اولوردی شرم شاه تشنه‌لب

گلمسم اما گینه گوردوم اولور ترک ادب

آخرین بو زحمته اولدی بو بیرنکته سبب

عرض ایدم مأذون میدانم خداحافظ آنا

 

ابْر فرقت گیزلدنده برج وصلین بدرینی

دولدورور اندوهیله آشفته عاشق صدرینی

یاخشی ساعتدور آنا بول بو بیر آنون قدرینی

خیمه‌ده مهمان بو بیر آنم خداحافظ آنا

 

من بؤ اُون ‌سگیز ایل عمرومده تمام عهدیمی

صرف راه عشق ایتدیم جمله جد و جهدیمی

ایمدی لازمدور ویرم باشیله باشه عهدیمی

گورموسن پابند پیمانم خداحافظ آنا

 

فرقتیم ایلوب باجیم صغرانی بُلم دلفکار

لوح دلده نقشۀ وصلی ایدر دائم نگار

قانلو بیر کوینک آپار صغرایه مندن یادگار

مصر عشقه ماه کنعانم خداحافظ آنا

 

بیرکسون یوخدور بو چولده واقفم بو مطلبه

غربتون سالمیش علاوه جانیمی تاب و تبه

من سنی تاپشورموشام عمم وفالی زینبه

چون اوزوم جانانه مهمانم خداحافظ آنا

 

من ویریم سن بسلین اعضانی نوک خنجره

سنده فخر ایله محبت عالمینده هاجره

چوخ سوسوزدور خنجر منقذ بو نازک حنجره

من اوزوم هر چند عطشانم خداحافظ آنا

 

یا گیدوب تک خیمه‌ده اگلش انیس محنت اول

یا گیدوب قاسم آناسیله اوتور هم‌صحبت اول

نه باش آچ نه زلف یول نه غصه‌دن بیطاقت اول

نه دی مجنون بیابانم خداحافظ آنا

 

گورموسن یالقوز قالوب بو پادشاه کم سپاه

سسلنور هل من مُعین هر دم چکر آه اوسته آه

حسرتیله صاق صولا ایلر غریبانه نگاه

من اودور بیله پریشانم خداحافظ آنا

 

دوندرور درد فراقیم تیره شامه گوندوزون

نیزه‌ده گیتسه باشیم هریانه سنده گل اوزون

بو اوزون یولاردا مندن بیر گجه کسمه گوزون

گورنه رخشان ماه تابانم خداحافظ آنا

 

یوخ بوگیتماقدان رضای حقدن اوزگه غرض

ایسته‌سن اُون ‌سگیز ایلکی زحمته سنده عوض

صبره مُعتاد اُول منی میداندا گورسن الْغرض

زخمدارم قانه غلطانم خداحافظ آنا

 

امر ایدوب جدیم که ایتمون مُستمندی ناامید

سائلی محروم قیلماز هیچ شقی و هیچ سعید

من نیجه حق بخششندن شأنیه ویرموم نوید

عرض ایدر محتاج احسانم خداحافظ آنا

 

مرحوم شانی

منبع مجموعه کانالهای مدح و مرثیه

موضوع: حضرت علی اکبر (ع) زبانحال ,
زبان شعر و شاعر: نوحه ترکی , شانی

-------------------------------

 شاهزاده حضرت علی اکبر (علیه السلام)

 

آه او ساعتدن سلام آخِر اکبردن اوجالدی

خیمه ده مظلوم امامون صورتی سولدی سارالدی

 

اضطراب و هولیله یوز قویدی دشت کار زاره

تا یِتوردی شه اوزین شبه رسول تاج داره

نوجوان اوغلون گوروب توپراقلار اوسته پاره پاره

اختیار اَلدن گیدوب آتدام اوزین توپراقه سالدی

 

عمریم اولسا یوز مین ایل بو بیر سوز اوسته

ذوالجناح اوستَن عزیز فاطمه دوشدی یوز اوسته

اولمادی طاقت دورا نِچّه قدم گیتدی دیز اوسته

یاندیروب زهرانی هم پیغمبرین آرامین آلدی

 

باشلادی شه ناله، بلبل تک گل خندانی گورجک

سویلدی نه تیز چخوب باتدون علی صبح اولدوزی تک

همّ و غمدن سَن خلاص اولدون اوزون، قویدون منی تک

بیر بیله دشمن آرا بی کس آنان بو چولده قالدی

 

بو مصیبتده دایان چخما قفسدن اول دل آرام

شه گوروب جان اوسته دور اول نازنین شوخ دلارام

باشینی باسدی اورک باشینه تا اولسون دل آرام

دل که آرام اولمادی آرتوب غمی دردی چوخالدی

 

خم قدین اَگدی قویوب صورت علینون صورتینه

نقل ایدر راوی باخاردیم من امامون حالتینه

گوردوم اولدی بو عمل افزوده شاهون رقّتینه

قان محاسندن آخور، گوز جامی هِی دولدی بوشالدی

 

سرخوش ایتدی شهریاری شربت هجران شهدی

بی نتیجه اولمادی عشق عالمینده جدّ و جهدی

داغ اکبر قدّینی اگدی دوزلدی نقص عهدی

مقصدی گلدی اَله آئینه ی قلبی صافالدی

 

شرمگین اولمور عجب چرخ جفاجو اوز ایشیندن

آه یازهرا امان بو روزگارون گردشیندن

سَنکه گوردون توپراقی قانی نجه سیلدی دیشیندن

اسگلوب نه غصّه دلدن، نه غم و محنت آزالدی

 

شه سَسین آلدی او شهزاده اُلومدن بیر یانشدی

جسمینه بیر تازه جان گَلدی گوروب تا سَس تانشدی

غنچه وَش سولموش لبین ناگاه بیر آچدی دانشدی

باغبان یاندی چکوب بلبل نوا گُللر سارالدی

 

سویلدی مندن سلام ایت لیلی بی اقربایه

ویر تسلّی گَلمسون بو غمده فریاد و نوایه

قاتلیم وورسا یارالی باشیمی نوک جدایه

سربلند ایلر حرملرده آنامدا باش اوجالدی

 

بولمورم نه حالیدی شه آغلیوب دشمن گُلردی

بیر خدا عالِمدی بیرده زینب کبری بولردی

گلمسِیدی قارداشی اکبر باشی اوسته اُلردی

گلدی امّا شیشه ی صبر حسینی داشه چالدی

 

عالم معناده زهرا آغلادی بو حاله یاندی

غیرت ا... عصمت اللهی گوروب حالی دولاندی

اکبرین یاددان چخاتدی داغ هجرین سهل ساندی

دوردی فوراً اوز عباسین زینبین باشینه سالدی

 

بولمورم من قالدی اکبردن صورا لیلا نه حاله

خیمه ده یا قتلگهده تاپدی نعشین چکدی ناله

گورمسون ا... آنارلار تا جهان وار لا محاله

گوردی لیلا گون گوزینده تیره تار اولدی قرالدی

 

نظم میداننده (شانی) آز دولاندور رخشِ طبعون

شکر ایزد آرتروب قلبونده نورون تخش طبعون

هر کسون بیر قسمی بو اولدی سنونده بخش طبعون

حالینی بو نوحه نین آنلار اولار که اهل حالدی

 

 مرحوم شانی

منبع مجموعه کانالهای مدح و مرثیه

موضوع: حضرت علی اکبر (ع) احوالات ,
زبان شعر و شاعر: نوحه ترکی , شانی

-------------------------------

 حضرت ابوالفضل عباس (علیه السلام) 

 

بو مشکه دگن اوخ منی مایوس ایلدی چوخ

ای کاش دگِیدی گوزیمه مشکه دگن اوخ

 

بستِیدی حیاتیم بو سویا جاندان اوساندیم

سو مشکیمه اوخ دگدی اوزوم جانه دایاندیم

اصغر عطشه، من شرر خجلته یاندیم

ای کاش دگِیدی گوزیمه مشکه دگن اوخ

 

من جان به کفم، وقفیدی بو جان شه دینه

یوخ باکیم اُلومدن، ولی ای لشکر کینه

ویرمیشدی منه بو قوروموش مشکی سکینه

ای کاش دگِیدی گوزیمه مشکه دگن اوخ

 

گوردوم عطشیندن سارالوب صورت اصغر

پوزدی پوزولان حالتیمی حالت اصغر

آز یاره وورون بسدی منه خجلت اصغر

ای کاش دگِیدی گوزیمه مشکه دگن اوخ

 

چون اهل وفا کوی وفاده منی یوخلار

تصدیق ویروب احسن ایدر عشقیمه چوخلار

بیر گُلشن فردوس ایلیوب سینمی اوخلار

ای کاش دگِیدی گوزیمه مشکه دگن اوخ

 

اوخ جسمیمه مایلدی منیم، من اونا مایل

بو اوخ نیه بس گیتدی خطا، اولمادی حایل

مشک اوسته دگوب، زحمتیمی ایلدی زایل

ای کاش دگِیدی گوزیمه مشکه دگن اوخ

 

جان ویرماقا جانانه بو گون تا هوسیم وار

داد ایتسم حسینیم کیمی بیر دادرسیم وار

عجز ایلمرم دشمنیمه تا نفسیم وار

ای کاش دگِیدی گوزیمه مشکه دگن اوخ

 

لایق دگل هر چند بو جان بو باش حسینه

امّا منی ایتمیشدی آتام یولداش حسینه

من نوکرم، هرگز دگلم قارداش حسینه

ای کاش دگِیدی گوزیمه مشکه دگن اوخ

 

چوخ سعی و تلاش ایلدیم آخِر اوز ایشیمده

قیردیم نه قَدَر دشمنی بو بیر یوریشیمده

قول گیتدی، دیردیم آپاریم مشکی دیشیمده

ای کاش دگِیدی گوزیمه مشکه دگن اوخ

 

تا سو اَله گَلدی غم و دردیم آزالشدی

مین همّتیمون ضدّینه بیر تیر چالشدی

سو آخدی، گوزوم باخدی، اورک یاندی، آلشدی

ای کاش دگِیدی گوزیمه مشکه دگن اوخ

 

سو وعده سینه چون که دیمیشدیم گوزوم اوسته

تا سو واریدی من واریدیم اوز سوزوم اوسته

قالسِیدی سو قولسوز سورونَردیم یوزوم اوسته

ای کاش دگِیدی گوزیمه مشکه دگن اوخ

 

 مین جانیم اولا ویرماقا بیر ذرّه یوخ اکراه

قول گیتدی، باشیم قالدی، بودور علّت دلخواه

لازمدی اولا باشدا نثارِ قدمِ شاه

ای کاش دگِیدی گوزیمه مشکه دگن اوخ

 

 بُلّم یِتَرَم آخِرِ عمریمده مرامه

لطفیله گَلور شه اوزی دیدار غلامه

خوشدور بو باشی اوندا قویام پای امامه

ای کاش دگِیدی گوزیمه مشکه دگن اوخ

 

 هر چند چوخالدوقجا یارا خجلت آزالماز

امّا آزالور اوخ چوخی مندن صورا قالماز

دشمنده قالان اوخ مگر آرامیمی آلماز

ای کاش دگِیدی گوزیمه مشکه دگن اوخ

 

 چوخ سعی ایلدیم من بو سویون حفظینه مطلق

شاهد سوزیمه بو کَسیلن اَلدی، بو بیرق

مقصود دله اولمادیم افسوس موفّق

ای کاش دگِیدی گوزیمه مشکه دگن اوخ

 

 (شانی)اوزیوی صدقیله بو درگهه سالدون

مقصود دلون حضرت عبّاسیدن آلدون

صد حیف بو حسرتده او سرور کیمی قالدون

ای کاش دگِیدی گوزیمه مشکه دگن اوخ

 

مرحوم شانی

منبع مجموعه کانالهای مدح و مرثیه

موضوع: حضرت ابوالفضل العباس (ع) زبانحال ,
زبان شعر و شاعر: نوحه ترکی , شانی

-------------------------------

زبانحال حضرت امام حسین (علیه السلام) در شهادت حضرت علی اصغر (علیه السلام)

 

ای لشگر کین بوشیرخواره ذریه ختم انبیادور

اودتک بدنی دوتوب شراره بوتشنه لق آتشی بلادور

 

گورموسوزایا گروه کینه  بوطفل نجه یانورعطشدن 

ذریه دی ختم مرسلینه  نی اهل فرنگدن حبش دن 

آخربورضیع دل حزینه بیرهوشه گلوب آیلساغشدن

قطعاً گلی نالیه دوباره نی تک قوری نائی پر نوادور

 

هرگوز گوره بوفسرده حالین مطلق اورگی یانار باحاله 

گل تک سارادوب عطش جمالین بلبل نجه باتماسون ملاله 

بوبال شکسته نطق لالین عمه باجیسی چکله ناله 

چون گل سولا پیشه هزاره شیوندی فغاندی آه و وادور

 

یازدوز که نچه رساله نامه ایتدوز منی بودیاره دعوت 

بس نولدی سبب بواحترامه آیابودی راه ورسم حرمت 

بوطفل صغیر وتشنه کامه سو ویرمه ما قوزدا وار نه علت 

دوشموش نفسی باخون شماره آثار مماتی برملا دور

 

گرمغرب ومشرق جهانی ای قوم تمام ایله سوز سیر

بیردختر مصطفانشانی دنیاده فقط منم دگل غیر 

دنیادکی ملک جاودانی شر اهلینه یتمز عاقبت خیر 

ناچاردی یوخ بوامره چاره هربیر عمله عوض جزادور

 

بیر امردی بو جهاندا معلوم بوسوادمرین ندور گناهی 

نه ظالم اولان قالور نه مظلوم نه یرده یاتار ستمکش آهی 

جان تشنه ویره بو ماهپاره انصاف ایلیون گورون روادور

 

تاپشوردی سیزه رسول طاها اولادینی بیرده حق کلامین 

ایتدوز هرایکی جهتدن اجرا تمرین اورسول لاینامین 

فرمایش مصطفانون آیا ساخلالا بونوعی احترامین 

اولاد رسول تاجداره عالمده بو ظلملر سزادور

 

ازبسکه یانقلی دل دیدی شاه یاندی او اسفلی حاله لشگر

قالموب اوقدر او قوم گمراه مطلق تاپا راه حقه رهبر 

افسوس جفای چرخدن آه ای دادگر و روف وداور 

دشمنکه یانوب اوشهریاره شیعه اوزین اولدوره بجادور

 

سعداوغلی گوروبکه اشقیاده وار اوزگه بیر انقالاب وشورش

گیتسون هاموسی یاخوندی باده ایتمشدی نقدر سعی وکوشش 

بیرقصدایلدی اونحس اراده سالدی دل مصطفایه سوزش 

ایتدی اوخ آتانلارا نظاره بیر حرمله گوردی بیحیادور

 

نه ظلم ایلدی اوظالم شوم (شأنی) دیمه حرمله جفاسین

نه حاله قالوب اوطفل معصوم نه حالته سالدی اوز آتاسین 

اوتاندی بیوردی شاه مظلوم گل باغلا باجی بو اوخ یاراسین 

سال باشیوه قاره اوسته قاره توک اشگوی موسم عزادور

 

آهسته گل اوپ سولان یوزیندن قویما آتاسی بو حالی گورسون 

سیل قانی تلیندن اوز گوزیندن گوسترمه بورنگ آلی گورسون 

چخسون یری وار رباب اوزیندن اوز سود امرین یارالی گورسون 

توکسون گوزی خون دل عذاره وار حقی اورک یانور آنادور

 

من فکر تمام ماسوانی عباسیم اولنده باشدان آتدیم 

تا اوخلادیلار بونا توانی مقصوده یتوب مرامه چاتدیم 

حلقندن او تیر جانستانی الله بولوری نجه چیخاتدیم 

گور گوش بگوش اولوبدی پاره بیرپارچا هامی بوغاز یارادور

 

مرحوم شانی

منبع مجموعه کانالهای مدح و مرثیه

موضوع: حضرت علی اصغر (ع) زبانحال ,
زبان شعر و شاعر: نوحه ترکی , شانی